ᐅᖃᓚᐅᑎᓯᐅᑏᑦ

You are here

ᑐᑭᓯᐅᒪᖃᑎᒌᖕᓂᕐᒧᑦ ᐊᖏᖃᑎᒌᒍᑎ ᒐᕙᒪᒃᑯᓐᓂ ᐊᐳᖅᑎᕐᓈᖅᑐᒃᑯᓐᓂᓪᓗ

ᓯᑎᐱᕆ 20, 2017

ᐱᕙᓪᓕᐊᔪᑦ ᐅᖃᐅᓯᐅᔪᑦ

ᑐᑭᓯᐅᒪᖃᑎᒌᖕᓂᕐᒧᑦ ᐊᖏᖃᑎᒌᒍᑎ ᒐᕙᒪᒃᑯᓐᓂ ᐊᐳᖅᑎᕐᓈᖅᑐᒃᑯᓐᓂᓪᓗ

ᐃᖃᓗᐃᑦ, ᓄᓇᕗᑦ (ᓯᑎᐱᕆ 20, 2017) – ᒥᓂᔅᑕ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓐᓄᓪᓗ ᒫᓂᑲ ᐃᐅᓪ−ᑲᓇᔪᖅ ᐊᒻᒪ ᐋᒻᒪᕐ ᐃᐅᓪ−ᔫᓐᑎ, ᐊᐳᖅᑎᕐᓈᖅᑐᒃᑯᓐᓂ ᐊᖓᔪᖅᑳᕆᔭᐅᔪᖅ ᐅᓪᓗᒥ ᑐᑭᓯᐅᒪᖃᑎᒌᖕᓂᕐᒧᑦ ᐊᖏᖃᑎᒌᒍᑎᒥ ᐊᑎᓕᐅᖅᑲᐅᔫᒃ (MOU).

ᑐᑭᓯᐅᒪᖃᑎᒌᖕᓂᕐᒧᑦ ᐊᖏᖃᑎᒌᒍᑎ ᖁᓕᓂᒃ ᓯᕗᓪᓕᐅᑎᑕᐅᔪᒪᔪᓂᒃ ᓇᓗᓇᐃᖅᓯᕗᖅ ᐱᓕᕆᖃᑎᒌᖕᓂᕐᒧᑦ ᐅᖃᐅᓯᒃᓴᖃᕐᕕᒋᔭᐅᕕᒡᔪᐊᓕᓚᐅᖅᖢᓂᓗ ᐅᓄᖅᑐᓂᑦ ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᓐ ᐊᒻᒪ ᐊᐳᖅᑎᕐᓈᖅᑐᒃᑯᓐᓂ. ᐅᑯᐊ ᓯᕗᓪᓕᐅᑎᑕᐅᖃᑕᐅᔪᒪᔪᑦ ᐋᓐᓂᐊᖅᑐᓕᕆᓂᖅ, ᐃᓕᓐᓂᐊᖅᑐᓕᕆᓂᖅ, ᐱᓕᒻᒪᒃᓴᖅᑎᑦᑎᓂᖅ, ᐱᕙᓪᓕᐊᔪᓕᕆᓂᖅ, ᓄᓇᓖᑦ ᐊᐅᓚᔪᓐᓇᐅᑎᖏᑦ, ᐃᒡᓗᓕᕆᓂᖅ, ᐃᑦᑕᕐᓂᓴᓕᕆᓂᖅ, ᐆᒪᔪᓕᕆᓂᖅ, ᑭᒃᑯᑐᐃᓐᓇᓂᒃ ᐊᑦᑕᕐᓇᖅᑕᐃᓕᒪᑎᑦᑎᓂᖅ, ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ.

"ᐅᓄᖅᑐᓂᒃ ᐃᑲᔫᑎᒃᓴᓂᒃ ᐱᓕᕆᐊᖑᔪᖃᖅᐳᖅ ᑭᕙᓪᓕᕐᒥ, ᓇᓗᓇᐃᖅᓯᔪᒪᕗᒍᓪᓗ ᐱᓕᕆᖃᑎᒌᑦᑎᐊᖅᑐᓂᒃ ᓯᕗᒻᒧᐊᒃᑐᖃᖅᐸᓪᓕᐊᓂᖓᓂᒃ," ᒫᓂᑲ ᐃᐅᓪ−ᑲᓇᔪᖅ ᐅᖃᖅᑐᖅ. "ᑖᓐᓇ ᑐᑭᓯᐅᒪᖃᑎᒌᖕᓂᕐᒧᑦ ᐊᖏᖃᑎᒌᒍᑎ ᐱᒋᐊᓪᓚᒃᑲᓐᓂᕈᑕᐅᕗᖅ ᐊᖏᖅᓯᒪᓂᑦᑎᓐᓄᑦ ᐊᑐᕈᓐᓇᑦᑎᐊᖅᑐᓂᑦ ᐱᕙᓪᓕᐊᔾᔪᑕᐅᔪᓐᓇᖅᑐᓂᑦ ᐊᒻᒪ ᑲᔪᓯᓂᐊᕐᓂᕋᓪᓚᑦᑖᖅᐳᑦ ᐱᓕᕆᖃᑎᒌᖕᓂᐊᕐᓂᕋᖅᖢᑎᒃ."

"ᖁᕕᐊᓱᑦᑎᐊᖅᐳᒍᑦ ᓄᓇᕗᑦ ᒐᕙᒪᒃᑯᓐᓂ ᐱᓕᕆᖃᑎᖃᕈᓐᓇᕋᑦᑕ, "ᐋᒻᒪᕐ ᐃᐅᓪ−ᔫᓐᑎ ᐅᖃᖅᑐᖅ ᐊᐳᖅᑎᕐᓈᖅᑐᒃᑯᑦ ᐊᖓᔪᖅᑳᖓᑦ. "ᓄᓇᕗᒻᒥ ᓇᖕᒥᓂᓕᖕᓄᑦ ᐱᓕᕆᕝᕕᑦᑎᐊᕙᐅᕗᖅ ᐊᒻᒪ ᐱᔪᓐᓇᕐᓂᖃᕐᕕᐅᓪᓗᓂ ᐊᐳᖅᑎᕐᓈᖅᑐᒃᑯᓐᓄᑦ ᐱᓕᕆᔾᔪᑎᒃᓴᓄᑦ ᐊᐅᓚᔾᔪᑎᒃᓴᖏᓐᓂᒃ ᐊᕐᕌᒍᒐᓴᖕᓄᑦ. ᑐᓴᐅᒪᖃᑎᒌᖕᓂᕐᒧᑦ ᐊᖏᖃᑎᒌᒍᑎ ᐅᕙᑦᑎᓐᓂᒃ ᐱᓕᕆᖃᑎᒌᒍᓐᓇᖅᑎᑦᑎᕗᖅ ᑲᑐᔾᔨᖃᑎᒌᖕᓂᒃᑯᑦ ᐊᒻᒪ ᐅᖃᖃᑎᒌᒍᓐᓇᑦᑎᐊᕐᓗᑕ ᓇᓗᓇᐃᖅᓯᖁᓪᓗᑕ ᐃᑲᔫᑎᒃᓴᓂᒃ ᐋᖅᑭᒃᓱᐃᔪᖃᕐᓂᖓᓂᒃ ᐱᕙᓪᓕᐊᑎᑦᑎᔪᒥᑦ ᐊᒻᒪ ᐊᕙᑎᑦᑎᓐᓂ ᑲᒪᒋᔭᖃᑦᑎᐊᖅᑐᓂᑦ, ᓇᓗᓇᐃᖅᓯᓪᓗᑎᒡᓗ ᐊᖏᔪᒥᒃ ᐱᐅᔪᒥᒡᓗ ᐃᑲᔪᖅᑐᐃᓂᑦᑎᓐᓂᒃ ᓄᓇᕗᒻᒥᐅᓕᒫᑦ ᐱᕚᓪᓕᕈᑎᒃᓴᖏᓐᓄᑦ."

ᐊᖏᕈᑎᖃᖅᐳᑦ ᑐᓴᐅᒪᑎᑦᑎᑦᑎᐊᕐᓂᐊᕐᓂᕋᐃᓪᓗᑎᒃ, ᐱᓕᕆᐊᒃᓴᖃᓕᖅᑎᑕᐅᒃᑲᓐᓂᕐᓗᑎᒃ ᐃᓚᐅᖃᑦᑕᖅᑐᑦ ᑮᓇᐅᔭᓕᐅᕋᓱᐊᕐᓂᒃᑯᑦ, ᓇᓗᓇᐃᖅᓯᓗᑎᒃ ᐊᑐᕈᓐᓇᑦᑎᐊᖅᑐᓂᒃ ᐅᔭᕋᖕᓂᐊᕐᓂᕐᒧᑦ ᐱᕙᓪᓕᐊᑎᑦᑎᓂᕐᒥᒃ ᐊᒃᑐᐃᓗᐊᖅᑕᐃᓕᖁᓪᓗᒋᑦ ᐊᕙᑎᑦᑎᓐᓂ ᐊᒻᒪ ᐆᒪᔪᓂᒃ, ᐊᒻᒪ ᐃᓱᒪᒃᓴᖅᓯᐅᕈᑎᖃᕐᓗᑎᒃ ᐱᕚᓪᓕᕈᑕᐅᒐᔭᒃᑐᓂᒃ ᑲᑐᔾᔨᓪᓗᑎᒃ ᐱᓕᕆᐊᖑᕙᓪᓕᐊᔪᓂᒃ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᐃᐅᔩᓐ ᑯᕙᒃ
ᑐᓴᒐᒃᓴᓕᕆᓂᕐᒧᑦ ᐊᐅᓚᑦᑎᔨᐅᓚᐅᑲᒃᑐᖅ
ᐱᕙᓪᓕᐊᔪᓕᕆᓂᕐᒧᑦ ᐃᖏᕐᕋᔪᓕᕆᓂᕐᒧᓪᓗ
867-975-7867
ekwok@gov.nu.ca