ᓄᓇᕗᒻᒥ ᐊᑭᑦᑐᕆᐊᖅᓯᓂᐊᖅᑐᑦ ᐊᑭᑭᓛᒥᑦ ᐊᑭᓕᖅᑕᐅᖃᑦᑕᖅᑐᓄᑦ $19−ᕌᓕᕐᓗᓂ/ᐃᑲᕐᕋᒧᑦ
ᐃᖃᓗᐃᑦ, ᓄᓇᕗᑦ (ᓄᕕᐱᕆ 6, 2023) – ᓄᓇᕗᑦ ᒐᕙᒪᖓ ᐊᑭᑦᑐᕆᐊᖅᓯᓂᐊᖅᑐᑦ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ ᐊᑭᑭᓛᒥᒃ ᑮᓇᐅᔾᔭᒃᓴᖅᑕᐅᕙᒃᑐᒥᒃ $16.00−ᒥᑦ $19.00−ᒧᑦ ᐃᑲᕐᕋᒧᑦ ᐊᑐᓯᒋᐊᓛᖅᖢᓂ ᔭᓄᐊᕆ 1, 2024−ᒥ.
ᒪᓕᒐᓕᕆᔨᒃᑯᑦ ᐊᑐᓕᖁᔨᓚᐅᖅᐳᑦ ᐊᑭᑦᑐᕆᐊᖁᔨᓪᓗᑎᒃ ᐊᑕᖐᔪᒥᒃ ᖃᐅᔨᓴᓚᐅᖅᑎᓪᓗᒋᑦ ᐊᒻᒪ ᑐᓴᕋᓱᓚᐅᖅᑎᓪᓗᒋᑦ ᓇᖕᒥᓂᖃᕐᕕᐅᔪᓂᒃ ᐊᒻᒪ ᐃᖅᑲᓇᐃᔭᖅᑎᓂᒃ 2023−ᒥ ᐊᐅᔭᒃᑯᑦ.
"ᐃᓕᑕᖅᓯᔪᒍᑦ ᐊᑭᑭᓛᒥᑦ ᐊᑭᓕᖅᑕᐅᖃᑦᑕᖅᑐᑦ ᐃᖅᑲᓇᐃᔭᕆᐊᖃᕐᒪᑕ ᐃᖅᑲᓇᐃᔭᖅᑎᑦᑎᔨᓄᑦ ᐃᖅᑲᓇᐃᔭᖅᑎᓄᓪᓗ ᐊᒻᒪ ᑐᕌᖓᓗᑎᒃ ᐃᓅᓇᓱᐊᕐᓂᕐᒧᑦ ᐃᖅᑲᓇᐃᔭᕐᓂᕐᒧᓪᓗ ᓄᓇᕗᒻᒥᑦ," ᐅᖃᖅᑐᖅ ᒥᓂᔅᑕ ᒪᓕᒐᓕᕆᔨᒃᑯᓐᓄᑦ, ᑕᐃᕕᑦ ᐊᕿᐊᕈᖅ. "ᓇᓗᙱᑦᑎᐊᖅᐳᖓ ᑕᒪᓐᓇ ᐊᑭᑦᑐᕆᐊᖅᑎᑦᑎᓂᖅ ᓈᒻᒪᖕᓂᖓᓂᒃ ᓇᓕᒧᒃᓱᖅᑎᑦᑎᓂᖓᓂᒃ ᐊᕕᒃᓯᒪᓂᑦᑎᓐᓄᑦ, ᑕᐃᒪᐃᓕᐅᕐᓂᒃᑯᓪᓗ ᐃᑲᔪᖅᖢᓂ ᑭᐅᓯᓂᕐᒥᒃ ᐊᒃᑐᖅᓯᓂᕆᕙᒃᑕᖏᓐᓂᒃ ᑭᓱᑐᐃᓐᓇᐃᑦ ᐊᑭᑦᑐᖅᐸᓪᓕᐊᑎᓪᓗᒋᑦ ᐊᑭᖏᓐᓄᓪᓗ ᐃᓅᓂᐊᕐᓗᓂ ᐅᓄᖅᓯᒋᐊᕐᓂᕆᔭᐅᔪᑦ ᑕᒪᒃᑯᓄᖓ ᑮᓇᐅᔭᓕᐅᖅᑐᓄᑦ ᐊᑭᑭᓛᒥᒃ ᑮᓇᐅᔾᔭᒃᓴᓂᐅᔪᖅ ᓄᓇᕗᒻᒥ."
ᒪᓕᒐᓕᕆᔨᒃᑯᑦ ᕿᒥᕐᕈᖕᒥᔪᑦ ᓄᑖᒥᑦ ᐋᖅᑭᒃᓱᐃᓂᕐᒥᑦ ᐊᑭᑭᓛᒥᑦ ᐊᑭᓕᖅᑕᐅᕙᒃᑐᓂᑦ ᐱᕕᖃᖁᓪᓗᒋᑦ ᐊᕐᕌᒍᑕᒫᑦ ᐊᑭᑦᑐᕆᐊᖅᐸᓪᓕᐊᔪᓂᑦ, ᓇᓗᓇᙱᔾᔫᒥᖁᓪᓗᒋᑦ ᓄᓇᕗᒻᒥ ᓇᖕᒥᓂᖃᖅᑎᐅᔪᑦ ᐃᑲᔫᔮᕐᔪᒃᑎᓪᓗᒋᑦ ᓄᓇᕗᒻᒥᐅᓂᑦ ᐊᖑᒻᒪᑎᖁᓪᓗᒋᑦ ᐊᑭᖏᓐᓂᑦ.
ᓱᓕᔪᑦ
- ᐃᑲᕐᕋᖅ ᐊᑕᐅᓯᖅ $19.00−ᓕᐅᓕᖅᐸᑕ, ᓄᓇᕗᑦ ᖁᑦᑎᓛᒥᒃ ᑮᓇᐅᔾᔭᒃᓴᖅᑕᐅᔪᓐᓇᖅᑐᖅ ᑲᓇᑕᒥ.
- ᑭᖑᓪᓕᖅᐹᒥ ᐊᑭᑦᑐᕆᐊᖅᑕᐅᓚᐅᖅᑐᖅ ᓄᓇᕗᒻᒥ ᐊᑭᑭᓛᒥ ᑮᓇᐅᔾᔭᒃᓴᖅᑕᐅᕙᒃᑐᖅ ᐊᐃᕆᓕ 1, 2020−ᒥ, ᐊᑭᑦᑐᕆᐊᖅᑎᓪᓗᒍ $13.00−ᒥ $16.00−ᒧᑦ ᐃᑲᕐᕋᒧᑦ ᐊᑕᐅᓯᕐᒧᑦ.