ᐃᓕᓐᓂᐊᕐᓂᓕᕆᔨᒃᑯᑦ ᓴᖅᑭᑦᑎᕗᑦ ᑐᓴᕋᓱᒍᑎᒋᓚᐅᖅᑕᒥᓂᒃ ᐅᓂᒃᑳᓂᑦ

ᐱᕙᓪᓕᐊᔪᖅ ᓴᖅᑭᑕᖅ

ᐃᓕᓐᓂᐊᕐᓂᓕᕆᔨᒃᑯᑦ ᓴᖅᑭᑦᑎᕗᑦ ᑐᓴᕋᓱᒍᑎᒋᓚᐅᖅᑕᒥᓂᒃ ᐅᓂᒃᑳᓂᑦ

ᐃᖃᓗᐃᑦ, ᓄᓇᕗᑦ (ᒪᐃ 30, 2019) – ᐃᓕᓐᓂᐊᕐᓂᓕᕆᔨᒃᑯᑦ ᐅᓪᓗᒥ ᓴᖅᑭᑦᑎᖅᑲᐅᕗᑦ ᓂᕈᐊᕐᓂᖅ ᐊᖅᑯᑎᑦᓴᒥᑦ ᓯᕗᒧᑦ, ᑖᓐᓇ ᐅᓂᒃᑳᖅ ᓇᓗᓇᐃᔭᐃᓯᒪᔪᖅ 2018-2019 ᐃᓕᓐᓂᐊᕐᓂᓕᕆᓂᖕᒧᑦ ᐱᖁᔭᖓᓄᑦ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᓴᐳᒻᒥᔭᐅᓂᖓᓄᑦ ᐱᖁᔭᖓᓄᑦ ᓄᓇᓕᖕᓂᑦ ᑐᓴᕋᓱᒃᑎᓪᓗᒋᑦ.

“ᖁᔭᓕᑦᑎᐊᒻᒪᕆᒃᑕᒃᑲ ᑐᓴᕐᕕᒋᓯᒪᔭᕈᑦ ᑐᓴᕋᓱᒋᐊᖅᓯᒪᑎᓪᓗᑕ,” ᐅᖃᖅᑐᕕᓂᖅ ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᑕᐃᕕᑎ ᔪᐊᓇᓯ. "ᐅᖃᐅᓯᒃᓴᕆᔭᐅᓚᐅᖅᑐᖅ ᓄᓇᕗᒻᒥᐅᓂᑦ ᐋᖅᑭᒍᑕᐅᓚᐅᖅᐳᑦ ᐋᖅᑭᒋᐊᑦᑕᐅᔪᒪᔪᓂᑦ ᐃᓕᓐᓂᐊᕐᓂᓕᕆᓂᖕᒧᑦ ᐱᖁᔭᖓ ᐊᒻᒪᓗ ᐃᓄᐃᑦ ᐅᖃᐅᓯᖓ ᓴᐳᔾᔭᐅᓯᒪᓂᖓᓄᑦ ᐱᖁᔭᖓᓂᑦ. ᑐᓴᕈᑎᒋᓚᐅᖅᑕᕗᑦ ᓴᖅᑭᔾᔪᑕᐅᕗᖅ ᑲᑐᔾᔨᓪᓗᑎᒃ ᑕᐅᑐᖅᑰᖅᑕᖏᓐᓂᑦ ᐃᓕᓐᓂᐊᕐᓂᖕᒧᑦ ᓴᐳᒻᒥᔭᐅᓂᖓᓄᓪᓗ ᓴᖅᑭᑕᐅᒃᑲᓐᓂᖕᓂᖓᓄᓪᓗ ᐃᓄᒃᑐᑦ.”

ᐅᓂᒃᑳᖅ ᓇᓗᓇᐃᔭᐃᓯᒪᕗᖅ ᖃᐅᔨᓵᖑᓂᑯᓂ ᐃᓱᒪᒋᔭᓂᒡᓗ ᓄᓇᕗᒻᒥᐅᓂᑦ ᐃᓕᓐᓂᐊᕐᓂᖕᒧᓪᓗ ᐱᓕᕆᖃᑕᐅᔪᓂᑦ ᒪᕐᕈᐃᓕᖓᔪᑎᒍᑦ ᐅᖃᐅᓯᒃᑯᑦ ᐃᓕᓐᓂᐊᕐᓂᓕᕆᓂᖕᒥᑦ ᐅᖃᐅᓯᕐᓗ ᐃᓕᓐᓂᐊᕐᑎᑦᑎᔾᔪᑕᐅᓇᔭᖅᑐᖅ, ᐱᓕᕆᐊᑦ ᑲᒪᒋᔭᒃᓴᓪᓗ ᐃᓕᓂᐊᕐᑐᓕᕆᔨᒃᑯᑦ ᐃᓕᓐᓂᐊᕐᓂᓕᕆᔨᒃᑯᓪᓗ, ᐃᓕᓐᓂᐊᕐᑐᓕᕆᔨᒃᑯᑦ ᑲᑎᒪᔨᖏᑦ, ᓅᑉᐸᓪᓕᐊᓂᖏᓐᓄᓪᓗ ᒪᓕᒋᐊᓕᑦ. ᐅᓂᒃᑳᖅᑕᐅᖅ ᐃᓚᖃᖕᒥᔪᖅ ᐅᖃᐅᓯᒃᓴᕆᔭᐅᓚᐅᖅᑐᓂᑦ ᐱᓯᒪᐃᓐᓇᕐᓯᓂᖕᓂᑦ ᓴᖅᑭᑦᑎᒋᐊᒃᑲᓐᓂᖕᓂᓪᓗ ᐅᖃᐅᓯᖕᒥᑦ ᐃᓕᖅᑯᓯᖕᒥᓪᓗ, ᓴᙱᒃᑎᒋᐊᖕᓂᕆᓂᖕᒥᓪᓗ ᐃᓕᓐᓂᐊᕐᕕᐅᑉ ᐃᓄᒋᐊᖕᓂᖏᑦ.

ᓯᑎᐱᕆ 11, 2018−ᓗ ᔮᓄᐊᕆ 22, 2019 ᐊᑯᓐᓂᖓᓐᓂᑦ, ᑐᓴᕋᓱᖃᑎᒌᑦ ᓄᓇᓕᓕᒫᓄᐊᓚᐅᖅᐳᑦ 25−ᓄᑦ ᓄᓇᕗᒻᒥᑦ. ᑲᑎᖦᖢᒋᑦ, 829 ᓄᓇᕗᒻᒥᐅᑦ ᐃᓚᐅᓚᐅᖅᐳᑦ ᑐᓴᕋᓱᖕᓂᖕᓂᑦ. ᐃᓕᓐᓂᐊᕐᓂᓕᕆᔨᒃᑯᑦ ᑎᑎᕋᖅᓯᒪᔪᓂᑦ ᐱᓚᐅᖕᒥᔪᑦ 6−ᓂᑦ ᐃᓕᓐᓂᐊᕐᑐᓕᕆᔨᒃᑯᓐᓂᑦ, ᑕᓪᓕᒪᓂᑦ ᐱᓕᕆᖃᑎᒋᔭᓄᑦ ᑲᑐᔾᔨᖃᑎᒌᓂᑦ, 33−ᓂᓪᓗ ᓄᓇᕗᒻᒥᐅᓂᑦ.

“ᓄᓇᕗᒻᒥᐅᑦ ᐊᒃᓱᕉᑎᖃᑦᑎᐊᖕᒪᑕ ᐃᓕᓐᓂᐊᕐᓂᓕᕆᓂᖕᒥᑦ, ᑕᐅᑐᒃᖢᑎᒡᓗ ᓄᑕᖅᑲᑦ ᒪᒃᑯᒃᑐᓂᒡᓗ ᓄᓇᕗᒻᒥᐅᓂᑦ ᐱᐅᓛᑦᑎᐊᓂᑦ ᐱᑎᑕᐅᓗᑎᒃ,” ᐅᖃᖅᑐᕕᓂᖅ ᒥᓂᔅᑕ ᔪᐊᓇᓯ. “ᖁᔭᓕᔪᒪᕙᒃᑲ ᓄᓇᓕᓕᒫᑦ ᓄᓇᕗᒻᒥᑦ, ᑖᒃᑯᐊᓗᑦᑕᐅᖅ ᐱᒻᒪᕆᐅᔪᑦ ᐃᑲᔪᖅᑐᑦ ᐃᖅᑲᓇᐃᔭᖅᑎᑦ ᐃᓕᓐᓂᐊᕐᓂᓕᕆᔨᒃᑯᓐᓂᑦ ᐃᓕᖅᑯᓯᓕᕆᔨᒃᑯᓐᓂᓪᓗ, ᑭᒡᒐᖅᑐᐃᔨᓂᒡᓗ ᓄᓇᕗᑦ ᑐᙵᕕᒃᑯᓐᓂᑦ ᑲᑐᔾᔨᖃᑎᒌᓂᒡᓗ ᓄᓇᕗᒻᒥᑦ ᐃᓕᓐᓂᐊᕐᑐᓕᕆᔨᒃᑯᓐᓂᑦ, ᐱᓕᕆᐊᖏᑦ ᐊᑑᑎᖃᒻᒪᕆᒃᖢᑎᒃ.”

ᐱᖁᔭᒃᓴᖅ 25, ᐱᖁᔭᖅ ᐋᖅᑭᒋᐊᕈᑕᐅᓂᐊᖅᑐᖅ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᖓᓐᓂᑦ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᓴᐳᒻᒥᔭᐅᓂᖓᓄᑦ ᐱᖁᔭᖓᓂᑦ ᓴᖅᑭᑕᐅᓛᖅᑐᑦ ᐅᐱᕐᖔᒥᑦ ᑲᑎᒪᓕᖅᐸᑕ ᓄᓇᕗᒻᒥᑦ ᒪᓕᒐᓕᐅᕐᕕᖕᒥᑦ. ᒪᓕᒐᓕᐅᖅᑏᑦ ᒪᓕᒐᓕᐅᕐᕕᖕᒥᑦ ᐱᕕᖃᖅᐳᑦ ᐋᔩᓂᖕᒥᑦ ᐱᖁᔭᒃᓴᒥᑦ ᐅᑭᐊᒃᓵᖅ ᑲᑎᒪᓕᖅᐸᑕ. ᐅᓂᒃᑳᖅ ᐊᑐᐃᓐᓇᐅᔪᖅ ᖃᕆᑕᐅᔭᒃᑯᑦ ᐅᕙᓂ ourgoalsforeducation.ca.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᔩᓐ ᐱᓕᑉ ᓚᐳᕆᔅ
ᐊᐅᓚᑦᑎᔨ, ᑐᓴᐅᒪᔪᓕᕆᓂᕐᒧᑦ
ᐃᓕᓐᓂᐊᕐᓂᓕᕆᔨᒃᑯᑦ
867-975-5645
@email