ᓴᓪᓕᕐᒥ

ᓴᓪᓕᖅ ᐱᔾᔪᑎᒋᓪᓗᒍ

ᓴᓪᓕᖅ ᓴᓪᓖᑦ ᐅᐊᖕᓇᖓᓃᑉᐳᖅ ᑕᓯᐅᔭᕐᔪᐊᒥ ᓄᓇᙳᐊᑎᒍᑦ ᐃᓂᖃᖅᑐᖅ N64 08' W83 10'−ᒥ. ᐃᓄᒃᑎᑐᑦ ᑕᐃᒎᓯᖓ ᓴᓪᓕᖅ, ᑐᑭᖃᖅᐳᖅ "ᕿᑭᖅᑕᖅ ᖃᐃᕋᑦᑐᖅ ᓄᓇᕕᐅᑉ ᓵᖓᓂ" (ᐃᓄᒃᑎᑐᑦ ᐊᑎᖓ ᕿᑭᖅᑕᕐᒧᑦ ᐊᒻᒪ ᓄᓇᓕᖕᓄᑦ ᑖᔅᓱᒥᖓᔅᓴᐃᓐᓇᖅ ᑕᐃᒎᓯᓖᒃ). ᓴᓪᓕᖅ ᕿᑎᐊᓃᐸᓗᖃᑕᐅᔪᖅ ᓄᓇᙳᐊᖅᑎᒍᑦ ᓇᐅᔮᑐᑦ (330 ᑭᓚᒦᑕᒥᒃ ᐅᖓᓯᒃᑎᒋᓪᓗᓂ) ᐅᐊᖕᓇᖓᓂ, ᑭᙵᐃᑦ ᑲᓇᖕᓇᖓᓂ, ᐃᕗᔨᕕᒃ ᑯᐸᐃᖕ ᓂᒋᖅᐸᓯᐊᓂ ᐊᒻᒪ ᐃᒡᓗᓕᒑᕐᔪᒃ ᐊᑭᓐᓇᖓᓂ. ᐊᑎᖓ ᓴᓪᓕᖅ ᓴᖅᑭᓐᓂᑰᓪᓗᓂ ᐊᐅᐸᔮᖅᑐᓂᒃ ᐅᔭᕋᙳᖅᓯᒪᔪᓂᒃ ᐱᑕᖃᐅᕐᓂᖓᓄᑦ ᓄᓇᓕᖕᓂ ᐃᒫᓂ.

ᐃᓄᐃᑦ ᓴᓪᓕᕐᒥᐅᑕᑦ ᐃᓕᖅᑯᓯᖃᖃᑎᒌᙱᑦᑐᓂᒃ ᓄᓇᖃᕐᕕᐅᕗᖅ ᑭᕙᓪᓕᕐᒥ ᓄᓇᕕᖕᒥᙶᖅᑐᓂᒃ, ᕿᑭᖅᑖᓗᖕᒥᙶᖅᑐᓂᒃ ᐊᒻᒪ ᑯᐸᐃᒃ ᑕᕐᕋᖓᓂᙶᖅᑐᓂᒃ. ᓴᓪᓕᖅ ᓄᓇᓕᐅᕗᖅ ᐃᓕᖅᑯᓯᕐᒥᓂᒃ ᓱᓕ ᐊᑐᓪᓚᕆᒃᑐᓂᒃ ᐊᒻᒪ ᐃᓄᒃᑎᑐᑦ ᐅᖃᐅᓯᕐᖓᐅᑎᒥᖕᓂ ᐅᖃᓪᓚᓲᓂᒃ ᐊᐃᓯᒪᑎᓪᓗᒋᑦ. ᓄᓇᓖᑦ ᐋᖓᔮᕐᓇᖅᑐᖃᙱᑦᑐᖅ, ᐃᒪᓐᓇ ᑐᑭᖃᖅᖢᓂ ᐃᒥᐊᓗᖃᕆᐊᖃᙱᑦᑐᑦ ᐊᒻᒪ ᐃᒥᐊᓗᖕᒥ ᐃᒥᕆᐊᖃᙱᑦᑐᑦ. ᐃᓄᐃᑦ ᐅᒃᐱᕈᓱᖕᒪᑕ ᑕᐃᒪᓐᓇ ᐊᑐᐊᒐᖃᖅᐸᑕ ᐃᑲᔫᑎᖃᕈᓐᓇᕐᒪᑦ ᓄᓇᓖᑦ ᓴᙱᔫᔪᓐᓇᕐᓂᖏᓐᓂᒃ.

ᐱᓕᕆᐊᒃᑯᒥᓇᖅᖢᑎᒃ ᐱᔾᔪᑕᐅᔪᑦ ᓴᓪᓕᕐᒥ ᐊᒃᑐᐊᓂᖃᖅᐳᑦ ᐃᓄᖏᓐᓄᑦ ᐃᑦᑕᕐᓂᓴᓕᕆᔨᒃᑯᓐᓂ ᑕᐃᔭᐅᓲᑦ ᓴᓪᓕᕐᒥᐅᑦ (ᐃᓄᐃᓪᓕ ᐅᖃᐅᓯᖃᓲᖑᓪᓗᑎᒃ ᑖᒃᑯᓂᖓ ᑐᓂᐅᓂᕋᐃᓪᓗᑎᒃ (ᑐᓂᔾᔪᐊᑦ)). ᐅᑯᐊ ᐅᖓᓯᒃᑐᕐᒥᐅᑕᑦ ᐃᓄᐃᑦ ᓯᕗᕚᑦᑎᓐᓂᙶᖅᑐᓪᓗ ᑐᓂᔾᔪᐊᓂᙶᖅᑐᓪᓗ ᑲᑎᖅᓱᒐᐅᓇᓱᒋᔭᐅᓪᓗᑎᒃ, ᓯᕗᕚᖅᐳᑦ ᓱᓕ ᓇᐅᙳᓚᐅᙱᑎᓪᓗᒋᑦ ᐱᑕᖃᕈᓐᓃᖃᑕᐅᓚᐅᖅᓯᒪᔪᑦ. ᓴᓪᓕᕐᒥᐅᑦ ᐊᓯᒥᓂᒃ ᐃᓄᖕᓃᖃᑕᐅᕙᓚᐅᖅᓯᒪᙱᑦᑐᑦ ᐃᓄᑑᒐᔪᓚᐅᖅᑐᑦ, ᑭᓯᐊᓂ ᑭᖑᓂᐊᒍᑦ ᓄᖑᑕᐅᓚᐅᖅᓯᒪᓪᓗᑎᒃ ᐋᓐᓂᐊᕐᓇᒧᑦ ᐊᐃᑦᑐᕐᓗᐃᔪᓐᓇᖅᑐᒧᑦ ᐃᓄᓕᒫᓄᑦ, ᑕᕆᐅᑉ ᐊᑭᐊᓂᙶᖅᑐᓂᒃ ᐅᒥᐊᕐᔪᐊᒃᑰᖅᑐᓂᒃ ᐋᓐᓂᐊᓕᖕᓂ ᓯᐊᒻᒪᒡᕕᐅᓚᐅᖅᓯᒪᔪᑦ 1902-ᖑᑎᓪᓗᒍ. ᓱᓕ ᒫᓐᓇᒧᑦ ᑎᑭᖦᖢᒍ ᓄᓇᖃᕐᕕᕕᓂᖏᑦ ᑕᑯᔭᒃᓴᐅᔪᑦ ᐃᓂᖃᐅᖅᖢᑎᒃ ᐊᑕᐅᓯᐅᙱᑦᑐᒥᒃ ᕿᑭᖅᑕᕐᒥ. ᖁᑦᑎᖕᓂᖅᓴᓄᑦ ᐃᓕᓐᓂᐊᕐᕕᒻᒥ ᐃᓕᓐᓂᐊᖅᑎᑦ ᑕᐅᕗᙵᖅᑎᑕᐅᒐᔪᒃᑐᑦ ᐅᐱᕐᖔᒃᑯᑦ Native Point−ᒥ, ᐊᖏᓂᖅᐹᖑᓪᓗᓂ ᓴᓪᓕᕐᒥᐅᓂᒃ ᓄᓇᒋᔭᐅᓚᐅᖅᓯᒪᔪᖅ.

ᓴᓪᓕᖅ ᓯᕗᓪᓕᖅᐹᒥ ᐅᐸᒃᑕᐅᓚᐅᖅᓯᒪᕗᖅ ᓇᕈᓇᒃᑎᒧᑦ ᑖᒪᔅ ᐸᑕᓐ−ᒧᑦ 1604-ᖑᑎᓪᓗᒍ. ᐊᑦᑎᓚᐅᖅᓯᒪᔭᖓ ᐱᔾᔪᑎᒋᓪᓗᓂᐅᒃ ᐃᑲᔪᖅᑎᒋᓚᐅᖅᑕᖓ, ᓴᓪᓕᕐᒥ ᐊᖓᔪᖅᑳᕆᔭᐅᓚᐅᖅᓯᒪᔪᖅ, ᐃᑲᔪᓚᐅᖅᓯᒪᖕᒪᑦ ᑕᓪᓗᕈᑎᐅᑉ ᐃᒫᒃᑯᑦ ᐃᑳᕋᓱᒃᑎᓪᓗᒍ. 1924-ᒥ ᓂᐅᕕᖅᑎᒃᑯᑦ ᓅᑦᑎᔪᒪᓕᓚᐅᖅᓯᒪᕗᑦ ᓂᐅᕕᕐᕕᖕᒥᓂ ᐊᒃᐸᑑᕐᔪᐊᕐᒥ ᓴᓪᓕᕐᒧᑦ ᓂᕈᐊᕆᔭᐅᓚᐅᖅᓯᒪᓪᓗᓂᓗ ᒫᓐᓇ ᐃᓂᒋᔭᖓ ᓴᓪᓕᖅ ᐃᓂᒋᖁᔭᐅᓪᓗᓂ. ᑕᐃᒪᐃᓪᓗᐊᙱᒃᑲᓗᐊᖅᖢᓂ, ᓂᐅᕕᕐᕕᖕᒥ ᐊᖓᔪᖅᑳᖓ ᐃᒡᓗᓕᒑᕐᔪᖕᒥ ᓅᑦᑐᒪᓚᐅᖅᓯᒪᖕᒥᖕᒪᑦ ᓴᓪᓕᕐᒧᑦ ᑖᓐᓇᔅᓴᐃᓐᓇᕐᓗ ᓂᕈᐊᕆᔭᐅᔪᖅ ᓂᕈᐊᕆᓚᐅᖅᓯᒪᒋᓪᓗᓂᐅᒃ. ᖃᓄᑐᐃᓐᓇᑦᑎᐊᖅ ᑐᓴᕋᓱᖃᑦᑕᐅᑎᙱᑦᑎᐊᖅᖢᑎᒃ ᑖᒃᑯᐊ ᒪᕐᕉᒃ ᐱᓕᕆᔩᑦ ᐊᑕᐅᑦᑎᒃᑯᑦ ᑎᑭᓚᐅᖅᓯᒪᕗᑦ ᑕᕝᕗᖓᔅᓴᐃᓐᓇᖅ ᐅᓪᓘᖕᓂ ᖃᓂᒋᒃᑑᖕᓂ.

ᐊᐅᐸᓗᒃᑐᓅᖅᑐᓄᑦ ᐊᒻᒪ ᓴᓐᓂᖓᔪᓕᖕᒥᐅᑕᓄᑦ ᑐᒃᓯᐊᕐᕖᑦ ᓴᓇᔭᐅᓚᐅᖅᓯᒪᓪᓗᑎᒃ ᖃᔅᓯᑲᓪᓚᑦ ᐅᑭᐅᑦ ᐊᓂᒍᖅᑎᓪᓗᒋᑦ ᓂᐅᕕᕐᕕᓕᐅᖅᓯᒫᓂᓕᖅᑎᓪᓗᒋᑦ. ᐃᓄᐃᑦ ᕿᑭᖅᑖᓗᖕᒥᙶᖅᑐᑦ ᐊᒻᒪ ᑯᐸᐃᖕᒥᙶᖅᑐᑦ ᐊᐅᐸᓗᒃᑐᓅᖅᖢᑎᒃ ᐅᒃᐱᕐᓂᖃᓚᐅᖅᐳᑦ ᑕᐃᒃᑯᐊᓗ ᓄᓇᕕᖕᒥᐅᑕᑦ ᓴᓐᓂᖓᔪᓕᖕᒥᐅᑕᐅᓪᓗᑎᒃ.

ᒥᐊᓕᒐᕐᒥ ᐅᓇᑕᖅᑐᒃᓴᑦ ᑐᖅᑲᖅᑕᕐᕕᓕᐅᓚᐅᖅᓯᒪᕗᑦ ᓴᓪᓕᕐᒥ ᐅᓇᑕᕕᒡᔪᐊᕐᓇᐅᑎᓪᓗᒍ ᑐᒡᓕᐊᓂ ᐃᓚᒋᔭᐅᓪᓗᓂ ᐱᓕᕆᐊᕆᔭᖓᓐᓂᒃ Crimson Route-ᒥ. ᐸᕐᓇᒍᑕᐅᓚᐅᖅᓯᒪᔪᖅ ᐅᕙᙵᑦᑎᐊᑯᓗᒃ ᖃᖓᑦᑕᓲᓄᑦ/ᒥᓲᓄᑦ ᖃᖓᑦᑕᓲᓂᒃ ᑕᕆᐅᑉ ᐊᑭᐊᓄᑦ ᐊᖅᑯᓵᕐᓗᑎᒃ ᑰᒡᔪᐊᕌᓗᒃᑯᑦ, ᓴᓪᓕᒃᑯᑦ, ᐃᖃᓗᒃᑎᒍᑦ, ᑲᓛᖦᖡᑦ ᓄᓈᓄᑦ ᐊᒻᒪ Iceland-ᑯᑦ.             ᑐᖅᑲᖅᑕᕐᕕᒃ ᓴᓇᔭᐅᓚᐅᖅᓯᒪᓪᓗᓂ 11 ᑭᓚᒦᑕᓂᒃ ᐅᖓᓯᒃᑎᒋᓪᓗᓂ ᓂᐅᕕᕐᕕᒃᑯᓐᓄᑦ ᑭᓯᐊᓂᓕ ᐊᑐᖅᑕᐅᓗᐊᓚᐅᖅᓯᒪᙱᑦᑐᖅ ᐅᓇᑕᕕᒡᔪᐊᖅᑎᓪᓗᒋᑦ. ᐊᑐᖅᑕᐅᓚᐅᖅᓯᒪᔪᕐᓕ ᐱᖁᑎᕐᔪᐊᓄᑦ ᐊᑐᖅᑕᐅᔪᓐᓃᖅᑐᓄᑦ ᐃᒋᐅᖅᑲᐃᕝᕕᒋᔭᐅᓪᓗᓂ ᐅᓇᑕᕕᒡᔪᐊᕐᓇᐅᑎᓪᓗᒍ ᓴᓇᔭᐅᑎᓪᓗᒋᑦ ᓈᓚᒡᕖᑦ ᐅᑭᐅᖅᑕᖅᑐᒥ ᖁᑦᑎᖕᓂᖅᓴᒥ. ᑭᓱᕈᓘᔭᑦ ᐅᒥᐊᕐᔪᐊᒃᑰᖅᑎᑕᐅᕙᒃᖢᑎᒃ ᓴᓪᓕᕐᒧᑦ ᖃᖓᑕᓲᒃᑯᓪᓗ ᐊᐅᓪᓚᖅᑎᑕᐅᕙᒃᖢᑎᒃ ᓲᕐᓗ ᑰᒑᕐᔪᖕᒧᑦ, ᐊᐅᔭᐅᓕᕋᓗᐊᕌᖓᑦ ᓯᑯᖃᐃᓐᓇᖃᑦᑕᓚᐅᕐᓂᖓᓄᑦ. ᖃᔅᓯᑲᓪᓛᓗᐃᑦ ᐃᓄᐃᑦ ᓱᓕ ᐃᓅᓯᖃᓚᐅᖅᑐᑦ ᓄᒃᑕᖅᐸᒃᖢᑎᒃ ᕿᑭᖅᑖᓘᑉ ᐊᕙᑖᓂ 1950−ᙳᕋᓱᖕᓂᖓᓄᑦ ᐃᓕᓐᓂᐊᕆᐊᕐᕕᐅᕙᓚᐅᖅᓯᒪᔪᖅ ᓴᓇᔭᐅᓚᐅᖅᓯᒪᓪᓗᓂ ᓂᐅᕕᕐᕕᐅᑉ ᖃᓂᒋᔮᒍᑦ.                  ᐅᑭᐅᑦ 50 ᐊᓂᒍᖅᑐᓂᒃ ᑕᑯᓯᒪᓕᖅᑐᒍᑦ ᓄᓇᓕᒃ ᐱᕈᖅᐹᓪᓕᖅᓯᒪᓂᖓᓂᒃ ᓱᒃᑲᓴᖅᑐᒥᒃ ᐃᒡᓗᓕᐅᖅᐸᓪᓕᐊᑐᐃᓐᓇᖅᖢᑎᒡᓗ ᐱᔨᑦᑎᕋᐅᑎᓪᓗ ᐱᕚᓪᓕᖅᑎᑕᐅᕐᔪᐊᖅᓯᒪᓕᖅᖢᑎᒃ. ᓄᓇᕗᑖᓚᐅᖅᑎᓪᓗᑕ 1999−ᒥ ᖃᓄᕈᓘᔮᓗᒃ ᐊᓯᔾᔨᖅᓯᒪᓕᖅᑐᑦ ᓲᕐᓗ ᓇᖕᒥᓂᖅ ᐊᐅᓚᑦᑎᔪᓐᓇᖅᓯᓪᓗᑎᒃ ᐃᓄᐃᑦ.

ᐃᓄᒋᐊᖕᓂᖏᑦ: 1,043

ᖃᐅᔨᒋᐊᕐᕕᒃᓴᖅ

ᐃᕐᖐᓈᖅᑕᐅᑦ: @email
ᐅᖄᓚᐅᑎ: 867-925-8867
ᓱᒃᑲᔪᒃᑯᑦ: 867-925-8233
ᐃᑭᐊᖅᑭᕕᒃ: www.coralharbour.ca