ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓄᑖᙳᕆᐊᖅᓯᒪᔪᑦ - ᑎᓯᐱᕆ 18, 2020

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓄᑖᙳᕆᐊᖅᓯᒪᔪᑦ - ᑎᓯᐱᕆ 18, 2020

ᓯᕗᓕᖅᑎᒥᑦ ᑐᓴᒐᒃᓴᖅ:

ᐅᓪᓛᒃᑯᑦ. ᐅᓪᓗᒥ, ᓄᓇᕗᒻᒥ ᓄᕙᒡᔪᐊᕐᓇᖅ-19−ᑖᖅᑐᖃᖅᓯᒪᙱᓚᖅ.

ᓄᓇᕗᒻᒥ ᒫᓐᓇ ᑲᑎᖦᖢᒋᑦ 34−ᖑᓕᖅᑐᑦ ᓄᕙᒃᔪᐊᕐᓇᖅ-19−ᒧᑦ ᖃᓂᒻᒪᒃᑐᑦ. ᑲᑎᖦᖢᒋᑦ ᐃᓄᐃᑦ ᒫᓐᓇᒧᑦ ᑎᑭᖦᖢᒍ ᖃᐅᔨᓴᖅᑕᐅᓯᒪᓕᖅᑐᑦ 5478−ᖑᓕᖅᑐᑦ. 631 ᐃᓄᐃᑦ ᒫᓐᓇ ᖃᐅᔨᓴᖅᑕᐅᓯᒪᓕᖅᑐᑦ. 225 ᓄᓇᕗᒻᒥᐅᑦ ᖃᓂᒻᒪᓚᐅᖅᑐᑦ ᖃᓄᐃᑦᑐᓐᓃᖅᑐᑦ.

ᐅᓇ ᑕᒪᑐᒪᓂ ᐊᕐᕌᒍᒥ  ᑭᖑᓪᓕᖅᐹᕆᓂᐊᖅᐸᕗᑦ ᑕᓚᕖᓴᒃᑯᑦ ᑕᑯᒃᓴᐅᑎᑕᕗᑦ. ᓯᕗᒻᒧᐊᒃᐸᓪᓕᐊᓗᑕ, ᐱᓇᓱᐊᕈᓯᐅᑉ ᓄᙳᐊᓂ ᐊᕐᕕᐊᓂ ᖃᓂᒪᒃᑐᑦ ᖃᔅᓯᐅᓂᖏᑦ ᑕᒪᕐᒥᒃ ᓇᒡᒐᔾᔭᒥ ᐅᖃᐅᓯᐅᓂᐊᖅᐳᑦ, ᐊᒃᓱᕈᖅᖢᑎᒃ ᐱᓕᕆᖃᑦᑕᖅᑐᑦ ᐊᐃᑦᑐᐃᓇᖅᑐᓂᑦ ᖃᐅᔨᓴᖅᑎᑦ ᓄᖅᑲᖓᓚᐅᑲᒋᐊᖃᓪᓚᕆᒃᑐᑦ ᓄᖅᑲᖓᖁᓪᓗᒋᑦ!   ᑕᐃᒪᐃᖃᑦᑕᕐᒪᑦ, ᐊᕐᕕᐊᑦ ᓯᓚᑖᓂ ᖃᓂᒻᒪᒃᑐᖃᖅᐸᑦ, ᓇᓗᓇᐃᔭᖅᓯᒪᓗᑎᒃ ᐅᖃᐅᓯᕆᑲᐅᑎᒋᓂᐊᖅᐸᕗᑦ.

ᖁᕕᐊᓱᒡᕕᖕᒧᑦ ᑎᑭᓯᒪᓪᓚᕆᓕᕐᒥᑎᓪᓗᑕ, ᐃᖅᑲᐃᑎᑦᑎᔭᕆᐊᖃᕆᕗᖓ ᓱᓕ, ᑕᒪᒃᑯᐊ ᐃᓅᖃᑎᒌᓂ ᑲᑎᓐᓂᕆᔭᐅᕙᒃᑐᑦ ᐃᓄᑭᑎᑉᐸᒡᓗᒋᑦ.

ᖁᕕᐊᓱᖃᑎᖃᕈᕕᑦ ᐃᓄᖕᓂᒃ ᐃᒡᓗᒥᐅᑕᐅᖃᑎᒋᙱᑕᕐᓂᒃ, ᐊᑐᐃᓐᓇᕆᐊᕐᓗᒍ ᑕᐃᑯᓄᖓᑦᑕᐃᓐᓇᖅ ᐃᓅᖃᑎᒋᕙᒃᑕᕐᓄᑦ. ᐱᒡᓕᖅᑕᙱᓪᓗᑎᑦ ᑲᑎᓐᓂᕆᔭᐅᔪᒥᑦ ᐊᓯᖏᓐᓄᑦ ᓄᑖᑦᑎᐊᓄᑦ ᐱᓕᕆᖃᑎᒌᒃᑐᓄᑦ ᐃᓄᖕᓄᑦ − ᑕᒪᓐᓇ ᑕᕝᕙ ᐃᓯᖅᓯᑦᑎᑦᑎᔾᔪᑎᒋᕙᒃᑕᕗᑦ ᓄᕙᒡᔪᐊᕐᓇᖅᑐᒥᒃ.

ᐃᖅᑲᐃᑎᑦᑎᔾᔪᑎ, ᐃᓱᓕᑦᑕᕐᕕᒃᑕᖃᕐᒪᑦ ᖃᔅᓯᐅᔪᓐᓇᕐᓂᖏᓐᓄᑦ ᑲᑎᖃᑎᒌᑐᐃᓐᓇᕆᐊᓖᑦ ᐃᒡᓗᕐᔪᐊᑉ ᐃᓗᐊᓂ, ᑕᐃᒃᑯᐊᓗ ᐃᓂᖃᖅᑐᑦ ᑕᕙᓂ ᐃᒡᓗᒥᐅᑕᐅᖃᑎᒌᓂ. ᐊᕐᕕᐊᕐᒥᐅᒃ ᐳᓛᖃᑦᑕᐅᑎᔭᕆᐊᖃᙱᓚᑦ, ᑲᖏᖅᖠᓂᕐᒥᐅᑦ ᑎᑭᕋᕐᔪᐊᕐᒥᐅᓪᓗ ᐳᓛᖅᑎᖃᕈᓐᓇᖅᐳᑦ 10−ᓂᒃ, ᑕᐃᒃᑯᐊᓗ ᑕᕝᕙᓂ ᐃᒡᓗᒥ ᐊᖏᕐᕋᓖᑦ, ᐊᓯᓕᒫᙱᓪᓗ ᓄᓇᓖᑦ 15−ᓂᒃ ᐳᓛᖅᑎᖃᕈᓐᓇᖅᖢᑎᒃ, ᑕᐃᒃᑯᐊᓗ ᑕᕝᕙᓂ ᐃᒡᓗᒥ ᐃᒡᓗᓖᑦ. ᑕᒪᓐᓇ ᑕᐅᑐᒃᑕᐅᓪᓗᐊᙱᓚᖅ ᐱᔾᔪᑕᐅᓗᓂ ᑲᑎᒪᑎᑦᑎᓂᐊᕐᓗᓂ ᖁᕕᐊᓱᖃᑎᒌᒃᑎᑦᑎᓂᐊᕐᓗᓂᓗ. ᐱᓕᕆᐊᕆᔭᕐᓂᒃ ᑲᔪᓯᑎᑦᑎᑦᑏᓐᓇᕆᑦ ᐅᔾᔨᖅᓱᑦᑎᐊᕐᓗᑎᓪᓗ.

ᖃᖏᖅᖠᓂᓕᒫᒧᑦ ᑎᑭᕋᕐᔪᐊᓕᒫᒧᓪᓗ,  ᖃᔅᓯᐅᔪᓐᓇᖅᑎᑕᐅᔪᑦ ᓯᐊᕐᕆᔮᕐᕕᖕᓂ ᓄᓇᓕᖕᓂᓗ ᐱᙳᐊᕐᕕᖕᓂ 25−ᖑᕗᑦ ᐃᓄᐃᑦ ᐅᕝᕙᓘᓐᓃᑦ 50−ᐳᓴᖓᓄᑦ ᐃᓐᓄᒍᓐᓴᕐᓂᕆᔭᖓᑕ, ᓇᓕᐊᒃ ᐅᓄᙱᓐᓂᖅᓴᐅᒃᐸᑦ. ᐊᓯᓕᒫᖏᓐᓄᑦ ᓄᓇᓕᖕᓄᑦ ᑭᑭᑕᐅᓪᓗᓂ ᐊᕐᕕᐊᑦ,  ᖃᔅᓯᐅᔪᓐᓇᖅᑎᑕᐅᔪᑦ ᓯᐊᕐᕆᔮᕐᕕᖕᓂ ᓄᓇᓕᖕᓂᓗ ᐱᙳᐊᕐᕕᖕᓂ 50−ᐅᕗᑦ ᐃᓄᐃᑦ ᐅᕝᕙᓘᓐᓃᑦ 50−ᐳᓴᖓᓄᑦ ᐃᓐᓄᒍᓐᓴᕐᓂᕆᔭᖓᑕ, ᓇᓕᐊᒃ ᐅᓄᙱᓐᓂᖅᓴᐅᒃᐸᑦ. ᐊᒻᒪᐃᓛᒃ, ᑕᒪᓐᓇ ᐱᔾᔪᑕᐅᔪᓐᓇᙱᓚᖅ ᑲᔪᓯᑎᑦᑎᓂᐊᕐᓗᓂ ᖁᕕᐊᓱᒡᕕᖕᒥ ᐱᙳᐊᕐᓂᕐᓂᒃ ᓄᓇᓕᖕᓂᓘᓐᓃᑦ ᑲᔪᓯᑎᑕᐅᔪᓂᒃ. ᑭᓯᐊᓂ ᐱᔪᓐᓇᖅᑎᑕᐅᓯᒪᒍᕕᑦ ᐃᓱᒪᒋᔭᐅᓗᓂᓗ ᖁᐊᖅᓵᕐᓇᙱᓐᓂᖓᓂᒃ ᓘᒃᑖᖅ ᐹᑐᓴᓐ−ᒧᑦ, ᑲᔪᓯᓇᓱᒃᑕᐃᓕᒋᑦ. ᐊᕐᕕᐊᕐᒥ ᓱᓕ ᐆᒻᒪᕆᒃᑐᓂᒃ ᐱᑕᖃᖅᑎᓪᓗᒍ, ᓱᓕ ᑖᒃᑯᐊ ᓇᒧᙵᖅᑕᐃᓕᒪᑎᑕᐅᕗᑦ, ᑖᒃᑯᓂᖓᓗ ᐃᓂᓂᒃ ᐊᑐᕈᓐᓇᙱᖦᖢᑎᒃ.

ᖃᓄᐃᓕᐅᕐᓂᕆᔭᑎᑦ ᑕᒪᑐᒪᓂ ᖁᕕᐊᓱᒡᕕᖕᒥ ᐊᒃᑐᖅᓯᕙᒃᐳᑦ ᑭᒃᑯᓕᒫᓂᒃ ᐊᕙᑎᖕᓃᑦᑐᓂᒃ. ᖃᐅᔨᒪᕗᖓ ᑕᒪᓐᓇ ᐊᔪᕐᓇᕐᓗᓂ ᐊᓯᔾᔨᖅᓯᒪᓂᐊᖅᐳᖅ ᐊᕐᕌᖑᓂ ᑭᖑᓂᑦᑎᓐᓂ ᐊᑐᖅᐸᓚᐅᖅᑕᑦᑎᓐᓂᒃ, ᑭᓯᐊᓂᓗ ᑲᔪᓰᓐᓇᕆᔅᙳ ᐊᑐᐃᓐᓇᖅᐸᒡᓗᓯ ᓄᓇᓕᖕᓂᒃ ᑲᒪᒋᔭᖃᑦᑎᐊᕐᓂᕐᒥᒃ.

ᐊᓯᖏᓐᓂ ᑐᓴᒐᒃᓴᓂ, ᐊᐱᕆᓚᐅᖅᐸᕋ ᓘᒃᑖᖅ ᐹᑐᓴᓐ ᖃᐅᔨᒋᐊᖁᓪᓗᒍ ᐱᑐᐃᓐᓇᐅᙱᑦᑐᒥᒃ ᐃᓄᖕᓄᒥᒃ ᑭᑭᑕᐅᖁᓪᓗᒍ ᐊᑐᖅᑕᐅᓪᓚᕆᒋᐊᖃᖅᐸᒃᖢᓂ ᐱᓕᕆᔨᐅᓂᖓᓄᑦ ᐱᓇᓱᐊᕈᓯᐅᓂᐊᖅᑐᒧᑦ.  ᖁᕕᐊᓱᑦᑎᐊᖅᐳᖓ  ᑕᒪᕐᒥᑦᑎᐊᖅ ᒪᒃᑯᒃᑐᑦ ᓄᓇᕗᒻᒥᐅᑦ ᑐᓴᖅᑎᑦᑐᓐᓇᕋᒃᑭᑦ ᓵᓐᑕ ᑲᓛᓯ ᐊᖏᖅᑕᐅᓯᒪᓂᖓᓂᒃ ᑕᒪᐅᙵᕈᓐᓇᖅᑎᑕᐅᓪᓗᓂ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒧᑦ ᐊᑎᕆᐊᖃᙱᖦᖢᓂ 14−ᓄᑦ ᐅᓪᓗᓄᑦ ᐅᐸᒃᑕᐅᑦᑕᐃᓕᒪᔭᕆᐊᖃᕐᓂᕐᒥᒃ. ᑕᒪᓐᓇ ᑖᔅᓱᒥᖓ ᐱᕕᖃᖅᑎᑦᑎᓂᐊᖅᐳᖅ ᐱᙳᐊᓕᐅᙱᓐᓇᖃᑦᑕᕈᓐᓇᕐᓗᓂ ᐱᓕᕆᖃᑎᒋᓗᓂᒋ ᐱᓕᕆᔨᓂ ᐱᕙᒌᔭᖅᐸᓪᓕᐊᓪᓗᓂᓗ ᐱᓕᕆᕐᔪᐊᕐᓇᖅᑐᒧᑦ ᖁᕕᐊᓱᒡᕕᐅᓂᐊᓕᕐᒥᔪᒧᑦ. ᑕᐃᒪᐃᓐᓂᖓᓄᑦ, ᐃᓱᒫᓗᙱᓪᓗᓯ, ᓴᓐᑕ ᑲᓛᓯ ᓄᓇᓕᖕᓄᐊᕐᓂᐊᖅᐳᖅ ᓄᓇᕗᒻᒥ ᑕᒪᑐᒪᓂ ᐊᕐᕋᒍᒥ.

ᖁᔭᓐᓇᒦᒃᑲᓐᓂᕈᒪᕙᔅᓯ ᑕᒪᔅᓯᑦᑎᐊᖅ ᓄᓇᕗᒻᒥᐅᓯᒍᑦ ᐅᑕᖅᑭᑦᑎᐊᖃᑦᑕᕈᓐᓇᕋᔅᓯ, ᐃᒃᐱᒋᔭᖃᑦᑎᐊᖃᑦᑕᕈᓐᓇᕋᔅᓯ ᐃᓄᑦᑎᐊᕙᐅᖃᑦᑕᕋᔅᓯᓗ ᐊᕐᕌᒎᓵᖅᑐᒥ. ᑕᒪᓐᓇ ᐊᒃᓱᕈᕐᓇᖃᑦᑕᖅᓯᒪᕗᖅ, ᑭᓯᐊᓂᓗ ᖁᔭᒋᓪᓗᒍ ᑕᒪᐃᓐᓄᑦᑎᐊᖅ ᐃᓕᑦᑎᓂᕆᔭᑦᑎᓐᓄᑦ ᑕᒪᑐᒧᖓ. ᑕᐃᒪᑐᖅ ᐃᓕᔅᓯᓗᑦᑕᐅᖅ ᖁᕕᐊᓱᐃᓐᓇᕐᓂᐊᖅᐳᓯ ᖃᓄᐃᙱᑦᑎᐊᕐᓗᓯᓗ ᑕᒪᑐᒪᓂ ᖁᕕᐊᓱᒡᕕᖕᒥ ᖁᕕᐊᒋᓗᒍᓗ ᖁᐊᖅᓵᕐᓇᙱᑦᑐᒃᑯᑦ.

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᑐᓴᒐᒃᓴᖏᑦ ᓄᑖᑦ:

ᐅᓪᓛᒃᑯᑦ,

ᐅᓪᓗᒥ, ᖁᕕᐊᓱᒃᐳᖓ ᐅᖃᕈᓐᓇᓕᕋᒪ ᓯᐊᒻᒪᒃᐸᓪᓕᐊᓂᕆᔭᖓ ᓴᓂᑭᓗᐊᒥ ᐃᓱᓕᓪᓚᑦᑖᕐᓂᖓᓂᒃ. ᑕᒪᓐᓇ ᑐᓴᕈᒥᓇᖅᖢᓂ ᑐᓴᒐᒃᓴᐅᕗᖅ, ᑕᒪᕐᒥᒡᓗ ᓄᓇᓕᖕᒥᐅᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᓪᓗ ᐃᖅᑲᓇᐃᔭᖅᑏᑦ ᐃᓕᓴᕆᔭᐅᔭᕆᐊᖃᖅᐳᑦ ᑕᒪᐅᖓ ᑎᑭᐅᑎᓯᒪᓕᕐᓂᖏᓐᓄᑦ.

ᑕᐃᒪᓐᓇ ᐅᖄᓪᓚᓚᐅᕐᓗᖓ, ᓴᓂᑭᓗᐊᒥᐅᓕᒫᑦ ᑎᓕᐅᖅᐸᒃᑲ ᐊᕕᒃᓯᒪᓂᓕᒫᓃᑦᑐᓪᓗ ᐅᔾᔨᕐᓱᐃᓐᓇᖃᑦᑕᖁᓗᒋᑦ ᒪᓕᖕᓂᕐᒥᒃ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖅᑕᐅᔭᕆᐊᓕᖕᓂᒃ. ᑕᒪᓐᓇ ᐱᒻᒪᕆᐅᓂᖅᓴᒻᒪᕆᐅᓕᕐᓂᐊᖅᐳᖅ ᑎᑭᐅᑎᕙᓪᓕᐊᓕᖅᑎᓪᓗᑕ ᖁᕕᐊᓱᒡᕕᖕᒧᑦ ᑕᒪᒃᑯᐊ ᑲᑎᓐᓂᕆᔭᐅᕙᒃᑐᑦ ᐊᑐᖅᑕᐅᓂᖅᓴᐅᕙᓪᓕᐊᓕᖅᑎᓪᓗᒋᑦ.

ᖃᐅᔨᓵᓪᓚᓚᐅᖅᖢᒍ ᓯᐊᒻᒪᒃᓯᒪᓂᕆᓕᖅᑕᖓ ᐊᕐᕕᐊᕐᒥ ᐃᓱᒪᒋᓪᓗᒍᓗ ᓱᓕ ᐅᓄᒃᑕᖃᕐᓂᖓᓂᒃ ᐅᐸᒃᑕᐅᑦᑕᐃᓕᒪᔪᓂᒃ ᑲᖏᖅᖠᓂᕐᒥ ᑎᑭᕋᕐᔪᐊᕐᒥᓗ, ᐆᓐᑭᒃᓯᓯᒪᓕᖅᐳᖓ ᓱᓕ ᐱᕕᒃᓴᐅᙱᓐᓂᖓᓂᒃ ᐊᔪᕐᓇᕈᓐᓃᖅᑎᑦᑎᕚᓪᓕᕆᐊᒃᓴᖅ ᑕᒪᒃᑯᓂᖓ ᑭᒃᑯᑐᐃᓐᓇᓄᑦ ᖃᓄᒪᑎᑦᑎᑦᑕᐃᓕᒪᓂᕐᒧᑦ ᐊᔭᖅᑭᑦᑕᕈᑎᓂᒃ. ᒫᓐᓇ ᐊᑐᖅᑕᐅᔪᑦ ᑕᒪᐃᓐᓂ ᓄᓇᓕᓕᒫᓂ ᐊᔾᔨᒌᓐᓇᕐᓂᐊᖅᐸᖏᑦ ᑭᓯᐊᓂ ᐊᓯᐊᓂᒃ ᑐᓴᖅᑎᑦᑎᔪᖃᒃᑲᓐᓂᖅᐸᑦ.

ᖁᕕᐊᓱᖕᕕᖕᒧᑦ ᑎᑭᐅᑎᕙᓪᓕᐊᓕᖅᑎᓪᓗᑕ, ᓂᕆᐅᒋᔭᖃᖅᑐᒻᒪᕆᐅᕗᒍᑦ ᓯᕗᓪᓕᖅᐹᒥᒃ ᑎᑭᓐᓇᔭᖅᑐᓂᒃ ᑲᐴᑎᓂᒃ ᓄᓇᕗᒻᒧᑦ ᑎᑭᓐᓂᐊᖅᖢᑎᒃ. ᓂᕆᐅᒋᔭᖃᖅᑐᖃᖅᐳᖅ ᑲᓇᑕ ᐊᖏᖅᓯᓂᐊᕐᓂᖓᓂᒃ ᐆᒥᖓ, Moderna ᑲᐴᑎᒥᒃ ᐊᑐᖅᑕᐅᓂᐊᕐᓗᓂ ᑎᑭᑉᐸᓪᓕᐊᔪᓂ ᐅᓪᓗᓂ, ᒐᕙᒪᑐᖃᒃᑯᓪᓗ ᓇᓗᓇᐃᖅᓯᒪᓕᖅᐳᑦ ᓂᕆᐅᒋᔭᖃᓪᓗᐊᕐᓂᑦᑎᓐᓂᒃ ᑲᐱᔭᐅᓇᔭᕐᓂᕐᓂᒃ ᖃᖓᑦᑎᐊᒃᑲᓐᓂᐊᕐᔪᙳᖅᐸᑦ.

ᖃᐅᔨᒪᙱᓚᒍᑦ ᓱᓕ ᖃᖓᒃᑯᑦ ᑕᒪᒃᑯᐊ ᑲᐱᔭᐅᔾᔪᑎᒃᓴᐃᑦ ᑎᑭᓛᕐᒪᖔᑕ ᖃᓄᕐᓗ ᐊᖏᑎᒋᔪᒥᒃ ᑲᐱᔭᐅᔾᔪᑎᒃᓴᒥᒃ ᑕᐃᒃᑯᐊ ᑎᑭᑦᑐᑦ ᐃᓚᖃᕐᓂᐊᕐᒪᖔᑕ, ᑭᓯᐊᓂᓗᑦᑕᐅᖅ, ᖃᔅᓯᑲᓪᓚᖕᓂᒃ ᑲᔪᓯᑎᑦᑎᓕᕐᓂᕐᒧᑦ ᐊᑐᖅᑕᐅᔪᓐᓇᖅᑐᓂᒃ ᐱᕙᒌᔭᐅᕗᒍᑦ, ᑕᒪᒃᑯᐊᓗ ᑲᔪᓯᑎᑕᐅᓂᐊᖅᖢᑎᒃ ᐱᔾᒧᑎᖃᕋᔭᖅᖢᓂ ᑕᒪᓐᓇ ᖃᖓᒃᑯᑦ ᖃᓄᕐᓗ ᐊᖏᑎᒋᔪᒥᒃ ᑲᐱᔭᐅᔾᔪᑎᒥᒃ ᐱᒻᒪᖔᑦᑕ.

ᐱᕕᒃᓴᖃᕐᓂᕐᓂ ᐅᖃᓪᓚᕆᒃᑲᓐᓂᕈᒪᕗᖓ ᑖᓐᓇ ᑲᐱᔭᐅᔾᔪᑎᒃᓴᖅ ᖁᐊᖅᓵᕐᓇᙱᓐᓂᖓᓂᒃ. ᑖᓐᓇ ᐊᑐᖅᑕᐅᔭᕆᐊᖃᖅᑐᓕᒫᓂᒃ ᖃᐅᔨᓴᖅᑕᐅᓂᕐᓂᒃ ᐊᑐᖅᓯᒪᕗᖅ, ᐆᒃᑐᖁᑕᐅᓯᒪᓪᓗᓂᓗ 30,000-ᓄᑦ ᐃᓄᖕᓄᑦ ᐱᑎᑦᑎᓂᐊᖅᖢᓂᓗ ᓄᓇᕗᒻᒥᐅᓂᒃ ᑲᐱᔭᐅᔪᓂᒃ ᓴᐳᔾᔭᐅᓯᒪᓂᕐᒥᒃ ᑕᒪᑐᒪᙵ ᖃᓂᒪᓐᓇᖅᑐᒥᑦ. ᖁᔭᓐᓇᒦᒃ.

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓄᑦ ᓴᐳᔾᔨᓯᔪᒪᓪᓗᑎᒃ ᓄᓇᕗᒻᒥᐅᓂᒃ ᓄᕙᒃᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:

ᒐᕙᒪᒃᑯᓐᓂᓕᒫᖅ ᖁᕕᐊᓱᖕᓇᒥ ᒪᑐᓯᒪᓂᐊᖅᑐᑦ

ᑕᒪᕐᒥᑦᑎᐊᖅ ᓄᓇᕗᑦ ᒐᕙᒪᖓᑕ ᑎᑎᕋᕐᕕᖏᑦ ᒪᑐᓯᒪᓂᐊᖅᐳᑦ ᑎᓯᐱᕆ 24−ᒥᑦ ᔭᓄᐊᕆ 3−ᒧᑦ, ᑭᑭᑕᐅᓗᑎᒃ ᓇᓗᓇᐃᖅᑕᐅᓯᒪᔪᑦ ᐃᓃᑦ ᒪᑐᐃᙶᕆᐊᖃᖅᑐᑦ.

ᓄᓇᕗᑦ ᒐᕙᒪᒃᑯᖏᑕ ᐱᔨᑦᑎᖃᕐᓂᕆᕙᒃᑕᖏᑦ ᐱᑎᑕᐅᖃᑦᑕᕐᓂᐊᖅᐳᑦ ᒪᓕᒃᑐᖃᕐᓗᓂ ᑭᒃᑯᑐᐃᓐᓇᓄᑦ ᖃᓄᐃᙱᑎᑦᑎᓂᕐᒧᑦ ᐊᑐᖅᑕᐅᔭᕆᐊᓕᖕᓂᒃ ᐃᓕᓯᒪᓗᑎᒃ, ᑕᒪᒃᑯᐊᓗ ᐊᓯᔾᔨᓯᑳᓪᓚᑐᐃᓐᓇᕆᐊᖃᖅᖢᑎᒃ.

ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ

• ᕿᑭᖅᑕᓂ ᐋᓐᓂᐊᕐᕕᒃ ᐱᔨᑦᓯᕋᖅᑎᓕᒫᖏᓐᓄᑦ ᐃᓚᐅᙱᓪᓗᑎᑦ ᒪᒥᓴᕐᓂᕆᔭᐅᔪᑦ.
• ᐊᖏᕐᕋᕆᔭᐅᔪᓂ ᑲᒪᒋᔭᖃᖅᐸᖕᓂᖅ ᐱᔨᑦᑎᕋᕐᓂᕆᔭᐅᕙᒃᑐᑦ ᒪᑐᓯᒪᓂᐊᖅᐳᑦ. ᐊᑐᖅᑕᐅᓪᓚᕆᒋᐊᖃᖅᑐᓄᑦ ᓄᖅᑲᖓᓐᓇᓄᑦ, ᑭᓯᐊᓂᓗ ᒪᓂᒪᓂᐊᖅᖢᑎᒃ ᑐᐊᕕᕐᓇᖅᑐᓄᑦ.
  • ᐅᔾᔨᕆᔪᖃᕐᓕ, ᐃᓚᖏᑦ ᐊᖏᕐᕋᕆᔭᐅᔪᓂ ᐱᔨᑦᑎᕋᕐᓃᑦ ᑭᕙᓪᓕᕐᒥ ᓄᖅᑲᖓᑎᑕᐅᕗᑦ ᑕᐃᒪᐃᔾᔪᑎᖃᖅᖢᑎᒃ ᓄᕙᒡᔪᐊᕐᓇᖅ-19−ᒥᒃ ᓇᒧᙵᕈᓘᔭᓕᖅᑐᒥᒃ.
• ᐅᐸᒃᐸᒃᑐᓄᑦ ᑲᒪᒋᔭᖃᕐᕐᒧᑦ ᐃᓗᐊᖅᓴᐃᕝᕖᑦ ᒪᑐᓯᒪᓂᐊᖅᐳᑦ ᑎᓯᐱᕆ 25, 28 ᐊᒻᒪᓗ ᔭᓄᐊᕆ 1, ᑭᓯᐊᓂᓗ ᐅᓪᓗᓂ ᐊᓯᖏᓐᓂ ᒪᑐᐃᙶᕐᓂᐊᖅᖢᑎᒃ.
• ᓄᓇᓕᖕᓂ ᐋᓐᓂᐊᕕᓕᐊᕐᕖᑦ ᒪᑐᐃᖔᕐᓂᐊᖅᐳᑦ, ᑭᓯᐊᓂᓗ, ᑐᐊᕕᕐᓇᖅᑐᑦ ᑐᐊᕕᕐᓇᖅᑐᓄᓪᓗ ᐱᔨᑦᑎᕋᕐᓃᑦ ᒪᓂᒪᓂᐊᖅᐳᑦ ᑲᒪᒋᔭᖃᕐᓂᕐᒧᑦ ᐅᑕᖅᖕᔪᑎᒍᑦ ᐱᔨᑦᑎᕋᕐᓂᕆᔭᐅᕙᒃᑐᑎᒍᑦ ᐅᑯᓄᖓ ᐱᓪᓗᐊᑕᕐᓄᑦ ᐱᔨᑦᑎᕋᕐᓂᐅᕙᒃᑐᓄᑦ ᑲᔪᓯᑎᑦᑎᓗᑎᒃ:
  • ᑐᐊᕕᕐᓇᖅᑐᓄᑦ/ᑐᐊᑯᕐᓇᓪᓚᕆᒃᑐᓄᑦ ᑲᒪᒋᔭᖃᕐᓂᖅ, ᐋᓐᓂᐊᖅᑐᓕᕆᓂᖅ, ᐃᓂᒃᓴᓕᐅᖅᑕᐅᓯᒪᔪᓪᓗ ᖁᐊᖅᓵᕐᓇᖅᑐᒦᑦᑐᓄᑦ ᐱᓕᕆᕕᐅᕙᒃᑐᓄᑦ ᑲᔪᓯᑎᑕᐅᖏᓐᓇᕐᓂᐊᖅᐳᖅ. 
  • ᖃᐃᙱᑦᑐᓄᑦ ᓄᑕᖅᑲᓄᑦ ᓯᖓᐃᔪᓕᕆᓂᕐᒧᓪᓗ ᐱᓕᕆᐊᖑᕙᒃᑐᑦ ᑲᔪᓰᓐᓇᕐᓂᐊᖅᐳᑦ ᐱᓕᕆᓐᓇᕐᓂᓕᒫᒥᒍᑦ.
  • ᐊᑐᖅᑕᐅᕙᒃᑐᑦ ᐋᓐᓂᐊᕆᔭᐅᓪᓚᕆᓕᖅᑐᓄᑦ ᖃᓄᐃᙱᑦᑐᓄᓪᓗ−ᐊᕐᓇᓄᑦ/ᖃᓄᐃᙱᑦᑐᓄᓪᓗ ᐊᖑᑎᓄᑦ ᐱᓕᕆᖃᑎᒌᖕᓃᑦ ᓄᖅᑲᖅᑎᑕᐅᓂᐊᖅᐳᑦ ᑕᒪᑐᒪᓂ ᐊᑐᖅᑕᐅᔪᒦᓐᓂᕐᒥᓂ ᐱᕕᒃᓴᖃᖅᑎᑦᑎᔪᒪᓂᕐᒥᓄᑦ ᐊᖏᒡᓕᒋᐊᖅᓯᒪᔪᓄᑦ ᑲᒪᒋᔭᖃᓪᓚᕆᖕᓂᕐᒧᑦ ᐱᔨᑦᑎᕋᕐᓂᕆᔭᐅᕙᒃᑐᓄᑦ.
• ᐃᓱᒪᒃᑯᑦ ᐃᓗᐊᖅᓴᐃᕙᖕᓂᕐᒧᑦ ᐃᓗᐊᖅᓴᐃᔩᑦ ᐅᖃᐅᔾᔪᐃᔩᓪᓗ ᐃᖅᑲᓇᐃᔭᖃᑦᑕᕐᓂᐊᖅᐳᑦ ᐊᑕᖏᖅᑐᒃᑯᑦ.
• ᑭᒃᑯᑐᐃᓐᓇᓄᑦ ᒡᐊᓐᓂᐊᖃᕐᓇᙱ5ᑐᓕᕆᓂᕐᒧᑦ ᐃᓗᐊᖅᓴᐃᔩᑦ, ᐊᕕᒃᓯᒪᓂᕐᒥ ᐊᐃᑦᑐᕐᓘᑕᐅᔪᓐᓇᖅᑐᓄᑦ ᐊᐅᓚᑦᑎᔩᑦ, ᐳᕙᒡᓗᒃᑐᓕᕆᔩᑦ, ᓯᖓᐃᔪᓕᕆᔩᑦ, ᓄᓇᓕᖕᓂ ᖃᓄᐃᙱᑎᑦᑎᓂᕐᒧᑦ ᑭᒡᒐᖅᑐᐃᔩᑦ ᐃᑲᔪᖅᑐᐃᓂᕐᒧᓪᓗ ᐃᖅᑲᓇᐃᔭᖅᑏᑦ ᐃᖅᑲᓇᐃᔭᕐᓂᐊᖅᐳᑦ ᐊᔪᙱᓐᓂᓕᒫᒥᒍᑦ ᐊᑕᖐᓗᑎᒃ.
• ᖃᐅᔨᓴᕐᕕᖕᓂ ᖃᐅᔨᓴᕐᓯᓂᕐᒧᓪᓗ ᐊᔾᔨᓕᐅᕆᕙᖕᓂᕐᒧᑦ ᐱᔨᑦᑎᕋᕐᓃᑦ ᒪᑐᐃᙶᕐᓂᐊᖅᐳᑦ ᐊᐅᓚᓗᑎᒡᓗ. ᑲᑎᖅᓱᐃᓂᖅ ᖃᐅᔨᓴᒐᒃᓴᓂᒃ ᖃᐅᔨᓴᖅᓯᓂᕐᒧᓪᓗ ᐊᔾᔨᙳᐊᑦ ᒪᓂᒪᑎᑕᐅᖃᑦᑕᕐᓂᐊᖅᐳᑦ 24/7−ᒧᑦ ᑕᒪᐃᓐᓄᑦ ᑐᐊᕕᕐᓇᖅᑐᓄᑦ ᐱᓕᕆᔪᖃᖃᑦᑕᕐᓂᐊᓄᓪᓗ ᓱᒪᒋᔭᒃᓴᐃᑦ.  ᓄᕙᒡᔪᐊᕐᓇᖅ-19−ᒧᑦ ᐊᓪᓚᕐᓃᑦ ᓯᕗᓪᓕᖅᐸᐅᔾᔭᐃᓯᒪᐃᓐᓇᕐᓂᐊᖅᐳᑦ ᑕᒪᕐᒥᑦᑎᐊᕐᓗ ᓄᒃᑕᕐᓂᕐᒧᑦ ᐊᑐᖅᑕᐅᔭᕆᐊᓖᑦ ᐃᓕᓯᒪᐃᓐᓇᕐᓂᐊᖅᐳᑦ ᒪᑐᓯᒪᔪᖃᐅᕐᓂᖓᓂ. ᑲᑎᖅᓱᐃᕙᖕᓂᖅ ᖃᐅᔨᓴᕐᕕᖕᒥ ᖃᐅᔨᓴᖅᑕᐅᔪᒃᓴᓂᒃ ᓄᖅᑲᖅᑎᑕᐅᓂᐊᖅᐳᖅ ᒫᓐᓇᐅᔪᒃᑯᑦ.
  • ᐋᓐᓂᐊᕕᓕᐊᕐᓗᓂ ᐊᐅᓪᓚᕐᓃᑦ ᑲᔪᓰᓐᓴᕐᓂᐊᖅᐳᑦ ᐊᑐᖅᐸᒃᑕᒥᑎᑐᑦ.
  • ᐃᖃᓗᑦᑑᑎᐊᒥᑦ ᐃᓱᒪᓕᔨᒃᑯᑦ ᐃᓂᖓᑦ:
    • ᐃᓱᒪᒃᑯᑦ ᐃᓗᐊᖅᓴᐃᕙᖕᓂᕐᒧᑦ ᐃᓗᐊᖅᓴᐃᔩᑦ ᐅᖃᐅᔾᔪᐃᔩᓪᓗ ᐃᖅᑲᓇᐃᔭᖃᑦᑕᕐᓂᐊᖅᐳᑦ ᐊᑕᖏᖅᑐᒃᑯᑦ.
    • ᐃᓱᒪᒃᑯᑦ ᐃᓗᐊᖅᓴᐃᕙᖕᓂᕐᒧᑦ ᐅᐃᕆᓯᒪᔾᔪᑕᐅᓕᖅᐸᒃᑐᓄᓪᓗ ᐱᓕᕆᔨᓪᓚᕆᐅᑲᓴᓕᖅᑐᑦ ᐃᖅᑲᓇᐃᔭᖅᑏᑦ ᓄᖅᑲᖓᓂᐊᖅᐳᑦ ᑭᓯᐊᓂᓗ ᒪᓂᒪᓗᑎᒃ ᐅᑕᖅᑭᕙᒡᓗᑎᒃ ᐃᓱᒪᖅᓲᑕᐅᓪᓗᑎᒃ ᐃᓱᒪᒃᑯ. ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓗᐊᖅᓴᐃᔨᒥᑦ.
  • ᐊᑲᐅᓯᓴᕐᕕᒃ ᐃᓱᒪᒃᑯᑦ ᖃᓄᐃᙱᑦᑐᓐᓇᕐᓂᕐᒧᑦ ᐃᓂ ᑲ)ᓯᓂᐊᖅᐳᖅ ᐊᑕᖏᑦᑎᐊᕐᓗᓂ.
  • ᐋᓐᓂᐊᕕᓕᐊᖅᑐᓄᑦ ᐃᓂᒋᔭᐅᕙᒃᑐᑦ ᐊᐅᓚᓂᐊᖅᐳᑦ ᐊᐅᓚᓂᕆᕙᒃᑕᒥᑎᑐᑦ.
    • ᑰᔾᔪᐊᕌᓗᒃ – ᐃᒡᓗᓕᐊᓗᒃ ᐋᓐᓂᐊᕕᓕᐊᖅᑐᓄᑦ ᐅᑕᖅᑭᕕᒃ.
    • ᐃᐊᑦᒪᓐᑕᓐ – ᓛᒐ ᐃᓪᓗᒃ.
    • ᐃᖃᓗᐃᑦ - ᑕᒻᒫᑎᕐᕕᒃ ᐋᓐᓂᐊᕐᕕᓕᐊᖅᑐᓄᑦ ᑐᔪᕐᒥᕕᒃ.
    • ᐋᑐᕚ – ᓛᒐ ᕿᑭᖅᑖᓗᒃ.
    • ᐅᐃᓂᐱᒡ – ᑭᕙᓪᓕᖅ ᐃᓄᐃᑦ ᑐᙵᓱᕝᕕᖓ.
    • ᔨᐊᓗᓇᐃ – ᓛᒐ ᕿᑎᕐᒥᐅᑦ.

ᐃᓄᓕᕆᔨᒃᑯᑦ

• ᐃᓄᓕᕆᔨᒃᑯᑦ ᑎᑎᕋᕐᕕᖏᑦ ᐅᑕᖅᑭᔪᓂᒃ ᐱᔨᑦᑎᕋᖅᑎᓂᒃ ᒪᓂᒪᔪᖃᖃᑦᑕᕐᓂᐊᖅᐳᑦ.
• ᐃᓄᓕᕆᔨᒃᑯᑦ ᑎᑎᕋᕐᕕᖏᑦ ᐅᑕᖅᑭᔪᓂᒃ ᐱᔨᑦᑎᕋᖅᑎᓂᒃ ᒪᓂᒪᔪᖃᖃᑦᑕᕐᓂᐊᖅᐳᑦ.
• ᐃᖅᑲᓇᐃᔭᕆᐊᖅᓴᓂᕐᒧᑦ ᐱᕙᓪᓕᐊᓂᕐᒧᑦ ᐱᓕᕆᕝᕕᒃ ᐅᑕᖅᑭᔪᓂᒃ ᐱᔨᑦᑎᕋᕐᑎᓂᒃ ᒪᓂᒪᔪᖃᖃᑦᑕᕐᓂᐊᖅᐳᖅ.

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ

• ᐅᑯᐊ ᓄᓇᓕᓐᓂᑦ ᒐᕙᒪᒃᑯᓐᓂᓪᓗ ᐱᔨᑦᓯᕋᑎᓄᑦ ᐱᓕᕆᕝᕖᑦ ᐊᑐᐃᓐᓇᐅᓂᐊᖅᑐᑦ ᑐᐊᕕᕐᓇᖅᑐᓄᑦ:
  • ᐊᑦᑕᕐᓇᖅᑕᐃᓕᒪᔪᓕᕆᓂᕐᒧᑦ ᐱᔨᑦᓯᕋᖅᑎᒃᑯᑦ (ᐊᓪᓚᕝᕕᖓ ᖃᑦᑎᕆᒃᑯᑦ. ᐊᖓᔪᖅᑳᒻᒪᕆᖓᑕ, ᐆᒻᒪᖅᑯᑎᓕᕆᓂᕐᒧᑦ ᖃᐅᔨᓴᖅᑎᓪᓗᐊᑕᖅ, ᐃᓪᓗᕐᔪᐊᓄᑦ. ᖃᐅᔨᓴᖅᑎᓪᓗᐊᑕᖅ ᑭᐊᒃᓴᐅᑎᓄᓪᓗ ᖃᐅᔨᓴᖅᑎᓪᓗᐊᑕᖅ).
  • ᐃᓂᒋᔭᐅᔪᓄᑦ ᐊᐅᓚᑦᑎᕝᕕᖃᕐᓂᕐᒧᑦ ᐱᓕᕆᕝᕕᒃ.
  • ᑐᐊᕕᕐᓇᖅᑐᓂᑦ ᐊᐅᓚᑦᓯᓂᕐᒧᑦ ᐊᓪᓚᕝᕕᒃ.

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ

• ᓄᓇᕗᒻᒥ ᒥᑦᑕᕐᕖᑦ ᒪᑐᐃᖔᕐᓂᐊᖅᐳᑦ.

ᐃᓕᓐᓂᐊᕐᓂᓕᕆᔨᒃᑯᑦ

• ᑮᓇᐅᔭᑎᒍᑦ ᐃᑲᔫᑏᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᑎᑎᕋᕐᕕᒃ ᐅᑕᖅᑭᖃᑦᑕᕐᓂᐊᖅᐳᖅ ᓄᒃᑕᕐᓂᕐᒧᑦ ᑐᐊᕕᕐᓇᖅᓯᔪᓂᒃ ᐅᕙᓂ 867-857-6950.

ᑮᓇᐅᔭᓕᕆᓂᖅ

• ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᓱᕐᕋᓐᓇᖅᑐᓕᕆᓂᕐᒧᓪᓗ ᑲᑎᒪᔨᖏᑦ ᑲᔪᒡᓯᓐᓇᕐᓂᐊᖅᐳᑦ ᐊᑦᑎᒃᑐᒥᒃ ᐋᓪᑲᕼᐋᓪᓕᖕᓂᒃ ᐃᒥᖅᑕᐅᕙᒃᑐᓂᒃ (ᐱᐊ, ᐊᐅᐃᓂ, ᐋᐳᓪᒥᙶᖅᑐᖅ, ᓂᒡᓕᓵᕈᑏᑦ) ᐃᖃᓗᖕᓂ ᐃᒥᐊᓗᖕᓄ ᓂᐅᕕᕐᕕᖕᒥᑦ ᖁᕕᐊᓱᖕᓇᒥᒃ ᒪᑐᓯᒪᓂᖏᓐᓂ, ᐃᑲᕐᕋᖏᑦ ᐅᓄᕈᓐᓃᕆᐊᖅᖢᑎᒃ.
• ᓄᓇᕗᒻᒥ ᐃᒥᐊᓗᓕᕆᔨᒃᑯᑦ ᓂᐅᕕᕐᕕᖓᑦ ᒪᑐᓯᒪᓂᐊᖅᐳᖅ ᑎᓯᐱᕆ 24−ᒥᑦ 28−ᒧᑦ, ᒪᑐᐃᒃᑲᓐᓂᓛᖅᖢᓂᓗ 29−ᒥ ᐊᒻᒪᓗ 30−ᒥ 1-ᒥᑦ 6−ᒧᑦ ᐅᓐᓄᒃᓴᒃᑯᑦ ᐊᒻᒪᓗ ᑎᓯᐱᕆ 31−ᒥ 12−ᒥᑦ 4-ᒧᑦ ᐅᓐᓄᒃᓴᒃᑯᑦ. ᓂᐅᕕᕐᕕᒃ ᒪᑐᑐᓯᒪᓂᐊᖅᐳᖅ ᔭᓄᐊᕆ 1, 2021−ᒥ ᐱᒋᐊᓛᖅᖢᓂᓗ ᐃᑲᕐᕋᑐᖃᕆᕙᒃᑕᒥᓄᑦ ᔭᓄᐊᕆ 2, 2021−ᒥ.
• ᐃᒥᐊᓗᖕᒥᒃ ᑎᑭᑎᑦᑎᓂᕐᒧᑦ ᐱᔪᓐᓇᐅᑎᑖᖅᓯᒪᔪᑦ ᐊᒻᒪᓗ ᓄᓇᓕᖕᓄᑦ ᑎᑭᓴᖅᓯᒪᔪᑦ ᐱᓕᕆᔭᐅᔾᔮᖏᑦᑐᑦ ᑎᓯᐱᕆ 24−ᒥᑦ ᔭᓄᐊᕆ 3−ᒧᑦ. ᓂᐅᕕᖅᐸᒃᑐᑦ ᐱᕙᒌᔭᖅᑐᑦ ᑎᑭᑎᑦᑎᔪᒪᓪᓗᑎᒃ ᐃᒥᐊᓗᖕᒥᒃ ᒫᓐᓇᐅᔪᒃᑯᑦ ᑎᓕᐅᖅᑕᐅᕗᑦ ᓂᐅᕕᖁᔭᐅᓪᓗᑎᒃ ᐱᔪᓐᓇᐅᑎᒥᒃ ᑎᓯᐱᕆ 23−ᖑᓚᐅᙱᓐᓂᖓᓂ ᐅᑯᓇᙵᑦ ᓇᓕᐊᖕᓂᑐᐃᓐᓇᖅ ᐃᓂᓂᑦ:
  ᐃᖃᓗᖕᓂ ᐃᒥᐊᓗᒃᑖᕐᕕᒃ ᓱᕐᕋᖕᓇᖅᑐᖅᑖᕐᕕᒡᓗ
  ᐅᐸᒍᑎᓗᑎᒃ:
  ᓇᒡᒐᔾᔭ 9−ᒥᑦ ᐅᓪᓛᒥᑦ 12−ᒧᑦ ᓂᕆᓐᓇᒧᑦ ᐊᒻᒪᓗ 1−ᒥᑦ 4:30-ᒧᑦ ᐅᓐᓄᒃᓴᒧᑦ. ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓᑎᒍᑦ.
  ᐊᐃᑉᐹᓂᑦ ᐅᓪᓗᑐᐃᓐᓇᒧᑦ 9−ᒥ 11-ᒧᑦ ᐅᓪᓛᒃᑯᑦ ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓᑎᒍᑦ
  ᐅᖄᓚᐅᑎᒃᑯᑦ 867-975-6869.
  ᑲᖏᖅᖠᓂᖅ
  ᑲᖏᖅᖠᓂᕐᒥ, ᐅᕗᖓ ᐅᖄᓚᔪᓐᓇᖅᐳᑎᑦ, 867-645-8575−ᒧᑦ, ᐅᕗᖓᓘᓐᓃᑦ, 855-844-5488-ᒧᑦ, ᓇᒡᒐᔾᔭᒥᑦ ᐅᓪᓗᑐᐃᓐᓇᒧᑦ, 8:30−ᒥᑦ ᐅᓪᓛᒥᑦ 12−ᒧᑦ ᐅᓪᓗᕈᒻᒥᓴᕐᓇᒧᑦ, 1−ᒥᓪᓗ to 5−ᒧᐊᕋᓱᖕᓂᖓᓄᑦ ᐅᓐᓄᒃᓴᒃᑯᑦ. ᑭᕙᓪᓕᕐᒥᐅᑦ ᖃᐅᔨᓴᐅᑎᖓᑎᒍᑦ.
  ᐃᖃᓗᒃᑑᑦᑎᐊᖅ
  ᐅᕗᖓ ᐅᖄᓚᔪᓐᓇᖅᐳᑎᑦ, 867-983-4048−ᒧᑦ, ᓇᒡᒐᔾᔭᒥᑦ ᐅᓪᓗᑐᐃᓐᓇᒧᑦ, 10−ᒥᑦ ᐅᓪᓛᒥᑦ 4−ᒧᑦ ᐅᓐᓄᒃᓴᒧᑦ. ᕿᑎᕐᒥᐅᑦ ᖃᐅᔨᓴᐅᑎᖓᑎᒍᑦ.
  ᖁᕐᓗᖅᑐᖅ
  ᐅᖄᓚᐅᑎᒃᑯᑦ ᐅᕗᖓ 867-982-6509 ᐃᑭᐊᖅᑭᕕᒃᑯᓪᓘᓐᓃᑦ ᐅᕗᖓ, @email. 
  ᖃᐅᔨᒪᓂᐊᖅᐸᓯ ᖁᕐᓗᖅᑐᕐᒥᑦ ᑎᑎᕋᕐᕕᖓᓐᓂᑦ ᓄᓇᓕᖓᓐᓂᑦ ᑭᓯᐊᓂ ᐃᒥᐊᓗᑦᑖᕈᓐᓇᐅᑎᓂᑦ ᑲᒪᓂᐊᖅᑐᑦ.

ᐃᖅᑲᓇᐃᔭᖅᑐᓕᕆᓂᖅ

• ᐃᖅᑲᓇᐃᔭᖅᑎᓄᑦ ᐃᓚᒌᓄᓪᓗ ᐃᑲᔪᖅᑕᐅᕙᖕᓂᖏᓐᓄᑦ ᐱᓕᕆᐊᖑᔪᖅ ᒪᓂᒪᖃᑦᑕᕐᓂᐊᖅᐳᖅ ᖁᕕᐊᓱᖕᓇᒥ. ᐃᖅᑲᓇᐃᔭᖅᑏᑦ ᐃᓚᖏᓪᓗ ᐅᖄᓚᔪᓐᓇᖅᐳᑦ ᐊᑭᓕᕆᐊᖃᙱᑦᑐᒧᑦ ᐅᕗᖓ 1-800-663-1142 ᓇᖕᒥᓂᖅ ᐅᖃᐅᔾᔪᖅᑕᐅᔪᒪᓗᑎᒃ ᑕᒪᐃᓐᓄ ᓄᓇᕗᒻᒥᐅᑦ ᐃᓕᓴᕆᔭᐅᓯᒪᔪᓄᑦ ᐅᖃᐅᓯᕐᓄᑦ ᐅᓇᓘᓐᓃᑦ ᑕᑯᔭᖅᑐᕐᓗᒍ https://homewoodhealth.com.  
• ᓄᓇᕗᑦ ᒐᕙᒪᖓᑕ ᖁᕕᐊᓱᖕᓇᒥ ᒪᑐᓯᒪᓂᖏᓐᓂ, ᐅᓇ, @email ᓇᐅᑦᑎᖅᓱᖅᑕᐅᖃᑦᑕᕐᓂᐊᖅᐳᖅ ᑐᐊᕕᕐᓇᖅᑐᑐᐊᓄᑦ.

ᒪᓕᒐᓕᕆᔨᒃᑯᑦ

• ᒪᓕᒐᓕᕆᓂᕐᒧᑦ ᓇᓗᓇᐃᔭᕆᐊᖃᖅᐸᖕᓃᑦ ᒪᑐᐃᙶᖏᓐᓇᕐᓂᐊᖅᐳᑦ.
• ᑎᒍᔭᐅᓯᒪᕝᕕᓕᒫᑦ ᒪᑐᐃᙶᖏᓐᓇᕐᓂᐊᖅᐳᑦ:
  • ᕿᑭᖅᑖᓗᒻᒥ ᐃᑲᔪᖅᑕᐅᕕᒃ ᒪᑭᒋᐊᕐᕕᓪᓗ.
  • ᑲᖏᕐᖠᓂᕐᒥ ᒪᒥᓴᕐᕕᒃ.
  • ᖁᕐᓗᖅᑐᕐᒥ ᐃᓚᕗᑦ ᑐᑦᑕᕐᕕᒋᔭᐅᔪᖅ.
  • ᐅᑕᖅᑭᕕᒃ ᓄᓇᓕᓐᓂᑦ ᐃᓂᖃᕐᕕᒃ.
  • ᓄᓇᕗᒻᒥ ᐊᕐᓇᓄᑦ ᑎᒍᔭᐅᓯᒪᔪᓄᑦ ᐃᓂ.
  • ᐃᓱᒪᖅᓱᖏᑦᑐᒃᑯᕕᒃ ᒪᒃᑯᑦᑐᓄᑦ.
• ᓄᓇᓕᖕᓂ ᒪᓕᒐᓕᕆᓂᕐᒧᑦ ᑎᑎᕋᕐᕖᑦ ᒪᑐᓯᒪᓂᐊᖅᐳᑦ ᑭᓯᐊᓂᓗ ᑐᐊᕕᕐᓇᖅᑐᓄᑦ ᓴᐳᔾᔨᓯᒪᓂᕐᒧᑦ ᑎᓕᓯᔾᔪᑕᐅᔪᑦ ᒪᓂᒪᕗᑦ ᐅᖄᓚᔪᖃᕐᓗᓂ ᐅᕗᖓ, 1-844-534-1038 ᐅᖄᓚᔪᖃᕐᓗᓂᓘᓐᓃᑦ ᓄᓇᓕᖕᓂ ᐸᓖᓯᒃᑯᓐᓄᑦ ᐃᑲᔪᖅᑕᐅᔪᒪᔪᖃᕐᓗᓂ.
• ᑎᑎᕋᕐᕕᖓ ᑭᒃᑯᑐᐃᓐᓇᓂᒃ ᑲᒪᒋᔭᖃᖅᐸᖕᓂᕐᒧᑦ ᐸᐸᑦᑎᔨᓗ ᒪᑐᓯᒪᓂᐊᖅᐳᒃ ᑭᓯᐊᓂᓗ ᖃᐅᔨᒋᐊᕐᕕᐅᔪᓐᓇᖅᖢᑎᒃ ᐅᕗᖓ 867-222-1805 ᑐᐊᕕᕐᓇᖅᑐᓄᑐᐊᖅ.
• ᓄᓇᓕᖕᓂ ᑎᒍᔭᐅᓯᒪᔪᓕᕆᓂᕐᒧᑦ ᐱᓕᕆᔩᑦ ᒪᓂᒪᖃᑦᑕᕐᓂᐊᖅᐳᑦ ᐅᖄᓚᕝᕕᐅᔪᓐᓇᖅᐸᒡᓗᑎᒃ. ᐅᑕᖅᑭᖃᑦᑕᕐᓂᐊᕐᓗᓂ ᐊᑐᖅᑕᐅᖃᑦᑕᕐᓂᐊᖅᑐᖅ ᐃᒪᓐᓇᐃᓕᖓᕗᖅ:

ᑎᓯᐱᕆ 23−ᒥᑦ 26−ᒧᑦ

ᐊᕙᑎᓕᕆᔨᒃᑯᑦ

• ᑐᐊᕕᕐᓇᖅᑐᒥᒃ ᑯᕕᔪᒥᒃ ᑭᐅᓯᓂᖅ ᒪᓂᒪᕗᑦ 24−ᓄᑦ ᐃᑲᕐᕋᓄᑦ ᐅᓪᓗᒥ ᐅᕙᓂ, 867-920-8130.
• ᑐᐊᕕᕐᓇᖅᑐᒥᒃ ᓂᕐᔪᑎᓄᑦ ᑭᐅᓯᓂᖅ ᒪᓂᒪᕗᑦ 24−ᓄᑦ ᐃᑲᕐᕋᓄᑦ ᐅᓪᓗᒥ ᐅᕙᓂ, 867-222-0167.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ

• ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᑎᑎᕋᕐᕕᖏᑦ ᒪᑐᐃᙶᕐᓂᐊᖅᐳᑦ ᓄᓇᕗᑦ ᒐᕙᓚᖓᑕ ᖁᕕᐊᓱᒡᕕᖕᒥ ᐅᓪᓗᖏᓐᓂ (ᑎᓯᐱᕆ 24, 29, 30 ᐊᒻᒪᓗ 31), ᑭᓯᐊᓂᓗ ᒪᑐᓯᒪᓂᐊᕆᓪᓗᑎᒃ ᓄᖅᑲᖓᕝᕕᐅᔭᕆᐊᖃᖅᑐᓂ ᐅᓪᓗᓂ (ᑎᓯᐱᕆ 25, 28 ᐊᒻᒪᓗ ᔭᓄᐊᕆ 1).

ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ

• ᑐᐊᕕᕐᓇᖅᑐᖅᑕᖃᖅᑎᓪᓗᒍ ᖃᐅᔨᒋᐊᕐᕕᒃᓴᖅ ᓈᓴᐅᑎ ᐃᖃᓗᖕᓂ ᐃᖅᑲᓇᐃᔭᖅᑎᓄᑦ ᐃᒡᓗᒋᔭᐅᔪᒥ: 867-877-4118. ᑎᑎᕋᖅᑕᐃᓕᒋᑦ ᐅᖃᓘᑎᕋᓛᒃᑯᑦ.

ᓄᓇᕗᒻᒥᑦ ᓯᓚᑦᑐᖅᓴᕐᕕᒃ:

ᐅᑯᐊ ᓄᓇᕗᒻᒥ ᓯᓚᑦᑐᖅᓴᕐᕕᖕᒧᑦ ᐃᒡᓗᖁᑎᒋᔭᐅᔪᑦ ᒪᑐᐃᖔᖏᓐᓇᕐᓂᐊᖅᐳᑦ ᑎᓯᐱᕆ 24−ᖑᕋᓱᖕᓂᖓᓂ:

• ᑭᕙᓪᓕᖅ ᕼᐋᓪ ᑎᑎᕋᕐᕕᖏᑦ− ᑲᖏᖅᖠᓂᕐᒥ*.
• *ᐃᓄᑐᐊᒃᑯᕖᑦ ᐃᓕᓐᓂᐊᖅᑎᓄᑦ ᐃᓂᒋᔭᐅᓲᑦ ᑭᕙᓪᓕᖅ ᕼᐋᓪ−ᒥ ᒪᑐᓛᖅᑐᑦ ᑎᓯᐱᕆ 18−ᒥ.
• ᓴᓇᑐᓕᖅᓴᕐᕕᒃᒪ ᐃᖅᑲᓇᐃᔮᕆᔭᐅᓕᖅᐸᒃᑐᓄᑦ ᐊᔪᕈᓐᓃᖅᓴᕐᓂᕐᒧᑦ ᐃᓂ.
• ᓄᓇᑦᑕ ᓯᓚᑦᑐᖅᓴᕐᕕᐅ ᐃᓂᓪᓗᐊᑕᖓ − ᐃᖃᓗᐃᑦ.
• ᕿᑎᕐᒥᐅᑦ ᓯᓚᑦᑐᖅᓴᕐᕕᒃ − ᐃᖃᓗᒃᑑᑦᑎᐊᖅ.

ᐅᑯᐊ ᓄᓇᕗᒻᒥ ᓯᓚᑦᑐᖅᓴᕐᕕᐅᑉ ᐃᒡᓗᖁᑎᖏᑦ ᒪᑐᐃᙶᖏᓐᓴᕐᓂᐊᖅᐳᑦ (ᐃᓕᓐᓂᐊᖅᑎᓄᑦ) ᒪᑐᓯᒪᔪᖃᕐᓂᖓᓂ:

• ᐃᓚᒌᓄᑦ ᐊᖏᕐᕋᕆᔭᐅᕙᒃᑐᑦ − ᐃᖃᓗᒃᑑᑦᑎᐊᒥ.
• ᐃᓚᒌᓄᑦ ᐊᖏᕐᕋᕆᔭᐅᕙᒃᑐᑦ − ᑲᖏᖅᖠᓂᕐᒥ.
• ᐃᓚᒌᓄᑦ ᐊᖏᕐᕋᕆᔭᐅᕙᒃᑐᑦ ᐃᓕᓐᓂᐊᖅᑎᓄᓪᓗ ᐃᓂᒋᔭᐅᔪᖅ (ᓄᑕᐅᙱᑦᑐᑦ ᓄᕚᒃᑯᑦ ᐃᒡᓗᖁᑎᕕᓂᐊ) − ᐃᖃᓗᐃᑦ.

ᖃᐅᔨᒋᐊᒃᑲᓐᓂᕈᒪᒍᕕᑦ ᑐᑭᓯᒋᐊᕐᕕᒃᓴᐅᔪᓄᑦ ᐅᕙᓂ ᓇᓂᔭᐅᔪᓐᓇᕐᐳᖅ: www.gov.nu.ca.     

ᓄᓇᕗᑦ ᒐᕙᒪᒃᑯᑦ ᑎᑎᕋᕐᕕᓕᒫᖏᑦ ᐅᒃᑯᐃᓛᖅᑐᑦ ᓇᒡᒐᔾᔭᒥ, ᔭᓄᐊᕆ 4, 2020-ᒥ, ᐃᑲᕐᕋᕆᖃᑦᑕᖅᑕᖏᓐᓄᑦ. ᖁᕕᐊᓱᒡᕕᒃᓯᐅᑦᑎᐊᕆᑦᑎ!

ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ

ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᑕᑯᔪᒪᒍᕕᑦ ᐊᒻᒪ ᐃᑲᔫᑎᒃᓴᓂᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ ᓄᓇᕗᒻᒥ, ᐅᕗᙵᕈᓐᓇᖅᐳᑎᑦ: https://www.gov.nu.ca/health/information/covid-19-novel-coronavirus

ᓄᑖᖑᓛᓂᒃ ᑐᓴᒐᒃᓴᓂᒃ ᐱᔪᒪᒍᕕᑦ ᒫᓐᓇ ᑭᒃᑯᑐᐃᓐᓇᓄᑦ ᖃᓄᐃᙱᑦᑐᓄᑦ ᐊᑐᖅᑕᐅᖁᔭᐅᔪᓂᒃ, ᐅᕗᙵᕐᓗᑎᑦ: https://www.gov.nu.ca/health/information/nunavuts-path

ᓄᕙᒡᔪᐊᕐᓇᖅ-19−ᖃᖅᑐᑦ ᖃᓄᐃᓕᖓᓂᖏᑦ: ᑎᓯᐱᕆ 18

ᓄᕙᕐᔪᐊᕐᓇᖅ-19−ᒧᑦ ᓄᓇᓕᖕᓂ ᐱᓕᖕᓂ ᑭᒡᓕᓯᓂᐊᖅᑕᐅᓯᒪᔪᑦ: ᑎᓯᐱᕆ 18

ᖃᐅᔨᓴᕐᓂᒧᑦ ᑭᒡᓕᓯᓂᐊᖅᑕᐅᓯᒪᔪᑦ ᒫᓐᓇᒧᑦ ᑎᑭᖦᖢᒍ: ᑎᓯᐱᕆ 18

ᐃᓄᑐᐊᒃᑯᕕᖕᒦᑦᑐᑦ ᐃᓄᐃᑦ:

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓯᒪᓕᖅᑐᑦ ᖃᓄᐃᓕᖓᓂᖏᑦ:

ᐃᖅᑲᓇᐃᔭᕆᐊᖃᓪᓚᕆᒃᑐᓂᒃ ᑐᒃᓯᕋᐅᑏᑦ:

ᑎᓯᐱᕆ 17−ᒥ ᐱᒋᐊᖅᖢᓂ, 10214−ᓂᒃ ᑐᒃᓯᕋᖅᑐᖃᓚᐅᖅᐳᖅ, 4808−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓄᑦ ᑐᒃᓯᕋᖅᑕᐅᔪᑦ.

ᓄᓇᕗᒻᒥᐅᓂᑦ ᖃᓄᐃᙱᑦᑎᐊᖅᑎᑦᑎᓇᓱᒡᓗᑕ ᑕᒪᑦᑕ ᑲᒪᒋᔭᒃᓴᕆᔭᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐋᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᖃᓂᒌᓗᐊᖅᑕᐃᓕᕙᒡᓗᓯ, ᐃᖢᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᑦᑕ.