ᓄᓇᕗᒻᒥ ᐃᒥᐊᓗᓕᕆᓂᕐᒥᑦ ᐊᒻᒪ ᐋᖓᔮᕐᓇᖅᑐᖅ ᐱᕈᖅᑐᕕᓂᓕᕆᓂᕐᒥᑦ ᑲᒥᓴᓐ
ᓄᓇᕗᒻᒥ ᐃᒥᐊᓗᓕᕆᓂᕐᒥᑦ ᐊᒻᒪ ᐋᖓᔮᕐᓇᖅᑐᖅ ᐱᕈᖅᑐᕕᓂᓕᕆᓂᕐᒥᑦ ᑲᒥᓴᓐ (ᑎᓕᔭᐅᓯᒪᔪᑦ) ᐅᑯᓄᖓ ᐱᔪᓐᓇᖅᑎᑕᐅᓪᓗᑎᒃ ᓴᖅᑭᑎᑕᐅᖃᑦᑕᖅᐳᖅ ᑮᓇᐅᔭᓕᕆᔨᒃᑯᑦ ᒥᓂᔅᑕᖓᓄᑦ, ᐃᒥᐊᓗᓕᕆᓂᕐᒧᑦ ᒥᓂᔅᑕ, ᑎᓕᔭᐅᓯᒪᔪᒥᒃ ᐱᓕᕆᐊᖅᓴᖅᑖᖅᑎᑦᑎᕙᒃᖢᓂ ᐃᒥᐊᓗᒃᑖᕐᕕᖕᓂ ᐊᐅᓚᑦᑎᓂᐊᕐᓗᓂ, ᓂᐅᕕᖅᑎᑦᑎᓂᐊᕐᓗᓂ, ᓂᐅᕐᕈᑎᖃᕐᓂᐊᕐᓗᓂ, ᐋᖅᑭᒃᓱᐃᓂᐊᕐᓗᓂ ᓄᓇᓕᖕᓄᐊᖅᑎᑦᑎᓂᐊᕐᓗᓂᓗ ᐊᒻᒪ ᐊᐅᓚᑦᑎᓂᐊᕐᓗᓂ ᐃᓚᖓᓂ II ᓄᓇᕗᒻᒥ ᐃᒥᐊᓗᖕᒧᑦ ᒪᓕᒐᕐᒦᑦᑐᒥ. ᑎᓕᔭᐅᓯᒪᔪᑦ ᒪᓕᖃᑦᑕᖅᐳᖅ ᐅᓂᒃᑳᓕᐅᖅᑕᐅᔪᒥᒃ ᐊᑐᕆᐊᓕᖕᓂᒃ ᓇᓗᓇᐃᖅᑕᐅᓯᒪᔪᓂᒃ ᐃᓚᖓᓂ II-ᒥ ᓄᓇᕘᒥ ᐃᒥᐊᓗᖕᒧᑦ ᒪᓕᒐᕐᒦᑦᑐᒥ ᐊᒻᒪ ᐃᓚᖓᓂ IX ᑮᓇᐅᔭᓂᒃ ᐊᐅᓚᑦᑎᓂᕐᒧᑦ ᐱᖁᔭᕐᒥ.
ᑎᓕᔭᐅᓯᒪᔪᑦ, ᐱᔪᓐᓇᕐᓂᖏᓐᓂᒃ ᑲᔪᓯᑎᑦᑎᓂᐊᕐᓗᓂ ᐱᓕᕆᐊᒃᓴᖏᓐᓂᒡᓗ ᐱᓕᕆᓂᐊᕐᓗᓂ ᐃᒥᐊᓗᖕᒧᑦ ᒪᓕᒐᕐᒥ ᐊᑐᕆᐊᖃᖅᑎᑕᐅᕗᖅ ᒥᓂᔅᑕᒧᑦ ᑎᓕᔭᐅᓗᓂ. ᑎᓕᔭᐅᓯᒪᔪᑦ ᐊᐅᓚᑦᑎᔨᒥᒃ ᓯᕗᓕᖅᑎᖃᖅᐳᖅ ᒥᓂᔅᑕᒧᑦ ᐅᓂᒃᑳᕆᐊᖃᖅᐸᒃᖢᓂ ᒥᓂᔅᑕᐅ ᑐᒡᓕᒃᑲᓐᓂᖓ ᐊᒻᒪ ᒥᓂᔅᑕᐅ ᑐᒡᓕᖓ ᑮᓇᐅᔭᓕᕆᔨᒃᑯᑦ ᐊᖅᑯᑎᒋᓗᒋᑦ, ᐊᐅᓚᑦᑎᕝᕕᖏᓐᓂ ᐋᖅᑭᒃᓱᖅᓯᒪᔪᓂ ᑎᑎᕋᐅᔭᖅᓯᒪᓪᓗᓂ ᒪᒃᐱᖅᑐᒐᖅ 5-ᒥ. ᐊᐅᓚᑦᑎᔨᒋᔭᐅᔪᖅ 12-ᓂᒃ ᐃᖅᑲᓇᐃᔭᖅᑎᓂᒃ ᑲᒪᒋᔭᖃᖃᑦᑕᖅᐳᖅ, ᑲᖏᖅᖠᓂᕐᒦᑦᑐᓂᒃ ᐃᑲᓗᖕᓂᓗ, ᐊᒻᒪᓗ ᑕᓪᓕᒪᓂᒃ ᑳᑦᑐᓛᒃᑕᐅᓯᒪᔪᓂᒃ ᐃᒥᐊᓗᖕᒥ ᖃᐅᔨᓴᖅᑎᓂᒃ.
ᑲᖏᖅᖠᓂᕐᒥ ᑐᑦᑕᕐᕕᖃᖅᑎᑕᐅᓪᓗᓂ, ᑎᓕᔭᐅᓯᒪᔪᖅ ᐊᐅᓚᑦᑎᔨᒋᔭᐅᕗᖅ ᓂᐅᕐᕈᑕᐅᕙᒃᑐᓂ ᐅᓄᖅᑐᓂᓪᓗ ᓂᐅᕐᕈᑎᖃᖅᐸᒃᑐᓂ ᓄᓇᓕᖕᓄᐊᖅᑕᐅᓂᐊᖅᑐᓂ ᒪᕐᕉᒃ ᓯᕐᓗᐊᑦ ᐊᑐᖅᖢᒋᑦ, ᐱᖃᑖ ᑲᖏᖅᖠᓂᕐᒥ 601 m2-ᓂᒃ ᐃᓗᓕᖅᑕᐅᔪᓐᓇᖅᖢᓂ ᐱᖃᑖᓗ ᐃᖃᓗᖕᓂ 603m2-ᓂᒃ ᐃᓗᓪᓕᕈᓐᓇᖅᖢᓂ. ᑎᓕᔭᐅᓯᒪᔪᖅ ᐊᐅᓚᑦᑎᖃᑦᑕᕆᕗᖅ ᐱᖓᓱᓂᒃ ᐱᔪᓐᓇᐅᑎᖃᖅᑎᑕᐅᔪᓂᒃ ᑎᑎᕋᕐᕕᖕᓂ, ᒪᕐᕉᒃ ᑳᑦᑐᓛᒃᑕᐅᓯᒪᓪᓗᑎᒃ ᑲᖏᖅᖠᓂᕐᒥ ᐃᖃᓗᒃᑑᑦᑎᐊᒥᓗ ᐱᖓᔪᖓᓗ ᐃᓚᒋᔭᐅᓪᓗᓂ ᐃᒥᐊᓗᖕᒧᑦ ᒪᓕᒐᕐᓂᒃ ᐊᑐᖅᑎᑦᑎᕙᒃᑐᑦ ᑎᑎᕋᕐᕕᖕᓂ ᐃᖃᓗᖕᓂ. ᐱᔪᓐᓇᐅᑎᖃᖅᑎᑕᐅᔪᑦ ᑎᑎᕋᕐᕕᖏᑦ ᐊᑭᓕᕆᐊᓕᖕᓂᒃ, ᐊᒻᒪ ᐃᒥᐊᓗᖕᒥ ᐊᓯᐊᓄᑦ ᓄᓇᓕᖕᓄᐊᕆᐊᓕᖕᓄᑦ ᐱᔪᓐᓇᐅᑎᑖᖅᑎᑦᑎᕙᒃᖢᓂ.
ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒋᐊᕈᓐᓇᕐᐳᑎᑦ NULC's ᐃᑭᐊᕿᕕ: www.nulc.ca.
ᐃᒥᐊᓗᖕᒥ ᓂᐅᕐᕈᑎᖃᕐᓂᖅ ᓄᓇᕘ ᐃᓗᐊᓂ
ᓄᓇᕘᑉ ᓄᓇᖓ ᐊᑐᖅᐸᒃᑕᖏᓐᓂᓪᓗ ᐱᓕᕆᐊᖑᓇᓱᒋᐊᖃᖅᐸᒃᑐᑦ ᒪᓕᒐᕆᔭᐅᓪᓚᑦᑖᖅᑐᓄᑦ ᑲᑎᙵᓪᓗᑎᒃ ᓄᓇᕘᒥ ᐃᒥᐊᓗᖕᒥᒃ ᓂᐅᕐᕈᑎᖃᖅᐸᒃᑐᑦ ᐊᑐᕆᐊᖃᖅᑎᑕᐅᔪᓂ ᐊᖏᕈᑕᐅᓯᒪᙱᓪᓗᓂ ᑲᓇᑕᒥ ᐱᓕᕆᐊᖑᖃᑦᑕᖅᓯᒪᓂᑯᓂ. ᐊᒃᓱᕈᕐᓇᕐᓂᖅᐹᖑᕙᒃᐳᖅ ᓄᓇᕘᒥ ᐃᒥᐊᓗᖕᒥᒃ ᓂᐅᕈᑎᖃᕐᓂᐊᕐᓗᓂ ᐱᔨᑦᑎᕋᕆᐊᖃᖅᑎᓪᓗᒋᑦ ᓂᐅᕕᖅᑎᑦᑎᕙᒃᑐᑦ ᐱᑕᖃᑦᑎᐊᙱᓐᓂᖏᓐᓂᒃ ᑲᓇᑕᐅ ᐃᓗᐊᓃᑦᑐᓂᒃ ᓄᓇᖁᑖᓂ ᑕᓪᓕᒪᖏᓐᓃᑦᑐᓂ ᐊᒻᒪ ᖃᖓᑕᓲᑐᐊᒃᑯᑦ ᐊᐅᓪᓚᖅᑎᑕᐅᔭᕆᐊᖃᖅᐸᒃᑎᓪᓗᒋᑦ ᐃᒪᒃᑯᓪᓗ ᐊᖅᑯᑎᒃᓴᖃᑦᑎᐊᖃᑦᑕᙱᓐᓂᖓᓄᑦ.
ᖃᓄᐃᑦᑑᓂᖏᑦ ᐊᔾᔨᒌᙱᑦᑐᑦ ᐊᑐᖅᖢᒋᑦ ᓄᓇᕘᒥ ᐃᒥᐊᓗᖕᒥ ᓄᓇᓕᖕᓄᐊᖅᑎᑦᑎᕙᓪᓕᐊᔾᔪᑕᐅᕙᒃᑐᖅ ᐋᖅᑭᒃᓯᔾᔪᑕᐅᕙᒃᖢᓂ ᐊᓯᖏᓐᓂᒃ ᑲᓇᑕᒥ ᑭᒡᒐᖅᑐᐃᕕᐅᔪᓂ ᐃᓚᒋᔭᐅᙱᖦᖢᓂ, ᓄᓇᓕᖕᓄᐊᖅᑎᑦᑎᓂᐊᕐᓗᓂ ᐊᑐᖅᑕᐅᓪᓗᐊᑕᖃᑦᑕᕐᓂᐊᖅᐳᖅ. ᑎᓕᓴᐅᓯᒪᔪᑦ ᐊᐅᓚᑦᑎᔨᐅᙱᑉᐳᖅ ᐃᒥᐊᓗᖕᒥ ᓂᐅᕕᕐᕕᒋᔭᐅᔪᓂᒃ ᐊᒻᒪ ᐃᒥᐊᓗᖕᒥ ᑎᑭᓴᖅᑕᐅᕙᒃᑐᓂᒃ ᑎᓕᔭᐅᓯᒪᔪᑦ ᑐᑦᑕᕐᕕᒋᔭᖓᒍᑦ ᐱᓕᕆᐊᖑᖃᑦᑕᖅᐳᑦ ᑲᖏᖅᖠᓂᕐᒥ ᖃᖓᑕᓲᒃᑯᓪᓗ ᐊᐅᓪᓚᖅᑎᑕᐅᕙᒃᖢᑎᒃ ᓇᓕᐊᖕᓂᑐᐃᓐᓇᖅ ᑎᓕᔭᐅᓯᒪᔪᑦ ᓯᕐᓗᐊᖓᓂᙶᖅᑐᓂᒃ. ᓚᐃᓴᖃᖅᑐᑦ ᓂᐅᕕᕐᕖᑦ ᓇᖕᒥᓂᖃᖅᑏᓪᓗ ᐱᓕᕆᑎᑦᑎᔪᖃᕐᓂᐊᖅᑎᓪᓗᒍ ᐱᔪᓐᓇᐅᑏᑦ ᐃᓚᐅᑎᑕᐅᙱᓚᑦ, ᓂᐅᕕᖅᑕᐅᔪᑦ ᐅᓄᓗᐊᖅᑐᑦ ᐅᖃᖅᓯᒪᖃᑦᑕᕐᓂᖏᓐᓄᑦ ᐊᐃᔭᐅᓯᒪᔭᕆᐊᖃᕐᓂᖏᓐᓂ ᖃᓂᓛᒧᑦ ᑎᓕᔭᐅᓯᒪᔪᒧᑦ ᓯᕐᓗᐊᕆᔭᐅᔪᒧᑦ.
ᓄᓇᕗᑦ ᒐᕙᒪᒃᑯᑦ ᐊᑲᐅᓂᖅᓴᒥᒃ ᓂᐅᕕᕈᓐᓇᖅᑎᑕᐅᔪᑦ ᐊᑐᕈᓐᓇᕈᒪᓪᓗᒋᑦ, ᑎᓕᔭᐅᓯᒪᔫᑉ ᐃᒥᐊᓗᓕᒫᖏᓐᓂᒃ ᑎᑎᕋᖅᑕᐅᓯᒪᔪᑦ ᓂᐅᕕᖅᑕᐅᖃᑦᑕᖅᐳᑦ ᑭᒡᒐᖅᑐᖅᑎᒥ ᑭᒡᒐᖅᑐᖅᑕᐅᓪᓗᑎᒃ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᓄᑦ ᐱᔪᓐᓇᖅᑎᑦᑎᕙᒃᑐᑦ ᐊᑐᖅᖢᒋᑦ.
ᓄᓇᕘᒥ ᐃᒥᐊᓗᖕᒥ ᑭᒡᓕᖃᖅᑎᑦᑎᔾᔪᑎᑦ
ᐃᒥᐊᓗᖕᒧᑦ ᒪᓕᒐᖅ ᓄᓇᕘᒥᐅᓂᒃ ᐋᖅᑭᒃᓱᖅᑕᐅᓯᒪᔪᓂᒃ ᐃᒥᐊᓗᖕᒥ ᑭᒡᓕᖃᖅᑎᑦᑎᔾᔪᑎᖃᖅᐳᑦ ᑎᓴᒪᓂᒃ ᐋᖅᑭᒃᓯᒪᔪᓂᒃ ᑐᙵᕕᖃᖅᖢᑎᒃ, ᐊᔾᔨᒌᙱᖦᖢᑎᒃ ᐅᑯᓂᖓ ᒪᓕᒃᑕᐅᕙᒃᑐᒥ ᐊᔪᖅᑎᑦᑎᑦᑎᐊᒻᒪᕆᖕᓂᕐᒧᑦ. ᓄᓇᓖᑦ ᐊᑐᕈᒪᔭᒥᓂᒃ ᓂᕈᐊᖃᑦᑕᖅᐳᑦ ᓂᕈᐊᕕᒡᔪᐊᖅᑎᑦᑎᓪᓗᑎᒃ. ᐊᒡᒍᖅᓯᒪᓂᖓ 48.2-ᒥ ᓇᓗᓇᐃᖅᑕᐅᓯᒪᓪᓗᓂ ᒪᓕᒐᕐᒥ ᐱᓕᕆᔾᔪᓯᖏᑕ ᐋᖅᑭᒃᓯᒪᓂᖏᑦ ᐅᑯᐊᖑᕗᑦ:
ᑭᒡᓕᖃᖅᑎᑦᑎᙱᖦᖢᑎᒃ ᓄᓇᓖᑦ ᒪᓕᒋᐊᖃᖅᑎᑕᐅᓪᓗᑎᒃ ᓄᓇᕘᒥ ᐃᒥᐊᓗᖕᒧᑦ ᒪᓕᒐᕆᔭᐅᔪᓂᒃ;
ᑭᒡᓕᖃᖅᑎᑕᐅᓪᓗᑎᒃ ᐅᓄᕐᓂᕆᔭᕆᐊᖃᖅᑕᖏᑦ ᐃᒥᐊᓘᑉ ᒪᓕᒐᖏᑕ ᖄᒃᑲᓐᓂᐊᒍᑦ, ᐃᒥᐊᓗᒃᑖᕆᔭᐅᓂᐊᖅᑐᑦ ᓂᐅᕕᖅᑕᐅᔪᓐᓇᖅᑐᑦ ᑭᒡᓕᖃᖅᑎᑕᐅᑐᐃᓐᓇᕆᐊᖃᖅᖢᑎᒃ;
ᑲᑎᒪᔨᓂᒃ ᐋᖅᑭᒃᓱᐃᔨᖃᖅᖢᑎᒃ, ᓄᓇᓕᖕᓂ ᓂᕈᐊᖅᑕᐅᓯᒪᔪᓂᒃ ᐃᒥᐊᓗᓕᕆᔨᒃᑯᑦ ᑲᑎᒪᔨᖏᓐᓂᒃ ᐋᖅᑭᒃᑕᐅᕙᒃᖢᑎᒃ:
- ᑭᒃᑯᑦ ᐃᒥᕈᓐᓇᖅᐸᑦ, ᐱᓯᒪᔪᓐᓇᖅᐸᑦ, ᓂᐅᕕᕈᓐᓇᖅᐸᑦ ᐅᕝᕙᓘᓐᓃᑦ ᐃᒥᐊᓗᖕᒥᒃ ᓇᒧᙵᐅᑎᑦᑎᔪᓐᓇᖅᐸᑦ ᓄᓇᓕᖕᓂ, ᕼᐋᒻᓚᑦᑯᓐᓂ ᖃᓂᒋᔭᖓᓂᓗ,
- ᑭᒃᑯᑦ ᐃᒥᐊᓗᖕᒥᒃ ᐊᓯᐊᓄᑦ ᓄᓇᓕᖕᓄᐊᖅᑎᑦᑎᔪᓐᓇᖅᐸᑦ, ᕼᐋᒻᓚᑦᑯᓐᓄᑦ ᖃᓂᒋᔮᓄᓪᓗ,
- ᖃᔅᓯᓂᒃ ᐃᒥᐊᓗᖕᓂᒃ ᐱᓯᒪᔪᓐᓇᖅᐸᑦ, ᓂᐅᕕᕈᓐᓇᖅᐸᑦ, ᓇᒧᙵᐅᔾᔨᔪᓐᓇᖅᐸᑦ ᐊᓯᐊᓄᑦ ᓄᓇᓕᖕᓄᐊᖅᑎᑦᑎᔪᓐᓇᖅᐸᓪᓗ ᓄᓇᓕᖕᓂ ᕼᐋᒻᓚᑦᑯᓐᓂ ᖃᓂᒋᔮᓂᓗ,
- ᑭᒃᑯᑦ ᐅᐊᐃᓂᒧᑦ ᐱᔪᓐᓇᐅᑎᑖᕋᓱᒍᓐᓇᖅᐸᑦ ᓄᓇᓕᖕᓂ, ᕼᐋᒻᓚᑦᑯᓐᓂ ᖃᓂᒋᔮᓂᓗ ᐊᒻᒪ ᖃᔅᓯᓂᒃ ᐅᐊᐃᓂᓂᒃ ᐱᓇᔪᒍᓐᓇᖅᐸ, ᐊᒻᒪ
- ᑭᒃᑯᑦ ᐃᒥᐊᓗᓕᐅᕈᓐᓇᖅᐸᑦ ᓇᖕᒥᓂᖅ ᖃᑕᙳᑎᖏᓪᓗ ᐃᒥᕐᓂᐊᖅᑕᖏᓐᓂᒃ ᓄᓇᓕᖕᓂ, ᕼᐋᒻᓚᑦᑯᓐᓂ ᖃᓂᒋᔮᓂᓗ ᐊᒻᒪ ᖃᓄᖅ ᐊᖏᑎᒋᔪᒥᒃ ᓴᓇᔪᓐᓇᖅᐸ.
ᐊᔪᖅᑎᑦᑎᔾᔪᑎ, ᐊᔪᖅᑎᑦᑎᔾᔪᑕᐅᓪᓗᓂ ᐃᒥᖅᐸᒃᑐᓂᒃ, ᐱᓯᒪᕙᒃᑐᓂᒃ, ᓂᐅᕕᖅᐸᒃᑐᓂᒃ, ᓂᐅᕐᕈᑎᖃᖅᐸᒃᑐᓂᒃ, ᓇᒧᙵᐅᔾᔨᕙᒃᑐᓂᓪᓗ ᐃᒥᐊᓗᖕᒥᒃ ᓄᓇᓕᐅᑉ ᐃᓗᐊᓂ, ᕼᐋᒻᓚᑦᑯᓐᓂ ᖃᓂᒋᔮᓂᓗ.
ᐊᑭᓕᐅᕆᓂᕐᒧᑦ ᐋᖅᑭᐅᒪᔪᖅ
ᓄᓇᕗᑦ ᒐᕙᒪᒃᑯᑦ ᐊᑲᐅᓂᖅᓴᒥᒃ ᓂᐅᕕᕈᓐᓇᖅᑎᑕᐅᔪᑦ ᐊᑐᕈᓐᓇᕈᒪᓪᓗᒋᑦ, ᑎᓕᔭᐅᓯᒪᔫᑉ ᐃᒥᐊᓗᓕᒫᖏᓐᓂᒃ ᑎᑎᕋᖅᑕᐅᓯᒪᔪᑦ ᓂᐅᕕᖅᑕᐅᖃᑦᑕᖅᐳᑦ ᑭᒡᒐᖅᑐᖅᑎᒥ ᑭᒡᒐᖅᑐᖅᑕᐅᓪᓗᑎᒃ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᓄᑦ ᐱᔪᓐᓇᖅᑎᑦᑎᕙᒃᑐᑦ ᐊᑐᖅᖢᒋᑦ. ᐊᑐᐊᒐᖅ ᐱᔾᔪᑎᒋᓪᓗᒍ, ᐱᔪᓐᓇᖅᑎᑦᑎᕙᒃᑐᑦ ᓂᐅᕕᕋᓱᖃᑦᑕᖅᐳᑦ ᐃᒥᐊᓗᓕᐅᕐᕕᖕᓂ ᐊᔪᕐᓇᙱᑐᐊᕋᖓᑦ. ᑎᑭᓴᖅᑕᐅᕙᒃᑐᑦ ᐅᓄᓗᐊᖃᑦᑕᙱᓐᓂᖏᓐᓄᑦ, ᐃᓚᖏᑦ ᐃᒥᐊᓗᑦ ᑎᑭᓴᖅᑕᐅᖃᑦᑕᖅᐳᑦ ᐃᒥᐊᓗᓕᕆᔨᒃᑯᑎᒍᑦ ᑯᐸᐃᖕᒥ (SAQ) ᐅᕝᕙᓘᓐᓃᑦ ᐃᒥᐊᓗᓕᕆᔨᑦ ᐊᐅᓚᑦᑎᔨᖏᑕ ᑲᑎᒪᔨᖏᓐᓄᑦ ᐋᓐᑎᐅᕆᐆᒥ (LCBO). ᓄᓇᕗᒻᒥ ᐃᒥᐊᓗᓕᕆᔨᕐᔪᐊᒃᑯᑦ ᐊᔾᔨᒌᓂᒃ ᐊᑭᖃᖅᑎᑦᑎᖃᑦᑕᖅᐳᑦ ᓖᑕ ᐊᑕᐅᓯᖅ ᐊᑭᖏᑦ ᐃᓚᒋᐊᖅᑕᐅᓯᒪᓪᓗᑎᒃ ᐃᒥᐊᓗᖕᓂᒃ ᓂᐅᕕᐊᒃᓴᕆᔭᐅᔪᓂᒃ. ᐊᐅᓚᑦᑎᔾᔪᑎᖏᓐᓄᑦ ᐊᑭᓕᕆᐊᓕᖕᒥᒃ ᐃᓚᒋᐊᖅᑕᐅᖃᑦᑕᖅᐳᖅ $0.27 ᓖᑕ ᐊᑕᐅᓯᖅ. ᐅᑯᐊ ᐅᓪᓗᒥ ᐃᓚᒋᐊᕈᑕᐅᖃᑦᑕᖅᑐᑦ ᓖᑕᒧᑦ ᐊᑕᐅᓯᕐᒧᑦ:
- Spirits $25.84
- Wine $7.69
- Coolers $3.00
- Beer $1.91
ᑎᓕᔭᐅᓯᒪᔪᑦ ᑕᑎᒋᔭᐅᔭᕆᐊᖃᕐᓂᖏᑦ ᖃᖓᑕᓲᒃᑯᖅᑎᑕᐅᕙᒃᑐᓄᑦ ᐃᒥᐊᓗᖕᓂᒃ ᑎᑭᓴᖅᑕᐅᔪᓂᒃ ᓄᓇᓕᖕᓄᐊᖅᑎᑦᑎᓂᐊᕐᓗᑎᒃ ᐃᒪᓐᓇ ᑐᑭᖃᖅᐳᖅ ᐃᒥᐊᓗᖕᒥᒃ ᓂᐅᕕᖅᐸᒃᑐᑦ ᓄᓇᕘᒥ ᓇᓂᒥᐅᑕᐅᓂᕐᒥᓄᑦ ᐱᓕᕆᐊᒃᓴᓂᒃ ᐃᓱᒪᒋᔭᖃᕆᐊᖃᖃᑦᑕᖅᐳᑦ ᖄᒃᑲᓐᓂᐊᒍᓪᓗ ᖃᖓᑦᑕᐅᑎᖏᓐᓄᑦ ᐊᑭᓖᔭᕆᐊᖃᖅᐸᒃᖢᑎᒃ ᐊᒻᒪ ᐋᖅᑭᒃᓱᖅᑕᐅᑦᑎᐊᕆᐊᖃᕐᓂᖏᓐᓄᑦ ᐊᑭᓖᒃᑲᓐᓂᕆᐊᖃᖅᐸᒃᖢᑎᒃ ᐊᓯᖏᓐᓂᒃ ᑲᓇᑕᒥ ᐊᑐᖅᑕᐅᕙᙱᑦᑐᒥᒃ.
ᓇᓂᒥᐅᑕᐅᓂᕐᒥᓄᑦ ᐱᓕᕆᐊᒃᓴᓄᑦ ᐊᔪᕈᑕᐅᓕᖅᐸᒃᑐᖅ ᐱᔾᔪᑎᖃᖅᐳᖅ ᐃᒥᐊᓗᑦ ᑎᑭᓴᖅᑕᐅᔪᑦ ᐊᑭᓕᐅᑎᖏᓐᓂᒃ ᑎᓕᔭᐅᓯᒪᔪᑎᒍᑦ. ᒫᓐᓇᐅᔪᖅ ᐱᔪᓐᓇᐅᑎᖃᖅᑎᑕᐅᓪᓗᑎᒃ ᑮᓇᐅᔭᒧᑦ ᐊᑭᓖᔾᔪᑕᐅᕙᒃᑐᑦ ᒪᑯᐊᖑᓪᓗᑎᒃ ᑎᑎᖅᑲᒃᑯᕕᒃᑯᑦ ᐊᑭᓖᓪᓗᑎᒃ ᑎᑭᓴᐃᔾᔪᑕᐅᕙᒃᑐᑦ, ᓂᐅᕕᖅᑎᒃᑯᑦ ᑮᓇᐅᔭᓂᒃ ᓇᒃᓯᐅᔾᔨᕙᒃᑐᑦ, ᓇᕿᑕᐅᓯᒪᔪᑦ ᑮᓇᐅᔭᒃᓴᑦ, ᑮᓇᐅᔭᒃᑯᕕᒃᑯᑦ ᐊᑭᓖᓂᖅ, ᐅᕝᕙᓘᓐᓃᑦ ᑮᓇᐅᔭᒃᑯᕕᖕᒧᐊᖅᑎᑦᑎᑲᐅᑎᒋᓂᖅ ᑎᓕᔭᐅᓯᒪᔪᑦ ᑮᓇᐅᔭᒃᑯᕕᖓᓄᑦ ᐊᑭᓕᐅᑕᐅᔪᓐᓇᖅᑐᐃᓇᐅᕗᑦ.
ᓄᓇᕘᒥ ᐃᒥᐊᓗᓕᕆᔨᕐᔪᐊᒃᑯᑦ ᐊᐅᒃᑕᔫᓂᒃ ᐱᔪᓐᓇᖃᑦᑕᕐᒥᔪᑦ (VISA ᐊᒻᒪ Mastercard) ᐃᒥᐊᓗᖕᒧᑦ ᐊᑭᓕᐅᑎᒋᓂᐊᕐᓗᒋᑦ, ᐊᒻᒪ ᐃᖃᓗᖕᒥᐅᑦ ᑲᖏᖅᖠᓂᕐᒥᐅᓪᓗ ᑮᓇᐅᔭᒃᑯᕕᖏᑕ ᐊᐅᒃᑕᔫᖏᓐᓂᒃ ᐊᑐᕈᓐᓇᖅᑎᑕᐅᖕᒥᔪᑦ. ᐊᑭᓕᐅᑎᖏᓐᓄᑦ ᓇᓗᓇᐃᖅᓯᒪᔪᑦ ᐱᔭᐅᓚᐅᖅᑎᓪᓗᒋᑦ, ᑎᓕᔭᐅᓯᒪᔪᑦ ᑎᑭᓴᖅᑕᐅᔪᓂᒃ ᓂᕈᐊᖅᖠᖅᑎᑦᑎᖃᑦᑕᖅᐳᑦ, ᐴᖅᑲᖅᑕᐅᓪᓗᑎᒃ, ᖃᖓᑕᓲᒃᑯᕕᓕᐊᕈᔾᔭᐅᓪᓗᑎᒡᓗ ᑎᑭᓴᐃᕝᕕᐅᔪᒧᑦ ᐊᐅᓪᓚᖅᑎᑕᐅᔭᖅᑐᓕᖅᖢᑎᒃ.
ᐃᒥᐊᓘᑉ ᐊᑭᖏᑕ ᖄᒃᑲᓐᓂᐊᒍᑦ, ᐊᑭᓖᒃᑲᓐᓂᕆᐊᖃᖃᑦᑕᖅᐳᑦ ᓄᓇᓕᖕᓂ ᑲᒪᒋᔭᐅᔾᔪᑎᖏᓐᓄᑦ ᐊᔾᔭᖅᑕᐅᔾᔪᑎᖏᓐᓄᓪᓗ $10.00-ᒥᒃ (GST-ᖓᓗ) ᐊᑐᓂ ᑎᑭᓴᖅᑕᐅᔪᑦ, ᐊᒻᒪ ᐊᓕᒍᑦ ᐃᓕᔭᐅᓯᒪᑦᑎᐊᓚᐅᕐᓗᑎᒃ ᐅᑎᖅᑎᑕᐅᔾᔪᑎᖏᓐᓄᑦ ᐊᑭᓕᕆᐊᓕᖕᒥᒃ. ᑎᑭᓴᖅᑑᑉ ᓄᓇᖓᓄᑦ ᐊᐅᓪᓚᖅᑎᑕᐅᓕᑕᐃᓐᓇᖃᑦᑕᖅᐳᑦ ᑎᑭᓴᐃᔪᕐᓗ ᖃᖓᑦᑕᐅᑎᖏᓐᓄᑦ ᐊᑭᓖᔭᕆᐊᖃᖅᐸᒃᖢᓂ ᖃᖓᑦᑕᐅᑎᓕᕆᔨᓄᑦ ᐊᑭᓕᒐᒃᓴᙳᖅᑎᑕᐅᔪᓂᒃ ᑲᒪᒋᔭᒃᓴᖃᕆᐊᖃᓕᖅᐸᒃᖢᑎᒡᓗ ᓄᓇᓕᖕᓄᑦ ᑎᑭᑦᑐᓐᓇᑦᑎᐊᖁᓪᓗᒋᑦ. ᖃᖓᑦᑕᐅᑎᖏᑦ ᐊᔾᔨᒌᖃᑦᑕᙱᑦᑐᑦ, ᐅᖓᓯᖕᓂᖓ, ᓄᓇᓕᖓ, ᐊᒻᒪ ᐅᓯᔾᔪᑎᒋᔭᐅᔪᖅ ᒪᓕᒃᖢᒋᑦ.
ᐋᑐᕚᒥ ᖃᖓᑦᑕᐅᑎᒃᑯᑦ ᖃᐅᑕᒫ ᐱᔨᑦᑎᕋᕈᑕᐅᕙᒃᑐᑐᐊᖅ ᖃᖓᑕᓲᕐᔪᐊᒃᑯᑦ ᓄᓇᕘᓕᐊᖅᐸᒃᑐᓂᒃ ᐊᓯᖏᓐᓄᓪᓗ ᓄᓇᓕᖕᓄᑦ ᐱᓇᓱᐊᕈᓯᖅ ᒪᕐᕈᐃᖅᖢᒍ ᐱᖓᓱᐃᖅᖢᒍᓘᓐᓃᑦ ᖃᖓᑕᕙᒃᖢᑎᒃ, ᖃᖓᑕᕝᕕᐅᕙᒃᑐᑦ ᐋᖅᑭᒃᓱᖅᑕᐅᓯᒪᔪᑦ ᓄᓇᕘᒥ ᐅᑕᖅᑭᔭᕆᐊᖃᓕᕈᑕᐅᖃᑦᑕᖅᐳᑦ ᐃᒥᐊᓗᖕᓂᒃ ᑎᑭᓴᖅᑕᐅᔪᓕᒫᓂᒃ ᓄᓇᕘᒥ (ᓚᐃᓴᖃᖅᑏᑦ ᐱᔪᓐᓇᐅᑎᖃᖅᑏᓪᓗ ᐱᒻᒪᕆᐅᔪᓂᒃ ᖃᓄᐃᓕᐅᖅᑎᑦᑎᓂᐊᖅᑐᑦ ᐃᓚᐅᑎᑕᐅᙱᑦᑐᑦ).
ᓄᓇᓕᓕᒫᑦ ᐊᔾᔨᒌᒃᑎᑕᐅᔾᔫᒥᖁᓪᓗᒋᑦ, ᐃᖃᓗᖕᒥᐅᑦ ᑲᖏᖅᖠᓂᕐᒧᑦ ᐃᒥᐊᓗᖕᓂᒃ ᑎᑭᓴᐃᔭᕆᐊᖃᖅᐳᑦ ᓄᓇᕘᑉ ᓯᓚᑖᓂᓪᓘᓐᓃᑦ, ᐊᒻᒪ ᑕᐃᒪᓐᓇᑦᑕᐅᖅ ᑲᖏᖅᖠᓂᕐᒥᐅᑦ ᐃᖃᓗᖕᓄᑦ ᐃᒥᐊᓗᖕᓂᒃ ᑎᑭᓴᐃᔭᕆᐊᖃᕆᓪᓗᑎᒃ ᐅᕝᕙᓘᓐᓃᑦ ᓄᓇᕘᑉ ᓯᓚᑖᓄᑦ. ᐊᓯᓕᒫᖏᑦ ᑎᑭᓴᐃᕙᒃᑐᑦ ᓄᓇᕘᒥ ᑲᖏᖅᖠᓂᕐᒧᑦ ᐃᖃᓗᖕᓄᓪᓘᓐᓃᑦ ᑎᑭᓴᐃᔪᓐᓇᖅᐳᑦ. ᑕᐃᒪᐃᔾᔪᑎᖃᖅᐳᑦ ᓄᓇᕘᓕᒫᒥ ᓄᓇᓕᖏᓐᓂ ᐃᒥᐊᓗᒃᑖᖃᑦᑕᖁᓇᒋᑦ ᑭᒃᑯᑐᐃᓐᓇᑦᑎᐊᑦ, ᑭᓯᐊᓂ ᓚᐃᓴᖃᖅᑎᑕᐅᔪᓂᒃ.
ᐃᒥᐊᓗᓕᔭᕈᓐᓇᐅᑏᑦ
ᓄᓇᕘᒥᐅᑦ ᐃᒥᐊᓗᒃᑖᕈᓐᓇᑐᐃᓐᓇᕆᐊᓖᑦ ᐊᓯᐊᓄᑦ ᓄᓇᓕᖕᓄᐊᖅᑎᑦᑎᔪᓐᓇᐅᑎᒥᒃ ᐱᔪᓐᓇᐅᑎᖃᕐᓗᑎᑦ ᐱᔪᓐᓇᐅᑎᖃᙱᓪᓗᑎᒡᓘᓐᓃᑦ, ᐊᔾᔨᒌᙱᕈᓘᔭᖅᑐᓂᒃ ᓂᕈᐊᕈᓐᓇᖁᓪᓗᒋᑦ ᐊᑭᖏᓪᓗ ᐊᔾᔨᒡᒌᙱᓐᓂᖅᓴᐅᓗᑎᒃ. ᓄᓇᕘᑉ ᓯᓚᑖᓂ ᐃᒥᐊᓗᒃᑖᕈᒪᒍᑎᒃ, ᑎᑭᓴᐃᔪᒪᔪᑦ ᓂᐅᕕᕆᐊᖃᕋᔭᖅᐳᑦ ᓄᓇᓕᖕᓄᐊᖅᑎᑦᑎᔪᓐᓇᐅᑎᒥᒃ ᓇᓕᐊᖕᓂᑐᐃᓐᓇᖅ ᐱᔪᓐᓇᐅᑎᑖᖅᑎᑦᑎᔨᑦ ᑎᑎᕋᕐᕕᖓᓂ ᐃᖃᓗᒃᑑᑦᑎᐊᒥ, ᑲᖏᖅᖠᓂᕐᒥ, ᐃᖃᓗᖕᓂᓘᓐᓃᑦ. ᖃᖓᑦᑕᐅᑎᑦ ᐊᑭᖏᓐᓄᑦ ᐃᓚᒋᐊᕈᑕᐅᒃᑲᓐᓂᖅᐸᒃᑐᑦ ᒪᓕᒃᖢᒋᑦ, ᐊᑐᖅᑕᐅᑎᑦᑎᔪᓐᓇᐃᓐᓇᕐᓂᐊᖅᐳᑦ ᓄᓇᖃᖅᑐᓕᒫᓂᒃ ᑭᒡᓕᖃᖅᑎᑕᐅᖃᑦᑕᙱᑦᑐᓄᑦ ᓄᓇᓕᖕᓄᑦ ᐊᒻᒪ ᓄᓇᓕᖕᓂ ᑲᑎᒪᔨᓄᑦ ᐊᐅᓚᑕᐅᔪᑦ.
ᓄᓇᓕᖕᓄᐊᖅᑎᑦᑎᔪᓐᓇᐅᑎᒥᒃ ᐱᔭᕆᐊᖃᖅᐳᑦ ᖃᔅᓯᑐᐃᓐᓇᕐᓂᒃ ᐃᒥᐊᓗᖕᓂᒃ ᓄᓇᕘᒧᐊᖅᑎᑦᑎᓂᐊᕐᓗᑎᒃ. ᑭᓯᐊᓂ, ᓇᒃᓴᕈᓐᓇᖅᑎᑕᐅᖃᑦᑕᖅᐳᑦ, ᓇᖕᒥᓂᖅ, 1,140 ml spirits ᐅᕝᕙᓘᓐᓃᑦ wine ᐅᕝᕙᓘᓐᓃᑦ 4,260 ml ᐱᐊ ᐅᖓᑖᓅᙱᑦᑐᖅ (12 355 ml ᐊᓕᒍᑦ). ᐅᑯᐊ ᐅᓪᓗᒥ ᐊᓯᐊᓄᑦ ᓄᓇᓕᖕᓄᐊᖅᑎᑦᑎᔪᓐᓇᐅᑎᒧᑦ ᐊᑭᓕᕆᐊᓖᑦ ᐋᖅᑭᒃᑕᐅᓯᒪᔪᑦ:
ᓄᓇᕘᒥᐅᑦ ᐃᒥᐊᓗᒃᑖᕈᒪᓇᔭᖅᑐᑦ ᓄᓇᓕᖕᓄᐊᖅᑎᑦᑎᔪᓐᓇᐅᑎᖃᙱᓪᓗᑎᒃ ᐱᔪᓐᓇᖅᑐᑦ ᐃᖃᓗᐃᑦ ᐅᕝᕙᓘᓐᓃᑦ ᑲᖏᖅᖠᓂᐅᑉ ᐃᒥᐊᓗᒃᑖᕐᕕᖓᓂ. ᐃᒥᐊᓗᒃᑖᕈᒪᔫᑉ ᓇᓂᒥᐅᑕᐅᓂᖓ ᒪᓕᒡᓗᒍ ᒪᓕᒐᖏᑦ ᐊᔾᔨᒌᙱᑦᑐᑦ.
ᐃᒥᐊᓗᓕᕆᔨᒃᑯᑦ ᑲᑎᒪᔨᕋᓛᖏᑦ
ᐃᒥᐊᓗᖕᒥᒃ ᓂᐊᕕᐊᒃᓴᖃᖅᑐᖃᕈᓐᓇᙱᑦᑐᖅ ᐊᔪᖅᑎᑕᐅᔪᓂᒃ ᓄᓇᓕᖕᓂ. ᐃᓄᒃ ᓄᓇᖃᕐᓗᓂ ᑭᒡᓕᖃᖅᑎᑦᑎᖃᑦᑕᙱᑦᑐᓂᒃ ᐃᒥᐊᓗᓕᕆᔨᒃᑯᑦ ᑲᑎᒪᔨᖏᓐᓂᒃ ᐊᖅᑯᑎᖃᕆᐊᖃᕋᔭᙱᑦᑐᑦ ᐊᒻᒪ ᑲᖏᖅᖠᓂᕐᒧᓪᓚᑦᑖᖅ ᐃᖃᓗᖕᓄᓪᓚᑦᑖᕐᓘᓐᓃᑦ ᑎᑭᓴᐃᔪᓐᓇᖅᖢᑎᒃ.
ᓄᓇᓖᑦ ᐃᒥᐊᓗᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᐅᓚᑕᐅᔪᑦ, ᐃᓄᐃᑦ ᑎᑭᓴᐃᔪᒪᔪᑦ ᐃᒥᐊᓗᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᖏᖅᑕᐅᓇᓱᒋᐊᖃᖅᐳᑦ ᐃᒥᐊᓗᖕᓂᒃ ᓄᓇᓕᖕᓄᐊᖅᑎᑦᑎᓇᓱᖕᓂᐊᕐᓗᑎᒃ. ᐃᒥᐊᓗᓕᕆᔨᒃᑯᑦ ᑲᑎᒪᔨᖏᑦ ᑎᑭᓴᖅᑕᐅᔪᓂᒃ ᑭᒡᓕᖃᖅᑎᑦᑎᑐᐃᓐᓇᕆᐊᓖᑦ ᐋᒃᑳᕈᓐᓇᖅᖢᑎᒡᓘᓐᓃᑦ ᑎᑭᓴᐃᔾᔪᑕᐅᓇᓱᒃᑐᒥᒃ. ᑎᑭᓴᐃᓇᓱᒃᑐᖅ ᐊᖏᖅᑕᐅᓯᒪᓕᖅᐸᑦ ᐃᒥᐊᓗᓕᕆᔨᒃᑯᑦ ᑲᑎᒪᔨᖏᓐᓄᑦ (ᑲᑎᒪᔩᑦ ᐊᖏᖅᑕᐅᓯᒪᔪᓂᒃ ᑎᑭᓴᐃᓇᓱᒃᑐᑦ ᐊᑎᖏᓐᓂᒃ ᓱᒃᑲᔪᒃᑯᑦ ᐊᐅᓪᓚᖅᑎᑦᑎᖃᑦᑕᖅᐳᑦ ᐃᒥᐊᓗᓕᕆᔨᕐᔪᐊᒃᑯᓐᓄᑦ), ᑎᑭᓴᐃᔪᓐᓇᖅᓯᓪᓗᑎᒡᓗ.
ᑭᖑᓪᓕᖅᐹᒥ ᐱᓕᕆᐊᖑᔭᕆᐊᖃᖅᑎᑕᐅᔪᖅ ᐃᒥᐊᓗᖕᒥᒃ ᓂᐅᕐᕈᑎᖃᖅᐸᒃᑐᓄᑦ ᓄᓇᕘᒥ ᑎᓕᔭᐅᓯᒪᔪᑦ ᑎᓕᐅᕆᔭᕆᐊᖃᕐᓂᖏᓐᓂᒃ ᓄᓇᕘᒥ ᐊᑐᓕᒃᑲᓐᓂᖅᑎᑦᑎᔭᕆᐊᖃᕐᓂᕐᒧᑦ ᐊᓕᒍᕐᓄᑦ ᑲᑎᖅᓱᐃᕝᕕᖕᒥ ᐊᑐᕐᓗᑎᒃ.
ᑎᓕᔭᐅᓯᒪᔪᑦ ᐊᓕᒍᕐᓄᑦ ᑲᑎᖅᓱᐃᕝᕕᖕᒥ ᐋᖅᑭᒃᓯᔭᕆᐊᖃᖅᐳᑦ ᐃᒥᐊᓗᒃᑖᕆᔭᐅᕙᓪᓕᐊᔪᓄᑦ, ᐊᒻᒪ ᐸᕐᓇᐃᓯᒪᕙᒡᓗᑎᒃ ᐃᒥᐊᓗᒃᑯᕕᖕᓂ ᐅᑎᖅᑎᑕᐅᔭᕆᐊᓕᖕᓂᒃ ᑲᑎᖅᓱᐃᕕᐅᓂᐊᖅᑐᒥᒃ ᓇᓂᑐᐃᓐᓇᖅ ᐊᑐᓕᖅᑎᑦᑎᒃᑲᓐᓂᖅᑎᑦᑎᕝᕕᖕᓂ. ᒫᓐᓇᐅᔪᖅ ᐊᓕᒍᕐᓂ ᐅᑎᖅᑎᑦᑎᕝᕕᒃᑕᖃᖅᐳᖅ ᐃᖃᓗᖕᓂ ᑲᖏᖅᖠᓂᕐᒥᓗ. ᑎᓕᔭᐅᓯᒪᔪᑦ ᐊᑭᓖᖃᑦᑕᖅᐳᑦ $0.29 ᐊᓕᒍᖅ ᐊᑕᐅᓯᖅ ᐊᒻᒪ $0.15 ᐃᐳᐃᑦᑐᖅ ᐊᑕᐅᓯᖅ ᐊᒻᒪ ᐅᑎᖅᑎᑦᑎᕙᒃᖢᑎᒃ $0.25 ᐊᓕᒍᖅ ᐊᑕᐅᓯᖅ ᐊᒻᒪ $0.10 ᐃᐳᐃᑦᑐᖅ ᐊᑕᐅᓯᖅ.
- Spirits $3.75 ᓖᑕ ᐊᑕᐅᓯᖅ
- Wine $2.00 ᓖᑕ ᐊᑕᐅᓯᖅ
- Coolers/ciders $0.59 ᓖᑕ ᐊᑕᐅᓯᖅ
- Beer $0.56 ᓖᑕ ᐊᑕᐅᓯᖅ