ᑎᒍᐊᕐᓂᖅ

ᑎᒍᐊᖃᑦᑕᕐᓂᖅ ᓄᓇᕗᒻᒥ

ᑎᒍᐊᖃᑦᑕᕐᓂᖅ ᐱᕕᖃᕈᑕᐅᕗᖅ ᓄᑕᖅᑲᑦ ᐃᓅᓯᓕᒫᒥᓂᒃ ᐃᓚᖃᕈᓐᓇᖅᓯᓗᑎᒃ, ᐃᓕᖅᑯᓯᕐᒥᓄᑦ ᐊᒃᑐᐊᖃᑕᐅᖏᓐᓇᓕᕐᓗᑎᒃ ᓄᓇᖅᑲᑎᒥᓄᓪᓗ ᑐᙵᕕᖃᖅᑎᑦᑎᐊᕐᓗᒋᑦ ᓄᑕᕋᓕᒫᑦᑎᐊᑦ.

ᓄᓇᕗᒻᒥ ᑎᒍᐊᕈᓐᓇᖅᓯᓲᖑᔪᑦ ᐊᖅᑯᑎᒋᓪᓗᒍ ᑎᒍᐊᖃᑦᑕᕐᓂᕐᒧᑦ ᐱᖁᔭᖅ ᓄᓇᕗᒻᒥ, ᐊᒻᒪᓗ ᓄᓇᖃᖅᑳᖅᓯᒪᔪᑦ ᑎᒍᐊᕈᓯᖏᓐᓄᑦ ᐱᖁᔭᖅ.

ᓄᓇᕗᒻᒥ ᑎᒍᐊᖃᑦᑕᕐᓂᕐᒧᑦ ᐱᖁᔭᖅ ᐊᑐᐊᒐᐅᕙᒃᑐᖅ ᓄᓇᕗᒻᒥᐅᑦ ᓄᑕᖅᑲᖁᑎᖏᑦ ᑎᒍᐊᖑᓕᒑᑎᓪᓗᒋᑦ. ᐱᓕᕆᐊᖃᓲᖑᖕᒥᔪᑦᑕᐅᖅ ᑭᒡᓕᖃᖃᑎᒌᙱᑦᑐᓂ ᑎᒍᐊᕋᓱᒃᑐᓂ. ᓄᓇᕗᒻᒥ ᑎᒍᐊᖃᑦᑕᕐᓂᕐᒧᑦ ᐱᖁᔭᖅ ᑎᑎᕋᖅᓯᒪᓂᕆᔭᖓᒍᑦ ᐱᓇᓱᐊᖅᑑᒐᓗᐊᖅ ᓄᑕᖅᑲᐃᑦ ᑎᒍᐊᖑᔭᕆᐊᓖᑦ ᐊᖏᕐᕋᖅᑖᕋᔭᕐᓂᖏᓐᓂᒃ ᓇᒡᓕᖕᓂᖃᖅᑐᓄᑦ. ᑐᕌᒐᕆᔭᖓᑦᑕᐅᖅ ᖁᕝᕙᖅᓴᐃᓇᓱᐊᕐᒥᖕᒪᑦ ᐃᓕᖅᑯᓯᑦᑎᐊᕙᐅᓛᖑᔪᑦ ᐊᑐᖅᑕᐅᒐᓗᐊᕐᒪᖔᑕ ᑎᒍᐊᖅᐸᓪᓕᐊᓂᕐᒧᑦ ᓄᑕᕋᕐᒥᒃ ᐊᒻᒪᓗ ᑖᓐᓇ ᓄᑕᕋᖅ ᐃᓕᓴᕆᔭᐅᔾᔪᑎᓕᒫᖏᑦ ᒪᓕᒐᑎᒍᑦ ᓴᖅᑭᑦᑐᐃᓐᓇᐅᔪᓐᓇᖁᓪᓗᒋᑦ ᓄᑕᕋᐅᑉ ᐱᓯᒪᔭᕆᐊᖃᖅᑕᓕᒫᖏᑦ ᑖᒃᑯᓇᓂ ᖃᑕᙳᑎᑖᖅᓯᒪᓕᖅᑎᓪᓗᒍ.

ᓄᓇᕗᒻᒥ ᑎᒍᐊᖃᑦᑕᕐᓂᕐᒧᑦ ᐱᖁᔭᖅ ᐋᖅᑭᒃᓯᒪᓂᕆᔭᖓᒍᑦ ᓴᐳᔾᔨᓯᒪᓇᓱᐊᖅᑐᖅ ᑕᒪᐃᓐᓂᓕᒫᖅ ᑎᒍᐊᕐᓂᕐᒥᒃ ᐃᓚᐅᖃᑕᐅᔪᓂᒃ: ᓄᑕᕋᖅ, ᓄᑕᕋᐅᑉ ᐊᖓᔪᖅᑳᖏᑦ ᐊᐅᖕᒥᒍᑦ ᐊᒻᒪᓗ ᑎᒍᐊᖅᓯᖅᑖᖏᑦ ᓄᑕᕋᐅᑉ.

ᐃᓄᓕᕆᔨᒃᑯᑦ ᖁᕝᕙᖅᓴᐃᕙᒃᐳᑦ ᑎᒍᐊᕐᓂᕐᒥᒃ ᐊᖏᖃᑎᒌᑐᐃᓐᓇᕐᓂᒃᑯᑦ ᓲᕐᓗ ᐊᒃᑐᐊᖃᑎᒌᒍᓐᓇᕐᓗᑎᒃ ᐃᓅᕝᕕᐅᔪᑦ ᐊᖓᔪᖅᑳᑦ ᐊᒻᒪᓗ ᐊᖓᔪᖅᑳᖑᓵᖅᑐᑦ ᑎᒍᐊᕐᓂᕐᒥᓄᑦ. ᐊᖏᖃᑎᒌᑐᐃᓐᓇᕐᓂᒃᑯᑦ ᑎᒍᐊᖃᑦᑕᕐᓂᖅ ᐊᑯᓂᐊᓘᔪᒧᑦ ᐊᖏᕈᑕᐅᕙᖕᒪᑕ ᐃᕐᓂᔪᓂᒃ ᐊᒻᒪ ᑎᒍᐊᖅᓯᙳᖅᑐᓂᒃ ᓲᕐᓗ ᓄᑕᕋᑯᓗᒃ ᐊᑲᐅᔪᒃᑯᑦ ᐃᓅᖃᑎᖃᕈᓐᓇᓛᕐᒪᑦ ᐊᖓᔪᖅᑳᓪᓚᕆᖕᒥᓂᒃ ᐊᒻᒪᓗ ᑭᓇᐅᓂᕐᒥᓂᒃ ᖃᐅᔨᒪᓗᓂ, ᓇᑭᙶᕐᓂᕐᒥᓂᒃ ᐊᒻᒪᓗ ᐊᒃᑐᐊᓂᖃᕐᓗᓂ ᐃᓕᖅᑯᓯᑐᖃᕐᒥᓄᑦ. ᑎᒍᐊᕐᓂᖅ ᑕᐃᔭᐅᒑᖓᑦ ᐱᔾᔪᑎᖃᖅᑐᐃᓪᓕ ᑎᒍᐊᖅᓯᙳᖅᑐᓂᒃ ᐊᒻᒪ ᐃᕐᓂᓚᐅᖅᑐᓂᒃ ᑖᒃᑯᐊ ᐊᖓᔪᖅᑳᖑᔪᐃᑦ ᐊᖏᖃᑎᒌᒃᖢᑎᒃ ᐃᓅᓯᓕᒫᖓᓄᑦ ᐱᕚᓪᓕᖅᑎᓐᓇᓱᐊᕐᓂᐊᖅᖢᒍ ᑖᓐᓇ ᓄᑕᕋᐅᔪᖅ.

ᑭᒃᑯᓕᒫᑦᑎᐊᑦ ᐱᕚᓪᓕᕈᑎᖃᕈᓐᓇᖅᑐᑦ ᐊᖏᖃᑎᒌᖕᓂᒃᑯᑦ ᑎᒍᐊᕐᓂᕐᒥᒃ. ᓄᑕᕋᑯᓗᒃ ᖃᐅᔨᒪᓲᖑᔪᖅ ᑭᒃᑯᓐᓂ ᐃᕐᓂᐊᖑᓚᐅᕐᒪᖔᕐᒥᓂ, ᐃᓕᖅᑯᓯᕐᒥᓂᒃ, ᐅᖃᐅᓯᕐᒥᓂᒃ ᐊᒻᒪ ᐱᖅᑯᓯᕆᔭᐅᔪᓂᒃ. ᐱᒻᒪᕆᐊᓘᔪᐃᑦ ᓲᕐᓗ ᐃᖢᐊᖅᓴᖅᑕᐅᓂᒃᑯᑦ ᐅᓂᒃᑳᖑᔪᑦ ᖃᐅᔨᒪᑎᑕᐅᓲᖑᓪᓗᑎᒃ ᐊᖓᔪᖅᑳᖑᔪᑦ ᐊᑯᓐᓂᐊᓂ ᐊᒻᒪᓗ ᐊᓯᖏᓐᓂᒃ ᑐᓴᐅᒪᖃᑦᑕᐅᑎᔪᓐᓇᖅᐸᒃᑭᓪᓗᑎᒃ ᓄᑕᕋᖅ ᐱᕈᖅᐸᓪᓕᐊᑎᓪᓗᒍ.

ᑭᓇ ᑎᒍᐊᕈᓐᓇᕐᒪᑦ?

ᐅᑯᐊ ᑕᕝᕙ ᑎᒍᐊᕈᓐᓇᖅᑐᑦ ᓄᑕᕋᕐᒥᒃ ᓄᓇᕗᑦ ᐱᙳᖅᑎᑕᐅᓂᖓᑕ ᐱᖁᔭᖓᑎᒍᑦ;

• ᐃᓄᑑᔪᖅ ᓲᕐᓗ ᐊᐃᑉᐸᖃᙱᑦᑐᖅ ᑎᒍᐊᕈᓐᓇᖅᑐᖅ ᐅᑭᐅᖏᑦ ᓈᒻᒪᑐᐊᖅᐸᑕ.
• ᓄᓕᐊᕇᖑᔫᒃ ᑎᒍᐊᕈᓐᓇᖅᑑᒃ ᓇᓕᐊᒃ ᐅᑭᐅᑭᓗᐊᙱᑐᐊᖅᐸᑦ.
• ᐊᐃᑉᐸᕆᔭᐅᔪᖅ, ᓄᑕᕋᕆᔭᐅᒍᓂ ᓄᓕᐊᕇᖕᓄᑦ ᐊᐃᑉᐸᕇᖑᔪᓄᑦ ᐊᒻᒪᓗ ᓇᓕᐊᒃ ᐊᓯᐊᓄᑦ ᑲᑎᑎᑕᐅᓯᒪᙱᑐᐊᖅᐸᑦ.

ᑎᒍᐊᖑᓂᐊᖅᑑᑉ ᒥᒃᓵᓄᑦ ᑐᓴᐅᒪᔭᐅᔭᕆᐊᓖᑦ ᐃᕐᓂᓚᐅᖅᑐᓄᑦ

ᑭᓇᒥᒡᓕ ᐅᖃᓪᓚᖃᑎᖃᕈᓐᓇᖅᐳᖓ?

ᐱᒻᒪᕆᐊᓘᔪᖅ ᓄᑕᕋᓛᖅᑖᕆᔭᐃᑦ ᐸᕐᓇᐅᑎᑦᑎᐊᕐᓗᒍ ᓇᒡᓕᖕᓂᖃᖅᑐᓄᑦ ᐊᖏᕐᕋᖅᑖᕐᓂᐊᕐᓂᖓ ᖃᐅᔨᒪᓗᒍᓗ.

ᓇᓗᓕᐅᖅᑲᓕᕈᕕᑦ ᑎᒍᐊᓪᓗᐊᕐᒪᖔᕐᓂᒃ ᑎᒍᐊᖅᑕᐅᑎᑦᑎᓪᓗᐊᕐᒪᖔᕐᓂᒡᓘᓐᓃᑦ, ᓄᓇᓕᖕᓂ ᐃᓄᓕᕆᔨᐅᔪᒧᑦ ᐃᑲᔪᖅᑕᐅᔪᓐᓇᖅᑐᒃᓴᐅᔪᑎᑦ ᑕᒪᑐᒧᖓ.

ᐃᓱᒪᓕᐅᕈᑎᒋᓂᐊᖅᑕᐃᑦ ᓇᖕᒥᓂᖅ ᑎᒍᐊᖅᑕᐅᖁᔨᖕᒪᖔᕐᓂᒃ ᑎᒍᐊᕈᒪᖕᒪᖔᕐᓂᒡᓘᓐᓃᑦ.

ᐃᓱᒪᒃᓴᖅᓯᐅᑲᑕᒋᐊᖃᕐᓇᖅᑐᖅ ᐊᔾᔨᒌᙱᑦᑑᑎᓄᑦ, ᑕᐃᒪᐃᒻᒪᑦ ᐃᓄᓕᕆᔨᒧᑦ ᐃᑲᔪᖅᑕᐅᔪᓐᓇᖅᐳᑎᑦ ᓄᓇᒋᔭᕐᓂ. ᖃᓄᖅ ᐃᓱᒪᓕᐅᕈᓐᓇᕐᒪᖔᕐᓂᒃ ᓂᕈᐊᖅᖠᕈᓐᓇᕐᒪᖔᖅᐱᓪᓘᓐᓃᑦ ᖃᐅᔨᕚᓪᓕᕈᓐᓇᖅᐳᑎᑦ ᑕᐃᒫᒡᓗ ᓄᑕᕋᓛᖅ ᐃᓱᒪᓕᐅᕈᑎᑦᑎᐊᕐᓗᒍ.

ᖃᓄᐃᑦᑑᓂᖏᑦ ᑎᒍᐊᕈᓰᑦ

ᑎᓴᒪᓂᒃ ᑎᒍᐊᕈᓯᖅᑕᓕᒃ ᓄᓇᕗᒻᒥ:

ᓄᓇᖃᖅᑳᖅᓯᒪᔪᑦ ᐱᖅᑯᓯᕐᒥᒍᑦ ᑎᒍᐊᕐᓂᖅ ᐊᑐᐃᓐᓇᐅᔭᖅᑐᖅ ᓈᒻᒪᒋᔭᐅᓪᓗᓂᓗ ᐊᑐᕋᓲᑎ ᓄᑕᕋᕐᒥᑦ ᐃᓂᑖᖅᑎᑦᑎᓂᕐᒥᒃ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖓᒍᑦ. ᐊᑕᐅᓯᖅ ᑕᒪᕐᒥᒡᓘᓐᓃᑦ ᐊᖓᔪᖅᑳᒃ ᑎᒍᐊᕐᓂᐊᖅᑐᓪᓗ ᐊᖓᔪᖅᑳᑦ ᐃᓅᔭᕆᐊᓕᑦ, ᐊᓪᓚᑦ ᐅᕝᕙᓘᓐᓃᑦ ᐊᓪᓚᖓᔪᑦ ᓄᓇᓕᖃᕆᐊᖃᖅᑐᓪᓗ ᐅᕝᕙᓘᓐᓃᑦ ᓱᓕᓗᑎᒃ ᐊᒃᑐᐊᓂᖃᕆᐊᓕᑦ ᓄᓇᕗᒻᒧᑦ.

ᐃᓄᐃᑦ ᑎᒍᐊᕈᓯᖏᑦ ᐋᖅᑭᒃᑕᐅᓯᒪᔪᖅ ᑲᒪᓂᐊᖅᑎᓪᓗᒋᑦ ᓄᑕᖅᑲᓂᒃ ᐊᖓᔪᖅᑳᓪᓚᑦᑖᑦ ᐊᒻᒪ ᑎᒍᐊᖅᓯᒪᔪᑦ ᐊᖓᔪᖅᑳᖅ(ᑦ) (ᐃᓚᒋᔭᐅᒐᔪᒃᑐᑦ ᐊᓯᖏᓐᓄᓪᓘᓐᓃᑦ ᐃᓄᖕᓄᑦ ᑕᕝᕙᓂᑦᑕᐃᓐᓇᖅ ᓄᓇᓕᖕᒥᑦ). ᑎᒍᐊᕐᓂᖅ ᐃᓱᒪᒋᔭᐅᔪᖅ ᐊᑐᓕᕐᓂᑰᓂᖓᓂᒃ ᐃᓂᑖᖅᑎᑕᐅᑎᓪᓗᒋᑦ.

ᑲᑎᙵᙱᑦᑐᖅ ᑎᒍᐊᕐᓂᕐᒧᑦ ᒪᓕᒐᓕᐊᖅ, ᑕᐃᔭᐅᔪᖅ ᓄᓇᖃᖅᑳᖅᓯᒪᔪᑦ ᑎᒍᐊᕈᓯᖏᓐᓄᑦ ᐱᖁᔭᖅ, ᑲᔪᓯᑎᑕᐅᓪᓗᓂ ᓯᑎᐱᕆ 30, 1995 ᑕᐃᒪᙵᓪᓗ ᐃᓕᖅᑯᓯᒃᑯᑦ ᑎᒍᐊᕐᓂᖅ ᐱᓕᕆᔭᐅᓪᓗᓂ ᑎᒍᐊᖅᑐᓕᕆᔨ ᑲᓇᑕᐅᑉ ᒐᕙᒪᖓᓄᑦ ᑭᒡᒐᖅᑐᖅᑎᓄᑦ ᓇᓂᑐᐃᓐᓇᖅ ᓄᓇᕗᒻᒥ ᓄᓇᑦᓯᐊᒥᓗ ᓄᓇᓕᖏᓐᓂ. ᑎᒍᐊᕐᓂᕐᒧᑦ ᓇᓗᓇᐃᒃᑯᑕᑦ ᐱᔭᕇᖅᑕᐅᖃᑦᑕᖅᑐᑦ ᑲᓇᑕᐅᑉ ᒐᕙᒪᖓᓄᑦ ᑭᒡᒐᖅᑐᖅᑎᓄᑦ ᑲᔪᓯᑎᑕᐅᓪᓗᑎᒃᓗ ᓄᓇᕗᒻᒥ ᐃᖅᑲᖅᑐᐃᕕᖕᒧᑦ ᓇᓗᓇᐃᒃᑯᖅᑎᖅᑕᐅᓪᓗᑎᒃ, ᓇᕿᑦᑎᕕᐅᓪᓗᑎᒃ ᑐᖅᑯᖅᑕᐅᓪᓗᑎᒡᓗ ᓄᓇᕗᒻᒥ ᐃᖅᑲᖅᑐᐃᕕᒃ ᑎᑎᕋᖅᑎᕋᓛᖓᓄᑦ.

ᐃᖅᑲᖅᑐᐃᕕᒃᑯᑦ ᑎᒍᐊᕐᓂᖅ ᐊᑐᓲᖅ ᓄᑕᕋᖅ ᑎᒍᐊᖅᑕᐅᓂᐊᖅᑐᖅ ᑲᒪᒋᔭᐅᙱᖦᖢᓂ ᐃᓄᓕᕆᔨᒃᑯᓐᓂ. ᐋᖅᑭᒃᑕᐅᔪᓐᓇᖅᑐᖅ ᐃᓄᖕᓄᑦ (ᐊᖓᔪᖅᑳᓪᓚᑦᑖᖅ(ᑦ) ᐊᒻᒪ ᑎᒍᐊᕐᓂᐊᖅᑐᑦ ᐊᖓᔪᖅᑳᖅ(ᑦ)) ᓇᖕᒥᓂᖅ ᐱᔭᕆᐊᓖᑦ ᑎᒍᐊᕐᓂᕐᒧᑦ ᐱᖁᔭᕐᒥ ᐊᒻᒪᓗ ᐊᑐᕆᐊᓕᑦ ᐱᓕᕆᐊᖑᓐᓂᖅᐸᑕ. ᓄᑕᖅᑲᑦ ᐃᓂᑖᖅᑎᑕᐅᔪᓐᓇᖅᑐᑦ ᑎᒍᐊᕐᕕᐅᓯᒪᔭᖏᓐᓄᑦ ᖃᑕᙳᑎᒌᓄᑦ ᓄᓇᕗᒦᙱᑦᑐᓄᑦ ᑭᓯᐊᓂ ᐊᓱᐃᓛᒃ ᐱᔭᕆᐊᓕᖏᑦ ᑕᒪᒃᑭ ᓄᓇᕗᒻᒥ ᓄᓇᖃᕐᕕᒋᓂᐊᖅᑕᖓᓗ ᓄᓇᕗᒻᒥᓘᓐᓃᑦ ᐊᑐᖅᑕᐅᔭᕆᐊᓕᑦ.

ᐃᖅᑲᖅᑐᐃᕝᕕᒃᑯᑦ ᑎᒍᐊᕐᓂᕐᒧᑦ ᐱᔾᔪᑎᖏᑦ ᐊᑐᐊᒐᓕᐅᖅᑕᐅᓯᒪᔪᑦ ᓴᐳᒻᒥᓗᒋᑦ ᐱᔪᒪᓂᖏᑦ ᐱᓕᕆᐊᖃᖅᑐᓕᒫᑦ, ᐱᖁᓪᓗᒍᓗ ᓴᐳᒻᒦᓂᖅ ᖃᓄᐃᙱᑦᑎᐊᖁᔨᓂᕐᓗ ᓄᑕᕋᕐᒥᑦ.

ᐊᓈᓇᒃᓴᒥᓄᑦ/ᐊᑖᑕᒃᓴᒥᓄᑦ ᑎᒍᐊᖅᑕᐅᔪᖅ ᐊᑖᓃᒻᒥᔪᖅᑕᐅᖅ ᐃᖅᑲᖅᑐᐃᕕᒃᑯᑦ ᑎᒍᐊᕐᓂᐅᑉ ᐃᓕᖅᑯᓯᖓᒍᑦ. ᐊᓈᓇᒃᓴᒥᓄᑦ/ᐊᑖᑕᒃᓴᒥᓄᑦ ᑎᒍᐊᖅᑕᐅᔪᖃᓲᖑᔪᖅ ᐊᐃᑉᐸᕆᓚᐅᖅᑕᖓᑕ ᕿᑐᕐᖓᖓᓂᒃ ᐱᑖᕈᒪᔪᖅ ᑎᒍᐊᕐᓂᒃᑯᑦ. ᓇᓕᐊᒃ ᐊᕐᓇᖅ ᐊᖑᓪᓘᓐᓃᑦ ᑲᑎᑎᑕᐅᓯᒪᔭᕆᐊᖃᙱᑦᑐᖅ ᐊᓯᐊᓄᑦ.

ᐃᓄᓕᕆᔨᒃᑯᑎᒍᑦ ᑎᒍᐊᕐᓂᖅ ᐊᑐᖃᑦᑕᖅᑐᖅ ᓄᑕᕋᖅ ᑎᒍᐊᖅᑕᐅᓂᐊᖅᑐᖅ ᑲᒪᒋᔭᐅᖏᓐᓇᕐᓗᓂ ᑎᒍᐊᙳᐊᕆᔭᐅᓗᓂᓘᓐᓃᑦ ᑐᑭᒧᐊᒃᑎᑦᑎᔨ ᓄᑕᖅᑲᓄᑦ ᖃᑕᙳᑎᒌᓄᓪᓗ ᐃᓄᓕᕆᔨᒃᑯᓐᓄᑦ ᐃᖅᑲᖅᑐᐃᕕᒃᑯᑦ ᑎᓕᔭᐅᓯᒪᓗᓂ. ᑖᓐᓇ ᐊᑐᕈᓐᓇᖅᑐᖅ ᐊᑕᐅᓯᒃᑯᑦ ᒪᕐᕈᐃᓕᖓᑎᓪᓗᒋᒃ:

• ᐊᖓᔪᖅᑳᖅ ᐃᕐᓂᓗᓂ ᓄᑕᖅᑲᒥᒃ ᓄᑕᕋᖅ ᒥᐊᓂᕆᔭᐅᔪᓕᕆᔨᒧᑦ ᐱᔾᔪᑎᒋᓗᒍ ᑎᒍᐊᕐᓂᖅ, ᐊᒻᒪ ᐊᖏᕈᑎᑦ ᐱᔭᕆᐊᓕᑦ ᐱᑎᑕᐅᓗᑎᒃ ᑐᑭᒧᐊᒃᑎᑦᑎᔨᒧᑦ (ᐊᕕᒃᓯᒪᓂᖅ. 37.(1) ᑕᕝᕙᓂ ᓱᕈᓯᕐᓄᑦ ᖃᑕᙳᑎᒌᓄᓪᓗ ᐱᔨᑦᑎᕋᕈᑎᓄᑦ ᐱᖁᔭᖅ).
• ᓄᑕᕋᖅ ᐊᖓᔪᖅᑳᖏᓐᓂ ᐊᖅᓵᖅᑕᐅᔪᖅ (ᐊᕕᒃᓯᒪᓂᖓ. 33 ᓄᑕᖅᑲᓄᑦ ᐃᓄᓕᕆᔨᒃᑯᓐᓄᓪᓗ ᐱᖁᔭᕐᒥ) ᐊᓱᐃᓛᒃ ᑲᒪᒋᔭᐅᖏᓐᓇᓕᕐᓗᓂ ᐱᔭᐅᓯᒪᔪᖅ ᑐᑭᒧᐊᒃᑎᑦᑎᔨᒧᑦ ᓄᑕᖅᑲᓄᑦ ᐃᓚᒌᓄᓪᓗ ᐱᔨᑦᑎᕋᖅᑎᒃᑯᓐᓄᑦ.

ᐊᑭᓕᖅᓱᖅᑕᐅᓗᓂ ᑎᒍᐊᕐᓂᖅ ᐊᑐᐃᓐᓇᐅᑕᐃᓐᓇᓲᖅ ᑭᓯᐊᓂ ᓄᑕᕋᖅ ᐃᓄᓕᕆᔨᒃᑯᓐᓄᑦ ᐱᓯᒪᔭᐅᙱᓐᓇᕈᓂ ᐊᔪᕈᓐᓃᖅᐸᑦ ᑎᒍᐊᖑᔭᕆᐊᒃᓴᖅ. ᐊᑭᓕᖅᓱᖅᑕᐅᓪᓗᑎᒃ ᐃᓄᓕᕆᔨᒃᑯᓐᓄᑦ ᑎᒍᐊᖅᑐᑦ ᐃᑲᔪᖅᑕᐅᖃᑦᑕᖅᑐᑦ ᑐᙵᕕᒃᑖᖅᑎᑦᑎᔾᔪᑕᐅᕙᒃᖢᓂᓗ ᓄᑕᖅᑲᓄᑦ ᑖᒃᑯᐊ ᑎᒍᐊᖅᑐᑦ ᐃᑲᔪᖅᑕᐅᓪᓗᑎᒃ, ᑮᓇᐅᔭᑎᒍᑦ ᐊᒻᒪ ᐊᓯᐊᒍᑦ, ᐊᖓᔪᖅᑳᙳᓵᖅᑐᓄᑦ ᐊᑐᐃᓐᓇᐅᓪᓗᑎᒃ ᐃᑲᔫᑎᑦ.

ᐊᑭᓕᖅᓱᖅᑕᐅᓪᓗᓂ ᐃᓄᓕᕆᔨᒃᑯᑎᒍᑦ ᑎᒍᐊᕐᓂᖅ ᐃᑲᔫᑕᐅᖃᑦᑕᖅᑐᖅ ᐃᓄᓕᕆᔨᒃᑯᑦ ᐅᒃᐱᕈᓱᒃᖢᑎᒃ ᓄᑕᕋᖅ ᑎᒍᐊᖑᒍᓂ ᐊᑲᐅᓂᖅᓴᐅᓂᐊᕐᓂᖓᓂᒃ ᓲᖃᐃᒻᒪ ᐅᕙᑦᑎᑖᕆᐊᖃᕐᒪᑦ, ᑐᙵᕕᖃᑦᑎᐊᕐᓗᓂ, ᐊᒻᒪᓗ ᐃᓅᓯᕆᖕᓂᖅᓴᐅᓕᕋᔭᕐᓂᖓᓄᑦ ᐅᕙᑦᑎᖃᕐᓗᓂ ᖃᑕᙳᑎᒋᔭᐅᓕᕐᓗᓂᓗ.

ᒪᕐᕈᐃᖑᔪᑦ ᐃᑲᔪᖅᓯᕈᑕᐅᔾᔪᓯᐅᔪᑦ ᐃᓄᓕᕆᔨᒃᑯᓐᓂ. ᐃᑲᔪᖅᑕᐅᖃᑦᑕᕈᓐᓇᓲᑦ ᐃᒪᐃᓕᖓᑐᐊᕌᖓᑕ:

• ᓄᑕᕋᖅ ᐃᓕᖅᑯᓯᖅᓱᙱᓐᓂᕐᒥᓄᑦ ᐃᑲᔪᖅᑕᐅᖃᑦᑕᕆᐊᖃᖅᐸᑦ; ᐊᒻᒪᓗ/ᐅᕝᕙᓘᓐᓃᑦ
• ​ᓄᑕᕋᖅ ᑲᒪᒋᔭᐅᔾᔪᑎᖓᓄᑦ ᐃᑲᔪᖅᑕᐅᖃᑦᑕᕆᐊᖃᖅᐸᑦ ᑎᒍᐊᖅᑐᐃᓪᓗ ᐊᔪᕐᓇᖅᑐᖅᓯᐅᕈᑎᖃᓕᒑᒃᐸᑕ ᐊᒃᓱᕈᓗᐊᕌᓗᒋᐊᖃᙱᓪᓗᑎᐅᒐᓗᐊᖅ ᑮᓇᐅᔭᑎᒍᑦ ᐱᑲᑕᖃᑦᑕᕆᐊᖃᕐᓂᐊᕐᓗᑎᒃ ᑎᒍᐊᖅᓯᙳᖅᑐᑦ ᑲᒪᒋᔭᖃᕐᓂᕐᒧᑦ ᐊᑭᓕᖅᓱᐃᒃᑲᓐᓂᖃᑦᑕᕆᐊᖃᕐᓂᖏᓐᓄᑦ.

ᑐᑭᒧᐊᒃᑎᑦᑎᔨ ᐃᓄᓕᕆᔨᒃᑯᓐᓄᑦ ᐋᖅᑭᒃᓯᔾᔪᔾᔨᔪᓐᓇᖅᑐᖅ ᐃᑲᔫᑎᒃᓴᓂᒃ ᐊᓯᖏᓐᓂᒃ ᓇᓗᓇᐃᖅᓯᒪᔪᓂᒃ ᐃᓛᒃᑰᖅᑐᖅ 17(1) ᓄᓇᕗᒻᒥ ᑎᒍᐊᖃᑦᑕᕐᓂᕐᒧᑦ ᐱᖁᔭᖅ ᑎᒍᐊᕋᓱᒃᑐᒧᑦ ᐅᕝᕙᓘᓐᓃᑦ ᑎᒍᐊᙳᐊᖃᖅᐸᒌᖅᑐᒧᑦ ᑭᓯᐊᓂ ᐊᓯᐊᒎᖁᔭᐅᓗᓂ ᓇᓗᓇᐃᕐᕕᐅᓯᒪᒃᐸᑦ ᓄᓇᕗᑦ ᒐᕙᒪᒃᑯᓐᓄᑦ ᑎᒥᖁᑎᖏᓐᓄᓪᓘᓐᓃᑦ ᖃᓄᐃᓕᐅᖁᔭᐅᓗᓂ.

ᓄᓇᓕᒡᔪᐊᑉ ᓯᓚᑖᓂᖔᖅᑐᒥᒃ ᑎᒍᐊᕐᓂᖅ ᐊᑐᖅᑕᐅᓲᖑᔪᖅ ᓄᑕᕋᖅ ᑎᒍᐊᖑᓐᓂᕌᖓᑦ ᑲᓇᑕᐅᑉ ᓯᓚᑖᓂ. ᓄᓇᓕᒡᔪᐊᑉ ᓯᓚᑖᓂ ᑎᒍᐊᖃᑦᑕᕐᓃᑦ ᒪᓕᒋᐊᖃᓲᖑᔪᑦ ᓄᓇᕗᒻᒥ ᑎᒍᐊᖃᑦᑕᕐᓂᕐᒧᑦ ᐱᖁᔭᕐᒧᑦ, ᓄᓇᕗᒻᒥ ᓄᓇᓕᒡᔪᐊᑦ−ᓯᓚᑖᓂ ᑎᒍᐊᕐᓂᕐᒧᑦ ᐱᖁᔭᖅ (ᑎᒍᐊᖅᑐᓕᕆᑎᓪᓗᒋᑦ ᐊᖏᖃᑎᒌᒋᐊᖃᕐᓂᖅ), ᒐᕙᒪᑐᖃᒃᑯᑦ ᑲᓇᑕᒧᐊᕐᓗᓂ ᒪᓕᒐᖏᓐᓂᒃ, ᐊᒻᒪᓗ ᒪᓕᒐᐃᑦ ᓄᑕᕋᐅᑉ ᓄᓇᓕᒡᔪᐊᖓᓂ ᐊᐅᓚᑦᑎᔪᑦ ᒪᓕᒃᑕᐅᔭᕆᐊᖃᖅᐸᒃᖢᑎᒃ. ᑕᒪᐃᓐᓂᓕᒫᑦᑎᐊᖅ ᒪᓕᒐᐃᑦ ᑖᒃᑯᓇᙶᖅᑐᑦ ᒪᓕᒃᑕᐅᔭᕆᐊᖃᓲᑦ.

ᓄᓇᕗᒻᒥ ᑎᒍᐊᖃᑦᑕᕐᓂᕐᒧᑦ ᐱᖁᔭᖅ ᐊᐅᓚᑦᑎᕙᒃᐳᖅ ᑎᒍᐊᖑᔪᖃᓕᒑᑎᓪᓗᒍ ᓄᓇᕗᒻᒧᑦ ᑖᓐᓇ ᓄᑕᕋᖅ ᑲᓇᑕᒧᑦ ᖃᑕᙳᑎᑖᖏᓐᓄᐊᖅᓯᒪᓕᖅᑎᓪᓗᒍ. ᑎᒍᐊᖑᔪᐃᑦ ᓄᑕᕋᐅᑉ ᓄᓇᓕᒡᔪᐊᖓᓂ ᐊᐅᓚᑕᐅᕙᒃᐳᑦ ᓄᓇᓕᒡᔪᐊᑦ−ᓯᓚᑖᓂ ᑎᒍᐊᕐᓂᕐᒧᑦ ᐱᖁᔭᖅ ᐊᑐᖅᑕᐅᓪᓗᓂ ᐊᒻᒪᓗ ᐱᔪᓐᓇᐅᑎᖃᕆᐊᖃᓲᖑᓪᓗᑎᒃ ᑎᒍᐊᖅᑐᓕᕆᓂᕐᒧᑦ ᑎᒥᐅᔪᒥᒃ ᐱᓕᕆᖃᑎᖃᕐᓗᑎᒃ. ᓄᓇᕗᒻᒥ ᓇᖕᒥᓂᖅᓱᖅᑐᓂᒃ ᑎᒍᐊᖅᑐᓕᕆᔨᖃᙱᒻᒪᑦ ᑎᒥᐅᔪᒥᒃ ᑕᐃᒪᐃᒻᒪᑦ ᖃᓪᓗᓈᑦ ᓄᓇᖏᓐᓃᑦᑐᓂᒃ ᑐᒥᐅᔪᓂᒃ ᑎᒍᐊᖅᑐᓕᕆᔨᓂᒃ ᐱᓕᕆᔨᖃᖃᑦᑕᖅᐳᑦ ᓄᓇᓕᒡᔪᐊᑉ ᓯᓚᑖᓂᖔᖅᑐᓂᒃ ᑎᒍᐊᖅᑐᖃᕋᓱᒃᑎᓪᓗᒍ.

ᑭᓲᖕᒪᑦ ᑎᒍᐊᖅᑐᓕᕆᑎᓪᓗᒋᑦ ᐊᖏᖃᑎᒌᒋᐊᖃᕐᓂᖅ?

ᒪᐃ 1993-ᒥ, 66-ᖑᔪᑦ ᓄᓇᓕᕐᔪᐊᑦ, ᐱᖃᓯᐅᑎᓪᓗᒍ ᑲᓇᑕ, ᐊᖏᖃᑎᒌᒍᑎᓕᐅᓚᐅᖅᑐᑦ ᑖᔅᓱᒥᖓ Hague-ᒥ
ᐊᖏᖃᑎᒌᒍᑎᖏᑦ ᓴᐳᔾᔨᓂᕐᒥᑦ ᓄᑕᖅᑲᕐᓂᑦ ᐱᓕᕆᖃᑎᒌᓐᓂᕐᒥᓪᓗ ᐱᔾᔪᑎᓕᓐᓂᑦ ᑲᓇᑕᒥᐅᑕᐅᖃᑎᒌᖏᑦᑐᓂᑦ
ᑎᒍᐊᕐᓂᖅ (ᐅᕝᕙᓘᓐᓃᑦ Hague Convention on inter-country ᑎᒍᐊᕐᓂᖅ). ᐊᖏᖃᑎᒌᒍᑎ ᕿᓂᖅᐳᖅ
ᓴᖅᑭᑦᑎᓂᐊᕐᓗᑎᒃ ᐱᓕᕆᖃᑎᒌᖕᓂᖕᒧᑦ ᑐᙵᕕᒃᓴᓂᑦ ᓄᓇᕐᔪᐊᒥᑦ ᓄᑕᖅᑲᑦ ᐱᔭᕆᐊᓕᖏᓐᓂᑦ
ᑎᒍᐊᕐᓂᖅ ᐊᒻᒪᓗ ᓄᓇᓕᕐᔪᐊᑦ ᐱᖃᑦᑕᖅᑕᖏᑦ ᓇᓗᓇᐃᖅᓯᓂᕐᒧᑦ ᓱᕈᓯᐅᑉ ᐱᔪᒪᔭᖏᓐᓂᑦ
ᓴᐳᔾᔭᐅᓯᒪᔪᖅ.

ᖃᓄᕐᓕ ᑕᐃᒪ ᓄᑕᖅᑲᑦ ᐃᓄᖕᓄᑦ ᐃᕐᓂᐊᖑᔪᕕᓃᑦ ᑎᒍᐊᖑᑎᓪᓗᒋᑦ?

ᓄᓇᕗᒻᒥ ᑎᒍᐊᖃᑦᑕᕐᓂᕐᒧᑦ ᐱᖁᔭᖅ ᐅᔾᔨᕈᓱᐃᓐᓇᖁᔨᓲᖑᔪᑦ ᓄᑕᕋᐅᑉ ᑎᒥᖓᒍᑦ, ᐃᓱᒪᖓᒍᑦ ᐃᒃᐱᖕᓂᐊᓂᖓᒍᓪᓗ ᖃᓄᐃᙱᑦᑎᐊᕆᐊᖃᕐᓂᖓ ᐊᒻᒪᑦᑕᐅᖅ ᐃᒃᐱᒋᔭᐅᔭᕆᐊᖃᕆᓪᓗᑎᒃ ᓄᑕᕋᐅᑉ ᐃᓕᖅᑯᓯᑐᖃᖓ, ᐅᖃᐅᓯᖓ ᐊᒻᒪᓗ ᐅᒃᐱᕈᓱᒍᓯᖓ ᖃᐅᔨᒪᔭᐅᕙᒌᕋᓱᐊᖅᐸᖕᒥᔪᑦ ᑎᒍᐊᖅᑕᐅᔪᖃᓕᒑᑎᓪᓗᒍ. ᐃᓕᓴᕆᔭᐅᓯᒪᖃᑦᑕᖅᑐᑦ ᐃᓄᖕᓄᑦ ᐃᕐᓂᐊᖑᔪᕕᓃᑦ ᐃᓕᖅᑯᓯᑐᖃᖓ ᐊᒻᒪ ᐅᕕᓂᖃᖃᑎᒋᔭᖏᑦ ᓇᑭᖔᕐᒪᖔᑕ ᑎᒍᐊᖑᔪᒃᓴᐅᑕᐅᔪᐃᑦ.

ᓇᖕᒥᓂᖅᓱᖅᑐᓂᓕ ᑎᒍᐊᖅᑕᐅᔪᖃᖅᑎᓪᓗᒍ, ᐃᕐᓂᓚᐅᖅᑐᑦ ᐊᖓᔪᖅᑳᖑᔪᑦ ᐊᖏᕈᑎᖃᕈᓐᓇᓲᑦ ᑐᓴᐅᒪᖃᑦᑕᐅᑎᓂᕐᒥᒃ ᐃᓄᖕᓄᑦ ᑎᒥᖁᑎᒋᔭᐅᔪᒥᒃ ᐊᑐᕐᓗᑎᒃ ᑎᒍᐊᖅᐸᓪᓕᐊᓂᕐᒧᑦ ᐸᕐᓇᐅᑎᓕᐅᖃᑎᒋᔭᐅᔪᓐᓇᓲᑦ. ᐃᓄᖕᓄᑦ ᑎᒥᖁᑎᒋᔭᐅᔪᖅ ᐃᑲᔪᕈᓐᓇᖅᑐᑦ ᐃᕐᓂᐊᖃᓚᐅᖅᑐᓂᒃ ᓇᓂᓯᔭᕆᐊᖃᖅᐸᑕ ᐊᐅᒃᑯᑦ ᖃᑕᙳᑎᖏᓐᓂᒃ ᑎᒍᐊᕈᒪᑐᐃᓐᓇᕆᐊᓕᖕᓂᒃ.

ᓄᑕᖅᑲᓄᑦ ᐃᓄᓕᕆᔨᒃᑯᓐᓂ ᐱᓯᒪᔭᐅᙱᓐᓇᐅᔭᖅᑐᑦ, ᐃᓄᓕᕆᔨᒃᑯᓐᓄᑦ ᑐᑭᒧᐊᒃᑎᑦᑎᔨ ᐃᓄᐃᑦ ᑎᒥᖁᑖᓂᒃ ᐱᓕᕆᖃᑎᖃᓲᖅ ᑭᓱᒥᒃ ᑐᑭᓯᒋᐊᒃᑲᓐᓂᕆᐊᖃᕐᓂᕌᖓᒥ ᐸᕐᓇᐅᑎᓕᐅᖅᐸᓪᓕᐊᓂᕐᒥᓂᒃ ᓄᑕᕋᑯᓗᒃ ᑎᒍᐊᖑᔪᒃᓴᐅᑎᓪᓗᒍ. ᖃᑕᙳᑎᒋᔭᐅᔪᒧᑦ ᐃᓚᖏᑦ ᐅᕝᕙᓘᓐᓃᑦ ᐊᖏᖅᑕᐅᓯᒪᔪᓂ ᐃᓄᖕᓂᒃ ᖃᑕᙳᑎᒌᖑᔪᓂ ᓇᓂᓯᔪᓐᓇᙱᒃᑯᑎᒃ, ᑐᑭᒧᐊᒃᑎᑦᑎᔨ ᐃᓱᒪᒃᓴᖅᓯᐅᕈᑎᖃᓕᕐᓂᐊᖅᐳᖅ ᐃᓅᖃᑎᖏᑕ ᓯᓚᑖᓂ ᐱᔪᒪᔪᖅᑕᖃᕐᒪᖔᑦ, ᓄᑕᕋᐅᑉ ᐃᓕᖅᓯᑐᖃᖓᓂᒃ ᐃᒃᐱᒍᓱᖕᓂᐊᕐᓂᕋᖅᓯᒪᑐᐊᖅᐸᑕ ᑭᓇᐅᓂᖓ ᐅᕕᓂᖓᒍᑦ ᐃᒃᐱᒋᔭᐅᑦᑎᐊᕐᓂᐊᕐᓗᓂ.

ᐱᕋᔭᓐᓃᑦ

ᑎᒍᐊᖅᑐᓄᑦ ᓄᓇᕗᒻᒥ ᐱᓕᕆᐊᖑᓪᓗᑎᒃ ᐊᐅᓚᑕᐅᓪᓗᑎᒡᓗ ᓄᓇᕗᒻᒥ ᑎᒍᐊᖃᑦᑕᕐᓂᕐᒧᑦ ᐱᖁᔭᒃᑯᑦ, ᐃᕐᓂᓚᐅᖅᑐᑦ ᐊᖓᔪᖅᑳᖑᔪᑦ ᑐᓴᐅᒪᑦᑎᐊᕆᐊᖃᖅᑐᑦ ᓇᐃᓈᖅᓯᒪᓪᓗᑎᒃ ᐅᓂᒃᑳᖑᔪᑦ ᖃᓄᖅ ᓱᕋᐃᕙᖕᒪᖔᑕ ᐱᖁᔭᕐᓂᒃ ᑕᕝᕘᓇ ᓄᓇᕗᒻᒥ ᑎᒍᐊᖃᑦᑕᕐᓂᕐᒧᑦ ᐱᖁᔭᒃᑯᑦ:

ᑭᓇᑐᐃᓐᓇᖅ ᓴᖅᑭᑎᑦᑎᔭᕆᐊᖃᙱᑦᑐᖅ ᓇᐅᒃᑯᑐᐃᓐᓇᖅ ᒪᓂᓴᐅᑎᖃᕐᓗᓂ ᓄᑕᕋᒥᒃ ᑎᒍᐊᕈᒪᓂᕋᕐᓗᓂ ᐅᕝᕙᓘᓐᓃᑦ ᑎᒍᐊᕈᒪᔪᓂᒃ ᐊᖓᔪᖅᑳᒃᓴᓂᒃ ᕿᓂᖅᓴᕆᐊᖃᙱᒻᒥᔪᖅ ᓄᑕᕋᕐᒧᑦ ᓄᑕᖅᑲᓄᓪᓘᓐᓃᑦ. ᑭᓇᑐᐃᓐᓇᑦᑎᐊᖅ ᓱᕋᐃᔪᖅ, ᖃᓄᐃᙱᑦᑐᑑᓇᔭᖅᖢᓂ ᐃᓄᓕᕆᔨᓄᑦ ᑐᑭᒧᐊᒃᑎᑦᑎᔨᐅᔪᖅ, ᐸᓯᒃᖠᖅᑕᐅᔾᔪᑎᖃᕈᓐᓇᕐᒪᑦ ᓱᕋᐃᓂᕐᒧᑦ ᓵᑕᐅᔾᔪᑎᖃᕈᓐᓇᖅᓯᓇᔭᖅᖢᓂᓗ ᐃᒻᒪᖄᓗ ᐊᑭᓖᖁᔭᐅᓕᕋᔭᖅᖢᓂ $5,000−ᓂᒃ, ᑎᒍᔭᐅᔪᓐᓇᕆᓪᓗᓂᓗ ᑕᖅᑮᑦ ᐊᕐᕕᓂᓖᑦ ᐅᖓᑖᓅᙱᑦᑐᖅ, ᐃᒻᒪᖄᓘᓐᓃᑦ ᑕᒪᐃᓐᓄᑦ ᓵᑕᐅᔾᔪᑎᖃᕈᓐᓇᖅᖢᓂ (ᐊᒡᒍᖅᓯᒪᓂᖓ 74).

ᑭᓇᑐᐃᓐᓇᑦᑎᐊᖅ, ᑐᑭᒧᐊᒃᑎᑦᑎᔨᐅᙱᑐᐊᕈᓂ, ᐊᑭᓖᓐᓂᖅᐸᑦ ᐊᑭᓕᖅᑕᐅᓐᓂᕈᓂᓘᓐᓃᑦ, ᑐᓂᔭᐅᑲᐅᑎᒋᓗᓂ ᐅᕝᕙᓘᓐᓃᑦ ᓴᓂᐊᒎᖅᑐᒃᑯᑦ ᐱᑎᑕᐅᒍᓂ ᐊᑭᓕᐅᑎᒥᒃ, ᓄᑕᖅᑲᒥᒃ ᐱᓇᓱᒡᓗᓂ ᐃᑲᔪᖅᐸᓪᓘᓐᓃᑦ ᑭᓇᒥᒃ ᓄᑕᖅᑲᒥᒃ ᑎᒍᐊᕋᓱᒡᓗᓂ ᑕᐃᒪ ᓱᕋᐃᕗᖅ ᐱᖁᔭᕐᒥᒃ ᑕᐃᒪᐃᒻᒪᓪᓗ ᐸᓯᒃᖠᖅᑕᐅᔾᔪᑎᖃᕈᓐᓇᖅᐳᖅ ᐊᑭᓕᒃᓴᖅᑖᕐᓗᓂᓗ $10,000 ᐅᖓᑖᓅᙱᑦᑐᖅ, ᑎᒍᔭᐅᓗᓂᓘᓐᓃᑦ ᐅᑭᐅᓕᒫᒥ ᐅᕝᕙᓘᓐᓃᑦ ᑕᒪᐃᓐᓂᒃ ᐊᑐᕆᐊᖃᑐᐃᓐᓇᕆᐊᖃᖅᐳᖅ. ᐸᓯᒃᖠᖅᑕᐅᔾᔪᑎᖃᕋᔭᙱᑦᑐᓪᓕ ᑭᓯᐊᓂ ᐊᑭᓕᖅᓱᐃᓂᕐᒧᑦ ᑕᖅᑭᑕᒫᖅᓯᐅᑎᓂᒃ ᐊᑭᓕᖅᓱᕆᐊᓕᖕᓂᒡᓗ ᐱᔨᑦᑎᕋᖅᑕᐅᓂᕐᒧᑦ ᓄᓇᕗᒻᒥ ᑎᒍᐊᖃᑦᑕᕐᓂᕐᒧᑦ ᐱᖁᔭᖅ ᐊᑖᒍᑦ, ᐊᒻᒪᑦᑕᐅᖅ ᐊᑭᓕᖅᓱᕆᐊᓕᖕᓄᑦ ᒪᓕᒐᓕᕆᔨᒧᑦ ᐅᕝᕙᓘᓐᓃᑦ ᐃᖅᑲᖅᑐᐃᕕᖕᒥ ᓴᐳᓐᓂᐊᖅᑎᓄᑦ ᐊᑭᓕᖅᓱᖅᑕᐅᔭᕆᐊᓕᖕᓂᒃ ᐅᕝᕙᓘᓐᓃᑦ ᐃᖢᐊᖅᓴᖅᑕᐅᔾᔪᑎᓂᒃ ᐋᓐᓂᐊᓚᐅᖅᑐᕕᓂᐅᒃᐸᑦ ᑕᒪᒃᑯᐊᓗ ᐅᓂᒃᑲᐅᓯᐅᔭᕆᐊᖃᖅᐸᒃᖢᑎᒃ (ᐊᒡᒍᖅᓯᒪᓂᖓ 75).

ᖃᐅᔨᒋᐊᕐᕕᒃᓴᖅ:

ᑐᑭᓯᒋᐊᒃᑲᓂᕈᒪᒍᕕᑦ, ᖃᐅᔨᒃᑲᕐᓗᒋᑦ ᓄᓇᓕᓐᓂ ᐃᓚᒌᓄᑦ ᖃᓄᐃᖏᑦᓯᐊᕐᓂᕐᒧᑦ ᐊᓪᓚᕝᕕᖓ

ᑐᑭᓯᒋᐊᕐᕕᒋᔪᓐᓇᕐᒥᔭᐃᑦᑕᐅᖅ ᓄᓇᕗᒻᒥ ᑎᒍᐊᖅᑐᓕᕆᔨᒻᒪᕆᒃ ᑐᕌᕈᑖ ᐊᑖᓂ ᑕᑯᒃᓴᐅᔪᖅ:

Department of Family Services
Government of Nunavut
Box 1000, Stn. 1240
Iqaluit, Nunavut
X0A 0H0

ᐅᖄᓚᐅᑦ: 867- 975-5200
ᓱᒃᑲᔪᒃᑯᑦ: 867-975-5298
ᐃᕐᖐᓐᓈᖅᑕᐅᒃᑯᑦ: @email
ᐅᖄᓚᐅᑎᖓ: 867-975-5232
ᓱᑲᔪᒃᑯᑦ: 867-975-5298