ᐅᖃᓚᐅᑎᓯᐅᑏᑦ

You are here

ᓯᓚᑖᓃᖔᖅᑐᓄᑦ ᕿᒥᕐᕈᔭᐅᒃᑲᐃᓂᕐᒧᑦ ᐅᓂᒃᑳᓕᐊᖅ ᓴᖅᑭᖅᑕᐅᔪᖅ ᐃᖃᓗᖕᓂ

ᓄᕕᐱᕆ 30, 2015

ᐱᕙᓪᓕᐊᔪᖅ ᑐᓴᕋᑦᓴᑦ 

ᓯᓚᑖᓃᖔᖅᑐᓄᑦ ᕿᒥᕐᕈᔭᐅᒃᑲᐃᓂᕐᒧᑦ ᐅᓂᒃᑳᓕᐊᖅ ᓴᖅᑭᖅᑕᐅᔪᖅ ᐃᖃᓗᖕᓂ 

ᐃᖃᓗᐃᑦ, ᓄᓇᕗᑦ (ᓅᕙᐃᒻᕙ 30, 2015) − ᐅᓂᑳᖅ ᑕᐃᔭᐅᔪᖅ “ᐃᖏᕐᕋᓂᖅ ᐆᒻᒪᑎᒃᑯᑦ ᐋᓐᓂᐊᓂᕐᒥᑦ” ᑭᒃᑯᑐᐃᓐᓇᕐᓄᑦ ᓴᖅᑭᖅᑕᐅᔪᖅ ᐃᖃᓗᖕᓂ ᐅᓪᓗᒥ ᒥᓂᔅᑕᖓᓄᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐹᓪ ᐅᑲᓕᕐᒧᑦ, ᑲᑎᒪᓚᐅᖅᑎᓪᓗᒋᑦ ᐊᖓᔪᖅᑳᕆᔭᐅᔪᑦ ᐱᐊᕋᕐᒧᑦ ᒪᑭᑉᐱᒃ ᑎᒥᓛᒃᒧᑦ, ᒪᒥᐊᓐᓂᕋᓚᐅᖅᑐᖅ ᐃᓚᒌᓄᑦ. 

“ᑭᒡᒐᖅᑐᕐᓗᒋᑦ ᓄᓇᕗᒻᒥᑦ ᒐᕙᒪᒃᑯᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓪᓗ, ᒪᒥᐊᑦᑐᖓ ᐱᐊᕋᐅᑉ ᒪᑭᑉᐱᒃ ᑎᒥᓛᑉ. ᐱᓗᐊᖅᑐᒥ ᒪᑭᑉᐱᐅᑉ ᐊᖓᔪᖅᑳᖏᓐᓄᑦ, ᓃᕕ ᐊᑭᓱᒃᒧᑦ ᓘᑦᑖᖅ ᖃᐅᒪᒋᐊᒧᓪᓗ, ᐆᒻᒪᑎᒃᑯᑦ ᐋᓐᓂᐊᓂᕆᓚᐅᖅᑕᖏᓐᓄᑦ ᐊᑦᓱᕈᓐᓂᕆᓚᐅᖅᑕᖏᓐᓄᓪᓗ ᐃᕐᓂᖓ ᐃᓅᔪᓐᓃᓚᐅᖅᑎᓪᓗᒍ 2012-ᒥ,” ᐅᖃᖅᓯᒪᔪᖅ ᐹᓪ ᐅᑲᓕᖅ. “ᒪᒥᐊᕝᕕᒋᒻᒥᔭᒃᑲ ᑭᙵᕐᒥᐅᑦ ᓇᓗᓂᕐᒥᑦ ᖃᐅᔨᓂᕆᓚᐅᖅᑕᖏᓐᓂᑦ ᐱᐅᓂᖓᓂᑦ ᐋᓐᓂᐊᖅᑐᓕᕆᓂᕐᒧᑦ ᐱᔨᑦᓯᕋᕐᓂᕐᒥᑦ ᓄᓇᓕᖏᓐᓂᑦ, ᓇᓗᓇᐃᖅᓯᕕᒋᑦᓯᐊᕐᓗᒋᓪᓗ ᐊᖏᖅᓯᒪᓂᑦᑎᓐᓂᑦ ᐱᐅᓂᖅᓴᒥᑦ ᒪᓕᒋᐊᓕᓐᓂᑦ.” 

ᐅᑭᐊᑦᓵᖓᓂ 2014, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᓇᒻᒥᓂᖅᓱᖅᑐᒥᑦ ᖃᐅᔨᓴᖁᔨᓚᐅᖅᑐᖅ ᖃᓄᐃᓐᓂᐅᔪᓂᑦ ᐃᓅᔪᓐᓃᓚᐅᕐᓂᖓᓄᑦ ᐱᖓᓱᓂᑦ−ᑕᖅᑭᓕᒃ ᐱᐊᕋᖅ ᒪᑭᑉᐱᒃ ᑎᒥᓛᒃ. ᑳᑐᕋᓐ ᐲᑐᓴᓐ, ᓄᖅᑲᖓᓕᖅᑐᖅ ᒪᓕᒐᓕᕆᔨ ᓄᓇᑦᓯᐊᕐᒥᑦ, ᐱᔭᐅᓚᐅᖅᓯᒪᔪᖅ ᐱᒋᐊᙵᕐᓂᖓᓂᑦ 2015 ᑎᓕᔭᐅᓚᐅᖅᑐᖅ ᐊᑐᐃᓐᓇᐅᑎᑦᓯᖁᔭᐅᑦᓱᓂ ᑭᙳᓪᓕᖅᐹᒥᑦ ᐅᓂᒃᑳᒥᑦ ᓅᕙᐃᒻᕙ 30, 2015. 

ᐲᑐᓴᐅᑉ ᑭᙳᓪᓕᖅᐹᖅ ᐅᓂᒃᑳᖓ ᐃᓗᓕᖃᖅᑐᖅ 47-ᓂ ᐊᑐᓕᖁᔭᐅᔪᓂᑦ, ᐃᓚᒋᔭᐅᑦᓱᑎᒃ ᑎᓕᐅᕆᓂᑦ ᐊᖓᔪᖅᑳᖓᓂᑦ ᑐᖁᖓᔪᓕᕆᔨᒃᑯᑦ ᓄᓇᕗᒻᒥᑦ ᖃᐅᔨᓴᖁᔨᑦᓱᓂ ᐃᓅᔪᓐᓃᓚᐅᕐᓂᖓᓄᑦ ᐱᐊᕋᖅ ᒪᑭᑉᐱᒃ ᑎᒥᓛᖅ, ᐅᖃᐅᓯᖃᕐᓂᕐᒥᑦ ᐃᓱᒫᓘᑕᐅᔪᓂᑦ ᐊᑦᑐᐊᓂᓕᓐᓂᑦ ᐃᖅᑲᓇᐃᔭᖅᑐᓕᕆᓂᕐᒧᑦ, ᐱᓕᕆᔾᔪᓯᕐᓂᑦ, ᐋᓐᓂᐊᕕᓕᐊᖅᑐᓕᕆᓂᕐᒥᓪᓗ ᐱᒻᒪᕆᐅᔪᓂᓪᓗ ᖃᓄᐃᓐᓂᐅᔪᓂᑦ ᖃᐅᔨᒃᑲᐃᖃᑦᑕᕐᓂᕐᒧᑦ ᒪᓕᑦᑕᐅᔭᕆᐊᓕᓐᓂᑦ. ᐃᓘᓐᓇᑎᒃ 47 ᐊᑐᓕᖁᔭᐅᔪᑦ ᐊᑐᓕᖅᑎᑕᐅᓂᐊᖅᑐᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ. 

“ᓇᓗᓇᐃᖅᓯᒍᒪᓚᐅᕋᒪ ᐊᑕᖏᑦᑐᒥᑦ ᐱᓕᕆᖃᑎᖃᕐᓂᕐᒥᑦ ᑖᑦᓱᒪᖓᑦ ᐱᓕᕆᐊᒥᑦ ᒪᑐᐃᖓᑦᓯᐊᖅᑐᒥᑦ ᓱᓕᔪᒥᓪᓗ, ᓇᑯᕐᒦᖅᓱᒍᓪᓗ ᐲᑐᓴᓐ ᖃᐅᔨᓴᓚᐅᕐᓂᖓᓄᑦ ᐊᖏᖅᓯᒪᓂᕆᓚᐅᖅᑕᖓᓄᓪᓗ ᖃᐅᔨᓴᕐᓂᕐᒧᑦ,” ᐅᖃᖅᓯᒪᔪᖅ ᒥᓂᔅᑕ ᐅᑲᓕᖅ. “ᐅᖃᐅᔾᔨᓯᒪᓕᖅᑐᖓ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐊᖓᔪᖅᑲᐅᑏᒃ ᐃᖅᑲᓇᐃᔭᖅᑎᖏᓐᓂᑦ ᐊᑐᓕᖅᑎᑦᓯᕙᓪᓕᐊᖁᔨᓂᕐᒥᑦ ᐃᓘᓐᓇᖏᓐᓂᑦ ᐊᑐᓕᖁᔭᐅᔪᓂᑦ, ᐊᑐᐃᓐᓇᐅᑎᑦᓯᓂᐊᕐᒥᔪᖓᓗ ᖃᐅᔨᒋᐊᑲᓐᓂᕈᑎᒥᑦ ᑭᖑᓪᓕᕐᒥᑦ ᑲᑎᒪᓕᖅᒥᑉᐸᑕ ᒪᓕᒐᓕᐅᖅᑏᑦ.”

ᐅᓂᒃᑳᖅ ᐊᖅᑭᑦᑕᐅᓯᒪᔪᖅ ᓴᖅᑭᖅᑕᐅᓛᖅᑐᑦ ᕕᕗᐊᓕ 2016-ᒥ ᑲᑎᒪᓂᖃᖅᑎᓪᓗᒋᑦ ᒪᓕᒐᓕᐅᖅᑏᑦᑦ. ᐊᔾᔨᒋᔭᖓᑦ ᓯᓚᑖᓃᖔᖅᑐᓄᑦ ᐅᓂᒃᑳᓕᐊᒥᓂᖅᖅ, “ᐃᖏᕐᕋᓂᖅ ᐆᒻᒪᑎᒃᑯᑦ ᐋᓐᓂᐊᓂᕐᒥᑦ”, ᐊᑐᐃᓐᓇᐅᔪᖅ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐃᑭᐊᖅᑭᕕᖓᓂᑦ: www.gov.nu.ca/health

### 

ᐱᕙᓪᓕᐊᔪᒥᑦ ᖃᐅᔨᒋᐊᕐᕕᒃ: 

ᕌᓐ ᕙᓯᖅ
ᑐᓴᕋᑦᓴᓕᕆᔨ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5710
rwassink@gov.nu.ca

 

ᖃᓄᐃᓕᐅᖅᑕᐅᓯᒪᓕᖕᓂᖏᑦ 

ᓇᐃᓈᖅᓯᒪᔪᑦ ᐊᑐᓕᖁᔭᐅᔪᑦ “ᐃᖏᕐᕋᓂᖅᐆᒻᒪᑎᒃᑯᑦ ᐋᓐᓂᐊᓂᕐᒥᑦ” 

ᐊᑐᖅᑕᐅᓚᐅᖅᑐᑦ 

ᐊᖓᔪᖅᑳᕆᔭᑦ ᒫᑭᐱ ᑎᒥᓛᑉ ᐅᖄᓚᓚᐅᖅᐳᑦ ᑭᙵᐃᑦ ᐋᓐᓂᐊᕕᐊᓄᑦ 9−ᒥᒐᓚᒃ ᐅᓐᓄᒃᑯᑦ ᐊᐃᑉᕆᓕ 4, 2012−ᖑᑎᓪᓗᒍ. ᐃᓗᐊᖅᓴᐃᔨ ᑕᐱ ᒪᑭᐅᐊᓐ ᑭᐅᓚᐅᖅᐳᖅ ᐅᖃᓗᖕᓂᐅᓚᐅᖅᑐᒥ. ᐃᓱᒫᓘᑎᖃᓚᐅᖅᑐᖅ ᓄᑕᕋᓛᖅ ᒫᑭᐱ ᐱᐅᓯᕙᓪᓕᐊᙱᓐᓂᖓᓂ. ᐃᓗᐊᖅᓴᐃᔨ ᒪᑭᐅᐊᓐ ᐅᖃᐅᔾᔨᓪᓗᓂ ᓄᑕᕋᓛᖅ ᐅᕕᓂᖕᓂᐊᖅᑕᐅᓗᓂ ᐊᒻᒪᓗ ᐋᓐᓂᐊᕕᓕᐊᕈᑎᔭᐅᓗᓂ ᖃᐅᑐᐊᕈᓂ. ᓱᓕᓂᐅᔪᓂ ᐊᖏᖃᑎᒌᙱᓐᓂᖃᓚᐅᖅᑐᖅ ᐅᖃᐅᓯᐅᔪᓂᑦ ᐊᐱᖅᑯᑎᓕᐊᖑᔪᓄᑦ ᖃᓄᐃᓐᓂᕆᔭᖓᓂ ᓄᑕᕋᓛᖅ ᒫᑭᐱᒧᑦ ᑕᐃᑲᓂ ᐅᖃᓗᖕᓂᐅᓚᐅᖅᑐᒥᑦ. ᖃᔅᓯᒐᓚᑦ ᐃᑲᕐᕋᐃᑦ ᐊᓂᒍᖅᑎᓪᓗᒋᑦ ᓄᑕᕋᓛᖅ ᒫᑭᐱ ᑐᐊᕕᕐᓇᖅᑐᒥ ᐋᓐᓂᐊᕕᓕᐊᕈᔾᔭᐅᓚᐅᖅᐳᖅ, ᖃᐅᔨᒪᒍᓐᓃᖅᓯᒪᓕᖅᑎᓪᓗᒍ, ᐊᒻᒪᓗ ᐆᒻᒪᖅᑎᑕᐅᔪᓐᓇᐃᓪᓕᓪᓗᓂ. 

ᑐᖁᓂᖓ ᓯᕗᓪᓕᕐᒥ ᐅᓂᒃᑲᐅᑕᐅᓚᐅᖅᐳᖅ ᐊᐃᑉᕆᓕ 2012-ᒥ ᑐᖁᖓᔪᓕᕆᔨᒻᒪᕆᖕᒧᑦ ᓄᑕᕋᓛᑦ ᓯᓂᒃᖢᑎᒃ ᐃᓅᔪᓐᓃᖃᑦᑕᕐᓂᖏᓐᓂᑦ. ᑐᖁᓂᐅᑉ ᐱᔾᔪᑎᖓ ᐋᖅᑭᒋᐊᖅᑕᐅᓚᐅᖅᐳᖅ ᑐᖁᖓᔪᓕᕆᔨᒧᑦ ᔪᓚᐃ 2012-ᒥ ᑐᖁᓂᐅᔪᒥᑦ ᐱᔾᔪᑎᖃᖅᑐᒥ ᓯᐊᒻᒪᒃᓯᒪᔪᒧᑦ ᐳᕙᖏᑎᒍᑦ ᐋᓐᓂᐊᕐᓂᐅᓂᕋᖅᑲᐅᔪᒧᑦ. ᐅᒃᑐᐱᕆ 2015-ᒥ ᐱᔾᔪᑎᖓ ᑐᖁᓂᕐᒧᑦ ᐋᖅᑭᒋᐊᖅᑕᐅᒃᑲᓐᓂᓚᐅᖅᐳᖅ ᓄᑕᕋᓛᑦ ᓯᓂᒃᖢᑎᒃ ᐃᓅᔪᓐᓃᖃᑦᑕᕐᓂᖏᓐᓄᑦ. 

ᐊᑐᓕᖁᔭᐅᓪᓗᐊᑕᖅᓯᒪᔪᑦ 

1. ᐋᖅᑭᒃᓯᒪᓂᕆᔭᖓᑕ ᐊᓯᔾᔨᖅᑕᐅᒋᐊᖃᕐᓂᕋᖅᑕᐅᕗᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᑦ: 

  • ᑕᒪᕐᒥᒃ ᓄᓇᓕᓐᓂ ᐋᓐᓂᐊᕕᖕᒥ ᐃᖅᑲᓇᐃᔭᖅᑎᐅᔪᑦ ᐅᓂᒃᑳᕆᓗᑎᒃ ᑕᐃᑰᓇᑦᑕᐃᓐᓇᖅ ᐅᓂᒃᑳᓪᓗᐊᖅᐳᑦ ᐊᑕᐅᓯᑐᐊᒃᑯᑦ ᑐᕌᖓᓂᓕᖕᒥᑦ ; 
  • ᐃᓂᒋᔭᐅᔪᖅ ᐊᖓᔪᖅᑳᖑᔪᒧᑦ ᐃᓗᐊᖅᓴᐃᔨᓄᑦ ᐋᖅᑭᒃᑕᐅᓪᓗᐊᖅᑐᖅ ᐊᒻᒪᓗ ᓈᒻᒪᒃᑐᒥ ᐃᑲᔪᕈᑎᖃᑦᑎᐊᕐᓗᓂ ᐊᖏᒡᓕᒋᐊᖅᑐᒧᑦ ᐱᓕᕆᐊᒃᓴᕆᔭᖃᕐᓗᓂ; 
  • ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᑎᖅᑎᕆᓗᑎᒃ ᑲᒪᒋᔭᖃᕐᓂᕐᒥᑦ ᐃᓂᖅᑎᕆᓂᐅᔪᓄᑦ ᐊᒻᒪᓗ ᓄᖅᑲᖅᑎᑦᑎᓂᕐᓄᑦ ᐋᓐᓂᐊᕕᖕᓂ ᐃᖅᑲᓇᐃᔭᖅᑎᐅᔪᓄᑦ; 
  • ᒪᕐᕈᐃᓕᖓᔪᒥᑦ ᐅᓂᒃᑳᕆᔭᕆᐊᖃᕐᓂᐅᔪᒥᑦ ᐱᔾᔪᑎᓕᖕᒥᑦ ᑐᐊᕕᕐᓇᖅᑐᓂ ᖃᓄᐃᓐᓂᐅᔪᓄᑦ ᐊᑐᓕᖅᑕᐅᔪᖃᕐᓗᓂ; 
  • ᓇᓗᓇᐃᖅᓯᒪᑦᓯᐊᖅᑐᓂᒃ ᐊᑐᐊᒐᕐᓂᑦ ᐋᔩᖃᑎᒌᖕᓂᕐᒧᑦ ᐊᒃᑐᖅᑕᐅᓯᒪᔪᓂ ᐱᓕᕆᕕᐅᔪᓄᑦ, ᑲᒪᒋᔭᖃᕐᓂᕐᒧᑦ ᐅᓐᓂᕐᓘᑕᐅᔪᓂᑦ ᐊᒻᒪᓗ ᐅᓂᒃᑳᕆᓂᕐᒥᑦ ᐱᕙᓪᓕᐊᑎᑕᐅᓗᑎᒃ. 

2. ᐅᓐᓂᕐᓘᑕᐅᔪᓄᑦ ᐱᓕᕆᔾᔪᓯᐅᔪᓂᑦ ᑐᑭᓕᐊᖑᓗᑎᒃ ᐊᒻᒪᓗ ᐊᑐᓕᖅᑎᑕᐅᓗᑎᒃ ᐋᓐᓂᐊᕕᖕᓂᑦ; 

3. ᖃᐅᔨᓴᐃᖁᔨᓂᖃᕐᓗᓂ ᑐᖁᓂᕆᓚᐅᖅᑕᖓᓄᑦ ᓄᑕᕋᓛᖅ ᒫᑭᐱᒧᑦ;

4. ᐃᖅᑲᓇᐃᔭᖅᑎᓄᑦ ᐱᔭᐅᔭᕆᐊᓕᖕᓂ ᐋᓐᓂᐊᕕᖕᓂ ᐊᒻᒪᓗ ᐊᕕᒃᑐᖅᓯᒪᔪᓂ ᑎᑎᕋᕐᕕᖓᓂ ᖃᐅᔨᓴᖅᑕᐅᒃᑲᓐᓂᕐᓗᑎᒃ ᒥᒃᖠᒋᐊᖅᑎᑕᐅᓇᓱᐊᕐᓂᕐᒧᑦ ᐱᔭᒃᓴᕐᔪᐊᕆᔭᐅᓗᐊᖅᑐᓂᑦ, ᐊᒻᒪᓗ ᓇᓕᒧᑎᑦᑎᓗᑎᒃ ᐊᔪᙱᓐᓂᐅᔪᓂᑦ ᓄᓇᓕᖕᓄᑦ ᐱᔭᐅᔭᕆᐊᓕᖏᓐᓂᑦ; 

5. ᐃᓗᐊᖅᓴᐃᔨᑦ ᐃᖅᑲᓇᐃᔭᖅᑎᐅᔪᑦ ᐱᓪᓗᐊᖅᐳᑦ ᕿᓚᒻᒥᐅᔪᒃᑯᑦ ᐊᒻᒪᓗ ᐃᓕᖅᑯᓯᕐᒧᑦ ᓈᒻᒪᑦᑎᐊᖅᑐᒥ ᐱᓕᒻᒪᒃᓴᓂᕐᒥᑦ, ᑕᖃᐃᖅᓯᕐᓂᐅᔪᒥᑦ, ᐃᖅᑲᓇᐃᔭᖅᑎᐅᔪᒥᑦ ᐃᖅᑲᓇᐃᔭᖅᑎᐅᔪᒧᑦ ᐃᓕᓐᓂᐊᖅᐸᓪᓕᐊᓂᐅᔪᒥᑦ, ᐊᒻᒪᓗ ᑐᓂᓯᓗᑎᒃ ᐊᖏᕈᑕᐅᔪᓂᑦ ᓴᖅᑭᑎᑦᑎᔪᓐᓇᕐᓂᕐᒧᑦ ᐅᖃᐅᓯᒃᓴᓂ RNANTNU-ᑯᓐᓂ ᐱᔾᔪᑎᓕᖕᒥᑦ ᐊᑐᖅᑕᐅᕙᓚᐅᖅᑐᓂ ᐊᒻᒪᓗ ᒫᓐᓇᐅᔪᒥ ᐅᓐᓂᕐᓘᑎᑕᖃᓚᐅᖅᐳᖅs/ᐱᓂᕐᓗᒃᓯᒪᔪᓂᒃ ᖃᐅᔨᓴᐃᓂᐅᔪᓂᑦ ᐊᒻᒪᓗ ᖃᓄᐃᓕᖓᓕᕐᓂᐅᔪᓄᑦ; 

6. ᓯᓚᑖᓃᖔᖅᑐᓄᑦ ᕿᒥᕐᕈᔭᐅᓂᖓᓂ ᐅᓂᒃᑳᓕᐊᖓ, ᐊᒻᒪᓗ ᓄᓇᕗᒻᒥ ᒐᕙᒪᒃᑯᓐᓂ ᑭᐅᓂᖓ ᑖᔅᓱᒥᖓᑦᑕᐃᓐᓇᖅ ᐃᓄᓕᒫᓄᑦ ᓴᖅᑭᑎᑕᐅᓗᓂ, ᐱᓕᕆᕕᐅᔪᓄᑦ ᐊᖓᔪᖅᑲᐅᑎᖏᓐᓂ ᐊᑐᐃᓐᓇᐅᓗᑎᒃ ᑲᑎᒪᖃᑎᖃᕐᓂᕐᒧᑦ ᓄᓇᓕᖕᓂ ᐃᓚᒋᔭᐅᔪᓂᑦ ᐅᓂᒃᑳᕐᕕᐅᓂᕐᒧᑦ ᐊᒻᒪᓗ ᐅᖃᐅᓯᖃᕐᓂᕐᒧᑦ ᐅᓂᒃᑳᓕᐊᒥᑦ ᐊᒻᒪᓗ ᐊᑐᓕᖁᔭᐅᔪᓂᑦ.