ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓄᑖᙳᕆᐊᖅᓯᒪᔪᑦ - ᒫᑦᓯ 26, 2021

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓄᑖᙳᕆᐊᖅᓯᒪᔪᑦ - ᒫᑦᓯ 26, 2021

ᓯᕗᓕᖅᑎᒥᙶᖅᑐᑦ ᓄᑖᙳᕆᐊᖅᓯᒪᔪᑦ:

ᐅᓪᓛᒃᑯᑦ. ᐅᓪᓗᖅ ᐊᕐᕕᓂᓕᒃ ᑭᖑᓕᕇᖕᓂ, ᓄᕙᕐᔪᐊᕐᓇᖅ-19−ᑕᖃᙲᓐᓇᖅᐳᖅ ᓄᓇᕗᒻᒥ. ᐱᓕᕆᑦᑎᐊᖅᐳᓯ ᐊᕐᕕᐊᕐᒥᐅᑦ!

ᒫᓐᓇᒧᑦ ᑎᑭᖦᖢᒍ, 12884 ᓄᓇᕗᒥᐅᑦ ᓯᕗᓪᓕᕐᒥ ᑲᐱᔭᐅᓯᒪᓕᖅᑐᑦ, ᐊᒻᒪ 6785 ᓄᓇᕗᒥᐅᑦ ᑲᐱᔭᐅᓯᒪᑎᒋᓕᖅᑐᑦ ᓄᕙᒡᔪᐊᕇᒃᑯᑎᒧᑦ.

ᑐᓴᖅᑎᑕᐅᖃᑦᑕᖅᓯᒪᒐᒪ ᐃᓱᒫᓘᑎᖃᖅᑐᓂᒃ ᓄᓇᕗᒥᐅᓂᒃ ᐅᔾᔨᕈᓱᒃᑐᓂᒃ ᐃᓄᖕᓂᒃ ᒪᑐᐊᖅᓯᒪᙱᑦᑐᓂᒃ. ᒪᑐᐊᑦ ᐊᑐᖅᑕᐅᓪᓚᕆᒋᐊᖃᙱᑎᓪᓗᒋᑦ, ᐊᑐᖅᑕᐅᖁᔭᐅᖏᓐᓇᕋᓗᐊᖅᐳᑦ ᐱᒻᒪᕆᐅᒋᔭᐅᖏᓐᓇᕋᓗᐊᖅᐳᓪᓗ ᐆᒃᑐᕋᖅᑕᑦᑎᓐᓂᒃ. ᐃᒪᐃᓐᓂᖓᓄᑦ ᓇᓗᒐᑦᑕ ᖃᖓ ᐊᒻᒪ ᓇᑭᑦ ᓄᕙᒡᔪᐊᕐᓇᖅ ᓴᖅᑭᒃᑲᓐᓂᕋᔭᕐᒪᖔᑦ, ᑕᐃᒪᐃᓐᓂᖓᓄᑦ ᐊᔪᓐᓃᖅᓴᐅᑎᒋᓯᒪᔭᕗᑦ ᐊᔪᕈᓐᓃᖅᓴᐅᑎᒌᓐᓇᕆᐊᖃᖅᑕᕗᑦ ᐅᔾᔨᖅᓱᑦᑎᐊᕆᐊᖃᖅᖢᑕᓗ. 

ᖁᐱᕐᕈᐊᕐᔪᐃᑦ ᐊᐃᑦᑐᕐᓗᖕᓇᖅᑐᑦ ᓱᓕ ᓯᕘᕋᓇᑦᑎᐊᖅᐳᑦ − ᐅᔾᔨᖅᓱᑦᑎᐊᖏᓐᓇᖁᔭᐅᕗᒍᑦ ᐊᑦᑕᕐᓇᖅᓯᔪᓐᓇᖅᑐᓂᒡᓗ ᒥᒃᖠᒋᐊᖅᑎᑦᑎᓯᒪᐃᓐᓇᕐᓗᑕ ᒪᓖᓐᓇᕐᓗᑎᒍᓪᓗ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᓐᓄᑦ ᑎᓕᐅᕆᔾᔪᑎᒋᓯᒪᔭᖏᑦ.

ᑲᐴᑎ ᐱᒻᒪᕆᐅᓪᓗᓂ ᐊᑐᕆᐊᖃᕐᒥᔭᕗᑦ ᓄᕙᒡᔪᐊᕐᓇᖅ-19−ᑖᖅᑕᐃᓕᒪᓂᕐᒧᑦ.  ᐃᓂᒃᓴᓕᐅᖅᑕᐅᔪᒪᖃᑦᑕᕐᓂᐊᖅᐳᓯ ᑲᐱᔭᐅᓂᒃᓴᒧᑦ, ᑲᐱᔭᐅᔭᕇᓯᒪᙱᒃᑯᔅᓯ. ᑲᐴᑎᑦ ᐱᓯᒪᑦᑎᐊᖅᑕᕗᑦ − ᒫᓐᓇᓕ ᐅᕙᒍᑦ ᑕᒪᑦᑕ ᖃᐅᔨᒪᑦᑎᐊᕋᓱᒋᐊᖃᖅᐳᒍᑦ ᐱᓕᕆᐊᒃᓴᑦᑎᓐᓂᒃ ᐱᓕᕆᑦᑎᐊᕋᓗᐊᕐᒪᖔᑦᑕ ᖃᓄᐃᙱᑦᑎᐊᕈᓯᑦᑎᓐᓄᑦ ᓄᓇᖅᑲᑎᑦᑎᓐᓄᑦ ᐊᒻᒪ ᓇᒡᓕᒋᔭᑦᑎᓐᓄᑦ.

ᖃᐅᔨᒪᔪᖓ ᓘᒃᑖᖅ ᐹᑐᓴᓐ ᐱᒻᒪᕆᐅᔪᓂᑦ ᑐᓴᒐᒃᓴᖃᕐᒪᑦ ᓄᓇᕗᑦ ᐊᑐᕐᓂᐊᖅᑕᖓᓂ, ᐱᒋᐊᖅᑎᓕᖅᐸᕋ.  ᐱᓇᓱᐊᕈᓯᕐᒥ ᖃᓄᐃᙱᑦᑎᐊᕐᓂᐊᖅᐳᓯ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑕ ᑐᓴᒐᒃᓴᖏᑦ:

ᐅᓪᓛᒃᑯᑦ,

ᐱᒋᐊᕐᓗᒍ ᓇᒡᒐᔾᔭ ᒫᑦᓯ 29, ᐊᕐᕕᐊᒧᙵᐅᔪᑦ ᐊᕐᕕᐊᒥᓪᓗ ᐊᐅᓪᓚᕐᓂᐊᖅᑐᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᓐᓄᑦ ᐊᖏᖅᑕᐅᑦᑎᖃᑦᑕᔾᔮᔪᓐᓃᖅᑐᑦ. ᑭᓯᐊᓂ, ᐃᓄᐃᑦ ᓱᓕ ᐊᓂᑦᑕᐃᓕᑎᑕᐅᔪᑦ ᖃᓂᕝᕕᓯᐅᓚᐅᖅᑐᕕᓃᑦ ᓄᕙᒡᔪᐊᕐᓇᖅ-19−ᖃᖅᑐᒧᑦ ᓱᓕ ᖃᖓᑕᓲᒃᑯᑦ ᐊᐅᓪᓚᑲᑕᖁᔭᐅᙱᑦᑐᑦ ᐊᓂᑦᑕᐃᓕᕝᕕᖓ ᐃᓱᓕᓚᐅᙱᓐᓂᖓᓂ. ᐱᒻᒪᕆᐊᓘᕗᖅ ᐊᓂᑦᑕᐃᓕᖁᔭᐅᒍᕕᑦ ᐊᓂᑦᑕᐃᓕᒋᐊᖃᕐᓂᓕᒫᕐᓂᒃ ᐊᓂᑦᑕᐃᓕᖁᔭᒐᓗᐊᖅᐳᑎᑦ.  ᒥᒃᖠᒋᐊᕈᑕᐅᔪᓐᓇᕐᒪᑦ ᐊᑦᑕᕐᓇᓕᕋᔭᖅᑐᓄᑦ ᓯᐊᒻᒪᒃᑎᖅᑕᐅᓗᐊᒃᑲᓐᓂᕐᓗᓂ ᓄᕙᒡᔪᐊᕐᓇᖅ-19−ᒧᑦ. ᓄᓇᓖᑦ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᖅᑲᓇᐃᔭᖅᑏᑦ ᐊᒃᓱᕈᖅᖢᑎᒃ ᐱᓕᕆᖃᑦᑕᖅᓯᒪᕗᑦ ᐊᕐᕕᐊᕐᒥᐅᑦ ᖃᓂᒪᔪᑦ ᓄᖑᑎᑕᐅᖁᓪᓗᒋᑦ ᐊᒃᓱᕉᑎᒌᓐᓇᕈᑦᑎᒍᑦ, ᒥᒃᖠᒋᐊᖅᑎᑦᑎᔪᓐᓇᕋᑦᑕ ᐊᑦᑕᕐᓇᕐᓂᖓᓂᒃ ᖃᓂᒻᒪᒃᑐᑦ ᐃᓚᒃᑲᓐᓂᕋᔭᕐᓂᖅᐸᑕ.  ᑭᒃᑯᑐᐃᓐᓇᑦ ᐊᓂᑦᑕᐃᓕᑎᑕᐅᔪᑦ ᑕᒪᐅᓇᒥᐊᖅ ᐊᓂᓐᓂᖅᐸᑕ, ᓄᓇᓕᖕᓂᓪᓘᓐᓃᑦ ᖃᐅᔨᔭᐅᙱᓪᓗᑎᒃ ᐊᐅᓪᓚᕐᓂᖅᐸᑕ, ᐊᑭᓕᒐᒃᓴᖅᑖᖅᑎᑕᐅᓇᔭᖅᐳᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ.

ᑕᒪᓐᓇ ᐱᓇᓱᐊᕈᓯᖅ ᐊᓂᒍᖅᑕᕗᑦ 50% ᐃᓐᓇᐃᑦ ᓇᓗᓇᐃᖅᑕᐅᓯᒪᔪᑦ ᓄᓇᕘᒥ ᑲᐱᔭᐅᓯᒫᓂᓕᖅᑐᑦ ᓯᕗᓪᓕᕐᒥ ᑲᐱᔭᐅᔾᔪᑎᒥᒃ. ᑐᓴᕈᒥᓇᖅᑐᖅ, ᑭᓯᐊᓂ ᐊᑕᐅᓯᐊᑐᐊᖅ ᑲᐱᔭᐅᓗᓂ ᓈᒻᒪᙱᒻᒪᑦ. ᑐᒡᓕᐊᓂ ᑲᐱᔭᐅᓂᐊᖅᑐᑦ ᓄᓇᓕᖕᓄᐊᖅᑕᐅᕙᓪᓕᐊᓕᖅᑎᓪᓗᒋᑦ, ᑎᓕᐅᖅᐸᒃᑲ ᓯᕗᓪᓕᕐᒥ ᑲᐱᔭᐅᓚᐅᖅᑐᑦ ᑲᐱᔭᐅᒃᑲᓐᓂᖁᓪᓗᒋᑦ.

ᑕᐃᒃᑯᐊᓗ ᑲᐱᔭᐅᓚᐅᙱᑦᑐᑦ ᐋᓐᓂᐊᕕᖕᒧᑦ ᐅᖃᓗᐃᓐᓇᕈᓐᓇᖅᐳᑦ ᐃᓂᒃᓴᓕᐅᖅᑕᐅᔪᒪᓗᑎᒃ ᑲᐱᔭᐅᓂᕐᒧᑦ. ᑭᖑᕙᓗᐊᙱᑦᑐᖅ, ᑲᐴᑎᑦ ᓱᓕ ᐊᑐᐃᓐᓇᐅᔪᑦ. ᐆᒃᑐᖅᑕᐅᖁᔭᐅᔪᓕᒫᑦ ᓴᐳᔾᔨᔾᔪᑎᒋᔪᓐᓇᖅᑕᕗᑦ, ᑲᐴᑎ ᐊᑑᑎᖃᕐᓂᖅᐹᖑᔪᖅ, ᓴᐳᔾᔨᔾᔪᑎᒃᓴᑦᑎᐊᕙᐅᓛᖑᓪᓗᑎᒃ ᓄᕙᒡᔪᐊᕐᓇᖅ-19−ᒧᑦ.

ᐃᓄᒐᓴᒡᔪᐊᑦ ᖃᐅᔨᒫᓂᓕᖅᑐᑦ, ᑭᕙᓪᓕᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕈᐊᖅᑎᑦᑎᓛᓕᕐᒥᖕᒪᑕ ᐊᕐᕕᐊᓂ ᑕᖅᑭᕆᓛᖅᑕᑦᑎᓐᓂ. ᖃᐅᔨᒪᓇᓱᖕᓂᐊᖅᐳᒍᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐆᒃᑐᖁᔭᐅᔪᑦ ᐊᔪᓕᕈᑕᐅᖁᙱᒃᑲᓗᐊᖅᐸᕗᓪᓗ ᐱᒻᒪᕆᐅᓪᓗᑎᒃ ᐱᓕᕆᐊᒃᓴᓂᒃ ᓯᕗᒻᒧᐊᒍᑎᒋᒋᐊᒃᓴᖅ. ᐃᑲᔪᕐᓂᐊᕐᓗᒋᑦ ᓂᕈᐊᖅᑎᑦᑎᔪᑦ ᖃᓂᒻᒪᒃᐸᓪᓕᐊᓐᓇᐅᑎᓪᓗᒍ, ᑐᑭᒧᐊᒍᑎᒃᓴᓂᒃ ᐋᖅᑭᒃᓯᓯᒪᓕᖅᑐᒍᑦ ᐃᑲᔫᑕᐅᓂᐊᖅᑐᓂᒃ ᑲᑐᔾᔨᖃᑎᒌᒡᕕᖕᓄᑦ ᐊᑦᑕᕐᓇᙱᑦᑐᒃᑯᑦ ᐸᕐᓇᐃᔪᓐᓇᕐᓗᑎᒃ ᓂᕈᐊᖅᑎᑦᑎᔪᓐᓇᕐᓗᑎᒡᓗ.

ᐅᖃᐅᓯᒃᓴᒃᑲ ᐃᓱᓕᓕᖅᑎᓪᓗᒋᑦ ᖁᕕᐊᓇᖅᑐᒥᒃ ᐅᖃᐅᓯᖃᕈᒪᒋᕗᖓ. ᖃᐅᔨᒪᔭᐅᕈᓘᔭᓕᖅᑐᖅ, ᐅᐱᕐᖔᒃᑯᑦ ᖁᕕᐊᓱᖕᓇᖅ ᖃᒡᓕᔪᑯᓘᓂᖓᓂᒃ. ᖁᕕᐊᓱᒃᑎᑦᑎᓂᐊᖅᑐᑦ ᐃᑲᔪᖅᖢᒋᑦ, ᓴᖅᑭᑦᑎᓯᒪᓕᖅᑐᒍᑦ ᑎᓕᔭᐅᔪᑦ Honourary ᑐᓂᖅ ᐊᒻᒪ ᐋᓕ ᐅᒥᖕᒪᒃ ᐱᓕᕆᑎᑦᑎᔨᐅᓪᓗᑎᒃ ᐱᕐᔪᐊᓄᑦ ᐱᔨᑦᑎᕋᐅᑎᓄᑦ; ᐱᓗᐊᖅᑐᒥᒃ, ᐅᐱᕐᖔᒃᑯᑦ ᓇᓪᓕᐅᓐᓂᖅᓯᐅᖅᑐᑦ, ᖁᕕᐊᓱᒃᑐᑦ ᐊᒻᒪ ᐱᙳᐊᑲᑕᒃᑐᓂᒃ. ᐅᑯᐊ ᑎᓕᓯᔾᔪᑕᐅᔪᑦ ᑭᑭᑕᐅᖃᑦᑕᕐᒪᑕ ᑖᒃᑯᐊ ᐱᒻᒪᕆᐅᓪᓗᑎᒃ ᐋᖅᑭᒃᓯᒪᓂᕆᔭᖏᑦ ᖃᖓᑕᓲᒃᑯᑦ ᐊᐅᓪᓚᕐᓂᐊᖅᑐᓄᑦ ᑭᒡᓕᒋᑎᑕᐅᔪᑦ. ᐱᕕᖃᖅᑎᑕᐅᓂᐊᕐᒥᔪᑦ ᐃᒡᓗᕐᔪᐊᓄᑦ ᐃᓯᕈᓐᓇᕐᓗᑎᒃ ᖃᐅᔨᒪᔭᐅᒋᐊᕐᓗᑎᓪᓗ ᓄᑕᖅᑲᑦ ᓈᓚᑦᑎᐊᕋᓗᐊᕐᒪᖔᑕ. ᐃᓅᖃᑎᒥᓂᒃ ᐅᖓᓯᒌᒃᑕᐃᓐᓇᕋᓱᒋᐊᓕᑦ.

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓄᑦ ᓴᐳᔾᔨᓯᔪᒪᓪᓗᑎᒃ ᓄᓇᕗᒥᐅᓂᒃ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ

ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᑕᑯᔪᒪᒍᕕᑦ ᐊᒻᒪ ᐃᑲᔫᑎᒃᓴᓂᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ ᓄᓇᕗᒻᒥ, ᐅᕗᙵᕈᓐᓇᖅᐳᑎᑦ: https://www.gov.nu.ca/health/information/covid-19-novel-coronavirus

ᓄᑖᖑᓛᓂᒃ ᑐᓴᒐᒃᓴᓂᒃ ᐱᔪᒪᒍᕕᑦ ᒫᓐᓇ ᑭᒃᑯᑐᐃᓐᓇᓄᑦ ᖃᓄᐃᙱᑦᑐᓄᑦ ᐊᑐᖅᑕᐅᖁᔭᐅᔪᓂᒃ, ᐅᕗᙵᕐᓗᑎᑦ: https://www.gov.nu.ca/health/information/nunavuts-path

ᑲᐱᔭᐅᕙᓪᓕᐊᔪᑦ ᑐᓴᒐᒃᓴᓂᒃ ᖃᖓᑦᑎᐊᓕᓴᐅᓛᓂᒃ ᑐᑭᓯᔪᒪᒍᔅᓯ ᓄᓇᕗᒻᒥ, ᐅᕗᙵᕈᓐᓇᖅᐳᓯ: https://www.gov.nu.ca/health/information/covid-19-vaccination

ᓄᕙᒡᔪᐊᕐᓇᖅ-19−ᖃᖅᑐᑦ ᖃᓄᐃᓕᖓᓂᖏᑦ:  ᒫᑦᓯ 26

** ᓇᓗᓇᐃᖅᑕᐅᓯᒪᔪᑦ ᐊᒻᒪ ᑕᐃᒪᐃᑦᑐᖃᑐᐃᓐᓇᕆᐊᓕᑦ ᐱᖃᓯᐅᔾᔨᕗᑦ ᑲᓇᑕᓕᒫᒥ ᖃᓂᒪᓇᓱᒋᔭᐅᔪᑦ ᖃᐅᔨᓴᖅᑕᐅᓯᒪᔪᓂᑦ. ᐅᑯᐊ ᐃᓄᐃᑦ ᒪᓕᒃᑕᐅᖃᑕᐅᔪᑦ ᓇᓗᓇᐃᖅᑕᐅᔪᑦ ᐊᓐᓂᐊᑲᑕᖕᓂᖏᓐᓂᒃ ᐊᒻᒪ ᐊᑦᑕᕐᓇᖅᑐᒦᓚᐅᖅᑐᑦ ᐊᓯᖏᓪᓗ ᓇᖕᒥᓂᖅ ᓇᐅᑦᑎᖅᓱᖅᑐᑦ ᐅᕝᕙᓘᓐᓃᑦ ᐅᐸᒃᑕᐅᑦᑕᐃᓕᔪᑦ. ᑖᒃᑯᐊᓕᒫᖅ ᐋᓐᓂᐊᑲᑕᒐᔭᙱᑦᑐᑦ ᐅᕝᕙᓘᓐᓃᑦ ᖃᐅᔨᓴᖅᑕᐅᔪᐃᓐᓇᐅᔭᕆᐊᖃᙱᑦᑐᑦ.

*ᑭᖑᕙᓯᒃᑐᖃᑐᐃᓐᓇᕆᐊᓕᒃ ᐅᖃᐅᓯᖃᕐᓂᐊᕐᓗᓂ ᖃᓄᐃᓕᖓᓂᖏᓐᓄᑦ ᑭᒡᓕᓯᓂᐊᖅᑕᐅᓯᒪᔪᓂᓪᓗ ᖃᓄᐃᓕᖓᔪᓂᑦ ᐱᔭᐅᔪᓂᑦ ᖃᓪᓗᓈᑦ ᓄᓇᖓᓐᓂᑦ ᑲᓇᑕᒥ. ᖁᓕᓪᓗ ᒪᕐᕉᒡᓗ ᓄᕙᒡᔪᐊᖅᑐᑦ ᖃᐅᔨᔭᐅᓚᐅᖅᑐᑦ ᓄᓇᕗᑦ ᓯᓚᑖᓂ ᓇᓗᓇᐃᖅᑕᐅᓚᐅᖅᐳᑦ ᓄᓇᕗᒻᒧᑦ. ᐱᖓᓱᑦ ᐃᓅᔪᓐᓃᖅᑐᑦ ᐱᖃᓯᐅᔾᔭᐅᓪᓗᑎᒃ. ᓄᓇᕗᒥᐅᑦ ᓄᕙᒡᔪᐊᕐᓇᖅ-19−ᖃᖅᑐᑦ ᓄᓇᕗᑦ ᓯᓚᑖᓂ ᖃᐅᔨᔭᐅᔪᑦ ᓇᓗᓇᐃᖅᑕᐅᔪᐃᓐᓇᐅᔾᔮᙱᑉᐳᑦ ᓄᓇᕗᒻᒧᑦ.

ᓄᕙᒡᔪᐊᕐᓇᖅ-19−ᒧᑦ ᑲᐱᔭᐅᔪᑦ ᖃᓄᐃᓕᖓᓂᖏᑦ: ᒫᑦᓯ 26

*ᑲᑎᖦᖢᒋᑦ ᑲᐱᔭᐅᓃᑦ ᓄᑖᙳᕆᐊᖅᑎᑕᐅᖃᑦᑕᖅᐳᑦ ᐊᔪᕐᓇᕈᓐᓃᑐᐊᕌᖓᑦ, ᑭᓯᐊᓂᓗ ᐊᑦᑎᖕᓂᖅᓴᐅᑐᐃᓐᓇᕆᐊᖃᖅᖢᑎᒃ ᓈᓴᖅᑕᐅᓯᒪᓪᓚᕆᒃᑐᓂᑦ.

ᓄᕙᕐᔪᐊᕐᓇᖅ-19−ᒧᑦ ᓄᓇᓕᖕᓂ ᐱᓕᖕᓂ ᑭᒡᓕᓯᓂᐊᖅᑕᐅᓯᒪᔪᑦ: ᒫᑦᓯ 26

*ᖃᐅᔨᔭᐅᔪᑦ ᓄᓇᕘᑉ ᓯᓚᑖᓂ ᐃᓚᐅᑎᑕᐅᙱᑦᑐᑦ ᓄᓇᓕᖕᓂ ᓄᕙᒡᔪᐊᕐᓇᖅᑐᖅᑖᖅᐸᓪᓕᐊᔪᓂᒃ.

ᖃᐅᔨᓴᕐᓂᒧᑦ ᑭᒡᓕᓯᓂᐊᖅᑕᐅᓯᒪᔪᑦ ᒫᓐᓇᒧᑦ ᑎᑭᖦᖢᒍ: ᒫᑦᓯ 26

ᐃᓄᑐᐊᒃᑯᕕᖕᒦᑦᑐᑦ ᐃᓄᐃᑦ:

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓯᒪᓕᖅᑐᑦ ᖃᓄᐃᓕᖓᓂᖏᑦ:

ᐃᖅᑲᓇᐃᔭᕆᐊᖃᓪᓚᕆᒃᑐᓂᒃ ᑐᒃᓯᕋᐅᑏᑦ:

ᒫᑦᓯ 18−ᒥ ᐱᒋᐊᖅᖢᓂ, 13636−ᓂᒃ ᑐᒃᓯᕋᖅᑐᖃᓚᐅᖅᐳᖅ, 6735−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓄᑦ ᑐᒃᓯᕋᖅᑕᐅᔪᑦ.

*ᑭᖑᓪᓕᖅᐹᖅᓯᐅᑎᑦ ᑎᑎᕋᖅᑕᐅᓯᒪᔪᑦ ᐊᑐᐃᓐᓇᐅᙱᑦᑐᑦ.

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ

ᐃᓕᓐᓂᐊᕆᐅᖅᓴᕕᒃ ᐸᐃᕆᕕᒡᓗ

ᐊᕐᕕᐊᕐᒥ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕆᐅᖅᓴᕕᖕᒥ ᐃᓕᓐᓂᐊᕆᐅᖅᓴᔪᑦ ᒫᓐᓇ ᐃᓕᓐᓂᐊᕆᐅᖅᓴᔾᔪᑎᓂᒃ ᐊᑐᐃᓐᓇᐅᑎᑦᑎᔪᑦ. ᐃᓕᓐᓂᐊᕆᐅᖅᓴᕕᒃ ᒪᒃᐱᕐᓂᐊᖅᑐᖅ ᓇᒡᒐᔾᔭ, ᒫᑦᓯ 29−ᒥ.

ᐱᖓᔪᐊᑦ, ᒫᑦᓯ 24−ᒥ, ᐊᕐᕕᐊᕐᒥ ᐸᐃᕆᕕᒃ ᒪᒃᐱᓚᐅᖅᐳᖅ.

ᓄᓇᕗᒻᒥᐅᑦ ᖃᓄᐃᙱᑦᑎᐊᖅᑐᑦ ᑕᒪᑦᑕᑦᑎᐊᖅ ᑲᑐᔾᔨᓪᓗᑕ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐋᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᐅᖓᓯᒌᒃᑕᖅᐸᒡᓗᓯ, ᐃᓗᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᓯᓗ ᖃᓂᒪᒍᔅᓯ.