Kristen Hebert's Story
ᐃᖅᑲᐅᒪᑦᑎᐊᕐᑕᕋᓱ ᓱᓕ ᐅᖄᓚᕕᐅᒐᑦᑕ − "ᐱᑕᖃᒃᑲᓐᓂᓕᕐᑐᖅ." ᔮᓄᐊᕆᐅᑉ ᕿᑎᐊᓃᓚᐅᕐᑐᖅ. ᐃᒡᓗᓕᒃ ᐃᓱᓕᔾᔪᔾᔨᓕᒑᑦᑎᐊᓕᕐᑎᓪᓗᒋ ᓯᐊᒻᒪᒃᑐᖃᓚᐅᕐᑎᓪᓗᒍ ᓯᕗᓪᓕᕐᐹᒥ ᓄᕙᒡᔪᐊᕐᓇᖅ-19 ᑎᓯᐱᕆ 2021 ᓄᙳᐊᓂᑦ. ᖃᐅᔨᒪᓚᐅᕐᑐᖓ ᓴᖅᑭᑦᑐᖃᐅᒃᑲᓐᓂᓛᕐᓂᖓᓂ, ᑭᓯᐊᓂᓕ ᓂᕆᐅᑦᑎᐊᕋᓱᓚᐅᕐᐳᖓ ᐱᐅᓛᒥᑦ. ᐃᑲᕐᕋᑦ 48 ᐃᓗᐊᓂ ᖃᐅᔨᓚᐅᕐᐳᒍ ᐊᒥᓲᓂᕐᓴᐅᓂᖏᓐᓂᑦ ᐊᑐᓚᐅᕐᑕᑦᑎᓐᓂᑦ ᐊᕐᕌᒎᓚᐅᕐᑐᒥᑦ.
ᐅᖃᕈᓐᓇᕐᐳᖓ ᐆᒥᖓ, ᐱᕙᒌᔭᓚᐅᕐᐳᒍᑦ ᐅᑯᓄᖓ ᐅᓪᓗᓄ ᐊᑯᓂᐊᓗᒃ. ᐸᖕᓇᐅᓯᐅᙳᐊᕐᐸᒃᖢᑕ ᐅᖃᐅᓯᕆᕙᒃᖢᑎᒍᓪᓗ ᐊᕐᕌᒎᓄ ᒪᕐᕉᖕᓄ, ᑭᓇ ᖃᓄᐃᓕᐅᕐᑎᐅᓇᔭᕐᐸ ᐋᓐᓂᐊᕕᖕᒥ “ᑕᒡᕙᓕ ᖃᓄᐃᑉᐸᑦ” ᒪᑯᐊ ᐅᐃᒍᐃᔭᕆᐊᖃᕋᔭᖕᒪᖔᑦᑕ ᐋᓐᓂᐊᕕᕗᑦ ᐊᓯᔾᔨᕐᓗᒋᑦ ᐃᑲᕐᕋᕗᑦ ᖃᐅᔨᓇᓱᒍᓐᓇᖁᓪᓗᑕ ᐃᖃᕐᕋᓄ 24−ᓄᑦ ᐅᓪᓗᕐᒥᑦ. ᐃᓱᒪᒋᓪᓗᒋᑦ, ᐃᓱᒪᔪᖓ ᑖᒃᑯᐊ ᐸᖕᓇᐅᑎᑦ ᖃᓄᐃᓗᐊᙱᔾᔪᑎᒋᒐᑦᑎᒍ, ᐅᑎᕐᑕᐃᓐᓇᐅᔭᕆᐊᖃᕋᓗᐊᕐᑎᓪᓗᑕ ᓴᓇᕝᕕᖕᒥᑦ 100−ᓚᐅᕐᓱᕐᖢᑕ ᓯᐊᒻᒪᒃᑐᖃᓕᕐᑎᓪᓗᒍ, ᐱᒋᐊᕐᕕᖃᓚᐅᕋᑦᑕᓕ ᑕᐅᑐᙳᐊᒐᖃᕐᖢᑕᓗ ᖃᓄᖅ ᓄᖅᑲᖓᑎᑦᑐᓐᓇᕐᒪᖔᑦ ᓄᕙᒡᔪᐊᕐᓇᖅ-19−ᒧᑦ ᓯᐊᒻᒪᖕᓂᐅᔪᖅ.
ᐃᓱᒪᒋᓪᓗᒍ ᔮᓄᐊᕆᒥ ᒫᑦᓯᒧᑦ 2022, ᐊᒥᓱᓂ ᐃᒃᐱᒋᔭᖃᐅᖃᑦᑕᓚᐅᕐᐳᖓ. ᐱᖏᒐᖕᓂᖅ. ᐃᓗᐊᖅᓴᐃᔨᐅᒐᒪ ᐃᒡᓗᓕᖕᒥᑦ ᑐᑭᒧᐊᒃᐸᒃᖢᒋᓪᓗ ᐃᓅᓵᑦ ᖃᐅᔨᓴᕐᑕᐅᓂᖏᑦ ᓄᓇᓕᑦᑎᓐᓂᑦ. ᒪᒃᑯᒃᑐᑦ ᐋᓐᓂᐊᓕᑉᐸᓪᓕᐊᓕᕌᖓᒥᒃ, ᐱᖏᒋᕙᒃᐸᒃᑲ. ᐱᖏᒋᖃᑦᑕᓚᐅᕐᐸᒃᑲ ᐊᖓᔪᖅᑳᖏᑦ. ᐃᖅᑲᐅᒪᖃᑦᑕᓚᐅᕐᐸᒃᑕ ᐃᖅᑲᓇᐃᔮᓂᒃᑳᖓᒪ, ᓯᓂᖕᓂᐊᓕᕌᖓᒪ, ᓴᙱᔫᖁᓪᓗᒋᓪᓗ ᐊᓂᒍᐃᓂᐊᖕᒪᑕ ᑕᒪᑐᒥᖓ. ᐊᓂᒍᐃᓚᐅᕐᑐᓪᓗ! ᐃᓛᓐᓂᒃᑯᑦ ᐃᑲᔪᕈᓐᓇᐃᓪᓕᖅᑰᔨᑦᑎᐊᕐᐸᒃᖢᓂ, ᐱᓗᐊᕐᑐᒥ ᐅᖃᓗᒡᕕᒋᓪᓗᒋᑦ ᐃᓚᒌᑦ ᐱᑖᕐᓂᖏᓐᓂᑦ. ᐃᖅᑲᐅᒪᔪᖓ ᐃᓄᐃᑦ ᕿᐊᖃᑦᑕᓚᐅᕐᑐᑦ ᑲᑉᐱᐊᓱᒃᖢᓂ ᐅᖄᓚᐅᑎᒃᑯᑦ. ᐃᒡᓗᓕᖕᒥᑦ ᓯᐊᒻᒪᒃᑐᒻᒪᕆᐅᓕᕐᑎᓪᓗᒍ, ᓲᕐᓗᓕ ᐊᖏᕐᕋᐅᓚᐅᕐᓯᒪᙱᖦᖢᑕ. ᑕᐃᑲᓃᖃᑦᑕᓚᐅᕐᐳᒍᑦ ᐅᓪᓗᓄ 7−ᓄᑦ ᐱᓇᓱᐊᕈᓯᒥ ᐅᓪᓗᒥᑦ ᐅᓐᓄᖕᒧᑦ ᐃᓛᓐᓂᒃᑯᓪᓗ ᐅᖁᒪᐃᑦᑐᐊᓘᔭᓕᕐᐸᒃᖢᓂ ᑐᓄᒃᑯ ᓯᐊᒻᒪᒃᑎᑦᑎᑦᑕᐃᓕᒪᑎᓪᓗᑕ. ᑕᐃᒃᑯᐊ ᐅᓪᓗᐃᑦ ᐊᒃᓱᕈᕐᓇᓚᐅᕐᑐᑦ.
ᑖᒃᑯᐊ ᑕᖅᑮᑦ ᐊᒃᓱᕈᕐᓇᒻᒪᕆᓚᐅᕋᓗᐊᕐᖢᑎᒃ, ᑭᒧᒻᒧ ᐃᖅᑲᕉᒪᖃᑦᑕᕐᑕᕋ ᐱᒃᑯᒍᓱᒃᖢᖓ. ᐋᓐᓂᐊᕕᒃᐳᑦ ᒪᑭᓯᒪᓚᐅᕐᐳᖅ ᐊᒃᓱᕈᕐᓇᕐᑎᓪᓗᒍ ᓴᐳᑎᓇᓱᒃᖢᑎᒍᑦ ᓄᓇᓕᕗᑦ. ᑭᒃᑯᓕᒫᑦ ᐱᓕᕆᐊᒃᓴᖃᓚᐅᕐᐳᑦ ᐱᓕᕆᑦᑎᐊᕐᑐᒻᒪᕆᐅᓚᐅᕐᖢᑎᒃᓗ. ᐃᖅᑲᓇᐃᔭᖃᑎᒌᑦᑎᐊᓚᐅᕐᑐᒍ ᐃᓱᒪᒃᓴᖅᓯᐅᕈᓐᓇᕐᖢᑕᓗ ᐊᓯᔾᔩᔪᓐᓇᕐᖢᑕᓗ ᑲᒪᒋᔭᖃᕐᓂᑦᑎᓐᓂ ᐱᐅᓂᕐᓴᓄᑦ. ᑭᒃᑯᓕᒫᑦ ᐃᓗᐊᖅᓴᐃᔨᓂᑦ, ᐃᖅᑲᓇᐃᔭᕐᑐᑦ ᐅᓪᓗᒃᑯᑦ ᐅᓐᓄᒃᑯᓪᓗ ᓇᓗᓇᐃᔭᐃᓇᓱᒃᖢᑎᒃ ᐃᓅᓕᓴᐃᓇᓱᒃᖢᑎᒃᓗ ᓄᕙᒡᔪᐊᕐᓇᖅ-19−ᒧᑦ ᐊᐃᑦᑐᕐᑕᐅᓯᒪᔪᓂᑦ, ᓴᓗᒻᒪᕐᓴᐃᔨᑦᑎᓐᓄᑦ ᓴᓇᔪᓕᕆᔨᑦᑎᓐᓄᓪᓗ ᑲᑉᐱᐊᓱᒐᑎᒃ ᑭᐅᖃᑦᑕᓚᐅᕐᑐᑦ ᐅᕙᑦᑎᓐᓄᑦ ᐊᑦᑕᕐᓇᓛᑦᑎᐊᖑᑎᓪᓗᒍ, ᑭᐅᔨᑦᑎᓐᓄᑦ ᑭᐅᓚᐅᕐᑐᑦ 100−ᒐᓵᓗᖕᓂᑦ ᐃᑲᔪᖅᑐᐃᓪᓗᓂ ᐃᖅᑲᓇᐃᔭᕐᖢᓂᓗ ᐊᒃᓱᕈᕐᖢᓂ ᐱᓕᕆᐊᒃᓴᒥᓂᑦ. ᐱᐅᓱᒋᔾᔪᑎᒋᙱᓚᒃᑲ ᐃᖅᑲᐅᒪᔭᓐᓂᑦ.
ᐋᓐᓂᐊᓯᐅᑎᑦ ᐱᓇᓱᐊᕈᓯᐊ ᐊᑲᐅᓛᖑᕗᖅ ᐃᑲᐅᒪᓗᒋᑦ ᐃᖅᑲᓇᐃᔮᒻᒪᕆᒃᐳᑦ ᖃᓄᐃᓕᐅᕐᓯᒪᓂᖏᓐᓂᑦ ᐊᒃᓱᕈᕐᓇᕐᑐᖃᕐᑎᓪᓗᒍ. ᓇᓴᐃᕐᐳᖓ ᐃᓗᐊᖅᓴᐃᔨᓕᒫᓄᑦ ᐋᓐᓂᐊᓯᐅᑎᓄᓪᓗ ᐊᒃᓱᕈᓚᐅᕐᓂᖏᓐᓂ ᐊᕐᕌᒍᓄᑦ ᒪᕐᕉᖕᓄᑦ. ᐊᒃᓱᕉᑕᐅᔪᓂ ᐊᑐᓚᐅᕐᑕᑦᑎᓐᓂᑦ ᐊᒃᓱᕈᕐᓇᓛᖑᑐᐃᓐᓇᕆᐊᓕᒃ ᐊᑐᕐᓯᒪᔭᑦᑎᓐᓂ ᐅᓪᓗᒥᐅᔪᖅ, ᑭᓯᐊᓂ ᓱᓕ ᑕᒡᕙᓃᑉᐳᒍ ᐃᓕᖕᓄᑦ. ᐊᑐᐃᓐᓇᐅᓪᓗᑕ ᑲᒪᒋᔭᖃᕆᐊᒃᓴᖅ ᐃᓕᖕᓂᑦ ᐃᓚᖕᓂᓪᓗ ᑲᒪᒋᔭᐅᔭᕆᐊᖃᓕᕌᖓᔅᓯ. ᖁᔭᓐᓇᒦᒃ ᐃᓗᐊᖅᓴᐃᔨᑦ.
ᒃᕆᔅᑎᓐ ᕼᐄᐳᑦ
ᓄᕙᒡᔪᐊᕐᓇᖅ-19−ᒧᑦ ᑐᐊᕕᖕᓇᖅᑐᓕᕆᔨᓂ ᓯᕗᓕᖅᑎ ᐃᒡᓗᓕᖕᒧᑦ
ᓄᓇᓕᖕᓂ ᐋᓐᓂᐊᓯᐅᑎ