ᐋᖅᑭᐅᒪᑎᑦᑎᔨ/ᐱᕋᔭᒍᑕᐅᔪᒥᒃ ᓴᖅᑭᑦᑎᓂᖅ - ᐊᐱᖅᑯᑕᐅᒐᔪᒃᑐᑦ
ᐋᖅᑭᐅᒪᑎᑦᑎᔨ/ᐱᕋᔭᒍᑕᐅᔪᒥᒃ ᓴᖅᑭᑦᑎᓂᖅ - ᐊᐱᖅᑯᑕᐅᒐᔪᒃᑐᑦ
ᑭᓱ/ᑭᓇ ᐋᖅᑭᐅᒪᑎᑦᑎᔨᐅᖕᒪᑦ?
ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᖁᔭᖅ (PSA) ᑎᓕᐅᕆᔾᔪᑕᐅᖕᒪᑦ ᓄᓇᕗᑦ ᒐᕙᒪᒃᑯᓐᓄᑦ (GN) ᐃᖅᑲᓇᐃᔭᖅᑎᓂᒃ ᖃᐃᖃᑦᑕᖁᓪᓗᒋᑦ ᐅᒃᐱᕈᓱᑐᐊᖅᐸᑕ ᐱᕋᔭᒃᑐᖃᓚᐅᕐᓂᖓᓂᒃ, ᐱᕋᔭᒃᑐᖃᓕᒑᓂᖓᓂᒡᓘᓐᓃᑦ ᐃᖅᑲᓇᐃᔭᕐᕕᖕᒥ. ᓄᓇᕗᑦ ᒐᕙᒪᒃᑯᓐᓄᑦ ᐋᖅᑭᐅᒪᑎᑦᑎᔨ ᕿᒥᕐᕈᖃᑦᑕᕆᐊᖃᕐᒪᑦ ᑖᒃᑯᓂᖓ ᐅᖃᐱᓘᑕᐅᔪᓂᒃ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᖁᔭᖅ ᒪᓕᒡᓗᒍ.
ᐅᖃᐱᓘᑕᐅᔪᑦ ᐱᕋᔭᒃᑐᖃᓚᐅᖅᑎᓪᓗᒍ ᐅᖃᐅᓯᐅᑦᑎᐊᙱᑉᐸᑕ ᓄᓇᕗᑦ ᒐᕙᒪᒃᑯᑦ ᓴᖅᑭᑕᐅᕙᒃᑐᒃᑯᑦ, ᐋᖅᑭᐅᒪᑎᑦᑎᔨ ᐅᖃᐱᓘᑕᐅᔪᓂᒃ ᐱᑎᑕᐅᖃᑦᑕᕐᓂᐊᖅᐳᖅ, ᖃᐅᔨᓴᕆᐊᖃᕌᖓᑦ ᖃᐅᔨᓴᖅᐸᒡᓗᓂ, ᐱᖁᔨᕗᖔᓕᐅᖅᐸᒡᓗᓂᓗ ᐱᓕᕆᑎᑦᑎᕙᒡᓗᓂ ᓴᖅᑭᑕᐅᑎᓐᓇᓱᒡᓗᒋᑦ ᐱᕋᔭᒍᑕᐅᔪᑦ.
ᑭᓲᖕᒪᑦ ᐱᕋᔭᒃᑐᖃᓚᐅᖅᑎᓪᓗᒍ ᓴᖅᑭᑦᑎᓂᖅ?
ᐱᕋᔭᒃᑐᖃᓚᐅᖅᑎᓪᓗᒍ ᓴᖅᑭᑦᑎᓂᖅ ᒪᓕᒋᐊᖃᖅᑎᑕᙳᖅᓯᒪᕗᖅ ᑐᑭᓯᒋᐊᒐᒃᓴᐅᓪᓗᓂ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᐅᔪᒧᑦ ᑐᓴᖅᑎᑦᑎᔭᕆᐊᖃ ᓲᒧᑦ ᓄᓇᕗᑦ ᒐᕙᓚᒃᑯᓐᓄᑦ ᐱᓕᕆᔨᓪᓚᕆᖕᓄᑦ ᐊᓯᐊᑕ ᒐᕙᒪᒃᑯᓐᓄᑦ ᐱᓕᕆᕝᕕᐊᑕ ᐱᐅᓯᖓᓐᓂᒃ, ᑐᑭᖓᓄᑦ ᐱᕋᔭᖕᓂᕐᒧᑦ ᓈᒻᒪᒃᓯᓕᖅᓯᒪᑦᑎᐊᖅᖢᓂ ᓇᓗᓇᐃᖅᑕᐅᓯᒪᔪᒥᒃ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᖁᔭᕐᒥ. ᐃᖅᑲᓇᐃᔭᖅᑎ ᐅᒃᐱᕈᓱᑦᑎᐊᕆᐊᖃᕐᒪᑦ ᐱᕋᔭᒃᑐᖃᖅᑲᐅᓂᖓᓂᒃ, ᐱᕋᔭᒃᑐᖃᓕᒑᓂᖓᓂᒡᓘᓐᓃᑦ. ᓴᖅᑭᑕᐅᔪᑦ ᓱᓕᑦᑎᐊᕆᐊᖃᖅᑐᑦ ᒪᓕᑦᑎᐊᕆᐊᖃᖅᖢᑎᒡᓗ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᖁᔭᕐᒥ.
ᑐᑭᓯᒋᐊᒐᒃᓴᖅᑕᖃᕐᓗᓂ ᑕᑯᒃᓴᐅᑎᑦᑎᔪᒥᒃ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᒥᒃ ᑎᓕᔭᐅᔪᖃᕐᓂᖅᐸᑦ ᐱᕋᔭᒃᑐᖃᖁᔭᐅᓗᓂ ᐃᓱᒪᒋᔭᐅᖃᓯᐅᔾᔭᐅᔪᓐᓇᖅᑐᖅ ᓴᖅᑭᑦᑎᖃᑕᐅᓂᖓᓂᒃ ᐱᕋᔭᖕᓂᕐᒥᒃ. ᐱᕋᔭᖕᓂᕐᒥᒃ ᓴᖅᑭᑦᑎᓂᖅ ᖃᐅᔨᓴᖅᑕᐅᓕᕈᓐᓇᕐᒪᑦ ᐸᓴᓇᕐᓗᓂ ᖃᐅᔨᓴᖅᑕᐅᒃᑲᓐᓂᕆᐊᖃᕐᓗᓂᓗ.
ᓴᖅᑭᑕᐅᔪᖃᕐᓂᐊᖅᑎᓪᓗᒍ ᐱᔭᒃᓴᐅᕗᑦ ᐅᕗᖓ ᐊᑦᑕᑕᕐᕕᖕᒧᐊᕐᓗᓂ.
ᖃᖓ ᐱᕋᔭᒃᑐᖃᖅᑎᓪᓗᒍ ᓴᖅᑭᑕᐅᓐᓂᖅᐸᑦ ᐊᒻᒪ ᐋᖅᑭᐅᒪᑎᑦᑎᔨ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᖁᔭᖅ ᐊᑐᓯᒋᐊᓚᐅᖅᐸᑦ?
ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᖁᔭᕐᒦᑦᑐᑦ ᑎᑎᕋᖅᓯᒪᓂᖏᑦ ᐊᑐᓕᖅᑎᑕᐅᓚᐅᖅᑐᑦ ᐊᐃᕐᕆᓕ 1, 2015-ᖑᑎᓪᓗᒍ.
ᐱᕋᔭᖕᓂᐅᑉ ᑐᑭᖓ ᑭᓲᖕᒪᑦ?
ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᖁᔭᖅ ᐱᕋᔭᖕᓂᕐᒥ ᓇᓗᓇᐃᖅᓯᓯᒪᕗᑦ ᐃᒪᓐᓇ: “ᐅᑯᓂᖓ ᓇᓕᐊᖕᓂᑐᐃᓐᓇᖅ ᐱᓕᕆᑎᓪᓗᒍ ᐃᖅᑲᓇᐃᔭᖅᑎ ᒐᕙᒪᒃᑯᑦ ᐃᖅᑲᓇᐃᔭᖅᑎᓂᒃ ᐱᔪᓐᓇᕐᓂᕆᔭᐅᔪᒥᒃ:
- ᐱᖁᔭᕐᒥ ᓱᕋᐃᒃᐸᑦ ᓄᓇᕗᒻᒥ ᒪᓕᒐᓕᐅᕐᕕᖕᒥ, ᑲᓇᑕᒥ ᒪᓕᒐᓕᕆᔨᕐᔪᐊᒃᑯᓐᓂ ᐅᕝᕙᓘᓐᓃᑦ ᒪᓕᒐᓕᐅᕐᕕᖕᒥ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᐅᕝᕙᓘᓐᓃᑦ ᓄᓇᕘᒥ ᐊᕕᒃᑐᖅᓯᒪᓂᐅᔪᒥ, ᐅᕝᕙᓘᓐᓃᑦ ᒪᓕᒐᓕᐊᖑᔪᒥᒃ ᓇᓕᐊᖕᓂᑐᐃᓐᓇᑦᑎᐊᖅ ᐱᖁᔭᓕᐊᖑᓯᒪᔪᓂᒃ;
- ᒪᓕᒋᐊᖃᖅᑎᑕᓂᒃ ᒪᓕᙱᑦᑐᑦ ᑎᓕᓯᔾᔪᑕᐅᓯᒪᔪᓂᒃ ᒥᓂᔅᑕᒧᑦ, ᑮᓇᐅᔭᓕᕆᔾᔪᑎᓂᒃ ᐊᐅᓚᑦᑎᔾᔪᑎᓄᑦ ᐱᖁᔭᕐᒧᑦ ᒥᓂᔅᑕ, ᐅᕝᕙᓘᓐᓃᑦ ᑮᓇᐅᔭᓕᕆᔨᑦ ᑲᑎᒪᔨᖏᓐᓄᑦ ᐃᒃᐱᒋᓪᓗᒍ ᐊᐅᓚᑕᐅᓂᖓ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐅᕝᕙᓘᓐᓃᑦ ᒐᕙᒪᒃᑯᑦ ᓇᖕᒥᓂᕆᔭᖏᓐᓄᑦ ᐃᖅᑲᓇᐃᔭᖅᑎᒧᑦ ᖃᓄᐃᓕᔭᐅᔪᕕᓂᐅᒃᐸᑦ;
- ᒐᕙᒪᒃᑯᑦ ᑮᓇᐅᔭᖁᑎᖏᓐᓂᒃ ᐊᑐᕐᓂᕐᓗᒃᑐᑦ ᐅᕝᕙᓘᓐᓃᑦ ᒐᕙᒪᒃᑯᑦ ᓇᖕᒥᓂᖁᑎᖏᓐᓂᒃ;
- ᐊᐅᓚᑦᑎᓂᕐᓗᖕᓂᖅ ᒐᕙᒪᒃᑯᑦ ᓇᖕᒥᓂᖁᑎᖏᓐᓂᒃ ᐱᖁᑎᖏᓐᓂᒡᓘᓐᓃᑦ ᐃᖅᑲᓇᐃᔭᖅᑎᒧᑦ ᖃᓄᐃᓕᔭᒧᑦ, ᐃᓚᒋᔭᐅᓪᓗᑎᒃ ᐱᓕᕆᔪᖃᕐᓂᖅᐸᑦ ᐅᕝᕙᓘᓐᓃᑦ ᐱᓕᕆᐊᖑᙱᑦᑐᓂᒃ ᑕᑯᒃᓴᐅᑎᑦᑎᔪᓂᒃ ᐱᔮᕆᓂᑰᔪᓂᒃ ᓇᖕᒥᓂᕆᔭᐅᔪᓂᒃ ᐊᐅᓚᑦᑕᕆᐊᓕᖕᓂᒃ ᐃᓄᖕᓄᑦ ᓇᖕᒥᓂᕆᔭᐅᔪᓂᒃ ᐅᕝᕙᓘᓐᓃᑦ ᐱᖁᑎᒋᔭᓄᑦ;
- ᐸᒡᕕᓵᖃᕐᓂᖅ ᐅᕝᕙᓘᓐᓃᑦ ᐅᖃᓪᓚᕐᓘᑎᕐᓗᓂ ᐅᕝᕙᓘᓐᓃᑦ ᐋᓐᓂᖅᑎᕆᒃᐸᑦ ᑭᓇᑐᐃᓐᓇᒥᒃ ᐃᖅᑲᓇᐃᔭᖅᑎᐅᑉ ᐊᓯᐊᓂᒃ ᓱᕋᐃᒃᐸᓪᓘᓐᓃᑦ ᐃᓄᖕᒧᑦ ᑳᓐᑐᓛᒃᑕᐅᓯᒪᔪᒧᓪᓘᓐᓃᑦ ᐱᔪᓐᓇᐅᑎᒋᔭᐅᔪᓂᒃ ᑭᒃᑯᑐᐃᓐᓇᑦᑎᐊᓄᑦ ᐱᔨᑦᑎᕋᖅᑎᐅᔪᓄᑦ ᐅᕝᕙᓘᓐᓃᑦ ᐱᔨᑦᑎᕋᖅᑕᐅᔪᓄᑦ ᑐᑭᓯᒋᐊᖅᑎᑕᐅᒃᐸᑕᓘᓐᓃᑦ ᖃᓄᑐᐃᓐᓇᖅ ᐱᔨᑦᑎᕋᐅᑕᐅᕙᒃᑐᓂᒃ ᒐᕙᒪᒃᑯᑦ ᐱᓕᕆᕝᕕᖓᓐᓂ ᐅᕝᕙᓘᓐᓃᑦ ᑎᒥᖓᓐᓂᒃ;
- ᐱᓕᕆᓐᓂᖅᐸᑦ ᐅᕝᕙᓘᓐᓃᑦ ᐱᓕᕆᐊᖑᙱᓐᓂᖅᐸᑦ ᓴᖅᑭᑦᑎᔾᔪᑕᐅᓗᓂ ᐊᖏᔪᐊᓗᖕᒥ ᐊᒻᒪ ᐊᑦᑕᕐᓇᖅᑐᒥᒃ ᐃᓅᓯᕆᔭᒧᑦ, ᖃᓄᐃᙱᑦᑎᐊᕈᓯᕐᒧᑦ ᐅᕝᕙᓘᓐᓃᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐃᓄᖕᓄᑦ, ᐃᓄᐃᑦ ᐅᕝᕙᓘᓐᓃᑦ ᐃᓛᒃᑰᖅᑐᓄᑦ ᓇᖕᒥᓂᕆᔭᐅᔪᓄᑦ, ᐅᕝᕙᓘᓐᓃᑦ ᓯᓚᒧᑦ, ᐊᓯᖏᓐᓄᓪᓗ ᐊᑦᑕᕐᓇᙱᑦᑑᒐᓗᐊᓄᑦ ᐅᔾᔨᕐᓇᕐᓂᐅᔪᓄᑦ ᐱᓕᕆᔾᔪᓯᒃᑯᑦ ᐊᐅᓚᓂᕆᔭᐅᔪᒃᑯᓪᓘᓐᓃᑦ ᐃᖅᑲᓇᐃᔭᖅᑎᒧᑦ;
- ᐱᔮᕆᔪᐊᓘᓗᓂ ᓱᕋᐃᒃᐸᑦ ᐱᓕᕆᐊᑦ ᐱᒻᒪᕆᐅᒋᔭᐅᔪᑦ ᐊᐅᓚᑕᐅᓂᖏᑕᓗ ᑐᙵᕕᖏᓐᓂᒃ;
- ᖃᓄᑐᐃᓐᓇᖅ ᐱᓕᕆᐊᑦ ᐊᑭᓂᐊᕈᑕᐅᔪᓐᓇᖅᑐᑦ ᐃᖅᑲᓇᐃᔭᖅᑎᒧᑦ ᐊᓯᐊᓄᓪᓘᓐᓃᑦ ᐃᓄᖕᒧᑦ; ᐅᕝᕙᓘᓐᓃᑦ
- ᑐᒃᓯᕋᖅᑐᖃᖅᐸᑦ, ᖃᓄᐃᓕᐅᖁᔨᔪᖃᖅᐸᑦ ᐅᕝᕙᓘᓐᓃᑦ ᑎᓕᐅᕆᔪᖃᖅᐸᑦ ᐃᖅᑲᓇᐃᔭᖅᑎᐅᑉ ᐊᖓᔪᖅᑳᖓᓐᓄᑦ ᐊᐅᓚᑦᑎᔨᒻᒪᕆᖓᓐᓄᓪᓘᓐᓃᑦ ᐊᓯᒥᓂᒃ ᐱᔾᔪᑎᖃᕐᓗᓂ ᐱᕋᔭᖁᔨᒍᓂ ᐋᖅᑭᒃᑕᐅᓯᒪᓂᖏᒃ (ᐃ)-ᒥ (ᓯ)-ᒧᑦ” ᒪᓕᒡᓗᒋᑦ.
ᑐᑭᓯᒋᐊᖃᒃᑲᓐᓂᕈᔅᓯ ᑭᓱᑦ ᓴᖅᑭᔾᔪᑕᐅᔪᓐᓇᕐᒪᖔᑕ ᐱᕋᔭᒍᑕᐅᓕᕈᓐᓇᕐᓗᑎᒃ ᐱᖁᔭᖅ ᑕᑯᓗᒍ, ᐊᐱᕆᖃᑦᑕᖁᔭᐅᕗᓯ ᐊᖓᔪᖅᑳᔅᓯᓐᓄᑦ, ᐃᖅᑲᓇᐃᔭᖅᑎᓄᑦ ᐱᓕᕆᑎᑦᑎᔨᐅᔪᓄᑦ ᐅᕝᕙᓘᓐᓃᑦ ᐋᖅᑭᐅᒪᑎᑦᑎᔨᒧᑦ.
ᑭᓇᒧᑦ ᐅᖃᐅᓯᕆᔪᒪᔭᕋ ᓴᖅᑭᑦᑐᓐᓇᕋᒃᑯ?
ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᐅᑎᓪᓗᑎᑦ, ᒪᓕᒋᐊᖃᖅᐳᑎᑦ ᐃᖅᑲᓇᐃᔭᖅᑐᓕᕆᓂᕐᒧᑦ ᐅᖃᓕᒫᒐᕐᒥ ᐊᒻᒪ, ᒪᓕᒃᑯᖕᓂ, ᑎᓕᓯᔾᔪᑎᒧᐊᕐᓗᑎᑦ 209. ᑎᓕᓯᔾᔪᑦ ᑐᑭᓯᓇᖅᓯᑎᓯᒪᕗᖅ ᐱᓕᕆᕝᕕᖕᒥ ᐱᓕᕆᔾᔪᓯᕐᓂᒃ ᓴᖅᑭᑦᑎᓂᐊᓕᕌᖓᑕ ᐸᓴᒋᔭᐅᔪᒥᒃ ᐱᕋᔭᒍᑕᐅᓇᓱᒋᔭᐅᔪᒥᒃ. ᐱᕋᔭᒍᑕᐅᓇᓱᒋᔭᕐᓂᒃ ᓴᖅᑭᑦᑎᔪᓐᓇᖅᐳᑎᑦ ᐊᖓᔪᖅᑳᕐᓄᑦ, ᐊᖓᔪᖅᑳᕕᑦ ᑐᒡᓕᐊᓄᑦ, ᒥᓂᔅᑕᐅᑉ ᑐᒡᓕᐊᓄᑦ ᑲᒪᒋᔭᒃᓴᓕᖕᒧᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᖁᔭᕐᒧᑦ, ᐅᕝᕙᓘᓐᓃᑦ ᐊᓯᖏᓐᓂᒃ ᐱᓕᕆᕝᕕᖕᓂ ᒥᓂᔅᑕᓄᑦ ᑐᒡᓕᕆᔭᐅᔪᓄᑦ.
ᐃᒪᐃᖅᑰᔨᒍᓱᑐᐊᕈᕕᑦ ᖃᐅᔨᓴᖅᑕᐅᓇᓱᒃᑑᒐᓗᐊᖅ ᐱᓕᕆᐊᖑᑦᑎᐊᖅᑰᔨᒋᙱᓪᓗᒍ ᐅᓪᓗᑦ 30 ᐊᓂᒍᖅᓯᒪᓕᕋᓗᐊᖅᑎᓪᓗᒋᑦ, ᓴᖅᑭᑦᑐᒪᔭᐃᑦ ᓇᖕᒥᓂᖅ ᐋᖅᑭᐅᒪᑎᑦᑎᒧᑦ ᐊᒡᔭᕈᓐᓇᖅᑕᑦ. ᐅᒃᐱᕈᓱᑐᐊᕈᕕᓪᓗ ᐃᓅᓯᕆᔭᒧᑦ ᐊᑦᑕᕐᓇᕈᑕᐅᑐᐃᓐᓇᕆᐊᖃᕐᓂᖓᓂᒃ, ᖃᓄᐃᙱᑦᑎᐊᕈᓯᕐᒧᑦ ᐊᑦᑕᕐᓇᓕᕈᑕᐅᑐᐃᓐᓇᕆᐊᖃᖅᐸᓪᓘᓐᓃᑦ ᐊᓯᒧᑦ, ᓇᖕᒥᓂᕆᔭᒧᑦ ᐊᕙᑖᓄᓪᓘᓐᓃᑦ, ᓴᖅᑭᑦᑎᔪᓐᓇᕆᕗᑎᑦ ᐱᕋᔭᒍᑕᐅᔪᒥᒃ ᐋᖅᑭᐅᒪᑎᑦᑎᔨᒧᑦ ᐅᐸᒍᑎᓪᓚᑦᑖᕐᓗᑎᑦ ᐅᕝᕙᓘᓐᓃᑦ ᐸᓖᓯᒃᑯᓐᓄᐊᕐᓗᑎᑦ (RCMP).
ᐱᒻᒪᕆᐊᓘᕗᖅ ᐳᐃᒍᖅᑕᐃᓕᔭᕆᐊᖃᕐᓂᔅᓯᓐᓂᒃ ᓴᖅᑭᑦᑎᓂᐊᓕᕌᖓᔅᓯ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᖁᔭᒃᑯᑦ, ᒪᓕᒋᐊᖃᕐᓂᔅᓯᓐᓂᒃ ᒪᓕᒐᒃᓴᓕᐊᕆᓯᒪᔭᖏᓐᓂᒃ ᐊᒻᒪ/ᐅᕝᕙᓘᓐᓃᑦ ᐱᓕᕆᔾᔪᓯᖏᓐᓂᒃ ᑲᒪᒋᔭᐅᑦᑎᐊᕈᓐᓇᖁᓪᓗᒋᑦ, ᑐᖅᑯᖅᑕᐅᑦᑎᐊᕈᓐᓇᖁᓪᓗᒋᑦ, ᓅᑕᐅᔪᓐᓇᖁᓪᓗᒋᑦ ᐊᒻᒪ ᑐᓂᓯᓂᐊᖅᑎᓪᓗᒋᑦ ᑐᑭᓯᒋᐊᒐᒃᓴᓂᒃ ᐅᕝᕙᓘᓐᓃᑦ ᑎᑎᕋᖅᓯᒪᔪᓂᒃ.
ᑭᓇᐅᔾᔪᓯᕋ ᓴᐳᔾᔭᐅᔪᓐᓇᖅᐸ?
ᓴᖅᑭᑕᐅᔪᑦ ᐱᖁᔭᒃᑯᑦ ᑲᙳᓇᖅᑑᕗᑦ, ᑭᓯᐊᓂ ᑭᒃᑯᓐᓂᙶᕐᒪᖔᑕ ᖃᐅᔨᒪᓇᖅᖢᑎᒃ. ᑕᒪᓐᓇ ᑐᑭᖃᖅᐳᖅ ᐃᓚᓕᐅᔾᔨᔭᕆᐊᖃᕐᓂᔅᓯᓐᓂᒃ ᐊᑎᖅᓯᓐᓂ ᐅᖃᐅᓯᖃᕐᓂᐊᓕᕌᖓᔅᓯ. ᐱᓕᕆᔾᔪᓰᑦ ᐱᓕᕆᐊᖑᓲᖑᖕᒪᑕ ᓄᖅᑲᖅᑎᔾᔪᑕᐅᓇᓱᒃᖢᑎᒃ ᓴᖅᑭᑕᐅᙱᑦᑐᓐᓇᖁᓪᓗᒋᑦ ᐊᑎᖅᓯ.
ᖃᓄᐃᓕᐅᕆᐊᖃᓲᖑᖕᒪᑕ ᐅᖃᐅᓯᐅᔪᒥᒃ ᓴᖅᑭᑦᑎᓂᐊᓕᕌᖓᑕ?
ᐃᖅᑲᓇᐃᔭᖅᑎᒥᒃ ᐱᕋᔭᒃᑐᕕᓂᕐᒥᒃ ᓴᖅᑭᑦᑎᔪᖄᓪᓚᓚᐅᖅᑎᓪᓗᒍ ᐊᖓᔪᖅᑳᒥᓄᑦ ᐅᕝᕙᓘᓐᓃᑦ ᐊᖓᔪᖅᑳᑉ ᑐᒡᓕᐊᓄᑦ, ᐱᓕᕆᕝᕕᖕᒥ ᖃᐅᔨᓴᓯᒋᐊᓲᖑᕗᑦ. ᐅᓪᓗᑦ 30 ᐊᓂᒍᖅᑎᓪᓗᒋᑦ ᓱᓕ ᐱᓕᕆᐊᖑᔪᖅ ᐋᖅᑭᒃᑕᐅᓂᕆᔭᖓ ᓈᒻᒪᒋᔭᐅᓕᐊᓂᙱᑉᐸᑦ ᐃᖅᑲᓇᐃᔭᖅᑎᒧᑦ, ᐅᖃᐅᓯᐅᔪᓐᓇᖅᑐᖅ ᐅᑯᓄᖓ ᓇᓕᐊᖕᓄᑐᐃᓐᓇᖅ:
- ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᖁᔭᕐᒧᑦ ᒥᓂᔅᑕᐅᑉ ᑐᒡᓕᐊᓄᑦ;
- ᐊᓯᒃᑲᓐᓂᐊᓂᒃ ᒥᓂᔅᑕᐅᑉ ᑐᒡᓕᒃᑲᓐᓂᐊᓂ ᐃᖅᑲᓇᐃᔭᖅᑎᒧᑦ ᓈᒻᒪᒐᓱᒋᔭᐅᔪᖅ ᐱᓕᕆᐊᖑᔪᑦ ᐱᓕᕆᐊᖑᑎᓪᓗᒋᑦ;
- ᐋᖅᑭᐅᒪᑎᑦᑎᔨᒧᑦ; ᐊᒻᒪ
- ᐸᓖᓯᒃᑯᓐᓄᑦ ᐅᕝᕙᓘᓐᓃᑦ ᒪᓕᒐᕋᓛᓕᕆᔨᒃᑯᓐᓄᑦ.
ᐱᓕᕆᔾᔪᓰᑦ ᓇᓗᓇᐃᖅᓯᒪᓂᖏᑦ ᐱᕋᔭᒍᑕᐅᔪᓂᒃ ᓴᖅᑭᑕᐅᔪᑦ ᐱᔭᒃᓴᐅᕗᑦ ᐃᖅᑲᓇᐃᔭᖅᑐᓕᕆᓂᕐᒧᑦ ᐅᖃᓕᒫᒐᖅ ᑎᓕᓯᔾᔪᑎ 209-ᒥ.
ᖃᓄᖅ ᑐᑭᖃᖅᑎᑕᐅᖕᒪᑦ “ᐊᑭᓇᓱᖕᓂᖅ” ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᖁᔭᕐᒦᑦᑐᖅ ᖃᓄᕐᓗ ᓴᐳᔾᔭᐅᓯᒪᒐᒪ ᐊᑭᓇᓱᐊᖅᑕᐅᓐᓂᕈᒪ?
ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᖁᔭᕐᒥ ᐅᖃᖅᓯᒪᖕᒪᑦ ᑭᓇᑐᐃᓐᓇᑦᑎᐊᖅ ᐃᖅᑲᓇᐃᔭᖅᑎ ᒪᓕᒋᐊᖃᕐᒪᑦ ᓇᓕᐊᖕᓂᑐᐃᓐᓇᖅ ᐊᑭᓂᐊᕈᑕᐅᔪᒥᒃ ᐃᓱᒪᒋᔪᓐᓃᕈᑕᐅᔪᒥᒡᓘᓐᓃᑦ ᐅᖃᐅᓯᖃᕐᓂᐊᖅᑎᓪᓗᒋᑦ.
ᐊᑭᓂᐊᕋᓱᖕᓂᐊᕐᓗᓂ ᐃᓅᖃᑎᒧᑦ ᐅᑯᓂᖓ ᐃᓚᖃᖅᐳᖅ:
ᖃᓄᑐᐃᓐᓇᖅ ᐱᓕᕆᐊᓂᒃ, ᓯᕘᕋᓵᕈᑕᐅᔪᓂᒃ ᐅᕝᕙᓘᓐᓃᑦ ᓄᖅᑲᖅᑎᑦᑎᔪᒪᔪᓂᒃ, ᐃᖅᑲᓇᐃᔮᒥ ᐊᔪᕐᓇᙱᓐᓂᖅᓴᒧᐊᖅᓯᓂᖅ, ᐊᓂᑦᑎᓂᖅ, ᐊᓂᑦᑎᓚᐅᑲᖕᓂᖅ, ᐊᓂᑦᑎᓂᖅ, ᐃᓕᕋᑦᑖᕆᓂᖅ, ᑎᓕᐅᖅᑕᐅᒃᐸᑦ, ᐲᖅᑕᐅᒃᐸᑦ, ᑳᓐᑐᓛᕆᔭᐅᔪᒥᒃ ᓄᖅᑲᖅᑎᑦᑎᓂᖅ ᐃᓄᒃ ᐱᔾᔪᑕᐅᔪᖅ ᐱᔾᔪᑎᖃᙱᓐᓂᖅᑎᓪᓗᒍ, ᒪᓕᒐᓕᕆᔨᒃᑯᓐᓄᑦ ᐱᓕᕆᐊᖑᑎᑕᐅᒃᐸᑦ, ᐊᑭᓖᑎᑕᐅᒃᐸᑦ ᐊᓯᖏᓐᓂᒡᓘᓐᓃᑦ ᐊᑭᓕᒃᑲᓐᓂᕆᐊᓕᖕᓂᒃ ᐊᑭᓖᑎᑕᐅᒃᐸᑦ ᐅᕝᕙᓘᓐᓃᑦ ᐊᕕᑎᓪᓗᒋᑦ ᐃᓅᒃ ᐱᕋᔭᒍᑕᐅᔪᒥᒃ ᓴᖅᑮᔪᖃᕐᓂᖓᓄᑦ ᐅᕝᕙᓘᓐᓃᑦ ᐃᓄᒃ ᐃᑲᔪᓚᐅᕐᓂᖓᓄᑦ ᖃᐅᔨᓴᖅᑕᐅᑎᓪᓗᒍ ᓴᖅᑭᑕᐅᓚᐅᖅᑐᖅ ᐊᓯᒥᓄᑦ ᐅᖃᐅᓯᐅᓚᐅᖅᑐᒧᑦ.
ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᖁᔭᖅ ᐅᖃᖅᓯᒪᖕᒪᑦ ᐃᖅᑲᓇᐃᔭᖅᑏᒡᒎᖅ ᓴᐳᔾᔭᐅᓯᒪᔪᑦ. ᐊᑭᓂᐊᖅᑕᐅᓐᓂᕈᕕᑦ, ᐋᖅᑭᐅᒪᑎᑦᑎᔨᒧᑦ ᐅᖃᐅᓯᕆᔪᓐᓇᖅᑕᑎᑦ. ᑕᐃᒃᑯᐊ ᐱᓂᕐᓗᒃᑎᑦᑎᓚᐅᖅᑐᑦ ᐱᓕᕆᕝᕕᓖᑦ ᐅᖃᐅᔾᔪᖅᓱᖅᑕᐅᒃᑲᓐᓂᕆᐊᖃᕋᔭᕐᒪᑕ.
ᖃᓄᐃᓕᐅᕆᐊᖃᕋᒪ ᐅᖃᐱᓘᑎᖃᕐᓂᐊᕈᒪ ᐊᑭᓂᐊᖅᑕᐅᓂᓐᓂ?
ᐋᖅᑭᐅᒪᑎᑦᑎᔨᒧᑦ ᐅᐸᒍᑎᓗᑎᑦ ᐅᖃᐱᓗᒍᓐᓇᖅᑐᑎᑦ. ᐊᑕᖏᕐᓗᒍ ᑕᑕᑎᕆᐊᖃᕋᔭᖅᑕᑦ ᓴᖅᑭᑦᑎᓂᐊᕐᓗᓂ ᑎᑎᕋᕆᐊᓕᖕᒥᒃ, ᐅᑯᓂᖓ ᑎᑎᕋᖅᓯᒪᔪᓂᒃ ᑐᑭᓯᒋᐊᒐᒃᓴᖅᑕᖃᖅᑐᖅ:
- ᐅᖃᐱᓘᑕᐅᔪᖅ ᖃᓄᐃᑦᑑᓂᖓ ᒪᓕᒃᑕᐅᓗᓂ ᖃᓄᐃᒻᒪᓪᓗ ᐱᓕᕆᐊᖑᓂᐊᖅᑐᖅ ᐊᑭᓯᓂᐊᕐᓂᕐᒧᑦ ᐋᖅᑭᒃᑕᐅᖕᒪᖔᑦ;
- ᐃᓅᑉ ᐊᑎᐊ(ᑎᖏᑦ) ᐊᑭᓂᐊᖁᔨᓪᓗᑎᒃ ᐱᓕᕆᑎᑦᑎᔪᑦ;
- ᐅᓪᓗᖅ ᐊᒻᒪ ᐅᓂᒃᑳᖅᓯᒪᓂᖓ ᐊᑭᓂᐊᕐᓂᕐᒧᑦ ᐱᓕᕆᐊᖑᓂᐊᖅᑐᓂᒃ, ᐊᓯᖏᓪᓗ ᐊᒃᑐᐊᔪᑦ ᑐᑭᓯᒋᐊᕈᑎᑦ; ᐊᒻᒪ
- ᐊᑏᑦ, ᐅᖃᓘᑎᕕᑦ ᓈᓴᐅᑖ ᐊᒻᒪ ᑐᕌᕈᑏᑦ ᐋᖅᑭᐅᒪᑎᑦᑎᔨᒧᑦ ᐊᔾᔨᐸᓗᐊᓂᒡᓘᓐᓃᑦ ᐱᔪᓐᓇᕐᓂᖃᖅᑐᒧᑦ ᖃᐅᔨᒋᐊᕐᕕᐅᔪᓐᓇᓛᕋᕕᑦ ᑐᑭᓯᒋᐊᕐᕕᐅᒃᑲᓐᓂᕋᓱᒡᓗᑎᑦ.
ᑐᑭᓯᒋᐊᒃᑲᓐᓂᕈᒪᒍᔅᓯ:
- ᑕᑯᒋᐊᕐᓗᒍ ᐃᓚᖓᑦ 6 ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᖁᔭᖅ
- ᑕᑯᒋᐊᕐᓗᒍ ᐃᖅᑲᓇᐃᔭᖅᑐᓕᕆᓂᕐᒧᑦ ᐅᖃᓕᒫᒐᖅ ᑎᓕᓯᔾᔪᑎ 209
- ᐊᖓᔪᖅᑳᕐᓄᑦ ᐅᖃᕐᓗᑎᑦ ᐅᕝᕙᓘᓐᓃᑦ ᐃᖅᑲᓇᐃᔭᖅᑎᓄᑦ ᐱᓕᕆᐊᒃᓴᓕᕆᔨᒧᑦ
- ᐋᖅᑭᐅᒪᑎᑦᑎᔨᒧᑦ ᖃᐅᔨᒋᐊᕐᓗᑎᑦ:
ᓄᓇᕗᒻᒥ ᐋᖅᑭᐅᒪᑎᑦᑎᔨ
@email
(867) 222.1463