Havaktingit

You are here

Ukiuqtaqtumi Hivuliqtiit miitiqtut qaritaujakkut uqautiginahuarhugin hivulliutijaujukhat Ukiuqtaqtumi, ilaujullu Aanniaqtailidjutikkut pikhat, Aulapkaidjutikhat, Ilinniarutikhat, Hilaup Aallanguqtirninganiklu

Immaktirvia 14, 2021

Ukiuqtaqtumi Hivuliqtiit miitiqtut qaritaujakkut uqautiginahuarhugin hivulliutijaujukhat Ukiuqtaqtumi, ilaujullu Aanniaqtailidjutikkut pikhat, Aulapkaidjutikhat, Ilinniarutikhat, Hilaup Aallanguqtirninganiklu

Itquumanikkut Ayuirhautinikkutlu Nunaqaqqaahimayutigut

Una titiraqhimayuq hulaqutigiyauttaaqtuq. Tamaita ukiuqtaqtumi avikturviit aktungnaugiyauqaqtut ilihariaqtuqpaktunut nayuraqaqhutik ilihariaqtuqpaktunut kingguliptingnut tuquffinaktuq. Hivuliqtiit katimaliqtut uqautigiumaplugu una atuqtauvaktuq atuqtauhimmaaqhuni. Naunaingmat atiqanggittunik timait Nunaqaqqaarhimayut nutaqqainnik talvani Kamploops Aadlait Ilihariaqtuqtunik Nayugaannik puiguqtailidjutaunggittuq kihimi kappianaktumik atuqtauvaktuq Kanatap qan’ngaraaluk atuqtitpagainnik. Hadja pidjutihimmaaqtuq aktuqtauniq inungnut Yukon mi, Nunattiaqmi Nunavunmilu. Iharianaktut huli ikayuutiqhainnik Nunaqaqqaarhimayunut Inuit tamaini kavamatkunni hivumuuriamingnik ayuirhautinikkut nunaqaqqaahimayutigut. Hivuliqtiit an’ngiqtut havaaqhariaqaliqtut huli ihumagitigiplugu ayuirhautinikkut nunaqaqqaahimayutigut, naunaipkaqtitaulutik itquumanikkut, maligaliqidjutikkut pihimayutlu hadja Tuqhulauqtunik Hulipkaiquplugit Tuqhulauqtuniklu Apirhuinikkut taapkuninga ilitturiyauhimaliqtunik talvuuna pidjutauplutik kanatami puiguqtailidjutigiyauyuq ikayuutigiyaungmata itquumanikkut, mamittiirnirmun ayuirhautinikkutlu nunaqaqqaahimayunut tamainnut.

Ukiuqtaqtumi Angmaffaatirinia

Hivuliqtiit uqautigivaktait ammaffaaqlugit upalun’ngaiyaidjutit aqhuugutivaktainnik tamainni ukiuqtaqtuni ammaffaaqlutiklu kayuumiittunnuamik qayarnaittumiklu. Hivuliqtiit uqaqtait pidjutihimayut itquumanialuunniit inungnut aanniaqtailinirmun maliqayaqhaitigut ayurnaqhivaktutn tamainnut ukiuqtaqtuni nunaqaqtuni; kihiani, pidjutillutik hapkuing maliqqayaqhatigut piviqhaqaqlutik mamihaiqlutik qilaminnuaq ayuqhautimingnit ukiuqtaqtumi nunaqaqqaarhimayut uvagut anniaqtailipluta pidjutilluni QALAGYUARNIQ-19 hiamitirnia.

Hivuliqtiit uqaqtait amigaitqianik kapuqhiqtunikkut, tamainni talvainnakni avataanilu ukiuqtaqtumi avikturviinni, pipkainiaqtuq an’ngiyuamik inungnut aanniaqtailinirmun maliqqayaqhainnik utigutimiklu audlaqhimayunik Ukiuqtaqtumun. Hivuliqtiit pitquyut tamainnut nunaqaqtunut piinnariaqaqtunut pilutik kapuqhirnirmik qilamiklu pitquiplutik. Kapurhirnikkut pidjutihimmagutigiyauyuq ammaffaaqpaliriamingnik qayarnaittumik ikiqliyuummigutilutiklu qayarnaut ukiuqtaqtumi avikturviini nunaqaqtuni nunallaanilu.

Hivuliqtiit uqagiyait ikayuutiqhat piumayainniklu kavamaita piliqtainnik ikayuutiqhainnik pulaaqtarniq havakviuyut ikayuutiqhainnut hiamitirnianit puiguqtailiyaungmatlu taffumatigut ikayuutigiyaungmat ilaa Ukiuqtaqtumi maniliurnitigiyainnut. Uqagiyaitlu pidjutihimmaangnia havaqatigiingnik kavamatuqaitlu hiamitirnia pidjutilluni paannariingnikkutlu piliurnia ikayuutiqhainnik ammaffaaqtirinia Ukiuqtaqtup.

Hivuniraalurmut, naunaittumik aanniaqtailinirmun maniliqtuutiqhainnik ihariagiyauyut

Hivuliqtiit quviagiyait kavamatuqainnit maniliurnian’ngit aanniaqtailiqhatigut, taapkunaniklu ikayuutiqhainnik nutqaqtittinahuaqhugu hiamitirnia. Hivuliqtiit uqaqtait nunakyuaptingni hiamiatirnia aqhuugutigiyauyuq aanniaqtailinirmun tamainni Kanatami nunainnut.

Hiamitirnia naunaiqhitiyuq qilamik ihariagiyauyut aadlanik ikayuutiqhanik ihumagitigplugit ihumailiqidjutinikkut ipiralimaittuqaqtunutlu aktungnarniit, taapkunaniklu nutqaqtitauhimayut kin’nguvaktauhimayut pilaqhiqtauyuqhanut takuyauyuqhanutlu pidjutihimayauyut hiamitirniamit. Hakugingnia paatnagiingnik piqaqtuqhat tamainni kavamaliqidjutigiyauyuni imaa iyaami tamainni nunaptingni nunaqaqtut piyaamingnik nakuutqianik anniaqtailinirmun havaktaulutik aadlanggurniatigut ihariagiyauvangmata Ukiuqtaqtumi. Hivuliqtiit an’ngiqtait ihariagiyauyumik inirniqhaat nayuraqhaannik, naammagiyauyumik maniliqtuutiqhamik ihumagiplugit aanniaqtailinirmun piqutaitigut tamainni pinggahuni ukiuqtaqtumi avikturviinni.

Taapkuat Canada Health Transfer kut tunihivaktut inirniqhaat nayuraqhaannik, ihuaqtunik maniliqtuutiqhanik aanniaqtailinirmun. Ukiuqtaqtumi avikturviit piqaqtuqhatlu aadlanik aanniaqtailinirmun maniliqtuutiqhanik iharianaittumik ihuaqtumiklu pidjutiyaami akituyunik akiinnut pipkaiyaamilu pidjutilginnut mikiyunut nunaqatigiiqtunut, un’ngahiqtilaanggitlu ihumagiplugitlu inuqarniitigut maniliurningganik ayuqhautigivagait taimaittut pidjutigiyauvaktut Ukiuqtaqtumi.

Aulapkaidjutiqhatigut Igluqhaniklu hivulliutigiyauhimmaaqpagait Ukiuqtaqtumi Avikturviinni Hivuliqtiinnut

Hivuliqtiit uqaqtait qanurinmanggaatigut aulapkaidjutiviliqinikkut Ukiuqtaqtumi naunaiqhugitlu akhut uqagiplugit aulapkaidjutiqhatigut ikitpallaaqpangmata maniliqtuutiqhait nunallaanut Ukiuqtaqtumi, aktuqtaudjutivaktut inungnut maniliurnirmunlu nunqaqtunut, kavamaliqidjutainnut maniliurnahuarnirmunlu.

Hivuliqtiit an’ngiqtait iharianiit pidjutihimmaaqlutik kavamatuqainnit maniliqtuutainnik pivallialiugutiqhanut aulapkaidjutigilluaqtuqhaniklu ikayuutiqhainnik maniliurnahuargutigivaktauyunik. Ilaliutilgitlu kihimi kiqliqargittut maniliurnirmun tariungmi tulaktarviitnik, milviqaqviit, apqutit, hivayauviliqidjutinik, iqluqhanut, pauwaqtuutiqhat nutaangguffaaqtuniklu aulaviqhanut aulapkaiviliqidjutinikkut.

Naunaittiarlugu aulapkaidjutiqhanut tikiutiyuqhat ilaudjutigiyaa naupkarnikkut tamaani nunaptingni, munariyaqaqhunilu pivallialiurnirmun piagainirmunlu, tikiutiplugitlu hivulliutigiyauyut takudjutinnaktuniklu iniktirutinik Ukiuqtaqtumi.

Hivuliqtiit kangiqhimayut pittalaqiyaangnirmun ihuaqtunut, akittuqpallaanggittunik nammagiyauyuniklu igluqhanik ilikkut pidjutilgit tamainnut inuup inuuhirittiarutiqhainnut, aanniartailinirmunlu, ilinniarnikkut havaaqhaqhiurnirmunlu. Hivuliqtiit uqaqtait ikiniat ihuaqtunik igluqhanik Ukiuqtaqtumi aktuqtaugitinggittait inuinnainarnut kihimilu taapkunanutlu nunallaanut. Nakuuhivallianinga kavamatuqainni ikayuutait havaqatigiingniitlu inungnut igluqhaitigut Ukiuqtaqtumi ihariagiqpiaqtut.

Ilihaqyuummingnikkut Ilihaqvikyuani Ukiuqtaqtumi

Hivuliqtiit uqaqtait pilluagaqhamut ilinniarnirmun Ukiuqtaqturmiutanut, qanuqlu maniliurnirmun pidjutivaktut ilihaqyuummingnitigut pipkaihungnguyuq piviqhanut Ukiuqtaqturmiutanut ilihaqyuummigumik ayuiqhaqlugitlu havaagiyauyut atauttimilu pivallialiqlutik nunamingni maniliurnahuarnirmun maniliurvinikkutigut.

Ikayuqlugit ayuiqhimakpiaqtunut Ukiuqtaqtumi havaktuni hakugingniqhaqaqlutik ikayuutiqaqlutik ikayuriamingnik maniliurnirmun ukiuqtaqtumi avikturviinggit hivulliutigihimmaaqtait taimaatun Hivuliqtiit. Havaqatigiihimmaaqtut Yukon Ilihaqvikyuan’nga, Nunavut Ilihaqpaalirvia Aurora College lu nutaan’nguqtiqtillugu ilihaqtittiyuni algatiq atulluaqpaktait ayuiqhaqhutik ilihaqvikyuani, ikayuutauniaqhuni hakugingniqaqluni tun’ngavikhait atuliqtittiliqluni Ukiuqtaqtumi ihumagiyauyuni piviqhainni utiqtiyaami maniliurnirmun inungnilu pilutik hakugingniqhamik nutaanik havaktittiliqlutik.

Hivuliqtiit ilitagitquyait takudjutittiplugu Yukon Ilihaqvikyuan’nga May 2020 mi.

Hivuliqtiit uqariyait Hilaup Aadlan’nguqtirnia tamaani Ukiuqtaqtumi

Kanatap Ukiuqtaqtumi uunnaalaqivaktuq aqhut pinggahutigut kayumitqilaatigut talvamit nunayuap akun’nganinit, aadlanggurniitlu pidjutiplutiklu amigaittuni aadlatkiingni Ukiuqtaqtumi inuuhiinnut nunagiyainnutlu. Hivuliqtiit ilitturipkagumayait Nunaqaqqaarhimayunut hivuliqtiit hilaup uqagiyaudjutainnik hivuniqhaalu uqarnirmun atauhirmik Ukiuqtaqtumi pilutik. Hivuliqtiit ilitariyait amigaikyuummingnia ikiqliyuumigumaplugit hun’ngiutigilugitlu pidjutainnut hilaup aadlan’nguqtirnia, imaalu pilutik halummaqhimayuqhamik auladjutikkut. Uqariyait ihariagigiut ihuaqtunik, piinnariaqaqtaaqtunik ihuaqhaihimayunik kavamatuqainnit ikayuutigiyauyunik uvani kiudjutimi. Unalu ilagiumayaat maniliqtuutiqhamik piliuriami Ukiuqtaqtumi Hilatigut Havagviuvikhamik ikayuriamingnik ukiuqtaqtumi’ qauyimayainnik hun’ngiutiuqhat aadlanggurnia hilap pidjutillutik piliurnirmun havaariyauyuqhanut Ukiuqtaqtumi.

Uqaqlugitlu amigaiyuummingniit nunami ayuqhautigiyauyut huqpaluiqhutiklu nappaktauhimayut apqutitluunnit pidjutihimangmata hilaup aadlangguqtirnianit taimaatut aulahimmaaqpaktuqlu akturnarniit Ukiuqtaqtumi. Hivuliqtiit ilitariyait pitquhiliqinikkut inungnunlu maniliurniq ilanggit aktungnautivaktut hilaup aadlangguqtirnianit pidjutivaktuq amigaitpiaqtunik ayurnaktunik nunallaanut. Immaktiqpiangnikkut, nunami ikualaaqtut, akhaqarninga nunauplu puvitquumannga mahaktirnia aktungnautigivaktut havaktilluta ikiqliyuummirahuaqhugit hun’ngiutilugitlu hapkua akturnarniit tamaani ukiuqtaqtumi.

Ukiuqtaqtup Ukiuqtaqtumilu Atugaqhanut Havaaqhait

Hivuliqtiit piumayut havaliqlugit atuliqtittirnirmun Ukiuqtaqtup Ukiuqtaqtumilu Atugaqhanut Havaaqhait. Hivuliqtiit ilitaqhimayut an’nginiqaqtuq havaktillutik nakuuqpiaqtumik aadlatkiiq ihumagidjutit aadlangguqpaktut maniliurnirmun upalunggaiyautainni hivulliutigiyauyuni uqaqlugit tamaita ukiuqtaqtumi avikturviit’ kitulluani inungni maniliurnirmunlu ihumagiyauyut pidjutivaqhuni-hiamitirnia hivikittumi ihumaliutqiqtauhimayunilu hivulliutigiyauyuqhani hivuniraalurmut.

Ukiuqtaqtumi Ukiuqtaqtumilu Atugaqhat Havaaqhait an’nginiqaqtuq ikayuut hivumuuriami tamainnit piumayainik tahapkunani ukiuqtaqtumi avikturviinni, Nunaqaqqaarhimayut, kavamatuqaitlu kavamainni. Havaaqhait ayurnaittumik pidjutihimmaaqtuqhat aadlanggurniitigut ihariagiyainni ukiuqtaqtumi avikturviinnut imaa piyaami tamatkiutiyaami nakuuqpiaqtumi talvani atuliqtittinirmuntigut.

Hivuliqtiit Sainiqtaat Nutaangguffaaqtumik Ukiuqtaqtumi Havaqatigiinirmun Ilitaqhidjutin’nga

Ihumagiplugit akturnarniit atuqhimayuni fiptiin tatqiqhiutini, Hivuliqtiit kangiqhipkaiyut nakuuyunik iniktiqtauyunik tikiutihimayunik talvuuna piplutik tamainni ukiuqtaqtumi ilaudjutilgit havaqatigiiqpangmata. Pidjutiplutik aqhuuqhainirmun kavamatuqainnit maniliqtuutiqhainnik aanniaqtailinirmun munaqhiyiitigut ikayuriamingnik QALAGYUARNITIGUT-19 kiuniit, havakpagainnikluunniit tuuliiqhimaittumik ihuaqtumiklu kapuqhiqtauyaangginni nunaqatait, Ukiuqtaqtumi Hivuliqtiit an’ngiqtut uvagut hakugitqiyauyugut tamapta pigupta.

Hivuliqtiit pittiarutigiyaat aqhuuqhainiat ukiuqtaqtumi avikturviit havaqatiqpiangmata ublumi sainiqhugu Ukiuqtaqtumi Havaqatigiinirmun Ilitaqhidjutin’nga. Talimani ukiuni an’ngirut tun’ngaviuyuq havaqatigiingnirmun tahapkunani pingahuni ukiuqtaqtumi avikturviinni kavamainni, imaalu piyaami havaqatigiiqtuqhat ihumagiyauyunik, uqaqlutiklu ihumaliuqatigiyainnik hivulliutiuqhanut.

Yukon naunaiyariiqhimavaktuq tun’ngahuktittiulutik Ukiuqtaqtumi Avikturviinnut Hivuliqtiit’ Katimadjutiqhainnut 2022 mi.

Aallanik ilitturittiarutikhanun:

Cate Macleod
Tuhaqtitaujuqhanut Titiraqtia Hivuliqtimun Savikataaq
867-975-5059
cmacleod@gov.nu.ca

Renée Francoeur
Ministat Tuhaqtipkaivia
867-334-9194
renee.francoeur@yukon.ca

Ministat Tuhaqtipkaivia
Nunatsiami Kavamanga
presssecretary@gov.nt.ca