ᒪᑐᐊᖅᓯᒪᔭᕆᐊᖃᓪᓚᕆᒃᑐᑦ ᓄᓇᕗᒻᒥ ᐋᓐᓂᐊᕕᓕᒫᓂᒃ
ᑭᖑᓪᓕᖅᐹᒥᒃ ᓄᑖᙳᕆᐊᖅᑎᑕᐅᓚᐅᖅᑐᖅ ᕿᑎᖅᑰᑦ, ᓄᕕᐱᕆ 9, 2023
ᒫᓐᓇᑲᐅᑎᒋ ᐱᒋᐊᕐᓗᓂ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᐅᔾᔨᕗᑦ ᓄᓇᕗᒻᒥᐅᓂᒃ ᑕᒪᒃᑯᐊ ᒪᑐᐊᑦ ᐊᑐᖅᑕᐅᔭᕆᐊᖃᓪᓚᕆᓕᕐᓂᖏᓐᓂᒃ ᑕᒪᐃᓐᓂ ᓄᓇᕗᒻᒥ ᐋᓐᓂᐊᕕᓕᐊᕐᕕᒋᔭᐅᔪᓂ, ᐃᓚᒋᔭᐅᓪᓗᑎᒃ ᐃᓐᓇᒃᑯᕖᑦ ᐊᒻᒪᓗ ᐊᑲᐅᓯᓴᕐᕕᒃ ᐃᖃᓗᖕᓂ.
ᐅᓄᖅᓯᕙᓪᓕᐊᔪᑦ ᓄᕙᒡᔪᐊᕐᓇᖅ-19 ᐊᓯᖏᓪᓗ ᐳᕙᒃᑯᑦ ᐋᓐᓂᐊᑦ ᖃᐅᔨᔭᐅᓯᒪᓕᖅᑐᑦ ᓄᓇᕗᒻᒥ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕙᓪᓕᐊᕗᑦ ᒥᒃᖠᒋᐊᖅᑎᓐᓇᓱᒃᖢᒋᑦ ᐊᑦᑕᕐᓇᕐᓂᖓ ᐊᐃᑦᑐᕐᓗᐃᑐᐃᓐᓇᕆᐊᖃᕐᓂᖅ ᐳᕙᒃᑯᑦ ᐋᓐᓂᐊᖅᑐᓂᒃ ᐱᓕᕆᕝᕕᑦᑎᓐᓂ ᓴᐳᑎᓗᒋᓪᓗ ᐊᑦᑕᕐᓇᖅᑐᒦᓐᓂᖅᓴᑦ ᐃᓄᐃᑦ.
ᒪᑐᐊᑦ ᐊᑐᖅᑕᐅᓪᓚᕆᒃᐸᒃᐳᑦ ᐃᑲᔪᕈᑕᐅᓪᓗᑎᒃ ᓯᐊᒻᒪᒃᑎᕆᑦᑕᐃᓕᒪᓂᕐᒥᒃ ᓄᕙᒡᔪᐊᕐᓇᖅ-19−ᒥᒃ ᐊᓯᖏᓐᓂᒡᓗ ᐊᓂᖅᓵᖅᑐᕐᓂᒃᑯᑦ ᖃᓂᒪᓐᓇᓂᒃ. ᐊᒻᒪᓗᑦᑕᐅᖅ ᖄᒃᑲᓐᓂᐊᒍᓪᓗ ᓴᐳᔾᔨᓯᒪᔾᔪᑕᐅᒃᑲᓐᓂᖅᐳᑦ ᑕᒪᒃᑯᓄᖓ ᖁᐊᖅᓵᕐᓇᖅᑐᒦᓐᓂᖅᓴᓄᑦ ᐋᓐᓂᐊᕐᔪᐊᓕᖅᐸᒃᑐᓄᑦ ᖃᓄᐃᓕᖓᓕᖅᑎᑕᐅᔪᓄᓪᓘᓐᓃᑦ ᓄᕙᒡᔪᐊᕐᓇᖅ-19−ᒧᑦ ᐊᐃᑦᑐᕐᓗᒃᑕᐅᓯᒪᓂᕐᒧᑦ.
ᑲᒪᒋᔭᐅᔪᑦ, ᐳᓛᖅᑎᑦ, ᐊᒻᒪ ᐃᖅᑲᓇᐃᔭᖅᑎᑦ ᐋᓐᓂᐊᕕᖕᒧᐊᖅᑐᑦ ᖃᐅᔨᓴᖅᑕᐅᖃᑦᑕᕐᓂᐊᖅᐳᑦ ᓄᕙᒡᔪᐊᕐᓇᖅ-19−ᒧᑦ ᖃᓂᒪᑲᑕᖕᒪᖔᑕ ᑎᑭᑉᐸᑕ. ᑭᒃᑯᓕᒫᑦ ᑎᓕᐅᖅᐸᕗᑦ ᐱᓕᕆᖁᓪᓗᒋᑦ ᐃᑲᔪᖁᓪᓗᒋᑦ ᐃᒡᓗᖁᑎᕗᑦ ᐊᑦᑕᕐᓇᙱᑦᑐᒦᖁᓪᓗᒋᑦ ᐊᐱᖅᑯᑎᓂᒃ ᑭᐅᖃᑦᑕᕐᓗᑎᒃ ᓱᓕᑦᑎᐊᕐᓗᑎᒃ ᐊᒻᒪ ᐃᒃᐱᒍᓱᑦᑎᐊᕐᓗᑎᒃ.