ᐅᖃᓚᐅᑎᓯᐅᑏᑦ

You are here

ᓄᓇᕗᒻᒥ ᓂᐱᕗᑦ

ᔫᓂ 02, 2017

ᒪᓕᒐᓕᐅᖅᑎ ᐹᓪ ᖁᐊᓴ
ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓄᑦ

ᓄᓇᕗᒻᒥ ᓂᐱᕗᑦ

ᐅᖃᖅᑎᑦᑎᔨ, ᓇᖏᖅᓯᕝᕕᒋᕙᒋᑦ ᒪᓕᒐᓕᐅᖅᑎᐅᖃᑎᒃᑲᓗ ᐅᓪᓗᒥ ᑐᓴᖅᑎᑦᑐᒪᓪᓗᓯ ᓄᓇᕗᒻᒥ ᓂᐱᑦᑎᓐᓂᒃ: ᑲᓇᑕᒥ 150−ᖓᓂ ᐊᑎᓕᐅᕐᕕᐅᓪᓗᓂ ᐱᓕᕆᐊᒥᒃ.

ᐅᖃᖅᑎᑦᑎᔨ, ᐅᐱᒍᓱᒃᐳᖓ ᐅᖃᕈᓐᓇᕋᒪ ᒪᒃᑯᒃᑐᖁᑎᕗᑦ ᑕᑯᒃᓴᐅᑎᑦᑏᓐᓇᕐᒪᑕ ᐅᐱᒍᓱᖕᓂᖏᓐᓂᒃ ᐃᓕᖅᑯᓯᕆᔭᑦᑎᓐᓄᑦ ᐊᒻᒪ ᐱᐅᓯᕆᔭᑦᑎᓐᓄᑦ. ᐊᖅᑯᑎᒋᓪᓗᒋᑦ ᓄᓇᕗᒻᒥ ᓂᐱᕗᑦ ᐱᓕᕆᐊᖅ, ᒪᒃᑯᒃᑐᑦ ᓄᓇᓕᖕᓂ ᓇᑭᙶᕈᓘᔭᖅᑐᑦ ᑐᓴᖅᑎᑦᑎᓚᐅᕐᒪᑕ ᐊᓯᖏᓐᓂᒃ ᓄᓇᕗᒻᒥ ᓄᓇᓕᖕᓂ ᓄᓇᕘᓕᒪᒥᓪᓗ ᓄᓇᕗᑦ ᖃᓄᐃᑦᑑᖕᒪᖔᑦ ᐊᒻᒪ ᖃᓄᖅ ᑕᐅᑦᑐᖃᕐᒪᖔᑦ 2017−ᒥ.

ᓄᓇᓕᖕᓂ ᐊᒃᓱᕉᑕᐅᓪᓗᑎᒃ, ᐃᓕᓐᓂᐊᖅᑎᓂᒃ, ᐊᒻᒪ ᐃᓕᓴᐃᔨᓂᒃ, 27−ᓂᒃ ᑕᕐᕆᔮᒃᓴᓕᐅᖅᑐᖃᓚᐅᖅᐳᖅ ᑕᕐᕆᔭᐅᓯᐅᖅᓯᒪᓪᓗᑎᒃ ᓄᓇᐅᑉ ᑲᔾᔮᕐᓇᕐᓂᖓᓂᒃ ᐊᒻᒪ ᐃᓕᖅᑯᓯᑦᑎᓐᓂ. ᑖᒃᑯᐊ ᑕᕐᕆᔮᒃᓴᑦ ᓇᓗᓇᐃᖅᓯᔾᔪᑕᐅᕗᑦ ᖁᕕᐊᓲᑎᖃᕈᑕᐅᓪᓗᑎᒡᓗ ᐃᓄᐃᑦ ᐃᓕᖅᑯᓯᖏᓐᓂᒃ, ᓲᕐᓗ ᓇᑦᑎᕋᓱᒃᑐᑦ, ᑲᑕᒡᔭᖅᑐᑦ, ᐊᒻᒪ ᓄᓇᓕᖕᓂ ᐱᓕᕆᐊᑦ. ᐊᔾᔨᓕᐅᖅᓯᒪᑐᐃᓐᓇᖅᑐᓪᓗ ᐃᓐᓇᐃᑦ.

ᐅᖃᖅᑎᑦᑎᔨ, ᐅᐱᒋᔪᒪᑦᑎᐊᖅᐸᒃᑲ ᐃᓕᓴᐃᔨᑦ ᐊᒻᒪ ᐃᓕᓐᓂᐊᖅᑎᑦᑎᔨᑦ ᐱᓕᕆᕐᔪᐊᖅᓯᒪᓂᖏᓐᓄᑦ ᑕᒪᐃᓐᓂᒃ 25−ᓂᒃ ᓄᓇᕗᒻᒥ ᓄᓇᓕᖕᓂ ᐃᑲᔪᖅᓱᐃᑦᑎᐊᖃᑦᑕᕐᒪᑕ ᐃᓕᓐᓂᐊᖅᑎᒥᓂᒃ ᑕᕐᕆᔭᐅᓯᐅᖅᑎᓪᓗᒋᑦ ᑐᑭᓯᓇᖅᓯᑎᑦᑎᓇᓱᒃᖢᑎᒃ ᑭᓱᑦ ᐱᒻᒪᕆᐅᖕᒪᖔᑕ ᓄᓇᓕᖏᓐᓂᒃ.  ᖁᔭᓕᔪᒪᑦᑎᐊᕐᒥᔭᒃᑲ ᓄᓇᑦᑕ ᓱᓇᒃᑯᑖᖏᑦ ᑕᑯᔭᒐᖃᕐᕕᒃ ᐱᒋᐊᖅᑎᑦᑎᓚᐅᕐᓂᖏᓐᓄᑦ ᑖᔅᓱᒥᖓ ᐱᓕᕆᐊᒥᒃ ᐱᓕᕆᐊᖑᓕᖅᑎᖦᖢᒍ. ᖁᕕᐊᓲᑎᖃᕐᓂᑦᑎᓐᓂ ᑲᓇᑕᒥ 150-ᓂᒃ ᐅᑭᐅᖃᓕᖅᑎᓪᓗᒍ ᑕᑯᒃᓴᐅᑎᑦᑎᑦᑎᐊᖃᑕᐅᖕᒪᑦ. 

ᐅᖃᖅᑎᑦᑎᔨ, ᓄᓇᕗᒻᒥ ᓂᐱᕗᑦ ᑕᑯᒃᓴᐅᑎᑕᐅᔪᖅ ᓄᓇᑦᑕ ᓱᓇᒃᑯᑖᖏᑦ ᑕᑯᔭᒐᖃᕐᕕᖕᒥ. ᑐᙵᓱᒃᑎᑦᑐᒪᔭᐃᓐᓇᕆᕙᔅᓯ ᑕᑯᒋᐊᖁᓪᓗᓯ ᑖᒃᑯᓂᖓ ᓴᖅᑭᑕᐅᑦᑎᐊᖅᓯᒪᔪᒻᒪᕆᐊᓗᖕᓂᒃ ᔫᓂᓕᒫᒥ ᓴᖅᑭᔭᖅᑎᑕᐅᓂᐊᖅᑐᓂᒃ. 

ᖁᔭᓐᓇᒦᒃ, ᐅᖃᖅᑎᑦᑎᔨ.