Maryna Semenova's Story
ᒥᐊᕆᓇ ᓯᒥᓅᕙᐅᔪᖓ. ᔫᒃᕋᐃᓐᒥᖔᕐᑐᖓ, ᓄᑕᕋᓄᑦ ᐃᓗᐊᖅᓴᐃᔨᐅᓯᒪᓪᓗᖓ ᔫᒃᕋᐃᓐᒥᑦ. ᐊᑯᓂᐸᓗᒃ, ᐱᐅᓪᔭᒻᒦᓚᐅᕐᓯᒪᔪᖓ ᐃᓱᒪᓕᕐᖢᖓᓗ ᐊᐅᓪᓛᕈᒪᓪᓗᖓ ᑲᓇᑕᒧ ᐃᓚᒃᑲᓗ 2005-ᒥᑦ. ᑐᓴᒪᓂ ᐱᐅᑦᑎᐊᕐᑐᓂ ᕿᑐᕐᖓᖃᕐᑐᒍᒃ, ᑳᓪᒍᓕ, ᐋᓪᐴᑕᒦᖏᓐᓇᕐᖢᑕᓗ ᑕᐃᒪᙵᓂᑦ.
ᑲᓇᑕᒧᐊᕐᑎᓪᓗᖓ, ᖃᓪᓗᓇᐅᔭᕈᓐᓇᓚᐅᙱᓐᓇᒪ ᐃᓕᓐᓂᐊᓕᕐᖢᒍ ᒪᐅᓐᑦ ᕈᐃᐅᓪ ᓯᓚᑦᑐᖅᓴᕐᕕᔾᔪᐊᕐᒥᑦ. ᐃᓗᐊᖅᓴᐃᔨᐅᓂᖅ ᐱᔪᒪᐃᓐᓇᐅᔭᓚᐅᕐᓯᒪᔭᕋ, Bridge to Canadian Nursing program−ᒧᐊᕐᖢᖓ ᒪᐅᓐᑦ ᕈᐃᐅᓪ ᓯᓚᑦᑐᖅᓴᕐᕕᒡᔪᐊᕐᒥᑦ ᐃᓗᐊᖅᓴᐃᔨᙳᕐᖢᖓᓗ 2013−ᒥᑦ. ᐃᖅᑲᓇᐃᔭᕐᓯᒪᓕᕐᑐᖓ ᐋᓪᐴᑕ ᓄᑕᖅᑲᓄ ᐋᓐᓂᐊᕕᐊᓗᐊᓂ 2008−ᒥᓂᑦ. ᐱᒋᐊᓚᐅᕐᓯᒪᕗᖓ ᐋᓪᐴᑕᒥ ᓄᑕᕋᓄᑦ ᐋᓐᓂᐊᕕᐊᓗᖕᒥᑦ ᐋᓐᓂᐊᓯᐅᑎᐅᓪᓗᖓ ᐃᑲᔫᑎᓚᐅᕐᑐᖅ ᑐᑭᓯᕚᓪᓕᕐᖢᖓ ᐋᓐᓂᐊᓯᐅᑎᓕᕆᓂᖕᒥᑦ. ᐃᓱᓕᑦᑎᐊᓂᒃᑲᒪ, ᐃᖅᑲᓇᐃᔭᓚᐅᕐᐳᖓ PLC−ᒥᑦ ᐃᓗᐊᖅᓴᐃᔨᐅᓪᓗᖓ ᓴᐅᓂᓕᕆᔨᓂᑦ, ᐊᐅᒃᑕᔫᓕᕆᓂᖕᓂᑦ ᐱᓚᒃᑕᐅᔪᓄᓪᓗ ᐃᓐᓇᕐᓄᑦ ᐃᓅᓕᓴᐅᑎᓕᕆᓂᖕᓂᑦ. ᐅᑎᓚᐅᕐᐳᖓ ᐋᓪᐴᑕᒥ ᓄᑕᖅᑲᓄ ᐋᓐᓂᐊᕕᐊᓗᖕᒥ ᑐᐊᕕᖕᓇᖅᑐᓕᕆᕝᕕᐊᓄ 2015-ᒥᑦ ᐃᖅᑲᓇᐃᔭᕐᕕᒋᓚᐅᕐᑕᕋ ᓄᓇᕗᒻᒧᐊᓚᐅᙱᑎᓪᓗᖓ.
ᐊᒃᓱᕈᕐᖢᖓ ᐃᓗᐊᖅᓴᐃᔨᐅᓂᖕᒥᑦ, ᒧᒥᕈᒻᒪᒻᒪᕆᐅᕗᖓ ᐊᔾᔨᒌᙱᑦᑑᑎᓂ ᒧᒥᐅᓯᕐᓂᑦ. ᖁᕕᐊᒋᓂᖅᐹᕋ ᑭᐱᙳᐃᔭᐅᑎᓂ/ᐱᙳᐊᕐᓂᖕᓂᑦ, ᐃᓱᒪᓐᓂᓪᓗ ᖃᓱᓯᒪᔾᔫᒥᓐᓇᕐᖢᓂ ᐊᒃᓱᕈᓗᐊᕌᓂᒃᑳᖓᒪ ᐃᖅᑲᓇᐃᔮᓐᓂᑦ. ᐱᓕᕆᑦᑎᐊᕐᓇᖅᑐᒻᒪᕆᐊᓗᒃ ᐃᖃᕐᓇᕋᓂᓗ ᒧᒥᕈᓯᖕᓂᑦ ᒧᒥᑲᑕᓕᕌᖓᒪ ᐅᕝᕙᓘᓐᓃᑦ ᓇᖕᒥᓂᖅ ᒧᒥᐅᓯᓕᐊᓐᓂᑦ. ᐅᓂᒃᑳᑦᑎᐊᕙᐅᓕᓲᑦ ᐅᖃᓪᓚᖃᑎᖃᓕᕌᖓᒪ ᐃᖅᑲᓇᐃᔭᖃᑎᓐᓂᑦ, ᐅᖃᐅᓯᖃᕈᒪᖃᑦᑕᕋᑦᑕ ᖁᕕᐊᒋᔭᑦᑎᓐᓂᑦ ᐊᑐᕐᓯᒪᔭᑦᑎᓐᓂᑦ ᐃᖅᑲᓇᐃᔭᕈᓐᓃᕌᖓᑦᑕ.
ᕿᓃᓐᓇᐅᔭᕐᑐᖓ ᐊᒃᓱᕈᕐᓇᖅᑐᓂᑦ ᐋᓐᓂᐊᓯᐅᑎᓕᕆᓂᖕᒥᑦ ᑕᐃᒪᐃᓐᓂᖓᓄᓪᓗ, ᐃᓗᐊᖅᓴᐃᔨᐅᓂᖕᒧᑦ ᐃᖅᑲᓇᐃᔮᖅᑖᕋᓱᓕᓚᐅᕐᐳᖓ ᕿᑎᕐᒥᐅᓂᑦ ᓄᓇᕗᒻᒥᑦ. ᐃᓱᒪᒃᓴᖅᓯᐅᓚᐅᕐᐳᖓ ᐊᕐᕌᒍᒥ ᐊᑕᐅᓯᖕᒥᑦ ᐊᔪᕋᔭᙱᒻᒪᖔᑦ ᐆᒥᖓ ᐃᖅᑲᓇᐃᔮᒥᑦ ᐊᔪᕋᓱᒋᔪᓐᓃᕋᒪ ᑲᑉᐱᐊᓱᒍᓐᓃᕋᒪ ᐱᒋᐊᓚᐅᕐᐳᖓ ᐃᖅᑲᓇᐃᔮᖅᑖᕆᓪᓗᒍᓗ ᕕᕗᐊᕆ 2021−ᒥᑦ.
ᓱᓕᓪᓚᕆᒃᖢᖓ, ᐊᒃᓱᕈᕐᓇᓛᖑᓚᐅᕐᓯᒪᔪᖅ ᐊᑐᕐᑕᓐᓂ ᐃᓗᐊᖅᓴᐃᔨᐅᓪᓗᖓ. ᐃᓕᑦᑎᕐᔪᐊᕐᓇᒻᒪᕆᓚᐅᕐᑐᖅ ᑕᕝᕙᓂ ᖁᕝᕙᓯᒃᑐᒥ ᐃᓗᐊᖅᓴᐃᔨᐅᓂᖕᒥᑦ. ᐊᒥᓱᓂ ᐱᔾᔪᑕᐅᔪᓂ ᐃᓱᒪᒃᓴᖅᓯᐅᕆᐊᖃᕐᓇᖅᑐᖅ ᐱᓕᕆᑦᑎᐊᕐᓂᐊᕐᓗᓂ ᐱᐅᓛᓂᓪᓗ ᑲᒪᑦᑎᐊᕐᓂᖕᓂᑦ ᐃᓄᖕᓄᑦ. ᐋᓐᓂᐊᕕᑦ ᐋᖅᑭᑦᑎᐊᕐᓯᒪᔪᑦ, ᓈᒪᓪᓗᑎᒃᓗ ᐃᓅᓕᓴᐅᑎᖃᐅᑦᑎᐊᕐᖢᑎᒃᓗ. ᑭᓯᐊᓂᓕ ᐱᑕᖃᙱᑦᑐᖅ ᐱᕕᔾᔪᐊᓂᑦ ᖃᐅᔨᓴᕈᑎᓂᑦ ᐋᓐᓂᐊᕕᐊᓗᖕᓂᓪᓗ. ᐋᓐᓂᐊᕕᓕᐊᕐᑎᑕᐅᕙᒃᐳᑦ ᖃᖓᑕᓲᒃᑯᑦ ᐊᖏᓂᕐᓴᓄᑦ ᐋᓐᓂᐊᕕᐊᓗᖕᓄᑦ ᖃᓄᐃᕐᔪᐊᕐᓯᒪᔪᓄ ᑲᒪᔾᔪᑎᒃᓴᓂ. ᐃᖅᑲᓇᐃᔭᖅᑎᑭᒃᓴᖅᐸᒃᑐᖅ ᐃᓛᓐᓂᒃᑯᓪᓗ ᐃᖅᑲᓇᐃᔭᖅᑎᑭᒃᓴᓗᐊᕐᐸᒃᖢᑎᒃ. ᐃᓱᒪᒋᓇᒋᑦ, ᐱᓕᕆᑦᑎᐊᕋᓱᐃᓐᓇᕐᐸᓚᐅᕐᐳᖓ ᐋᓐᓂᐊᕕᓕᐊᕐᓯᒪᔪᓂ ᐃᓱᒪᒋᓇᒋᑦ ᐊᒃᓱᕈᕐᓇᖅᑐᑦ.
ᐱᓕᕆᐊᓐᓂ, ᐊᑐᐃᓐᓇᐅᔭᕐᐸᒃᑲ ᖃᐅᔨᒪᓂᕋ ᐊᑐᕐᓯᒪᔭᒃᑲᓗ ᑕᐃᒪᙵᓂ ᑕᑯᒐᒪ ᐋᓐᓂᐊᕕᓕᐊᕐᑐᒥ ᖃᓄᐃᑦᑐᓐᓃᕋᓱᖕᓂᓕᒫᖏᓐᓄᑦ. ᐃᓚᖃᑦᑐᖅ ᑕᒪᐃᓐᓂᒃ ᖁᓕᕇᓕᖕᓂᑦ ᑲᒪᑦᑎᐊᕐᓂᖕᓂᑦ ᐱᒋᐊᕐᓂᖓᓂ ᐋᓐᓂᐊᓪᓚᕆᓕᕐᑎᓪᓗᒍ. ᑕᐃᒪᐃᒃᑲᓗᐊᕐᖢᓂ, ᐃᑲᕐᕋᒃᑲ ᖃᐅᔨᒪᔭᐅᔪᓐᓇᙱᑦᑐᑦ ᐱᓕᕆᑦᑎᐊᒻᒪᕆᒋᐊᖃᐃᓐᓇᐅᔭᕐᖢᖓᓗ ᐅᔾᔨᖅᓱᑦᑎᐊᕐᓗᖓᓗ ᖃᓄᐃᑦᑐᓂᑦ ᐊᔪᕐᓇᙱᓕᒫᖓᓂᑦ.
ᐃᓗᐊᖅᓴᐃᔨᑦ ᓄᓇᕗᒻᒥᑦ ᐱᓕᕆᖃᑎᖃᑦᑎᐊᓲᑦ ᐋᓐᓂᐊᕕᓕᐊᕐᑐᓂᑦ ᐃᓗᐃᑦᑑᓕᖓᔪᑎᒍ ᑲᒪᓪᓗᑎᒃ ᐋᓐᓂᐊᕕᓕᐊᕐᑐᓂᑦ, ᐃᓚᖏᓐᓂᑦ ᓄᓇᓕᖕᓂᓪᓗ ᐃᓗᐃᑦᑐᑎᑐᑦ. ᐃᓄᐃᑦ ᐃᓕᖅᑯᓯᒥᓂ ᐱᓯᒪᑦᑎᐊᕐᑐᑦ ᑲᒪᓇᕐᓯᒪᓪᓗᓂᓗ ᑕᐅᑐᒋᐊᖓᓂᑦ. ᐃᒃᐱᒍᓱᑦᑎᐊᕐᑐᒻᒪᕆᐊᓗᐃᑦ ᐃᓐᓇᕐᓂ, ᐱᐅᓯᐅᕙᓚᐅᕐᑐᓂ ᓄᓇᒥᓪᓗ. ᐱᒻᒪᕆᐅᕗᖅ ᐃᒃᐱᒋᑦᑎᐊᕐᓗᒋᑦ ᐅᑯᐊ ᐃᓕᖅᑯᓯᑦ ᐊᑐᕐᓗᒋᓪᓗ ᐊᔪᕐᓇᙱᓕᒫᖓᓂ ᓄᓇᓕᖕᓃᑎᓪᓗᑎᒃ. ᑕᒫᓃᑎᓪᓗᖓ, ᐃᓕᑦᑐᓐᓇᕐᓯᓚᐅᕐᐳᖓ ᓂᕿᓪᓚᑦᑖᓂᑦ ᓲᕐᓗ ᓇᑦᑎᖅ, ᕿᓚᓗᒐᖅ, ᑐᒃᑐ ᐊᒻᒪᓗ ᐱᒻᒪᕆᐅᓂᖓᓂ ᓄᓇᓕᖕᓄᑦ. ᐃᓕᑦᑎᓚᐅᕆᕗᖓᑦᑕᐅᖅ ᐊᖑᓇᓱᖕᓂᑦ ᐃᒻᒥᒧ ᐃᓱᒪᑦᑎᐊᕆᓕᕐᐸᓪᓕᐊᓐᓇᕐᑐᑦ ᐃᓄᖕᓂᓪᓗ ᐃᑲᔪᕈᑕᐅᕙᒃᖢᓂ ᓄᓇᓕᖕᓄᑦ.
ᓄᓇᕗᒻᒥᑦ ᐃᓗᐊᖅᓴᐃᔨᑦ ᓈᓚᑦᑎᐊᒃᑲᒻᒪᕇᑦ ᑭᒡᒐᖅᑐᐃᕙᒃᖢᑎᒃᓗ ᑕᑯᔭᒥᓂᒃ. ᐃᖢᐊᖅᓴᐃᓲᑦ ᖃᓄᐃᑦᑐᖃᕐᑎᓪᓗᒍ ᐃᒃᐱᒍᓱᑦᑎᐊᕈᓐᓇᕐᖢᑎᒃᓗ ᑐᑭᓯᐊᑦᑎᐊᕐᖢᑎᒃᓗ. ᐊᑯᓂᐸᓗ ᐃᓅᖃᑎᑖᕐᓇᕐᑐᖅ ᑕᑯᔭᕐᓂᑦ ᑭᓯᐊᓂᓕ ᐱᒻᒪᕆᐅᔪᖅ ᐋᓐᓂᐊᕕᓕᐊᕐᑐᓄ ᖃᐅᔨᒪᓗᑎᒃ ᑕᑎᖃᕐᓗᑎᒃᓗ ᐋᓐᓂᐊᓯᐅᑎᓂᑦ.
ᐅᑭᐅᖅᑕᖅᑐᒥ ᐃᓗᐊᖅᓴᐃᔨᐅᓂᖅ ᐊᒃᓱᕈᕐᓇᓛᖅ ᐃᖅᑲᓇᐃᔮᕆᓚᐅᕐᓯᒪᔭᓐᓂᑦ, ᑭᓯᐊᓂᓕ ᖁᕕᐊᓇᒻᒪᕆᖃᑦᑕᕐᓯᒪᔪᖅ. ᑕᐅᑐᖃᑦᑕᕐᐳᖓ ᐃᓄᐃᑦ ᖃᓄᐃᑦᑐᓐᓃᕐᐸᓪᓕᐊᔪᑦ ᖃᓄᕈᓘᔭᖅ ᓲᕐᓗ ᑎᒥᒥᒍ, ᐃᓱᒪᒥᒍᑦ ᐃᓅᖃᑎᖃᕐᓂᖏᑎᒍᓪᓗ.
ᐃᓄ ᐅᖃᕐᑎᓪᓗᒍ, “ᑕᑯᒃᑲᓐᓂᓛᕐᐸᒋᑦᑐᖅ” ᐅᕝᕙᓘᓐᓃᑦ “ᐅᐊᕋᔮ ᐅᑎᓛᕋᕕᑦ” ᐱᕐᔪᐊᒻᒪᕆᐊᓗ ᓄᓇᕐᔪᐊᒥᑦ! ᐃᓗᐊᖅᓴᐃᔨᐅᓪᓗᓂ ᓄᓇᕗᒻᒥᑦ ᑲᒪᔨᙳᖃᑦᑕᕐᐳᑎᑦ ᐋᓐᓂᐊᕕᓕᐊᕐᑐᓂᑦ. ᐃᓚᒋᔭᐅᒐᕕᑦ ᐱᓕᕆᖃᑎᒌᓂ ᖁᕝᕙᖅᓴᐃᔪᓐᓇᕐᑐᑦ ᑕᕐᓂᖏᓐᓂᑦ ᑲᔪᖏᖅᓱᕐᓗᒋᓪᓗ ᖃᓄᐃᙱᑦᑎᐊᖁᓗᒋᑦ ᓴᙱᖁᓗᒋᓪᓗ. ᐃᓗᐊᖅᓴᐃᔨᑦ ᐊᑑᑎᖃᕈᓐᓇᖅᑐᑦ ᖃᓄᑐᐃᓐᓇ ᐱᓕᕆᐊᖏᓐᓂᑦ ᐋᓐᓂᐊᓯᐅᑎᐅᓪᓗᑎᒃ. ᑕᒪᓐᓇ ᐊᑐᕐᓯᒪᔭᕋ ᐱᕈᖅᐹᓪᓕᕈᑎᒋᓯᒪᕙᓂ ᐃᓗᐊᖅᓴᐃᔨᑐᐃᓐᓇᕐᑑᙱᑦᑐᑐ, ᑭᓯᐊᓂᑦᑕᐅᖅ ᐃᓄᒃᑐᑦ. ᖁᕕᐊᓱᑦᑎᐊᕐᑐᖓ ᓂᕈᐊᕐᓯᒪᒐᒃᑯ ᑕᒪᓐᓇ ᐊᓯᐊᒍᓪᓗ ᐊᑐᕋᔭᙱᑦᑎᐊᕐᖢᖓ.