ᐃᒪᕐᒧᑦ/ᑭᓈᓗᖃᕐᕕᖕᒧᑦ ᐊᐅᓚᑦᑎᔨ (ᓴᖅᑭᑕᐅᒃᑲᓐᓂᖅᑐᖅ)

ᐅᓇ ᐃᖅᑲᓇᐃᔮᒃᓴᖅ ᐱᓇᔪᒃᑕᐅᔪᓐᓇᖅᑐᖅ ᑭᒃᑯᓕᒫᓄᑦ.

ᓄᓇᕗᒻᒥ ᒐᕙᒪᒃᑯᑦ ᓂᕈᐊᖅᑕᐅᓯᒪᔪᑦ ᑲᓇᑕᒥ ᐃᖅᑲᓇᐃᔭᖅᑎᖃᕐᓂᖅᐹᖑᓂᖓᓄᑦ ᒪᒃᑯᒃᑐᓂᑦ ᐊᓂᒍᐃᓵᖅᑐᓂᒡᓗ 2021-ᒥ. ᐱᕈᖅᐸᓪᓕᐊᓂᖅᐹᖑᖃᑕᐅᔪᖅ ᒪᒃᑯᑦᑐᐃᓪᓗ ᐃᓄᒋᐊᖕᓂᖅᐹᖑᓪᓗᑎᒃ ᑲᓇᑕᒥ, ᓄᓇᕗᑦ ᐆᒻᒪᕆᒃᑐᖅ, ᐱᔪᒪᓂᖃᑦᑎᐊᖅᑐᖅ, ᐊᖏᖅᓯᒪᑦᑎᐊᖅᖢᑎᓪᓗ ᐱᐅᓂᖅᓴᒥᒃ ᐃᓂᖃᖅᑎᑦᑎᖁᔨᓪᓗᑎᒃ ᑭᖑᕚᒃᓴᑎᓐᓄᑦ. ᒐᕙᒪᐅᑎᓪᓗᒋᑦ, ᐊᐅᓚᓂᕆᔭᕗᑦ ᐊᔾᔨᐅᙱᓐᓂᖓ ᓴᙱᓂᖅᑖᖅᑎᑉᐸᓪᓕᐊᕙᕗᑦ - ᐃᓚᓕᐅᔾᔨᓂᕐᒧᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ, ᓴᖅᑭᔮᖅᑎᑦᑎᓂᕐᒧᑦ ᐃᓄᒃᑐᑦ ᐅᖃᐅᓯᖓᓐᓂᑦ, ᑭᒡᒐᖅᑐᐃᑦᑎᐊᕐᓂᕐᒧᑦ ᒐᕙᒪᒃᑯᓐᓂᑦ ᐃᖅᑲᓇᐃᔭᖅᑎᓂᑦ, ᐱᓕᕆᖃᑎᖃᖃᑦᑕᕐᓗᓂᓗ ᑲᑐᔾᔨᖃᑎᒥᓂᒃ ᑲᔪᓯᑎᑦᑎᓂᕐᒧᑦ ᐊᖏᖅᓯᒪᓂᕆᔭᖓᓂᑦ ᓄᓇᕗᒻᒧᑦ. ᐊᓂᒍᐃᓯᒪᑦᑎᐊᖅᑐᑦ ᐃᖅᑲᓇᐃᔮᖅᑖᕋᓱᒃᑐᓂᑦ ᖁᕕᐊᒋᔭᖃᕐᓂᐊᖅᑐᑦ ᐊᑭᓕᖅᓱᖅᑕᐅᑦᑎᐊᕐᓂᕐᒥᑦ, ᐋᓐᓂᐊᕐᕕᖕᒧᑦ ᑭᒍᑎᓕᕆᔭᐅᓂᕐᒧᓪᓗ ᐃᑲᔫᑎᓂᑦ, ᓇᓗᓇᐃᔭᖅᑕᐅᓯᒪᔪᓂᑦ ᐃᓐᓇᖅᓯᐅᑎᒃᓴᓄᑦ ᐃᑲᔫᑎᒃᓴᓂᑦ, ᓅᑕᐅᓂᕐᒧᑦ ᐱᔪᓐᓇᐅᑎᓂᑦ ᐱᕕᖃᕐᓂᕐᒧᓪᓗ ᐱᓕᒻᒪᒃᓴᕐᓂᕐᒧᑦ ᐃᖅᑲᓇᐃᔮᒥᓪᓗ ᖁᕝᕙᖅᐸᓪᓕᐊᓂᕐᒥᑦ.

ᐅᖃᕐᕕᖃᓯᑲᐅᑎᒋᕙᒡᓗᓂ ᐊᕕᒃᓯᒪᓂᕐᒥ ᐃᓂᒋᔭᐅᔪᒧᑦ ᐊᐅᓚᑦᑎᔨᒋᔭᐅᔪᒧᑦ (RFM−ᒧᑦ), ᑖᓐᓇ ᐃᓂᒋᔭᐅᔪᖅ ᑲᒪᒋᔭᒃᓴᖃᖃᑦᑕᕐᓂᐊᖅᐳᖅ ᑕᒪᐃᓐᓂᑦᑎᐊᖅ ᐊᐅᓚᓂᕆᔭᐅᔪᓂᒃ ᐃᓚᒋᔭᐅᓪᓗᑎᒃ ᑲᒪᒋᔭᖃᖅᐸᖕᓂᖅ, ᐊᑮᑦᑐᓕᕆᓂᖅ/ᑮᓇᐅᔭᖅᑖᕆᔭᐅᕙᓪᓕᐊᔪᑦ ᑲᑎᖅᓱᐃᓂᖅ, ᓄᑖᙳᕆᐊᖅᑎᑦᑎᓂᖅ ᐱᐅᓯᒋᐊᖅᑎᑦᑎᓂᕐᓗ ᐃᒪᕐᒧᑦ/ᑭᓈᓗᖕᒧᑦ ᐊᑐᖅᑕᐅᕙᒃᑐᒧᑦ ᑲᖏᖅᖠᓂᕐᒥ.  ᑖᓐᓇ ᐃᖅᑲᓇᐃᔮᖅ ᑲᒪᒋᔭᖃᕐᓂᐊᕐᒥᔪᖅ ᐃᓘᓐᓇᖏᓐᓂᑦ ᒥᑭᔫᑎᓂᑦ ᐊᑭᑐᔫᑎᓄᑦ ᐱᓕᕆᐊᓂᑦ ᑲᖏᖅᖠᓂᕐᒥᑦ ᐃᒥᕐᒧᑦ/ᑭᓈᓗᖃᕐᕕᓐᓂᑦ ᐊᒻᒪ ᐱᖓᓲᔪᖅᑐᓂᑦ (6) ᐊᓯᖏᓐᓂᑦ ᑭᕙᓪᓕᕐᒥᑦ ᐃᒪᓕᕆᓂᕐᒧᑦ ᓴᓗᒻᒪᖅᓴᐃᕕᓐᓂᑦ ᐊᒻᒪ ᐱᓕᕆᖃᑦᑕᕐᓗᓂ ᐱᓕᕆᐊᔅᓴᓂᑦ ᐸᕐᓇᐃᓂᕐᒥᑦ, ᑮᓇᐅᔭᓂᑦ ᐊᑐᖅᑐᔅᓴᓂᑦ, ᐊᑐᓕᖅᑎᑦᑎᓂᕐᒥᑦ, ᐱᔭᕇᖅᓯᓂᕐᒥᑦ ᐊᒻᒪ ᓇᓪᓕᐅᒃᑯᒫᖓᓐᓂᑦ ᖃᐅᔨᒋᐊᑲᓐᓂᕐᓂᕐᒥᑦ.

ᐃᓚᒋᔭᐅᓪᓗᑎ ᖃᐅᔨᒪᑎᑕᕐᓂᑦ ᐃᖅᑲᓇᐃᔭᖅᑎᓂᑦ, ᐃᖅᑲᓇᐃᔮᑖᖅᑐᖅ ᐃᖅᑲᓇᐃᔭᖃᑦᑕᖅᑐᖅ ᐱᐅᓛᖑᑎᑦᑎᓇᓱᐊᖅᑐᓂ ᐃᓪᓗᓂᑦ ᐊᒻᒪ ᓴᓇᔭᐅᓯᒪᓂᖓ ᒪᑭᒪᑎᑦᑐᒋᑦ ᐃᑲᔪᖅᑐᐃᔪᑦ ᐊᒻᒪ ᐱᔨᑦᑎᖃᑦᑕᕐᓗᒋᑦ ᐸᕕᓴᐃᓗᐊᕐᓂᐊᖏᑦᑐᓂᑦ ᐃᓱᒪᒋᓪᓗᒍ ᐃᓅᓯᕐᒧᑦ ᐊᑦᑕᓇᐃᖅᓯᒪᓂᖅ, ᐃᖅᑲᓇᐃᔮᖑᖅᑳᕆᐊᓕᓐᓂᑦ, ᑭᓱᓕᕆᔾᔪᑎᔅᓴᖃᑦᑎᐊᖏᓐᓂᖅ ᐊᒻᒪ ᐊᑯᓂᐅᓂᖏᓐᓄᑦ ᐊᑭᖏᑦ.  ᐱᓕᕆᐊᖑᔪᑎᒍᑦ ᐱᕙᒌᔭᕐᓂᕐᒧᑦ ᑲᔪᓯᑎᑦᑎᓂᕐᒥᒡᓗ ᐱᓕᕆᐊᒃᓴᕆᔭᐅᔪᓂᒃ, ᐃᓂᑖᖅᑎᑕᐅᔪᖅ ᐱᔾᔪᑎᖃᓪᓚᕆᒃᐸᒃᐳᖅ ᖁᐊᖅᓵᕐᓇᖅᑕᐃᓕᒪᓂᕐᒥᒃ, ᐱᓕᕆᖃᑎᒌᑦ ᑲᔪᓯᓂᖃᑦᑎᐊᕈᓐᓇᕐᓂᖏᓐᓂᒃ, ᐱᓕᕆᕝᕕᒋᔭᐅᔪᑦ ᓈᒻᒪᒃᓴᕈᓐᓇᕐᓂᖏᓐᓂᒃ ᐱᐅᑎᑎᔪᓐᓇᕐᓂᕐᒥᒡᓗ.  ᑖᓐᓇ ᐃᓂᒋᔭᐅᔪᖅ ᑲᔪᓯᑎᑦᑎᕙᒃᐳᖅ ᐊᔪᕈᓐᓃᖅᓴᕐᓂᕐᒥᒃ ᐱᕙᓪᓕᐊᑎᑦᑎᓂᕐᒥᒡᓗ ᐱᓕᕆᖃᑎᒌᓂᒃ ᑕᕝᕙᓂ ᐃᖅᑲᓇᐃᔭᕐᕕᖕᒥ.

ᑲᑎᓯᒪᔪᓂᒃ ᖃᐅᔨᒪᓂᖅ, ᐊᔪᙱᓐᓂᖅ, ᐱᔪᓐᓇᕐᓂᕐᓗ ᐱᔭᐅᒐᔪᒃᑐᑦ ᐱᔭᕇᕈᓯᐊᕐᒥᒃ ᐃᒪᓕᕆᓂᕐᒧᑦ ᐊᑐᒐᒃᓴᓄᑦ ᓴᓇᔪᓕᕆᓂᕐᓂ, ᐃᒪᕐᒧᑦ/ᑭᓈᓗᖕᒧᑦ ᐱᓕᕆᔨ, ᐃᒥᐅᑉ ᐱᐅᓂᖓᓂᒃ ᐊᕙᑎᒧᓪᓗ ᓴᓇᔪᓕᕆᔨᒻᒪᕆᓕᕆᓂᖅ ᐊᔾᔨᕐᓚᖓᓂᒃᓘᓐᓃᑦ ᐃᓂᖃᖅᑐᓂ ᐃᓕᓴᕆᔭᐅᓯᒪᔪᒥᒃ ᐃᓕᓐᓂᐊᒃᑲᓐᓂᕐᓂᕐᒧᑦ ᐃᓕᓐᓂᐊᕐᕕᖕᒥ ᐱᔭᐅᔪᒪᔪᖅ, ᐃᓚᖃᕐᓗᒍ ᐊᕐᕌᒍᑦ ᑕᓪᓕᒪᑦ ᐊᒃᑐᐊᓂᓕᖕᒥᒃ ᐊᑐᕐᓂᑰᓗᓂ. ᐊᔪᙱᓪᓗᓂ ᐱᓕᕆᔨᒻᒪᕆᐅᓗᓂ ᐊᕙᑎᓕᕆᓂᕐᒧᑦ ᐊᐅᓚᑦᑎᓂᕐᒥ ᐃᒪᕐᒧᓪᓗ ᓴᓗᒻᒪᖅᓴᐃᓂᕐᒥ/ᑐᓂᓯᓂᕐᓂ ᐊᒻᒪ ᑭᓈᓗᖃᕐᕕᖕᓂ ᐊᕝᕗᐃᓂᕐᓂ/ᓴᓗᒻᒪᖅᓴᐃᓂᕐᒥ ᖁᑦᑎᖕᓂᓕᒃ II ᓇᓗᓇᐃᒃᑯᑕᖃᕐᓗᓂ ᐃᓕᓴᕆᔭᐅᓯᒪᔪᒥᒃ ᓄᓇᓕᕐᔪᐊᖑᓂᖅᓴᓂ ᐊᕕᒃᑐᖅᓯᒪᓂᐅᔪᓂ ᓄᓇᓕᕋᓛᖑᓂᖅᓴᓂᒃᓘᓐᓃᑦ ᐃᓚᐅᖃᑕᐅᔾᔪᑎᒥᒃ ᑎᒥᐅᔪᒥᒃ ᐱᔭᕆᐊᖃᕐᒥᔪᖅ. ᐃᓕᓐᓂᐊᖅᓯᒪᓂᖓ, ᖃᐅᔨᒪᓂᖓ, ᐱᓕᕆᔪᓐᓇᕐᓂᖓ ᐊᒻᒪ ᐊᔪᖏᓐᓂᖓ ᑲᑎᓪᓗᒋᑦ ᐊᔾᔨᐸᓗᖓᓂ ᐃᓕᓐᓂᐊᓚᕆᒃᓯᒪᔪᑐᑦ ᐊᒻᒪ ᐱᓕᕆᓯᒪᓪᓚᕆᒃᑐᑐᑦ ᐃᖅᑲᓇᐃᔭᖃᑦᑕᖅᓯᒪᓂᖏᓪᓗ ᐃᓱᒪᒋᔭᐅᑐᐃᓐᓇᕆᐊᓕᒃ. ᐊᖁᑦᑐᓐᓇᐅᑎᖃᕆᐊᓕᒃ ᓇᓗᓇᐃᒃᑯᑕᓕᒃ 5−ᒥᑦ ᑖᔅᓱᒧᖓ ᐃᖃᓇᐃᔮᒧᑦ.

ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᓄᓇᕗᒻᒥ ᐅᑯᐊᖑᕗᑦ ᐃᓄᒃᑎᑐᑦ, ᖃᓪᓗᓈᑐᑦ ᐊᒻᒪ ᐅᐃᕖᑐᑦ. ᐃᖅᑲᓇᐃᔭᖅᑖᕋᓱᐊᖅᑐᑦ ᐃᖅᑲᓇᐃᔭᖅᑖᕋᓱᐊᕈᑎᒥᒃ ᑎᑎᕋᕈᓐᓇᖅᑐᑦ ᓂᕈᐊᕆᔭᖏᓐᓂᑦ ᐃᓕᓴᕆᔭᐅᓯᒪᔪᓂᑦ ᐅᖃᐅᓯᕐᒥᑦ ᓄᓇᕗᒻᒥ. ᐅᖃᕈᓐᓇᖅᐸᑦ ᐊᑕᐅᓯᐅᙱᑦᑐᒥᒃ ᓄᓇᕗᒻᒥ ᐅᖃᐅᓯᕐᓂᑦ ᐃᑲᔫᑎᖃᑦᑎᐊᕋᔭᖅᑐᖅ. ᖃᐅᔨᒪᒃᐸᑦ ᐃᓄᐃᑦ ᓄᓇᓕᖕᓂ, ᐃᓕᖅᑯᓯᖏᓐᓂᒃ, ᓄᓇᒥᑦ, ᐃᓄᐃᑦ ᖃᐅᔨᒪᔭᑐᖃᖏᓐᓂᑦ, ᐱᓕᕆᖃᑦᑕᖅᓯᒪᓗᓂᓗ ᐅᑭᐅᖅᑕᖅᑐᒥ ᐃᓕᖅᑯᓯᖃᖃᑎᒌᙱᑦᑐᓂ ᐃᑲᔫᑎᖃᑦᑎᐊᕋᔭᕐᒥᔪᖅ.

ᐊᔾᔨᐸᓗᖏᓐᓂᒡᓘᓐᓃᑦ ᐃᓕᓐᓂᐊᖅᓯᒪᓗᓂ ᐱᓕᕆᖃᑦᑕᖅᓯᒪᓂᑰᓗᓂᓘᓐᓃᑦ ᐃᓱᒪᒋᔭᐅᓂᐊᖅᑐᑦ ᑖᔅᓱᒧᖓ ᐃᖅᑲᓇᐃᔮᒧᑦ. ᑎᓕᐅᕆᒃᑲᓐᓂᖅᑐᒍᑦ ᐱᓇᓱᐊᖁᔨᓪᓗᑕ ᐃᓕᖕᓂᑦ ᓇᓕᒧᖓᓂ ᐊᕐᕌᒍᓂᑦ ᐃᓕᓐᓂᐊᖅᓯᒪᒍᕕᑦ ᐊᒻᒪᓗ/ᐅᕝᕙᓘᓐᓃᑦ ᐱᓕᕆᖃᑦᑕᖅᓯᒪᒍᕕᑦ ᐃᓕᓐᓂᐊᖅᓯᒪᔭᕆᐊᓕᑦ ᐱᓕᕆᖃᑦᑕᖅᓯᒪᔭᕆᐊᓕᓪᓗ ᓇᓕᒧᖓᓂ ᖁᓛᓂᑦ ᑎᑎᕋᖅᓯᒪᔪᓄᑦ. ᐅᓇ ᐃᖅᑲᓇᐃᔮᖅ ᐱᑐᐃᓐᓇᐅᙱᑦᑐᒻᒪᕆᐅᖕᒪᑦ ᐱᕋᔭᒃᓯᒪᓂᑰᙱᒃᑲᓗᐊᖕᒪᖔᑦ ᖃᐅᔨᓴᖅᑕᐅᔭᕆᐊᓕᒃ, ᐊᑦᑕᕐᓇᖅᑐᒦᑎᑦᑎᓂᐊᙱᒃᑲᓗᐊᕐᒪᖔᑦ ᖃᐅᔨᓴᖅᑕᐅᔭᕆᐊᖃᕆᓪᓗᓂ. ᑲᒪᒋᔭᒃᓴᐅᔪᑦ ᑖᔅᓱᒧᖓ ᐃᖃᓇᐃᔮᒧᑦ ᐱᖃᕆᐊᓕᒃ ᓄᓇᕗᑦ ᒐᕙᒪᖓᓂ ᐃᓯᕈᓐᓇᐅᑎᒥᑦ ᑎᑎᕋᕐᕕᖕᒧᑦ, ᐃᒡᓗᕐᔪᐊᓄᑦ, ᐋᓐᓂᐊᕐᕕᖕᒧᑦ, ᐊᒻᒪᓗ ᐃᓕᓐᓂᐊᕐᕕᖕᒧᑦ ᐃᓚᐅᖃᑕᐅᕙᒃᑐᑦ ᓂᑭᑖᖅᐸᒃᑐᑦ ᐊᒃᑐᖅᑕᐅᔭᕋᐃᓐᓂᖅᓴᓂᑦ.

ᑖᔅᓱᒧᖓ ᐃᖅᑲᓇᐃᔮᒃᓴᒧᑦ ᐱᓇᔪᒍᒪᒍᕕᑦ, ᐃᕐᖐᓐᓈᖅᑕᐅᒃᑯᑦ ᑎᑎᕋᖅᑕᑎᑦ ᐊᒻᒪ ᐱᔪᒥᓴᐅᑎᑦ ᐃᖅᑲᓇᐃᔮᕆᖃᑦᑕᖅᓯᒪᔭᕐᓄᑦ ᓇᓗᓇᐃᔭᖅᓯᒪᔪᑦ ᓇᒃᓯᐅᑎᓗᒋᑦ ᐅᕗᖓ @email. ᐃᓚᓕᐅᑎᓗᒍ ᓇᓗᓇᐃᒃᑯᑖᑕ ᓈᓴᐅᑖ ᐱᔾᔪᑎᒋᔭᖓᓄᑦ ᐃᕐᖐᓐᓈᖅᑕᐅᒃᑯᑦ ᑎᑎᕋᖅᑕᕐᓄᑦ.

• ᓄᓇᕗᑦ ᒐᕙᒪᒃᑯᖏᑦ ᐱᓕᕆᓇᓱᓪᓚᕆᒻᒪᑕ ᓴᖅᑭᑦᑎᓂᖅᓴᐅᓇᓱᒃᖢᑎᒃ ᑭᒡᒐᖅᑐᐃᓂᕐᒥᑦ ᐃᖅᑲᓇᐃᔭᖅᑎᓂᒃ, ᑕᐃᒪᐃᓐᓂᖓᓄᑦ ᓄᓇᕗᒻᒥ ᐃᓄᐃᑦ ᓯᕗᓪᓕᐅᔾᔭᐅᓂᐊᖅᑐᑦ ᓇᒻᒥᓂᖅ ᓇᓗᓇᐃᖅᓯᔪᑦ ᐊᑎᓕᐅᖅᑕᐅᖃᑕᐅᓯᒪᓂᖏᓐᓂᒃ ᓄᓇᕗᒻᒥ ᐊᖏᕈᑎᒧᑦ ᒪᓕᒃᖢᒍ ᓯᕗᓪᓕᐅᔾᔭᐅᔭᕆᐊᓖᑦ ᐃᖅᑲᓇᐃᔭᑖᕐᓂᕐᒧᑦ ᐊᑐᐊᒐᖅ.
• ᓄᓇᕗᑦ ᒐᕙᒪᖓᓂ ᐃᖅᑲᓇᐃᔭᓕᓵᖅᑐᑦ ᖃᐅᔨᓴᖅᑕᐅᔭᕆᐊᓖᑦ ᐱᔭᕆᐊᖃᖅᑐᑦ ᑐᓂᓯᓗᑎᒡᓗ ᐱᔪᓐᓇᐅᑎᑖᕈᑎᒥᒃ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓐᓄᑦ ᐃᖅᑲᓇᐃᔭᕐᕕᒋᔭᖓᑕ ᐱᓕᕆᕝᕕᖓᓂᑦ. ᐱᔪᓐᓇᖅᑎᑕᐅᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓂᙶᖅᑐᖅ ᐃᖅᑲᓇᐃᔮᖅᑖᕋᓲᑎᖕᓄᑦ ᐊᑕᔭᕆᐊᓕᒃ ᐃᓱᒪᒋᔭᐅᓂᐊᕐᒪᑦ. 
• ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓕᔭᖅᑐᑦ ᐊᔪᓕᕈᑕᐅᙱᑐᐃᓐᓇᕆᐊᓕᑦ ᐆᒃᑐᕐᓂᕆᔭᖏᑦ ᐃᓱᒪᒋᔭᐅᓂᖏᓐᓄᑦ. ᖃᐅᔨᓴᖅᑕᐅᓂᖏᑦ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᒋᔭᐅᔪᑦ ᖃᐅᔨᔭᐅᓇᓱᖕᓂᐊᖅᐳᑦ ᐱᓕᕆᐊᒃᓴᕆᔭᐅᔪᑦ ᐃᖅᑲᓇᐃᔮᒃᓴᒥ. ᑖᓐᓇ ᐱᔭᐅᔭᕆᐊᖃᖅᐳᖅ ᐃᖅᑲᓇᐃᔮᒃᓴᓄᑦ ᐱᔭᕆᐊᖃᖅᑐᓄᑦ ᓈᒻᒪᒋᔭᐅᔪᓂᒃ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓕᔭᖅᑐᓄᑦ ᐅᕝᕙᓘᓐᓃᑦ ᐊᒃᑐᖅᑕᐅᓴᕋᐃᓐᓂᖅᓴᓂᒃ ᑲᒪᔪᓐᓇᕐᒪᖔᑦ ᖃᐅᔨᓴᖅᑕᐅᒋᐊᖃᖅᑐᖅ. 
• ᐃᖅᑲᓇᐃᔭᖅᑖᕋᓱᒃᑐᑦ ᐃᖅᑲᓇᐃᔭᖅᑖᕋᓱᐊᕈᑎᒥᒃ ᑎᑎᕋᕈᓐᓇᖅᑐᑦ ᓂᕈᐊᕆᔭᖏᓐᓂᑦ ᐃᓕᓴᕆᔭᐅᓯᒪᔪᓂᑦ ᐅᖃᐅᓯᕐᓂᑦ ᓄᓇᕗᒻᒥ.
• ᐆᒃᑐᖅᑐᑦ ᓂᕈᐊᖅᑕᐅᔪᑐᐊᑦ ᐊᐱᖅᓱᖅᑕᐅᔪᒪᓗᑎᒃ ᑐᓴᖅᑎᑕᐅᓂᐊᖅᐳᑦ.
• ᑎᒍᒥᐊᖅᑐᖅ ᐱᓇᔪᒃᑐᓂᒃ ᐱᔭᐅᓚᐅᕐᓗᓂ ᑲᓇᑕᐅᑉ ᓯᓚᑖᓂ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᖏᑦᑕ ᓇᓕᖅᑲᖏᑦ ᑲᓇᑕᐅᑉ ᓯᓚᑖᓂ ᓇᓕᖅᑲᖏᑦ ᖃᐅᔨᓴᖅᑕᐅᓇᔭᖅᐳᑦ ᐃᓕᑕᕆᔭᐅᓯᒪᔪᒃᑯᑦ ᑲᓇᑕᒥ ᐃᓕᓐᓂᐊᕐᕕᖕᒥ.  ᑕᐃᒪᐃᓕᐅᙱᒃᑯᕕᑦ ᐃᒻᒪᖄ ᐱᓇᔪᒃᑕᑦ ᐋᒃᑳᖅᑕᐅᑐᐃᓐᓇᕆᐊᓕᒃ.