ᑭᙵᕐᓂ

ᑭᙵᐃᑦ ᐱᔾᔪᑎᒋᓪᓗᒍ

ᑭᙵᐃᑦ ᓄᓇᖓ, ᑕᐃᔭᐅᕙᓚᐅᖅᑑᒐᓗᐊᖅ Cape Dorset, ᓄᓇᙳᐊᑎᒍᑦ ᐃᓂᖃᖅᐳᖅ 64' 14" North, 76' 32' West, Dorset ᕿᑭᖅᑕᐅᑉ ᐊᑭᓐᓇᖓᓂ ᓯᑯᓰᓚᕐᒥ ᕿᑭᖅᑖᓘᑉ ᐊᑭᓐᓇᖅᐸᓯᐊᓃᑦᑐᖅ. ᒥᑦᑕᕐᕕᖓ 56 ᒦᑕᓂᒃ ᐳᖅᑐᔪᕐᒦᑎᒋᔪᖅ. ᑭᙵᐃᑦ 402 ᖃᖓᑕᓲᒃᑯᑦ ᐅᖓᓯᒃᑎᒋᕗᖅ ᐃᖃᓗᐃᑦ ᐊᑭᓐᓇᖅᐸᓯᐊᓃᖦᖢᓂ, ᐊᒻᒪ 1,891 ᑭᓚᒦᑕᓂᒃ ᔭᓗᓇᐃ ᑲᓇᖕᓇᖅᐸᓯᐊᓃᖦᖢᓂ.

ᑭᙵᐃᑦ ᓄᓈᓐᓂ ᑕᐃᔅᓱᒪᓂᑲᓪᓚᒃ ᐃᓅᕙᓚᐅᖅᓯᒪᔪᑦ ᓴᐅᓂᕕᓂᖏᑦ ᓱᓕ ᑕᒫᓃᑦᑐᑦ, ᐃᓅᕙᓚᐅᖅᓯᒪᔪᑦ 1000 ᐅᑭᐅᑦ ᔩᓱᓯ ᓱᓕ ᐃᓅᓚᐅᙱᑎᓪᓗᒍ ᐊᒻᒪ 1100 ᔩᓱᓯ ᐃᓅᓯᒪᓕᖅᑎᓪᓗᒍ, ᓯᕗᓪᓕᕐᒥ ᓇᓂᔭᐅᓚᐅᖅᓯᒪᔪᑦ. ᑕᐃᔭᐅᕙᓚᐅᖅᓯᒪᔪᑦ "ᑐᓂᔾᔪᐊᑦ" Cape Dorset−ᒥ ᑕᐃᔭᐅᓚᐅᙱᓱᖓᖅᑎᓪᓗᒍ ᓱᓕ. ᐃᓄᐃᑦ ᕿᑭᖅᑖᓗᖕᒥᐅᑕᐅᓪᓗᑎᒃ ᑭᙵᕐᓂ, ᑭᖑᕚᕆᔭᐅᔪᑦ ᓯᕗᓕᐊᕐᔪᑦᑎᓐᓄᑦ, ᖃᐅᔨᒪᔭᐅᔪᑦ ᐅᓂᒃᑳᖅᑐᐊᖑᖃᑦᑕᕐᓂᖏᓐᓄᑦ ᑐᓂᔾᔪᐊᖑᓂᕋᖅᑕᐅᓪᓗᑎᒃ.

ᐃᒃᐱᐊᕐᔫᓂᖓ ᐊᑦᑎᖅᑕᐅᓚᐅᖅᓯᒪᓪᓗᓂ ᑳᐱᑕᐃ ᓘᒃ ᕚᒃᔅ−ᒧᑦ ᓯᑎᐱᕆ 24, 1631-ᒥ, ᐄᑐᐊᖅ ᓵᒃᕕᐅᓪ ᐃᓅᔪᓐᓃᓚᐅᖅᑎᓪᓗᒍ, Dorset-ᑯᑦ ᐊᖓᔪᖅᑳᕐᔪᐊᖓ. ᓵᒃᕕᐅᓪ, ᐊᖓᔪᖅᑳᕐᔪᐊᕆᔭᐅᔪᕕᓂᖅ, ᑳᐱᑕᐃ ᕚᒃᔅ−ᒧᑦ ᐃᑲᔪᖅᑐᐃᔨᒋᔭᐅᓚᐅᖅᐳᖅ ᑕᓪᓗᕈᑎᐅᑉ ᐃᒪᖓᒍᑦ ᐃᑳᕆᐊᒃᑰᑲᑕᒐᓱᒃᑲᓗᐊᖅᖢᓂ ᐊᓂᒍᓚᐅᖅᓯᒪᙱᑕᖓ. "ᐃᒃᐱᐊᕐᔪᒃ" Dorset ᕿᑭᖅᑕᖓᓂ 243 ᒦᑕᒥᒃ ᐳᖅᑐᑎᒋᓪᓗᓂ ᖃᖅᑲᖅ, ᑭᙵᐃᑦ ᐃᓚᖓᓐᓃᖃᑕᐅᔪᖅ. "ᑭᙵᐃᑦ" ᑐᑭᖃᖅᐳᖅ "ᐳᖅᑐᔫᑎᑦ ᑭᙵᐃᑦ" ᐃᓄᒃᑎᑐᑦ ᑕᐃᒪᐃᓐᓂᖓᓄᓪᓗ ᐃᓄᒃᑎᑐᑦ ᑕᐃᒎᓯᕆᔭᐅᓕᖅᖢᓂ ᓄᓇᓕᖕᒥᐅᓄᑦ.

ᓂᐅᕕᖅᑎᒃᑯᑦ ᓂᐅᕕᕐᕕᓕᐅᓚᐅᖅᓯᒪᓪᓗᑎᒃ 1913-ᖑᑎᓪᓗᒍ. ᓴᓐᓂᖓᔪᓕᐅᖅᑐᑦ ᑐᒃᓯᐊᕐᕕᓕᐅᖅᑕᐅᓚᐅᖅᓯᒪᔪᑦ 1938-ᒥ ᑭᓯᐊᓂ ᒪᑐᔭᐅᓚᐅᖅᓯᒪᔪᖅ 1960-ᒥ ᓄᓇᖅᑲᑎᒌᑦ ᐊᒥᓲᓂᖅᓴᑦ ᐊᐅᐸᓗᒃᑐᓅᖅᑐᓄᑦ ᐅᒃᐱᕐᓂᖃᕐᓂᖏᓐᓄᑦ. 1947-ᒥ ᖃᐅᔨᒪᔭᐅᑦᑎᐊᖅᑐᖅ ᐅᑭᐅᖅᑕᖅᑐᓕᐊᖅᑕᖅᑐᖅ ᐅᒥᐊᕐᔪᐊᖅ ᐃᓄᒃᑎᑐᑦ ᑕᐃᔭᐅᕙᓚᐅᖅᓯᒪᔪᖅ ᒪᑦᑖᕐᕕᒃ (RMS Nascopie) ᐃᒃᑲᕐᕆᐊᓪᓚᓚᐅᖅᖢᓂ ᑭᕕᓚᐅᖅᓯᒪᔪᖅ. ᐅᒥᐊᕐᔪᐊᖅ ᐅᓯᔭᖏᓪᓗ ᑭᕕᓚᐅᖅᓯᒪᔪᑦ, ᑭᓯᐊᓂ ᐃᑭᒪᔪᑦ ᐅᒥᐊᕐᔪᐊᕐᒥᓪᓗ ᐱᓕᕆᔩᑦ ᐊᓐᓇᒃᑎᑕᐅᓚᐅᖅᓯᒪᔪᑦ; ᑭᙵᕐᒥᐅᑦ ᐃᖅᑲᐅᒪᓂᖃᖅᖢᑎᒃ ᐱᓂᕐᓗᓚᐅᖅᓯᒪᔪᓂᒃ ᐃᓄᒃᓱᒐᓕᐅᓚᐅᖅᓯᒪᕗᑦ ᐃᖅᑲᐃᔾᔪᑎᒃᓴᒥᒃ. ᐃᓄᒃᓱᒐᓕᐊᕆᓯᒪᔪᖅ ᐸᓖᓯᒃᑯᑦ ᑎᑎᕋᕐᕕᖓᑦᑕ ᓯᓚᑎᑦᑎᐊᖓᓃᑦᑐᖅ.

1953-ᒥ, ᑭᙵᕐᒥᐅᑕᑦ ᐊᐅᐸᓗᒃᑐᓅᖅᑐᑦ ᑐᒃᓯᐊᕐᕕᓕᐅᓚᐅᖅᓯᒪᓪᓗᑎᒃ ᓇᖕᒥᓂᖅ ᑐᒃᓯᐊᕐᕕᓕᐊᕆᔪᒪᔭᒥᓂᒃ. ᑐᒃᓯᐊᕐᕕᐅᑉ ᐃᓚᒃᓴᖏᑦ ᐊᒻᒪ ᐅᓯᔭᐅᔪᒃᓴᓄᑦ ᐊᑭᖏᑦ ᐊᑭᓕᖅᓱᖅᑕᐅᓚᐅᖅᓯᒪᕗᖅ ᐅᑭᐅᖅᑕᖅᑐᒥ ᐊᔪᕆᖅᓱᐃᔨᓄᑦ. ᐊᕐᕌᒍᒥ ᑖᔅᓱᒥᖓᔅᓴᐃᓐᓇᖅ ᓄᓇᓕᖕᓄᐊᖅᐸᓪᓕᐊᔪᓂᒃ ᐊᐅᓚᑦᑎᔨ ᔭᐃᒥᓯ ᕼᐆᔅᑕᓐ ᓄᓇᓕᖕᓄᑦ ᑎᑭᓚᐅᖅᓯᒪᔪᖅ. ᔭᐃᒥᓯ ᕼᐃᐅᔅᑕᓐ ᓄᓕᐊᖓᓗ ᐅᑭᐅᓄᑦ ᖁᓕᓄᑦ ᑭᙵᕐᒦᓐᓂᐊᓚᐅᖅᑑᒐᓗᐊᑦ; ᓄᓇᓕᖕᒥᐅᓂᒃ ᐃᑲᔪᖅᑎᖃᕐᓗᑎᒃ, ᑲᑎᖅᓱᐃᕙᓪᓕᐊᓕᓚᐅᖅᓯᒪᔪᑦ ᓴᓇᙳᐊᒃᑳᓗᖕᓂᒃ, ᓴᓇᙳᐊᖃᑦᑕᖁᔨᑦᑎᐊᖅᖢᑎᒃ ᒥᖅᓱᖃᑦᑕᖁᔨᓪᓗᑎᒃ ᐊᒻᒪ ᑎᑎᖅᑐᒐᖃᑦᑕᖁᔨᓪᓗᑎᒃ.  1959-ᖑᑎᓪᓗᒍᓗ ᑯᐊᐸᒃᑯᓐᓂ ᓂᐅᕕᕐᕕᒃᑖᓚᐅᖅᓯᒪᓪᓗᑎᒃ, ᑕᐃᔅᓱᒪᓂᐅᑎᓪᓗᒍᓗ ᓯᕗᓪᓕᖅᐹᒥ ᑕᑯᒃᓴᐅᑎᑕᐅᓂᑯᓂᒃ ᑭᙵᕐᓂ ᐃᓄᐃᑦ ᓴᓇᙳᐊᖃᑦᑕᖅᓯᒪᔭᖏᑦ Stradford-ᑯᓐᓂ ᖁᕕᐊᓲᑎᖃᖅᑐᓂᒃ. ᐱᓕᕆᐊᖑᑦᑎᐊᖅᑐᒻᒪᕆᐊᓘᓚᐅᖅᑐᖅ, ᓴᓇᙳᐊᒐᒃᓴᑦ ᐊᒻᒪ ᐱᓪᓚᑦᑖᖑᖅᑰᔨᑦᑎᐊᖅᑐᑦ ᓴᓇᙳᐊᖅᓯᒪᔪᑦ ᑮᓇᐅᔭᓕᐅᕈᑕᐅᓇᓱᐊᖏᓐᓇᖃᑦᑕᖅᑐᑦ ᓄᓇᖅᑲᑎᒌᓄᑦ.

ᑲᑎᖦᖢᒋᑦ ᐃᓄᒋᐊᖕᓂᖏᑦ: 1,527

ᖃᐅᔨᒋᐊᕐᕕᒃᓴᖅ

ᐃᕐᖐᓈᖅᑕᐅᑦ: @email
ᐅᖄᓚᐅᑎ: 867-897-5943
ᓱᒃᑲᔪᒃᑯᑦ: 867-897-8030
ᐃᑭᐊᖅᑭᕕᒃ: www.capedorset.ca