ᐅᖃᓚᐅᑎᓯᐅᑏᑦ

You are here

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓂ ᐅᖃᐅᓯᖃᖅᑐᖅ

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ (CGS) ᐃᖅᑲᓇᐃᔭᓲᑦ ᑲᑐᔾᔨᖃᑎᖃᖅᖢᑎᒃ ᓄᓇᓕᖕᓂ ᒐᕙᒪᒃᑯᓐᓂᒃ ᐃᑲᔪᖅᖢᑎᒃ ᐱᔪᓐᓇᕐᓂᖏᓐᓄᑦ ᐃᓗᓪᓕᖅᓱᐃᓪᓗᑎᒃ, ᓄᓇᓕᖕᓂ ᐱᔭᐅᔭᕆᐊᓕᖕᓂᒃ ᐱᔪᓐᓇᖁᓪᓗᒋᑦ. CGS ᐱᓕᕆᐊᒃᓴᖃᖅᑎᑦᑎᓲᖑᕗᖅ ᐊᒻᒪᓗ ᑮᓇᐅᔭᖃᖅᑎᑦᑎᕙᒃᖢᑎᒃ ᐃᑲᔫᑎᒃᓴᓂᒃ ᓄᓇᓕᖕᓂ ᕼᐋᒻᓚᑦᑯᖏᑕ ᐊᐅᓚᔾᔪᑎᒃᓴᖏᓐᓂᒃ, ᐱᖁᑎᕐᔪᐊᓂᒃ ᓴᓇᔪᓐᓇᖅᓯᕙᓕᐊᓂᖅ ᐊᒻᒪᓗ ᓄᓇᒥᒃ ᐱᕙᓪᓕᐊᓂᕐᒥᒃ.  ᐃᑲᔪᖅᑐᐃᓂᖅ ᐊᑐᐃᓐᓇᐅᑎᑕᐅᓲᖑᕗᖅ ᐱᓕᒻᒪᒃᓴᐃᓂᖅ ᐱᑐᐃᓐᓇᕆᐊᖃᖅᑎᑕᐅᓪᓗᓂ ᑲᑎᒪᔨᓄᑦ ᐊᒻᒪᓗ ᕼᐋᒻᓚᑦᑯᓐᓂ ᐃᖅᑲᓇᐃᔭᖅᑎᓄᑦ.

CGS ᐊᔾᔨᒌᙱᑦᑐᓂᒃ ᐊᑐᐃᓐᓇᐅᑎᑦᑎᓲᖑᒋᕗᖅ ᐱᔨᑦᑎᕋᐅᑎᓪᓗᐊᑕᕐᓂᒃ ᒐᕙᒪᒃᑯᑦ ᐱᓕᕆᕝᕕᖏᓐᓄᑦ ᑲᑐᔾᔨᖃᑎᒌᖏᓐᓄᓪᓗ ᐃᑲᔪᖅᑐᖅᖢᒋᑦ ᓈᒻᒪᒃᑐᒃᑯᑦ ᐊᑑᑎᖃᑦᑎᐊᖅᑐᒃᑯᑦ ᐊᐅᓚᓂᖃᖁᓪᓗᒋᑦ ᐱᓕᕆᐊᖏᓐᓂᒃ ᐱᔨᑦᑎᕈᑎᖏᓐᓂᒡᓗ.  ᐱᔨᑦᑎᕋᐅᑏ CGS-ᑯᓐᓂᑦ ᐃᓚᖃᖅᐳᑦ ᐱᔪᓐᓇᕐᓂᕐᒥᒃ, ᐅᒥᐊᕐᔪᐊᒃᑯᑦ ᐱᓇᓱᐊᒐᒃᓴᑦ ᐊᒻᒪᓗ ᑳᓐᑐᓛᖕᓂᒃ ᐱᔨᑦᑎᕋᕐᓂᖅ; ᓄᓇᖁᑎᓂᒃ ᐊᒻᒪᓗ ᐱᖁᑎᓂᒃ ᐊᐅᓚᑦᑎᓂᖅ ᐊᒻᒪᓗ ᑲᒪᒋᔭᖃᕐᓂᖅ, ᖃᕋᓴᐅᔭᒃᑯᑦ ᐊᒻᒪᓗ ᐱᓕᕆᐊᒃᓴᓂᒃ ᐊᐅᓚᑦᑎᓂᕐᒥᒃ ᐊᖏᔫᑎᓄᑦ ᐱᑯᑎᓄᑦ ᐱᓕᕆᐊᒃᓴᓄᑦ ᐊᒻᒪᓗ; ᑐᓴᐅᒪᑎᑦᑎᓂᕐᒧᑦ ᓄᑖᙳᖅᓯᒪᔪᓂᒃ ᐊᒻᒪᓗ ᐅᓂᒃᑳᓕᐊᕆᓯᒪᔪᓂᒃ ᐊᐅᓚᑦᑎᓂᕐᒥᒃ ᐱᔨᑦᑎᕋᐅᑎᓂᒃ.

CGS-ᑯᑦ ᑲᒪᒋᔭᖃᕆᕗᑦ ᐱᔨᑦᑎᕋᐅᑎᓂᒃ ᑐᕌᖓᔪᓄᑦ ᑭᒃᑯᑐᐃᓐᓇᕐᓄᑦ. ᑖᒃᑯᐊ ᐃᓚᖃᖅᖢᑎᒃ: ᐃᑭᑦᑕᐃᓕᒪᓂᕐᒥᒃ ᓴᖅᑭᔮᖅᑎᑦᑎᓂᕐᒥᒃ, ᖃᐅᔨᓴᕐᓂᕐᒥᒃ ᐊᒻᒪᓗ ᐱᓕᒻᒪᒃᓴᐃᓂᕐᒥᒃ; ᐅᐊᔭᓕᕆᓂᕐᒥᒃ ᐊᐅᓚᐅᑎᓕᕆᓂᕐᒥᒡᓗ ᖃᐅᔨᓴᕐᓂᖅ ᐃᒡᓗᕐᔪᐊᓂᒃ; ᑐᐊᕕᕐᓇᖅᑐᓂᒃ ᐊᐅᓚᑦᑎᓂᕐᒥ ᐱᔨᑦᑎᕋᐅᑎᓂᒃ ᐃᓚᐅᓪᓗᑎᒃ ᕿᓂᖅᑎᑦᑎᓂᖅ ᐊᒻᒪᓗ ᐃᓅᓕᒃᖠᓂᕐᒥᒃ ᐋᖅᑭᒃᓱᐃᓂᖅ ᐱᓕᒻᒪᒃᓴᐃᓂᕐᓗ; ᓂᐅᕕᖃᑦᑕᖅᑎᑦᑎᓂᕐᒥᒃ ᐱᓕᕆᐊᖅ; ᑎᒍᓯᓂᕐᒥᒃ ᑐᓂᐅᖅᑲᐃᓂᕐᒥᒡᓗ ᐅᖅᓱᐊᓗᓕᕆᓂᕐᒥᒃ ᓄᓇᓕᖕᓄᑦ ᐊᒻᒪᓗ; ᓴᖅᑭᑎᑦᑎᕙᓪᓕᐊᓂᖅ ᐱᙳᐊᖅᑐᓕᕆᓂᕐᒥᒃ ᓄᓇᕘᒥ.  ᑖᒃᑯᐊ ᐱᔨᑦᑎᕋᐅᑏᑦ ᑐᕌᖓᔪᑦ ᓄᓇᓕᖕᓂ ᒐᕙᒪᒃᑯᖏᓐᓄᑦ, ᓇᖕᒥᓂᕆᔭᐅᔪᓄᓪᓗ ᐊᒻᒪᓗ ᑭᒃᑯᑐᐃᓐᓇᕐᓄᑦ.

ᑕᐅᑐᙳᐊᖅᑕᕗᑦ:

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᐅᒃᐱᕈᓱᒃᐳᑦ ᐱᓪᓗᐊᑕᐅᒐᑦᑕ ᐃᑲᔪᖅᑐᐃᓂᕐᒥᒃ ᓇᖕᒥᓂᖅ ᒐᕙᒪᖃᕐᓂᕐᒥᒃ, ᐱᕚᓪᓕᖅᑎᑦᑎᓂᕐᒥᒃ ᓄᓇᓕᖕᓂ ᐃᑲᔪᖅᑐᖃᑦᑕᖅᑐᓂᒃ ᐃᓄᓕᕆᓂᕐᒥᒃ ᐃᓕᖅᑯᓯᕐᓂᒡᓗ ᓄᓇᓕᖕᓂ ᐊᑐᖅᑕᐅᔭᕆᐊᓕᖕᓂᒃ ᐊᒻᒪᓗ ᓄᓇᕘᒥ ᐱᕈᐃᖃᑕᐅᓪᓗᓂ ᑮᓇᐅᔭᑎᒍᑦ, ᐃᓄᓕᕆᓂᒃᑯᑦ, ᐃᓕᖅᑯᓯᒃᑯᑦ ᐊᒻᒪᓗ ᐊᕙᑎᐅᑉ ᖃᓄᐃᙱᑦᑎᐊᕐᓂᖓᓄᑦ.

CGS-ᑐᑦ ᑕᐅᑐᙳᐊᖅᑕᐅᔪᒥᒃ ᐊᑐᓕᖅᑎᑦᑎᕚᓪᓕᖅᐳᑦ ᓈᒻᒪᒃᑐᒥᒃ ᐊᑐᕆᐊᓕᖕᓄᑦ ᐱᓕᕆᐊᒃᓴᓂᒃ ᐱᔨᑦᑎᕋᐅᑎᓂᒡᓗ ᓄᓇᓕᖕᓄᑦ ᐃᓄᖏᓐᓄᓪᓗ ᐊᒻᒪᓗ ᑐᕌᖓᓪᓚᑦᑖᖏᑦᑐᒍᑦ ᒐᕙᒪᒃᑯᑦ ᐱᔨᑦᑎᕋᐅᑎᖏᑦᑎᒍᑦ ᐊᓯᖏᓐᓄᑦ ᐱᓕᕆᕝᕕᖕᓄᑦ ᑲᑐᔾᔨᖃᑎᒌᓄᓪᓗ.

 

ᒪᓕᒋᐊᖃᖅᑕᕗᑦ ᐱᒻᒪᕆᐅᒋᔭᕗᓪᓗ:

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᐅᑉᐱᕈᓱᒃᐳᑦ:

  • ᐃᑲᔪᖅᑐᐃᓂᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ (IQ) ᐊᑐᖃᑦᑕᖅᑕᕗᑦ ᓴᖅᑭᑦᑎᓂᕐᒥᒃ ᒪᑐᐃᖓᔪᒥᒃ ᑭᐅᔪᓐᓇᖅᑐᒥᒃ ᐱᓕᕆᕝᕕᖕᒥ, ᐃᓚᓕᐅᔾᔨᕙᓪᓕᐊᓪᓗᑎᒃ ᐃᓕᖅᑯᓯᑐᖃᒃᑯᑦ ᐱᓕᕆᐊᒃᓴᓂᒃ ᐱᒻᒪᕆᐅᒋᔭᐅᔪᓐᓂᒡᓗ ᐱᓕᕆᐊᒃᓴᓂᒃ ᐱᔨᑦᑎᕋᐅᑎᓂᒡᓗ;
  • ᑲᑐᔾᔨᖃᑎᖃᕐᓂᖅ ᓄᓇᓕᖕᓂ ᒐᕙᒪᒃᑯᖏᓐᓂᒃ ᑎᒍᒥᐊᖅᑎᓂᒡᓗ ᑐᙵᕕᐅᕗᖅ ᑲᑐᔾᔨᖃᒌᓕᖅᐸᓪᓕᐊᓂᕐᒥᒃ ᐃᖅᑲᓇᐃᔭᖃᑎᒌᖕᓂᕐᒥᓪᓗ ᐃᓚᒌᓕᕐᓂᕐᒥᒃ;
  • ᐱᓕᒻᒪᒃᓴᐃᓂᖅ ᐃᓕᓐᓂᐊᕐᓂᕐᓗ ᐱᐅᓯᒋᐊᖅᑎᑦᑎᓲᖑᕗᖅ ᖃᓄᐃᙱᑦᑎᐊᖅᑐᒥᒃ ᐃᖕᒥᖕᓂᒃ ᒐᕙᒪᖃᕐᓂᕐᒥᒃ ᐊᒻᒪᓗ ᐃᒻᒥᓂᖅᓱᕈᓐᓇᖅᓯᕙᓪᓕᐊᔪᓂᒃ ᓄᓇᓕᖕᓂᒃ ᐃᓂᒋᔪᓐᓇᖅᑕᖓᓄᑦ ᐱᕈᖅᐸᓪᓕᐊᓂᕐᒥᒃ. ᑕᒪᓐᓇ ᓴᙱᒃᑎᕙᓪᓕᐊᔾᔪᑕᐅᓂᐊᖅᑐᖅ ᓄᓇᕘᒧᑦ ᐊᒻᒪᓗ ᐃᒻᒥᓂᖅᓱᕈᓐᓇᖅᓯᕚᓪᓕᕐᓗᓂ ᐊᒻᒪᓗ ᓄᓇᓖᑦ ᐱᔪᓐᓇᖅᓯᕚᓪᓕᕐᓗᑎᒃ.
  • ᓴᖅᑭᔮᖅᑎᑦᑎᓗᑎᒃ ᐱᔨᑦᑎᕋᐅᑎᒥᒃ ᑲᒪᒋᔭᖏᓐᓄᑦ ᑭᐅᓴᕋᐃᑦᑐᓐᓇᖁᓪᓗᒋᑦ, ᐊᑲᐅᙱᓕᐅᕈᑎᔪᑦ ᐋᖅᑭᒋᐊᕈᓐᓇᕐᓗᑎᒃ ᐊᒻᒪᓗ ᐱᐅᔪᒥᒃ, ᐃᑲᑦᑐᕆᒃᑐᒥᒃ ᐱᔪᒪᓂᖃᕐᓗᓂ. ᑖᓐᓇ ᐱᒻᒪᕆᐅᕗᖅ ᓈᒻᒪᒃᑐᒥᒃ ᐊᑑᑎᖃᑦᑎᐊᖅᑐᒥᒃ ᐱᔨᑦᑎᕋᕈᓐᓇᕐᓂᖅ ᓄᓇᓕᖕᓄᑦ ᐊᒻᒪᓗ ᐊᓯᖏᓐᓄᑦ ᐱᓕᕆᕝᕕᖕᓄᑦ.

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ
PO Box 1000, Station 700, 4th Floor,
W.G. Brown Building, Iqaluit, Nunavut
ᐅᖃᓘᑖ: (867) 975-5400
ᓱᒃᑲᔪᒃᑰᕈᑖ: (867) 975-5305