Ilinniaqtuliqijikkut Havagvia unniutijuq nutaamik inuuhiringnaqtumik ikajuutikhamik pijaaqtunun Inuit FANSkut pivaktunun

Iqaluit, Nunavut (Nuvaipa 7, 2023) – Ilinniaqtuliqijikkut Havagvia quviahuktuq unniutiliramik nutaamik maniliqtuutikhamik pijaaqtunun Nunavunmi Inuit pivaktuq Manikkut Ikajuutikhanik Nunavunmi Ilihaqtunun (FANS). 

Uvani ukiakhami 2023 iliharvingmi, tamaita tadja Inuit pivaktuq uuminga FANSkut Ikajuutimik Aittuutimik pinialiqtun inuuhiringnaqtumik ikajuutikhamik imaatun $500 tamainni iliharvingni.

Ilinniaqtuliqijikkut Havagvia tadja havaliqtun angijumik ihivriurutimik uumani FANSkut pinahuarutimi upalungaijaliqtun tamaaqpiaq nutaanguqtirlugu ihuaqhaffaarlugulu pinahuaruti.

“Naunaittun havagutainnin ihivriuqhinirmin taimaatun akittuqjuummiqtunik maniliqtuutikhanik, taapkualluanilu aallatkiingni tamainni ikajuutikhanik ihariagijaujun nakuutqijaujumik pidjutikhaanik inirutikhainnik iliharvingjuani ilihaqtuni,” uqaqtuq Minista Ilinniaqtuliqijikkunni, Pamela Hakongak Gross. “Atuqtipkailirniq uumani tamaaqpiaq ihuaqhaqtauhimajumi FANSkut pinahuarutimi inihainnalimaittuq, ilihimajugullu ilihaqtun ihariagijun aallaniklu ikajuutikhanik tadja.”

Ilinniaqtuliqijikkut Havagvia piniarhimajun haipkaihimmaaqlugu una ikajurutikhaq talvunga nutaaq ihuaqhaqtauhimajuqlu FANSkut pinahuaruti atuliqtipkainianun.

Pittaaqtun FANSkut Inuit ilihaqtun niriuktaaqtun uqaqatigijaulutik FANSkut havagvianin pilutiklu nutaamik inuuhiringnirmun ikajuutimik qakugunnuaq tikittukhani qaffiujuni havainirni.