ᕿᑎᕐᒥᐅᑦ ᐊᒻᒪᓗ ᕿᑭᖅᑕᓂ ᐃᓕᓐᓂᐊᕐᕖᑦ ᓅᑉᐳᑦ ᐊᑐᖅᑕᐅᓂᐊᖅᑐᒧᑦ 1−ᒧᑦ
ᐱᕙᓪᓕᐊᔪᖅ ᓴᖅᑭᑎᑕᐅᔪᖅ
ᕿᑎᕐᒥᐅᑦ ᐊᒻᒪᓗ ᕿᑭᖅᑕᓂ ᐃᓕᓐᓂᐊᕐᕖᑦ ᓅᑉᐳᑦ ᐊᑐᖅᑕᐅᓂᐊᖅᑐᒧᑦ 1−ᒧᑦ
ᐃᖃᓗᐃᑦ, ᓄᓇᕗᑦ (ᕕᕗᐊᕆ 3, 2021) – ᐱᒋᐊᕐᓗᓂ ᕿᑎᖅᑰᒻᒥ ᕕᕗᐊᕆ 4, 2021−ᒥ, ᑕᒪᕐᒥᑦᑎᐊᖅ ᐃᓕᓐᓂᐊᕐᕖᑦ ᕿᑎᕐᒥᐅᓂ ᕿᑭᖅᑕᓂᓗ ᓅᓐᓂᐊᓕᖅᐳᑦ ᐊᑐᖅᑕᐅᓂᐊᖅᑐᒧᑦ 1−ᒧᑦ ᐅᑯᑎᒎᓇᖅ, 2020-21−ᒧᑦ ᒪᑐᐃᖅᓯᓂᐊᕐᓂᕐᒧᑦ ᐱᕙᒌᔭᖅᑕᐅᓯᒪᔪᖅ ᓄᓇᕗᒻᒥ ᐃᓕᓐᓂᐊᕐᕕᖕᓂᒃ. ᑕᒪᕐᒥᑦᑎᐊᖅ ᐃᓕᓐᓂᐊᕐᕖᑦ ᑖᒃᑯᓇᓂ ᐊᕕᒃᓯᒪᓂᕐᓂ ᒪᑐᐃᙶᖃᑦᑕᓂᐊᓕᕆᕗᑦ ᐅᓪᓗᓕᒫᖅ ᐃᓕᓐᓂᐊᕐᕕᖕᒥ ᐊᔪᕈᓐᓃᖅᓴᖅᑎᑕᐅᕙᒡᓗᑎᒃ ᐃᓕᓐᓂᐊᕐᑏᑦ, ᐃᓕᓐᓂᐊᓕᓵᖅᑐᓂᑦ ᖁᕝᕙᓯᖕᓂᓕᖕᓄᑦ 12-ᒧᑦ, ᐅᓪᓗᓄᑦ ᑕᓪᓕᒪᓄᑦ ᐱᓇᓱᐊᕈᓯᕐᒥ.
“ᐃᓕᓐᓂᐊᕐᕕᖕᓂ ᐃᒡᓗᕈᓯᕐᓂ ᐃᓕᓐᓂᐊᕐᓃᑦ ᐊᑐᖅᑕᐅᕙᒃᑐᓪᓗ ᐱᒻᒪᕆᐊᓘᕗᑦ ᐱᕙᓪᓕᐊᓂᖃᕐᓂᐊᖅᑎᓪᓗᒋᑦ ᓄᑕᖅᑲᑦ ᒪᒃᑯᒃᑐᓪᓗ. ᐃᓕᓐᓂᐊᖅᑎᓂᑦ, ᐃᓚᒌᓂᑦ, ᐃᖅᑲᓇᐃᔭᖅᑎᓂᓪᓗ ᖃᓄᐃᖏᑦᑎᐊᖅᑎᑦᑎᓂᖅ ᐊᑦᑕᕐᓇᖏᑦᑐᒦᑎᑦᑎᓂᕐᓗ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᓯᕗᓪᓕᐅᔾᔭᐅᒋᐊᖃᕐᓂᖅᐹᖑᕗᖅ," ᑕᐃᒪᓐᓇ ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓄ, ᑕᐃᕕᑦ ᔪᐊᓇᓯ, ᐅᖃᖅᖢᓂ. “ᑕᐃᒪᐃᓐᓂᖓᓄᓪᓗ, ᐱᒻᒪᕆᐅᕗᖅ ᐃᓕᓴᖅᓯᓂᐊᕐᓗᓂ ᐱᐅᙱᑦᑐᓂᒃ ᐃᓱᒪᒃᑯᑦ ᑎᒥᒃᑯᓪᓗ ᖃᓄᐃᙱᑦᑎᐊᕐᓂᕐᒧᑦ ᐊᒃᑐᖅᓯᔪᓄᑦ ᒥᒡᓕᒋᐊᖅᑎᑦᑎᓂᖅ ᐃᓕᓐᓂᐊᕐᕕᖕᓂ ᐊᔪᕈᓐᓃᖅᓴᖅᑎᑕᐅᓂᕐᓂᒃ ᖃᓄᖅ ᐊᒃᑐᖅᓯᔪᓐᓇᕐᓂᖓᓂᒃ ᓄᓇᓕᑦᑎᓐᓄᑦ. ᓂᕆᐅᒋᔭᖃᑦᑎᐊᖅᐳᖓ ᐃᓕᓐᓂᐊᖅᑏᑦ ᑖᒃᑯᖕᓇᖕᓂ ᐊᕕᒃᓯᒪᓂᕐᓂ ᐃᑐᕐᓂᐊᓕᕐᓂᖏᓐᓄᑦ ᐃᓕᓐᓂᐊᕐᕕᖕᓄᑦ ᐅᓪᓗᓕᒫᖅᐸᓕᕐᒥᓗᑎᒃ.
ᓄᓇᕗᒻᒥᐅᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖓᑕ ᑕᐃᒪᐃᓐᓂᕋᖅᖢᓂᐅᒃ, ᒫᓐᓇᓯᐅᑏᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᔾᔪᑕᐅᔪᓐᓇᖅᑐᑦ ᐊᑐᖅᑕᐅᖃᑦᑕᖅᓯᒪᔪᓪᓗ ᐱᔾᔪᑎᖃᖅᖢᑎᒃ ᓄᕙᒡᔪᐊᕐᓇᖅ-19−ᒥᒃ ᐃᑲᔪᖅᑐᐃᕗᖅ ᐃᓱᒪᒋᔭᐅᔪᒥᒃ ᓄᑕᖅᑲᑦ ᒪᒃᑯᒃᑐᓪᓗ ᐃᓕᓐᓂᐊᕆᐊᖃᑦᑕᕈᓐᓇᕐᓂᖏᓐᓂᒃ ᐊᑐᕐᓗᑎᒃ ᐊᖏᓪᓛᒃᑰᖅᑎᑦᑎᓇᔭᖅᑐᒥᒃ ᖃᓄᐃᙱᑦᑎᐊᕈᓐᓇᕐᓂᖏᓐᓂᒃ ᑲᔪᓰᓐᓇᕐᓗᓂᓗ ᒥᑭᒡᓕᑎᑦᑎᓯᒪᐃᓐᓇᕐᓗᓂ ᖁᐊᖅᓵᕐᓇᕋᔭᖅᑐᓂᒃ. ᑕᒪᕐᒥᑦᑎᐊᖅ ᐃᓕᓐᓂᐊᕐᕖᑦ ᒪᓖᓐᓇᕐᓂᐊᖅᐳᑦ ᐋᖅᑭᒃᑕᐅᓯᒪᕙᒌᖅᑐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᖅᑕᐃᓕᒪᓂᕐᒧᓪᓗ ᐊᑐᖅᑕᐅᖃᑦᑕᖅᑐᓂᒃ, ᓲᕐᓗ, ᐱᐅᓯᒋᐊᖅᓯᒪᔪᓂᒃ ᓴᓗᒻᒪᖅᓴᐃᓂᕐᒧᑦ ᐃᒡᓗᒥᒡᓗ ᑲᒪᒋᔭᖃᖅᐸᖕᓂᕐᒧᑦ ᐊᑐᖅᑕᐅᕙᒃᑐᓂᒃ, ᓇᓗᙱᑦᑎᐊᖅᐸᒡᓗᑎᒡᓗ ᐃᓕᓐᓂᐊᕐᑏᑦ ᐃᖅᑲᓇᐃᔭᖅᑏᓪᓗ ᖃᓂᒪᔪᑦ ᐊᖏᕐᕋᖅᓯᒪᖃᑦᑕᕋᓗᐊᕐᒪᖔᑕ.
“ᐱᒻᒪᕆᐊᓘᕗᖅ ᓇᓕᒧᒌᒃᑎᑦᑎᓗᓂ ᖁᐊᖅᓵᕐᓇᕋᔭᖅᑐᒥᒃ ᐊᐃᑦᑐᕐᓗᒃᑕᐅᓇᔭᕐᓂᕐᒥᒃ ᓯᐊᒻᒪᒡᕕᐅᓇᔭᕐᓂᕐᒥᒡᓗ ᓄᕙᒡᔪᐊᕐᓇᖅ-19−ᒥᒃ ᖁᐊᖅᓵᕐᓇᖅᑐᓄᑦ ᐃᓕᓐᓂᐊᕐᕖᑦ ᒪᑐᔭᐅᕙᖕᓂᖏᓐᓄᑦ ᓄᑕᕋᐃᑦ ᑎᒥᒃᑯᑦ, ᐱᕙᓪᓕᐊᓂᒃᑯᑦ, ᐃᓱᒪᒃᑯᓪᓗ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ,” ᑕᐃᒪᓐᓇ ᓄᓇᕗᒻᒥᐅᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖓᑦ, ᓘᒃᑖᖅ ᒪᐃᑯᓪ ᐹᑐᓴᓐ ᐅᖃᖅᖢᓂ. “ᑐᙵᕕᒋᓪᓗᒍ ᒫᓐᓇ ᖃᓄᐃᓕᖓᓂᖓ ᓄᕙᒡᔪᐊᕐᓇᖅ-19 ᕿᑎᕐᒥᐅᓂ ᕿᑭᖅᑕᓂᓗ ᐊᕕᒃᓯᒪᓂᕐᓂ, ᐱᑕᖃᙱᓚᖅ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᔾᔪᑕᐅᔪᓐᓇᖅᑐᓂᒃ ᑲᔪᓰᓐᓇᕋᔭᖅᑐᒥᒃ ᐃᓕᓐᓂᐊᕐᕖᑦ ᒪᑐᔭᐅᓯᒪᔭᕆᐊᖃᕐᓂᖏᓐᓂᒃ ᒫᓐᓇᒧᑦ ᑎᑭᖦᖢᒍ. ᖃᐅᔨᒪᑦᑎᐊᖅᐳᖓ ᐃᓕᓐᓂᐊᕐᑏᑦ ᐃᖅᑲᓇᐃᔭᖅᑏᓪᓗ ᕿᑎᕐᒥᐅᓂ ᕿᑭᖅᑕᓂᓗ ᐃᓕᓐᓂᐊᕐᕕᖕᓂ ᖁᐊᖅᓵᕐᓇᙱᑦᑐᒃᑯᑦ ᐅᑎᕈᓐᓇᓕᕐᓂᖏᓐᓂᒃ ᐃᓕᓐᓂᐊᕐᕖᑦ ᐃᒡᓗᕈᓯᖏᓐᓄᑦ."
2020-21−ᒥ ᓄᓇᕗᒻᒥ ᐃᓕᓐᓂᐊᕐᕖᑦ ᒪᑐᐃᓛᖅᓂᖏᓐᓄᑦ ᐱᕙᒌᔭᐅᑎ: ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᖅᑕᐃᓕᒪᓂᕐᒧᓪᓗ ᒪᓂᒪᕗᑦ ᐅᕙᓂ: https://gov.nu.ca/iu/ilinniarnilirijikkut/information/2020-21-nunavummi….
ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ ᒫᓐᓇᓗ ᐋᓐᓂᐊᖅᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᑦ, ᐅᕗᙵᕐᓗᓯ: https://www.gov.nu.ca/health/information/nunavuts-path
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᑐᕋᐃ ᕉᑦᔅ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᓂᖕᓄᑦ
ᐃᓕᓐᓂᐊᕐᓂᓕᕆᔨᒃᑯᑦ
ᓄᓇᕗᑦ ᒐᕙᒪᖓ
867-975-5680
@email