ᑮᓇᐅᔭᒃᓵᓂᑦ ᐊᑐᖅᑐᐊᕐᓂᖅ

ᓄᓇᕗᒻᒥᐅᑦ ᐃᖅᑲᐃᓯᔭᐅᕗᑦ ᐊᑦᑕᕐᓇᖅᑐᒧᐊᕐᓇᕐᓂᖓᓄ ᑮᓇᐅᔭᒃᓵᓂᑦ ᐊᑐᖅᑐᐊᕐᓂᖅ. ᑮᓇᐅᔭᒃᓵᓂᑦ ᐊᑐᖅᑐᐊᕐᓂᖅ ᐊᑯᓂᐅᙱᑦᑐᒥᑦ ᐊᑐᖅᑐᐊᕐᕕᐅᕙᒃᑐᑦ ᐊᑭᑐᓂᖅᓴᒥᑦ ᐊᑮᑦᑐᖅᑖᖅᑎᑕᐅᓐᓇᖅᖢᓂ ᑖᒃᑯᓇᙵᑦ ᐊᑐᖅᑐᐊᕐᕕᐅᕙᒃᑐᓂᑦ ᐅᕝᕙᓘᓐᓃᑦ ᐊᑭᓕᒃᓴᖃᐅᑎᐅᔪᓂᑦ. ᑮᓇᐅᔭᒃᓵᓂᑦ ᐊᑐᖅᑐᐊᕐᓂᖅ ᐊᑭᓖᔭᕆᐊᖃᒐᔪᒃᑐᑦ ᒪᕐᕉᒃ ᐱᓇᓱᐊᕈᓯᐅᑉ ᐃᓗᐊᓂ, ᒪᓕᒡᓗᓂ ᐊᑐᖅᑐᐊᖅᑎᐅᑉ ᓇᓕᖅᑲᖓᓂ ᐊᑭᓕᖅᑕᐅᓚᐅᖅᑎᓪᓗᒋᑦ. ᐃᓚᒋᐊᖅᑕᐅᓗᓂ ᐊᑭᓕᒐᒃᓴᖅ ᐊᖏᕈᑕᐅᓯᒪᔪᒥᑦ ᒪᓕᑦᑎᐊᙱᒃᑯᓂ.

ᓄᓇᕗᒻᒥᐅᑦ ᓇᖕᒥᓂᖅ ᖃᐅᔨᒪᑦᑎᐊᖃᑦᑕᕆᐊᓖᑦ ᐊᑐᖅᑐᐊᕐᓂᐊᕈᑎᒃ ᑖᓐᓇ ᑎᒥ ᐊᑐᕐᕕᒋᓇᓱᐊᖅᑕᖓ ᐃᓕᓴᕆᔭᐅᓯᒪᒐᓗᐊᕐᒪᖔᑦ:

• ᑐᕌᕈᑎᖃᕐᓗᓂ, ᐅᖃᓘᑎᒃᑯᑦ ᐃᑲᔪᖅᑕᐅᔪᓐᓇᕐᓗᓂ, ᐅᕝᕙᓘᓐᓃᑦ ᖃᕆᓴᐅᔭᒃᑯᑦ ᑎᑎᕋᖃᑦᑕᐅᑎᔪᓐᓇᕐᓗᓂ.
• ᑮᓇᐅᔭᓂᒃ ᐊᑭᓕᖅᑕᐅᕙᒌᕆᐊᖃᙱᓪᓗᑎᒃ, ᐊᑭᓕᕆᐊᓖᑦ ᐊᑭᓕᖅᑕᐅᔭᕆᐊᖃᕐᒪᑕ ᐊᑐᖅᑐᐊᖅᑕᐅᔪᒥᑦ.
• ᖃᓄᖅ ᐊᑐᖅᑐᐊᖅᑕᐅᔪᑦ ᐊᑐᖅᑕᐅᔪᓐᓇᕐᒪᖔᑕ ᐅᖃᖅᐸᙱᑦᑐᑦ.
• ᑎᑎᕋᖅᓯᒪᖃᑕᐅᓪᓗᓂ ᑲᓇᑕᒥ ᓇᓗᓇᐃᖅᑕᐅᓯᒪᔪᓂᒃ ᐃᓕᓴᕆᔭᐅᓯᒪᓪᓗᑎᒃ ᐊᑐᖅᑐᐊᖅᑎᐅᕙᒃᑐᑦ ᑲᓇᑕᒥᐅᓄᑦ.

ᖁᑦᑎᒃᑐᒥᑦ ᖄᒃᑲᓐᓂᐊᒍᑦ ᐊᑭᓕᕆᐊᓖᑦ ᐊᒻᒪ ᐃᓚᒋᐊᖅᑕᐅᔪᓐᓇᖅᑐᑦ ᐊᑭᓕᕆᐊᓖᑦ ᑮᓇᐅᔭᒃᓵᓂᑦ ᐊᑐᖅᑐᐊᕐᓂᖅ ᐊᔪᕐᓇᖅᑐᖅᓯᐅᒃᑲᓐᓂᕈᓐᓇᖅᐳᖅ ᐊᑭᓖᓂᕐᒧᑦ, ᐱᔾᔪᑕᐅᔪᓐᓇᖅᑐᖅ ᐃᓚᒋᐊᖅᑕᐅᓗᓂ ᑮᓇᐅᔭᑎᒍᑦ ᐊᔪᕐᓇᖅᑐᖅᓯᐅᕐᓂᕐᒧᑦ ᐊᒻᒪ ᐊᒃᓱᕈᕐᓇᖅᑐᖅᓯᐅᕐᓗᓂ. ᐱᒻᒪᕆᐅᕗᖅ ᑲᑎᓪᓗᒋᑦ ᐊᑭᓖᔭᕆᐊᖃᖅᑐᑦ ᐊᑐᖅᑐᐊᕐᕕᖕᒥᑦ, ᐊᑐᖅᑐᐊᖅᑕᑎᑦ, ᐊᑭᓕᒐᒃᓴᖏᓪᓗ, ᐊᒻᒪ ᖄᒃᑲᓐᓂᐊᒍᑦ ᐊᑭᓕᕆᐊᓖᑦ ᓇᓗᓇᐃᔭᑦᑎᐊᖅᓯᒪᓗᓂ ᓂᐅᕕᖅᐸᒃᑐᒧᑦ. ᓂᐅᕕᖅᐸᒃᑐᑦ ᐅᔾᔨᖅᓱᕆᐊᓖᑦ ᐊᑭᓖᔭᕆᐊᓖᑦ ᐊᑭᓕᓱᙱᓪᓗᒋᑦ ᐊᖏᕈᑕᐅᓯᒪᔪᑎᒍᑦ ᐱᑎᑕᐅᔪᓐᓇᖅᑐᖅ ᑲᔪᓯᑎᑕᐅᖏᓐᓇᖅᑐᒥᑦ ᑲᑎᑉᐸᓪᓕᐊᓗᓂ ᖄᒃᑲᓐᓂᐊᒍᑦ ᐊᑭᓕᖅᓱᕆᐊᓕᖕᓂᑦ, ᐊᔪᕐᓇᖅᑐᖅᓯᐅᕈᑕᐅᔪᓐᓇᖅᑐᖅ ᐊᑭᓖᓂᕐᒧᑦ ᐊᑭᓕᒐᒃᓴᑎᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᐊᑐᖅᑐᐊᕐᓂᓕᕆᓂᕐᒧᑦ, ᖃᐅᔨᒋᐊᕈᓐᓇᖅᐳᑎᑦ ᓂᐅᕕᐊᒃᓴᖃᖅᑐᓕᕆᔨᒃᑯᑦ  ᐅᕙᓂ @email ᐅᕝᕙᓘᓐᓃᑦ 1-866-223-8139 (ᐊᑭᖃᙱᑦᑐᖅ).