ᐊᑦᑕᕐᓇᙱᑦᑐᒥᒃ ᓂᕿᓕᕆᓂᖅ ᐊᖏᕐᕋᒥᓂᒃ ᐃᒐᔭᐅᓯᔪᓂᒃ ᓂᐅᕕᕐᓂᐊᕐᓗᓂ
ᒐᕙᒪᒃᑯᓐᓂ ᐃᓄᖕᓄᑦ ᑐᓴᒐᒃᓴᖅ
ᐊᑦᑕᕐᓇᙱᑦᑐᒥᒃ ᓂᕿᓕᕆᓂᖅ ᐊᖏᕐᕋᒥᓂᒃ ᐃᒐᔭᐅᓯᔪᓂᒃ ᓂᐅᕕᕐᓂᐊᕐᓗᓂ
ᓄᓇᕗᒻᒥᐅᑦ ᐅᖃᐅᔾᔭᐅᕗᑦ ᐊᖏᕐᕋᒥᓂ ᓂᐅᕕᐊᒃᓴᒃᓴᒥᓂᒃ ᐃᒐᓂᐊᖅᑐᑦ, ᐅᕝᕙᓘᓐᓃᑦ ᓂᕿᓕᐅᖅᓯᒪᔪᓂᑦ ᓂᐅᕕᕐᓂᐊᖅᑐᑦ ᐊᖏᕐᕋᒥᓂ−ᓇᖕᒥᓂᓕᖕᒥᑦ ᓂᐅᕕᐊᒃᓴᓕᖕᒥᑦ, ᐊᑦᑕᕐᓇᙱᓐᓂᖅᓴᓂᒃ ᐊᑐᐃᓐᓇᖃᑦᑕᖁᔭᐅᓪᓗᑎᒃ, ᓲᕐᓗ ᐆᓯᒪᔪᑦ, ᓰᕐᓇᖅᑐᑦ, ᐸᓂᖅᑐᑦ ᓂᕆᔭᒃᓴᑦ, ᐱᕈᖅᑐᒥᓃᑦ ᓰᕐᓇᖅᑐᑦ ᐊᒻᒪ ᐱᕈᖅᑐᒥᓃᑦ ᓯᕐᓇᖏᑦᑐᑦ. ᖃᖓᑦᑎᐊᖅ, ᐅᓄᕐᓂᖅᓴᐅᓕᓚᐅᖅᐳᑦ ᐊᖏᕐᕋᒥᓂ ᐃᒐᓯᒪᔪᓂᑦ ᓂᐅᕕᐊᒃᓴᓖᑦ ᓴᖅᑭᔮᖅᑎᑦᑎᖃᑦᑕᖅᑐᑦ ᐃᓄᖕᓄᑦ ᑐᓴᒐᒃᓴᖃᕐᕕᒃᑯᑦ.
ᐊᖏᕐᕋᒥ ᐃᒐᔭᐅᓯᒪᔪᑦ ᒪᓕᙱᑐᐃᓐᓇᕆᐊᖃᖅᐳᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᖏᖅᑕᐅᓯᒪᔪᓂᑦ ᒪᓕᒋᐊᓕᖏᓐᓂᒃ ᐱᓕᕆᔾᔪᓯᖏᓐᓂᒡᓗ. ᐊᖏᖅᑕᐅᓯᒪᙱᑦᑐᑦ ᐊᖏᕐᕋᒥᓂ ᓂᕿᓕᐅᕈᑕᐅᕙᒃᑐᑦ ᐃᓂᒋᔭᕆᐊᓕᖕᒥᓂ ᓱᓇᒃᑯᑖᕆᔭᕆᐊᓕᖏᓐᓂᒡᓗ ᐱᖃᙱᑦᑐᐃᓐᓇᕆᐊᖃᖅᐳᑦ ᓂᕿᓕᐊᖏᑦ ᓂᒡᓕᓇᖅᑐᒦᑎᑕᐅᑦᑎᐊᖁᓪᓗᒋᑦ ᐅᕝᕙᓘᓐᓃᑦ ᐆᓇᔪᒃᑐᒦᑎᑦᑎᐊᕐᓗᒋᑦ ᐊᑦᑕᕐᓇᙱᑦᑐᒦᖏᓐᓇᖁᓪᓗᒋᑦ ᓂᕿᓕᐊᕆᓂᐊᖅᑕᖏᑦ, ᐅᕝᕙᓘᓐᓃᑦ ᓈᒻᒪᒃᑐᓂᒃ ᐊᑐᕐᓂᐊᖅᑐᓂᒃ ᐱᖃᙱᓪᓗᓂ ᑐᖅᑯᖅᓯᒪᕝᕕᒃᓴᒥᒃ, ᐃᓕᓯᒪᕝᕕᒃᓴᒥᒃ ᐊᒻᒪ ᐃᓄᒋᐊᒃᑐᓄᑦ ᓂᕆᑎᑦᑎᓂᐊᖅᑐᓄᑦ.
ᑖᓐᓇ ᐅᖃᐅᔾᔨᒋᐊᕈᑎ ᐊᑦᑕᕐᓇᙱᓐᓂᖅᓴᓂᒃ ᓂᕿᓂᒃ ᓂᐅᕐᕈᑎᖃᖅᐸᒃᑐᓄᑦ ᐱᓕᕆᖃᑎᒌᓄᑦ ᑐᓂᕐᕈᑎᖃᖅᐸᒃᑐᓄᓪᓗ ᐊᑐᙱᑦᑐᖅ ᑮᓇᐅᔭᓕᐅᕈᑎᖃᕋᓱᒃᐸᒃᑐᓄᑦ ᐊᒻᒪᓗ ᐃᓄᐃᑦ ᓂᕿᖏᓐᓂᒃ ᓂᐅᕕᐊᒃᓴᖃᓲᓄᑦ ᑎᑎᕋᖅᓯᒪᔪᑦ ᐃᓚᖓ 5 ᒪᓕᒃᖢᒍ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒋᒍᑎᒥ.
ᓂᕆᔭᒃᓴᐃᑦ ᐱᕙᒌᔭᖅᑕᐅᔪᓐᓇᖅᑐᑦ ᐊᖏᖅᑕᐅᓯᒪᔪᒥᑦ ᓂᖅᖠᐅᕐᕕᖕᒥᑦ, ᓲᕐᓗ ᐱᙳᐊᕐᕕᖕᒥ ᐃᓕᓐᓂᐊᕐᕕᐅᓪᓘᓐᓃᑦ ᓂᕿᓕᐅᕐᕕᖓᓂ. ᖃᐅᔨᒋᐊᕐᕕᒋᓗᒍ ᐊᕕᒃᑐᖅᓯᒪᔪᓂ ᐊᕙᑎᑦᑎᓐᓂ ᐋᓐᓂᐊᖃᕐᓇᙱᑦᑐᓕᕆᔨ ᑕᒪᑐᒥᖓ ᐅᖃᖃᑎᒋᔪᒪᒍᕕᐅᒃ ᐊᓯᖏᓐᓂᒡᓘᓐᓃᑦ ᐊᑐᕈᓐᓇᖅᑎᑕᐅᔪᓂᑦ. ᑐᑭᓯᒋᐊᒃᑲᓐᓂᕈᒪᒍᕕᑦ ᐅᕗᖓᕐᓗᑎᑦ https://www.gov.nu.ca/iu/aanniaqangnanngittulirijikku/information/avati….
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᑏᓇ ᓴᒧᕕᐅᓪ
ᑐᓴᒐᒃᓴᓕᕆᔩᑦ ᑐᑭᒧᐊᒃᑎᑦᑎᔨᖓ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
@email