ᓯᕗᓕᖅᑎ ᑐᓴᖅᑎᑦᑎᕗᖅ ᐊᐅᓚᑦᑎᔨᒻᒪᕇᑦ ᐊᓯᔾᔨᕐᓂᖏᓐᓂᑦ

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᓯᕗᓕᖅᑎ ᑐᓴᖅᑎᑦᑎᕗᖅ ᐊᐅᓚᑦᑎᔨᒻᒪᕇᑦ ᐊᓯᔾᔨᕐᓂᖏᓐᓂᑦ

ᐃᖃᓗᐃᑦ, ᓄᓇᕗᑦ (ᒫᑦᓯ 26, 2021) − ᓯᕗᓕᖅᑎ ᔫ ᓴᕕᑲᑖᖅ ᐅᓪᓗᒥ ᑐᓴᖅᑎᑦᑎᔪᖅ ᐊᓯᔾᔨᕐᓂᖏᓐᓄᑦ ᓄᓇᕗᑦ ᒐᕙᒪᖓᑕ ᐊᐅᒪᑦᑎᔨᒻᒪᕆᖏᑦ.

ᐱᒋᐊᕐᓗᒍ ᒪᐃ 1, 2021, ᑳᓖᓐ ᓯᑖᒃᓕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕᒧᑦ ᑐᒡᓕᖅᑖᕆᔭᐅᓛᖅᐳᖅ. ᑳᓖᓐ ᓯᑖᒃᓕ ᑐᒡᓕᕆᔭᐅᓚᐅᕐᒥᔪᖅ 2014-ᒥ 2019-ᒧᑦ, ᖃᐅᔨᒪᑦᑎᐊᖅᖢᓂᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒡᓚᕝᕕᓕᕆᔾᔪᓯᕐᓂᒃ ᐊᒻᒪ ᐊᐅᓚᑦᑎᔾᔪᓯᕐᓂᒃ.

ᐱᒋᐊᕐᓗᒍ ᐊᐃᕆᓕ 19, 2021, ᑲᐃᐅᓪ ᓰᓕ ᒥᓂᔅᑕᒧᑦ ᑐᒡᓕᖅᑖᕆᔭᐅᓛᖅᐳᖅ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓂ. ᑲᐃᐅᓪ ᓰᓕ ᐃᖅᑲᓇᐃᔭᖅᑎᐅᓯᒪᓕᖅᑐᖅ ᐱᓕᕆᕝᕕᖕᒥᐅᓄᑦ ᐅᑭᐅᑦ 17 ᐅᖓᑖᓄᑦ, ᖃᖓᑦᑎᐊᕐᓗ ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᒋᓚᐅᑲᓚᐅᖅᖢᓂᐅᒃ ᓄᓇᓕᖕᓂ ᒐᕙᒪᒃᑯᓐᓂ ᐅᑭᐅᒃ ᒪᕐᕉᒃ ᖃᓂᒋᔮᓄᑦ.

"ᐊᓕᐊᓇᐃᒍᓱᑦᑎᐊᖅᐳᖓ ᑐᙵᓱᒃᑎᑦᑎᒋᐊᒃᓴᖅ ᑳᓖᓐ ᓯᑖᒃᓕᒥ ᐅᑎᖅᑎᓪᓗᒍ ᓄᓇᕗᒻᒧᑦ ᖃᐅᔨᒪᓪᓗᒍᓗ ᖃᐅᔨᒪᓂᕆᔭᖓ ᐊᒻᒪ ᐱᔪᓐᓇᕐᓂᕆᔭᖓ ᐃᑲᔫᑎᖃᕐᓂᐊᕐᓂᖏᓐᓂᒃ ᓄᓇᕘᒧᑦ ᐊᐅᓚᑦᑏᓐᓇᖅᑎᓪᓗᑕ ᓄᕙᒡᔪᐊᕐᓇᖅ ᖃᓂᒻᒪᒍᑕᐅᕙᓪᓕᐊᔪᒥᒃ ᐊᑯᓂᐅᔪᒃᑯᑦ ᐱᔭᐅᒋᐊᓕᖕᓂᒃ ᓄᓇᕗᒥᐅᓕᒫᓄᑦ," ᐅᖃᓚᐅᖅᐳᖅ ᓯᕗᓕᖅᑎ ᓴᕕᑲᑖᖅ. ᑲᐃᐅᓪ ᓰᓕ ᐃᑲᔪᕐᔪᐊᖅᓯᒪᔪᒻᒪᕆᐊᓘᖕᒪᑦ ᐃᖅᑲᓇᐃᔮᒥᓂᒃ ᐱᓕᕆᖃᑎᒋᕙᒃᖢᓂᒋᑦ ᓄᓇᓕᖕᓂ ᒐᕙᒪᒋᔭᕗᑦ, ᐱᓗᐊᖅᑐᒥᒃ ᐊᕐᕌᒍᕆᓵᖅᑕᑦᑎᓐᓂ, ᖁᓱᙱᓚᖓᓗ ᐱᓕᕆᐊᒃᓴᕆᓕᖅᑕᒥᓂᒃ ᐱᓕᕆᑦᑎᐊᕐᓂᐊᕈᓱᒋᓪᓗᒍ ᐊᔪᙱᑦᑎᐊᕐᓂᖓᓄᑦ."

ᒫᓐᓇᓕᓴᖅ ᒥᓂᔅᑕᐅᑉ ᑐᒡᓕᐊ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐅᒡᓗᐱ ᐳᕋᐅᓐ ᐃᖅᑲᓇᐃᔮᒥᓂᒃ ᓄᖅᑲᕐᓂᐊᓕᖅᑐᖅ ᐊᐃᕆᓕ 11, 2021-ᖑᓕᖅᐸᑦ, ᒫᓐᓇ ᒥᓂᔅᑕᐅᑉ ᑐᒡᓕᐊ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓂ ᑳᓐᔅᑕᓐᔅ ᕼᐆᕆ ᐃᖅᑲᓇᐃᔮᖃᕈᓐᓃᓛᖅᖢᓂ ᐊᐃᕆᓕ 16, 2021−ᖑᓕᖅᐸᑦ.

ᓯᕗᓕᖅᑎ ᓴᕕᑲᑕᖅ ᖁᔭᓕᕗᖅ ᑕᒪᐃᓐᓂᒃ ᐱᔨᑦᑎᕋᖃᑦᑕᕐᓂᖏᓐᓄᑦ ᓯᕗᓕᖅᑎᐅᖃᑦᑕᕐᓂᖏᓐᓄᓪᓗ ᐃᖅᑲᓇᐃᔭᖅᑎᐅᑎᓪᓗᒋᒃ ᑕᒪᕐᒥᒡᓗ ᓯᕗᒻᒧᐊᑦᑎᐊᖁᕙᖏᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ
867-975-5059
@email