ᐊᖓᔪᖅᑳᖃᕐᕕᖕᒥ ᐊᐅᓚᑦᑎᕕᒃ
ᐊᖓᔪᖅᑳᖃᕐᕕᖕᒥ ᐊᐅᓚᑦᑎᕕᒃ
ᐊᖓᔪᖅᑳᖃᕐᕕᖕᒥ ᐊᐅᓚᑦᑎᔨᖏᑦ ᐱᓕᕆᐊᖑᓲᖑᕗᖅ ᑐᑭᒧᐊᒃᑎᑦᑎᔨᒃᑯᓐᓄᑦ, ᐊᑐᐊᒐᓕᕆᔨᓄᑦ, ᐸᕐᓇᐃᔨᓄᓪᓗ ᒪᓕᒐᓕᐊᖑᔪᒪᔪᓂᒡᓗ ᐊᒻᒪ ᐊᐅᓚᑦᑎᕕᒃᑯᓐᓄᑦ, ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᖕᒧᑦ.
ᑐᑭᒧᐊᒃᑎᑦᑎᔨᒃᑯᑦ ᑲᒪᒋᔭᒃᓴᖃᖅᐳᑦ ᐊᑕᖏᖅᑕᐅᓪᓗᑎᒃ ᐊᐅᓚᑦᑎᔾᔪᑎᓂᒃ ᖃᓄᐃᓕᐅᕆᐊᖃᖅᑐᓂᒡᓗ
ᐊᕙᑎᓕᕆᔨᒃᑯᓐᓄᑦ ᒪᑯᓂᖓᓗ ᒥᓂᔅᑕᐅᑉ ᑐᒡᓕᐊᑕ ᐊᒻᒪ ᐃᑲᔪᖅᑎᖓᑕ ᐊᒡᓚᕝᕕᐊᓃᑦᑐᓂᒃ. ᑐᑭᒧᐊᒃᑎᑦᑎᔨᒃᑯᑦ ᓯᕗᓕᖅᑎᒋᔭᐅᕗᑦ ᐊᕙᑎᓕᕆᔨᒃᑯᓐᓄᑦ ᖃᐅᔨᒪᓇᓱᐊᖅᑎᐅᓪᓗᑎᒡᓗ ᐱᓕᕆᐊᒃᓴᓂᒃ ᐱᔨᑦᑎᕋᐅᑎᒃᓴᓂᒡᓗ ᐱᓕᕆᐊᖑᔪᓂᒃ ᐊᕙᑎᓕᕆᔨᒃᑯᓐᓄᑦ ᑐᕌᒐᖃᖅᖢᑎᒃ ᓯᕗᓪᓕᐅᑎᖁᔭᐅᔪᓂᒃ ᒐᕙᒪᒃᑯᓐᓄᑦ. ᑐᑭᒧᐊᒃᑎᑦᑎᔨᒃᑯᑦ ᑲᒪᒋᔭᒃᓴᖃᕆᓪᓗᑎᒃ ᓯᕗᓕᖅᑎᒋᔭᐅᓪᓗᑎᒃ ᐃᓚᓕᐅᔾᔭᐅᕙᒃᑐᓂᒃ ᐃᓄᐃᑦ ᐱᒻᒪᕆᐅᒋᔭᖏᓐᓂᒃ ᐱᓕᕆᕝᕕᓕᒫᑦ ᐱᓕᕆᔾᔪᓯᖏᓐᓂᒃ.
ᐊᑐᐊᒐᓕᕆᔨᑦ, ᐸᕐᓇᐃᔨᑦ ᐊᒻᒪ ᒪᓕᒐᓕᐊᖑᔪᒪᔪᓕᕆᔨᑦ ᑲᒪᒋᔭᒃᓴᖃᖅᖢᑎᒃ ᐃᓚᓕᐅᔾᔨᒋᐊᖃᖅᐸᒃᖢᑎᒃ ᐊᒻᒪ
ᐋᖅᑭᒃᓱᐃᔨᐅᓪᓗᑎᒃ ᐊᑐᐊᒐᕐᓂᒃ, ᒪᓕᒐᓕᐊᖑᔪᒪᔪᓂᒃ ᓴᖅᑭᑎᕆᕙᓪᓕᐊᓪᓗᑎᒃ, ᐊᒻᒪ ᐸᕐᓇᐅᑎᓂᒃ ᐊᐅᓚᔾᔪᓯᕐᓂᒃ ᐊᕙᑎᓕᕆᔨᒃᑯᓐᓄᑦ, ᐅᖃᐅᔾᔪᖅᓱᐃᕙᒃᖢᑎᒡᓗ ᐊᑐᐊᒐᑦ ᐊᒻᒪ ᖃᓄᐃᓕᐅᕈᑕᐅᔪᒪᔪᑦ ᖃᓄᐃᓕᐅᕆᐊᖃᕐᓂᖏᓐᓂᒃ ᑐᑭᒧᐊᒃᑎᑦᑎᔨᓄᑦ, ᐱᔭᕆᐊᖃᕌᖓᑕ. ᐊᕙᑎᓕᕆᔨᒃᑯᑦ ᐱᓕᕆᓲᖑᓪᓗᑎᒃ ᓇᓗᓇᐃᖅᓯᓇᓱᒃᖢᑎᒃ ᑐᓴᐅᒪᔪᓕᕆᔾᔪᑎᑦᑎᐊᕙᖕᓂᒃ ᐊᕙᑎᓕᕆᔨᒃᑯᓐᓂ, ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᓄᓇᕗᒻᒥᐅᓂᒃ, ᑲᓇᑕᒥᐅᓂᒃ ᐊᒻᒪ ᓄᓇᕐᔪᐊᕐᒥᐅᓂᒃ. ᐊᕙᑎᓕᕆᔨᒃᑯᑦ ᐱᕙᓪᓕᐊᑎᑦᑎᓲᖑᖕᒥᔪᑦ ᐊᕙᑎᓕᕆᓂᕐᒧᑦ ᐃᓕᓐᓂᐊᕈᑎᒃᓴᓂᒃ ᐊᐅᓚᑦᑎᔨᒋᔭᐅᕙᒃᖢᑎᒡᓗ ᑐᓴᖅᑕᐅᔭᕆᐊᓕᖕᓂᒃ ᐱᒋᐊᕈᑎᒃᓴᓂᒃ.
ᑮᓇᐅᔭᓕᕆᔨᒃᑯᑦ ᐊᑕᖐᓪᓗᑎᒃ ᐃᑲᔪᖅᓱᐃᕙᒃᖢᑎᒃ ᐊᕙᑎᓕᕆᔨᒃᑯᓐᓄᑦ ᓇᓗᓇᐃᖅᓯᕙᒃᖢᑎᒡᓗ ᐱᓕᕆᐊᖑᔪᓕᒫᑦ ᐱᔨᑦᑎᕋᐅᑎᓕᒫᓪᓗ ᐊᐅᓚᑕᐅᑦᑎᐊᕋᓗᐊᕐᒪᖔᑕ. ᓇᓗᓇᐃᖅᓯᕙᒃᑭᓪᓗᑎᒃ ᑮᓇᐅᔭᓕᕆᔾᔪᑏᑦ ᐊᒻᒪ ᐃᖅᑲᓇᐃᔭᖅᑐᓕᕆᔾᔪᑏᑦ ᐊᐅᓚᑦᑎᔾᔪᑎᑦ ᐊᕙᑎᓕᕆᔨᒃᑯᓐᓄᑦ ᐱᓕᕆᐊᖑᑦᑎᐊᕋᓗᐊᕐᒪᖔᑕ ᒪᓕᒃᑕᐅᓪᓗᑎᒃ ᐊᑐᐊᒐᑦ ᐊᒻᒪ ᒪᓕᒋᐊᓕᑦ ᐊᕙᑎᓕᕆᔨᒃᑯᓐᓄᑦ ᐊᒻᒪ ᓄᓇᕗᑦ ᒐᕙᒪᒃᑯᓐᓄᑦ.
ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᒃ ᐅᑯᓄᖓ ᐃᒪᓐᓈᖅᑐᖅᑕᐅᓪᓗᑎᒃ: ᐅᐸᒋᐊᖅᑕᕗᑦ − ᓄᓇᕗᑦ ᒐᕙᒪᖓᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᓄᖅᑑᕈᑎᑦ; ᐅᑭᐅᖅᑕᖅᑐᓕᒫᒥ ᓱᖏᐅᑎᕙᓪᓕᐊᓂᕐᒧᑦ ᖃᓄᖅᑑᕈᑎ; ᐊᒻᒪ ᓴᓗᒪᔪᒥᒃ ᐆᒻᒪᖅᑯᑎᓅᖓᔪᓄᑦ ᐱᓕᕆᐊᒃᓴᐅᔪᑦ ᐃᑯᒻᒪᑎᑦ − ᓄᓇᕗᑦ ᒐᕙᒪᒃᑯᑦ ᐆᒻᒪᖅᑯᑎᓕᕆᓂᕐᒧᑦ ᖃᓄᖅᑑᕈᑎ, ᓄᓇᕗᑦ ᐊᖏᕈᑎᒋᓯᒪᔭᖏᓐᓄᑦ ᐊᒃᑐᐊᓂᓕᖕᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓱᖏᐅᑎᕙᓪᓕᐊᓂᖅ ᐊᒻᒪ ᐊᒃᑐᐃᓗᐊᖅᑕᐃᓕᑎᑦᑎᓂᖅ. ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᒃ ᑭᒃᑯᑐᐃᓐᓇᓂᒃ ᐅᔾᔨᕈᓱᓕᖅᑎᑦᑎᖃᑦᑕᖅᐳᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᐊᒃᑐᐃᔪᓂᒃ ᐋᖅᑭᒃᓱᐃᕙᒃᖢᑎᒡᓗ ᓄᓇᕗᓕᒫᒥ ᐱᓕᕆᐊᖑᑎᑕᐅᔪᓂᒃ. ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᒃ ᐃᑲᔪᖅᑐᐃᕗᑦ ᑲᓇᑕᓕᒫᒥ ᓄᓇᕐᔪᐊᓕᒫᒥᓪᓗ ᐱᓕᕆᐊᖑᕙᓪᓕᐊᔪᒪᔪᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᐊᒻᒪ ᐅᔾᔨᕆᔭᐅᓕᖅᑎᑦᑎᒃᑲᓐᓂᖅᖢᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᐃᓚᓕᐅᔾᔭᐅᓂᖓᓂᒡᓗ ᐃᓱᒪᓕᐅᕈᑎᖏᓐᓂᒃ ᓄᓇᕗᒻᒥ.