ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᑐᓴᒐᒃᓴᑦ - ᓄᕕᐱᕆ 20, 2020
ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᑐᓴᒐᒃᓴᑦ - ᓄᕕᐱᕆ 20, 2020
ᓯᕗᓕᖅᑎᒥᑦ ᑐᓴᒐᒃᓴᖅ:
ᐅᓪᓛᒃᑯᑦ. ᐅᓪᓗᒥ, ᓄᓇᕗᒻᒥ ᖁᓕᓂᒃ (10) ᓄᕙᒡᔪᐊᕐᓇᖅ-19−ᑖᖅᑐᖃᖅᓯᒪᓕᕐᒥᔪᖅ. ᐊᑕᐅᓯᕐᒥᒃ ᓄᕙᒡᔪᐊᕐᓇᖅ 19−ᑖᒃᑲᓐᓂᖅᑐᖃᖅᑐᖅ ᐊᕐᕕᐊᓂ, ᐱᖓᓱᒃᑲᓐᓂᕐᓂᒃ ᑎᑭᕋᕐᔪᐊᕐᒥ ᐊᒻᒪ ᐊᕐᕕᓂᓕᑦ (6)−ᓂᒃ ᐃᓚᒃᑲᓐᓂᖅᖢᑎᒃ ᑲᖏᖅᖠᓂᕐᒥ.
ᓄᓇᕗᒻᒥ ᒫᓐᓇ ᑲᑎᖦᖢᒋᑦ 84−ᖑᓕᖅᑐᑦ ᓄᕙᒡᔪᐊᕐᓇᖅ-19−ᒧᑦ ᖃᓂᒻᒪᒃᑐᑦ. ᑲᑎᖦᖢᒋᑦ ᐃᓄᐃᑦ ᒫᓐᓇᒧᑦ ᑎᑭᖦᖢᒍ ᖃᐅᔨᓴᖅᑕᐅᓯᒪᓕᖅᑐᑦ 4293−ᖑᓕᖅᑐᑦ. 892 ᐃᓄᐃᑦ ᒫᓐᓇ ᖃᐅᔨᓴᖅᑕᐅᔪᑦ.
ᓯᕗᓪᓕᕐᒥ ᐱᓇᓱᐊᕈᓯᕐᒥ ᒪᑑᕋᖅᑕᐅᑎᓪᓗᒋᑦ, ᓄᓇᕗᒥᐅᑦ ᐱᓇᓱᐊᑦᑎᐊᖏᓐᓇᖁᕙᒃᑲ ᑲᒪᑦᑎᐊᖏᓐᓇᖁᕙᒃᑲᓗ. ᑕᒪᓐᓇ ᖃᓂᒪᓐᓇᖅ ᐊᒃᓱᕈᕐᓗᑕ ᓄᖅᑲᖅᑎᓐᓇᓱᐊᓗᒃᑲᓗᐊᕈᑦᑎᒍᑦ ᐊᖅᑯᓵᖏᓐᓇᓕᒑᖕᒪᑦ ᖃᐱᓚᒋᐊᓗᒃᑲᓗᐊᕈᑦᑎᒍᑦ ᑕᖄᓗᒃᑲᓗᐊᕈᑦᑕᓘᓐᓃᑦ ᐊᖅᑯᓵᖏᓐᓇᕐᓂᐊᖅᑐᖅ. ᑕᖃᐃᖅᓯᔾᔮᙱᑦᑎᐊᖅᑐᒍᑦ ᕿᓚᒥᑯᒡᓘᓐᓃᑦ ᐱᓕᕆᐊᕆᔭᑦᑎᓐᓂᒃ. ᓯᐊᒻᒪᒃᑎᖅᑕᐃᓕᒪᑎᓪᓚᕆᓚᐅᕐᓚᕗᑦ ᓇᓕᐊᖕᓂᑐᐃᓐᓇᖅ ᓄᓇᑦᑎᓐᓂ.
ᖃᐅᔨᒪᑦᑎᐊᖅᑐᖓ ᐊᔪᕐᓇᕐᓂᐊᖅᑐᒻᒪᕆᐊᓗᒃ, ᑕᒪᔅᓯᐊᓗᒃ ᑎᓕᐅᖅᐸᔅᓯ ᐳᓚᕋᖃᑦᑕᐅᑎᙱᐊᓪᓚᒋᔅᓯ ᐃᒡᓗᔅᓯᓘᓐᓃᑦ ᐊᓯᐊᓄᑦ ᑲᑎᙵᕈᓘᔭᑲᑕᙱᓪᓗᓯ. ᐃᓱᒪᖅᓱᑦᑎᐊᖅᑐᓯ, ᐊᓂᔪᒪᑐᐊᕌᖓᔅᓯ ᐊᓂᖃᑦᑕᒻᒪᕆᐊᓗᒋᔅᓯ − ᐊᖑᓇᓱᒋᐊᖃᑦᑕᕆᔅᓯ, ᐃᖃᓗᒐᓱᒋᐊᖃᑦᑕᕆᔅᓯ, ᐊᐅᓪᓛᖃᑦᑕᕆᔅᓯ − ᑭᓯᐊᓂ ᐃᒡᓗᒥᐅᖃᑎᒌᒃᓯᒍᑦ ᐃᓕᔅᓯᑐᐊᖅ ᑲᑎᙵᑲᑕᑲᓚᐅᕆᔅᓯ ᐊᔪᙱᑐᐊᕌᖓᔅᓯ. ᐃᒪᓐᓇᖔᕐᓘᓐᓃᑦ, ᑲᑎᙵᖃᑎᒌᖕᓂᐊᕈᔅᓯ ᐃᓄᑭᑉᐸᒡᓗᓯ ᐃᓄᐃᑦ ᑲᑎᙵᔪᓐᓇᕐᓗᑎᒃ ᑕᓪᓕᒪᐅᑦᑕᕐᓗᑎᒃ.
ᐊᒻᒪ ᐊᑐᐃᓐᓇᓕᕐᒥᔭᕗᑦ, ᒪᑐᐊᖅᓯᒪᕙᒡᓗᓯ ᐃᒡᓗᔅᓯ ᐊᓯᐊᓄᐊᕐᓂᐊᕌᖓᔅᓯ, ᐅᖓᓯᒌᒃᑕᑦᑎᐊᖅᐸᒡᓗᓯ, ᐊᒡᒐᓯ ᐅᐊᓴᑦᑎᐊᑲᑕᒡᓗᓯᐅᒃ, ᖁᐃᖅᓱᖅᐸᒡᓗᓯ ᐃᑯᓯᔅᓯᓐᓄᑦ, ᐊᓪᓚᖅᑎᕆᐊᓖᓪᓗ ᐊᓪᓚᖅᑎᕋᔪᒡᓗᒋᑦ.
ᖃᐅᔨᒫᓂᒃᑐᖓ ᐊᖅᑯᓵᖅᑕᕗᑦ ᐊᔪᕐᓇᖅᑐᐊᓘᖕᒪᑦ ᒫᓐᓇ, ᐱᓗᐊᖅᑐᒥ ᓄᑕᖅᑲᓄᑦ. ᐅᓪᓗᒥ ᑲᓇᑕᓕᒫᒥ ᓄᑕᖅᑲᓄᑦ ᐅᓪᓗᕆᔭᐅᕗᖅ − ᑎᓕᐅᕆᓕᖅᐳᖓᓕ ᑭᒃᑯᓕᒫᑦᑎᐊᓂᒃ ᖁᕕᐊᓱᖃᑎᒋᔭᐅᖁᓪᓗᒋᑦ ᕿᑐᕐᖓᕗᑦ ᐆᒻᒪᕆᖕᓂᖏᑦ, ᐊᔪᙱᓐᓂᖏᑦ ᐊᒻᒪ ᑐᓂᖅᑯᓯᐊᖏᑦ. ᓄᑕᖅᑲᑦ ᓄᓇᑦᑎᓐᓂ ᐃᓚᒋᔭᐅᑦᑎᐊᕐᒪᑕ, ᑖᓐᓇᓗ ᖃᓂᒻᒪᒍᑕᐅᕙᓪᓕᐊᔪᖅ ᐊᔪᕐᓇᕈᑕᐅᒋᓪᓗᓂ ᓄᑕᖅᑲᓄᑦ. ᐅᓪᓗᒥ ᐱᕕᖃᓕᕈᑦᑕ ᓄᑕᖅᑲᑦ ᑲᒪᒋᔭᕗᑦ ᑐᓴᖅᑎᙳᐊᖦᖤᕐᓂᐊᖅᐸᕗᑦ ᐱᒻᒪᕆᐊᓘᓂᖏᓐᓂᒃ, ᐅᐱᒋᔭᐅᑦᑎᐊᕐᓂᖏᓐᓂᓪᓗ ᐱᓕᕆᐊᕇᓐᓇᖅᐸᒃᑕᖏᑦ ᐱᓕᕆᐊᕆᑦᑕᐃᓕᒪᖃᑕᐅᓪᓗᒋᑦ ᓯᐊᒻᒪᒃᑎᖅᑎᑦᑕᐃᓕᒪᖃᑕᐅᓪᓗᑎᒃ ᓄᕙᒡᔪᐊᕐᓇᖅ 19−ᒥ.
ᓱᕈᓯᓕᒫᑦ, ᓄᑕᕋᓕᒫᑦ, ᐅᐱᒋᔭᐅᑦᑎᐊᕋᔅᓯ ᖃᐅᔨᒪᓂᐊᖅᐳᓯ ᐱᓕᕆᖃᑕᐅᓂᔅᓯᓐᓂᒃ. ᐃᓅᓯᑦᑎᓐᓄᑦ ᖃᓄᐃᓐᓇᙱᑦᑐᒧᑦ ᖃᑯᒍᑦᑎᐊᖅ ᐅᑎᕐᔫᒥᓛᖁᓕᕋᓗᐊᖅᑕᕗᑦ. ᑕᒪᔅᓯᐊᓗᒃ ᐊᔪᙱᑦᑐᒻᒪᕆᐊᓘᔪᓯ!
ᑭᒃᑯᓕᒫᑦᑎᐊᓄᑦ ᓄᓇᕘᒥ − ᖁᔭᓐᓇᒦᒃ. ᑐᓴᖅᑎᑕᐅᖏᓐᓇᑦᑎᐊᖅᑐᖓ ᐱᐅᔪᓂᒃ ᓂᕆᐅᒐᒃᓴᑦᑎᐊᕙᖕᓂᒃ, ᑎᓕᐅᕈᑎᑦᑎᐊᕙᖕᓂᒃ ᐊᒻᒪ ᖁᕝᕙᖅᑎᖃᑦᑕᐅᑎᓪᓗᑎᒃ ᐃᓅᖃᑎᒌᑦ ᐊᒃᓱᕈᖅᖢᑎᒃ ᐱᓕᕆᐊᖏᓐᓄᑦ. ᑕᐃᒫᒃ ᐱᓕᕆᔪᓐᓇᖅᑐᒍᑦ. ᐱᓕᕆᐊᕇᓐᓇᕈᓐᓇᖅᑕᕗᑦ ᓄᖅᑲᐅᑎᓚᐅᙱᓪᓗᑎᒍᑦ.
ᖃᓄᐃᙱᑦᑎᐊᕆᑦ. ᐊᑦᑕᕐᓇᖅᑐᒦᑦᑕᐃᓕᒋᑦ. ᐊᐃᓯᒪᓗᑎᑦ.
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑕ ᑐᓴᖅᑎᑦᑎᔾᔪᑎᖏᑦ:
ᐅᓪᓛᒃᑯᑦ. ᐅᓪᓗᒥ ᑐᑭᓯᓇᖅᓯᑎᑦᑎᔪᒪᕗᖓ ᖃᓄᖅ ᑐᑭᖃᕐᒪᖔᑦ ᐃᒪᓐᓇ ᐅᖃᕌᖓᑦᑕ ᑭᓇᑭᐊᖅ ᓇᓗᓇᐃᖅᑕᐅᔪᖅ ᓄᕙᒡᔪᐊᕐᓇᖅ-19−ᒧᑦ ᖃᓂᒪᔪᒥᒃ ᐅᐸᒍᑎᓯᒪᑲᑕᒃᑐᒥᒃ.
ᑐᕌᒐᕆᔭᐅᔪᖅ ᖃᓂᒪᓐᓇᖅ ᓯᐊᒻᒪᒃᑎᖅᑕᐃᓕᓗᒍ ᓯᐊᒻᒪᒃᐸᓪᓕᐊᓂᖓ ᓄᖅᑲᖅᑎᓪᓗᒍ ᕿᓚᒻᒥᐅᓂᖅᐹᒃᑯᑦ. ᑭᓇᑭᐊᖅ ᓄᕙᒡᔪᐊᕐᓇᖅ-19−ᖃᕐᓗᓂ ᖃᐅᔨᔭᐅᒃᐸᑦ ᖃᐅᔨᔪᒪᖃᑦᑕᖅᐳᒍᑦ ᑭᒃᑯᓐᓂᓯᐅᑲᑕᓚᐅᕐᒪᖔᑕ ᖃᓂᒪᑎᓪᓗᒍ. ᑕᕝᕙ ᑖᒃᑯᐊ ᐃᓄᐃᑦ ᓯᐊᒻᒪᒡᕕᐅᓯᒪᔪᑦ, ᖃᓂᒪᓇᕐᓗ ᑎᒥᐊᓃᓕᖅᐸᑦ ᖃᓂᒪᓐᓇᖅ ᐱᕈᖅᐸᓪᓕᐊᑐᐃᓐᓇᓕᕈᓐᓇᕐᒪᑦ. ᖃᓂᒻᒪᒃᑐᑦ ᓇᓗᓇᕈᓐᓃᕈᓐᓇᖅᐳᑦ ᐅᓪᓗᑦ 14−ᓄᑦ ᑎᑭᓪᓗᒍ ᖃᓂᒪᔪᒥᒃ ᖃᓂᕝᕕᓯᐅᓚᐅᖅᑎᓪᓗᒋᑦ.
ᐃᓄᖕᓄᑦ ᓄᕙᒡᔪᐊᕐᓇᖅ-19−ᖃᖅᑐᒧᑦ ᖃᓂᕝᕕᓯᐅᓚᐅᖅᑐᓄᑦ, ᐱᕐᔪᐊᕌᓘᕗᖅ ᐃᓄᑑᒋᐊᖃᓕᖅᑎᓪᓗᒋᑦ ᐅᓪᓗᓄᑦ 14−ᓄᑦ, ᖃᓂᒪᓗᐊᙱᒃᑲᓗᐊᖅᐸᑕᓘᓐᓃᑦ. ᐅᔾᔨᕆᙱᖦᖢᓂ ᖃᓂᒪᓪᓗᓂ ᓯᐊᒻᒪᒃᑎᕆᓐᓇᕐᒪᑦ ᐊᓯᑦᑎᓐᓄᑦ, ᐊᓯᕗᓪᓗ ᓯᐊᒻᒪᒃᑎᕐᕕᐅᔪᑦ ᖃᓂᒻᒪᒃᐸᒃᖢᑎᒃ. ᑕᐃᒪᐃᓐᓂᖓᓄᑦ, ᐅᖃᐅᔾᔭᐅᑐᐊᕈᕕᑦ ᓄᕙᒡᔪᐊᕐᓇᖅ-19−ᑖᖃᑕᐅᓯᒪᑐᐃᓐᓇᕆᐊᖃᕐᓂᕐᓂᒃ, ᐃᒡᓗᔅᓯᓐᓂ ᐊᓂᑦᑕᐃᓕᒋᐊᖃᓕᕋᔭᖅᐳᑎᑦ. ᑕᒪᓐᓇ ᐊᑲᐅᓛᒻᒪᕆᐅᕗᖅ ᖃᓂᒻᒪᓯᕐᒧᑦ ᓯᐊᒻᒪᒃᑎᑦᑎᑦᑕᐃᓕᒪᓂᕐᒥᒃ.
ᐱᓕᕆᐊᒃᓴᕆᔭᐅᔫᑉ ᐃᓚᖓ ᖃᓂᒻᒪᒃᓯᒪᔪᒥᒃ ᓯᐊᒻᒪᒃᑎᕐᕕᐅᓯᒪᔪᖅ ᖃᐅᔨᓴᕐᓗᒍ ᓄᕙᕐᔪᐊᕐᓇᖅ-19 ᓯᐊᒻᒪᒃᓯᒪᓕᕐᒪᖔᑦ ᒪᕐᕉᖕᓂᒃ ᐃᓅᖕᓂᒃ. ᓯᐊᒻᒪᒃᐸᓪᓕᐊᓕᓲᖅ ᐃᓄᐃᑦ ᖃᓂᒌᒃᑕᕌᖓᑕ ᐊᑯᓂᐅᓂᖅᓴᖅ. ᑕᒪᐃᓐᓄᑦ ᒪᓕᒃᑕᐅᒋᐊᓕᒃ ᓯᐊᒻᒪᒃᐸᓪᓕᐊᔪᓐᓇᕐᒪᑦ ᒪᕐᕉᒃ ᐃᓅᒃ 6−ᓂᒃ ᐃᓯᒃᑲᓂᒃ ᐅᖓᓯᒌᒃᑕᕌᖓᑕ 10 ᒥᓂᑦᔅ ᐅᖓᑖᓄᑦ, ᑕᒪᓐᓇ ᐱᔾᔪᑕᐅᓪᓗᓂ ᐱᒻᒪᕆᐅᕗᖅ ᑲᑎᙵᔪᑦ ᐅᐸᒃᓯᒪᑦᑕᐃᓕᓗᒋᑦ ᐃᓄᐃᓪᓗ ᑲᑎᙵᔪᑦ ᖃᔅᓰᓐᓇᐅᑎᑉᐸᒡᓗᒋᑦ ᐃᒡᓗᒥᐅᖃᑎᔅᓯᓐᓄᑦ.
ᖃᓂᒪᓐᓇᖅ ᑎᒥᐅᑉ ᐃᓗᐊᓂ ᐱᕈᖅᐸᓪᓕᐊᒐᓗᐊᖅᑎᓪᓗᒍ, ᖃᐅᔨᓴᕈᑎᓄᑦ ᖃᐅᔨᓴᕈᑎᑦ ᓇᓗᓇᕈᓐᓇᕐᒪᑕ. ᐃᓄᑑᖁᔭᐅᒍᕕᑦ ᓯᐊᒻᒪᒃᐸᓪᓕᐊᔪᒧᑦ ᓄᖅᑲᕈᑕᐅᔪᓐᓇᕐᒪᑦ, ᐱᖃᓐᓇᕆᔭᑎᑦ, ᐃᓚᑎᑦ, ᐊᒻᒪ ᓄᓇᖅᑲᑎᑎᑦ ᓴᐳᑎᓗᒋᑦ.
ᓄᕙᒡᔪᐊᕐᓇᖅ-19−ᖃᖅᑐᒥᒃ ᖃᓂᕝᕕᓯᐅᓚᐅᙱᒃᑲᓗᐊᕈᕕᓪᓘᓐᓃᑦ, ᖃᓄᐃᓕᐅᕈᓘᔭᕈᓐᓇᖅᑐᑦ ᑭᒃᑯᕈᓘᔮᓗᐃᑦ ᓯᐊᒻᒪᒃᑎᖅᑕᐃᓕᓗᒍ ᓄᕙᕐᔪᐊᕐᓇᖅ-19:
- ᐊᐃᓯᒪᓗᑎᑦ ᖃᓂᒪᒍᕕᑦ
- ᐃᓄᖕᓂᒃ ᑲᑎᙵᖃᑎᖃᕐᓂᐊᕈᕕᑦ ᐃᓄᒋᐊᒃᓯᑦᑕᐃᓕᒋᔅᓯ, ᓲᕐᓗ ᐃᓄᐃᑦ ᐱᓕᕆᑎᓪᓗᒋᑦ ᖃᔅᓰᓐᓇᐅᑎᑉᐸᒡᓗᒋᑦ ᑖᒃᑯᐊᔅᓴᐃᓐᓇᐅᕙᒡᓗᑎᓪᓗ.
- ᐊᒡᒐᓯ ᐅᐊᓴᕋᔪᒡᓗᓯᐅᒃ
- ᒪᑐᐊᖅᓯᒪᕙᒡᓗᓯ
- ᐃᓄᖕᓄᑦ ᖃᓂᒃᓴᓗᐊᓕᙱᒃᑲᓗᐊᕐᒪᖔᖅᐱᑦ ᐅᔾᔨᕈᓱᑦᑎᐊᖏᓐᓇᕐᓗᑎᑦ
ᐱᖓᔪᐊᓂ, ᐅᖃᐅᓯᖃᓚᐅᕋᒪ ᑐᐊᕕᕐᓇᖅᑐᓕᕆᔨᒃᑯᑦ ᐱᓕᕆᕐᔪᐊᖅᑐᐊᓘᓂᖏᓐᓂᒃ ᐊᒻᒪ ᐃᓄᐃᑦ ᐱᓕᕆᖃᑎᒌᑦ ᓄᖅᑲᖅᑎᑦᑎᓇᓱᒃᖢᑎᒃ ᓯᐊᒻᒪᒃᑎᖅᐸᓪᓕᐊᔪᒥᒃ. ᐅᓪᓗᒥ, ᖁᔭᒋᔪᒪᕐᔪᐊᖅᑖᓗᒃᑲ ᖃᐅᔨᓴᕐᕕᖕᒥᐅᑕᑦ. ᐃᑲᕐᕋᒐᓵᓗᖕᓂᒃ ᓴᓇᑲᑕᒃᑐᑦ, ᐅᓐᓄᐊᖅᓯᐅᓕᖅᐸᒃᖢᑎᒃ ᐅᓪᓛᕌᓗᖕᒧᑦ ᑎᑭᖦᖢᒍ ᖃᐅᔨᓴᖅᑕᖏᑦ ᖃᓄᐃᓕᖓᖕᒪᖔᑕ ᑭᓯᐊᓂ ᖃᐅᔨᒑᖓᑕ ᓄᖅᑲᐅᑎᕙᒃᖢᒋᑦ. ᐱᓕᕆᐊᖏᑦ ᐃᑲᔫᑎᕐᔪᐊᖅᑐᐊᓗᐃᑦ ᐊᒃᓱᕈᕐᓂᕆᔭᑦᑎᓐᓄᑦ ᓄᖅᑲᐅᒪᑎᑦᑎᓇᓱᒃᑎᓪᓗᑕᓱ ᖃᓂᒻᒪᓯᕐᒥᒃ.
ᖁᔭᓐᓇᒦᒃ.
ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓂ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐱᓕᕆᕝᕕᖓ
ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᑕᑯᔪᒪᒍᕕᑦ ᐊᒻᒪ ᐃᑲᔫᑎᒃᓴᓂᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ ᓄᓇᕗᒻᒥ, ᐅᕗᙵᕈᓐᓇᖅᐳᑎᑦ: https://www.gov.nu.ca/health/information/covid-19-novel-coronavirus.
ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᒫᓐᓇᓕᓴᕐᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᓂᒃ, ᐅᕗᙵᕈᓐᓇᖅᐳᓯ: https://www.gov.nu.ca/health/information/nunavuts-path
ᓄᓇᕗᒻᒥ ᓄᕙᒡᔪᐊᕐᓇᖅ-19−ᒧᑦ ᑭᒡᓕᓯᓂᐊᖅᑕᐅᓯᒪᔪᑦ ᓄᕕᐱᕆ 20−ᒥ
| ᓄᓇᓕᒃ | ᐃᑉᐸᒃᓴᖅ ᓇᓗᓇᐃᖅᑕᐅᓚᐅᖅᑐᑦ ᓄᕙᒡᔪᐊᕐᓇᖅ-19 −ᖃᕐᓂᖏᓐᓂᒃ | ᐅᓪᓗᒥ ᓇᓗᓇᐃᖅᑕᐅᔪᑦ ᓄᕙᒡᔪᐊᕐᓇᖅ-19 −ᖃᕐᓂᖏᓐᓂᒃ | ᐊᓯᔾᔨᕐᓂᕆᔭᖓ ᐱᑕᖃᓪᓚᑦᑖᕐᓂᕋᖅᑕᐅᓯᒪᔪᓂᑦ ᓈᓴᖅᑕᐅᓯᒪᓂᖏᑕ (+/-) ᐃᑉᐸᒃᓴᖓᓂᑦ |
| ᐊᕐᕕᐊᑦ | 57 | 58 | 1 |
| ᑎᑭᕋᕐᔪᐊᖅ | 8 | 11 | 3 |
| ᑲᖏᖅᖠᓂᖅ | 7 | 13 | 6 |
| ᓴᓂᑭᓗᐊᖅ | 2 | 2 | 0 |
| ᑲᑎᖦᖢᒋᑦ | 74 | 84 | 10 |
ᖃᐅᔨᓴᖅᓯᓂᒧᑦ ᑭᒡᓕᓯᓂᐊᖅᑕᐅᓯᒪᔪᑦ ᐅᓪᓗᒥᒧᑦ ᑎᑭᖦᖢᒍ: ᓄᕕᐱᕆ 20
| ᓄᓇᓕᒃ | ᖃᐅᔨᓴᖅᑕᐅᒐᒥ ᐱᖃᓪᓚᕆᖕᓂᕋᖅᑕᐅᔪᖅ | ᖃᐅᔨᓴᖅᑕᐅᒐᒥ ᐱᖃᙱᓐᓂᕋᕐᑕᐅᔪᖅ |
| ᐊᕐᕕᐊᑦ | 58 | 137 |
| ᑎᑭᕋᕐᔪᐊᖅ | 11 | 21 |
| ᑲᖏᖅᖠᓂᖅ | 13 | 110 |
| ᓴᓂᑭᓗᐊᖅ | 2 | 119 |
| ᑲᑎᖦᖢᒋᑦ | 84 | 387 |
ᐃᓄᑑᔭᕆᐊᖃᖅᑐᑦ
| ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᓄᑐᐊᒃᑯᕖᑦ) | |
| ᖃᓄᐃᑦᑕᖅᑐᖅᖢᑎᒃ ᐊᐅᓪᓚᖅᓯᒪᖕᒪᖔᑕ | ᑐᔪᕐᒥᕕᖕᒦᑦᑐᑦ ᐊᓂᑦᑕᐃᓕᑎᑕᐅᔪᑦ ᓄᕕᐱᕆ 19−ᒥ ᐱᒋᐊᖅᖢᒍ |
| ᐋᓐᓂᐊᕐᕕᓕᐊᖅᑐᑦ | 326 |
| ᑭᒃᑯᑐᐃᓐᓇᑦ | 167 |
| ᑲᑎᒃᖢᒋᑦ | 493 |
ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓯᒪᓕᖅᑐᑦ ᖃᓄᐃᓕᖓᓂᖏᑦ:
| ᐅᓪᓗᖅ ᐊᐅᓪᓚᕐᕕᒃᓴᖓ | ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᐸᒃᑕᐅᑦᑕᐃᓕᕕᖕᓂᒃ |
| ᓄᕕᐱᕆ 20 | 32 |
| ᓄᕕᐱᕆ 21 | 7 |
| ᓄᕕᐱᕆ 22 | 12 |
| ᓄᕕᐱᕆ 23 | 57 |
| ᓄᕕᐱᕆ 24 | 13 |
| ᑲᑎᒃᖢᒋᑦ | 121 |
ᐱᑕᖃᕆᐊᖃᓪᓚᕆᒃᑐᓂᒃ ᐃᖅᑲᓇᐃᔭᖅᑎᓂᒃ ᑐᒃᓯᕋᐅᑏᑦ
ᓄᕕᐱᕆ 19−ᒥ ᐱᒋᐊᖅᖢᒍ, 9064−ᓂᒃ ᑐᒃᓯᕋᖅᑐᖃᓚᐅᖅᐳᖅ, 4214−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓄᑦ ᑐᒃᓯᕋᖅᑕᐅᔪᑦ.
| ᑐᒃᓯᕋᖅᑕᐅᓯᒪᔪᑦ ᖃᓄᐃᓕᖓᓂᖏᑦ | # | % |
| ᐊᖏᖅᑕᐅᓯᒪᔪᑦ (ᐅᑯᐊᖑᕗᑦ ᐱᔭᕆᐊᖃᓪᓚᕆᒃᑐᑦ ᐊᒻᒪ ᐱᔭᕆᐊᖃᓪᓚᕆᙱᑦᑐᑦ) | 6059 | 66.8% |
| ᐊᖏᖅᑕᐅᙱᑦᑐᑦ | 281 | 3.2% |
| ᐅᑕᖅᑭᔪᑦ | 212 | 3.1% |
| ᐊᐅᓪᓚᕐᕕᐅᔪᓐᓇᖅᑐᑦ ᐊᑐᖅᑕᐅᒐᔪᒃᑐᓄᑦ ᐊᖏᖅᑕᑦ | 2512 | 2.3% |
| ᑲᑎᖦᖢᒋᑦ | 9064 | 100% |
ᐊᕙᑎᓕᕆᔨᒃᑯᑦ ᐱᔨᑦᑎᕋᕐᓂᖏᑦ
ᓄᓇᕘᒥ ᒥᕐᖑᐃᖅᓯᕕᓕᒫᑦ ᒪᑐᓯᒪᓂᐊᖅᑐᑦ ᓇᓗᓇᐃᖅᑕᐅᓚᐅᙱᓐᓂᓕᒫᖏᓐᓂᒃ.
ᑮᓇᐅᔭᓕᕆᔨᒃᑯᑦ
ᐃᖅᑲᓇᐃᔭᖅᑎᒧᑦ ᐊᑭᓕᐅᑎᓄᑦ ᑐᓴᖅᑕᐅᑎᑦᓯᔾᔪᑎ − ᑎᓯᐱᕆ 11
ᐃᓘᓐᓇᑎᒃ ᒐᕙᒪᒃᑯᓐᓄᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᐊᑭᓕᖅᑐᖅᑕᐅᖏᓐᓇᕐᓂᐊᖅᑐᑦ ᑕᐃᒫᖑᖃᑦᑕᕐᒪᑦ. ᒪᓕᑦᑕᐅᒋᐊᖃᙱᑦᑐᓕᓐᓄᑦ ᐊᑭᓕᐅᑎᓄᑦ ᓲᕐᓗ ᐃᖅᑲᓇᐃᔭᕐᓇᐅᙱᑦᑐᒃᑯᑦ ᐃᖅᑲᓇᐃᔭᕈᑏᑦ ᐃᓇᖏᖅᓯᒪᓂᕐᒧᓪᓘᓐᓃᑦ ᐊᑭᓕᐅᑏᑦ ᐅᑎᖅᑎᑦᓯᓂᕐᒧᓪᓗ (ᐃᓚᒋᔭᐅᓗᑎᒃ ᓄᖅᑲᖓᙱᔾᔪᑎᖃᕐᓗᓂ ᐊᑭᓕᖅᑕᐅᒐᓂᓗ ᓄᖅᑲᖓᓂᕐᒧᑦ) ᑲᒪᒋᔭᐅᓂᐊᖅᑐᑦ ᑭᖑᓂᐊᒍᑦ ᐅᓪᓗᖅ.
ᐃᖅᑲᓇᐃᔭᐃᓐᓇᖅᑐᓄᑦ ᐃᖅᑲᓇᐃᔭᖅᑎᓄᑦ ᐊᑭᓕᖅᑐᖅᑕᐅᓂᐊᖅᑐᑦ ᑮᓇᐅᔭᑦᓵᒋᒐᔪᒃᑕᖏᑎᒍᑦ.
ᐃᓘᓐᓇᑎᒃ ᐃᖅᑲᓇᐃᔭᑲᐃᓐᓇᖃᑦᑕᖅᑐᑦ ᐃᖅᑲᓇᐃᔭᖅᑏᑦ ᐅᖓᕝᕙᕆᐊᖅᑕᐅᓯᒪᔪᑦ ᓄᕕᐱᕆ 27-ᒧᑦ ᑐᓂᓯᒋᐊᑐᒐᑎᓪᓗ ᐃᑲᕐᕋᓕᐅᕈᑎᖏᓐᓂᒃ.
ᐃᓇᖏᖅᓯᓯᒪᓚᐅᑲᒃᑐᑦ ᐃᖅᑲᓇᐃᔭᖅᑐᕕᓃᑦ ᓄᕕᐱᕆ 14 - 26 ᐃᑲᕐᕋᖏᑕ ᓇᓕᖅᑲᖏᓐᓂᒃ ᑐᓂᓯᓯᒪᔭᕆᐊᓖᑦ 5−ᒧᐊᙱᓐᓂᖓᓂ ᓄᕕᐱᕆ 26-ᒥ. ᒫᓐᓇᐅᔪᖅ, ᑭᓯᐊᓂ ᐃᖅᑲᓇᐃᔭᖅᑏᑦ ᐊᖓᔪᖅᑳᓪᓗ ᐊᑎᓕᐅᕆᔭᕆᐊᓖᑦ ᐃᑲᕐᕋᓕᐅᕈᑎᓂᑦ. ᑭᖑᕙᕐᓗᑎᒃ ᑐᓂᓯᓂᐅᔪᑦ ᑲᒪᒋᔭᐅᓚᖓᖏᑦᑐᑦ.
ᐃᖅᑲᓇᐃᔭᖅᑎᓄᑦ ᓯᒃᑭᑖᖃᑦᑕᖅᑐᓄᑦ, ᓄᓇᓕᑦᓯᓐᓅᖅᑎᑕᐅᖃᑦᑕᕐᓂᐊᖅᑐᑦ ᑕᐃᒫᑦᓴᐃᓐᓇᐅᓂᐊᖅᑐᖅ. ᑎᓕᐅᕆᔪᒍᑦ ᐃᓕᓐᓂᑦ ᐊᑐᖁᔨᓂᕐᒧᑦ ᖃᕆᑕᐅᔭᑎᒍᑦ ᑮᓇᐅᔭᒃᑯᕕᓕᕆᓂᕐᒧᑦ ᓇᓗᓇᐃᖅᓯᓂᕐᒧᑦ ᐊᑭᓕᖅᑕᐅᓂᕐᓄᑦ ᐊᑭᓕᖅᑕᐅᕕᓐᓂᑦ. ᑕᐃᒃᑯᓄᖓ ᑮᓇᐅᔭᒃᑯᕕᒻᒨᖅᑕᐅᑎᑦᓯᖃᑦᑕᖅᑐᑦ, ᑮᓇᐅᔭᑦᓵᑦ ᓇᓕᖅᑲᖏᑦ ᓴᖅᑭᖅᑕᐅᓛᖅᑐᑦ ᑭᖑᓂᐊᒍᑦ ᐅᓪᓗᖅ.
ᑐᑭᓯᒋᐊᑲᓂᕈᒪᒍᕕᑦ, ᖃᐅᔨᒃᑲᐅᑎᓗᒍ ᑐᕋᐃᓯ ᒧᐊᐃᐅᓪᔅ, ᑐᑭᒧᐊᑦᑎᑦᓯᔨ ᐊᑭᓕᖅᑕᐅᔾᔪᑎᓄᑦ ᐃᑲᔫᑎᓄᓪᓗ ᐅᕗᖓ @email.
ᒪᓕᒐᓕᕆᔨᒃᑯᓐᓂᑦ ᐱᔨᑦᑎᕋᐅᑎᑦ
ᑎᒍᔭᐅᓯᒪᔪᓕᕆᔨᒃᑯᑦ ᒪᓕᒐᓕᕆᔨᒃᑯᓐᓂ ᕿᒥᕐᕈᐃᓐᓇᖃᑦᑕᖅᐳᑦ ᐱᓕᕆᔾᔪᓯᕐᓂᒃ ᐊᒻᒪ ᒪᓕᒃᑕᐅᔪᒃᓴᓂᒃ ᑎᒍᔭᐅᓯᒪᔪᓕᕆᔨᓂᒃ ᖃᐅᔨᒪᔪᒪᓪᓗᒋᑦ ᐊᑦᑕᕐᓇᖅᑐᒦᙱᒃᑲᓗᐊᕐᒪᖔᑕ ᐊᓄᓪᓚᒃᓰᕕᖕᒦᑦᑐᑦ ᐃᖅᑲᓇᐃᔭᖅᑎᓪᓗ ᒫᓐᓇᒃᑯᑦ. ᐃᓚᖏᑦ ᐱᓕᕆᐊᒃᓴᕆᔭᐅᔪᑦ ᐋᖅᑭᒋᐊᖅᑕᐅᓯᒪᔪᑦ ᑎᒍᔭᐅᓯᒪᕝᕕᖕᓂ ᐱᔭᐅᒋᐊᓕᑦ ᑖᒃᑯᐊ ᐃᑲᔪᖅᓱᐃᔾᔪᑎᑦ ᓯᕗᓪᓕᐅᔾᔭᐅᒋᐊᖃᕐᓂᖏᓐᓄᑦ.
ᐱᔨᑦᑎᕋᖅᑕᐅᖏᓐᓇᖅᑐᑦ:
ᐃᓄᐃᑦ ᐃᓕᖅᑯᓯᑐᖃᕐᒥᒍᑦ ᐊᔪᕈᓐᓃᖅᑕᐅᕙᒃᑐᓄᑦ ᐱᓕᕆᐊᖑᔪᑦ ᐱᓕᕆᐊᖑᐃᓐᓇᕐᓂᐊᖅᑐᑦ.
ᑮᓇᐅᔭᓂᒃ ᓇᒃᓯᐅᔾᔨᓂᖅ ᐊᒡᔭᖅᓯᓂᕐᓗ ᐱᓕᕆᐊᖑᐃᓐᓇᕐᓂᐊᖅᑐᑦ. ᑮᓇᐅᔭᓂᒃ ᐊᒡᔭᖅᓯᔪᑦ ᐋᖅᑭᒃᑕᐅᓯᒪᔪᒃᑯᑦ ᐃᑲᕐᕋᑎᒎᖃᑦᑕᕐᓂᐊᖅᐳᖅ ᕿᑭᖅᑖᓗᖕᒥ ᐃᑲᔪᖅᑕᐅᕕᖕᒥ ᐊᒻᒪ ᑲᖏᖅᖠᓂᕐᒥ ᒪᒥᓴᕐᕕᖕᒥ. ᐅᖓᕙᕆᐊᖅᑕᐅᖃᑦᑕᑐᐃᓐᓇᕆᐊᖃᕐᓂᐊᖅᑐᑦ ᓇᒃᓯᐅᔾᔭᐅᔪᑦ, ᑮᓇᐅᔭᓕᕆᔨᒃᑯᓐᓂ ᐃᖅᑲᓇᐃᔭᖅᑎᑦ ᖃᔅᓯᐅᓂᖏᑦ ᐱᔾᔪᑕᐅᓗᑎᒃ.
ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᐅᑎᑦ:
ᑕᒪᕐᒥᒃ "ᐅᐸᒍᑎᓪᓗᑎᒃ" ᐳ[ᓚᕆᐊᖃᑦᑕᖅᑐᑦ ᓄᖅᑲᖅᑎᑕᐅᔪᑦ, ᑭᓯᐊᓂ ᑎᒍᔭᐅᓯᒪᕝᕖᑦ ᐱᓕᕇᓐᓇᕐᓂᐊᖅᑐᑦ ᐊᑐᐃᓐᓇᕈᕐᕕᒋᓗᒋᑦ ᐊᓄᓪᓚᒃᓰᕕᖕᒦᑦᑐᑦ ᑕᕐᕆᔭᖃᑦᑕᐅᑎᓗᑎᒃ ᐳᓛᖅᑕᐅᔪᓐᓇᕐᓗᑎᒃ, ᑕᐃᒪᐃᑦᑐᖃᕌᖓᑕ. ᐅᐸᒍᑎᓪᓗᑎᒃ ᐳᓛᕆᐊᖅᑐᑦ ᖃᐅᔨᓴᖅᑕᐅᒐᔪᖃᑦᑕᕐᓂᐊᖅᑐᑦ.
ᐅᑯᐊ ᐆᒃᑑᑎᒃᓴᑦ ᐊᑐᖅᑕᐅᓕᖅᑐᑦ ᐱᓕᕆᐊᖅ ᐃᖏᕐᕋᐃᓐᓇᖁᓪᓗᒍ, ᐊᔪᕐᓇᙱᒃᑳᖓᑦ:
- ᐱᓕᕆᔭᖅᑐᑐᐃᓐᓇᖅᑐᓂᒃ ᐱᓕᕆᔪᖃᑲᑕᙱᑦᑐᖅ, ᑳᓐᑐᓛᒃᑎᑦᑎᔩᑦ ᓯᓚᑖᓂᙶᖅᑐᑦ ᑎᒥᐅᔪᑦ ᐃᓯᕈᓐᓇᖅᑎᑕᐅᓂᐊᖅᑐᑦ ᑎᒍᔭᐅᓯᒪᕝᕕᖕᓄᑦ
- ᐃᓄᒋᐊᒋᐊᖃᙱᓐᓂᖏᑦ ᐋᖅᑭᒃᑕᐅᓯᒪᓕᖅᑐᑦ ᐱᓕᕆᐊᖑᓂᐊᖅᑐᖅ ᒪᓕᒡᓗᒍ
- ᑭᒡᓕᖃᖅᑎᑕᐅᔪᑦ ᐋᖅᑭᒃᑕᐅᓯᒪᓕᖅᑐᑦ ᖃᔅᓯᐅᓂᖏᓐᓄᑦ ᐊᐅᓚᑦᑎᕕᖃᙱᑦᑐᑦ ᐃᖅᑲᓇᐃᔭᖅᑎᑦ ᐃᓯᕈᓐᓇᖅᑐᑦ ᑎᒍᔭᐅᓯᒪᕝᕕᖕᒧᑦ
ᑖᒃᑯᐊ ᑭᒡᓕᒋᑎᑕᐅᔪᑦ ᐃᓱᒪᒋᓗᒋᑦ, ᑎᒍᔭᐅᓯᒪᕝᕖᑦ ᖃᐅᔨᓇᓱᖃᑦᑕᕐᓂᐊᖅᑐᑦ ᓯᓚᒍᐃᔭᖅᑎᑕᐅᓚᐅᑲᒍᓐᓇᕐᓂᕐᒥᒃ.
ᐱᓕᕆᐊᒃᓴᑦ ᐱᓕᕆᐊᖑᐃᓐᓇᕐᓂᐊᖅᑐᑦ ᐅᑯᓂᖓ ᑭᒡᓕᖃᖅᑎᑕᐅᓗᑎᒃ:
- ᓄᓇᓕᖕᓂ ᑲᑎᙵᕈᓘᔭᖅᐸᙱᓪᓗᑎᒃ/ᓴᖅᑭᔮᖅᐸᙱᓪᓗᑎᒃ
- ᐅᓄᓛᖃᕐᓗᑎᒃ ᒪᕐᕉᖕᓂ ᑎᒍᔭᐅᓯᒪᔪᓂᒃ ᓄᓇᓕᐸᐅᔭᕐᒥ ᐱᔨᑦᑎᕋᖅᑎᖃᕐᓗᓂ ᑎᒍᔭᐅᓯᒪᕝᕕᐅᑉ ᓯᓚᑖᓂ ᐱᓕᕆᐊᒃᓴᖃᖅᑎᑕᐅᔪᓄᑦ
- ᐃᓄᖕᓄᑦ ᓴᐳᔾᔨᔾᔪᑎᑦ ᐊᑐᖅᑕᐅᖏᓐᓇᕆᐊᖃᕐᓂᐊᖅᑐᑦ ᐃᖅᑲᓇᐃᔭᖅᑎᓄᑦ ᑎᒍᔭᐅᓯᒪᔪᓄᓪᓗ ᖃᖓᓕᒫᑦᑎᐊᖅ
- ᑕᐃᒃᑯᐊᑐᐊᕐᓗ ᐱᔭᕆᐊᖃᓪᓚᕆᑦᑐᑦ/ᐱᕐᔪᐊᓂᒃ ᐱᓕᕆᐊᒃᓴᖃᖅᑐᑦ ᑎᒍᔭᐅᓯᒪᕝᕕᐅᑉ ᓯᓚᑖᓂ ᐊᖏᖅᑕᐅᔪᑑᖃᑦᑕᕐᓂᐊᖅᖢᑎᒃ
- ᑎᒍᔭᐅᓯᒪᕝᕕᖕᒥ ᐱᓕᕆᐊᖑᔪᖅ ᐱᓕᕆᐊᖑᐃᓐᓇᕐᓂᐊᖅᑐᖅ, ᓄᕙᒡᔪᐊᕐᓇᖅ-19−ᒧᑦ ᐅᔾᔨᖅᓱᕆᐊᓕᑦ ᖃᐅᔨᒪᓇᓱᒃᑕᐅᑦᑎᐊᕈᓐᓇᖅᑐᑦ
ᐃᓐᓇᐃᑦ ᐃᓅᓯᓕᕆᔩᑦ ᐃᓅᓯᓕᕆᖃᑦᑕᕐᓂᐊᖅᐳᑦ ᐋᖅᑭᒃᑕᐅᓯᒪᔪᓂᒃ ᒪᓕᒡᓗᑎᒃ ᐱᓕᕆᔨᖃᑎᖃᕐᓗᑎᒃ/ᐃᓐᓇᕆᔭᐅᓚᐅᑲᒃᑐᑦ ᑎᒍᔭᐅᓯᒪᔪᑦ ᖃᓄᐃᑦᑑᓂᖏᑦ ᒪᓕᒃᑕᐅᓗᑎᒃ. ᐊᖏᖅᑕᐅᓯᒪᔪᑦ ᐃᓱᒪᒋᔭᐅᖃᑦᑕᕐᓂᐊᖅᑐᑦ ᐊᑦᑕᕐᓇᕈᓐᓇᕐᓂᖓ ᓴᖅᑭᔮᕐᓂᖓᓄᑦ ᐃᓐᓇᖅ ᐅᕝᕙᓘᓐᓃᑦ ᑎᒍᔭᐅᓯᒪᕝᕕᖕᒥ ᓴᐳᔾᔭᐅᓯᒪᔪᒥᒡᓗ ᐳᓛᕐᕕᖕᒦᑎᑕᐅᖃᑦᑕᕐᓂᐊᖅᐳᑦ.
ᑎᒍᔭᐅᓯᒪᕝᕖᑦ ᓂᕿᓪᓚᑦᑖᓂ ᐱᔪᒪᖃᑦᑕᔾᔮᙱᑦᑐᑦ ᓄᓇᓕᖕᓂ ᐊᒡᔭᖅᑕᐅ[ᔪᒐᓗᐊᓂᒃ. ᑎᒍᔭᐅᓯᒪᔪᓕᕆᔨᒃᑯᑦ ᓂᐅᕕᖃᑦᑕᕐᓂᐊᖅᑐᑦ ᓂᕿᓪᓚᑦᑖᓂᒃ ᓂᐅᕕᐊᒃᓴᓂᒃ. ᑎᒍᔭᐅᓯᒪᕝᕕᖕᒥ ᓂᕆᔭᒃᓴᑦ ᑕᑯᒃᓴᐅᑎᑕᐅᓂᐊᖅᑐᑦ ᐃᓚᒋᐊᖅᑕᐅᓯᒪᔪᓂᒃ. ᐊᒻᒪ ᓱᓕ, ᑎᒍᔭᐅᓯᒪᔪᓕᕆᔨᒃᑯᑦ ᕿᒥᕐᕈᔪᑦ ᐊᔪᕐᓇᙱᑐᐃᓐᓇᕆᐊᓕᖕᓂᒃ ᐃᓚᓕᐅᑎᓂᐊᕐᓗᒋᑦ ᓂᕿᓪᓚᑦᑖᑦ ᓂᐅᕕᕐᕕᕌᓚᒥ ᓂᐊᕕᐊᒃᓴᐅᓲᓂᒃ.
ᐃᓚᒋᔭᐅᖕᒥᔪᖅ ᒪᓕᒋᐊᓕᖕᓄᑦ ᓄᑖᙳᕆᐊᖅᓯᒪᔪᓄᑦ ᐅᖃᐅᓯᐅᓵᖅᓯᒪᔪᓄᑦ, ᑎᒍᔭᐅᓯᒪᔪᓕᕆᔨᒃᑯᑦᒃ ᐊᓯᖏᓪᓗ ᒪᓕᒐᓕᕆᔨᒃᑯᓐᓂ ᐱᓕᕆᖃᑎ[ᒋᑦ ᐱᓕᕆᕗᑦ ᐃᓄᐃᓴᒃᖠᒋᐊᖅᑎᑦᑎᓇᓱᒃᖢᑎᒃ ᑎᒍᔭᐅᓯᒪᔪᓂᒃ ᐊᔪᕐᓇᙱᑦᑕᕌᖓᑦ.
ᐃᖅᑲᖅᑐᖅᑕᐅᓯᒪᔪᓕᒫᑦ ᐊᓄᓪᓚᒃᓯᐊᖑᔪᑦ ᑎᒍᔭᐅᓯᒪᕝᕕᖕᓂᒃ ᕿᒥᕐᕈᔭᐅᓚᐅᖅᐳᑦ ᖃᐅᔨᔭᐅᔪᒪᓪᓗᑎᒃ ᐊᓂᑎᑕᐅᓵᓕᔪᓐᓇᕐᓂᖏᑦ. ᑖᒃᑯᐊ ᕿᒥᕐᕈᔭᐅᓚᐅᖅᑎᓪᓗᒋᑦ, ᑲᑎᖦᖢᒋᑦ ᑎᓴᒪᐅᓚᐅᖅᐳᑦ ᑎᒍᔭᐅᓯᒪᔪᑦ ᐊᓂᑎᑕᐅᓵᓕᓂᐊᖅᑐᑦ ᕿᑭᖅᑖᓗᖕᒥ ᐃᑲᔪᖅᑕᐅᕕᖕᒥ ᒫᓐᓇ ᐱᒋᐊᖅᖢᒍ ᓄᕕᐱᕆ 25, 2020-ᒧᑦ ᑎᑭᖦᖢᒍ ᑎᓴᒪᑦ ᑎᒍᔭᐅᓯᒪᔪᑦ ᐊᓂᑎᑕᐅᓵᓕᓛᖅᖢᑎᒃ ᑲᖏᖅᖠᓂᕐᒥ ᒪᒥᓴᕐᕕᖕᒥ ᒫᓐᓇ ᐱᒋᐊᖅᖢᒍ ᑎᓯᐱᕆ 1, 2020-ᒧᑦ ᑎᑭᖦᖢᒍ.
ᐱᒋᐊᖅᖢᒍ ᓄᕕᐱᕆ 18, ᓄᓇᕗᒻᒥ ᐃᖅᑲᖅᑐᐃᕕᒃᑯᑦ ᑐᓴᖅᑎᑦᑎᓚᐅᖅᐳᑦ ᐊᐅᓚᑦᑎᔾᔪᑎᑦ ᖃᔅᓰᓐᓇᕈᕆᐊᖅᑕᐅᓂᖏᓐᓂᒃ, ᑭᓯᐊᓂ, ᓇᓗᓇᐃᖅᓯᕗᑦ ᑎᒍᔭᐅᓯᒪᔪᑦ ᐊᑭᓕᖅᑕᐅᓪᓗᑎᒃ ᐊᓂᑎᑕᐅᔪᑦ ᕿᒥᕐᕈᔭᐅᔪᑦ ᐃᓄᖕᓄᑦ ᐃᖅᑲᒃᑐᖅᑕᐅᖅᑳᕋᑎᒃ ᑎᒍᔭᐅᓯᒪᔪᑦ ᐱᓕᕆᐊᖑᐃᓐᓇᖃᑦᑕᕐᓂᐊᖅᑐᑦ.
ᓄᓇᕗᒻᒥᐅᑕᖅᑎᒍᑦ ᖃᓄᐃᙱᑦᑎᐊᕈᓯᑦᑎᓐᓄᑦ ᐅᕙᑦᑎᓐᓄᑦ ᑕᒪᐃᓐᓄᑦ ᑲᒪᒋᔭᒃᓴᕆᒐᑦᑎᒍᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐋᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᖃᓂᒌᓗᐊᖅᑕᐃᓕᕙᒡᓗᓯ, ᐃᖢᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᑦᑕ.