ᓄᓇᕗᑦ ᓇᓗᓇᐃᔭᑦᑎᐊᕈᒪᕗᖅ ᑲᓇᑕᒥ ᒐᕙᒪᒃᑯᑦ ᑮᓇᐅᔭᖅᑑᑎᒃᓴᖏᓐᓂᒃ ᐃᒡᓗᓕᕆᓂᕐᒧᑦ ᐊᒻᒪ ᐅᑭᐅᖅᑕᖅᑐᒥ ᐊᐅᓚᔪᓐᓇᐅᑎᓄᑦ
ᐃᖃᓗᐃᑦ, ᓄᓇᕗᑦ (ᐊᐃᕆᓕ 16, 2024) – ᓄᓇᕗᒻᒥ ᓯᕗᓕᖅᑎ ᐲᔾᔭᐃ ᐊᕿᐊᕈᖅ ᐊᒻᒪ ᑮᓇᐅᔭᓕᕆᔨᒃᑯᓐᓄᑦ ᒥᓂᔅᑕ ᖁᐊᓴ ᑯᓱᒐᖅ ᐅᖃᖅᐳᑦ ᓄᓇᕗᑦ ᒐᕙᒪᒃᑯᑦ ᐅᑕᖅᑭᖕᒪᑕ ᐃᓗᓕᖏᓐᓂᒃ ᑮᓇᐅᔭᑦ ᐅᖃᐅᓯᐅᖅᑲᐅᔪᓂᒃ ᐅᓪᓗᒥ 2024-25−ᒥ ᑲᓇᑕᒥ ᑮᓇᐅᔭᑦ ᐊᑐᖅᑐᒃᓴᓂᒃ ᐃᒡᓗᓕᕆᓂᕐᒧᑦ, ᓱᕈᖅᑎᕆᓗᐊᙱᑦᑐᓄᑦ ᐆᒻᒪᖅᑯᑎᑐᕈᓯᕐᓄᑦ ᐊᒻᒪ ᐊᐅᓚᔪᓐᓇᐅᑎᓄᑦ ᐊᒃᑐᐊᓂᓕᖕᓄᑦ ᑲᓇᑕᒥ ᓇᖕᒥᓂᕆᔭᐅᔪᒧᑦ ᐊᒻᒪ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᐅᑭᐅᖅᑕᖅᑐᒥ.
"ᑮᓇᐅᔭᑦ ᐊᑐᖅᑐᒃᓴᑦ 2024-2025−ᒥ ᑐᓴᖅᑎᑦᑎᓚᐅᖅᐳᑦ ᖃᔅᓯᑲᓪᓚᖕᓂ−ᐊᑐᖅᑐᓂᒃ ᐊᐅᓚᔪᓐᓇᐅᑎᓄᑦ ᑮᓇᐅᔭᓂᒃ ᐃᑲᔫᑕᐅᓪᓗᑎᒃ ᑕᐅᑐᖅᑰᖅᑕᐅᔪᒧᑦ ᓇᓗᓇᐃᖅᑕᐅᓯᒪᔪᖅ ᐱᓕᕆᐊᒃᓴᑦᑎᓐᓂ ᓄᓇᕗᒻᒥ ᓄᓇᓕᓕᒫᑦ ᓴᙱᔫᓂᖏᓐᓂᒃ, ᓇᖕᒥᓂᖅᓱᕈᓐᓇᕐᓂᖏᓐᓂᒃ ᐊᒻᒪ ᒪᑭᑕᔪᓐᓇᑦᑎᐊᕐᓂᖏᓐᓂᒃ," ᓯᕗᓕᖅᑎ ᐊᕿᐊᕈᖅ ᐅᖃᓚᐅᖅᐳᖅ.
"ᖃᐅᔨᔪᒪᑦᑎᐊᖅᑐᒍᑦ ᐃᓗᓕᖏᓐᓂᒃ ᖃᓄᖅ ᑖᒃᑯᐊ ᐱᓕᕆᐊᒃᓴᑦ ᐃᑲᔫᑕᐅᓂᐊᕐᒪᖔᑕ ᓇᓕᒧᒌᒃᑎᓪᓗᒋᑦ ᑕᐅᑐᖅᑰᖅᑕᕗᑦ ᓄᓇᕗᒻᒧᑦ ᑲᓇᑕᒥ ᐊᖏᕈᑕᐅᓯᒪᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᑕ ᐱᒋᔭᐅᓂᖓᓄᑦ ᐊᒻᒪ ᓴᐳᔾᔭᐅᓯᒪᓂᖓᓄᑦ. ᓯᕗᒻᒧᐊᒃᑎᓪᓗᑕ ᓄᓇᕗᒻᒥ ᓄᓇᖁᑎᓂᒃ ᐊᒻᒪ ᓄᓇᒥᐅᑕᓂᒃ ᓇᖕᒥᓂᖅᓱᕐᓂᕐᒧᑦ ᐊᖏᖃᑎᒌᒍᑎᒥᒃ, ᐱᓕᕆᐊᒃᓴᓂᒃ ᐱᔨᑦᑎᕋᐅᑎᓂᓪᓗ ᓴᙱᒃᑎᒋᐊᕈᑕᐅᓂᐊᖅᑐᓂᒃ ᓄᓇᕗᒻᒥ ᐱᕙᒌᔭᑦᑎᐊᕐᓂᖅᓴᐅᓕᕐᓂᐊᖅᐳᒍᑦ ᐊᒃᓱᕈᕐᓇᖅᑐᓄᑦ ᓯᕗᓂᒃᓴᑦᑎᓐᓂ ᐊᒻᒪ ᓄᓇᕗᒻᒥᐅᑦ ᐃᑲᔪᑦᑎᐊᕈᓐᓇᖅᓯᓗᑎᒃ ᓄᓇᓕᑦᑎᓐᓄᑦ, ᓄᓇᕗᒻᒧᑦ ᐊᒻᒪ ᑲᓇᑕᒧᑦ," ᑕᐃᒪᓐᓇ ᐅᖃᖅᖢᓂ.
ᐃᒡᓗᓕᕆᓂᖅ ᑲᒪᒋᔭᐅᓪᓗᐊᑕᖅᓯᒪᔪᖅ ᑲᓇᑕᒥ ᒐᕙᒪᒃᑯᑦ ᑮᓇᐅᔭᓂᑦ ᐊᑐᖅᑐᒃᓴᖏᓐᓂᑦ ᐃᓚᒋᔭᐅᓪᓗᑎᓪᓗ ᐃᑲᔪᕈᒪᓪᓗᒋᑦ ᓇᖕᒥᓂᖅ ᐃᒡᓗᖃᖅᑏᑦ ᐊᑭᖏᓐᓄᑦ ᓂᐅᕕᖅᑎᓪᓗᒋᑦ ᓯᕗᓪᓕᖅᐹᒥ ᐊᖏᕐᕋᖏᓐᓂᑦ, ᐊᒻᒪ ᑲᔪᖏᖅᓴᐅᑎᒃᓴᑦ ᐃᒡᓗᓕᕆᓂᕐᒧᑦ ᐱᕙᓪᓕᐊᑎᑦᑎᔨᓄᑦ ᓴᓇᔪᓐᓇᕐᓗᑎᒃ ᓄᑖᓂᑦ ᐊᑭᑐᓗᐊᙱᑦᑐᓂᑦ ᐃᒡᓗᓂᑦ.
"ᐱᓕᐊᓐ ᓄᑖᑦ ᐃᒡᓗᓕᕆᓂᕐᒧᑦ ᑮᓇᐅᔭᑦ ᑲᓇᑕᒥ ᐃᒡᓗᓕᐅᖅᑐᑦ ᐱᓕᕆᐊᖑᑎᓪᓗᒍ ᐊᑐᐃᓐᓇᐅᑎᑦᑎᓂᐊᖅᐳᖅ ᓄᓇᕗᒻᒥ ᐊᑭᑐᓗᐊᙱᑦᑐᓂᒃ ᐃᒡᓗᒃᓴᓂᒃ ᓇᓗᓇᐃᖅᓯᒪᔪᑦ ᐃᒡᓗᓕᐅᖃᑎᒌᖕᓂᖅ ᓄᓇᕗᒻᒥ 3000-ᒧᑦ ᖃᓄᐃᓕᐅᕈᑕᐅᔪᒪᔪᓂᒃ," ᐅᖃᓚᐅᖅᐳᖅ ᖁᐊᓴ ᑯᓱᒐᖅ, ᑕᒪᕐᒥᒃ ᐱᓕᕆᐊᒃᓴᖏᑦ ᑮᓇᐅᔭᓕᕆᔨᒃᑯᑦ ᒥᓂᔅᑕᖓᓐᓄᑦ ᐊᒻᒪ ᒥᓂᔅᑕᒧᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ. "ᒐᕙᒪᕗᑦ ᐱᓕᕆᖃᑎᖃᑦᑎᐊᕐᓂᐊᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐱᕕᒃᓴᖃᕐᓂᓕᒫᖏᓐᓂᒃ ᐊᑐᐃᓐᓇᐅᑎᑦᑎᖁᓪᓗᒋᑦ ᐃᒡᓗᒃᓴᓂᒃ ᓄᓇᕗᒻᒥᐅᓄᑦ."
2024-25−ᒥ ᑲᓇᑕᒥ ᑮᓇᐅᔭᑦ ᐊᑐᖅᑐᒃᓴᑦ ᐱᔭᒃᓴᐅᔪᑦ ᑲᓇᑕᒥ ᒐᕙᒪᒃᑯᑦ ᐃᑭᐊᖅᑭᕕᖓᓐᓂ.