ᓇᓗᓇᐃᖅᑕᐅᔪᖃᖅᑐᖅ ᓄᕙᔾᔪᐊᕐᓇᖅᑐᓕᒻᒥᒃ 19 ᓄᓇᕗᒻᒥ
ᓴᖅᑭᖅᑎᑕᐅᑦᓴᐅᑎᒋᒋᐊᓕᒃ
ᓇᓗᓇᐃᖅᑕᐅᔪᖃᖅᑐᖅ ᓄᕙᔾᔪᐊᕐᓇᖅᑐᓕᒻᒥᒃ 19 ᓄᓇᕗᒻᒥ
ᐃᖃᓗᐃᑦ, ᓄᓇᕗᑦ (ᐃᐳᕈ 30, 2020) − ᓘᑦᑖᖅ ᒪᐃᑯᓪ ᐹᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᔪᖅᑳᖅ, ᓇᓗᓇᐃᖅᓯᓯᒪᓕᖅᑐᖅ ᓯᕗᓪᓕᖅᐹᒥᒃ ᓄᕙᔾᔪᐊᕐᓇᖅᑐᑖᖅᓯᒪᔪᒥᒃ 19 ᒥᑦᑎᒪᑕᓕᒃ, ᓄᓇᕗᒻᒥ.
“ᓂᕆᐅᓚᐅᖅᑐᒍᑦ ᖃᖓᑐᐃᓐᓇᖅ ᓄᓇᕗᒻᒥ ᓇᓗᓇᐃᖅᑕᐅᓯᒪᔪᒥᒃ ᓄᕙᔾᔪᐊᕐᓇᖅᑐᑕᖃᓕᓛᕐᓂᖓᓂᒃ, ᐅᒡᒍᕐᓇᖅᑐᓂᓗ ᐅᓪᓗᒥ ᑕᒡᒐ ᓇᓗᓇᐃᖅᑕᐅᔪᖃᖅᑯᖅ,” ᐅᖃᖅᓯᒪᔪᖅ ᐹᑐᓴᓐ. “ᐱᒋᐊᖅᑎᑦᓯᓯᒪᔪᒍᑦ ᑲᑎᓯᒪᔭᖏᓐᓂᒃ ᓇᓗᓇᐃᔭᐃᕙᓪᓕᐊᓂᕐᒥᒃ ᓄᓇᓕᓐᓂ ᐊᒻᒪᓗ ᕿᓚᒥᐅᔪᒃᑯᑦ ᑲᒪᒋᔨᕗᑦ ᒥᑦᑎᒪᑕᓕᒻᒨᖅᐸᓪᓕᐊᓕᖅᑐᑦ, ᐃᑉᐱᒋᔭᖃᕆᐊᖅᑐᕐᓗᑎᒃ ᓇᓗᓇᐃᖅᓯᓯᒪᒋᐊᖅᑐᕐᓗᑎᓪᓗ ᓄᓇᓕᓐᓂ ᐊᑕᖏᖅᑐᓂᒃ ᐃᑲᔫᑎᑦᓴᓂᒃ ᐊᑐᐃᓐᓇᖃᕐᕕᐅᖁᓪᓗᒋᑦ ᐊᐅᓚᑦᓯᒍᓐᓇᖁᓪᓗᒋᑦ ᑕᒪᑐᒥᖓ.”
ᑖᓐᓇ ᐃᓄᑑᑎᑕᐅᓪᓗᓂ ᐊᓂᑦᑕᐃᓕᑎᑕᐅᔪᖅ ᖃᓄᐃᙱᑦᑐᓂᓗ. ᐊᑕᖏᖅᑐᒋᑦ ᑎᑭᖃᑦᑕᖅᑐᑦ ᐊᐅᓪᓚᖃᑦᑕᖅᑐᑦ ᒥᑦᑎᒪᑕᓕᒻᒥᒃ ᐃᓱᓕᑦᑕᕐᕕᑖᖅᑎᑕᐅᔪᑦ, ᐋᒡᒐᑐᐊᖅ ᐱᖁᑏᑦ ᐊᒻᒪᓗ ᑐᐊᕕᕐᓇᖅᑐᒃᑯᑦ ᐊᐅᓪᓚᕆᐊᓖᑦ. ᐃᓚᒋᔭᐅᓪᓗᑎᒃ ᓄᓇᒃᑯᑦ ᓄᓇᓕᓐᓄᑦ ᑎᑭᖃᑦᑕᕆᐊᖃᙱᑦᑐᑦ.
ᑭᓇᑐᐃᓐᓇᖅ ᐱᔾᔪᑎᖃᕈᓂ ᓱᓕᔪᖅᓴᕈᓂ ᓴᐳᒻᒥᔭᐅᓯᒪᒐᓂ ᓴᖅᑭᔮᕐᕕᐅᓐᓂᕆᐊᒥᒃ ᓄᕙᔾᔪᐊᕐᓇᖅ 19-ᒥᒃ ᐅᖄᓚᖁᔭᐅᔪᑦ COVID-ᐅᖓᓯᑦᑐᒥᒃ ᐊᑭᖃᙱᑦᑐᒧᑦ 1-888-975-8601-ᒧᑦ ᐊᑯᓐᓂᖓᓂ 10 ᐅᓪᓛᓴᒃᑯᑦ ᐊᒻᒪᓗ 6 ᐅᓐᓄᕋᑖᒃᑯᑦ, ᖃᐅᔨᒃᑲᕐᓗᒋᓪᓘᓐᓃᑦ ᓄᓇᑦᓯᓐᓂᒃ ᐋᓐᓂᐊᕐᕕᒻᒥ ᕿᓚᒥᑦᓴᐅᑎᒋ, ᕿᓚᒥᑦᓴᐅᑎᒋᓗ ᐊᓂᑦᑕᐃᓕᓕᕐᓗᑎᑦ ᐊᖏᕐᕋᕐᓂ ᐅᓪᓗᓂᒃ 14-ᓂᒃ. ᐅᐸᒍᑎᙱᓪᓗᑎᑦ ᐋᓐᓂᐊᕐᕕᒻᒧᑦ.
“ᐅᐃᒪᔮᓕᖅᑐᖃᕆᐊᑐᙱᑦᑐᖅ. ᓄᓇᕗᒻᒥ ᐱᕕᖃᖅᓯᒪᒻᒪᑕ ᐅᐸᓗᖓᐃᔭᕐᓂᕐᒧᑦ, ᒫᓐᓇᐅᔪᕐᓗ ᑐᙵᕕᖃᑦᓯᐊᖅᑐᑕ ᐊᐅᓚᑦᓯᒍᓐᓇᖅᓯᔪᒍᑦ. ᐊᐱᕆᔭᕗᑦ ᑭᒃᑯᑐᐃᓐᓇᐃᑦ ᐸᓯᑦᓯᖃᑦᑕᖁᓇᒋᑦ, ᑲᙳᓵᕆᖃᑦᑕᖁᓇᒋᑦ ᐃᑲᔪᖅᓱᐃᖁᓪᓗᒋᓪᓗ ᓄᓇᓕᓐᓂᒃ ᓄᓇᖅᑲᑎᒥᓂᓪᓗ ᖄᖏᐅᑎᒍᓐᓇᖁᓪᓗᒋᑦ ᓄᕙᔾᔪᐊᕐᓇᖅ 19-ᒥᒃ ᓄᓇᕗᒻᒥ,” ᐅᖃᖅᓯᒪᔪᖅ ᓯᕗᓕᖅᑎ ᔫ ᓴᕕᑲᑖᖅ.
ᖃᓄᐃᒍᑎᐅᒍᓐᓇᖅᑐᑦ ᓄᕙᔾᔪᐊᕐᓇᕐᒧᑦ 19 ᐃᓚᖏᑦ ᐆᑎᕐᓇᕐᓗᑎᒃ, ᖁᐃᖅᓱᖃᑦᑕᕐᓗᑎᒃ ᐅᕝᕙᓘᓐᓃᑦ ᐃᐱᓂᐊᖃᑦᑕᕐᓗᑎᒃ. ᓴᐳᒻᒥᔭᐅᑦᓯᐊᖅᓯᒪᓂᖅᐹᖑᒍᓐᓇᖅᑐᑦ ᓯᐊᕐᒪᖅᑎᑦᓯᑦᑕᐃᓕᓂᕐᒥᒃ ᐅᕝᕙᓘᓐᓃᑦ ᓄᕙᔾᔪᐊᕐᓇᖅᑖᕈᓐᓇᓂᕐᒥᒃ ᐃᓅᖃᑎᒌᑦ ᖃᓂᒌᓗᐊᑦᑕᐃᓕᖃᑦᑕᕐᓗᑎᒃ, ᐊᒡᒐᑎᑦ ᐅᐊᓴᐃᓐᓇᖃᑦᑕᕐᓗᒋᑦ 20 ᓴᑲᓐᓯ ᐅᖓᑖᓄᑦ, ᖁᐃᖅᓱᖃᑦᑕᕐᓗᑎᑦ ᑕᒋᐅᖃᑦᑕᕐᓗᑎᓪᓗ ᑕᓕᓐᓄᑦ/ᐊᐃᓐᓄᑦ ᐊᖏᕐᕋᖅᓯᒪᖃᑦᑕᕐᓗᑎᓪᓗ ᑕᐃᒪᐃᒍᓐᓇᕐᓂᓕᒫᕐᓂ.
ᓄᑖᖑᓂᖅᐹᓂᒃ ᐊᑐᐃᓐᓇᕈᖅᑐᖃᕐᓂᐊᖅᑐᖅ ᐱᕙᓪᓕᐊᔪᓕᕆᔨᓂᒃ ᑐᓴᖅᑎᑦᓯᒋᐊᓕᖅᑲᑕ ᐅᓪᓗᒥᒋᐊᒃᑲᓐᓂᖅ.
###
ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:
ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
@email
ᑯᕆᔅ ᐳᓕᐊ
ᑐᓴᕋᑦᓴᓕᕆᓂᕐᒧᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5762
@email