ᐃᖅᑲᐃᓯᔾᔪᑎ: ᐳᕙᒃᑯᑦ ᖃᓂᒪᓐᓇᖅ ᓄᕙᖕᓇᕐᓗ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᐅᔾᔨᕗᑦ ᓄᓇᕗᒻᒥᐅᓂᑦ ᐅᓗᕆᐊᓇᖅᓯᒃᑲᓐᓂᕐᓂᖓᓂ ᐳᕙᒃᑯᑦ ᐋᓐᓂᐊᕆᔭᐅᕙᒃᑐᖅ, ᐱᖃᓯᐅᑎᓪᓗᒋᑦ, ᐋᓐᓂᐊᓕᕈᑕᐅᓲᑦ ᓲᕐᓗ ᓄᕙᒡᔪᐊᕐᓇᖅ A ᓇᓂᑐᐃᓐᓇᖅ ᓄᓇᕗᒻᒥ.

ᐃᓕᖕᓂᑦ, ᐃᓚᖕᓂᑦ ᓄᓇᖅᑲᑎᖕᓂᓪᓗ ᓴᐳᔾᔨᓯᒪᑦᑎᐊᓛᖑᔪᓐᓇᖅᐳᑎᑦ ᓄᕙᓗᐊᕐᓇᙱᑦᑐᒧᑦ ᑲᐱᔭᐅᓗᑎᑦ. ᐋᓐᓂᐊᓕᕇᒃᑯᑎᑦ ᐊᐃᑦᑐᐃᓐᓇᙱᓐᓂᖅᓴᐅᕗᑦ, ᖃᓂᒻᒪᒡᔪᐊᕐᓇᙱᓐᓂᖅᓴᐅᕗᑦ, ᐅᕝᕙᓘᓐᓃᑦ ᐃᓅᔪᓐᓃᖅᐸᒃᑐᓂᑦ. ᓄᕙᓗᐊᕐᓇᙱᑦᑐᖅ ᑲᐴᑦ ᖃᖓᑐᐃᓐᓇᒃᑯᑦ ᐱᔭᐅᔪᓐᓇᖅᑐᖅ ᓄᕙᖕᓇᐅᑎᓪᓗᖑ. ᐃᓚᖏᑦ ᑲᐴᑎᑦ ᐃᓅᓯᓕᒫᕐᒧᑦ ᐊᑐᕈᓐᓇᖅᑐᑦ ᐋᓐᓂᐊᓕᕇᒃᑯᑎᒋᔭᐅᓗᑎᑦ, ᑖᓐᓇᓕ ᓄᕙᓗᐊᕐᓇᙱᑦᑐᒧᑦ ᑲᐴᑎ ᐊᕐᕌᒍᑕᒫᖅ ᐱᔭᐅᖃᑦᑕᕆᐊᓕᒃ.

ᓄᓇᕗᒻᒥᐅᓕᒫᑦ ᐊᕐᕕᓂᓕᑦ ᑕᖅᑭᑦ ᐅᖓᑖᓃᑦᑐᑦ ᑲᐱᔭᐅᖁᔭᐅᕗᑦ ᓄᕙᓗᐊᕐᓇᙱᑦᑐᒧᑦ ᓄᕙᒡᔪᐊᕐᓇᖅ-19−ᒧᓪᓗ. ᑕᒪᐃᓐᓂᒃ ᐋᓐᓂᐊᓕᕇᒃᑯᑎᓂᑦ ᑲᐱᔭᐅᓗᓂ ᐱᒻᒪᕆᐅᕗᖅ ᓲᖃᐃᒻᒪ ᓄᕙᒡᔪᐊᕐᓇᖅ-19 ᐊᒻᒪ ᓄᕙᖕᓇᖅ ᐊᔾᔨᒌᐸᓗᖕᓂ ᐋᓐᓂᐊᕈᑎᖃᖃᑦᑕᕐᒪᑕ ᐊᑐᓂᓗ ᐱᕐᔪᐊᓕᖅᐸᓪᓕᐊᔪᓐᓇᖅᖢᑎᒃ.

ᐅᑯᐊ ᒪᓕᒃᑕᐅᑦᑎᐊᑐᐊᖅᐸᑕ ᐊᐃᑦᑐᕐᓗᐃᙱᓐᓂᖅᓴᐅᔪᓐᓇᖅᐳᑦ ᖃᓂᒪᓐᓇᒥ, ᓄᕙᒡᔪᐊᕐᓇᖅ-19−ᒥ, ᐊᓯᖏᓐᓂᒡᓗ ᐳᕙᒃᑯᑦ ᖃᓂᒪᓐᓇᓂᑦ:
• ᐊᖏᕐᕋᖅᓯᒪᑐᐃᓐᓇᕐᓗᑎᑦ ᖃᓂᒪᒍᕕᑦ.
• ᖁᐃᖅᓱᖅᐸᒡᓗᓯ ᑕᒋᐅᒃᐸᒡᓗᓯᓗ ᑕᓕᔅᓯᓐᓄᑦ.
• ᐊᒡᒐᑎᑦ ᐅᐊᓴᕋᔪᒡᓗᒋᑦ.
• ᑮᓇᐃᑦ ᐊᒃᑐᖅᑕᐃᓕᓗᒍ.
• ᑲᒃᑭᐅᑎᒋᐊᓂᒃᑕᓯ ᐊᒃᑕᑰᓯᕝᕕᖕᒧᑦ ᐃᒋᑲᐅᑎᒋᕙᒡᓗᒋᑦ.
• ᐃᓅᖃᑎᓯ ᖃᓂᒋᓗᐊᖅᐸᙱᓪᓗᒋᑦ ᐊᓂᓯᒪᑎᓪᓗᓯ.
• ᐃᒡᓗᒥ ᓱᐴᖅᑐᖅᐸᙱᓪᓗᓯ ᐅᕝᕙᓘᓐᓃ ᐃᓅᖃᑎᓯ ᖃᓂᒋᔮᓂ, ᐱᓗᐊᖅᑐᒥᑦ ᓄᑕᕋᓛᑦ ᖃᓂᒋᔭᖏᓐᓂᑦ.
• ᑲᐱᔭᐅᓗᑎᑦ ᐋᓐᓂᐊᓕᕇᒃᑯᑎᒧᑦ.

ᓄᕙᓗᐊᕐᓇᙱᑦᑐᖅ ᑲᐴᑎ ᐊᑐᐃᓐᓇᐅᒋᕗᖅ ᐋᓐᓂᐊᕐᕕᓕᒫᓂᑦ ᐅᖁᒪᐃᓐᓂᕐᓂᐊᕐᕕᖕᓂᓪᓗ ᓄᓇᕗᒻᒥ. ᐃᖃᓗᖕᓂ ᐅᖁᒪᐃᓐᓂᕐᓂᐊᕐᕕᖕᒧᑦ ᓱᓕ ᐃᓯᑐᐃᓐᓇᕈᓐᓇᖅᑐᑦ ᓄᕙᓗᐊᕐᓇᙱᑦᑐᒧᑦ ᓄᕙᒡᔪᐊᕐᓇᖅ-19−ᒧᓪᓗ ᑲᐱᔭᐅᔪᒪᔪᓄᑦ ᐅᓪᓗᑐᐃᓐᓇᑕᒫ 9−ᒥᑦ ᐅᓪᓛᒃᑯᑦ 4:30−ᒧᑦ ᑎᑭᓪᓗᒍ.

ᐃᓕᖕᓂᒃ ᓄᓇᖅᑲᑎᑎᓪᓗ ᓴᐳᔾᔭᐅᓯᒪᖁᓪᓗᒋᑦ, ᐋᓐᓂᐊᕕᖕᒥ ᓱᓕ ᒪᑐᐊᖅᓯᒪᔭᕆᐊᖃᐃᓐᓇᖅᐳᑦ.