ᓄᕙᒡᔪᐊᕐᓇᖅ-19−ᒧᑦ ᓄᓇᕗᑦ ᒐᕙᒪᖓᑕ ᓄᑖᙳᕆᐊᖅᑎᑕᖏᑦ - ᐊᐃᕆᓕ 22, 2020

ᓯᕗᓕᖅᑎᒥᑦ ᑐᓴᒐᒃᓴᖅ:

ᓱᓕ ᓇᓗᓇᐃᖅᓯᒪᓪᓚᕆᒃᑐᓂᒃ ᑕᐃᒪᐃᓐᓇᓱᒋᔭᐅᔪᓂᒡᓘᓪᓃᑦ ᓄᕙᒡᔪᐊᕐᓇᖅ-19−ᖃᕐᓂᕐᒥᒃ ᐱᑕᖃᕐᓂᖓᓂᒃ ᓇᓗᓇᐃᓪᓚᕆᒃᓯᒪᔪᖃᙱᓚᖅ ᓄᓇᕗᒻᒥ.

ᐅᓪᓗᒥ, ᑲᑎᖦᖢᒋᑦ ᐃᓄᐃᑦ ᖃᐅᔨᓴᖅᑕᐅᔪᑦ 485-ᖑᓕᖅᑐᑦ. 235 ᒫᓐᓇ ᖃᐅᔨᓴᖅᑕᐅᔪᑦ, 250−ᓗ ᐃᓄᐃᑦ ᖃᐅᔨᓴᖅᑕᐅᔪᓐᓃᖅᖢᑎᒃ.

ᖁᕕᐊᓱᒃᐳᖓ ᓇᓗᓇᐃᖅᓯᔪᓐᓇᕋᒪ ᐅᑯᑎᒎᓇᖅ, ᓄᓇᕗᒻᒥ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᒃᑯᑎᒍᑦ, ᓄᓇᕗᑦ ᒐᕙᒪᖓ ᑮᓇᐅᔭᖃᖅᑎᑦᑎᕗᖅ ᒥᖅᓱᖅᑎᓂᒃ ᓴᓇᖁᓪᓗᒋᑦ 5,000−ᓂᒃ ᐃᓐᓇᕐᓄᑦ ᑮᓇᕐᒧᑦ ᒪᑐᐊᖅᓯᓯᒪᔾᔪᑎᒃᓴᖏᓐᓂᒃ, ᓄᓇᕗᒻᒥᐅᓄᑦ ᐋᓐᓂᐊᖃᖅᑐᓄᑦ ᐃᓗᐊᖅᓴᖅᑕᐅᔭᕆᐊᓕᖕᓂᒃ, ᑕᒪᒃᑯᐊᓗ ᐃᓗᐊᖅᓴᐃᓂᒃᑰᙱᑦᑐᖅ ᑭᐅᓯᖅᑳᓕᖅᐸᒃᑐᑦ, ᓲᕐᓗ ᖃᑦᑎᕆᔩᑦ. 500-ᐸᓗᖕᓂᒃ ᓴᓂᕐᕙᐃᓯᒪᔪᖃᐅᑎᒋᓯᒪᔪᖅ ᖃᖓᑕᓗᑎᒃ ᓇᒧᙵᐅᓂᐊᖅᑐᓄᑦ, ᑕᒪᓐᓇ ᑕᐃᒪᐃᓕᐅᕈᑎᒋᓪᓗᒍ ᒪᓕᒍᒪᓪᓗᑎᒃ ᑲᓇᑕᒥ ᐃᖏᕐᕋᔪᓕᕆᔨᒃᑯᑦ ᓄᑖᒥᒃ ᓄᒃᑕᖅᑐᓄᑦ ᐊᑐᕆᐅᖃᖅᑐᖁᑎᒋᓕᖅᑕᖓᓂᒃ.

ᑕᒪᒃᑯᐊ ᒪᑐᐊᖅᓯᓯᒪᔾᔪᑏᑦ ᓴᓇᓯᒪᓂᐊᖅᐳᑦ ᖃᓪᓗᓈᖅᑕᒥᒃ, ᐅᐊᓴᒐᒃᓴᐅᓪᓗᑎᒡᓗ, ᐊᑐᒃᑲᓐᓂᓕᒐᒃᓴᐅᓐᓗᑎᒡᓗ, ᓴᓇᔭᐅᓯᒪᓪᓗᑎᒡᓗ ᑲᓇᑕᒥᐅᓂ ᖃᓄᐃᓕᐅᖅᑕᐅᔭᕆᐊᓕᖕᓂᒡᓗ ᒪᓕᒃᖢᑎᒃ. ᑕᒪᒃᑯᐊ ᐃᓇᖏᖅᓯᔾᔪᑕᐅᓇᓱᙵᓚᑦ ᐊᓯᖏᓐᓂᒃ ᐊᑐᖅᑕᐅᔪᓂᒃ, ᓲᕐᓗ ᐃᓅᖃᑎᓂᒃ ᐅᖓᓯᒃᓴᕆᐊᖃᓂᕐᒥᒃ, ᐊᐅᓴᖅᐸᖕᓂᕐᒥᒡᓗ ᐊᒡᒐᓂᒃ, ᑭᓯᐊᓂᓕ ᖄᒃᑲᓐᓂᐊᒍᑦ ᓴᐳᒻᒥᔾᔪᑕᐅᒃᑲᓐᓂᖅᐳᑦ.

ᐊᔪᕐᓇᙱᑦᑐᑯᓗᖕᓂᒃ ᒪᓕᒃᑕᐅᕙᓪᓕᐊᔪᓐᓇᖅᑐᓂᒃ ᐋᖅᑭᒃᓱᐃᔪᖃᖅᐸᓪᓕᐊᕗᖅ ᑕᒪᒃᑯᐊ ᐃᓄᐃᑦ ᓇᖕᒥᓂᖅ ᑕᐃᒪᐃᑦᑐᒃᓴᒥᓂᒃ ᐊᖏᕐᕋᒥᓂ ᓴᓇᔪᓐᓇᕐᓂᐊᕐᒪᑕ.

ᑐᓵᖅᑲᐅᔪᒃᓴᐅᕗᑎᑦ ᐅᓪᓛᖅ ᑲᓇᑕᐅᑉ ᐊᖓᔪᖅᑳᕐᔪᐊᖓ ᐅᖃᐅᓯᖃᖅᑕᐅᖕᒪᑦ ᑮᓇᐅᔭᖁᑎᒋᔭᐅᓂᐊᖅᑐᓂᒃ ᐱᕕᒃᓴᓂᒡᓗ ᐃᓕᓐᓂᐊᖅᑎᓄᑦ, ᑕᐃᒪᐃᔾᔪᑎᖃᖅᖢᓂᓗ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ. ᓂᕆᐅᒋᔭᖃᖅᐳᒍᑦ ᐱᒃᑲᓐᓂᕐᓂᐊᕐᓂᕐᒥᒃ ᑐᓴᖅᑕᐅᔪᒃᓴᒃᑲᓐᓂᕐᓂᒃ ᑕᒪᒃᑯᓄᖓ ᐱᓕᕆᐊᒃᓴᓄᑦ, ᖃᓄᐃᕐᓗ ᑕᒪᒃᑯᐊ ᐃᔪᕐᓂᐊᕐᒪᖔᑕ ᓄᓇᕗᒻᒥᐅᑦ ᐃᓕᓐᓂᐊᖅᑎᖁᑎᖏᓐᓂᒃ ᐊᐅᔭᙳᖅᐸᓪᓕᐊᓂᐊᓕᕐᒥᑎᓪᓗᒍ.

ᐅᕙᑦᑎᓐᓂᓪᓕ, ᓄᓇᕗᒻᒥ ᐃᓕᓐᓂᐊᖅᑎᑦ ᑮᓇᐅᔭᖃᖅᑎᑕᐅᓂᖏᓐᓄᑦ ᐃᑲᔫᑎᓂᑦ ᐊᑭᓕᐅᑕᐅᔪᒃᓴᖅ ᐃᓱᓕᓐᓂᐊᖅᐳᖅ ᐊᐃᕆᓕ 30-ᐅᓕᖅᐸᑦ, ᑕᐃᒪᐃᓐᓇᔭᙱᖦᖢᓂ ᑭᓯᐊᓂ ᐱᓕᕆᐊᖑᔪᖅ ᑲᔪᓰᓐᓇᕐᓂᐊᖅᐸᑦ ᒪᐃᒧᑦ ᑎᑭᓪᓗᒍ. ᐱᓕᕆᐊᖃᒻᒪᕆᒍᔭᕗᒍᑦ ᐃᓕᓐᓂᐊᖅᑎᖁᑎᑦᑎᓐᓄᑦ ᐃᑲᔪᕈᒪᓪᓗᑎᒍᓪᓗ ᑲᔪᓯᓂᖃᑦᑎᐊᖁᓪᓗᒋᑦ ᐃᓕᓐᓂᐊᒃᑲᓐᓂᕐᓂᕐᒧᑦ ᐱᕕᒃᓴᕆᓂᐊᕐᒥᔭᒥᓂ. ᐃᓕᓐᓂᐊᖅᑏᑦ ᑎᓕᐅᖅᑕᐅᕗᑦ ᐋᖅᑭᒃᓱᐃᕙᒌᖁᔭᐅᓪᓗᑎᒃ ᖃᖓᑕᓂᕆᓇᔭᖅᑕᒥᓂᒃ ᐊᖏᕐᕋᒥᓄᑦ ᓄᓇᓕᖕᓄᑦ ᒪᐃ 1 ᑎᑭᓚᐅᙱᓐᓂᖓᓂ, ᖃᕆᑕᐅᔭᒃᑯᓪᓗ ᑎᑎᖅᑲᖅᑖᕆᕙᒃᑕᒥᓂᒃ ᖃᐅᔨᒋᐊᕐᓗᑎᒃ ᑐᓴᖅᑕᖃᒃᑲᓐᓂᕈᒪᒍᑎᒃ.

ᐅᓪᓗᒥ ᓄᓇᕐᔪᐊᑦ ᐅᓪᓗᕆᕙᐅᒃ, ᑕᒪᓐᓇᓗ ᑕᒪᑐᒪᓂ ᐊᕐᕌᒍᒥ ᐊᔾᔨᒋᖅᑰᔨᙱᑦᑎᐊᖅᖢᓂᐅᒃ ᐊᓯᖏᑎᑕ ᐊᑐᖅᑕᐅᒐᔪᒃᐸᑦᑐᑎᑐᑦ. ᒥᕐᙳᐃᖅᓯᕐᕕᑦᑎᓐᓄᙵᐅᔪᓐᓇᙱᓚᒍᑦᑲᑎᓪᓗᑕᓘᓐᓃᑦ ᐃᓄᖃᑎᒌᒡᓗᑕ ᓯᓚᒥ ᖁᕕᐊᓱᖃᑎᒌᖕᓂᐊᕐᓗᑕ ᐱᔪᓐᓇᙱᓚᒍᑦ.

ᐃᒪᐃᓕᐅᕈᓐᓇᖅᐳᒍᓪᓕ, ᑲᔪᓯᑎᑦᑏᓐᓇᕐᓗᑕ ᐱᒻᒪᕆᐊᓘᓂᖓᓂᒃ ᐅᕙᑦᑎᓐᓂᒃ ᐊᕙᑎᑦᑎᓐᓂᒡᓗ ᖃᓄᐃᙱᑦᑎᐊᖅᑎᑦᑎᓂᕐᒥᒃ. ᖃᓄᐃᙱᑦᑎᐊᖅᑐᑦ ᓄᓇᕗᒻᒥᐅᑦ, ᖃᓄᐃᙱᑦᑎᐊᖅᑐᑦ ᓄᓇᓖᑦ ᖃᓄᐃᙱᑦᑎᐊᖅᑐᕐᓗ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᖅ, ᑕᐃᒪᙵᓂᐅᓚᐅᒃᑲᓐᓂᕐᓗᓂᓗ.

ᑕᒪᑐᒪᓂ ᐊᕐᕌᒍᒥ, ᖁᕕᐊᓱᒍᑎᖃᓚᐅᖅᑕ ᓄᓇᕐᔪᐊᑉ ᐅᓪᓗᖓᓂᒃ ᐃᓅᖃᑎᒌᙱᓪᓗᑕ, ᑕᐃᒪᐃᒃᑯᑦᑕᓗ ᖃᐅᔨᒪᑦᑎᐊᕐᓂᐊᕋᑦᑕ ᖃᓄᐃᙱᑦᑎᐊᕐᑐᐃᓐᓇᐅᓂᑦᑎᓐᓂᒃ.

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᖕᓂᕆᔭᖓᓄᑦ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐊᖅᓵᕐᓇᖅᑐᒧᑦ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ

ᑮᓇᐃᑦ ᒪᑐᐊᖅᓯᒪᔭᕆᐊᖃᖅᑎᑕᐅᓕᖅᑐᑦ ᖃᖓᑕᓲᒃᑯᑦ ᐊᐅᓪᓚᖅᑐᓄᑦ

ᑲᓇᑕᐅᑉ ᒐᕙᒪᒃᑯᖏᑦ ᐱᖁᔨᒻᒪᑕ, ᑕᒪᕐᒥᑦᑎᐊᖅ ᖃᖓᑕᔪᑦ ᐱᓯᒪᓗᑎᒃ (ᐃᓚᖏᑦ ᓈᒻᒪᒋᔭᐅᔪᑦ ᖃᓄᐃᒋᔭᐅᙱᑦᑐᑦ) ᐲᖅᑕᐅᖃᑦᑕᕈᓐᓇᖅᑐᒥᒃ ᐃᓗᐊᖅᓴᐅᑎᓯᐅᑕᐅᙱᑦᑐᒥᒃ ᑮᓇᕐᒧ ᒪᑐᐊᖅᓯᓯᒪᔾᔪᑎᒥᒃ, ᑮᓇᕐᒧᓘᓐᓃᑦ ᐊᑐᖅᑕᐅᓂᐊᖅᑐᒥᒃ, ᖃᓂᐊᓂᒃ ᕿᖓᖓᓂᒡᓗ ᒪᑯᓯᓯᒪᔪᓐᓇᕐᓗᓂ, ᑲᓇᑕᒥᐅᓄᑦ ᒥᑦᑕᕐᕕᒋᔭᐅᔪᑎᒎᕐᓂᕐᒥᓂ, ᖃᖓᑕᓂᕐᒥᓂᓗ. ᑕᒪᓐᓇ ᑎᓕᓯᔾᔪᑕᐅᔪᖅ ᐊᑐᓕᕐᓂᐊᖅᐳᖅ ᓇᒡᒐᔾᔭ, ᐊᐃᕐᕆᓕ 20, 2020 12-ᒧᐊᖅᐸᑦ ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓ ᒪᓕᒡᓗᒍ.

ᐊᐅᓪᓚᕐᓂᐊᖅᑐᖅ ᑖᒃᑯᓂᖓ ᐊᑐᕆᐊᖃᖅᑎᑕᐅᓕᖅᑐᓂᑦ ᑮᓇᕐᒧᑦ ᒪᑐᐊᖅᓯᒪᔾᔪᑎᒥᑦ ᐊᐅᓪᓚᕈᓐᓇᖅᑎᑕᐅᖃᑦᑕᔾᔮᖏᑦᑐᑦ. ᖃᐅᔨᒪᒋᔅᓯ ᑕᒪᒃᑯᐊ ᑮᓇᕐᒧᑦ ᒪᑐᐊᖅᓯᒪᔾᔪᑎᒋᔪᓐᓇᖅᑕᓯ ᐃᓗᐊᖅᓴᐃᔨᔅᓯᐅᑕᙱᒃᑲᓗᐊᖅᐸᑕ ᖃᓄᐃᙱᑦᑐᖅ. ᑮᓇᕐᒧᑦ ᒪᑐᐊᖅᓯᒪᔾᔪᑎᔅᓴᐅᔪᓐᓇᖅᑐᖅ ᖁᖓᓯᕈᐃᑦ ᐅᕙᓗ ᐊᓯᖏᑦ ᐊᔾᔨᒐᓚᖏᓐᓂᑦ ᖃᓄᐃᒋᔭᐅᙱᑦᑐᖅ.

ᐅᐸᒃᑕᐅᑦᑕᐃᓕᒪᓂᕐᒧᑦ ᐃᓃᑦ

ᑕᐃᒃᑯᐊ ᐅᐸᒃᑕᐅᑦᑎᐃᓕᒪᔪᑦ ᐊᑐᕈᓐᓇᖅᐳᑦ, ᑕᓚᕖᓴᒃᑯᑦ ᕿᔾᔭᓪᓗᒐᕐᓂᒃ, ᐃᑭᐊᖅᑭᕕᖕᒥᒃ, ᐱᖓᓱᐃᖅᓱᕐᓗᑎᒃ ᐅᓪᓗᒥ ᓂᕆᑎᑕᐅᕙᒡᓗᑎᒃ, ᓴᓗᒪᔪᓂᒃ ᐊᓪᓕᓂᖅᑖᖅᑎᑕᐅᕙᒡᓗᑎᒃ ᓴᓗᒪᖅᓴᐅᑎᑖᖅᑎᑕᐅᕙᒡᓗᑎᒡᓗ. ᐊᒃᑕᑯᖏᑦ ᖃᐅᑕᒫᑦ ᐱᔭᐅᕙᒃᐳᑦ. ᑕᒪᒃᑯᐊ ᐊᑭᓕᕆᐊᓖᑦ ᑲᒪᒋᔭᐅᕗᑦ ᓄᓇᕗᑦ ᒐᕙᒪᒃᑯᖏᓐᓂᑦ. ᓄᓇᕗᑦ ᒐᕙᒪᒃᑯᖏᑦ ᐊᑭᓖᓂᐊᖅᐳᑦ ᖁᐃᖏᓕᓴᕐᓄᑦ, ᓄᑕᕋᓛᑦ ᐃᒻᒧᖏᓐᓄᑦ ᐊᕐᓇᖅᓯᐅᑎᓄᓪᓗ. ᑕᐃᑲᓃᑎᑕᐅᔪᑦ ᑎᑭᓴᐃᔭᕆᐊᖃᖃᑦᑕᖅᐳᑦ ᑕᒪᒃᑯᓂᖓ ᐱᖁᑎᓂᒃ ᐱᕝᕕᐅᔪᓐᓇᖅᑐᓂᑦ ᑐᓂᓯᔭᖅᑐᖃᑦᑕᕈᓐᓇᕐᓗᑎᒃ, ᑭᓯᐊᓂ ᑖᒃᑯᓄᖓ ᐱᖁᑎᓄᑦ ᐊᑭᓕᒐᒃᓴᖅᑖᖅᑎᑕᐅᔾᔮᙱᑦᑐᑦ.

ᓇᓗᓇᐃᔭᖅᓯᒪᔪᑦ ᑲᑎᖅᓱᖅᑕᐅᓯᒪᔪᖅ ᐊᓯᔾᔨᕆᐊᖅᑕᐅᓯᒪᓕᖅᐳᖅ ᐃᓚᖃᖅᑎᑕᐅᓂᐊᓕᖅᖢᓂ ᑐᓴᖅᑕᐅᔪᒃᓴᓂᒃ ᓂᕆᔭᒃᓴᓂᒃ ᑎᑭᓴᐃᕙᒃᑐᓄᑦ ᐊᐃᒃᖠᕈᓐᓇᖅᐸᒃᑐᓄᓪᓗ. ᑕᒪᕐᒥᒃ ᑖᒃᑯᐊᒃ ᑐᔪᕐᒥᕕᖕᒧᙵᐅᔭᐅᖃᑦᑕᕈᓐᓇᖅᐳᑦ. ᑕᒪᒃᑯᐊ ᐊᒡᔭᖅᓯᕕᐅᔪᑦ ᐊᒃᑐᐊᓂᓖᓪᓗ ᐊᑭᖏᑦ ᐊᑭᓕᖅᑕᐅᖃᑦᑕᔾᔮᙱᓚᑦ ᓄᓇᕗᑦ ᒐᕙᒪᑯᖏᓐᓂᑦ.

ᐅᓄᕐᓂᖏᑦ

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓂᖏᓐᓄᑦ ᖃᓄᐃᓕᖓᓂᖏᑦ:

ᐱᕕᒡᔪᐊᓂᒃ ᐃᖅᑲᓇᐃᔭᖅᑎᓂᒃ ᐱᔪᒪᔾᔪᑕᐅᔪᑦ

ᐱᒋᐊᕐᖢᓂ ᐊᐃᐳᕈ 21−ᒥ, 653−ᓂᒃ ᑐᒃᓯᕋᖅᓯᒪᔪᖃᖅᐳᖅ, 498−ᖑᓂᖏᑦ ᐱᔭᕆᐊᖃᒻᒪᕆᒃᑐᓂᒃ ᐃᖅᑲᓇᐃᔭᖅᑎᒃ ᑐᒃᓯᕋᕈᑕᐅᓪᓗᑎᒃ.

ᐃᓄᓕᕆᔨᒃᑯᑦ

ᓄᓇᕗᒻᒥ ᐃᓕᓐᓂᐊᖅᑎᑦ ᑮᓇᐅᔭᖃᖅᑎᑕᐅᓂᖏᓐᓄᑦ ᐃᑲᔫᑎᑕᖅᐸᒃᑐᓄᑦ ᐃᓕᓐᓂᐊᖅᑎᓄᑦ:

ᐱᓕᕆᐊᕆᔭᐃᑦ ᐊᔪᕈᓐᓃᖅᓴᕐᓂᕐᒧᑦ ᑭᓯᐊᓂ ᑲᔪᓰᓐᓇᖅᐸᑦ ᒪᐃᒧᑦ ᑎᑭᓪᓗᒍ, ᑕᒪᓐᓇ ᓄᓇᕗᒻᒥ ᐃᓕᓐᓂᐊᖅᑎᑦ ᑮᓇᐅᔭᖃᖅᑎᑕᐅᓂᖏᓐᓄᑦ ᐃᑲᔫᑎ ᑮᓇᐅᔭᖃᖅᑎᑕᐅᓂᖅ ᐃᓱᓕᓛᖅᑐᖅ ᐊᐃᕆᓕ 30, 2020−ᒥ. ᑭᖑᓪᓕᖅᐹᖅ ᐃᓕᖕᓄᑦ ᐊᑭᓕᐅᑕᐅᔪᖅ ᑮᓇᐅᔭᒃᑯᕕᖕᓄᐊᖅᑕᐅᑲᐅᑎᒋᓚᐅᖅᐳᖅᐊᐃᕆᓕ 15, 2020−ᒥ.

ᑕᐃᒪᐃᓐᓂᖓᓄᓪᓗ, ᓄᓇᕗᒻᒥ ᐃᓕᓐᓂᐊᖅᑎᑦ ᑮᓇᐅᔭᖃᖅᑎᑕᐅᓂᖏᓐᓄᑦ ᐃᑲᔫᑎᒃᑯᑦ ᑎᑎᕋᕐᕕᖓᑦ ᐃᓕᖕᓂᒃ ᐊᖏᕐᕋᕐᓄ ᐅᑎᖁᔨᓇᔭᖅᐳᑦ.

ᒪᐃ 1, 2020−ᖑᕋᓱᖕᓂᖓᓂ ᐱᕕᒃᓴᖃᖅᐳᑎᑦ ᖃᖓᑦᑕᐅᑎᒋᓂᐊᖅᑕᐃᑦ ᐋᖅᑭᒃᓱᐃᓂᐊᕐᓗᒍ. ᑖᓐᓇ ᐅᓪᓗ ᐊᓂᒍᖅᐸᑦ, ᐅᖃᕈᓐᓇᙱᑉᐳᒍᑦ ᑖᒃᑯᐊ ᓄᓇᕗᒻᒥ ᐃᓕᓐᓂᐊᖅᑎᑦ ᑮᓇᐅᔭᖃᖅᑎᑕᐅᓂᖏᓐᓄᑦ ᐃᑲᔫᑎᓕᕆᔨᒃᑯᑦ ᐊᑭᓖᔪᓐᓇᓛᕐᓂᖏᓐᓂᒃ ᐊᖏᕐᕋᐅᔾᔪᑎᒋᓂᐊᖅᑕᕐᓂᒃ.

ᐊᖏᕐᕋᕐᓄᑦ ᖃᖓᑕᐅᑎᒋᓂᐊᖅᑕᐃᑦ ᐋᖅᑭᒃᓱᕈᓐᓇᖅᐸᐃᑦ ᐅᑯᑎᒎᓇᖅ, Top of the World Travel ᖃᕆᑕᐅᔭᒃᑯᑦ ᐅᕗᖓ ᑎᑎᕋᕐᓗᑎᑦ, @email

ᐃᒪᓐᓇ ᐅᔾᔨᕆᔭᖃᑦᑎᐊᕐᓂᐊᖅᐳᑎᑦ, ᓄᓇᕗᒻᒥ ᐃᓕᓐᓂᐊᖅᑎᑦ ᑮᓇᐅᔭᖃᖅᑎᑕᐅᓂᖏᓐᓄᑦ ᐃᑲᔫᑎ ᐊᑐᐊᒐᖓ ᒪᓕᒃᖢᖑ, ᖃᖓᑕᓂᕆᓂᐊᖅᑕᐃᑦ ᐊᑐᙱᒃᑯᕕᐅᒃ, ᓇᖕᒥᓂᖅ ᐊᑭᓖᔭᕆᐊᖃᕐᓂᐊᖅᑐᑎᑦ ᐃᓕᖕᓂᒃ ᖃᖓᑕᓂᕆᓂᐊᖅᑕᕐᓂᒃ. ᑕᐃᒪᐃᓐᓂᖓᓄᓪᓗ, ᖃᐃᔨᒪᑦᑎᐊᕐᓂᐊᖅᐳᑎᒃ ᑐᑭᓯᐅᒪᑦᑎᐊᕐᓂᕐᓂᒃ ᖃᖓᑕᓂᐊᕐᓂᕐᒧᑦ ᐊᑐᕆᐊᖃᕐᓂᐊᖅᑕᕐᓂᑦ ᓇᒧᙵᐅᕙᓪᓕᐊᓂᕐᓂ.

ᓄᓇᕗᒻᒥ ᐃᓕᓐᓂᐊᖅᑎᑦ ᑮᓇᐅᔭᖃᖅᑎᑕᐅᓂᖏᓐᓄᑦ ᐃᑲᔫᑎᓕᕆᔨᒃᑯᑦ ᓇᒃᓯᐅᔾᔨᓂᐊᕐᒥᔪᑦ ᑐᓴᖅᑕᐅᔪᒃᓴᒃᑲᓐᓂᕐᓂᒃ ᐱᓇᓱᐊᕈᓯᐅᓂᐊᖅᑐᒥ, ᓇᑭᑦ ᑮᓇᐅᔭᖃᖅᑎᑕᐅᔪᖃᕈᓐᓇᕐᒪᖔᑦ ᓂᕆᖃᑦᑕᕆᐊᖃᕐᓂᕐᒧᑦ ᐊᑭᓕᖅᓱᕆᐊᖃᖅᐸᒃᑐᓄᑦ, ᐊᐃᕆᓕ 30, 2020 ᐊᓂᒍᐊᓪᓚᓚᐅᖅᑎᓪᓗᒍ.

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐱᓕᕆᕝᕕᖓᑕ ᐱᔨᑦᑎᕈᑎᖏᑦ

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐱᓕᕆᖃᑎᖃᖅᐳᑦ ᓄᓇᕗᒻᒥ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᒃᑯᓐᓂᒃ ᓴᓇᑎᑦᑎᓂᐊᖅᖢᑎᒃ ᐃᓗᐊᖅᓴᐃᔨᓯᐅᑕᐅᙱᑦᑐᓂᒃ ᒪᑐᐊᖅᓯᓯᒪᔾᔪᑎᓂᒃ ᑭᒃᑯᑐᐃᓐᓇᓄᑦ ᐊᑐᖅᑕᐅᖃᑦᑕᕈᓐᓇᕐᓂᐊᖅᑐᓂᒃ.ᑕᒪᓐᓇ ᓯᕗᓪᓕᖅᐹᖅᓯᐅᑎᒥᒃ $35,000.−ᓂᑦ ᐊᑐᖅᐳᖅ.

ᑐᕌᕆᔭᐅᔪᖅ ᑕᒪᑐᒧᖓ ᐱᓕᕆᐊᖑᔪᒧᑦ ᐱᑎᑦᑎᔪᒪᓂᐅᕗᖅ ᓈᒻᒪᒃᑐᓂᒃ ᐊᑐᖅᑕᐅᖃᑦᑕᕈᓐᓇᖅᑐᓂᒃ ᒪᑐᐊᖅᓯᓯᒪᔾᔪᑎᓂᒃ, ᐱᕕᒃᓴᖃᖅᑎᑦᑎᓗᑎᒃ ᓄᓇᕗᒻᒥᒃ ᒪᓕᒍᓐᓇᕐᓗᓂ ᓄᑖᖑᓛᓂᒃ ᓄᒃᑕᕐᓂᕐᒧᑦ ᑲᓇᑕᒥ ᐃᖏᕐᕋᔪᓕᕆᔨᒃᑯᑦ ᐊᑐᖅᑕᐅᔭᕆᐊᖃᖅᑐᖁᑎᖏᓐᓂᒃ ᓄᒃᑕᖅᑎᓄᑦ, ᐊᒻᒪᓗᑦᑕᐅᖅ ᓇᓗᙱᑦᑎᐊᖅᑎᑦᑎᓗᓂ ᐱᑐᐃᓐᓇᐅᙱᑦᑐᑦ ᐱᓕᕆᖃᑎᒡᒋᑦ, ᓲᕐᓗ ᐃᓗᐊᖅᓴᐃᔨᐅᙱᑦᑐᑦ ᐃᖅᑲᓇᐃᔭᖅᑏᑦ, ᐃᓐᓇᐃᑦ, ᓄᓇᕗᒻᒥᐅᓪᓗ ᐋᓐᓂᐊᖃᖅᐸᒌᖅᑐᑦ ᐊᑐᕈᓐᓇᑯᓪᓗᒋᑦ ᖄᒃᑲᓐᓂᐊᒍᑦ ᓴᐳᒻᒥᔾᔪᑎᒃᓴᒥᒃ.

ᑕᒪᒃᑯᐊ ᒪᑐᐊᖅᓯᓯᒪᔾᔪᑏᑦ ᓴᓇᓯᒪᓂᐊᖅᐳᑦ ᖃᓪᓗᓈᖅᑕᒥᒃ, ᐅᐊᓴᒐᒃᓴᐅᓪᓗᑎᒡᓗ, ᐊᑐᒃᑲᓐᓂᓕᒐᒃᓴᐅᓐᓗᑎᒡᓗ, ᓴᓇᔭᐅᓯᒪᓪᓗᑎᒡᓗ ᑲᓇᑕᒥᐅᓂ ᖃᓄᐃᓕᐅᖅᑕᐅᔭᕆᐊᓕᖕᓂᒡᓗ ᒪᓕᒃᖢᑎᒃ. ᒥᖅᓱᒐᒃᓴᐃᑦ ᓇᒃᓯᐅᔾᔭᐅᓂᐊᖅᐳᑦ ᒥᖅᓱᖅᑎᓄᑦ ᓴᓇᓂᐊᕐᓂᕐᒧᑦ ᒪᓕᒋᐊᖃᖅᑐᖁᑎᖃᕐᓗᑎᒃ, ᖃᓄᐃᓕᐅᕆᐊᖃᕐᓂᕐᒧᓪᓗ ᓴᓇᓕᕈᑎᒃ.

ᐊᔪᕐᓇᙱᑦᑐᑯᓗᖕᓂᒃ ᒪᓕᒃᑕᐅᕙᓪᓕᐊᔪᓐᓇᖅᑐᓂᒃ ᐋᖅᑭᒃᓱᐃᔪᖃᖅᐸᓪᓕᐊᕗᖅ ᑕᒪᒃᑯᐊ ᐃᓄᐃᑦ ᓇᖕᒥᓂᖅ ᒪᑐᐊᒃᓴᒥᓂᒃ ᐊᖏᕐᕋᒥᓂ ᓴᓇᔪᓐᓇᕐᓂᐊᕐᒪᑕ.

ᐃᓗᐊᖅᓴᐃᔨᓯᐅᑕᐅᙱᑦᑐᑦ ᒪᑐᐊᖅᓯᓯᒪᔾᔪᑎᑦ ᐱᑎᑦᑎᕙᒃᐳᑦ ᖄᒃᑲᓐᓂᐊᒍᑦ ᓴᐳᔾᔭᐅᓯᒪᓂᕐᒥᒃ. ᑕᒪᒃᑯᐊ ᐃᓇᒌᔾᔮᙱᑦᑐᑦ ᐃᓅᖃᑎᒥᒃ ᐅᖓᓯᒃᓴᕆᐊᖃᕐᓂᕐᒥᒃ ᐊᓯᖏᓐᓂᒡᓗ ᓴᐳᔾᔨᓯᒪᔪᒪᓂᕐᒧᑦ ᐊᑐᖅᑕᐅᔪᓂᒃ.

ᑭᓲᕙ ᓈᒻᒪᒐᔭᖅᑐᖅ ᐃᓗᐊᖅᓴᐃᔨᓯᐅᑕᐅᙱᓪᓗᓂ ᒪᑐᐊᖅᓯᓯᒪᔾᔪᑎ ᑮᓇᕐᒧᓪᓘᓐᓃᑦ ᒪᑐᓯᓯᒪᔾᔪᑎ?

ᐃᓗᐊᖅᓴᐃᔨᓯᐅᑕᐅᙱᑦᑐᑦ ᒪᑐᐊᑦ  ᑮᓇᕐᒧᓪᓘᓐᓃᑦ ᒪᑐᓯᓯᒪᔾᔪᑏᑦ ᐃᒪᕐᓇᐅᓪᓗᐊᖅᐳᑦ:

• ᓴᓇᓯᒪᓗᑎᒃ ᒪᕐᕈᓪᓗᐊᑖᖕᓂᒃ ᖃᓕᕇᖕᓂᒃ  ᓱᑲᑎᖅᓯᒪᑦᑎᐊᖅᑐᒥᒃ ᓄᕕᖅᓴᖅᓯᒪᓂᓕᖕᒥᒃ ᖃᓪᓗᓈᖅᑕᒥᒃ, (ᓲᕐᓗ ᖃᓪᓗᓈᖅᑕᖅ ᕿᐱᑉᓴᔭᒡᓘᓐᓃᑦ)
• ᐊᖏᓂᖃᕐᓗᑎᒃ ᐊᑕᖏᑦᑎᐊᕐᓗᒋᒃ ᐃᓗᐊᕐᓗᓂᓗ ᒪᑐᓯᓯᒪᔪᓐᓇᕐᓗᓂ ᕿᖓᕐᒥᒃ ᖃᓂᕐᒥᒡᓗ ᐊᖕᒪᓂᖃᖅᑐᖃᐅᙱᑦᑎᐊᕐᓗᓂ.
• ᓂᐊᖁᒧᑦ ᐊᑕᔪᓐᓇᑦᑎᐊᕐᓗᓂ ᕿᓚᒍᓐᓇᕐᓗᓂ ᓯᐅᑏᖕᓄᓪᓘᓐᓃᑦ ᓇᒃᑎᑦᑐᓐᓇᕐᓗᓂ
• ᐊᓂᖅᓵᖅᑐᒡᒐᙱᑎᑦᑎᑦᑎᐊᕐᓗᓂ
• ᐃᓗᐊᕐᓗᓂ ᐋᖅᑭᒋᐊᕆᐊᖃᒃᑲᓐᓂᕋᔪᙱᓪᓗᓂᓗ
• ᐊᓯᔾᔨᖅᑕᐅᕙᒡᓗᓂ ᐊᔪᕐᓇᕈᓐᓃᑐᐊᕌᖓᑦ ᖃᐅᓯᓕᖅᐸᑦ ᐃᑉᐸᓕᖅᐸᓪᓘᓃᑦ
• ᐃᓕᖅᑯᓯᑐᖃᕐᒥᓃᖏᓐᓇᖅᐸᒡᓗᓂ ᐅᐊᓴᖅᑕᐅᕌᓂᒃᑳᖓᒥ ᐸᓂᖅᓯᖅᑕᐅᕌᓂᒃᑳᖓᒥᓗ

ᐃᓚᖏᑦ ᒪᑐᐊᖅᓯᓯᒪᔾᔪᑏᑦ ᐃᓚᖃᖅᐸᒃᑭᕗᑦ ᐃᒃᐱᐊᕐᕗᖕᒥᒃ ᐊᓪᓚᕈᑎᖃᕐᕕᐅᓂᐊᖅᑐᒥᒃ ᐃᒋᑕᒃᓴᐅᔪᒥᒡᓘᓐᓃᑦ ᑳᐱᒧᑦ ᐳᑐᓛᒥᒃ, ᐱᐅᓂᖅᓴᒥᒃ ᐊᑐᖅᑐᖃᕈᒪᒃᐸᑦ. ᐊᔪᕐᓇᙱᑐᐊᖅᐸᑦ, ᐊᑐᖅᑐᖃᕐᓗᓂ ᐊᔾᔨᒌᙱᑦᑑᖕᓂᒃ ᖃᓪᓗᓈᖅᑖᖕᓂᒃ ᑕᒪᐃᓐᓄᑦ ᓵᖏᖕᓄᑦ ᒪᑐᐊᖅᓯᓯᒪᔾᔪᑎᐅᑉ, ᑕᐃᒪᐃᑉᐸᑦ ᖃᐅᔨᒪᓂᐊᕋᕕᐅᒃ ᓯᓚᓪᓕᐅᖕᒪᖔᑦ ᐃᓗᓪᓕᐅᖕᒪᖔᓪᓘᓐᓃᑦ.

ᐃᓗᐊᖅᓴᐃᔨᓯᐅᑕᐅᙱᑦᑐᑦ ᑮᓇᕐᒧ ᒪᑐᐊᑦ ᑮᓇᕐᒧᓪᓘᓐᓃᑦ ᒪᑐᓯᓯᒪᔫᑏᑦ ᐃᒪᐃᑦᑑᓪᓗᐊᖅᐳᑦ:

• ᐃᓕᔭᐅᓪᓗᐊᙱᓚᑦ ᓄᑕᖅᑲᓄᑦ ᐊᕐᕌᒍᓕᖕᓄᑦ 2 ᑐᖔᓂ
• ᐃᓕᔭᐅᓪᓗᐊᙱᓚᑦ ᑭᓇᑐᐃᓐᓇᕐᒧᑦ ᓇᖕᒥᓂᖅ ᑕᐃᒪᐃᑦᑐᓂᒃ ᐲᖅᓯᔪᓐᓇᕋᔭᙱᑦᑐᒧᑦ ᐃᑲᔪᖅᑕᐅᙱᓪᓗᓂ, ᑭᓇᑐᐃᓐᓇᕐᒧᓪᓘᓐᓃᑦ ᐊᓂᖅᓵᖅᑐᒡᒐᕐᓂᖃᖅᐸᒃᑐᒧᑦ
• ᓴᓇᓯᒪᓪᓗᐊᙱᓚᑦ ᐊᐅᒃᑕᔫᒥᒃ ᐊᓯᐊᓂᒡᓘᓐᓃᑦ ᐊᓂᖅᓵᕐᑐᕐᕕᐅᔪᓐᓇᙱᑦᑐᓄᑦ ᐱᖁᑎᓄᑦ
• ᓴᓇᓯᒪᓪᓗᐊᑕᕐᓗᓂ ᐊᐅᒃᑕᔫᒥᑦ ᓵᑦᑐᒥᑦ ᐱᖁᑎᓂᒡᓘᓐᓃᑦ ᓱᕋᒃᓴᕋᐃᑦᑐᓂᑦ, ᓲᕐᓗ, ᑲᒃᑭᐃᑎᒃᓴᓂᑦ
• ᐊᑕᓕᖅᑎᑕᐅᓪᓗᐊᙱᓚᑦ ᓂᐱᐅᑎᒧᑦ ᐊᓯᐊᓄᓪᓘᓐᓃᑦ ᓈᒻᒪᙱᑦᑐᓄᑦ ᐊᑕᓕᕈᑕᐅᔪᓐᓇᖅᑐᓄᑦ
• ᐊᒥᖅᑳᕈᑕᐅᑦᑕᐃᓕᓕᑦ ᐊᓯᓄᑦ
• ᑕᐅᑐᑦᑎᐊᙱᓕᕈᑕᐅᑦᑕᐃᓕᓕ, ᐱᓕᕆᐊᒃᓴᓄᓪᓘᓃᑦ ᐊᒡᕕᐊᑲᑕᓕᖅᑕᐃᓕᓕᑦ

ᖃᓄᖅ ᐃᓗᐊᖅᓴᐃᔨᓯᐅᑕᐅᙱᑦᑐᒥᒃ ᒪᑐᐊᖅᓯᓯᒪᔾᔪᑎᒥᒃ ᑮᓇᕐᒧᓪᓘᓐᓃᑦ ᒪᑐᓯᓯᒪᔾᔪᑎᒥᒃ ᐊᑎᓯᔪᖃᕈᓐᓇᖅᐸ

1. ᖃᐅᔨᒪᑦᑎᐊᕐᓗᑎᑦ ᑖᓐᓇ ᒪᑐᐊᖅᓯᓯᒪᔾᔪᑎ ᓴᓗᒪᓂᖓᓂᒃ ᐸᓂᕐᓂᖓᓂᒡᓗ.
2. ᐊᒡᒐᑎᑦ ᐅᐊᓴᕐᓗᒋᑦ ᐆᓇᔪᒃᑐᒧᑦ ᐃᒪᕐᓄᑦ ᐅᐊᓴᐅᑎᒧᓪᓗ 20−ᐸᓗᖕᓄᑦ ᑎᑦᑕᑯᓗᖕᓄᑦ ᑖᓐᓇ ᒪᑐᐊᖅᓯᓯᒪᓪᔪᑎ ᐊᒃᑐᓚᐅᙱᓐᓂᕐᓂ. ᐱᑕᖃᙱᑉᐸᑦ, ᐊᑐᕐᓗᑎᑦ ᖁᐱᕐᕈᓂᒃ ᐊᒡᖓᒐᓃᑦᑐᓂᒃ ᑐᖁᕋᐃᔾᔪᑎᒥᒃ, ᒥᑭᓛᖃᕐᓗᒍ 60%−ᒥᒃ ᐋᓪᑲᕼᐋᓪ−ᓕᖅᓯᒪᔪᒥᒃ.
3. ᖃᐅᔨᒪᑦᑎᐊᖅᐸᒡᓗᑎᑦ ᓄᔭᑎᑦ ᑮᓇᖕᓃᙱᒃᑲᓗᐊᕐᒪᖔᑕ.
4. ᐊᑎᓗᒍ ᑮᓇᖕᓄᑦ ᒪᑐᓯᓯᒪᔾᔪᑏᑦ ᕿᖓᖅᐱᑦ ᖁᓛᒍᑦ ᖃᓂᖅᐱᓪᓗ ᐊᑦᑐᙱᕐᓗᒍᓗ ᓂᐊᖁᕐᓄᑦ ᓯᐅᑎᖕᓄᓪᓘᓐᓃᑦ ᕿᓚᒍᑎᒋᓐᓄᑦ ᑕᓯᔭᖅᑐᖏᓐᓄᓪᓘᓐᓃᑦ.
5. ᐋᖅᑭᒋᐊᒃᑲᓐᓂᕐᓗᒍ ᐋᖅᑭᒋᐊᕆᐊᖃᒃᑲᓐᓂᖅᐸᑦ ᖃᐅᔨᒪᑦᑎᐊᕈᒪᒧᑦ ᕿᖓᐃᑦ ᖃᓃᓪᓗ ᐊᑕᖏᑦᑎᐊᖅᖢᑎᒃ ᒪᑐᓯᒪᒐᓗᐊᕐᒪᖔᑎᒃ.
6. ᑖᓐᓇ ᓇᓛᒋᔭᐅᑦᑎᐊᓪᓗᐊᖅᐳᖅ ᐊᖏᓂᖓ ᐅᓗᐊᖕᓄᑦ, ᐊᖕᒪᓂᖃᐅᙱᑦᑎᐊᕐᓗᓂᓗ.
7. ᐊᑐᒃᑲᓐᓂᕐᓗᒍ ᐊᑐᖅᑕᐅᕙᒃᑐᖅ 2.

ᐊᑐᕐᓂᕐᓂ ᐃᓗᐊᖅᓴᐃᔨᓯᐅᑕᐅᙱᑦᑐᒥᒃ ᒪᑐᐊᖅᓯᓯᒪᔾᔪᑎᒥᒃ ᑮᓇᕐᓄᓪᓘᓐᓃᑦ ᒪᑐᒥᒃ, ᐱᒻᒪᕆᐊᓗᕗᖅ ᑮᓇᐃᑦ ᐊᒃᑐᖅᑕᐃᓕᒪᖃᑦᑕᕈᕕᐅᒃ. ᐊᒃᑐᕐᓂᕈᕕᐅᒃ ᒪᑐᐊᖅᓯᓯᒪᔾᔪᑏᑦ ᑮᓇᐃᓪᓘᓐᓃᑦ, ᐊᒡᒐᑎᑦ ᐅᐊᓴᓯᑲᐅᑎᒋᓪᓗᐊᖅᐸᑎᑦ ᐆᓇᔪᒃᑐᒧᑦ ᐃᒪᕐᒧᑦ ᐊᐅᓴᐅᑎᖃᕐᓗᑎᑦ, ᐅᐊᓴᐃᓗᑎᓪᓗ 20−ᐸᓗᖕᓄᑦ ᑎᑦᑕᑯᓗᖕᓄᑦ. ᐊᑐᕈᓐᓇᕆᕗᑎᑦ ᖁᐱᕐᕈᓂᒃ ᑐᖁᕋᐃᔾᔪᑎᒥᒃ, ᒥᑭᓛᖃᕐᓗᒍ 60%−ᒥᒃ ᐋᓪᑲᕼᐋᓪ−ᓕᖅᓯᒪᔪᒥᒃ.

ᖃᓄᖅ ᐃᓗᐊᖅᓴᐃᔨᓯᐅᑕᐅᙱᑦᑐᒥᒃ ᒪᑐᐊᖅᓯᓯᒪᔾᔪᑎᒥᒃ ᑮᓇᕐᒧᓪᓘᓐᓃᑦ ᒪᑐᓯᓯᒪᔾᔪᑎᒥᒃ ᐊᑐᕈᓐᓃᖅᑐᖃᕈᓐᓇᖅᐸ

1. ᐊᒡᒐᑎᑦ ᐅᐊᓴᕐᓗᒋᑦ ᐆᓇᔪᒃᑐᒧᑦ ᐃᒪᕐᓄᑦ ᐅᐊᓴᐅᑎᒧᓪᓗ 20−ᐸᓗᖕᓄᑦ ᑎᑦᑕᑯᓗᖕᓄᑦ ᑖᓐᓇ ᒪᑐᐊᖅᓯᓯᒪᓪᔪᑎ ᐊᒃᑐᓚᐅᙱᓐᓂᕐᓂ.
   • ᐱᑕᖃᙱᑉᐸᑦ, ᐊᑐᕐᓗᑎᑦ ᖁᐱᕐᕈᓂᒃ ᐊᒡᖓᒐᓃᑦᑐᓂᒃ ᑐᖁᕋᐃᔾᔪᑎᒥᒃ, ᒥᑭᓛᖃᕐᓗᒍ 60%−ᒥᒃ ᐋᓪᑲᕼᐋᓪ−ᓕᖅᓯᒪᔪᒥᒃ.
2. ᐲᕐᓗᒍ ᑮᓇᕐᓄᑦ ᒪᑐᐊᖅᓯᓯᒪᔾᔪᑎ ᕿᓚᒃᓯᒪᔪᓐᓃᖅᑎᓪᓗᒍ ᓯᐅᑎᖕᓃᑦᑐᒡᓘᓐᓃᑦ ᓇᒃᑎᖏᕐᓗᒋᒃ.
   • ᐊᒃᑐᖅᑕᐅᓕᓗᒍ ᒪᑐᐊᖅᓯᓯᒪᔾᔪᑎᐅᑉ ᓵᖓ ᐲᓕᕈᕕᐅᒃ.
   • ᑖᓐᓇ ᐃᓕᔭᐅᓯᒪᓚᐅᑲᒍᓐᓇᖅᐳᖅ ᕿᓪᓚᔪᑭᐊᒧᑦ ᐴᕐᒧᑦ ᐊᖏᕐᕋᖅᓯᒪᙱᒃᑯᕕᑦ.
     • ᖃᐅᔨᒪᑦᑎᐊᕐᓂᐊᖅᐳᑎᑦ ᒪᑐᑦᑎᐊᕐᓂᕐᓂᒃ, ᒥᖅᓱᖅᑕᖅᑐᕐᓂᕐᓂᒡᓘᓐᓃᑦ ᐳᖓ ᑐᖅᑯᓕᕈᕕᐅᒃ.
3. ᐊᑐᒃᑲᓐᓂᕈᒪᓂᐊᕈᕕᐅᒃ ᑖᓐᓇ ᒪᑐᐊᖅᓯᓯᒪᔾᔪᑎ, ᐅᐊᓴᕐᓗᒍ ᐊᑐᒃᑲᓐᓂᓚᐅᙱᓐᓂᕐᓂ.
   • ᐅᐊᓴᖅᑕᐅᔪᓐᓴᖅᑐᖅ ᐆᓇᖅᑐᒧᑦ, ᐅᐊᓴᐅᑎᖃᑦᑎᐊᖅᑐᒧᑦ ᐃᒪᕐᒧᑦ, ᐅᐊᓴᖅᑕᐅᔪᓐᓇᕆᓪᓗᓂᓘᓐᓃᑦ ᐊᓯᖏᓐᓂ ᐅᐊᓴᒐᒃᓴᓂ.
   • ᐃᒋᓐᓂᐊᕈᕕᐅᒃ, ᐊᒃᑕᑰᕝᕕᖕᒧᐊᕐᓗᒍ, ᕿᓪᓚᔪᑭᐊᒧᓪᓘᓐᓃᑦ ᐴᕐᒧᑦ.
4. ᐲᕌᓪᓚᓚᐅᕐᓗᒍ ᑮᓇᕐᓄᑦ ᒪᑐᓯᒪᔾᔪᑏᑦ, ᐊᑐᒃᑲᓐᓂᕐᓗᒍ ᐊᑐᕆᐊᓕᒃ 1.

ᓄᓇᕗᒻᒥᐅᑦ ᖃᓄᐃᙱᑦᑎᐊᕈᓐᓇᕐᓂᖏᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐅᐊᓴᖅᐸᒡᓗᒋᑦ ᖄᕆᔭᐅᔪᓪᓗ, ᐊᑐᖅᐸᒡᓗᑎᒃ ᑭᒃᑯᑐᐃᓐᓇᓂᒃ ᖃᓂᒃᓴᓗᐊᖅᑕᐃᓕᒪᓂᕐᒥᒃ, ᓈᓚᒃᐸᒡᓗᑎᓪᓗ ᐅᖃᐅᔾᔪᐃᔾᔪᑕᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓂᑦ, ᐊᖏᕐᕋᖅᓯᒪᕙᒡᓗᑎᒡᓗ ᖃᓂᒪᔭᕌᖓᕕᑦ.