ᓄᓇᕗᑦ ᖁᕕᐊᓱᑎᖃᖅᐳᖅ ᐊᕐᕌᒍᒥ ᐃᓗᐊᖅᓴᐃᔨ ᐊᒻᒪ ᐃᕐᓂᓱᒃᓰᔨ
ᑕᒪᑐᒪᓂ ᐊᕐᕌᒍᒥ, ᓄᓇᕗᒻᒥ ᒐᕙᒪᖓᑦ ᐱᖃᑕᐅᔪᑦ ᓄᓇᕐᔪᐊᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑎᒥᖁᑖᓂᒃ ᓴᖅᑭᑎᑦᑎᓗᑎᒃ ᐊᐃᑦᑑᑎᓂᒃ ᑕᐃᒃᑯᓄᖓ ᐱᔨᑦᑎᖅᑐᓄᑦ ᐱᐅᓯᒋᐊᕐᓗᒍ ᐋᓐᓂᐊᖃᖅᑕᐃᓕᒪᓂᖅᐳᑦ ᐊᕐᕌᒍᖓᓂ ᐃᓗᐊᖅᓴᐃᔨ ᐊᒻᒪ ᐃᕐᓂᓱᒃᓰᔨ.
“ᐃᓗᐊᖅᓴᐃᔨᑦ ᐃᕐᓂᓲᒃᓰᔨᓪᓗ ᐱᑎᑦᑎᖃᑕᐅᔪᑦ ᐋᖅᑭᒃᓱᕐᓗᒍ ᑲᒪᒋᔭᐅᓂᖏᑦ ᓄᓇᕗᒻᒥᐅᑦ ᐱᖃᑦᑕᖅᑕᖏᑦ. ᐃᖅᑲᓇᐃᔭᖅᑎ ᓯᕗᓪᓕᕐᒥᑦ ᐅᐸᒃᑕᐅᕙᒃᑐᓂᑦ ᑐᐊᕕᕐᓇᖅᑐᓄᓪᓗ ᑲᒪᔨᓄᑦ, ᐅᖁᒪᐃᓐᓂᕐᓂᐊᕐᕕᒃ ᐊᑐᐊᒐᓪᓗ, ᐱᓕᕆᖃᑦᑕᖅᑐᑦ ᑲᒪᓂᕐᓂ, ᐃᒃᐱᒍᓱᑦᑎᐊᕐᓂᕐᓂ ᑐᓂᓯᒪᑦᑎᐊᕐᓂᕐᒥᒃᓗ ᑭᒃᓕᖃᙱᑦᑐᓂᑦ, ᖁᔭᒋᑦᑎᐊᖅᐸᒃᑲᓗ ᑐᓂᓯᒪᓂᖏᓐᓄᑦ,” ᐅᖃᖅᑐᖅ ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔪᐊᔾ Hᐃᒃᔅ.
ᕿᑭᖅᑕᓂ ᐋᓐᓂᐊᕕᖕᒥ 24-ᖑᔪᓂᒃᓗ ᓄᓇᓕᖕᓂ ᐋᓐᓂᐊᕕᖕᓂ, ᐅᖓᑖᓂ 300 ᐃᓗᐊᖅᓴᐃᔨᑦ ᖁᓕᓪᓗ ᐃᕐᓂᓱᒃᓰᔨᑦ ᐱᓕᕇᓐᓇᖃᑦᑕᖅᑐᑦ ᑕᖃᓱᐃᑦᑑᓪᓗᑎᒃ ᐱᖁᓪᓗᒋᑦ ᓄᓇᕗᒻᒥᐅᑦ ᐱᐅᓛᒥᒃ ᑲᒪᒋᔭᐅᓂᕐᓂ.
2020-ᒥ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓴᖅᑭᔮᖅᑎᑦᑎᓂᐊᖅᑐᑦ ᐊᐃᑦᑑᑎᓂᑦ, ᐊᔾᔨᒌᙱᕈᓘᔭᕐᓃᑦ ᐱᐅᓯᕆᔭᐅᕙᓚᐅᖅᑐᓪᓗ ᐃᓗᐊᖅᓴᐃᓕᕆᓂᕐᓄᑦ ᐃᕐᓂᓱᒃᓰᔨᓄᓪᓗ ᓄᓇᕗᒻᒥ, ᑲᔪᓯᑎᑦᑎᓂᓂᕐᓗ ᐃᓄᖕᓂᒃ ᓲᕐᓗ ᕐᑳᐱᒃ ᐊᑕᒍᑦᑎᐊᖅ ᐃᒃᐱᐊᕐᔪᖕᒥᐅᑕᖅ, ᐱᖅᑯᓯᑐᖃᒃᑯᑦ ᐃᓅᓪᓗᓂ ᐃᕐᓂᓱᒃᓰᔨ ᐊᒻᒪ ᑯᐄᓐ ᐃᓕᓴᐱ II ᐊᓕᒎᔭᕐᒥᒃ ᖁᕕᐊᓲᑎᖃᕐᓂᕐᒧᑦ ᐅᔭᒥᖕᒥᒃ ᐱᔪᒃᓴᐅᑎ. ᐊᑕᒍᑦᑎᐊᖅ ᐃᕐᓂᑎᑦᑎᓯᒪᔪᖅ Hᐋᓐᓇᓚ ᐅᖓᑎᖏᓐᓃᑦᑐᓂᒃ ᓄᑕᕋᓛᖅᑖᑦᑎᑦᑎᓪᓗᓂ ᓄᓇᕗᒻᒥ ᐃᑲᔪᖅᓯᒪᓪᓗᓂᓗ ᓴᓇᔭᐅᓂᖓᓂᒃ ᐊᑲᐅᓯᕕᒃ ᐃᓄᐃᑦ ᖃᑕᙳᑎᒌᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᓕᕆᖃᑎᒌᓂᑦ ᐋᓐᓂᐊᕕᓯᐅᑎᓄᓪᓗ ᐅᐸᒐᕐᒥᑦ ᐋᑐᕚᒥ.
ᐅᖃᐅᓯᖃᕐᓂᒃᑯᑦ ᑖᒃᑯᓂᖓ ᐅᓂᒃᑳᓂᑦ ᓴᖅᑭᔮᖅᑎᑦᑎᓂᒃᑯᓪᓗ ᐱᓪᓚᕆᐅᓂᖏᓐᓂᒃ ᐃᖅᑲᓇᐃᔭᖏᑦ ᐃᓗᐊᖅᓴᐃᔨᑦ ᐃᕐᓂᓱᒃᓰᔨᓪᓗ ᐱᓕᕆᐊᖏᓐᓂ ᓄᓇᓕᑦᑎᓐᓂ, ᓄᓇᕗᒻᒥ ᒐᕙᒪᖓᑦ ᓂᕆᐅᖕᓂᖃᖅᐳᖅ ᑎᓕᐅᕆᒃᑲᓐᓂᕐᓗᒋᑦ ᓄᓴᕗᒻᒥᐅᑦ ᐱᒋᐊᕐᓗᑎᒃ ᐃᖅᑲᓇᐃᔮᕆᔪᒪᔭᖏᓐᓂᒃ ᐃᓗᐊᖅᓴᐃᔨᐅᓂᕐᒥᒃ ᐃᕐᓱᒃᓰᔨᐅᓂᕐᒥᒃᓗ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᑯᕆᔅ ᐴᒡᓕᐊ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5762
@email