ᐸᓴᒋᔭᐅᔪᖅᑕᓕᒃ ᓄᕙᔾᔪᐊᕐᓇᖅᑖᖅᓯᒪᔪᒥᒃ 19 ᓄᓇᕗᒻᒥ
ᐱᕙᓪᓕᐊᔪᑦ ᑐᓴᕋᑦᓴᑦ
ᐸᓴᒋᔭᐅᔪᖅᑕᓕᒃ ᓄᕙᔾᔪᐊᕐᓇᖅᑖᖅᓯᒪᔪᒥᒃ 19 ᓄᓇᕗᒻᒥ
ᐃᖃᓗᐃᑦ, ᓄᓇᕗᑦ (ᔪᓚᐃ 2, 2020) − ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᔪᖅᑳᖅ, ᓇᓗᓇᐃᖅᓯᓯᒪᔪᖅ ᐸᓴᒋᔭᐅᔪᒥᒃ ᓄᕙᔾᔪᐊᕐᓇᖅᑖᖅᓯᒪᔪᖃᕐᓂᖓᓂᒃ 19 ᓄᓘᔮᑦ ᐅᔭᕋᕐᓂᐊᕐᕕᖓᓂ, 176 ᑭᓛᒥᑕᐃᑦ ᓂᒋᐊᑕ ᐱᖓᓐᓇᖓᓂ ᒥᑦᑎᒪᑕᓕᐅᑉ.
“ᑖᓐᓇ ᐃᓄᑑᑎᑕᐅᔪᖅ ᖃᓂᒋᔭᖃᕋᓂ ᐃᖅᑲᓇᐃᔭᖃᑎᒥᓂᒃ ᖃᓄᐃᑦᑑᔮᕋᓂᓗ. ᑕᒪᓐᓇ ᓯᐊᕐᒪᖅᑕᐃᓕᑎᑕᐅᔪᖅ, ᓇᓗᓇᐃᕐᕕᒋᒍᒪᓪᓗᒋᓪᓗ ᓄᓇᕗᒻᒥᐅᑦ ᑖᓐᓇ ᓄᓇᕗᒻᒧᑦ ᑎᑭᕋᑖᓚᐅᕐᓂᖓᓂᒃ ᐃᖅᑲᓇᐃᔭᕆᐊᖅᑐᓂ, ᖃᓂᒋᔭᖃᓚᐅᙱᑦᑐᖅ ᓄᓘᔮᓂ ᐃᖅᑲᓇᐃᔭᖅᑎᓂᒃ ᐊᓯᖏᓐᓂᓪᓗ ᖃᓂᒋᔭᖏᓐᓃᑦᑐᓂ ᓄᓇᓕᓐᓂ,” ᐅᖃᖅᓯᒪᔪᖅ ᓘᑦᑖᖅ ᐸᑐᓴᓐ.
ᓄᓇᕗᒻᒥᐅᓂᒃ ᐃᖅᑲᓇᐃᔭᖅᑐᖃᓚᐅᙱᑦᑐᖅ ᓄᓘᔮᑦ ᐅᔭᕋᕐᓂᐊᕐᕕᖓᓂ ᒫᑦᓯᒥᓂᒃ. ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᖃᐅᔨᓴᖅᐸᓪᓕᐊᖏᓐᓇᕐᓂᐊᖅᑐᑦ ᑕᒪᑐᒥᖓ ᐊᑐᐃᓐᓇᐅᓪᓗᑎᓪᓗ ᐃᑲᔪᖅᓱᐃᒍᓐᓇᓂᕐᒧᑦ ᑲᒪᖃᑕᐅᒍᓐᓇᓂᕐᒧᓪᓗ ᑕᐃᒪᐃᒋᐊᖃᓕᑐᐊᕐᓂᕈᑎᒃ. Baffinland-ᑯᑦ ᐊᑐᓕᖅᑎᑦᓯᓯᒪᔪᑦ ᓄᕙᔾᔪᐊᕐᓇᖅ 19 ᒪᓕᑦᑕᐅᒋᐊᓕᓐᓂᒃ ᐱᒋᐊᖅᑎᑦᓯᓯᒪᓕᖅᑐᑎᓪᓗ ᑭᓇᒃᑯᓐᓂᒃ ᑲᑎᓯᓐᓂᕐᒪᖔᑦ ᖃᐅᔨᓴᕐᓂᕐᒥᒃ. ᖃᐅᔨᒪᔭᐅᔪᓕᒫᑦ ᑲᑎᔭᒥᓂᖏᑦ ᐊᓂᑦᑕᐃᓕᑎᑕᐅᓕᖅᑐᑦ ᐃᓄᑑᒋᐊᖃᖅᑎᑕᐅᓪᓗᑎᒃ. ᑖᓐᓇ ᐊᑕᐅᓯᑑᓂᖓᓄᑦ ᓄᕙᔾᔪᐊᕐᓇᖃᖅᓱᕆᔭᐅᔪᖅ, ᓄᓘᔮᓂ ᐅᔭᕋᕐᓂᐊᕐᕕᒃ ᒪᑐᐃᖓᐃᓐᓇᕐᓂᐊᖅᑐᖅ.
“ᓄᓇᕗᒻᒥᐅᑦ ᐃᓱᒫᓗᒋᐊᑐᙱᑦᑐᑦ ᓯᐊᕐᒪᒐᔭᕐᓂᖓᓂᒃ ᓄᕙᔾᔪᐊᕐᓇᖅ 19 ᑖᓐᓇ ᐱᔾᔪᑎᒋᓪᓗᒍ,” ᐅᖃᖅᓯᒪᔪᖅ ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᔪᐊᔾ Hᐃᒃᔅ. “ᐊᑕᖏᖅᑐᑎᒃ ᓯᕗᕐᖓᒍᑦ ᐅᔾᔨᖅᓱᕆᐊᖃᕈᑎᐅᔪᑦ ᐊᑐᖅᑕᐅᔪᑦ, ᐃᖅᑲᓇᐃᔭᖅᑏᓪᓗ ᐅᔭᕋᕐᓂᐊᕐᕕᒻᒥ ᑲᑎᑕᖃᓚᐅᙱᑦᑐᑦ ᓄᓇᓕᓐᓂᒥᐅᑕᕐᓂᒃ. ᑖᓐᓇ ᐸᓴᒋᔭᐅᔪᖅ ᕿᓚᒥᐅᔪᒃᑯᑦ ᖃᓄᐃᒍᓐᓃᖁᕙᕗᑦ. ᐃᖅᑲᐅᒪᓂᐊᖅᑯᓯ ᐊᑕᖏᖅᑐᑕ ᐃᑲᔪᕈᓐᓇᕋᑦᑕ ᓯᐊᕐᒪᓕᖁᓇᒍ ᓄᕙᔾᔪᐊᕐᓇᖅ 19, ᒫᓐᓇᓕ ᑕᒡᒐ ᐅᔾᔨᖅᓱᑦᓯᐊᕆᐊᒃᑲᓐᓂᕆᐊᖃᓕᖅᑯᒍᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᒋᐊᖃᖅᑎᑕᐅᔪᓂᒃ.”
ᒫᓐᓇᐅᔪᖅ ᖃᓄᐃᒍᑕᐅᔪᖅ ᐊᑦᑐᐃᓂᖃᔾᔮᙱᑦᑐᖅ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᒋᐊᖃᖅᑎᑕᐅᔪᓂᒃ, “ᓄᓇᕗᒻᒥ ᒪᑐᐃᖅᐸᓪᓕᐊᓂᕐᒧᑦ ᐅᕝᕙᓘᓐᓃᑦ ᐊᐅᓪᓚᖃᑎᒌᖃᑦᑕᕈᓐᓇᕐᓂᖏᓐᓂᒃ ᓄᓇᕗᒻᒥ ᓄᓇᑦᓯᐊᕐᒥᓗ.
ᑭᓇᑐᐃᓐᓇᖅ ᖃᓂᒋᔭᖃᖅᓯᒪᓱᕆᒍᓂ ᓄᕙᔾᔪᐊᕐᓇᖅᑐᓕᒻᒥᒃ ᐅᖄᓚᖁᔭᐅᔪᑦ ᓄᕙᔾᔪᐊᕐᓇᖅ ᐅᖓᓯᑦᑐᒥᒃ ᐊᑭᖃᙱᑦᑐᒧᑦ ᐅᖄᓚᕕᐅᒍᓐᓇᖅᑐᒧᑦ ᐅᕙᓂ 1-888-975-8601 ᐊᑯᓐᓂᖓᓂ 10 ᐅᓪᓛᓴᒃᑯᑦ ᐊᒻᒪᓗ 6
ᐅᓐᓄᓴᒃᑯᑦ, ᖃᐅᔨᒃᑲᐃᓗᑎᓪᓘᓐᓃᑦ ᓄᓇᖓᓐᓂ ᐋᓐᓂᐊᕐᕕᒻᒧᑦ ᒫᓐᓇᑦᓴᐅᑎᒋ, ᕿᓚᒥᐅᔪᒃᑯᓪᓗ ᐊᓂᑦᑕᐃᓕᓕᕐᓗᓂ ᐊᖏᕐᕋᒥᓂ ᐅᓪᓗᓂᒃ 14-ᓂᒃ. ᐅᐸᒍᑎᑦᑕᐃᓕᓗᓯ ᐋᓐᓂᐊᕐᕕᑦᓯᓐᓄᑦ.
ᖃᓄᐃᒍᑕᐅᒍᓐᓇᖅᑐᑦ ᓄᕙᔾᔪᐊᕐᓇᖅ 19-ᒧᑦ ᐆᑎᕐᓇᕐᓂᖅ, ᖁᐃᖅᓱᖃᑦᑕᕐᓂᖅ ᐅᕝᕙᓘᓐᓃᑦ ᐃᐱᓂᐊᖃᑦᑕᕐᓂᖅ. ᓴᐳᒻᒥᓯᒪᑦᓯᐊᕈᓐᓇᖅᑐᑦ ᓯᐊᕐᒪᒍᓐᓇᕐᓂᖓᓂᒃ ᐅᕝᕙᓘᓐᓃᑦ ᓄᕙᔾᔪᐊᕐᓇᖅᑖᕈᓐᓇᓂᕐᒧᑦ ᐃᓅᖃᑎᒌᑦ ᖃᓄᒌᓗᐊᑦᑕᐃᓕᖃᑦᑕᕐᓗᑎᒃ, ᐊᒡᒐᑎᑦ ᐅᐊᓴᐃᓐᓇᖃᑦᑕᕐᓗᒋᑦ 20 ᓴᑲᓐᓯᓂᒃ, ᖁᐃᖅᓱᖃᑦᑕᕐᓗᑎᑦ ᑕᒋᐅᖃᑦᑕᕐᓗᑎᓪᓗ ᐊᐃᓐᓄᑦ ᐊᖏᕐᕋᖅᓯᒪᖃᑦᑕᕐᓗᑎᓪᓗ ᑕᐃᒪᐃᒍᓐᓇᕐᓂᓕᒫᕐᓂ.
ᑐᓴᖅᑎᑦᓯᒋᐊᒃᑲᓐᓂᓚᖓᔪᑦ ᐱᕙᓪᓕᐊᔪᓕᕆᔨᓄᑦ ᑐᓴᖅᑎᑦᓯᒋᐊᓕᖅᑲᑕ 2-ᒥ ᐅᓐᓄᓴ ᐅᓪᓗᒥ.
###
ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:
ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎ
ᓴᕕᑲᑖᕐᒧᑦ
867-975-5059
@email
ᔅᑳᑦ ᕼᐃᑦᔨᑳᒃᒡ
ᑐᓴᕋᑦᓴᓕᕆᓂᕐᒧᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5712
@email