ᓄᓇᕗᑦ ᒐᕙᒪᒃᑯᑦ ᓇᓗᓇᐃᖅᓯᕗᑦ ᐊᐃᑉᐱᖅᓯᒪᓕᕐᓂᖓᓂᒃ ᓄᕙᕐᔪᐊᕐᓇᖅ-19ᒧᑦ ᐋᓐᓂᐊᓕᖅᑐᒥᒃ ᓴᓂᑭᓗᐊᕐᒥᑦ
ᓄᓇᕗᑦ ᒐᕙᒪᒃᑯᑦ ᓇᓗᓇᐃᖅᓯᕗᑦ ᐊᐃᑉᐱᖅᓯᒪᓕᕐᓂᖓᓂᒃ ᓄᕙᕐᔪᐊᕐᓇᖅ-19ᒧᑦ ᐋᓐᓂᐊᓕᖅᑐᒥᒃ ᓴᓂᑭᓗᐊᕐᒥᑦ
ᐃᖃᓗᐃᑦ, ᓄᓇᕗᑦ (ᓅᕖᕝᕙ 8, 2020) − ᓘᒃᑖᖅ. ᒪᐃᑯᓪ ᐹᑐᓴᓐ, ᓄᓇᕗᒻᒥ ᓘᑦᑕᑦ ᐊᖓᔪᖅᑳᖓ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂ, ᓇᓗᓇᐃᖅᓯᓯᒪᓕᖅᐳᖅ ᐊᐃᑉᐱᖅᓯᒪᓕᕐᒪᑦ ᓄᕙᒡᔪᐊᕐᓇᖅ-19−ᒥᒃ ᖃᐅᔨᓴᖅᑕᐅᔾᔪᑎᖓ ᓇᓗᓇᐃᖅᑕᐅᔪᖅ ᐋᓐᓂᐊᓕᖅᓯᒪᔪᖃᕐᓂᖓᓂᒃ ᓴᓂᑭᓕᐊᕐᒥᑦ.
"ᑖᓐᓇ ᐃᓄᒃ ᐃᓪᓗᒥᐅᖃᑎᒋᔭᐅᔪᖅ ᓯᕗᓪᓕᕐᒧᑦ ᓇᓗᓇᐃᖅᑕᐅᓚᐅᖅᑐᒧᑦ ᐋᓐᓂᐊᓕᖅᓯᒪᔪᒧᑦ, ᑖᓐᓇ ᐋᓐᓂᐊᔪᓄᑦ ᖃᓄᐃᒍᑕᐅᕙᑦᑐᓂᑦ ᖃᐅᔨᒪᔾᔪᑎᒋᔭᐅᔪᓂᑦ ᐊᑐᙱᑦᑐᖅ, ᐃᓅᑎᑕᐅᔪᖅ ᐊᒻᒪ ᖃᓄᐃᙱᑦᑐᓂ," ᐅᖃᖅᐳᖅ ᓘᑦᑖᖅ. ᐹᑐᓴᓐ.
ᓅᕖᕝᕙ 7ᒥᑦ, ᑖᒃᑯᐊ ᐋᓐᓂᐊᓯᐅᖅᑎᒃᑯᑦ ᑐᐊᕕᕐᓇᖅᑐᓕᕆᔨᖏᑦ ᐊᑕᐅᓯᒥᑦ ᐋᓐᓂᐊᓯᐅᖅᑎᒥ ᐊᒻᒪ ᐊᑕᐅᓯᖅ ᐃᖅᑲᓇᐃᔭᖅᑎᖓ ᖃᐅᔨᓴᕈᑎᓕᕆᔨ ᓴᓂᑭᓗᐊᕐᒨᓚᐅᖅᑐᑦ ᐃᑲᔪᕆᐊᖅᑐᑎᒃ ᑕᐃᑯᓂᖓ ᑕᐃᑲᓃᑉᐸᒌᖅᑐᓄᑦ ᐋᓐᓂᐊᓯᐅᖅᑎᒃᑯᖏᓐᓄᑦ ᓄᓇᖓᓐᓂᒃ. ᐅᓪᓗᒥᒃ, 11 ᐃᓄᐃᑦ ᓇᓗᓇᐃᖅᑕᐅᓯᒪᓕᖅᑐᑦ ᑖᒃᑯᐊ ᖃᐅᔨᓴᖅᑕᐅᖃᑕᐅᓕᖅᑐᑦ ᑲᑎᓯᓯᒪᓚᐅᕐᓂᖏᓐᓄᑦ. ᐱᓕᕆᖃᑎᒌᑦ ᐋᓐᓂᐊᓯᐅᖅᑏᑦ ᖃᐅᔨᓴᖅᑕᐅᐸᓪᓕᐊᔪᑦ ᐊᐃᑦᑐᖅᑕᐅᖃᑕᐅᑐᐃᓐᓇᕆᓕᓐᓂᑦ ᐊᒻᒪ ᑲᑎᔭᐅᖃᑕᐅᓯᒪᔪᓂᑦ ᓱᓕ ᖃᐅᔨᓴᖅᐸᓪᓕᐊᔪᑦ. ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᐊᖑᕙᓪᓕᐊᔪᑦ ᐊᑐᓕᖅᑎᑕᐅᔪᑦ ᓅᕖᕝᕙ 7ᒥᑦ, ᐃᓚᒋᔭᐅᓪᓗᓂ ᐊᐅᓪᓚᖃᑦᑕᕐᓂᐅᔪᖅ ᑕᐃᑯᖓ ᐊᒻᒪ ᑕᐃᑲᙵᑦ ᓄᓇᓕᒻᒥᑦ ᐊᒻᒪᓗ ᑭᓪᓕᖃᑎᑕᐅᓂᖏᑦ ᑲᑎᙵᖃᑦᑕᖅᑐᓄᑦ ᓱᓕ ᒪᓕᑦᑕᐅᔭᕆᐊᓖᑦ.
"ᒫᓐᓇ ᓇᓗᓇᐃᕈᑎᒃᓴᓚᑦᑖᒥᑦ ᐱᑕᖃᖅᑎᓐᓇᒍ ᓯᐊᒻᒪᒃᓯᒪᓕᕐᒪᖔᖅ ᓄᓇᓕᒻᒥ, ᓴᓂᑭᓗᐊᕐᒥᐅᑦ ᐅᖃᐅᑎᕙᒃᑲ ᒪᓕᑦᑎᐊᕋᓱᐊᖏᓐᓇᖁᓪᓗᒋᑦ ᓱᓕ ᑕᒪᒃᑯᓂᖓ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒪᓕᑦᑕᐅᔪᔅᓴᓕᐊᖑᓯᒪᔪᓂᑦ. ᐱᒻᒪᕆᐅᓂᖓ ᑖᔅᓱᒪ ᑭᒃᑯᑐᐃᓐᓇᕐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒪᓕᑦᑕᐅᖁᔭᐅᔪᑦ ᓈᓚᑦᑕᐅᔭᕆᐊᖃᓪᓚᕆᓐᓂᖓ ᓱᓕᔪᕆᖏᓪᓗᒍ ᐱᔭᕆᐊᖃᖏᒻᒪᑦ. ᐊᖏᕐᕋᖅᓯᒪᓗᓯ, ᐳᓚᕋᙱᓪᓗᓯᓗ ᐊᒻᒪ ᒪᑐᐊᕐᒥᑦ ᐊᑐᕐᓗᓯ ᑭᒃᑯᑐᐃᓐᓇᕐᓄᑦ ᐅᐸᑦᑕᐅᖃᑦᑕᖅᑐᓅᕈᔅᓯ ᓲᕐᓗ ᓂᐅᕕᕐᕕᓐᓄᑦ. ᐅᕙᒍᑦ ᑲᑐᔾᔨᓗᑕ ᑕᒪᓐᓇ ᓄᖅᑲᖓᑎᑦᑐᓐᓇᖅᑕᕗᑦ ᓯᐊᒻᒪᒃᑲᓐᓂᕈᓐᓃᖅᑎᓪᓗᑎᒍᑦ ᓄᓇᓕᒻᒥ," ᐅᖃᖅᑐᖅ ᓘᑦᑖᖅ. ᐹᑐᓴᓐ.
ᑭᓇᑐᐃᓐᓇᖅ ᐊᐃᑦᑐᖅᑕᐅᓯᒪᓇᓱᒋᑉᐸᑦ ᓄᕙᒡᔪᐊᕐᓇᖅ-19−ᓕᖕᒧᑦ ᐅᖃᐅᔾᔨᖁᔭᐅᕗᖅ ᐅᖄᓚᓗᓂ ᓄᕙᒡᔪᐊᕐᓇᖕᒧᑦ ᐅᖄᓚᕕᒻᒧ ᐅᕗᖓ 1-888-975-8601 ᐅᑯᐊ ᐃᑲᕐᕋᖏᓐᓂᑦ 10ᒥ ᐅᓪᓛᒃᑯᑦ ᐊᒻᒪᓗ 6ᒧ ᐅᓐᓄᒃᑯᑦ. ᑲᓇᓐᓂᕐᒥᑦ ᐅᕙᓗ ᓄᓇᓕᓐᓂᑦ ᐋᓐᓂᐊᕕᔅᓯᓐᓄᑦ ᖃᐅᔨᒃᑲᐅᑎᑦᑕᐅᑎᒋᓗᑎᑦ. ᐋᓐᓂᐊᕕᓕᐊᖅᑕᐃᓕᒋᑦ ᐅᐸᒡᓗᒍ.
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ
ᑯᕆᔅ ᐴᒡᓕᐊ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᓂᖕᓄᑦ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐱᓕᕆᕝᕕᖓ
867-975-5949
@email