ᑭᙵᕐᓂᑦ ᐳᕙᓪᓗᑦᑐᓕᑦ ᖃᐅᔨᓴᕐᓂᖅ ᐱᔭᕇᖅᑐᖅ
ᐱᕙᓪᓕᐊᔪᖅ ᓴᖅᑭᑎᑕᐅᔪᖅ
ᑭᙵᕐᓂᑦ ᐳᕙᓪᓗᑦᑐᓕᑦ ᖃᐅᔨᓴᕐᓂᖅ ᐱᔭᕇᖅᑐᖅ
ᐃᖃᓗᐃᑦ, ᓄᓇᕗᑦ (ᒪᐃ 17, 2019) - ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᓪᓗᒥ ᓇᓗᓇᐃᖅᓯᔪᑦ ᐱᔭᕇᑦᓯᐊᕐᓂᖓᓂᑦ ᓄᓇᕗᒻᒥ ᐱᖓᔪᐊᓐᓂᑦ ᓄᓇᓕᓕᒫᓂᑦ ᐳᕙᓪᓗᓐᓂᕐᒧᑦ (TB) ᖃᐅᔨᓴᕐᓂᕐᒧᑦ ᑭᙵᕐᓂᑦ.
"ᖃᐅᔨᓴᕐᓂᖅ ᑭᙵᕐᓂᑦ ᐃᓚᒋᔭᐅᔪᖅ ᒐᕙᒪᒃᑕ ᐱᒐᓱᐊᖏᓐᓇᕐᓂᖓᓄᑦ ᐅᓄᖅᓯᑎᑦᓯᓂᕐᒥᑦ ᓄᓇᓕᓐᓂᑦ ᐅᔾᔨᕈᓱᑦᑎᑦᓯᓂᕐᒧᑦ ᐳᕙᓪᓗᓂᕐᒥᑦ, ᓄᖅᑲᖓᑎᑦᓯᓂᕐᒥᑦ ᐅᓄᖅᓯᑎᑦᓯᓂᕐᒥᓪᓗ ᐋᓐᓂᐊᓂᐅᔫᑉ ᓱᖅᑯᐃᖅᑕᐅᓂᖓᓂᑦ ᐃᑲᔪᖅᑕᐅᓂᕐᒧᓪᓗ ᑕᒪᒃᑮᓐᓄᑦ ᐆᒻᒪᕇᑦᑐᑦ ᐆᒻᒪᕆᖏᑦᑐᓪᓗ ᐳᕙᓪᓗᓇᐃᕐᓂᑦ," ᐅᖃᖅᑐᖅ ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄ ᔪᐊᔾ ᕼᐃᒃᔅ. "ᖃᐅᔨᒪᓂᖅᑖᕐᓂᐅᔪᑦ ᕿᑭᖅᑕᕐᔪᐊᕐᒥᑦ, ᑎᑭᕋᕐᔪᐊᕐᒥᑦ ᑭᙵᕐᓂᓪᓗ ᖃᐅᔨᓴᕐᓂᕐᒧᑦ ᐱᕕᖃᖅᑎᑦᓯᓂᐊᖅᑐᑦ ᐅᕙᑦᑎᓐᓂᑦ ᓴᖅᑭᑎᑦᓯᓂᕐᒧᑦ ᐊᑯᓂᐅᔪᒧᑦ ᓄᓇᓕᓐᓂᑦ-ᑐᙵᕕᖃᕐᓂᕐᒧᑦ ᑲᒪᒋᔭᖃᕐᓂᕐᒧᑦ ᐃᑲᔫᑕᐅᓂᐊᖅᑐᓂᑦ ᓄᖅᑲᑎᑦᓯᓂᕐᒧᑦ ᐳᕙᓪᓗᕐᓂᕐᒥᑦ ᓄᓇᕘᓕᒫᒥᑦ 2030-ᒥ.
ᑭᙵᕐᓂᑦ ᐳᕙᓪᓗᕐᓂᕐᒧᑦ ᖃᐅᔨᓴᓚᐅᖅᑐᑦ 80-ᐳᓴᓐᑎᖏᓐᓂᑦ ᓄᓇᓕᓕᓐᓂᑦ ᐅᖓᑖᓄᑦ ᐱᓇᓱᐊᕈᓯᕐᓄᑦ 12-ᓄ. ᑭᙵᕐᓃᑎᓪᓗᒋᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒥᓱᑲᓪᓚᓂᑦ ᖃᓄᐃᓕᐅᖅᑎᑦᓯᓚᐅᖅᑐᑦ, ᐃᓚᒋᔭᐅᑦᓱᓂ ᓄᓇᓕᓐᓂᑦ ᓂᕆᕕᔾᔪᐊᑎᑦᓯᓂᖅ ᑐᓴᐅᒪᑎᑦᓯᔾᔪᑎᓄᑦ ᑲᑎᒪᑎᑦᓯᓂᖅ, ᐊᑐᐃᓐᓇᐅᑎᑦᓯᓂᕐᒥᑦ ᐱᕕᖃᕐᓂᐅᔪᓂᑦ ᓄᓇᓕᓕᓐᓂᑦ ᐊᐱᖅᑯᑎᓂᑦ ᐊᐱᖅᓱᓂᕐᒧᑦ ᑐᓴᖅᑎᑦᓯᔾᔪᑎᑖᕐᓂᕐᒧᓪᓗ ᐳᕙᓪᓗᓐᓂᐅᑉ ᒥᑦᓵᓄᑦ ᑐᓂᔭᐅᓂᖓᓄᓪᓗ, ᖃᐅᔨᓴᖅᑕᐅᓂᕐᒧᑦ ᑲᒪᒋᔭᐅᓂᖏᓪᓗ.
ᐱᓕᕆᔨᐅᕗᑦ ᑖᒃᑯᓂᖓ ᐱᓕᕆᐊᖑᔪᓂᒃ ᑕᐃᒪᐃᒍᓐᓇᓚᐅᖅᑐᖅ ᐱᓕᕆᖃᑎᖃᕐᓂᕐᒧᑦ ᑭᙵᒥᐅᓂᑦ ᕼᐋᒻᒪᓚᒃᑯᓐᓂ ᓄᓇᕗᒻᒥᓪᓗ ᒐᕙᒪᒃᑯᓐᓂᑦ (GN) ᐱᓕᕆᕝᕕᐅᔪᓂᓪᓗ ᓄᓇᓕᓐᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓂᑦ ᐃᓕᓐᓂᐊᕐᓂᓕᕆᔨᒃᑯᓐᓂᓪᓗ. ᑖᒃᑯᐊ ᖃᐅᔨᓴᕐᓂᐅᔪᑦ ᐃᑲᔪᖅᑕᐅᓚᐅᕐᒥᔪᑦ ᒐᕙᒪᒃᑯᓐᓄᑦ ᓄᓇᕗᒻᒥ ᐱᓕᕆᖃᑎᒌᓄᑦ ᑲᓇᑕᒥ ᐳᕙᓪᓗᑦᑐᓕᕆᔨᖏᓐᓄᑦ, ᐃᓚᒋᔭᐅᑦᓱᑎᒃ ᐃᓄᐃᑦ ᑕᐱᕇᑦ ᑲᓇᑕᒥ, ᓄᓇᕗᒻᒥ ᑐᙵᕕᒃᑯᑦ., ᑲᓇᑕᒥ ᖁᐱᕐᕈᐊᕐᔪᓕᕆᔨᓂᑦ ᒐᕙᒪᒃᑯᓐᓂᓪᓗ ᑲᓇᑕᒥ.
ᑐᓴᕆᐊᒃᑲᓐᓂᕈᑎᓄᑦ ᐳᕙᓪᓗᓐᓇᕐᒧᑦ ᖃᐅᔨᓴᖅᑕᐅᓂᕐᒧᓪᓗ, ᐅᖃᓕᒫᕐᓗᒍ ᐳᕙᓪᓗᓐᓂᕐᒧᑦ ᓱᓕᔪᑦᕿᒥᕐᕈᐊᒐᖓ ᐊᒻᒪᓗ ᐳᕙᓪᓗᓐᓇᕐᒧᑦ ᐅᕕᓂᒃᑯᑦ ᖃᐅᔨᓴᖅᑕᐅᔾᔪᑎ ᕿᒥᕐᕈᐊᒐᖓ. Skin test
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᕗᐊᓐᑎ ᕼᐊᓗᓐᐃᓐ
ᑐᓴᒐᒃᓴᓕᕆᔨᒻᒪᕆᒃ ᒐᕙᒪᓕᕆᔨᒃᑯᑦ
867-975-6048
@email