Mister's Story
ᐊᑎᕋ ᒥᔅᑐᓖ ᑯᓘᑎᐊᐃ. ᐊᕐᕌᒍᖃᕐᑐᖓ 25-ᓂ ᓂᔾᔭᐅᓯᔭᕐᐸᒃᖢᖓ ᓂᐱᓕᐅᕆᕙᒃᖢᖓᓗ ᐃᓅᓚᐅᕐᑐᖓ ᐱᕈᕐᖢᖓᓗ ᐃᖃᓗᖕᓂᑦ, ᓄᓇᕗᑦ, ᐃᒻᒥᓂ ᐅᓚᕕᓴᕈᓐᓇᑦᑎᐊᕐᑐᖓ.
ᐱᕈᕐᓴᓪᓗᖓ ᓄᓇᕗᒻᒥᑦ, ᐊᒃᓱᕈᖃᑦᑕᓚᐅᕐᑐᖓ ᖃᓄᐃᙱᓐᓂᒃᑯᑦ ᐃᓱᒪᑦᑎᐊᕋᓱᒃᖢᖓ. ᓄᑕᕋᐅᓂᖕᓂᑦ ᐃᓅᓱᒃᑐᒧᑦ, ᐊᔪᙱᐸᓗᓚᐅᕐᓯᒪᔪᖓ ᖃᓄᑐᐃᓐᓇᕐ ᐆᒃᑐᕐᑕᓐᓂᑦ ᑭᓯᐊᓂᓕ ᐊᔪᙱᑕᖃᒻᒪᕆᐊᓗᙱᖦᖢᖓ. ᕿᑎᒃᑲᒻᒪᕆᐅᓚᐅᕐᐳᖓ ᐊᑲᐅᔪᒻᒪᕆᐅᓚᐅᕐᑐᖅ ᑭᓱᒧ ᓵᖓᓪᓗᖓ ᐱᐅᓂᕐᓴᐅᓕᕋᓱᒃᖢᖓ, ᑕᒪᐃᓐᓂᒃ ᐃᓕᒌᑎᒍ ᐊᒻᒪᓗᑦᑕᐅᖅ ᓇᖕᒥᓂᓐᓄᑦ.
ᐊᓂᒍᐃᔪᓐᓇᕈᑎᒋᖃᑦᑕᓚᐅᕐᒥᔭᕋᑦᑕᐅᖅ, ᐃᓄᒻᒪᕆᒃᖢᖓ. ᐊᔪᕐᓇᙱᓐᓂᕐᓴᐅᓚᐅᕐᑐᖅ ᐃᓄᖕᓄᑦ ᓵᙵᓪᓗᖓ ᐃᓄᑑᙱᖦᖢᖓ ᓇᖕᒥᓂᕐᓗ ᐱᖃᓐᓇᕆᖏᖦᖢᖓ. ᖁᕕᐊᒋᑦᒃᑎᐊᖃᑦᑕᓚᐅᕐᑕᕋ ᐱᖃᑎᑖᕆᐊᒃᓴᖅ ᐊᔾᔨᒌᙱᑦᑑᑎᑎᒍᓪᓗ ᐃᓅᖃᑕᐅᕙᒃᖢᖓ ᐃᒃᐱᖕᓂᐊᓂᒃᑯᑦ.
ᖁᑦᓯᓂᖅᓴᓄᑦ ᐃᓕᓐᓂᐊᕐᕕᒻᒥ ᐊᒃᓱᕈᕐᓇᖅᑐᒻᒪᕆᐅᓚᐅᕐᑐᖅ. ᖁᔭᓕᓯᒪᕗᖓ ᐃᓅᖃᑎᒃᑲ ᑕᑯᕙᒃᖢᒋᑦ ᐱᖃᓐᓇᕆᔭᒃᑲ ᖃᐅᑕᒫᑦ, ᑭᓯᐊᓂᓕ ᐃᓕᓐᓂᐊᑦᑎᐊᕈᓐᓇᓚᐅᙱᑦᑐᖓ ᐊᖑᒻᒪᑎᑦᑎᐊᕐᓇᖓᓗ ᐃᓕᓐᓂᐊᕆᐊᓕᖕᓂᑦ. ᐊᒥᓱᓂ ᐱᐊᓂᖃᑦᑕᓚᐅᙱᑦᑐᖓ ᖁᑦᓯᓂᖅᓴᓄᑦ ᐃᓕᓐᓂᐊᕐᕕᒻᒥ ᐃᓱᓕᑦᑎᔪᓐᓇᐃᓪᓕᓪᓗᖓ, ᖁᙱᐊᑐᐃᓐᓇᕐᐸᒃᖢᒋᓪᓗ ᐱᖃᓐᓇᕆᔭᒃᑲ ᐃᓕᓐᓂᐊᖃᑎᒃᑲᓗ ᐱᕈᖃᑎᒋᓯᒪᔭᒃᑯᑦ ᐃᓕᓐᓂᐊᕆᐅᓕᓵᖅᑎᓪᓗᖓ, ᐃᓕᓐᓂᐊᕆᐊᓕᕐᖢᑎᒃᓗ ᓯᓚᑦᑐᖅᓴᕐᕕᖕᒧᑦ ᓯᓚᑦᑐᖅᓴᕐᕕᒡᔪᐊᖕᒧᓪᓗ. ᐃᓚᒋᔭᐅᖅᑰᔨᕙᓚᐅᙱᑦᑐᖓ, ᐅᕙᓐᓄᑦ ᐊᒃᓱᕈᕐᓇᓚᐅᕐᑐᖅ. ᐃᓅᖃᑎᖃᕈᓐᓇᕐᓂᕋ, ᐱᕐᔪᐊᖑᒻᒪᕆᓚᐅᕐᑐᖅ ᐅᕙᓐᓄᑦ, ᐊᓯᔾᔨᖅᑐᒻᒪᕆᐅᓚᐅᕐᐳᖅ ᐃᓄᑑᖏᓐᓇᐅᔭᓕᕐᖢᖓᓗ.
ᐃᓱᓕᑦᑎᓚᐅᕐᖢᖓ ᖁᑦᓯᓂᖅᓴᓄᑦ ᐃᓕᓐᓂᐊᕐᕕᒻᒥ, ᐊᕐᕌᒍᒥ ᑭᖑᕙᖅᖢᖓ, ᐃᒻᒥᓂᐅᓕᕐᖢᖓᓗ ᐃᓄᑑᖃᑦᑕᓕᓚᐅᕐᐳᖓ ᐊᓂᒍᐃᓇᓱᒃᖢᖓ ᐊᓯᔾᔨᕐᔪᐊᕐᐸᓪᓕᐊᔪᓂ ᐃᓅᓯᓐᓂᑦ, ᐊᒻᒪᓗ ᐃᓄᒻᒪᕆᒃᖢᖓ ᐊᒃᓱᕈᕐᓇᖅᑐᒻᒪᕆᐅᓚᐅᕐᑐᖅ ᐃᓱᒪᓐᓄ ᓂᑲᓪᓗᖓᕐᔪᐊᓕᕐᖢᖓ, ᐃᓛᓐᓂᒃᑯᓪᓗ ᐃᒻᒥᓃᕈᒪᓂᖕᒥᑦ ᐃᓱᒪᓚᐅᕐᐸᒃᖢᖓ ᐊᒃᓱᕈᓗᐊᒧᑦ ᐱᕈᕐᐸᓪᓕᐊᓪᓗᖓ ᐃᓄᑑᖅᑰᔨᓪᓗᖓᓗ. ᐃᓚᖏᑦ ᐱᖃᓐᓇᕆᔭᒃᑲ ᐅᕙᖓᓗ ᐅᖓᕙᐅᑎᕙᓪᓕᐊᓕᓚᐅᕐᐳᒍ ᖃᓂᑦᑐᓐᓃᕐᖢᑕᓗ. ᐃᓕᑦᑎᕙᓪᓕᐊᓕᓚᐅᕐᐳᖓ ᑲᒪᑦᑎᐊᕆᐊᒃᓴᖅ ᐃᓂᒋᔭᓐᓂᑦ. ᑕᖃᓯᒪᐃᓐᓇᐅᔭᓚᐅᕐᐳᖓ ᐃᖅᑲᓇᐃᔮᓐᓂᑦ ᖁᕕᐊᒋᙱᑕᓐᓂᑦ, ᐃᒡᓗᓐᓄᑦ ᐊᑭᓖᖃᑦᑕᕋᓱᒃᖢᖓ ᐊᑭᓕᒐᒃᓴᒃᑲᓗ ᑭᖑᕙᖁᓇᒋ. ᓱᕐᕋᖕᓇᖅᑐᖅᑐᖅᐸᖕᓂᕋ ᐱᓇᓱᐊᕈᓯᐅᓪᓗ ᓄᙳᐊᓂ ᖁᕕᐊᓱᒐᓱᖕᓂᕋᓗ ᖃᐅᑕᒫᒧᑦ ᐅᐃᕆᔾᔪᑎᒋᓕᓚᐅᕐᐸᕋ. ᐃᓱᒪᑦᑎᐊᖃᑦᑕᓚᐅᙱᓚᖓ ᑐᑭᓯᑦᑎᐊᕈᓐᓇᐃᓪᓕᓪᓗᖓ ᐋᖅᑭᐅᒪᑦᑎᐊᕐᓇᖓᓗ. ᖃᐅᔨᒪᓚᐅᙱᑦᑐᖓ ᑕᐃᒃᓱᒪᓂ, ᓱᕐᕋᖕᓇᖅᑐᖅᑐᖅᐸᒃᖢᖓ ᐃᓱᒪᑦᑕᐃᓕᓪᓗᖓ ᐊᒃᓱᕈᕐᓇᕐᑐᓂ ᐃᓱᒪᓗᐊᖁᓇᖓ ᐅᒃᑯᐃᕈᑎᒋᔪᓐᓇᕐᓇᒍᓗ ᐃᓱᒪᒃᑯᑦ ᐊᒃᓱᕉᑎᒋᔭᓐᓂᑦ, ᑭᓯᐊᓂᓕ ᐊᒃᓱᓗᐊᕌᓗᒃ ᐃᓱᒪᒃᑯᑦ ᐊᒃᓱᕈᕈᑎᖃᖃᑦᑕᓕᕋᒪ.
ᓂᔾᔭᐅᓯᐅᖃᑦᑕᓕᓚᐅᕐᐳᖓ ᖁᑦᓯᓂᖅᓴᓄᑦ ᐃᓕᓐᓂᐊᕐᕕᒻᒥ, ᐱᖃᓐᓇᕆᔭᒃᑲᓗ ᑖᒪᓯ ᑯᓄᒃᓗ. ᐊᓕᐊᓇᐃᓚᐅᕐᑐᖅ ᖁᕕᐊᒋᓪᓗᑎᒍ ᓱᕐᕋᒃᓯᒪᓕᕌᖓᑦᑕ ᑲᑎᙵᓗᑕᓗ. ᓂᔾᔭᐅᓯᔭᕐᐸᓪᓕᐊᖏᓐᓇᕐᐸᒃᖢᑕ ᐊᕐᕌᒍᓄᑦ ᒪᕐᕈᓪᓗᐊᓄᑦ, ᓲᕐᓗᓕ ᐃᖅᑲᓇᐃᔮᕆᔪᒥᒋᓪᓗ ᓇᓖᕌᒐᒃᓴᐅᓕᓚᐅᕐᐳᖅ. ᐊᕐᕌᒍᓂ ᓯᕗᓪᓕᕐᓂᑦ, ᒥᑕᐅᑎᒋᔭᐅᕙᓚᐅᕐᐳᖓ ᐃᓱᒪᖃᑦᑕᓚᐅᕐᒪᑕ ᑭᓇᑐᐃᓐᓇ ᓄᓇᕗᒻᒥᑦ ᓂᔾᔭᐅᓯᔭᕐᑎᑕᖃᕈᓐᓇᕋᓱᒋᙱᓐᓇᒥᒃ ᐊᒃᓱᕈᕐᓇᓚᐅᕐᑐᖅ, ᑭᓯᐊᓂᓕ ᖁᕕᐊᒋᑦᑎᐊᓚᐅᕐᑕᕋ ᓂᔾᔭᐅᓯᐅᕐᖢᖓ. ᖃᐅᔨᓚᐅᕐᐳᖓ ᑭᓱᒥ ᐊᔪᙱᑦᑎᐊᕐᒪᖔᕐᒪ, ᓲᕐᓗᓕ ᖃᓄᐃᓕᐅᕐᐸᓪᓕᐊᖅᑰᔨᓕᓚᐅᕐᐳᖓ ᐅᕙᓐᓄᑦ. ᑎᑎᕋᕐᓂᒃᑯᑦ ᐃᓅᓯᓐᓂᑦ ᐊᑐᓚᐅᕐᑕᓐᓂᑦ, ᐃᒻᒥᓂ ᑐᑭᓯᔪᓐᓇᕐᓂᕐᓴᐅᓕᓚᐅᕐᐳᖓ ᐅᖃᐅᓯᕆᑦᑎᐊᕐᓗᒋᓪᓗ ᐃᓱᒪᒋᔭᒃᑲ ᐃᒃᐱᒋᔭᒃᑲᓗ ᐅᕙᓐᓄᑦ,
ᐊᓯᓐᓄᓪᓗ ᐊᕙᑎᓐᓃᑦᑐᓄᑦ ᑐᑭᓯᓗᖓ ᐊᓂᒋᐊᒃᓴᖅ ᐃᓄᑑᕝᕕᒋᔭᓐᓂᑦ ᐋᖅᑭᓚᐅᕐᑕᓐᓂ ᐃᒻᒥᓂ ᐃᓐᓇᙳᕐᐸᓪᓕᐊᓕᕐᖢᖓ.
ᐃᖅᑲᓇᔮᕋ ᐱᒋᐊᓕᓵᕐᖢᓂ ᐊᕐᕌᒍᒐᓵᕐᔫᓕᕐᑐᑦ, ᓄᕙᒡᔪᐊᕐᓇᖅ-19 ᓄᓇᕐᔪᐊᒥᑦ ᖃᓂᒪᓂᖃᓕᓚᐅᕐᐳᖅ ᓄᖅᑲᕈᑎᐅᓪᓗᓂᓗ ᐊᐅᓪᓚᕐᕕᒋᖃᑦᑕᕐᓂᐊᓚᐅᕐᑕᓐᓂ ᓴᖅᑭᒋᐊᕋᓱᓕᕐᖢᒍ ᐃᖅᑲᓇᐃᔮᕋ. ᐊᓂᑦᑕᐃᓕᔭᕆᐊᖃᒃᑲᓐᓂᓕᓚᐅᕐᐳᖓ ᐊᒃᓱᕈᕐᓇᓚᐅᕐᑐᖅ, ᐳᓚᖅᑲᓕᕆᓪᓗᖓᓗ ᐊᕐᕌᒍᓄᑦ ᐊᓂᓇᓱᓚᐅᕐᖢᖓ. ᐅᖃᐅᔾᔪᖅᑕᐅᓚᐅᕐᖢᖓ ᐱᖃᓐᓇᕆᔭᓐᓂᑦ, ᐃᓅᓯᓕᕆᔨᒥ ᑕᑯᖃᑦᑕᓕᓚᐅᕐᐳᖓ, ᖁᔭᓕᔾᔪᑎᒋᓯᒪᔭᕋ ᐃᓕᑦᑎᓚᐅᕋᒪ ᐊᑲᐅᔪᓂ ᑐᙵᓐᓇᕐᑐᓂ ᑯᒃᓴᓱᒃᓂᖕᒧᑦ, ᐱᐅᓂᕐᓴᓂᓪᓗ ᐅᖃᓪᓚᖕᓂᖕᓂᑦ ᐅᖃᑦᑎᐊᕈᓐᓇᕐᓂᖕᒥᓪᓗ ᐃᒃᐱᒋᔭᓐᓂᑦ ᓂᑲᓪᓗᖓᓕᕌᖓᒪ, ᑭᓯᐊᓂᓕ ᓈᒻᒪᓚᐅᙱᑦᑐᖅ.
2021 ᐃᓱᕐᐸᓯᐊᓂ, ᓯᕘᕋᖃᑦᑕᕐᑐᒻᒪᕆᐅᓕᓚᐅᕋᒪ. ᓲᕐᓗᓕ ᑭᓱᓕᒫᑦ ᐊᔪᕐᓂᐊᕐᑐᖅ ᐃᖅᑲᓇᐃᔮᓐᓂᑦ, ᑐᙵᕕᖃᓗᐊᓚᐅᕋᒪ ᓯᓚᑖᓂ ᐃᓗᐊᕐᓯᓇᓱᒃᖢᖓ ᐊᔪᕐᖢᖓᓗ ᐃᓄᑑᔭᕆᐊᒃᓴᖅ. ᐊᒃᓱᕈᓗᐊᓕᓚᐅᕐᓯᒪᕗᖓ ᐋᓐᓂᐊᕕᓕᐊᕆᐊᖃᕐᖢᖓ ᑎᒥᒃᑯᑦ ᖃᓄᐃᓕᕐᖢᖓ ᐅᐃᒪᔮᕐᓂᖃᓕᕐᖢᖓ ᐊᒃᓱᐊᓗᒃ, ᐅᓯᐅᒻᒪᓗ ᐆᒻᒪᓯᕆᓕᕐᑐᖓ. ᐋᓐᓂᐊᕕᖕᒦᓚᐅᕐᖢᖓ, ᓄᖅᑲᑦᑎᐊᒻᒪᕆᓕᓚᐅᕐᐳᖓ ᓱᕐᕋᖕᓇᖅᑐᒥᑦ, ᓯᒡᒐᓕᐊᓂ, ᐃᒥᐊᓗᖕᓂᑦ ᑳᐱᒥᓪᓘᓐᓃᑦ. ᑕᖅᑮᖕᓄ ᒪᕐᕉᖕᓄ ᐃᓄᑑᓚᐅᕐᐳᖓ ᐃᓕᑦᑎᕙᓪᓕᐊᓪᓗᖓᓗ ᐃᒃᐱᒍᓱᖕᓂᖕᒥᑦ ᐅᓚᕕᓴᕐᑕᐅᓕᓪᓗᖓᓗ ᕿᒪᕉᑎᔪᒪᓇᖓ.
ᑕᖅᑭᓄ ᖃᔅᓯᐊᕐᔪᖕᓄᑦ ᐋᖓᔮᕈᓐᓃᕋᒪ, ᖃᐅᔨᓚᐅᕐᐳᖓ ᓱᕐᕋᖕᓇᖅᑐᖅ ᓄᖅᑲᖔᕈᑎᐅᓚᐅᕐᐳᖅ ᐃᒃᐱᖕᓂᐊᔾᔪᑎᓐᓂᑦ ᐱᓕᕆᐊᕆᓕᕐᖢᒋᓪᓗ ᐅᒃᑯᐃᖓᑦᑎᐊᕐᖢᖓ ᓱᓕᓪᓚᕆᒃᖢᖓᓗ. ᐃᒥᐊᓗᒋᐅᓚᐅᕆᕗᖓ ᕿᒫᔾᔪᑎᒋᓇᓱᙱᖦᖢᒍ ᐅᓚᕕᓴᐅᑎᒋᓇᓱᒃᓗᒍᓘᓐᓃᑦ. ᐅᓪᓗᒥ ᐊᕐᕌᒍ ᓇᑉᐸᖓᓂ ᓱᕐᕋᖕᓇᖅᑐᕈᓐᓃᖅᑐᖓ, ᐊᑯᓂᐅᓂᕐᐹᖅ ᑕᐃᒪᙵᓂ ᖁᑦᓯᓂᖅᓴᓄᑦ ᐃᓕᓐᓂᐊᓚᐅᕐᓯᒪᑎᓪᓗᖓ. ᐱᒃᑯᒍᓱᒻᒪᕆᒃᑐᖓ ᐅᖃᕆᐊᒃᓴᖅ ᓂᑲᓪᓗᖓᓗᐊᖃᑦᑕᕈᓐᓃᖅᑐᖓ ᓄᖅᑲᓚᐅᕐᑎᓪᓗᖓ. ᐅᒡᒍᐊᙱᑦᑐᖓ ᐊᑐᓚᐅᕋᒪ ᓱᕐᕋᖕᓇᖅᑐᒥ ᐃᑲᔫᑎᓚᐅᕐᒪ ᐃᓕᖦᖢᖓ ᐃᒻᒥᒥ ᐃᑲᔫᑎᓪᓗᓂᓗ ᓴᓇᑐᓂᖕᒥᑦ ᐱᒋᐊᓕᓵᖅᑎᓪᓗᖓ ᓂᔾᔭᐅᓯᔭᖅᑎᐅᓇᓱᓕᕐᑎᓪᓗᖓ.
ᐊᓕᐊᓇᐃᒋᓚᐅᕐᑕᕋ ᐊᑐᕐᖢᒍ ᓱᕐᕋᖕᓇᖅᑐᓂᒃ ᑭᓯᐊᓂ ᐱᑕᖃᕈᓐᓃᓚᐅᕐᑐᖅ ᐊᑐᓚᐅᕐᑕᓐᓂ ᐃᒻᒥᒥ ᖃᐅᔨᒪᔭᕆᐊᖃᕋᕕᑦ. ᐃᓅᓯᓕᕆᔨᑦ ᐊᑐᐃᓐᓇᐅᔪᑦ ᐃᑲᔪᕐᓂᐊᕐᓗᑎᒃ ᓈᓚᒃᓗᑎᒃ ᐃᓕᖕᓂᑦ, ᐃᑲᔪᕐᖢᑎᒃᓗ ᐃᒻᒥᒥ ᓈᓚᖕᓂᕐᒥᑦ, ᐃᑲᔫᔮᕐᔪᒃᖢᑎᒃ ᐃᓕᖕᓂᑦ ᑐᑭᓯᑦᑎᐊᕋᓱᖕᓂᖅ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᖕᒥᑦ ᐃᖃᖅᑐᖅᑕᐅᙱᓪᓗᓂ. ᓈᓚᖃᑦᑕᕆᐊᖃᕐᐸᐃᑦ ᐃᓱᒪᐃᑦ ᐃᒃᐱᒋᔭᑎᓪᓗ ᖃᓄᐃᓕᐅᑦᑎᐊᕐᓗᑎᓪᓗ. ᓱᕐᕋᖕᓇᖅᑐᖅ ᐊᑐᕐᑐᖅ ᐊᒥᓱᓄ ᐃᓄᖕᓄᑦ, ᐃᑲᔪᓲᕐᑕᐅᖅ ᑲᙳᓱᓗᐊᕈᓐᓃᕐᓗᓂ ᐊᑲᐅᓯᓐᓇᕐᖢᓂᓗ ᐅᖃᓪᓚᑦᑎᐊᕐᖢᓂ, ᑕᐃᒪᐃᙱᓚᕐᓕ ᐅᕙᓐᓄᑦ, ᖃᐅᔨᓚᐅᕐᐳᖓᓗ ᖃᓄᐃᓕᐅᕈᑎᒋᓕᕐᖢᒍᓗ. ᓄᖅᑲᕋᓗᐊᕋᒪ ᓱᕐᕋᖕᓇᖅᑐᒥᑦ ᐊᑲᐅᓯᕚᓪᓕᕈᑎᓚᐅᙱᑦᑐᖅ ᐊᑲᐅᙱᓕᐅᕈᑎᒋᔭᓐᓂᑦ, ᑭᓯᐊᓂ ᖃᐅᔨᒪᓪᓗᖓ ᐊᑑᑎᖃᕐᑐᖅ ᐅᕙᓐᓄᑦ ᐃᓱᒪᓐᓄᑦ ᐃᑲᔪᖅᐸᓪᓕᐊᓕᓚᐅᕐᖢᓂ.
ᐃᓕᖕᓂᑦ ᓈᓚᒋᑦ, ᐃᒻᒥᓂᒃᓗ ᑲᒪᒋᑦᑎᐊᕐᓗᑎᑦ!
ᐋᑯᓗᒃ ❤️
-ᒥᔅᑕ