ᖃᓄᐃᖏᑦᑎᐊᕐᓂᕐᒧᑦ ᒪᓕᒐᓕᕆᔨᒃᑯᓐᓂ ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᒥᒃ ᓴᖅᑭᑎᑦᑎᓂᒃᑯᑦ ᐊᓕᐊᓇᐃᒍᓲᑎᖃᕐᓂᖅ
ᐱᕙᓪᓕᐊᔪᑦ ᓴᖅᑭᑕᑦ
ᖃᓄᐃᖏᑦᑎᐊᕐᓂᕐᒧᑦ ᒪᓕᒐᓕᕆᔨᒃᑯᓐᓂ ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᒥᒃ ᓴᖅᑭᑎᑦᑎᓂᒃᑯᑦ ᐊᓕᐊᓇᐃᒍᓲᑎᖃᕐᓂᖅ
ᐃᖃᓗᒃᑑᑦᑎᐊᖅ, ᓄᓇᕗᑦ (ᒫᔾᔨ 26, 2019) − ᒪᓕᒐᓕᕆᔨᒃᑯᑦ ᐅᓪᓗᒥ ᓇᓗᓇᐃᖅᓯᔪᑦ ᓴᖅᑭᑕᐅᓂᖓᓂᒃ ᖃᓄᐃᙱᑦᑎᐊᕐᓂᕐᒧᑦ ᒪᓕᒐᓕᕆᔨᒃᑯᓐᓂᑦ ᐱᓕᕆᐊᒃᓴᒥ ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᒥᒃ ᐃᖃᓗᒃᑑᑦᑎᐊᒥ.
"ᑕᒪᓐᓇ ᐱᓕᕆᐊᖅ ᒪᓕᒃᐳᖅ ᑐᕌᖅᑕᕗᑦ ᓯᕗᓪᓕᐅᔾᔭᐅᔭᕆᐊᓕᖕᓂ ᐃᓅᓯᕗᒻᒥ, ᐱᓕᕆᖃᑎᒌᖕᓂᐅᑎᑕᐅᔪᖅ ᖃᓄᐃᙱᑦᑎᐊᕐᓂᕐᒥᒃ ᐃᒻᒥᖕᓂᒃ ᐱᓕᕆᔪᓐᓇᑦᑎᐊᕐᓂᕐᒥᒡᓗ ᐃᓄᖁᑎᑦᑎᓐᓂᒃ ᓄᓇᓕᑦᑎᓐᓂᓗ. ᑕᒪᓐᓇ ᐱᓕᕆᐊᒃᓴᖅ ᐃᑲᔫᑎᖃᕐᓂᐊᖅᑐᖅ ᐃᓕᖅᑯᓯᕐᒧᑦ ᐊᒃᑐᐃᓐᓇᖅᑐᓄᑦ, ᓄᓇᓕᖕᓂᙶᖓᔪᓂ ᐱᓕᕆᐊᒃᓴᓂ ᐃᑲᔪᖅᓱᐃᔪᓂ ᐱᓕᒻᒪᒃᓴᖅᑎᑦᑎᔪᓂ ᐃᖅᑲᓇᐃᔭᕐᓂᕐᒧᓪᓗ ᐊᓄᓪᓚᓰᕕᐅᑉ ᓯᓚᑖᓂ ᐊᐅᓚᑦᑎᓂᕐᒥᒃ ᑎᒍᔭᐅᓯᒪᔪᓂ ᐃᓅᖃᑎᒌᓄᑦ," ᐅᖃᓚᐅᖅᑐᖅ ᒪᓕᒐᓕᕆᔨᒃᑯᓐᓄᑦ ᒥᓂᔅᑕ ᔩᓂ ᐃᕼᐊᓪᓗᐊᖅ.
ᖃᓄᐃᙱᑦᑎᐊᕐᓂᕐᒧᑦ ᒪᓕᒐᓕᕆᔨᒃᑯᓐᓂ ᐱᓕᕆᐊᒃᓴᖅ ᑎᒍᔭᐅᓯᒪᔪᓄᑦ ᑐᕌᖓᔪᖅ ᑐᕌᒐᖃᖅᖢᑎᒃ ᑲᒪᒋᔭᖃᕐᓂᕐᒥᒃ ᐱᔾᔪᑕᐅᕙᒃᑐᓂ ᐱᕋᔭᖕᓂᕐᒥᒃ ᐃᓕᖅᑯᓯᖃᕐᓂᕐᒥᒃ ᓲᕐᓗ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᒥᒃ, ᐊᔪᓕᕈᑎᖃᖅᓯᒪᓂᕐᒥᒃ ᐊᒃᓱᕈᕐᓇᓪᓚᕆᖕᓂᕐᒥᒡᓗ. ᐊᑕᖐᔪᒥᒃ ᐱᓕᕆᐊᖃᕐᓂᖅ ᒪᓕᒐᓕᕆᔨᒃᑯᓐᓄᑦ ᒪᓕᒃᑐᒥ ᐃᓄᐃᑦ ᖃᐅᔨᒪᔭᑐᖃᖏᑦᑕ ᑐᙵᕕᖏᓐᓂᒃ.
ᑕᒪᓐᓇ ᐱᓕᕆᐊᒃᓴᖅ ᐱᒋᐊᕐᓂᐊᖅᑐᖅ ᐊᐃᕐᕆᓕ 1, 2019, ᒪᕐᕉᖕᓂᓪᓗ ᐃᓚᖃᓪᓗᐊᑕᖅᖢᓂ. ᓯᕗᓪᓕᖅ ᐋᓐᓂᐊᕐᕕᖕᒥ ᐃᓚᒋᔭᐅᔪᖅ ᐃᑲᔪᖅᓱᐃᓂᖃᖅᑐᖅ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᒧᑦ ᐃᓅᓯᓕᕆᔨᓂᒃ, ᓘᒃᑖᓂᒃ ᐊᒻᒪ ᐃᓱᒪᓕᕆᔨᒻᒪᕆᖕᓂᒃ. ᑭᖑᓪᓕᖅ ᐃᓚᒋᔭᐅᔪᖅ ᐃᓕᖅᑯᓯᕐᒨᖓᔪᖅ, ᐃᑲᔪᖅᓱᐃᓂᖃᖅᑐᖅ ᓄᓇᓕᖕᓂ ᐃᓅᓯᓕᕆᔨᓂᒃ ᐃᓐᓇᕐᓂᒡᓗ, ᐃᓚᐅᕙᒃᖢᑎᒃ ᐱᓕᕆᓂᕆᔭᐅᔪᓂ ᓲᕐᓗ ᓄᓇᓕᐅᑉ ᓯᓚᑖᓂ ᐱᓕᕆᐊᒃᓴᓂ. ᐃᑲᔪᖅᑕᐅᔭᕆᐊᓖᑦ ᑐᓐᓂᖅᑯᑕᐅᓇᔭᖅᑐᑦ ᐱᓕᕆᐊᒃᓴᒧᑦ ᐸᓖᓯᒃᑯᓐᓂᑦ, ᐃᖅᑲᖅᑐᖅᑕᐅᑎᑦᑎᔨᓂᒃ ᓴᐳᓐᓂᐊᖅᑎᓂᒡᓗ.
ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᖅ ᑲᑐᔾᔨᖃᑎᒌᒃᑐᑎᒍᑦ ᑮᓇᐅᔭᖃᖅᑎᑕᐅᔪᖅ ᒐᕙᒪᑐᖃᒃᑯᑦ ᐃᖅᑲᖅᑐᐃᕕᓕᕆᕝᕕᖏᓐᓂᒃ ᓄᓇᕗᑦ ᒐᕙᒪᖓᑕᓗ ᒪᓕᒐᓕᕆᔨᒃᑯᖏᓐᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᒡᓗ. ᐃᓅᓯᖃᑦᑎᐊᖅᑐᓕᕆᔨᒃᑯᑦ ᐃᖃᓗᒃᑑᑦᑎᐊᒥ ᓴᖅᑭᑎᑦᑎᖃᑕᐅᔪᑦ ᑕᒪᑐᒥᖓ ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᒥᒃ. ᐃᖅᑲᖅᑐᐃᕕᓕᕆᔨᕐᔪᐊᒃᑯᑦ ᑲᓇᑕᒥ ᓴᓂᕐᕙᒃᓯᓯᒪᔪᑦ $750 000−ᓂᒃ ᑕᒪᑐᒧᖓ ᐱᓕᕆᐊᒃᓴᒧᑦ, 2018−ᒥᑦ 2020−ᒧᑦ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᒪᑎᐅᓪᑕ ᒥᑕᑭᐅᕙᒻᐸ
ᐊᑐᐊᒐᓕᕆᓂᕐᒧᑦ ᑐᓴᒐᒃᓴᓕᕆᓂᕐᒧᓪᓗ
ᕿᒥᕐᕈᔨ ᒪᓕᒐᓕᕆᔨᒃᑯᑦ
(867) 975-6325
@email