ᐆᒪᔪᓂᒃ ᐊᐅᓚᑦᑎᓂᕐᒧᑦ
ᐆᒪᔪᓕᕆᔨᒃᑯᑦ ᐱᓕᕆᕝᕕᖓ ᐊᔾᔨᒌᙱᑦᑑᑎᓂᒃ ᐃᑲᔫᑎᑦᓴᓂᒃ ᐊᑐᐃᓐᓇᖃᖅᑎᑦᓯᔪᑦ. ᑲᓱᕝᕕᓄᑦ ᓇᕿᑦᑎᓗᑎᑦ ᐊᑖᓃᑦᑐᓂᒃ ᕿᒥᕐᕈᐊᕐᓂᕐᒧᑦ ᐃᑲᔫᑎᑦᓴᓂᒃ ᐊᕕᑦᑐᖅᓯᒪᔪᓂᒃ ᐃᒪᐃᓕᖓᔪᒥᑦ:
ᓄᓇᕘᒥ ᐊᖑᓇᓱᑦᑎᓄᑦ ᐊᑦᑕᕐᓇᖅᑕᐅᓕᒪᓂᕐᒧᑦ ᒪᓕᒋᐊᓖᑦ
ᑖᓐᓇ ᓄᓇᕘᒥ ᐊᖑᓇᓱᑦᑎᓄᑦ ᐊᑦᑕᕐᓇᖅᑕᐅᓕᒪᓂᕐᒧᑦ ᒪᓕᒋᐊᓖᑦ ᓴᓇᔭᐅᓯᒪᔪᑦ ᐊᑐᐃᓐᓇᐅᑎᑦᓯᓂᕐᒥᑦ ᓄᓇᕘᒥ ᐊᖑᓇᓱᑦᑎᓂᑦ ᐊᒻᒪᓗ ᓄᓇᓕᒻᒥᐅᑕᓂᑦ ᑐᑭᓯᒋᐊᕈᑎᓂᑦ ᐆᒪᔪᐃᑦ ᖃᓂᒻᒪᓯᖏᓐᓂᒃ, ᐊᒻᒪ ᐊᑐᐊᒐᐃᓪᓗ ᐊᑦᑕᕐᓇᙱᓐᓂᕐᒥᑦ ᓂᕆᓗᒋᑦ ᐊᐅᓚᑦᓯᓂᕐᒥᓪᓗ ᖃᓂᒻᒪᓯᓂᑦ ᐆᒪᔪᓂᒃ.
ᑖᓐᓇ ᐱᓕᕆᐊᖑᔪᖅ ᑲᑐᔾᔨᖃᑎᒌᓐᓂᒃᑯᑦ ᑖᒃᑯᓇᙵᑦ ᑲᓇᑕᒥ ᑲᑐᔾᔨᖃᑎᒌᑦᑐᑦ ᐆᒪᔪᑦ ᖃᓂᒻᒪᓯᖏᓐᓄᑦ ᐊᓪᓚᕝᕕᖓ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓂᒃ, ᐊᕙᑎᓕᕆᔨᒃᑯᑦ ᐱᓕᕆᕝᕕᖓ. ᑖᒃᑯᐊ ᑲᑐᔾᔨᖃᑎᒌᒃ ᐱᓕᖃᑎᒌᓲᑦ ᖃᐅᔨᓴᕐᓂᕐᒥᑦ ᐆᒪᔪᐃᑦ ᖃᓄᐃᙱᒃᑲᓗᐊᕐᒪᖔᑦ ᓄᓇᕘᒥ. ᑖᓐᓇ ᒪᓕᒋᐊᓕᒃ ᐊᑑᑎᖃᖁᔭᕗᑦ ᑖᒃᑯᓄᖓ ᓄᓇᒥᐅᑕᓕᕆᔨᓄᑦ, ᐆᒪᔪᕐᓂᐊᖅᑎᒃᑯᓐᓄᑦ, ᓄᓇᓕᒻᒥᐅᑕᐅᔪᓄᑦ, ᐊᒻᒪᓗ ᐆᒪᔪᓂᒃ ᖃᐅᔨᓴᖅᑎᓂᒃ ᐱᓕᕆᖃᑎᒌᓐᓂᒃᑯᑦ ᑐᓂᓯᖃᑦᑕᐅᑎᓂᒃᑯᑦ ᖃᐅᔨᒪᓂᕐᒥᑦ ᐊᒻᒪᓗ ᖃᐅᔨᓴᕐᓂᕐᒥᑦ ᓄᓇᕘᑉ ᐊᔾᔨᒌᙱᑦᑐᑦ ᐆᒪᔪᖁᑎᖏᓐᓂᒃ..
ᒪᓕᒋᐊᓖᑦ ᐅᖃᓕᒫᒐᐃᑦ ᓇᑦᓯᐅᔾᔭᐅᓯᒪᔪᑦ ᓄᓇᓕᓕᒫᑦ ᐆᒪᔪᕐᓂᐊᖅᑎᖏᓐᓄᑦ ᐊᒻᒪᓗ ᐆᒪᔪᓕᕆᓂᕐᒧᑦ ᐊᓪᓚᕝᕕᓕᒫᓄᑦ ᓄᓇᕘᒥᑦ. ᓄᓇᓕᖁᑏᑦ ᑐᓴᐅᒪᑎᓐᓂᐊᕋᕕᐅ ᑖᑦᓱᒫ ᐅᖃᓕᒫᒐᕐᒥᑦ ᐊᒻᒪᓗ ᐅᖃᓪᓚᖃᑎᖃᓕᖅᑎᑦᓯᓂᕐᒥᑦ ᐆᒪᔪᐃᑦ ᖃᓄᐃᑉᐸᓪᓕᐊᓐᓂᖏᓐᓄᑦ ᓄᓇᓕᑦᓯᓐᓂ, ᐋᖅᑭᑦᓱᐃᕈᒪᑐᐃᓐᓇᕆᐊᖃᖅᑐᑎᑦ ᑐᑭᓯᒋᐊᕈᑎᒥᑦ ᑲᑎᒻᒪᓂᒃᑯᑦ ᐃᕝᕕᑦ ᓄᓇᓕᖓᓂ ᐅᖃᐅᓯᐅᓗᓂ ᐆᒪᔪᐃᑦ ᖃᓄᐃᙱᑦᓯᐊᕆᐊᖃᕐᓂᖏᑦ ᐊᒻᒪᓗ ᐊᖑᓇᓱᑦᑎᓄᑦ ᐊᑦᑕᕐᓇᖅᑕᐅᓕᒪᓂᕐᒥᑦ.
ᑖᓐᓇ ᐅᖃᓕᒫᒐᖅ ᒫᓐᓇᐅᔪᖅ ᖃᓪᓗᓈᑎᑐᐃᓐᓇᖅ ᓴᖅᑭᑕᐅᓯᒪᔪᖅ. ᑐᕌᒐᕆᔭᕗᑦ ᓯᕗᓪᓕᖅᐹᒥᑦ ᑖᑦᓱᒧᖓ ᓄᓇᕘᒥ ᐊᖑᓇᓱᑦᑎᓄᑦ ᐊᑦᑕᕐᓇᖅᑕᐅᓕᒪᓂᕐᒧᑦ ᒪᓕᒋᐊᓖᑦ ᐱᓕᕆᐊᖑᔪᒧᑦ ᐆᑦᑑᑎᒋᔭᐅᓚᐅᑲᓪᓗᓂ ᑖᓐᓇ ᒪᓕᒐᑦᓴᐅᔪᖅ. ᓄᓇᕘᑉ ᓄᓇᓕᓕᒪᖏᓐᓄᑦ ᑐᓐᓂᖅᓴᖅᑕᐅᓯᒪᓕᖅᑐᖅ, ᑐᓴᐅᒪᑎᑕᐅᔪᒪᓪᓗᑎ ᐊᒻᒪᓗ ᐅᖃᐅᓯᑦᓴᓂᒃ ᑐᓂᓴᐅᓗᑎᑦ, ᓯᕗᓂᑦᓴᒥᑦ ᐃᓚᓕᐅᔾᔭᐅᒐᔭᖅᑐᓂᑦ ᓴᓇᔭᐅᒃᑲᓐᓂᖅᑎᓪᓗᒋᑦ ᐅᖃᓕᒫᒐᐃᑦ. ᑲᔪᓯᓂᒃᑯᑦ ᐅᖃᓪᓚᖃᑎᒌᑎᓪᓗᒋᑦ ᓄᓇᓕᐅᔪᑦ, ᓄᐊᑦᑎᔪᒪᒻᒥᔪᒍᑦ ᓄᓇᓕᒻᒥᙶᖅᑐᓂᒃ ᐊᒻᒪᓗ ᐃᓄᐃᑦ ᖃᐅᔨᒪᔭᖏᓐᓂᒃ ᐃᓚᓕᐅᔾᔭᐅᒍᓐᓇᖁᓪᓗᒋᑦ ᒪᓕᒐᑦᓴᐅᔪᒧᑦ. ᓯᕗᓂᑦᓴᑦᑎᓐᓂᒃ ᐃᓗᐃᑦᑐᕐᒥᑦ ᓴᖅᑮᒍᒪᔪᒍᑦ ᑐᑭᓕᐅᖅᑕᐅᓯᒪᓗᑎᑦ ᐃᓄᒃᑎᑐᑦ, ᐃᓄᐃᓐᓇᖅᑐᓐ, ᐊᒻᒪᓗ ᐅᐄᕖᑎᑐᑦ.
ᐊᑏᑑᖅ ᑖᓐᓇ ᓄᓇᕘᒥ ᐊᖑᓇᓱᑦᑎᓄᑦ ᐊᑦᑕᕐᓇᖅᑕᐅᓕᒪᓂᕐᒧᑦ ᒪᓕᒋᐊᓕᒃ ᐊᑑᑎᖃᕐᓕ ᐃᑲᔫᑎᖃᕐᓗᓂᓗ.
ᐊᖏᓂᖓ ᐱᔾᔪᑎᒋᓪᓗᒍ, ᒪᓕᒋᐊᓕᒃ ᐊᕕᑦᑐᖅᓯᒪᔪᖅ ᐱᔭᕆᐊᑭᓐᓂᖅᓴᒃᑯᑦ ᒥᓇᖅᑕᐅᔪᓐᓇᕐᓂᐊᕐᒪᑦ:
"ᓇᓄᕐᓄᑦ ᐊᑦᑕᕐᓇᖅᑕᐃᓕᒪᓂᖅ ᓄᓇᕘᒥ"
ᐅᑯᐊ ᒪᓕᒐᑦᓴᐅᔪᑦ ᐃᕝᕕᑦ ᖃᓄᐃᓕᐅᕈᓐᓇᖅᑕᖏᓐᓂ "ᓇᓄᕐᓄᑦ ᐊᑦᑕᕐᓈᕿᑦᑕᐃᓕᒪᓂᕐᒧᑦ" ᓄᓇᕘᒥ.
1. ᐅᖃᐅᓯᕆᑦᓴᐅᑎᒋᖃᑦᑕᕐᓗᒋᑦ ᓇᓄᐃᑦ ᑕᑯᔭᐅᔪᑦ ᓄᓇᓕᐅᑉ ᖃᓂᒋᔭᖓᓂ ᐃᓕᑦᓯ ᓄᓇᒥᐅᑕᓕᕆᔨᖏᓐᓄᑦ ᐊᒻᒪᓗ ᐆᒪᔪᕐᓂᐊᖅᑎᒃᑯᓐᓄᑦ
ᑲᒪᒋᔭᐅᑦᓴᐅᑎᒋᑉᐸᑦ ᒪᓂᑐᐃᓐᓇᖏᓪᓗᑎᑦ ᓇᓄᖅᑕᖃᖅᑎᓪᓗᓂ ᓄᓇᓕᒻᒥ ᖃᓂᒋᔭᖓᓂᓪᓘᓐᓃᑦ ᒥᑭᓪᓕᑦᑎᕆᓲᖅ ᐃᓄᐃᑦ ᓂᕿᖁᑎᖏᓐᓂᒃ ᓂᕆᓂᐊᙱᒻᒪᑕ ᐊᒻᒪᓗ ᓇᓄᖅ ᐅᑎᒃᑲᓐᓂᕐᓂᐊᙱᒻᒪᑦ. ᓄᓇᒥᐅᑕᓕᕆᔩᑦ ᐱᖁᑎᖃᖅᑐᑦ ᐊᑑᑎᖃᑦᓯᐊᖅᑐᓂᑦ ᓇᓄᕐᓂᒃ ᕿᒫᑎᑦᓯᓂᕐᒥᑦ ᖁᑭᕆᐊᙱᑐᐃᓐᓇᕐᓗᑎ ᖁᑭᐅᒻᒧᑦ.
2. ᐃᓄᓐᓂ ᖃᓂᒋᔭᖃᖅᑎᓪᓗᒋᑦ ᐅᐄᕆᓯᒪᓕᔭᑦᑐᑦ!! ᓇᓄᐃᑦ ᓄᓇᓕᒻᒦᑎᑕᐅᓐᓇᖃᑦᑕᖏᓪᓗᒋᑦ.
3. ᐃᓄᐃᑦ ᖃᐅᔨᓴᕈᒪᑐᐃᓐᓇᕋᓗᐊᖅᑎᓪᓗᒋᑦ ᓇᓄᕐᓂᒃ ᓄᓇᓕᖏᓐᓅᖅᑐᓂᒃ ᖃᓂᒋᔭᖓᓄᓪᓘᓐᓃᑦ ᐅᕝᕙᓘᓐᓃᑦ ᐊᑦᑕᕐᕕᖏᓐᓄᒃ, ᓄᓇᕐᓂᒃ ᐅᐸᒍᑎᓂᖅ ᐊᔾᔨᓕᐅᕆᓂᕐᒧᑦ ᐅᕝᕙᓘᓐᓃᑦ ᖃᐅᔨᓴᕐᓂᕐᒧᑦ ᐅᐃᕆᒍᑕᐅᓕᕈᓐᓇᖅᑐᖅ. ᓇᓄᐃᑦ ᐅᐃᕆᓯᒪᓕᖅᑎᓪᓗᒋᑦ ᐃᓄᓐᓃᓕᒪᓕᖅᑎᓪᓗᒋᑦ, ᐃᓕᙵᓕᓲᖑᒻᒪᑕ ᐃᓄᐃᑦ ᐅᓗᕆᐊᓇᙱᑦᑑᓐᓂᖏᓐᓂ ᑕᒪᓐᓇᓗ ᐅᐃᕆᒍᑕᐅᓕᓲᖑᒻᒪᑦ ᓇᓄᐃᑦ ᓄᓇᓕᒻᒨᒐᔪᓐᓂᖅᓴᐅᓕᓲᖑᓪᓗᑎ.
4. ᓂᕿᓂᒃ ᐅᕝᕙᓘᓐᓃᑦ ᓴᓂᕐᓂᒃ ᕿᒪᐃᖃᑦᑕᙱᓗᓯ ᓇᓄᕐᓄᑦ ᐊᑐᐃᓐᓇᐅᔪᓐᓇᖅᑐᓂᒃ.
ᓂᕿᓂᒃ ᓯᓚᒦᑎᑦᓯᒋᐊᖃᕈᕕᑦ, ᓴᙱᔪᒥᑦ ᐴᖃᖅᑎᓪᓗᒍ ᐲᖅᓴᕋᐃᙱᑦᑐᒥᑦ ᒪᑐᖃᑦᓯᐊᕐᓗᓂ. ᓇᓄᐃᑦ ᐊᑐᐃᓐᓇᖃᕐᕕᐅᑎᓪᓗᒋᑦ ᓂᕿᓂᑦ ᓄᓇᓕᓐᓂ ᖃᓂᒋᔭᖏᓐᓂᓘᓐᓃᑦ, ᑐᓂᓯᖃᑦᑕᕋᑦᑎᒍ ᐃᓄᓐᓄᑦ ᖃᓂᒋᔭᖃᕐᓂᕐᒧᑦ ᐊᒻᒪᓗ ᐱᖁᑎᖏᓐᓄᑦ. ᓇᓄᐃᑦ ᑕᐃᒪᐃᑦᑐᓂᑦ ᓂᕿᑦᓴᑦᓯᐊᖃᑦᑕᐃᓐᓇᓕᕐᓂᐊᖅᑐᑦ.
5. ᓂᕐᔪᑎᕕᓃᑦ ᕿᒪᖃᑦᑕᙱᓪᓗᒋᑦ ᓄᓇᓕᒻᒥ ᖃᓂᒋᔭᖓᓂᓪᓘᓐᓃᑦ.
ᐆᒪᔪᕐᓂᐊᖅᑎᓯ ᓄᓇᒥᐅᑕᓕᕆᔨᓯᓘᓐᓃᑦ ᐅᖃᖃᑎᒋᓗᒍ ᓇᓗᓇᐃᖅᓯᓂᕐᒥᑦ ᐃᓂᑦᓴᑦᓯᐊᕙᐅᒐᔭᖅᑐᒥᑦ ᕿᒪᐃᓂᕐᒧᑦ ᐃᒋᑦᓯᓂᕐᒧᓘᓐᓃᑦ ᓂᕐᔪᑎᕕᓂᕐᓂᒃ. ᓂᕐᔪᑎᕕᓂᒃᑯᕕᑕᖃᑦᓯᐊᖅᐸᑦ ᓇᓄᐃᑦ ᓄᓇᓕᐅᑉ ᐱᖁᑎᒋᔭᖏᓐᓂᒃ ᐅᐸᒍᑎᙱᓐᓂᖅᓴᐅᒐᔭᖅᑐᑦ.
6. ᐃᓱᒪᑦᓴᑦᓯᐅᕙᒌᕐᓗᑎᑦ ᖃᓄᐃᓕᐅᕋᔭᕐᒪᖔᖅᐱᑦ ᓇᓄᒻᒥ ᑕᑯᑳᓪᓚᓐᓂᕈᕕᑦ.
ᑕᒪᓐᓇ ᐅᐃᒪᓕᕐᓂᕐᒧᑦ ᐊᒻᒪᓗ ᑲᑉᐱᐊᓱᓕᕐᓂᕐᒧᑦ ᐃᑲᔫᑎᖃᕋᔭᖅᑐᖅ ᐊᒻᒪᓗ ᐃᓱᒪᓕᐅᕆᑦᓯᐊᕐᓂᕐᒧᑦ ᐃᑲᔫᑎᖃᕐᓗᓂ. ᑐᑭᓯᒋᐊᒃᑲᓐᓂᕐᓂᕐᒧᑦ ᖃᓄᖅ ᑲᒪᒋᔭᖃᕐᓂᕐᒥᑦ ᓇᓄᕐᒥᑦ ᑕᑯᓐᓂᕈᕕᑦ, ᖃᐅᔨᒋᐊᕐᕕᒋᓗᒍ ᓄᓇᒥᐅᑕᓕᕆᔨᓯ ᐅᕝᕙᓘᓐᓃᑦ ᐆᒪᔪᕐᓂᐊᖅᑎᒃᑯᓯ.
7. ᐅᔾᔨᖅᓱᑦᓯᐊᕆᑦ ᓱᕈᓯᓛᓪᓗ ᖃᐅᔨᓴᖅᔫᒥᖃᑦᑕᕐᓗᒋᑦ.
ᓇᓄᐃᑦ ᐃᖏᕐᕋᕕᐊᓪᓕᐊᕐᓂᖏᓐᓂᒃ ᐊᑐᓕᖅᑎᓪᓗᒋᑦ, ᐱᐅᓂᖅᐹᖑᔪᖅ ᓱᕈᓰᑦ ᖃᐅᔨᓴᖅᑕᐅᑎᓪᓗᒋᑦ ᐊᓃᕐᓂᖏᓐᓂ ᐊᒻᒪᓗ ᓱᕈᓰᑦ ᐱᓱᖃᑎᒋᓗᒋᑦ ᐊᖏᕐᕋᒥᑦ, ᐃᓕᓐᓂᐊᕐᕕᒻᒧᑦ, ᐊᒻᒪᓗ ᐊᓯᖏᓐᓄᑦ ᓄᓇᓕᐅᑉ ᐃᓗᐊᓂ.
8. ᕿᒫᑎᑦᓯᔪᖃᖅᑎᓪᓗᓂ ᐊᕝᕕᐊᖅᑕᐃᓕᒋᑦ.
ᖃᐅᔨᒪᓂᖃᑦᓯᐊᕈᕕᑦ ᐅᕝᕙᓘᓐᓃᑦ ᐱᖁᑎᖃᑦᓯᐊᕈᕕᑦ ᕿᒫᑎᑦᓯᓂᕐᒥᑦ ᓇᓄᕐᓂᒃ ᐅᐸᒍᑎᑦᑕᐅᓕᒋᑦ ᓇᓄᕐᒥᑦ. ᖁᙱᐊᖅᑏᑦ ᐃᓅᓯᖏᓐᓂ ᐅᓗᕆᐊᓇᖅᑐᒦᑎᑦᓯᓲᖑᒻᒪᑕ ᓇᓄᕐᒥᑦ ᐊᒻᒪᓗ ᕿᒫᑎᑦᓯᒐᓱᐊᖅᑎᓪᓗᒋᑦ. ᐃᓄᐃᑦ ᑕᕝᕙᓃᖃᑕᐅᓯᑳᓪᓚᑉᐸᑕ ᐱᔮᖅᑯᑕᐅᙱᑦᑐᒃᑯᑦ ᕿᒫᑎᑦᓯᒐᓱᐊᕐᓂᕐᒧᑦ ᐊᕝᕕᐊᓕᑐᐃᓐᓇᕆᐊᓖᑦ ᓇᓄᕐᓗ ᑐᖁᑕᐅᖔᑐᐃᓐᓇᕆᐊᖃᖅᑐᓂ.