ᖃᒪᓂ'ᑐᐊᕐᒥ
ᖃᒪᓂ'ᑐᐊᖅ ᐱᔾᔪᑎᒋᓪᓗᒍ
ᖃᒪᓂ'ᑐᐊᖅ, ᐅᕝᕙᓘᓐᓃ ᖃᒪᓂ'ᑑᖅ, ᓄᓇᖅᐸᓯᒃᑐᒦᑉᐳᖅ, ᑰᑉ ᐊᑯᐊᓂ, ᓄᓇᕗᒻᒥ ᑭᕙᓪᓕᖅᐸᓯᐊᓂ. ᓄᓇᙳᐊᒃᑯᑦ ᐃᓂᖃᖅᑐᖅ 64.3 N 96.08 W, ᓄᓇᙳᐊᒃᑯᑦ ᑕᑯᓪᓗᒍ ᑲᓇᑕᒥ ᕿᑎᖅᐸᓯᐊᓃᑦᑐᖅ.
1950's ᕿᑎᖅᐸᖅᑎᓪᓗᒍ ᑭᓯᐊᓂ, ᖃᔅᓯᑲᓪᓚᑦ ᐃᓄᐃᑦ ᓄᓇᐃᓐᓇᕐᒥ ᓄᓇᖃᖅᐸᓚᐅᖅᓯᒪᔪᑦ ᖃᒪᓂ'ᑐᐊᑉ ᐊᕙᑖᓂ. ᐅᑦᑯᕼᐃᒃᓴᓕᖕᒥᐅᑦ ᓴᓐᓂᖓᔫᑉ ᑰᖓᓂᙶᖅᓯᒪᕗᑦ; ᕼᐊᓐᓂᖓᔪᕐᒥᐅᑦ ᓴᓐᓂᖓᔪᕐᒥᐅᑕᑦ; ᐊᑭᓕᓂᕐᒥᐅᑦ ᑲᖏᕐᔪᐊᑉ ᑰᖓᓂᙶᖅᑐᑦ ᐃᒃᐱᐅᑉ ᑕᓯᖅᐸᓯᐊᓂ; ᖃᐃᕐᓂᕐᒥᐅᑦ ᑲᖏᕐᔪᐊᑉ ᐊᑦᑎᖕᓂᖅᓴᒦᑦᑐᖅ, ᖃᒪᓂ'ᑐᐊᖅ ᐊᒻᒪ ᐃᒡᓗᓕᒑᕐᔪᒃ; ᐊᒻᒪ ᕼᐊᕐᕙᖅᑑᕐᒥᐅᑦ ᓵᕐᕙᖅᑑᕐᒥᙶᖅᖢᑎᒃ. ᐅᑯᐊ ᓄᓇᐃᑦ ᖃᓂᒌᒃᑐᑦ ᐊᓯᖏᓪᓗ ᓄᓇᖅᐸᓯᖕᒦᑦᑐᑦ, ᐃᓅᓯᖃᖃᑦᑕᖅᓯᒪᕗᑦ ᐃᓄᐃᓪᓚᒥᐅᑕᐅᓪᓗᑎᒃ. ᑕᑎᒋᔭᐅᖃᑦᑕᖅᓯᒪᔪᑦ ᐱᔾᔪᑎᒃᓴᖅᑖᖅᐸᒃᖢᑎᒃ ᓇᐹᖅᑐᖃᙱᑦᑐᕐᒥᐅᑕᓂᒃ, ᒪᑯᓂᖓ ᓲᕐᓗ ᑐᒃᑐᓂᒃ ᐊᒻᒪ ᐃᖃᓗᖕᓂᒃ.
ᐋᓐᓂᐊᕕᓕᐅᖅᑐᖃᓚᐅᖅᓯᒪᔪᖅ 1956-ᖑᑎᓪᓗᒍ ᐊᒻᒪ ᐃᓕᓐᓂᐊᕐᕕᓕᐅᓚᐅᖅᓯᒪᓪᓗᑎᒃ 1957-ᒥ. ᑕᐃᔅᓱᒪᓂᐅᑎᓪᓗᒍ ᐃᓄᐃᑦ ᑲᑎᑉᐸᓪᓕᐊᓕᓚᐅᖅᓯᒪᔪᑦ ᖃᒪᓂ'ᑐᐊᕐᒧᑦ ᓄᑕᖅᑲᑦ ᐃᓕᓐᓂᐊᕆᐊᖃᕐᓂᖏᑦ ᐱᔾᔪᑕᐅᓪᓗᑎᒃ ᐊᒻᒪᓗ ᑕᐃᒪᐃᓕᖓᓕᓚᐅᖅᓯᒪᒋᓪᓗᓂ ᐱᕐᓕᕋᖅᑎᓪᓗᒋᑦ ᑐᒃᑐᐃᑦ ᑕᒡᔪᐊᕐᓂᖏᑦ ᐊᓯᔾᔨᖅᑎᓪᓗᒋᑦ. 1962-ᖑᑎᓪᓗᒍ, ᐃᒡᓗᓕᐅᓚᐅᖅᓯᒪᕗᑦ ᐃᓄᓕᕆᔨᑐᖃᒃᑯᑦ ᐊᒻᒪ ᓄᓇᒥᐅᑕᓂᒃ ᐊᑐᖅᑐᒃᓴᓕᕆᔨᒃᑯᑦ. ᐃᒪᐃᒃᑲᓗᐊᖅᑎᓪᓗᒍ ᐃᓚᖏᑦ ᐃᓚᖐᑦ ᐃᓄᐃᓪᓚᒥ ᓄᓇᖃᖅᐸᓚᐅᖅᓯᒪᔫᒐᓗᐊᑦ ᓱᓕ 1960's ᐊᑐᖅᑎᓪᓗᒋᑦ ᑭᖑᓂᐊᒍᑦ ᑭᓯᐊᓂ ᑕᒪᕐᒥᑦᑎᐊᖅ ᓄᓇᓕᖕᓄᑦ ᓅᓚᐅᖅᓯᒪᔪᑦ.
ᑲᑎᖦᖢᒋᑦ ᐃᓄᒋᐊᖕᓂᖏᑦ 2,096
ᖃᐅᔨᒋᐊᕐᕕᒃᓴᖅ
ᐃᕐᖐᓈᖅᑕᐅᑦ: @email
ᐅᖄᓚᐅᑎ: 867-793-2874
ᓱᒃᑲᔪᒃᑯᑦ: 867-793-2509
ᐃᑭᐊᖅᑭᕕᒃ: www.bakerlake.ca