ᐊᐅᓱᐃᑦᑐᕐᒥ

ᐊᐅᓱᐃᑦᑐᖅ ᐱᔾᔪᑎᒋᓪᓗᒍ

ᐊᐅᓱᐃᑦᑐᖅ ᑲᓇᑕᒥ ᐅᑭᐅᖅᑕᖅᑐᒦᓪᓚᕆᒃᐳᖅ ᐃᓂᖃᖅᖢᓂ ᓄᓇᙳᐊᑎᒍᑦ ᒫᓂ N76º 25' W 82º 54',.  ᐃᓂᖃᖅᑐᖅ ᐊᐅᓱᐃᑦᑑᑉ ᕿᑭᖅᑖᓗᐊᑕ ᑭᑎᖔᖓᓂ, ᐅᔭᐅᒪᑦᑎᐊᖅᖢᓂ ᐊᐅᓱᐃᑦᑑᑉ ᐃᒪᕕᖓᓐᓄᑦ. ᐃᓄᒃᑎᑐᑦ ᐊᑎᖓ, ᐊᐅᔪᐃᑦᑐᖅ, ᑐᑭᖃᖅᐳᖅ "ᓄᓇ ᐊᐅᒍᓐᓇᙱᑦᑐᖅ." ᓄᓇᓖᑦ ᐃᓂᖃᖅᑐᑦ 600 ᒦᑕᒥᒃ ᐳᖅᑐᑎᒋᔪᓂᒃ ᖃᖅᑲᓕᖕᒥ, 1,544 ᑭᓚᒦᑕᓂ ᐅᖓᓯᒃᑎᒋᓪᓗᓂ ᓄᓇᕐᔪᐊᑉ ᑲᔾᔨᖓᓄᑦ.

ᐊᐅᓱᐃᑦᑐᕐᒥ ᖃᖅᑲᖓ 1953-ᒥ ᑐᙵᕕᒋᔭᐅᓕᓚᐅᖅᓯᒪᕗᖅ ᑲᓇᑕᒥ ᒐᕙᒪᒃᑯᓐᓂ ᖃᑕᙳᑎᒌᑦ ᐱᖓᓲᓕᖅᑲᖓᔪᑦ ᓄᓇᓖᑦ ᓄᓇᒋᙱᑕᒥᓄᑦ ᓄᓇᑖᖅᑎᑕᐅᓪᓗᑎᒃ Port Harrison-ᒥ (ᒫᓐᓇ ᑕᐃᒎᓯᓕᒃ ᐃᓄᒃᔪᐊᖅ), ᑯᐸᐃᒃ. ᐱᖃᑎᖃᓚᐅᖅᑐᑦ ᒥᑦᑎᒪᑕᓕᖕᒥᐅᑕᓂᒃ ᐃᓚᒌᓂᒃ ᖁᑦᑎᒃᑐᒥᐅᑕᐅᓕᕐᓗᑎᒃ ᓱᖏᐅᓴᖁᔭᐅᓕᖅᖢᑎᒃ.

ᓄᓇᓖᑦ ᐃᓂᖃᓚᐅᖅᓯᒪᔫᒐᓗᐊᖅ Lindstrom ᓄᕗᐊᑦᑎᐊᖓᓂ, 8 ᑭᓚᒦᑕᓂᒃ ᐊᑭᓐᓇᖓᓃᑦᑐᖅ ᒫᓐᓇ ᓄᓇᒋᔭᐅᓕᖅᑐᒧᑦ. 1962-ᒥ, ᐃᓄᐃᑦ ᓄᓇᓖᑦ ᒪᓕᓚᐅᖅᓯᒪᕗᑦ ᐸᓖᓯᒃᑯᓐᓂ ᐃᓂᑖᓵᒥᓄᑦ ᐊᐅᓱᐃᑦᑐᕐᒧᑦ, ᒫᓐᓇᒧᑦ ᑎᑭᖦᖢᒍ ᓄᓇᒋᔭᐅᔪᖅ. ᖃᔅᓯᑲᓪᓚᖕᓂᒃ ᓱᓕ ᐃᒡᓗᕐᔪᐊᓂᒃ ᓇᐸᔪᖃᖅᑐᖅ "ᓄᓇᖃᕐᕕᕕᓂᑐᖃᕐᒥ". Otto Sverdrup, Norwegian−ᒥᙶᖅᖢᓂ ᓇᕈᓇᒃᑎ, ᓄᓇᙳᐊᓕᐅᓚᐅᖅᓯᒪᕗᖅ ᑕᐃᔅᓱᒪᓂᐅᑎᓪᓗᒍ.  ᓇᕈᓇᒃᑎᑦ ᐅᒥᐊᕐᔪᐊᖓᑦ ᐅᑮᓚᐅᖅᓯᒪᕗᖅ 1899-ᒥ Sverdrup−ᓗ ᑕᐃᔅᓱᒪᓂ ᐊᑦᑎᖅᓯᓚᐅᖅᓯᒪᓪᓗᓂ Harbour Fiord-ᒥ, ᐊᐅᓱᐃᑦᑑᑉ ᑲᖏᖅᖢᐊᑕ ᐊᑭᓐᓇᖓᓂ. Sverdrup−ᖑᓚᐅᖅᑎᓪᓗᒍ, ᑭᖑᓪᓕᕐᒥ ᐃᓄᖁᑎᒋᔭᐅᓚᐅᖅᑐᑦ ᖃᓪᓗᓈᖑᓪᓗᑎᒃ ᐊᐅᓱᐃᑦᑑᑉ ᕿᑭᖅᑖᓗᐊᑕ ᓂᒋᕐᒥᐅᑕᐅᓚᐅᖅᑐᑦ ᐸᓖᓯᒃᑯᑦ. ᑲᓇᑕᒥ ᒐᕙᒪᒃᑯᑦ ᓂᐅᕕᕐᕕᖕᓂ ᓇᑉᐸᖅᑎᕆᓚᐅᖅᓯᒪᓪᓗᑎᒃ 1920's−ᖏᑦ ᓱᓕ ᐊᑐᖅᑎᓪᓗᒋᑦ. ᐸᕐᓇᓚᐅᖅᓯᒪᔪᑦ ᐸᓖᓯᖃᕐᕕᖕᒥ ᐃᒡᓗᓕᐅᕈᒪᓪᓗᑎᒃ Fram Fiord ᖃᓂᒋᔮᓂ, ᑭᓯᐊᓂ ᓯᑯᖃᐃᓐᓇᕐᓂᖓᓄᑦ 1922-ᒥ ᐊᐅᔭᒃᑯᑦ ᒐᕙᒪᒃᑯᑦ ᐃᒡᓗᓕᐅᕆᐊᖃᓕᓚᐅᖅᓯᒪᕗᑦ ᑲᓇᖕᓇᖓᓃᓐᓂᖅᓴᒥᒃ.

ᐃᓄᒋᐊᖕᓂᖏᑦ: 192

ᖃᐅᔨᒋᐊᕐᕕᒃᓴᖅ

ᐃᕐᖐᓈᖅᑕᐅᑦ: @email
ᐅᖄᓚᐅᑎ: 867-980-9959
ᓱᒃᑲᔪᒃᑯᑦ: 867-980-9052
ᐃᑭᐊᖅᑭᕕᒃ: www.grisefiord.ca