ᒥᓂᔅᑕᐅᖃᑎᒌᑦ ᑲᑎᒫᓂᒃᐳᑦ ᐊᑯᓐᓂᖓᓐᓂᑦ−ᑲᑎᓐᓂᖕᒥᑦ
ᐱᕙᓪᓕᐊᔪᑦ ᓴᖅᑭᑕᑦ
ᒥᓂᔅᑕᐅᖃᑎᒌᑦ ᑲᑎᒫᓂᒃᐳᑦ ᐊᑯᓐᓂᖓᓐᓂᑦ−ᑲᑎᓐᓂᖕᒥᑦ
ᐃᖃᓗᐃᑦ, ᓄᓇᕗᑦ (ᓯᑎᐱᕆ 9, 2019) – ᓄᓇᕘᑉ ᒥᓂᔅᑕᐅᖃᑎᒌᖏᑦ ᐊᑯᓐᓂᐊᖓᓐᓂᑦ−ᑲᑎᒪᓂᖕᒥᑦ ᐃᓱᓕᓚᐅᖕᒪᑦ ᐊᕐᕕᐊᓂᑦ ᐱᓇᓱᐊᕈᓯᐅᓚᐅᖅᑐᒥᑦ, ᓄᑖᒥᑦ ᑕᐅᑐᙳᐊᒐᖃᓕᖅᖢᑎᑦ ᑎᑭᓐᓇᓱᐊᖅᑕᖃᓕᖅᖢᑎᒡᓗ ᐊᑐᓕᖅᑎᑕᐅᑦᑎᐊᖕᓂᒃᓴᖓᓂᑦ ᑐᕋᖅᑕᕗᑦ.
“ᑲᑎᙵᓪᓗᑕ ᓯᕗᓕᖅᑎᐅᓪᓗᑕ ᑲᑎᒪᔨᐅᕗᒍᑦ, ᓇᓗᓇᙱᑦᑎᐊᖅᑐᒥᑦ ᑐᕌᒐᕆᔭᖃᖅᖢᑕ ᐃᓱᒪᖃᒻᒪᕆᑦᑎᐊᖅᖢᑕᓗ ᓄᓇᕗᒻᒧᑦ. ᓇᑉᐸᖓᓃᓕᖅᐳᒍᑦ ᐱᓕᕆᐊᒃᓴᑦᑎᓐᓂᑦ, ᐊᖏᖅᓯᒪᐃᓐᓇᖕᓂᐊᖅᖢᑕᓗ ᓵᑕᒃᓴᐅᓂᖕᒧᑦ ᑖᒃᑯᐊᓗ ᒐᕙᒪᒃᑯᑦ ᓄᓇᕗᒻᒥᑦ ᑎᑭᓐᓇᓱᐊᕐᓗᓂᒡᓗ ᑐᕌᒐᕆᔭᖏᑦ ᐱᓕᕆᐊᒃᓴᑦᑎᓐᓂᑦ,” ᐅᖃᖅᑐᕕᓂᖅ ᓯᕗᓕᖅᑎ ᔫ ᓴᕕᑲᑖᖅ. “ᐅᓪᓘᖕᓄ ᒪᕐᕉᖕᓄᑦ ᐱᓕᕆᔪᒻᒪᕆᐅᓚᐅᖅᑎᓪᓗᑕ, ᑐᕌᒐᖃᑦᑎᐊᓕᖅᑐᒍᑦ ᓯᕗᒻᒧᐊᒍᓐᓇᖁᓪᓗᑕ ᐱᐊᓂᒡᓗᑎᒍᓪᓗ ᐱᓕᕆᐊᕗᑦ ᐃᑲᔫᑕᐅᓂᐊᖅᑐᒧᑦ ᓄᓇᕗᒻᒥᐅᓕᒫᓄᑦ.”
ᖃᓄᐃᓕᐅᒐᒃᓴᒻᒪᕇᑦ ᑲᑎᒪᓂᐅᓚᐅᖅᑐᒥᑦ ᑐᕌᒐᐅᓂᐊᖅᑐᓂᑦ:
- ᓴᖅᑭᑦᑎᓗᑎᒃ ᓄᓇᕗᒻᒥᑦ ᐅᔭᕋᖕᓂᐊᖕᓂᖕᒧᑦ ᐱᓕᒻᒪᒃᓴᕐᕕᖕᒥᑦ ᑲᖏᖅᖠᓂᖕᒥᑦ, ᐱᓕᕆᖃᑎᖃᐅᕐᓗᑎᒃ ᓴᓇᕝᕕᐅᔪᓂᑦ ᐱᓕᕆᖃᑎᒋᔭᓂᑦ ᓄᓇᕗᒻᒥᑦ.
- ᐃᑲᔪᖅᑐᕐᓗᒋᑦ ᐃᓄᐃᑦ ᐃᖅᑲᓇᐃᔭᖕᓂᖏᑦ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᓐᓂᑦ ᐊᒥᓱᕈᖅᐸᓪᓕᐊᓂᒃᑯᑦ ᑎᒃᑯᐊᖅᑕᐅᕙᖕᓂᖏᑦ ᐊᑯᓂᐅᔪᖅ ᐃᖅᑲᓇᐃᔭᑲᐃᓐᓇᖅᐸᒃᑐᓄᑦ.
- ᑖᒃᑯᐊ ᑮᓇᐅᔭᑎᒍᑦ ᐃᑲᔫᑏᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᐱᓕᕆᐊᖏᑦ ᐅᑎᕐᓗᑎᒃ ᐃᓕᓐᓂᐊᕐᓂᓕᕆᔨᒃᑯᓐᓄᑦ, ᐃᑲᔪᖅᑐᐃᓂᐊᕐᓗᑎᒃ ᐃᓅᓯᓕᒫᒧᑦ ᐃᓕᑦᑎᕙᖕᓂᖕᒥᑦ.
- ᓄᑖᙳᕆᐊᕐᓗᒋᑦ ᐱᓕᕆᖃᑎᒋᔭᑦ ᐊᕕᒃᑐᖅᓯᒪᔪᓂᑦ, ᓄᓇᕗᒻᒥᑦ ᑲᓇᑕᒥᓪᓗ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᑦ ᓴᙱᒃᑎᓐᓂᐊᕐᓗᒋᑦ ᐸᖕᓇᐃᓃᑦ ᓂᐱᖅᑯᖅᑐᓯᒋᐊᕐᓗᒍᓗ ᓂᐱᕗᑦ.
- ᓅᓪᓗᒋᑦ ᐃᖃᓗᓕᕆᔨᒃᑯᓪᓗ ᓇᑦᑎᓕᕆᔨᒃᑯᓪᓗ ᐊᕙᑎᓕᕆᔨᒃᑯᓐᓂᑦ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓐᓄᑦ, ᐱᕚᓪᓕᖅᓯᒪᓗᒋᑦ ᐃᑲᔪᖅᑐᐃᓃᑦ ᐱᕙᓪᓕᐊᑦᑎᐊᕈᓐᓇᖁᓪᓗᒋᑦ ᐱᓕᕆᕝᕕᐅᔪᑦ ᐱᔪᓐᓇᖕᓂᖏᑦ.
- ᐱᓕᕆᖃᑎᒌᒃᓵᓕᐸᓪᓗᑎᒃ ᐱᓕᕆᖃᑎᒌᒐᔪᒡᓗᑎᒡᓗ ᓄᑖ ᒐᕙᒪᑐᖃᖅᑯᑦ ᓄᓇᕗᒻᒥᐅᑦ ᐊᔾᔨᖏᓐᓂᑦ ᐱᐅᓯᖃᖁᓪᓗᒋᑦ ᐱᕕᒃᓴᓂᒡᓗ ᑲᓇᑕᒥᐅᑎᓄᑦ ᐱᔪᓐᓇᖕᓂᖃᕐᕕᐅᔪᓂᑦ.
“ᑭᒐᖅᑐᖅᖢᒋᑦ ᒥᓂᔅᑕᐅᖃᑎᒌᑦ, ᓄᓇᕗᒻᒥᐅᑦ ᖃᐅᔨᒪᖁᕙᒃᑲ ᐃᖏᕐᕋᑦᑎᐊᕋᑦᑕ ᐊᖏᖅᓯᒪᓪᓗᑕᓗ ᐱᕈᖅᐸᓪᓕᐊᓂᖓᓂ ᐱᕙᓪᓕᐊᓂᖓᓂᒡᓗ ᓄᓇᕗᑦ. ᓯᕗᓪᓕᖅᐹᓪᓗᐊᑕᕆᔭᕗᑦ ᑲᔪᓯᑦᑎᐊᕐᓂᖏᑦ ᖃᓄᐃᙱᑦᑎᐊᖕᓂᖏᓪᓗ ᐃᓄᖁᑎᕗᑦ. ᐱᕚᓪᓕᖅᑎᑦᑐᒪᕙᕗᑦ ᐱᔨᑦᑎᕋᐅᑎᕗᑦ ᐱᓕᕆᐊᒃᓴᕗᓪᓗ, ᓄᓇᕗᒻᒥᐅᓪᓗ ᐱᕕᖃᖁᓪᓗᒋᑦ ᑲᔪᓯᑦᑎᐊᖁᓪᓗᒋᑦ,” ᐅᖃᓚᐅᖅᑐᖅ ᓯᕗᓕᖅᑎ ᓴᕕᑲᑖᖅ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ
ᑎᑎᕋᖅᑎ ᓯᕗᓕᖅᑎ ᔫ ᓴᕕᑲᑖᖅ ᑎᑎᕋᕐᕕᐊᓂ
867-975-5059
867-222-5763
@email