Annie’s Story
ᖁᕝᕙᓯᖕᓂᓕᒃ 11-ᒦᖃᑕᐅᑎᓪᓗᖓ ᐃᔩᒃᑲᒃ ᒪᒃᐱᖅᑕᐅᑦᑎᐊᓚᐅᖅᓯᒪᕗᑦ. ᑕᐃᔅᓱᒪᓂᐅᑎᓪᓗᒍ, ᐱᖃᓐᓈᖃᖅᖢᖓ ᓯᕗᓪᓕᖅᐹᒥ ᐊᕕᑕᐅᓚᐅᖅᓯᒪᕗᖓ, ᓯᕗᓪᓕᖅᐹᑦᑎᐊᒥᒡᓗ ᓂᑲᓪᓗᖓᓐᓇᖅᑐᒧᑦ ᑎᑭᑕᐅᓚᐅᖅᐳᖓ. ᑕᖅᑭᓂᒃ ᖃᔅᓯᐊᕐᔪᖕᓂᒃ ᖃᓄᖅ ᐃᓱᒪᑦᑎᐊᕋᓗᐊᕐᒪᖔᑦ ᓇᓗᓇᖅᑐᒦᓚᐅᖅᐳᖓ. ᐃᖅᑲᐅᒪᙱᑦᑐᖓᓘᓐᓃᑦ ᐱᖃᓐᓇᕆᔭᒃᑲ ᐅᐸᒃᓯᒪᑲᑕᓚᐅᕋᓗᐊᕐᒪᖔᑕ, ᐃᖅᑲᐅᒪᙱᖦᖢᖓᓗ ᐱᙳᐊᖅᑐᓂᒃ ᐱᙳᐊᖃᑕᐅᓚᐅᕋᓗᐊᕐᒪᖔᕐᒪ. ᑕᐃᔅᓱᒪᓂᐅᑎᓪᓗᒍ ᖃᓄᓗᒃᑖᖅ ᐱᓂᐊᕐᓂᐅᓚᐅᖅᑐᑦ ᐃᖅᑲᐅᒪᓇᙱᑦᑎᐊᖅᑐᑦ. ᐊᔪᕐᓇᖅᑐᖅᓯᐅᒻᒪᕆᓕᓚᐅᖅᐳᖓ ᐊᕕᑕᐅᓯᒪᓕᖅᑎᓪᓗᖓ, ᐅᔾᔨᕈᓱᓕᑕᐃᓐᓇᓕᓚᐅᕋᒪ ᖃᔅᓯᒃᑭᐊᖅ ᑕᖅᑮᑦ ᐊᓂᒍᖅᓯᒪᓕᖅᑎᓪᓗᒋᑦ. ᓯᕗᓪᓕᖅᐹᒥ ᐃᓕᓐᓂᐊᕐᕕᖕᒥ ᐃᓅᓯᓕᕆᔨᒧᑦ ᐃᑲᔪᖅᑕᐅᑲᑕᒐᓱᓚᐅᕋᓗᐊᖅᐳᖓ. ᐱᕕᖃᖅᑎᑦᑎᐊᖃᑦᑕᓚᐅᖅᐹᖓ ᐃᓯᕈᒪᒑᖓᒪ ᖃᖓᒥᐊᖅ ᐃᓯᕈᓐᓇᖅᑎᖦᖢᓂᖓ. ᐅᑭᐅᑦ ᖃᔅᓯᐊᕐᔪᑦ ᐊᓂᒍᖅᑐᓂᒃ, ᐅᖃᓪᓚᖃᑎᖃᖃᑦᑕᓚᐅᖅᐳᖓ ᐊᔾᔨᒌᙱᑦᑐᓂᒃ ᐃᓅᓯᓕᕆᔨᓂᒃ. ᓯᓚᑦᑐᖅᓴᕐᕕᖕᒦᓕᖅᑎᓪᓗᖓ ᖃᐅᔨᓴᖅᑕᐅᒐᒪ ᖃᐅᔨᔭᐅᓚᐅᖅᐳᖓ ᓂᑲᓪᓗᖓᔪᐊᓘᓂᓐᓂᒃ ᐊᒻᒪ ᓯᕘᕋᔪᐊᓘᓂᕐᓂ ᐄᔭᒐᕆᐊᖃᓕᓚᐅᖅᒪᕗᖓ ᓂᑲᓪᓗᖓᓐᓇᙱᑦᑐᓂᒃ.
ᐊᑯᓂᒻᒪᕆᐊᓗᒃ ᐃᑲᔪᖅᑕᐅᔪᒪᒐᓗᐊᖅᖢᖓ ᐊᐱᕆᒋᐊᒃᓴᖅ ᑲᑉᐱᐊᓱᖃᑦᑕᓚᐅᖅᐳᖓ. ᖃᔅᓰᖅᓱᑲᓪᓚᒡᔪᐊᖅᖢᖓ ᐅᖃᓪᓚᒍᒪᒐᓗᐊᖅᖢᖓ ᑲᑉᐱᐊᓱᓕᕌᖓᒪ ᓂᐸᐃᑐᐃᓐᓇᖃᑦᑕᓚᐅᖅᐳᖓ, ᖃᑯᒍᙳᖅᐸᓪᓕᐊᑎᓪᓗᒍᓗ ᓱᖏᐅᑎᕙᓵᕐᓂᖅᖢᒍ. ᒫᓐᓇᓕ ᐃᖢᕐᕆᓂᖅᓴᐅᓕᖅᑐᖓ ᐃᓅᖃᑎᓐᓄᑦ ᒪᒃᐱᖅᓯᒪᒋᐊᒃᓴᖅ. ᓯᕗᓪᓕᕐᒥ ᐃᓅᓯᓕᕆᔭᐅᑲᑕᒐᓱᒃᑎᓪᓗᖓ ᐃᓱᒫᓗᖕᓇᖅᑐᒻᒪᕆᐊᓘᓚᐅᕐᒪᑦ. ᐊᓈᓇᒪ ᐃᑲᔪᖅᓱᑦᑎᐊᕐᒫᖓ ᖃᐅᔨᓇᓱᐃᓐᓇᖃᑦᑕᖅᑎᓪᓗᒍᓗ ᖃᐅᔨᒪᓂᖃᑦᑎᐊᖅᑐᓂᒃ ᐃᑲᔪᖅᑎᒃᓴᖅᓯᐅᖅᐸᒃᖢᓂᖓ ᐅᕙᓐᓄᑦ ᐃᑲᔫᑎᔪᓐᓇᕐᓂᖏᓐᓂᒃ ᖃᐅᔨᒪᓚᐅᕐᒪᑦ, ᐃᑲᔪᖅᑕᐅᓪᓗᖓ ᐃᑲᔫᑎᖃᓚᐅᖅᐳᖓ ᐃᑲᔪᖅᑕᐅᒋᐊᒃᓴᖅ ᑲᑉᐱᐊᓇᙱᑦᑐᓐᓇᕐᓂᖓᓐᓂᒃ.
ᒫᓐᓇᓕ, ᖃᓄᐃᙱᑉᐹᓪᓕᕐᔪᐊᓕᖅᑐᖓ. ᐃᓛᓐᓂᒃᑯᑦ ᐃᒪᐃᓕᖓᓲᖑᓕᖅᐳᖓ ᖃᔅᓯᐊᕐᔪᖕᓄᑦ ᑕᖅᑭᓄᑦ ᖃᓄᐃᙱᑦᑎᐊᓚᐅᕐᓗᖓ ᑭᖑᓂᐊᒍᑦ ᓂᑲᓪᓗᖓᔪᐊᓘᓕᖅᐸᒃᖢᖓ. ᐅᑯᐊ ᐃᖅᑲᐃᓯᔾᔪᑎᒃᓴᑦ ᐅᕙᓐᓂᑦᑕᐅᖅ ᐃᓅᓯᓐᓄᑦ ᒪᒥᓴᖃᑕᐅᒋᐊᖃᕐᒥᒐᒪ. ᖃᓄᕈᓘᔮᓗᒃ ᐊᕐᕌᒍᒥ ᖃᓄᐃᓕᐅᒐᒃᓴᖃᕋᒪ ᐱᔪᒃᓯᑦᑎᐊᖅᐳᖓᓗ ᑭᒡᒐᖅᑐᐃᔪᓐᓇᕐᓂᐊᕋᒪ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐊᒻᒪ ᖃᓄᐃᙱᑦᑎᐊᕐᓇᖅᑐᓂᒃ ᐃᓄᖕᓄᑦ.
ᐃᓱᒪᒥᒍᑦ ᐊᔪᕈᑎᓕᖕᓄᑦ ᑲᙳᓇᖅᐸᒃᑐᒃᓴᐅᕗᖅ, ᐱᓗᐊᖅᑐᒥᒃ ᒪᒃᑯᒃᑐᑦ ᐊᒻᒪ ᐊᖑᑏᑦ ᐃᓱᒪᒥᒍᑦ ᖃᓄᐃᙱᑦᑎᐊᕈᓯᖏᓐᓄᑦ. ᐊᖓᔪᒃᖡᑦ ᑲᙳᓱᖕᓂᖅᓵᓘᖃᑦᑕᖅᑰᖅᑐᑦ. ᐱᕈᖅᓴᑎᓪᓗᖓ, ᖃᐅᔨᖃᑦᑕᓚᐅᖅᓯᒪᒐᒪ ᐊᓯᕗᑦ ᑐᑭᓯᐊᙱᑦᑐᑦ ᐃᓱᒪᒃᑯᑦ ᐋᓐᓂᐊᕈᑎᖃᖅᑎᓪᓗᖓ ᐅᖃᖅᐸᓚᐅᖅᖢᑎᒡᓗ ᐃᓱᒪᓐᓂᒡᒎᖅ ᐋᖅᑭᒃᑲᒃᑯ. ᑕᐃᒪᐃᑎᑦᑕᕋ. ᑖᓐᓇ ᐃᔩᖕᓄᑦ ᒪᒃᐱᕐᓇᖅᑐᕕᒡᔪᐊᕌᓘᓚᐅᖅᑐᖅ ᓱᓕ ᑲᙳᓇᖅᑑᒋᔭᐅᓂᖓᓄᑦ. ᐅᔾᔨᕐᓇᖅᑐᒻᒪᕆᖕᒥᒃ ᐊᔾᔨᒌᙱᓐᓂᖃᖅᐳᖅ ᑕᐃᔅᓱᒪᓂ ᐊᖓᔪᒃᖠᕐᓂ ᐃᓕᓐᓂᐊᖃᑕᐅᑎᓪᓗᖓ ᐃᓕᓐᓂᐊᕈᓯᐅᓚᐅᖅᑐᒥᒃ ᒫᓐᓇᓕᓴᕐᓂᒡᓗ. ᐃᓱᒪᒥᒍᑦ ᐊᔪᕈᑎᓖᑦ ᐊᒻᒪ ᖃᓄᐃᙱᑦᑎᐊᕐᓂᖅ ᐅᖃᐅᓯᐅᖃᑦᑕᓚᐅᖅᓯᒪᖕᒪᑕ, ᑭᓯᐊᓂ ᑭᒡᒐᖅᑐᖅᑕᐅᓗᐊᖅᐸᙱᖦᖢᑎᒃ. ᐃᓄᒋᐊᒃᖢᑕ ᖃᓄᐃᓕᐅᖁᔨᖃᑦᑕᓚᐅᖅᓯᒪᙱᓐᓇᑦᑕ ᒫᓐᓇ ᑕᐃᒪᐃᓕᐅᑲᑕᖕᒪᑕ ᑕᒪᑐᒪᓂ ᐊᕐᕌᒍᒥ. ᑖᒃᑯᐊ ᑲᒪᒋᔭᐅᑦᑎᐊᓚᐅᖅᐳᑦ ᒪᒃᑯᖕᓂᖏᑦ ᐱᔾᔪᑕᐅᓪᓗᑎᒃ. ᐃᓕᓐᓂᐊᖃᑎᒥᓂᒃ ᐊᓯᐅᔨᓚᐅᖅᑎᓪᓗᒋᑦ ᐊᒻᒪᐃᓛᒃ ᐱᓕᕆᐊᕆᔭᐅᓕᕐᓗᓂ ᐊᑭᓴᖅᑐᖅᑕᐅᓗᑎᒃ, ᑲᒪᓇᒻᒪᕆᒃᑐᖅ. ᖃᓄᐃᖅᑰᙱᑦᑎᐊᖅᑐᑦ ᑭᒡᒐᖅᑐᐃᑎᓪᓗᒋᑦ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐃᑲᔫᑎᒃᓴᒃᑲᓐᓂᕐᓂᒃ ᓴᖅᑭᑕᐅᖁᔨᓪᓗᑎᒃ. ᐃᓄᐃᑦ ᐃᓱᒪᕙᓪᓕᐊᑐᐃᓐᓇᕐᒪᑕ ᐱᐅᓯᕆᔭᐅᖔᕈᓐᓇᖅᑐᓂᒃ ᐃᒻᒥᓂᒃ ᐃᑲᔪᕐᓗᑎᒃ ᐃᓅᖃᑎᒥᓂᒡᓗ.
ᕿᓄᐃᓵᑦᑎᐊᖃᑦᑕᕆᔅᓯ ᐃᓕᔅᓯᓐᓂᒡᓗ ᐊᒃᓱᕈᖅᑎᓗᐊᖃᑦᑕᙱᓪᓗᓯ. ᐃᑲᔪᖅᑕᐅᔪᒪᖃᑦᑕᕆᔅᓯ ᐊᖓᔪᖅᑳᔅᓯᓐᓄᑦ, ᐃᓚᔅᓯᓐᓄᑦ ᐅᕝᕙᓘᓐᓃᑦ ᐱᖃᓐᓇᕆᔭᔅᓯᓐᓄᑦ. ᐱᑐᐃᓐᓇᕆᐊᖃᓕᕈᔅᓯ ᐃᖢᕐᕆᓕᕈᔅᓯᓗ, ᐃᓅᓯᓕᕆᔨᒧᑦ ᐃᑲᔪᖅᑕᐅᔪᒪᖃᑦᑕᕐᓂᐊᖅᐳᓯ! ᓯᕗᓪᓕᕐᒥ ᐊᓪᓗᕐᓂᖅ ᐊᒃᓱᕈᕐᓇᖅᑐᖅ ᐊᓂᒍᕋᓱᖕᓂᐊᕐᓗᒍ ᐃᓅᓯᓕᕆᔭᐅᓗᑎᓪᓗ ᑭᓇᒧᒃᑭᐊᖅ ᐃᑲᔫᑎᖃᕈᓐᓇᕐᒪᑦ ᐃᓄᖕᓄᑦ ᐅᖃᓪᓚᖃᑎᖃᕈᓐᓇᖅᓯᑦᑎᐊᕐᓗᑎᑦ ᖃᓄᖅ ᐃᒃᐱᒍᓱᖕᒪᖔᖅᐱᑦ ᐅᖃᓪᓚᒍᓐᓇᖅᓯᑦᑎᐊᕈᓐᓇᕋᕕᑦ. ᖃᐅᑕᒫᖅᓯᐅᑎᓯ ᐱᒋᐊᒃᓴᖅ ᐳᐃᒍᖃᑦᑕᖅᑕᐃᓕᒋᔅᓯ.
ᐃᕝᕕᓪᓘᓐᓃᑦ ᖃᐅᔨᒪᔭᐃᓪᓘᓐᓃᑦ ᐊᒃᓱᕈᕐᓇᖅᑐᒃᑰᖅᐸᑦ, ᐊᑏ ᐃᑲᔪᖅᑕᐅᒋᐊᕆᑦ. ᐃᓚᒋᔪᓐᓇᕐᑕᐃᑦ, ᐱᖃᓐᓇᕆᔪᓐᓇᕐᑕᐃᑦ, ᐃᓱᒪᓕᕆᔨᒃᑯᓐᓄᓪᓘᓐᓃᑦ ᐋᓐᓂᐊᕕᔅᓯᓐᓂ ᐋᓐᓂᐊᕕᐊᓗᖕᒥᓪᓘᓐᓃᑦ.
ᐅᖃᖃᑎᖃᖃᕐᓗᑎᑦ ᐅᖃᕐᕕᒋᔪᓐᓇᖅᑕᓐᓂᑦ: ᐃᓚᓐᓂᑦ, ᐃᓄᑐᖃᕐᒥᑦ, ᐱᖃᑎᓐᓂᓪᓘᓐᓃᑦ.