ᑮᓇᐅᔭᑎᒍᑦ ᐃᑲᔪᖅᑕᐅᕙᖕᓂᖏᑦ ᓄᓇᕗᒻᒥᐅᑦ ᐃᓕᓐᓂᐊᖅᑏᑦ – FANS-ᖑᓂᕋᖅᑕᐅᕙᒃᖢᓂ

ᒥᓇᖅᓗᒋᑦ ᐊᔨᖏᑦ ᐃᓕᓐᓂᐊᖅᑎᓄᑦ ᐊᑐᐊᒐᒃᓴᖅ ᐅᕗᖓ!

 

ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᑦ ᐋᖅᑭᒃᑕᐅᓯᒪᕗᑦ ᑮᓇᐅᔭᑦ ᐱᔾᔪᑕᐅᓗᑎᒃ ᑐᓗᖅᑕᕈᑕᐅᖁᙱᖦᖢᒋᑦ ᐃᓕᓐᓂᐊᒃᑲᓐᓂᕈᒪᔪᓄᑦ ᖁᑦᑎᖕᓂᖅᓴᒥᒃ. ᐃᓕᓐᓂᐊᖅᑎᓄᑦ ᑐᕌᖓᕗᑦ ᐃᓕᓐᓂᐊᖃᑕᐅᔪᓄᑦ ᓇᓗᓇᐃᖅᑕᐅᓯᒪᔪᓂᒃ ᐊᖓᔪᒃᖠᕐᓄᑦ ᐃᓕᓐᓂᐊᕐᕕᖕᓄᑦ ᐊᒻᒪ ᐃᓕᓐᓂᐊᖅᑕᐅᕙᒃᑐᑐᖃᓄᑦ. ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᑦ ᒪᓂᒻᒪᐃᓲᖑᕗᑦ ᖃᔅᓯᑲᓪᓚᖕᓂᒃ ᐃᑲᔫᑎᒃᓴᓂᒃ ᑐᕌᖓᑎᑕᐅᔪᓂᒃ ᐃᑲᔫᑕᐅᔪᓐᓇᖁᓪᓗᒋᑦ ᐊᑭᓕᖅᓱᕆᐊᓕᖕᓄᑦ ᐊᔪᕐᓇᖅᑐᖅᓯᐅᓗᐊᖁᙱᖦᖢᒋᑦ ᐃᓕᓐᓂᐊᖅᑎᑦ. ᐳᐃᒍᖅᑕᐃᓕᒋᔅᓯ ᑖᔅᓱᑎᒎᓇᖅ ᐱᓕᕆᐊᒃᑯᑦ ᐃᓕᓐᓂᐊᕈᑎᓕᒫᕐᓄᑦ ᐊᑭᓖᔾᔪᑕᐅᔪᓐᓇᙱᓐᓂᖓᓂᒃ.

 

ᐃᑲᔪᖅᑕᐅᔭᕆᐊᖃᕈᕕᑦ ᖃᐅᔨᒋᐊᕈᓐᓇᖅᐳᑎᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᑦ ᑎᑎᕋᕐᕕᖓᓐᓄᑦ ᐅᕗᙵᕐᓗᑎᑦ FANS@gov.nu.ca  ᐅᖃᓗᒡᓗᑎᓪᓘᓐᓃᑦ 1-866-ᒧᑦ ᐅᖃᖃᑎᖃᕈᒪᓗᑎᓪᓗ ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᒧᑦ.

 

ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᓂᒃ ᐱᓇᔪᒋᐊᖃᖅᐳᑎᑦ ᐊᔪᕈᓐᓃᑐᐊᕈᕕᑦ.

 

ᐊᖏᖅᑕᐅᑦᑏᔭᕆᐊᖃᙱᑦᑐᑎᑦ ᐃᓕᓐᓂᐊᕐᕕᒋᔪᒪᔭᕐᓂᒃ ᐱᓇᔫᑎᑦ ᐱᒋᐊᕐᓂᐊᕐᓗᒍ, ᑭᓯᐊᓂ ᐊᐅᓪᓚᖅᑎᑦᑎᔭᕆᐊᖃᕐᓂᐊᖅᐳᑎᑦ ᐊᖏᖅᑕᐅᔾᔪᑎᒥᒃ ᑎᑎᖅᑲᒥᒃ ᐃᑲᔪᖅᑕᐅᔾᔪᓯᐊᒃᓴᑦ ᐱᓕᕆᐊᖑᐃᓐᓇᕈᓐᓇᖁᓪᓗᒍ.

Quick Links:

ᐊᔪᙱᑎᑕᐅᔪᓐᓇᖅᑐᑦ
ᐃᓕᓐᓂᐊᖅᑎᑦ ᖃᓄᐃᑦᑑᓂᖏᑦ
ᖃᓄᐃᑦᑑᓂᖏᑦ ᐃᑲᔫᑎᒃᓴᑦ ᒪᓂᒪᔪᑦ
ᖃᓄᖅ ᓄᓇᕗᒻᒥ ᐃᓕᓐᓂᐊᖅᑎᑦ ᐃᑲᔫᓯᐊᖅᑐᓕᕆᔨᖏᑦ ᐱᓕᕆᓲᖑᖕᒪᖔᑕ
ᐱᓕᕆᐊᕆᔭᕆᐊᖃᖅᑕᑎᑦ
ᐊᖓᔪᒃᖡᑦ ᐃᓕᓐᓂᐊᕐᕕᖓᓐᓂᒃ ᓇᓗᓇᐃᖅᑕᐅᓯᒪᔪᑦ
ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᑦ ᑐᓴᖅᑕᐅᒃᑲᓐᓂᕐᕕᒃᓴᓄᑦ ᐱᓕᕆᐊᑦ
Forms

 

 

ᐊᔪᙱᑎᑕᐅᔪᓐᓇᖅᑐᑦ

 

ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑖᖃᑕᐅᓇᔭᕈᕕᑦ ᐃᒪᐃᑦᑕᕆᐊᖃᖅᐳᑎᑦ:

 

• ᑲᓇᑕᒥ ᓄᓇᖃᕐᓗᑎᑦ ᐅᕝᕙᓘᓐᓃᑦ ᑲᓇᑕᒥᐅᑕᐅᖏᓐᓇᕐᓗᑎᑦ;
• ᓄᓇᕗᒥᐅᑕᐅᓗᑎᑦ (ᓄᓇᕗᒻᒥ ᓄᓇᖃᕐᓗᑎᑦ) ᑕᖅᑭᓄᑦ 12-ᐸᓗᖕᓄᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᓂᒃ ᐱᓇᔪᓚᐅᙱᓐᓂᕐᓂᒃ;
• ᐊᑎᓕᐅᖅᑕᐅᖃᑕᐅᓯᒪᓗᑎᑦ ᐃᓕᓐᓂᐊᖅᑕᐅᔪᒃᓴᒥᒃ ᐱᓇᓱᐊᕈᓯᕐᓄᑦ 12-ᓄᑦ ᑎᑭᓪᓗᒍ ᐃᓕᓐᓂᐊᖅᑕᐅᔪᒃᓴᖅ ᓇᓗᓇᐃᖅᑕᐅᓯᒪᓗᓂ ᐊᖓᔪᒃᖠᕐᓂᒃ ᐃᓕᓐᓂᐊᕐᕕᖕᒥᒃ;
• ᐅᓪᓗᓕᒫᖅ ᐃᓕᓐᓂᐊᖅᑎᐅᓗᑎᑦ (60%-ᐸᓗᖕᒥᒃ ᐃᓕᓐᓂᐊᖅᑕᐅᔪᒃᓴᓂᒃ ᐃᓕᓐᓂᐊᖅᓯᒪᓗᑎᑦ) ᐃᓕᓐᓂᐊᕐᕕᒋᔭᕐᓂᒃ ᓇᓗᓇᐃᖅᑕᐅᓯᒪᔪᑦ ᒪᓕᒡᓗᒋᑦ;
• ᐃᓕᓐᓂᐊᕐᓗᑎᑦ ᐃᓱᓕᑦᑎᓇᓱᒡᓗᑎᓪᓗ ᐃᓕᑕᕆᔭᐅᔾᔪᑎᑖᕐᓇᖅᑐᒥᒃ, ᐃᓕᓐᓂᐊᖅᑎᑦᑎᔪᓐᓇᐅᒻᒥᒃ ᐅᕝᕙᓘᓐᓃᑦ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᑕᕆᔭᐅᔾᔪᑎᑖᕐᓇᖅᑐᒥᒃ;
• ᓈᒻᒪᒋᔭᐅᔪᓂᒃ ᐃᓕᓐᓂᐊᕈᑎᖕᓄᑦ ᐱᓕᕆᑦᑎᐊᖃᑦᑕᕐᓗᑎᑦ ᐅᐸᒍᑎᑦᑎᐊᖃᑦᑕᕐᓗᑎᓪᓗ.

 

ᐃᓕᓐᓂᐊᖅᑎᑦ ᖃᓄᐃᑦᑑᓂᖏᑦ

 

ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᑦ ᐱᓕᕆᐊᖏᑦ ᐃᓕᑕᖅᓯᐅᒪᖕᒪᑕ ᐱᖓᓱᓂᒃ ᖃᓄᐃᑦᑑᔭᕆᐊᖃᕆᔭᐅᔪᓂᒃ ᐃᓕᓐᓂᐊᖅᑎᓂᒃ. ᐅᑯᐊᖑᓪᓗᑎᒃ:

1. ᓄᓇᕗᒻᒥ ᐱᔪᓐᓇᕐᓂᖅᑖᖃᑕᐅᓯᒪᔪᑦ. ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒃᑯᑦ ᐱᔪᓐᓇᕐᓂᖅᑖᖃᑕᐅᓯᒪᒍᕕᑦ, ᐊᔪᙱᑉᐳᑎᑦ ᐃᓕᓐᓂᐊᕈᑎᓄᑦ ᑐᕌᖓᔪᓂᒃ ᐊᒻᒪ ᐃᓚᒋᐊᕈᑎᒃᑲᓐᓂᕐᓂᒃ ᑐᓐᓂᖅᑯᑕᐅᕙᒃᑐᓂᒃ ᐱᔭᕆᐊᒃᓴᖅ, ᐊᑭᓕᒃᑲᓐᓂᕆᐊᖃᙱᖦᖢᒋᓪᓗ. ᐊᔪᙱᒃᑭᕗᑎᑦ ᓄᑲᖅᖠᕐᓂᒃ ᐃᓕᓐᓂᐊᖅᑕᐅᔾᔪᑎᓂᒃ ᐊᒻᒪ ᑭᙴᒪᓇᖅᑐᓄᑦ ᖃᐅᔨᓴᖅᑕᐅᓯᒪᔪᓂᒃ ᐊᑐᖅᑐᐊᒐᒃᓴᓂᒃ.
2. ᓄᓇᕗᒥᐅᑕᑦ ᓄᓇᕗᒻᒥ ᐃᓕᓐᓂᐊᖅᓯᒪᓂᑯᑦ: ᓄᓇᕗᒥᐅᑕᐅᒍᕕᑦ ᐃᓚᖓᓐᓂᒡᓗ ᐊᑕᖏᕐᓗᒍᓘᓐᓃᑦ ᐃᓕᓐᓂᐊᖃᑕᐅᓯᒪᓂᑰᓗᑎᑦ ᓄᑲᖅᖠᕐᓂᖅ ᐃᓕᓐᓂᐊᖅᑐᓂᒃ ᐅᕝᕙᓘᓐᓃᑦ ᐊᖓᔪᒃᖠᕐᓂᒃ ᐃᓕᓐᓂᐊᖅᑐᓂᒃ ᓄᓇᕗᒻᒥ, ᐊᔪᕋᔭᙱᑉᐳᑎᑦ ᐅᑭᐅᕐᒧᑦ ᐊᑕᐅᓯᕐᒧᑦ ᐃᓕᓐᓂᐊᖅᑕᐅᕙᒃᑐᓂᒃ ᑐᓐᓂᖅᑯᓯᐊᖅᑎᑕᐅᒋᐊᒃᓴᖅ ᑕᒪᐃᓐᓄᑦ ᐅᑭᐅᓄᑦ ᐱᖓᓱᓄᑦ ᐃᓕᓐᓂᐊᖅᓯᒪᖃᑦᑕᖅᑕᕐᓄᑦ ᐃᓱᓕᓯᒪᔭᕐᓄᓪᓗ ᓄᓇᕗᒻᒥ, ᐊᑭᓕᕆᐊᖃᙱᖦᖢᒋᓪᓗ. ᐊᔪᙱᒃᑭᕗᑎᑦ ᓄᑲᖅᖠᕐᓂᒃ ᐃᓕᓐᓂᐊᖅᑕᐅᕙᒃᑐᓂᒃ, ᐊᖓᔪᒃᖠᓂᒃ ᐃᓕᓐᓂᐊᖅᑕᐅᕙᒃᑐᓂᒃ ᐊᒻᒪ ᑭᙴᒪᓇᖅᑐᓂᒃ ᖃᐅᔨᓴᖅᑕᐅᓯᒪᔪᓂᒃ ᐊᑐᖅᑐᐊᒐᒃᓴᓂᒃ.
3. ᓄᓇᕗᒥᐅᑕᑦ ᓄᓇᕗᒻᒥ ᐃᓕᓐᓂᐊᖃᑕᐅᓯᒪᙱᑦᑐᑦ: ᓄᓇᕗᒥᐅᑕᐅᓗᑎᑦ, ᑭᓯᐊᓂ ᐃᓕᓐᓂᐊᖃᑕᐅᖃᑦᑕᖅᓯᒪᙱᓪᓗᑎᑦ ᓄᓇᕗᒻᒥ ᐅᕝᕙᓘᓐᓃᑦ ᐅᑭᐅᑦ ᐱᖓᓱᑦ ᑐᖔᓂ ᐃᓕᓐᓂᐊᖃᑕᐅᓂᑰᓗᑎᑦ ᐊᑐᖅᑐᐊᒐᒃᓴᓄᑐᐊᖅ ᐊᔪᕋᔭᙱᑉᐳᑎᑦ. ᐊᔪᙱᑎᑕᐅᓇᔭᖅᐳᑎᑦ ᓄᑲᖅᖠᓄᑦ ᐃᓕᓐᓂᐊᖅᑐᓂᒃ ᐊᑐᖅᑐᐊᒐᒃᓴᓂᒃ ᐊᑭᓖᔾᔪᑕᐅᓗᑎᒃ ᐅᑭᐅᕐᒧᑦ ᐊᑕᐅᓯᕐᒧᑦ ᐊᖓᔪᒃᖡᑦ ᐃᓕᓐᓂᐊᕐᕕᖓᓐᓂᒃ ᐃᓕᓐᓂᐊᖃᑕᐅᔾᔪᑎᖕᓄᑦ ᑕᒪᐃᓐᓄᑦ ᐅᑭᐅᓄᑦ ᐱᖓᓱᓄᑦ ᓄᓇᕗᒥᐅᑕᐅᓕᕈᕕᑦ. ᓄᓇᕗᒻᒧ ᐅᑎᕆᐊᖃᕋᔭᖅᐳᑎᑦ ᓴᓈᖃᕐᓗᑎᓪᓗ ᑖᒃᑯᐊ ᐊᑐᖅᑐᐊᓚᐅᖅᑕᑎᑦ ᐃᓱᒪᒋᔪᓐᓃᖅᑕᐅᑎᓐᓇᓱᖕᓂᐊᕈᕕᒋᑦ. ᐊᖓᔪᒃᖠᕐᓂᒃ ᐃᓕᓐᓂᐊᖅᑕᐅᔪᓄᑦ ᐊᑐᖅᑐᐊᒐᒃᓴᑦ ᐊᑕᖏᖅᑕᐅᓗᑎᒃ ᐊᑭᓕᖅᑕᐅᒃᑲᓐᓂᕆᐊᖃᖅᐳᑦ.

 

Back to top of page

 

 

ᖃᓄᐃᑦᑑᓂᖏᑦ ᐃᑲᔫᑎᒃᓴᑦ ᒪᓂᒪᔪᑦ

 

ᐃᓕᓐᓂᐊᖅᑕᐅᔪᒃᓴᓄᑦ ᑐᓐᓂᖅᑯᓯᐊᑦ:

 

ᐃᓕᓐᓂᐊᖅᑕᐅᔪᒃᓴᓄᑦ ᑐᓐᓂᖅᑯᓯᐊᑦ ᐃᑲᔫᑕᐅᓇᓱᒃᐳᑦ ᐃᓕᓐᓂᐊᖅᑎᓄᑦ ᐊᑭᓕᖅᓱᕆᐊᓕᖕᓄᑦ ᐊᒃᑐᐊᓂᓕᖕᓄᑦ ᐃᓕᓐᓂᐊᕈᑎᖏᓐᓄᑦ, ᐃᓕᓐᓂᐊᕐᕕᖕᒧᑦ ᐊᑭᓕᖅᓱᒃᑲᓐᓂᕆᐊᓕᖕᓄᑦ ᐊᒻᒪ ᖃᖓᑦᑕᐅᑎᓄᑦ. ᐃᓕᓐᓂᐊᖅᑕᐅᔪᒃᓴᓄᑦ ᑐᓐᓂᖅᑯᓯᐊᑦ ᐊᑭᖃᖅᑎᒋᔪᓐᓇᖅᐳᖅ ᐊᑭᑐᓛᖃᕐᓗᒍ $3428 ᐃᓕᓐᓂᐊᕐᓇᒧᑦ ᐊᑕᐅᓯᕐᒧᑦ ᐊᒻᒪᑦᑕᐅᖅ ᖃᖓᑦᑕᐅᑎᑦ ᐊᑭᒋᑎᑕᐅᕙᒃᑕᓄᑦ ᐅᖓᒻᒧᑦ ᐅᑎᒧᓪᓗ ᓄᓇᔅᓯᓐᓄᑦ ᓄᓇᓕᐸᐅᔭᕐᒥᓪᓗ ᖃᓂᒋᔭᐅᓛᒧᑦ ᒥᑦᑕᕐᕕᖃᕐᕕᖕᒧᑦ (ᐊᑦᒪᓐᑕᓐ, ᐋᑐᕚ, ᒪᓐᑐᓕᐊ) ᐃᓕᓐᓂᐊᕐᕕᒋᓂᐊᖅᑕᕐᓄᑦ ᐅᕝᕙᓘᓐᓃᑦ ᓄᓇᕗᒻᒥ ᓯᓚᑦᑐᖅᓴᕐᕕᖕᒥᒃ ᐃᓕᓐᓂᐊᕐᕕᒋᓂᐊᖅᑕᕐᓄᑦ. ᐃᓚᓕᐅᔾᔭᐅᓯᒪᓇᔭᖅᐳᑦ ᐊᐃᑉᐸᐃᑦ ᕿᑐᕐᖓᑎᓪᓗ.

 

ᐃᓚᒋᐊᕈᑎᓄᑦ ᑐᓐᓂᖅᑯᓯᐊᑦ:

 

ᐃᓚᒋᐊᕈᑎᓄᑦ ᑐᓐᓂᖅᑯᓯᐊᑦ ᑐᕌᖓᑎᑕᐅᕗᑦ ᓄᓇᕗᒻᒥ ᓄᓇᑖᖃᐅᑕᐅᓯᒪᔪᑦ ᐊᖏᖃᑎᒌᒍᑎᒧᑦ ᐱᔪᓐᓇᕐᓂᖅᑖᖃᑕᐅᓯᒪᔪᓄᑦ ᐃᑲᔪᕈᑎᒃᓴᒃᑲᓐᓂᐅᓪᓗᑎᒃ ᐊᑭᒋᔭᓄᑦ ᐃᓕᓐᓂᐊᕈᑎᓄᑦ, ᖃᖓᑦᑕᐅᑎᓄᑦ ᐊᒻᒪ ᓄᓇᑖᕆᓵᖅᑖᒧᑦ ᐃᓂᓪᓚᒃᐸᓪᓕᐊᔾᔪᑎᓄᑦ. ᑖᓐᓇ ᑐᓐᓂᖅᑯᓯᐊᖅ ᓈᓴᐅᑎᓂᒃ ᒪᓕᒃᑐᖅ ᐅᓄᕐᓂᖏᑦ ᒪᓕᒃᐸᒃᖢᑎᒃ ᐃᒡᓗᒥᐅᖃᑎᒌᑦ ᐅᓄᕐᓂᖏᑦ ᒪᓕᒃᑕᐅᓪᓗᑎᒃ.

 

*ᐃᒡᓗᒥᐅᖃᑎᒌᑦ ᐅᑯᐊᖑᑎᑕᐅᓲᑦ ᕿᑐᕐᖓᖏᑦ, ᕿᑐᕐᖓᙳᐊᖏᑦ ᐅᕝᕙᓘᓐᓃᑦ ᑎᒍᐊᖏᑦ 18 ᑐᖔᓂ ᐅᑭᐅᖃᖅᑐᑦ ᐅᕝᕙᓘᓐᓃᑦ ᕿᑐᕐᖓᖏᑦ 21-ᓂᒃ ᐅᑭᐅᖃᖅᑐᑦ ᐊᖓᔪᒃᖠᕐᓂᒃ ᐃᓕᓐᓂᐊᖃᑕᐅᓗᑎᒃ ᐅᓪᓗᓕᒫᖅ ᐅᕝᕙᓘᓐᓃᑦ ᐃᒡᓗᒥᐅᖃᑎᖏᑦ ᑎᑎᖅᑲᖁᑎᓕᔭᖅᐸᑕ ᐃᓅᓯᓕᒫᒥᓄᑦ ᑎᒥᒥᒍᑦ ᐊᔪᕈᑎᖃᕐᓗᑎᒃ.

 

ᓄᑲᖅᖠᕐᓂᒃ ᐃᓕᓐᓂᐊᖅᑕᐅᔪᒃᓴᓄᑦ ᐊᑐᖅᑐᐊᒐᒃᓴᑦ:

ᑖᒃᑯᐊ ᐊᑐᖅᑐᐊᒐᒃᓴᑦ ᒪᓂᒻᒪᒃᑕᐅᓲᖑᕗᑦ ᐃᓕᓐᓂᐊᖅᑎᓄᑦ ᐃᑲᔫᑕᐅᓇᓱᒃᖢᑎᒃ ᐊᑭᒋᔭᐅᕙᒃᑐᓄᑦ ᐃᒡᓗᓄᑦ ᐊᑐᖅᑐᐊᕈᑎᓄᑦ, ᓂᕿᓄᑦ ᐊᒻᒪ ᐊᓐᓄᕌᖅᑖᕈᑎᓄᑦ. ᐊᔪᙱᑎᑕᐅᔪᓄᑦ ᐃᓕᓐᓂᐊᖅᑎᓄᑦ ᐊᕐᕌᒍᑦᑕᕌᖓᑦ ᑐᓐᓂᖅᑯᑕᐅᓲᑦ. ᑖᓐᓇ ᐊᑐᖅᑐᐊᒐᒃᓴᖅ ᐃᓕᓐᓂᐊᖅᑎᓄᑦ ᒪᓂᒪᑎᑕᐅᕗᖅ ᓄᓇᕗᒥᐅᑕᐅᓯᒪᔪᓄᑦ ᐊᕐᕌᒍᓄᑦ ᐱᖓᓱᓄᑦ ᐅᖓᑖᓄᓪᓘᓐᓃᑦ. ᐃᓕᓐᓂᐊᕌᓂᒃᓯᒪᓕᕈᕕᑦ ᐅᑎᕆᐊᖃᖅᐳᑎᑦ ᓄᓇᕗᒻᒧᑦ ᓴᓇᓗᑎᓪᓗ ᑖᒃᑯᐊ ᐊᑐᖅᑐᑎᐊᓚᐅᖅᑕᑎᑦ ᐃᓱᒪᒋᔪᓐᓃᖅᑕᐅᖁᒍᕕᒋᑦ.

ᐊᖓᔪᒃᖠᕐᓂᒃ ᐃᓕᓐᓂᐊᕈᑎᓄᑦ ᐊᑐᖅᑐᐊᒐᒃᓴᑦ:

 

ᑖᒃᑯᐊ ᐊᑐᖅᑐᐊᒐᒃᓴᑦ ᒪᓂᒻᒪᒃᑕᐅᓲᖑᕗᑦ ᓄᓇᕗᒥᐅᑕᐅᓕᓵᖅᑐᓄᑦ. ᐃᑲᔫᑕᐅᓇᓱᒃᖢᑎᒃ ᐊᑭᒋᔭᐅᕙᒃᑐᓄᑦ ᐃᓅᓇᓱᐊᕈᑎᓄᑦ ᐃᒡᓗᓄᑦ ᐊᑐᖅᑐᐊᖅᑕᐅᔪᓄᑦ, ᓂᕿᓄᑦ ᐊᒻᒪ ᐊᓐᓄᕌᖅᑖᕈᑎᓄᑦ. ᑖᒃᑯᐊ ᐊᑐᖅᑐᐊᖅᑕᐅᓯᒪᔪᑦ ᐊᑕᖏᖅᑕᐅᓗᑎᒃ ᐊᑭᓕᐅᑎᒃᑯᑦ ᐅᑎᖅᑎᑕᐅᔭᕆᐊᖃᖅᐳᑦ.

 

ᐱᔭᕆᐊᓕᖕᓄᑦ ᖃᐅᔨᓴᖅᑕᐅᓯᒪᔪᑦ ᐊᑐᖅᑐᐊᒐᒃᓴᑦ:

 

ᑖᒃᑯᐊ ᐊᑐᖅᑐᐊᒐᒃᓴᑦ ᑐᓐᓂᖅᑯᑕᐅᓲᑦ ᑐᙵᕕᖃᖅᑎᑕᐅᓲᖑᕗᑦ ᑮᓇᐅᔭᑎᒍᑦ ᐱᔭᐅᔭᕆᐊᖃᖅᑐᑦ ᒪᓕᒃᑕᐅᓪᓗᑎᒃ. ᐱᓇᔪᑐᐃᓐᓇᕆᐊᖃᖅᐳᑎᑦ ᐱᔭᕆᐊᖃᖅᑐᓄᑦ ᖃᐅᔨᓴᖅᑕᐅᓯᒪᓗᑎᒃ ᐊᑐᖅᑐᐊᒐᒃᓴᓄᑦ ᐃᓕᓐᓂᐊᖅᑎᓪᓗᑎᑦ ᑭᓯᐊᓂ ᐊᑐᖅᑐᐊᒐᒃᓴᖅᑖᕈᓐᓇᕋᔭᙱᓚᑎᑦ ᑭᖑᓂᕐᒥᒃ ᐃᓕᓐᓂᐊᕈᑎᒋᖃᑦᑕᓚᐅᖅᑕᕐᓄᑦ/ᐊᕐᕌᒍᓄᑦ ᐃᓕᓐᓂᐊᕈᑎᒋᓯᒪᔭᕐᓄᑦ. ᐱᓇᔪᒋᐊᖃᖅᐳᑎᑦ ᐃᓕᓐᓂᐊᖅᑎᓪᓗᑎᑦ ᐃᓕᓐᓂᐊᖅᑕᑦ ᐃᓱᓕᓚᐅᙱᓐᓂᖓᓂᒃ. ᐊᓯᐊᓂᒃ ᓄᑖᒥᒃ ᐱᓇᔫᑎᒥᒃ ᐱᓇᔪᒃᑲᓐᓂᕆᐊᖃᖃᑦᑕᕐᓂᐊᖅᐳᑎᑦ ᐆᒃᑐᕈᒪᒃᑲᓐᓂᑐᐊᕌᖓᕕᑦ ᐊᑐᖅᑐᐊᒐᒃᓴᓂᒃ ᑕᒪᒃᑯᓄᖓ ᑐᕌᖓᔪᓂᒃ.

 

ᑐᓐᓂᖅᑯᓯᐊᑦ ᐃᓕᓐᓂᐊᖅᑎᓄᑦ ᑎᒥᒥᒍᑦ ᐊᔪᕈᑎᓕᖕᓄᑦ:

 

ᑖᒃᑯᐊ ᑐᓐᓂᖅᑯᓯᐊᑦ ᐃᑲᔫᑕᐅᓇᓱᒃᐳᑦ ᐊᑭᑐᓗᐊᔭᑦᑐᓄᑦ ᐊᑭᓕᖅᓱᕆᐊᓕᖕᓄᑦ ᐊᖓᔪᒃᖠᕐᓂᒃ ᐃᓕᓐᓂᐊᕈᑕᐅᕙᒃᑐᓄᑦ ᑕᐃᒃᑯᓄᖓ ᑎᒥᒥᒍᑦ ᐊᔪᕈᑎᓕᖕᓄᑦ. ᐱᓇᔪᒍᓐᓇᖅᐳᑎᑦ ᑖᔅᓱᒥᖓ ᑐᓐᓂᖅᑯᓯᐊᒃᓴᒥᒃ ᖃᖓᒃᑯᑐᐃᓐᓇᑦᑎᐊᖅ ᐃᓕᓐᓂᐊᕐᓇᐅᑎᓪᓗᒍ. ᑐᓂᓯᔭᕆᐊᖃᕋᔭᖅᐳᑎᑦ ᐋᓐᓂᐊᕐᕕᖕᒥᙶᖅᑐᒥᒃ ᖃᐅᔨᓴᖅᑕᐅᔾᔪᑎᒋᓯᒪᔭᕐᓂᒃ ᐅᕝᕙᓘᓐᓃᑦ ᐃᓕᑦᑎᕙᓪᓕᐊᕋᔮᕈᑎᒥᒃ ᖃᐅᔨᓴᖅᑕᐅᔾᔪᑎᒥᒃ ᐃᓕᑕᕆᔭᐅᔾᔪᑎᑖᖅᓯᒪᔪᒥᒃ ᐃᓗᐊᖅᓴᐃᔨᒥᒃ ᓘᒃᑖᒥᒡᓘᓐᓃᑦ ᐱᐅᓰᑦ ᐅᓂᒃᑲᐅᓯᐅᓯᒪᓗᓂ ᐊᔪᕈᑎᖕᓄᑦ ᐊᒃᑐᐃᔾᔪᑎᒋᔪᓐᓇᖅᑕᑎᑦ ᐃᓚᐅᔪᓐᓇᐅᑎᒃᓴᕐᓂᒃ ᐊᖓᔪᒃᖡᑦ ᐃᓕᓐᓂᐊᕐᕕᖕᒧᑦ ᐃᓕᓐᓂᐊᕈᑎᓄᑦ. ᑐᓐᓂᖅᑯᓯᐊᑦ $8,000.00-ᒧᑦ ᑎᑭᓪᓗᒍ ᐊᔪᖅᑎᑕᐅᓲᖑᙱᑦᑐᑦ ᐊᑑᑎᒋᔭᕆᐊᖃᖅᑕᕐᓄᑦ ᐱᔨᑦᑎᕋᐅᑎᓄᓪᓗ ᑐᕌᖓᔪᓂᒃ ᐃᓕᓐᓂᐊᕈᑎᖕᓄᑦ ᐅᕝᕙᓘᓐᓃᑦ $1,000.00-ᒥᒃ ᑕᒪᐃᓐᓄᑦ ᐃᓕᓐᓂᐊᖅᑕᕐᓄᑦ ᐃᓱᓕᑉᐸᓪᓕᐊᔭᕐᓄᑦ.

 

ᐅᖓᓯᒋᔭᒦᓪᓗᓂ/ᖃᕋᓴᐅᔭᒃᑰᕐᓗᓂ/ᑎᑎᖅᑲᑎᒍᑦ ᐃᓕᓐᓂᐊᕈᑎᓄᑦ ᐊᑭᓕᐅᑕᐅᔪᕕᓃᑦ ᐅᑎᖅᑎᑦᑕᕆᐊᓖᑦ:

 

ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᑦ ᐊᑭᓕᐅᑕᐅᔪᕕᓂᕐᓂᒃ ᐅᑎᖅᑎᑦᑎᓲᖑᕗᑦ ᐊᖓᔪᒃᖠᕐᓂᒃ ᐃᓕᓐᓂᐊᖃᑕᐅᔾᔪᑎᓄᑦ ᐃᓱᓕᑦᑎᑦᑎᐊᖅᑐᓄᑦ ᖃᕋᓴᐅᔭᒃᑯᑦ ᐅᖓᓯᒋᔭᒦᑦᑐᑦ ᐃᓕᓐᓂᐊᕈᑎᖏᓐᓂᒃ ᑎᑎᖅᑲᑎᒍᓪᓘᓐᓃᑦ ᐃᓕᓐᓂᐊᕈᑎᖏᓐᓂᒃ. ᓄᓇᕗᒥᐅᑕᐅᔭᕆᐊᖃᖅᐳᑎᑦ ᐊᕐᕌᒍᓄᑦ ᐱᖓᓱᓄᑦ ᓇᓕᐊᖕᓄᑐᐃᓐᓇᖅ ᐃᓕᓐᓂᐊᖅᑕᐅᔪᓂᒃ ᐱᓇᔪᖃᑕᐅᒋᐊᓚᐅᙱᓐᓂᕐᓂᒃ ᓇᒃᓯᐅᑎᔭᕆᐊᖃᖅᑕᑎᑦ ᓇᓕᖅᑲᓪᓚᑖᑦ, ᑎᑎᕋᖅᑕᐅᓯᒪᓪᓚᑦᑖᖅᑐᑦ ᓇᓗᓇᐃᖅᓯᓯᒪᔪᑦ ᐃᓱᓕᑦᑎᓚᐅᕈᑎᖕᓂᒃ ᐃᓕᓐᓂᐊᕈᑎᒥᒃ ᐊᒻᒪ ᒪᓕᒐᖅᑎᒎᖓᔪᒥᒃ ᓱᓕᓂᕋᕈᑎᒥᒃ ᓇᓗᓇᐃᖅᓯᓯᒪᓗᑎᒃ ᐊᑭᓕᒃᓴᖃᙱᒃᑲᓗᐊᕐᒪᖔᖅᐱᑦ ᐊᑭᓕᐅᑕᐅᔪᕕᓂᕐᓄᑦ ᐅᑎᖅᑎᑕᕆᐊᓕᖕᓄᑦ ᐃᖅᑲᓇᐃᔭᕐᕕᖕᓂᙶᖅᑐᒥᒃ ᐊᓯᖓᓂᙶᖅᑐᒥᒡᓘᓐᓃᑦ ᐱᓕᕆᕝᕕᒋᔭᕐᓂᒃ.

 
Back to top of page

 

ᖃᓄᖅ ᓄᓇᕗᒻᒥ ᐃᓕᓐᓂᐊᖅᑎᑦ ᐃᑲᔫᓯᐊᖅᑐᓕᕆᔨᖏᑦ ᐱᓕᕆᓲᖑᖕᒪᖔᑕ

 

ᐱᓕᕆᔾᔪᓯᐅᔪᖅ ᐱᓇᔪᖕᓂᐊᕐᓗᓂ ᐱᑎᑕᐅᖃᑦᑕᕐᓂᐊᕐᓗᓂᓗ ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᕈᑎᓄᑦ ᐃᑲᔫᑎᑦ ᐅᑯᓂᖓ ᑎᑎᕋᖅᓯᒪᔪᓂᒃ ᒪᓕᒋᐊᖃᖅᐳᑦ:

 

1. ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᓄᑦ ᐱᓇᔪᒃᐸᒡᓗᓯ ᐊᔪᕈᓐᓃᑐᐊᕌᖓᔅᓯ. ᐅᑕᖅᑭᔭᕆᐊᖃᙱᑦᑐᑎᑦ ᐃᓕᓐᓂᐊᕐᕕᒋᔪᒪᔭᕐᓄᑦ ᓱᓕ ᐊᖏᖅᑕᐅᓚᐅᙱᑎᓪᓗᑎᑦ ᐱᓇᔪᒐᓱᓕᑕᐃᓐᓇᕆᐊᖃᙱᑦᑐᑎᑦ, ᑭᓯᐊᓂ ᓇᒃᓯᐅᔾᔨᔭᕆᐊᖃᖅᐳᑎᑦ ᐊᖏᖅᑕᐅᓯᒪᔪᒥᒃ ᑎᑎᖅᑲᒥᒃ ᐱᓕᕆᐊᖑᔪᓐᓇᓛᕐᒪᑕ ᐃᓕᓐᓂᐊᓯᒋᐊᓚᐅᙱᓐᓂᕐᓂᒃ.
2. ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᑦ ᐱᓇᔫᑎᖕᓂᒃ ᐱᒃᐸᑕ ᓇᒃᓯᐅᔾᔨᕝᕕᐅᓇᔭᖅᐳᑎᑦ ᐊᖏᖅᑕᐅᓂᕋᖅᓯᒪᔪᓂᒃ ᑎᑎᖅᑲᒥᒃ ᓇᓗᓇᐃᖅᓯᔾᔪᑎᒃᓴᒥᒃ ᐱᓇᔫᑎᑦ ᐱᔭᐅᓯᒪᓕᕐᓂᖓᓂᒃ ᐊᒻᒪᑦᑕᐅᖅ ᑐᒃᓯᕋᕐᕕᐅᓗᑎᑦ ᐊᓯᖏᓐᓂᒃ ᑎᑎᕋᖅᓯᒪᔪᓂᒃ ᑎᑎᖅᑲᓂᒃ ᐊᑭᓕᒃᓴᖅᑕᖃᕐᓂᖅᐸᑦ.
3. ᑎᑎᖅᑲᑦ ᐱᔭᐅᔪᒪᔪᑦ ᐱᒍᕕᒋᑦ ᐊᐅᓪᓚᖅᑎᓵᓕᔭᕆᐊᖃᖅᐸᑎᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᓄᑦ.
4. ᑭᖑᓂᐊᒍᑦ ᐊᖏᖅᑕᐅᔾᔪᑎᒥᒃ ᑎᑎᖅᑲᖅᑖᕋᔭᖅᐳᑎᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᒃᑯᓐᓂᒃ ᓇᓗᓇᐃᒃᑯᑕᕆᓇᔭᖅᑕᑦ ᐃᑲᔫᓯᐊᖅᑖᖅᑎᑕᐅᔪᓐᓇᕐᒪᖔᖅᐱᑦ. ᑎᑎᖅᑲᖅ ᓇᓗᓇᐃᖅᓯᒪᓂᐊᖅᐳᖅ ᐃᑲᔫᓯᐊᖅᑖᕆᓂᐊᖅᑕᕐᓂᒃ ᖃᓄᐃᓕᐅᕆᐊᖃᕐᒪᖔᖅᐱᓪᓗ ᓇᓗᓇᐃᖅᓯᒪᓗᐊᒃᑲᓐᓂᕐᓗᑎᒃ.
5. ᖃᖓᑕᓲᓕᕆᔨᒃᑯᓐᓄᑦ ᐅᖃᓗᒋᐊᖃᕋᔭᖅᐳᑎᑦ ᐅᕝᕙᓘᓐᓃᑦ ᖃᖓᑦᑕᐅᑎᓕᕆᔨᒃᑯᓐᓄᑦ ᖃᖓᑦᑕᐅᑎᒃᓴᑎᑦ ᐋᖅᑭᒃᑕᐅᓇᔭᕐᒪᑕ ᑕᐃᑲᙵᑦ ᐃᓕᓐᓂᐊᕆᐊᕐᕕᒋᓛᖅᑕᕐᓄᑦ.
6. ᐃᓕᓐᓂᐊᕆᐊᕐᓗᑎᑦ!
7. ᐃᓕᓐᓂᐊᕐᕕᖕᓄᐊᖅᓯᒪᓕᕈᕕᑦ ᑎᑎᖅᑭᕆᔭᓯ ᑎᑎᕋᖅᑎᓪᓗᒍ ᐃᓕᓐᓂᐊᕐᕕᖕᒧᑦ ᐊᑎᓕᐅᖅᑕᐅᔾᔪᑎᒥᒃ ᐱᓕᕆᑎᑕᑎᓪᓗᒍ ᐃᕝᕕᓪᓘᓐᓃᑦ ᑎᑎᕌᓂᒃᓯᒪᔪᒥᒃ ᐅᑎᖅᑎᑦᑐᓐᓇᖅᐸᓯᐅᒃ ᓄᓇᕗᒻᒥ ᐃᓕᓐᓂᐊᖅᑎᑦ ᐃᑲᔫᓯᐊᖅᑐᓕᕆᔨᓄᑦ ᐅᕗᙵᕐᓗᓯ FANS@gov.nu.ca. ᑖᓐᓇ ᑎᑎᕋᖅᓯᒪᔪᖅ ᐱᔭᐅᓯᒪᓕᑐᐊᖅᐸᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔩᑦ ᐃᑲᔫᓯᐊᖅᑖᕆᓂᐊᖅᑕᕐᓂᒃ ᐴᖅᓯᓛᖅᐳᑦ Bank-ᒧᑦ ᓈᓴᐅᑎᖕᓄᑦ ᑎᑎᕋᓚᐅᖅᑕᑎᑦ ᒪᓕᒃᑕᐅᓗᑎᒃ ᐱᓇᔫᑎᒋᔭᕐᓂᒃ ᐅᓪᓗᑦ 7 ᓴᓇᓐᓇᓂᒃ ᐅᓪᓗᓂᒃ.

 

ᐃᓕᓐᓂᐊᖅᑎᐅᖏᓐᓇᕈᕕᑦ ᐊᓯᐊᓂᒡᓗ ᐃᓕᓐᓂᐊᒃᑲᓐᓂᓯᒋᐊᕈᕕᑦ

 

• ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᕈᑎᒥᒃ ᑎᑎᕋᖅᓯᐊᓂᖕᓂᐊᖅᐳᑎᑦ ᐃᑲᔪᖅᑕᐅᖏᓐᓇᕈᑎᒋᓂᐊᖅᑕᕐᓂᒃ ᓇᒃᓯᐅᑎᓗᒍᓗ ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᒃᑯᓐᓄᑦ. ᐳᐃᒍᖅᑕᐃᓕᓗᑎᑦ ᐃᓚᓕᐅᔾᔨᒋᐊᒃᓴᖅ ᑎᑎᕋᖅᓯᒪᔪᓂᒃ ᐅᖃᐅᓯᐅᓚᐅᖅᑐᓂᒃ ᑭᖑᓪᓕᕐᒥ ᐃᓕᓐᓂᐊᕐᕕᒋᓚᐅᖅᑕᕐᓂᒃ.
• ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᑦ ᐱᓇᔫᑎᖕᓂᒃ ᐱᓯᒪᓕᖅᐸᑕ, ᑖᒃᑯᓇᙵᑦ ᓇᒃᓯᐅᔾᔨᕝᕕᐅᓇᔭᖅᐳᑎᑦ ᐱᓚᐅᕐᓂᖏᓐᓂᒃ ᓇᓗᓇᐃᖅᓯᓗᑎᒃ, ᐃᓚᓕᐅᔾᔨᓗᑎᒡᓗ ᑐᒃᓯᕋᐅᒻᒥᒃ ᐊᓯᒃᑲᓐᓂᖏᓐᓂᒃ ᑎᑎᕋᖅᓯᒪᔪᓂᒃ ᑎᑎᖅᑲᖁᑎᖕᓂᒃ ᐊᑭᓕᒃᓴᐅᔪᓂᒃ.
• ᑖᒃᑯᐊ ᐱᔭᐅᔪᒪᔪᑦ ᑐᓐᓂᖅᑯᑎᒋᐊᓂᑐᐊᕈᕕᒋᑦ ᐃᓕᓐᓂᐊᕐᕕᖕᒧᑦ ᐅᑎᑐᐃᓐᓇᕆᐊᖃᓕᑦᑎᐊᕋᔭᖅᐳᑎᑦ!

 

Back to top of page

ᐱᓕᕆᐊᕆᔭᕆᐊᖃᖅᑕᑎᑦ

ᐳᐃᒍᖅᑕᐃᓕᓗᑎᑦ, ᐃᓕᓐᓂᐊᖅᑎᐅᓪᓗᑎᑦ ᑲᒪᒋᔭᒃᓴᖃᕋᕕᑦ ᒐᕙᒪᒃᑯᓐᓂᒃ ᑮᓇᐅᔭᑦ ᐱᔭᐅᓯᒪᓕᕆᐊᖃᕐᓂᖏᓐᓂᒃ. ᐅᑯᓂᖓ ᐃᓚᖃᖅᑐᑦ ᑖᒃᑯᐊ ᐃᓕᓐᓂᐊᕐᕕᖕᒧᑦ ᐅᐸᒍᑎᑦᑎᐊᕈᑎᑎᑦ, ᐃᓕᓐᓂᐊᑦᑎᐊᖅᓯᒪᓗᑎᑦ, ᐊᒻᒪᑦᑕᐅᖅ ᓇᓗᓇᐃᖅᓯᕙᒡᓗᑎᑦ ᑮᓇᐅᔭᑦ ᒪᓂᒻᒪᒃᑕᐅᔪᑦ ᐃᓕᖕᓄᑦ ᐊᖓᔪᒃᖠᕐᓄᑦ ᐃᓕᓐᓂᐊᕈᑎᒋᓂᐊᖅᑕᕐᓄᑦ ᐃᓕᖕᓄᑦ ᐊᑭᓕᐅᑕᐅᖕᒪᑕ ᐃᓕᓐᓂᐊᕐᕕᖕᓄᑦ.

ᐱᓕᕆᐊᒃᓴᖃᕆᐊᖃᕋᔭᕋᕕᑦ ᐃᑲᔫᑎᖃᕐᓗᑎᑦ ᐱᓇᔫᑎᑦ ᕿᓚᒻᒥᐅᓂᖅᐹᒃᑯᑦ ᐱᓕᕆᐊᖑᔪᓐᓇᖁᓪᓗᒋᑦ ᓇᓗᓇᐃᖅᓯᕝᕕᐅᔪᓐᓇᖁᓪᓗᑎᓪᓗ ᑮᓇᐅᔭᓂᒃ ᐊᑐᐃᓐᓇᖅᑕᖃᕐᓂᖓᓂᒃ ᐃᓕᓐᓂᐊᓯᒋᐊᕐᓂᐊᓕᖅᑎᓪᓗᓯ:

 

• ᐱᓇᔫᑎᑦ ᐊᐅᓪᓚᖅᑎᓪᓗᒍ ᐃᑲᔪᖅᓲᑎᓪᓗ ᑎᑎᖅᑲᑦ ᕿᓚᒻᒥᐅᓂᖅᐹᒃᑯᑦ. ᒪᑐᕝᕕᒃᓴᖏᑦ ᖃᒡᓕᓗᐊᖅᑎᓪᓗᒋᑦ ᐱᓕᕆᓇᓱᒃᑕᐃᓕᒋᑦ ᐱᓕᕆᐊᖑᓪᓚᕆᓕᖅᑎᓪᓗᒋᑦ ᐱᔭᒃᓴᖃᓗᐊᓕᓲᖑᖕᒪᑕ ᐅᖓᕙᕆᐊᖅᑕᐅᔾᔪᔾᔨᓐᓇᖅᖢᓂᓗ.
• ᐃᕐᖐᓐᓈᕈᑎᒃᑯᑦ ᓱᒃᑲᔪᒃᑯᓪᓘᓐᓃᑦ ᐱᓇᔫᑎᑦ ᖃᐅᔨᓇᓱᖃᑦᑕᕐᓂᐊᖅᐸᑎᑦ ᐱᔭᐅᒐᓗᐊᕐᒪᖔᑕ. ᓱᒃᑲᔪᒃᑰᖅᑎᑕᐅᔪᑦ ᐱᓗᐊᖅᑐᒥᒃ ᖃᓄᑐᐃᓐᓇᖅ ᓈᒻᒪᙱᓕᐅᕈᑎᖃᓕᓲᖑᖕᒪᑕ ᖃᐅᔨᒪᓇᓱᑦᑎᐊᖃᑦᑕᕐᓂᐊᖅᐳᑎᑦ ᑎᑎᕋᓚᐅᖅᑕᑎᑦ ᐊᕐᕕᐊᓄᐊᕋᓗᐊᕐᒪᖔᑕ.
• ᐸᕐᓇᒃᓯᒪᑦᑎᐊᕐᓗᑎᑦ ᓇᖕᒥᓂᖅ ᑮᓇᐅᔭᒡᒋᕆᓇᔭᖅᑕᕐᓂᒃ ᐃᓕᖕᓄᑦ ᐃᑲᔫᑎᒃᓴᓂᒃ ᐱᓗᐊᖅᑐᒥᒃ ᐃᓕᓐᓂᐊᕆᐊᕐᕕᒋᓂᐊᖅᑕᕐᓄᑦ ᐅᐸᒍᑎᓵᓕᔪᒪᒍᕕᑦ ᐃᒡᓗᒃᓴᖅᓯᐅᕆᐊᕐᓗᑎᑦ ᐅᕝᕙᓘᓐᓃᑦ ᐸᐃᕆᕕᒃᓴᖅᓯᐅᕆᐊᕐᓗᑎᑦ.

 

ᐅᑯᐊ ᐳᐃᒍᖅᑕᐃᓕᓗᒋᑦ:

ᐱᓇᔫᑎᑎᑦ ᐱᐊᓂᒃᓯᒪᑦᑎᐊᕐᓗᒋᑦ ᓇᒃᓯᐅᑎᓗᒋᑦ ᐊᖏᖅᑕᐅᔾᔪᑎᑎᓪᓗ ᑎᑎᖅᑲᑦ ᐅᓪᓗᑦ 30 ᐃᓕᓐᓂᐊᓯᒋᐊᓚᐅᙱᓐᓂᔅᓯᓐᓂᒃ ᖃᐅᔨᒪᑦᑎᐊᓛᕋᔅᓯ ᑮᓇᐅᔭᑦ ᐱᑐᐃᓐᓇᕆᐊᖃᓛᕐᒪᑕ ᐃᓕᓐᓂᐊᓯᒋᐊᓚᐅᙱᓐᓂᔅᓯᓐᓂᒃ.

ᐊᖓᔪᒃᖡᑦ ᐃᓕᓐᓂᐊᕐᕕᖓᓐᓂᒃ ᓇᓗᓇᐃᖅᑕᐅᓯᒪᔪᑦ

ᒪᕐᕈᐃᓕᖅᑲᖓᔪᒥᒃ ᖃᐅᔨᒋᐊᕈᓐᓇᖅᐳᓯ ᐃᓕᓐᓂᐊᕐᕕᒋᓂᐊᖅᑕᓯ ᐃᓕᓐᓂᐊᕐᓂᐊᖅᑕᓯᓗ ᐊᖓᔪᒃᖠᕐᓂᒃ ᐃᓕᓐᓂᐊᖅᑕᐅᓂᐊᕐᒪᖔᑕ. ᐊᐃᑉᐸᖓ ᖃᐅᔨᒋᐊᕆᐊᖃᖅᐳᓯ www.canlearn.ca ᖃᐅᔨᓇᓱᒡᓗᓯ ᐃᓕᓐᓂᐊᕐᕕᒋᓂᐊᖅᑕᓯ ᓇᓗᓇᐃᖅᑕᐅᓯᒪᖕᒪᖔᑕ ᐊᖓᔪᒃᖠᕐᓄᑦ ᐃᓕᓐᓂᐊᕐᕕᐅᔪᓐᓇᕐᓗᓂ ᐊᕕᒃᓯᒪᓂᕐᒥ ᐅᕝᕙᓘᓐᓃᑦ ᓄᓇᕗᒻᒥ ᓇᓃᖦᖢᓂ ᐃᓕᓐᓂᐊᕐᕕᐅᖕᒪᖔᑦ. ᖃᐅᔨᒪᓕᕈᕕᑦ ᐃᓕᓐᓂᐊᕐᕕᒋᓂᐊᖅᑕᑦ ᓇᓗᓇᐃᖅᑕᐅᓯᒪᓂᖓᓂᒃ ᐊᖓᔪᒃᖠᕐᓄᑦ ᐃᓕᓐᓂᐊᕐᕕᐅᔪᓐᓇᕐᓗᓂ, ᖃᐅᔨᒋᐊᕐᓗᑎᑦ ᐃᓕᓐᓂᐊᕐᓂᐊᖅᑕᑦ ᐊᖓᔪᒃᖠᕐᓄᑦ ᐃᓕᓐᓂᐊᖅᑕᐅᓂᐊᕋᓗᐊᕐᒪᖔᑦ.

ᐃᓕᓐᓂᐊᕐᓂᐊᖅᑕᑦ ᓄᓇᕗᒦᓐᓂᐊᖅᐸᑦ ᖃᐅᔨᒋᐊᕈᓐᓇᖅᐳᑎᑦ ᓇᓗᓇᐃᖅᓯᔨᑦ ᐊᖓᔪᖅᑳᖓᓐᓄᑦ ᑎᑎᕋᖅᑕᐅᓯᒪᓲᖑᔪᑦ ᐊᕐᕌᒍᑕᒫᑦ ᑎᑎᕋᖅᓯᒪᕙᒃᖢᑎᒃ ᐃᓕᓐᓂᐊᒐᒃᓴᑦ ᓇᓗᓇᐃᖅᑕᐅᓯᒪᔪᑦ ᓄᓇᕘᒥ ᑕᐃᒪᐃᓐᓂᖓᓄᓪᓗ ᑮᓇᐅᔭᑎᒍᑦ ᐃᑲᔪᖅᑕᐅᔪᓐᓇᖅᑐᑦ ᐱᔭᐅᔪᓐᓇᖃᑦᑕᑲᖅᐳᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᑦ ᐱᓕᕆᐊᖓᑦᑎᒍᑦ.

 

"ᐊᖓᔪᒃᖠᕐᓂᒃ ᐃᓕᓐᓂᐊᖅᑕᐅᔪᒃᓴᑦ” ᓇᓗᓇᐃᖅᑕᐅᓯᒪᕗᖅ ᓄᓇᕗᒻᒥ ᐃᒪᓐᓇ:

• ᐃᓕᓐᓂᐊᖅᑕᐅᔪᓐᓇᖅᑐᑦ ᐃᓕᑕᕆᔭᐅᓯᒪᔪᒥᒃ ᐊᖓᔪᒃᖠᑦ ᐃᓕᓐᓂᐊᕐᕕᖏᓐᓂᒃ;
• ᐃᓕᓐᓂᐊᒐᒃᓴᑦ ᐱᓇᓱᐊᕈᓯᕐᓄᑦ 12-ᓄᑦ ᐃᓕᓐᓂᐊᖅᑕᐅᓗᑎᑦ;
• ᒥᑭᓛᖃᕐᓗᒍ 60%-ᒥ ᐃᓕᓐᓂᐊᖅᑕᐅᕙᒃᑐᓂᒃ ᐃᓗᓕᖅᑕᖏᑦ ᐊᖓᔪᒃᖠᕐᓂᒃ ᐃᓕᓐᓂᐊᖅᑕᐅᔪᒃᓴᓃᖃᑕᐅᖕᒪᖔᑦ.

 

ᐃᓕᓐᓂᐊᕐᓂᐊᖅᑕᑦ ᐃᓕᓐᓂᐊᕐᕕᖕᒦᑉᐸᑦ ᓄᓇᕘᑉ ᓯᓚᑖᓂ ᖃᐅᔨᒋᐊᕆᐊᕐᓂᐊᖅᐳᑎᑦ ᑐᑦᑕᕐᕕᒋᔭᐅᔪᒧᑦ ᐅᕝᕙᓘᓐᓃᑦ ᐱᓕᕆᕝᕕᖕᒧᑦ ᐱᓕᕆᐊᒃᓴᓕᖕᓄᑦ ᐊᕕᒃᓯᒪᓂᕐᒥᒃ ᐅᕝᕙᓘᓐᓃᑦ ᓄᓇᕗᒻᒥ ᓇᓗᓇᐃᖅᑕᐅᖁᓗᒍ. ᐃᓕᓐᓂᐊᖅᑐᓕᕆᔨᒃᑰᒐᔪᒃᑐᑦ.

 

ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᓄᑦ ᐃᑲᔫᑎᒃᓴᑦ:

• ᑮᓇᐅᔭᑎᒍᑦ ᐃᑲᔫᑎᒋᔪᓐᓇᖅᑕᕐᓂᒃ ᖃᐅᔨᒋᐊᕈᓐᓇᖅᐳᑎᑦ ᐅᕗᙵᕐᓗᑎᑦ www.canlearn.ca.
• ᖃᐅᔨᒋᐊᕐᓗᑎᓪᓗ ᐃᓕᓐᓂᐊᕐᕕᒋᓂᐊᖅᑕᑦ ᐊᔪᙱᒃᑲᓗᐊᕐᒪᖔᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᓄᑦ ᐆᒃᑐᕆᐊᒃᓴᖅ ᐊᖓᔪᒃᖠᕐᓂᒃ ᐃᓕᓐᓂᐊᖃᑕᐅᓂᐊᖅᑎᓪᓗᑎᑦ ᓇᓗᓇᐃᖅᑕᐅᓯᒪᓪᓗᑎᒃ ᑎᑎᕋᖅᓯᒪᔪᓂᒃ.
• ᑐᓴᐅᒪᒋᐊᕐᓗᒋᑦ ᐃᓕᓐᓂᐊᖅᑎᓄᑦ ᑮᓇᐅᔭᑎᒍᑦ ᐃᑲᔫᑕᐅᔪᓐᓇᖅᑐᑦ ᒪᓕᒐᖓᑦ ᒪᓕᒋᐊᓕᖏᓪᓗ.

 

Back to top of page

ᐊᖏᖅᑕᐅᙱᓐᓂᕐᓕᐅᕐᓂᕐᒧᑦ ᐱᓕᕆᐊᖑᒃᑲᓐᓂᖅᑎᑦᑎᓂᖅ ᐋᖅᑭᒃᑕᐅᔪᒥᒃ

 

ᑖᒃᑯᐊ ᐃᓕᓐᓂᐊᖅᑎᓄᑦ ᓄᓇᕗᒻᒥ ᐃᑲᔫᓯᐊᕐᓂᒃᒥᒃ (FANS) ᐱᓇᓱᒃᑎᑦᑎᕙᒃᑐᑦ ᐱᐅᔪᒥᒃ ᐊᑐᕋᓱᒃᐸᒃᑭᕗᑦ ᑲᒪᒋᑦᑎᐊᕐᖢᓂᔾᔪᒃ ᕿᒥᕐᕈᕙᒃᐸᐃᑦ, ᐃᓱᒪᒋᑦᑎᐊᕐᖢᓂᔾᔪᒃ ᐊᒻᒪ ᒪᓕᒃᖢᓂᔾᔪᒃ ᐃᓕᓐᓂᐊᖅᑎᓄᑦ ᐃᑲᔪᓯᐊᖅᑎᑦᑎᓂᕐᒧᑦ ᒪᓕᒐᖅ ᐊᒻᒪ ᐊᑐᐊᒐᖏᑦ. ᑕᐃᒪᐃᒃᑲᓗᐊᖅᑎᓪᓗᒋᑦ ᑖᒃᑯᐊ ᐱᔪᓐᓇᕐᓂᓕᒫᒥᖕᓄᑦ  ᐃᑲᔪᕋᓱᖃᑦᑕᕋᓗᐊᖅᑎᓪᓗᒋᑦ ᑕᒻᒪᖅᑐᖅᑲᖅᑐᕕᓂᐅᔪᓐᓇᕐᒥᖕᒪᑦ ᐱᓕᕆᔨᐅᔪᒥᒃ. ᐅᒃᐱᕆᔭᖃᓕᕐᓂᕈᕕᑦ ᑖᒃᑯᐊ (FANS)-ᑯᑦ ᐊᑐᐊᒐᖏᑦ ᐊᑐᖅᑕᐅᑦᑎᐊᖏᑦᑐᕕᓂᐅᖕᒪᖔᑕ ᑐᒃᓯᕋᐅᑎᒋᓇᓱᒃᑕᕐᓄᑦ ᐅᕝᕙᓘᓐᓃᑦ ᐃᓕᖕᓂᓪᓚᕆᒃ ᐱᔾᔪᑎᖃᕐᒪᖔᑕ ᐃᓱᒪᒍᕕᑦ ᐱᓇᓱᒍᓐᓇᖅᑎᑕᐅᕗᑎᑦ ᐊᖏᖅᑕᐅᖏᓐᓂᕐᓕᐅᕈᑎᒥᒃ ᐋᖅᑭᑦᑕᐅᔪᕕᓂᕐᒧᑦ ᑖᒃᑯᓇᙵᑦ (FANS)-ᑯᓐᓂᑦ ᐱᓇᓲᑎᒧᑦ ᒪᓕᒡᓗᒍ ᐊᖏᖅᑕᐅᖏᓐᓂᕐᓕᐅᓂᕐᒧᑦ ᐱᓕᕆᒃᑲᓐᓂᖅᑎᑦᑎᓂᕐᒧᑦ ᐊᑐᐊᒐᐃᑦ. ᑖᒃᑯᐊ ᐊᑐᐊᒐᐃᑦ ᐋᖅᑭᒃᓯᒪᖕᒥᔪᑦ ᐱᕕᒃᓴᖃᓂᕐᒥᒃ, ᑲᔪᓯᐊᑦᑎᐊᕐᓂᕐᓂᒃᑯᑦ ᐊᒻᒪ ᐊᑲᐅᔫᓇᓱᖕᒥᔪᒥᒃ ᕿᒥᕐᕈᔭᐅᖁᓪᓗᒋᑦ ᑐᒃᓯᕋᐅᑎᑎᑦ ᐊᒻᒪ ᐊᒡᓚᖁᑎᑎᑦ. ᑖᓐᓇ ᐊᑐᐊᒐᖅ ᓴᓂᖅᑯᑕᐅᓇᓱᖕᓂᖅᐸᑦ ᐊᑯᓂᐅᒃᑲᓐᓂᕈᑕᐅᑐᐃᓐᓇᕋᔭᖅᑐᖅ.

ᐊᖏᖅᑕᐅᖏᓐᓂᕐᓕᐅᕐᓂᒧᑦ ᑐᒃᓯᕋᐅᑎᒧᑦ ᐊᓯᔾᔨᖅᑕᐅᔪᓐᓇᖏᑦᑐᑦ ᐅᑯᐊᖑᕗᑦ:

 

• ᑕᐃᒃᑯᐊ ᐃᓕᓐᓂᐊᖅᑕᐅᔭᕆᐊᖃᖅᐸᒃᑐᓂᒃ ᐃᓕᓐᓂᐊᕐᕕᑦ ᐅᕝᕙᓘᓐᓃᑦ ᐱᓕᕆᐊᖑᑎᑕᐅᕙᒃᑐᑦ ᖁᕝᕙᓯᖕᓂᕐᓴᒥᒃ ᐃᓕᓐᓂᐊᖅᓯᒪᓂᕋᖅᑕᐅᓐᓇᖅᐳᑦ
• ᑭᖑᕙᕐᓂᕈᕕᑦ ᐅᑎᖅᑎᓯᒪᔭᕆᐊᖃᕐᕕᖓᓄᑦ ᑐᒃᓯᕋᐅᑎᕕᑦ
• ᐊᑭᖓᓂᒃ ᐅᑎᖅᑎᑦᑎᔭᕆᐊᖃᕐᓃᑦ/ᐊᑐᙱᑎᑕᐅᓂᖅ ᑮᓇᐅᔭᓪᓗᐊᑕᕐᓂᒃ ᐅᕝᕙᓘᓐᓃᑦ ᐊᑐᖅᑐᐊᖅᑕᐅᔪᑦ ᐃᕐᓂᐅᕈᑎᖏᑦ.

 

 

ᖃᖓᒃᑯᑦ ᐊᖏᖅᑕᐅᖏᓐᓂᕐᓕᐅᕐᓂᕐᒧ

 

ᑐᓴᖅᑎᑕᐅᓯᒪᓕᑐᐊᕈᕕᑦ ᐱᕕᖃᕐᐳᑎᑦ ᐅᓪᓗᓂᒃ 30-ᓂᒃ ᑐᓂᓯᔪᓐᓇᖅᑎᑕᐅᓪᓗᑎᑦ ᑎᑎᖅᑲᓂᒃ ᐅᓐᓂᕐᓗᒃᓴᐅᑎᒋᔭᕐᓂᒃ. ᐊᑐᖁᔭᐅᕗᑎᑦ ᓄᓇᕗᒻᒥ ᐃᓕᓐᓂᐊᖅᑐᓄᑦ ᐃᑲᔫᓯᐊᖅᕕᖏᑕ (FANS)-ᑯᑦ ᐊᖏᖅᑕᐅᖏᓐᓂᕐᓕᐅᕐᓂᕐᒧᑦ ᖃᓄᖅᑑᒃᑲᓐᓂᖅᑎᑦᑎᓂᕐᒧᑦ ᑕᑕᑎᒐᒃᓴᓂᒃ ᑕᕝᕙᙵᑦ. ᑐᓴᖅᑎᑕᐅᒍᕕᑦ ᑎᑎᖅᑲᑎᒍᑦ ᑖᓐᓇ 30-ᐅᔪᑦ ᐅᓪᓗᐃᑦ ᐱᒋᐊᕋᔭᖅᑐᑦ 10-ᓂᒃ ᐅᓪᓗᓂᒃ ᓇᒃᓯᐅᔾᔭᐅᓚᐅᖅᑎᓪᓗᒍ. ᑐᓴᖅᑎᑕᐅᒍᕕᑦ ᖃᕋᓴᐅᔭᒃᑯᑦ, ᑖᓐᓇ ᐅᓪᓗᖅ 30 ᐱᒋᐊᕋᔭᖅᑐᖅ ᒪᕐᕈᒃ (2) ᓇᒃᓯᐅᔾᔭᐅᓚᐅᖅᑎᓪᓗᒍ ᖃᕋᓴᐅᔭᒃᑯᑦ. ᐅᕐᑳᓚᐅᑎᒃᑯᑦ ᑐᓴᖅᑎᑕᐅᒍᕕᑦ ᐃᓚᒋᔭᐅᒋᓪᓗᓂ ᓂᐱᓕᐅᕐᕕᐅᓗᑎᑦ ᓂᐱᓕᐅᕐᕕᖕᓄᑦ, ᑖᓐᓇ ᐅᓪᓗᖅ ᐱᒋᐊᕋᔭᖅᑐᖅ ᑕᕝᕙᓂᑲᐅᑎᒋᒃ ᐅᓪᓗᕐᒥ.

 

 

ᐊᖏᖅᑕᐅᖏᓐᓂᕐᓕᐅᕐᓂᕐᒧᑦ ᖃᓄᐃᓕᐅᒃᑲᓐᓂᖅᑎᑦᑎᓇᓱᐊᕐᓃᑦ ᖁᕝᕙᓯᓕᕇᖕᓂᖏᑦ

 

ᑖᓐᓇ ᓯᕗᓪᓕᖅᐹᖅ ᐱᓇᓱᓕᕐᓗᓂ ᐱᓪᓚᕆᓯᒋᐊᕈᓂ ᑕᔅᓱᒥᖓ ᐅᖃᖃᑎᖃᕆᐊᖃᖅᐳᖅ ᑖᒃᑯᐊ (FANS)-ᑯᑦ ᑎᑎᕋᖅᑎᖓᓂᒃ. ᐅᓄᖅᑑᔪᓐᓇᕐᒪᑕ ᐅᖃᐅᓯᐅᔪᑦ ᐊᐱᖅᑯᓯᒃᓴᕆᔭᐅᔪᓂᒃ ᑭᐅᓯᖃᑦᑕᕈᓐᓇᖅᖢᑎᒃ ᐅᖃᐅᓯᕆᔭᐅᑐᐃᓐᓇᕐᓗᑎᒃ ᐊᒻᒪ ᑕᒪᕐᒥᒃ ᑖᒃᑯᐊᒃ ᐃᒻᒥᖕᓄᑦ ᑐᑭᓯᖃᑦᑕᐅᑎᓗᑎᒃ.

 

 

ᑖᓐᓇ ᑐᒡᓕᐊ ᐱᓇᓱᓕᕐᓗᓂ ᐱᓪᓚᕆᒋᐊᓕᕐᓗᓂ ᐊᖏᖅᑕᐅᖏᓐᓂᕐᓕᐅᕐᓂᕐᒧᑦ ᐱᓇᓲᑎᒥᒃ ᑕᑕᑎᕆᓗᓂ  ᓇᒃᓯᐅᑎᓗᒍᓗ ᐅᕗᖓ FANS@gov.nu.ca. ᑎᑎᕋᖅᓯᒪᔪᖅ ᐅᓐᓂᕐᓗᒃᓴᐅᑎ ᑲᒪᒋᔭᐅᓚᔭᖅᑐᖅ ᐊᐅᓚᑦᑎᔨᐅᔪᒧᑦ (FANS)-ᑯᓐᓄᑦ ᑖᔅᓱᒪᓗ ᕿᒥᕐᕈᓂᐊᖅᐸᐃᑦ ᑲᑎᕐᓱᖅᓯᒪᔪᖁᑎᑎᑦ ᐊᒻᒪ ᐅᕐᑳᓚᕕᒋᓂᐊᕈᓂᑎᑦ ᑐᑭᓯᒋᐊᒃᑲᓐᓂᕐᕕᒋᓂᐊᖅᐹᑎᑦ ᐱᔭᕆᐊᖃᕈᓂ. ᐊᐅᓚᑦᑎᔨᐅᔫᑉ ᐱᒍᓂᐅᒃ ᐊᖏᖅᑕᐅᖏᓐᓂᕐᓕᐅᕈᑏᑦ ᐅᓪᓗᖃᕐᓂᐊᖅᑐᑦ ᑕᓪᓕᒪᓂᒃ (5)-ᓂᒃ ᐃᖅᑲᓇᐃᔭᕐᓇᐃᑦ ᐅᓪᓗᖏᓐᓂ ᖃᐅᔨᓯᒪᓂᕇᕈᓐᓇᖁᓪᓗᒋᑦ ᖃᓅᓂᐊᕐᒪᖔᑕ ᖃᐅᔨᒪᓕᖁᓪᓗᒋᑦ ᐊᒻᒪ ᑐᓴᖅᑎᑦᑎᓕᕐᒥᓗᑎᒃ ᐱᓇᓱᒃᑑᑉ ᖃᓄᐃᓕᔭᐅᓂᕆᔭᖓᓂᒃ ᐅᓐᓂᕐᓘᑎᖓᑕ.

 

 

ᑖᓐᓇ ᐱᖓᔪᖓᓐᓂ ᐱᓇᓱᖕᓂᕐᒥᓂ ᐱᓪᓚᕆᒐᓱᖕᓂᕐᒥ ᑲᒪᔨᐅᔫᑉ ᑐᑭᒧᐊᒃᑎᓐᓂᐊᖅᐹ ᐊᖏᖅᑕᐅᖏᓐᓂᕐᓕᐅᕈᑎ ᑕᕝᕗᖓᓗ ᐊᑕᔪᓕᒫᑦ ᑲᑎᖅᓱᖅᑕᐅᓯᒪᔪᑦ ᑕᐃᑯᖓ ᑐᑭᒧᐊᒃᑎᑦᑎᔨᒧᑦ ᐃᖅᑲᓇᐃᔮᒃᓴᓂᒃ ᓴᖅᑭᑎᕆᕙᓪᓕᐊᓂᕐᒧᑦ ᕿᒥᕐᕈᐊᒃᑲᓐᓂᕐᓂᐊᖅᖢᓂᒋᓪᓗ ᑖᔅᓱᒪ. ᑖᓐᓇ ᑐᑭᒧᐊᒃᑎᑦᑎᔨ ᐃᖅᑲᓇᐃᔮᒃᓴᓂᒃ ᓴᖅᑭᑎᕆᓂᕐᒧᑦ ᐅᓪᓗᓂᒃ ᑕᓪᓕᒪᓂᒃ (5)-ᓂᒃ ᐃᖅᑲᓇᐃᔭᕐᓇᐅᔪᓂᒃ ᕿᒥᕐᕈᓇᔭᖅᖢᓂᒋᑦ ᑖᒃᑯᐊ, ᖃᓄᐃᓕᖓᓂᐊᕆᐊᒃᓴᖏᓪᓗ ᖃᐅᔨᓗᓂᒋᑦ ᐊᒻᒪ ᑐᓴᖅᑎᓕᕐᓗᓂᐅᒃ ᐱᓇᓱᒃᓯᒪᔪᖅ.

 

 

ᑦ ᐱᓇᓱᒍᓐᓇᕐᓯᕙᒃᐳᑦ

ᑖᓐᓇ ᑭᖑᓪᓕᖅᐹᖅ ᐱᓇᓱᖕᓂᕐᒧᑦ ᐊᑐᕋᔭᖅᑐᖅ ᑖᓐᓇ ᐱᓇᓱᒃᑐᖅ ᖁᕕᐊᓱᐊᓂᓕᖏᑉᐸᑦ ᑕᕝᕙ ᑕᐃᓐᓇ ᑐᑭᒧᐊᒃᑎᐅᔪᖅ ᐃᖅᑲᓇᐃᔮᒃᓴᓂᒃ ᓴᖅᑭᑎᕆᓂᕐᒧᑦ ᑐᕌᖅᑎᑦᑎᓕᕐᓂᐊᕐᐳᖅ ᑕᒪᐃᓐᓂᒃ ᑖᒃᑯᓂᖓ ᑖᔅᓱᒧᖓ ᐊᑕᔪᓕᒫᓂᒃ ᑕᐃᒃᑯᓄᖓ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᑕᑯᔭᐅᖁᓪᓗᒋᑦ ᐃᓕᓐᓂᐊᖅᑐᓕᕆᔨᒃᑯᑦ ᒥᓂᔅᑕᖓᓄᓪᓗ ᑐᓂᔭᐅᑐᐃᓐᓇᕆᐊᖃᖅᖢᑎᒃ ᑖᓐᑯᓂᖓ ᑐᑭᓯᔪᒪᒧᑦ ᖃᓄᐃᓕᔭᐅᓂᐊᕆᐊᒃᓴᖓᓂᒃ.

 

Back to top of page

 

ᑐᑭᓯᒋᐊᕈᑎᓄᑦ ᖃᐅᔨᒋᐊᕐᕕᒃᓴᖅ

 

ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᑦ ᐊᑭᖃᙱᑦᑐᒃᑯᑦ ᓱᒃᑲᔪᒃᑰᕈᓐᓇᐅᑖ:

 

1-877-860-0167

 

ᐊᕕᒃᓯᒪᓂᕐᒥ ᐃᖅᑲᓇᐃᔮᕆᔭᐅᔪᒪᔪᓕᕆᔨᑦ ᑎᑎᕋᕐᕕᖏᑦ:

 

ᐱᖓᓱᓂᒃ ᐊᕕᒃᓯᒪᓂᕐᒥᒃ ᐃᖅᑲᓇᐃᔮᕆᔭᐅᔪᒪᔪᓕᕆᔨᑦ ᑎᑎᕋᕐᕕᖃᖅᐳᑦ ᐃᑲᔪᓯᔫᒥᑐᐃᓐᓇᕆᐊᖃᖅᑐᓂᒃ ᐱᓇᔫᑎᒋᔭᕐᓄᑦ ᓯᕗᒻᒧᐊᒍᑎᒃᓴᓂᒃ ᐃᓕᓐᓂᐊᖅᑕᕐᓄᑦ. ᖃᐅᔨᒋᐊᕈᓐᓇᖅᐳᑎᑦ ᐃᖅᑲᓇᐃᔮᕆᔭᐅᔪᒪᔪᓕᕆᔨ ᑎᑎᕋᖅᑎᔅᓯᓐᓄᑦ ᐊᐱᖅᑯᑎᒃᓴᕐᓄᑦ ᑭᐅᔭᐅᔾᔪᑎᒃᓴᖅᓯᐅᕐᕕᒋᓗᓯᐅᒃ ᐃᓱᒫᓘᑎᒃᓴᖃᕈᕕᓪᓘᓐᓃᑦ:

 

ᐊᔪᐃᓐᓇᕆᐊᕈᓐᓇᖅᐳᑎᑦ FANS-ᒃᑯᑦ ᐋᕿᒃᑕᖏᓐᓂᑦ ᐊᖏᖃᑎᒋᙱᒃᑯᕕᒋᑦ. ᐅᓪᓗᑦ 30 ᐃᓗᐊᓂᑦ ᐋᕿᒃᓯᓚᐅᖅᑎᓪᓗᒋᑦ ᐊᔪᐃᓐᓇᕆᐊᕆᐊᖃᖅᐳᑎᑦ.

 

ᐱᒻᒪᕆᐅᔪᖅ: ᑮᓇᐅᔭᒥᒃ ᐊᑮᑐᖃᕈᕕᑦ FANS-ᒃᑯᑦ ᐊᔪᓐᓇᕈᑎᖕᓂᑦ ᓇᒃᓴᕐᕕᐅᔭᐃᕐᖃᖕᓂᐊᖅᐳᑦ ᐃᑲᔪᖅᓲᑎᓂᒃ ᑎᑎᕋᖅᓯᒪᔪᓂᑦ.

 

ᑐᖅᑯᓯᒪᕝᕖᑦ ᕿᒥᕐᕈᔭᐅᓂᖓ ᐊᒻᒪᓗ ᐊᔪᐃᓐᓇᕈᑏᑦ

 

ᖃᓄᐃᓕᖓᓂᐊᖅᐸ ᓄᖅᑲᕈᒪ, ᐃᓚᐅᔪᓐᓃᕈᒪ, ᐃᓱᓕᑦᑎᖏᒃᑯᒪ ᐅᕝᕙᓘᓃᑦ ᐃᓕᓐᓇᕈᓐᓃᕈᒪ?

 

ᓄᖅᑲᕈᓂ

ᓄᖅᑲᕈᕕᑦ ᐃᓕᓐᓇᖅᑕᖕᓂᑦ ᖃᐅᔨᑎᑦᑕᕆᐊᖃᖅᐸᑎᑦ FANS-ᒃᑯᑦ ᕿᓚᒻᒥᐅᔪᒃᑯᑦ (ᐅᓪᓗᑦ 30 ᐃᓗᐊᓂᑦ) ᐊᑭᓯᖅᓱᖅᑕᐅᖏᓐᓇᖅᑕᐃᓕᒪᓗᑎᓪᓗ. ᓄᖅᑲᕈᕕᑦ ᐋᓐᓂᐊᕐᓂᖕᒧᑦ ᐅᑎᖅᑎᑦᑎᔭᕆᐊᖃᔾᔮᖏᑦᑐᑎᑦ ᑮᓇᐅᔭᒥᒃ ᐃᓕᖕᓄᑦ ᐊᑭᓕᐅᑕᐅᓯᒪᔪᓂᒃ ᑭᓯᐊᓂ ᐃᓕᓐᓂᐊᕈᓐᓃᑐᐃᓐᓇᕈᕕᑦ ᐅᕝᕙᓘᓃᑦ ᐊᓯᖏᓐᓂᒃ ᐱᔾᔪᑎᖃᕐᓗᑎᑦ ᐊᑮᑐᖃᖕᓂᕋᖅᑕᐅᓇᔭᖅᐳᑎᑦ ᐃᓕᖕᓄᑦ ᐊᑭᓕᐅᑕᐅᓯᒪᔪᓂᑦ.

 

ᐃᓕᓐᓇᖅᑕᐅᕙᒃᑐᑦ ᐱᓕᕆᓂᕆᔭᖏᑦ

ᑲᔪᓯᑎᑦᑎᑎᐊᖏᒃᑯᕕᑦ ᐃᓕᓐᓂᖅᑕᐅᕙᒃᑐᑦ ᐱᓕᕆᓂᕐᔭᖏᓐᓂᑦ ᐃᓱᒪᖅᓱᕈᓐᓃᖅᑎᑕᐅᓇᔭᖅᐳᑎᑦ. ᑲᔪᓯᑏᓐᓇᕈᕕᐅᒃ ᐊᓂᑕᐅᓇᔭᖅᖢᑎᑦ ᐊᑮᑐᖅᑖᖅᑎᑕᐅᓗᑎᓪᓗ ᐊᑭᓕᐅᑕᐅᓚᐅᖅᑐᓂᑦ ᐃᓕᖕᓄᑦ.

 

ᑲᔪᓯᑎᑦᑎᔪᓐᓇᖏᒃᑯᕕᑦ ᐃᓕᓐᓇᕐᓂᕆᔭᖕᓂᑦ

FANS-ᒃᑯᑦ ᐱᑎᑕᐅᓚᐅᖅᑎᓪᓗᒋᑦ ᐃᓕᓐᓂᐊᕆᐊᖃᑦᑕᕐᓂᖅᐱᑦ ᓇᓕᖅᑲᖏᓐᓂᒃ  ᓇᓗᓇᕈᓐᓃᕋᔭᖅᐳᖅ ᑲᔪᓰᓇᕐᓂᐊᕐᒪᖔᖅᐱᑦ ᐅᓪᓗᓕᒫᖅ ᐃᓕᓐᓂᖕᓂᕐᒥᒃ (ᐋᕿᒃᑕᐅᓯᒪᓗᓂ ᐱᓕᕆᕝᕕᒋᔭᖕᓂᑦ). ᓯᓚᑦᑐᖅᓴᕐᕕᖕᒥᑦ ᐃᓕᓐᓂᐊᕐᓂᕆᔭᐃᑦ ᐅᓪᓗᓕᒫᖑᖃᑦᑕᖏᑉᐸᑦ ᐃᓱᒪᖅᓱᕈᓐᓃᑎᑕᐅᓇᔭᖅᐳᑎᑦ ᐊᒻᒪᓗ ᐱᕚᓪᓕᖏᒃᑯᕕᑦ ᑕᒪᓐᓇ ᐊᑐᖅᑎᓪᓗᒍ ᐊᓂᑕᐅᓕᕋᔭᖅᐳᑎᑦ.

 

ᑐᑭᓯᒐᑲᓐᓂᕈᒪᒍᕕᑦ ᐊᒻᒪ ᐃᑲᔪᖅᑕᐅᔪᒪᒍᕕᑦ, ᐅᖃᓗᒍᓐᓇᖅᐳᑎᑦ FANS-ᑯᓐᓄᑦ ᐊᑭᖃᖏᑦᑐᒧᑦ: 1-877-860-0680.

 

ᕿᑭᖅᑕᓂ: 1-800-567-1514

ᑭᕙᓪᓕᕐᒥ: 1-800-953-8516

ᕿᑎᕐᒥᐅᓂ: 1-800-661-0845

 

ᐃᖅᑲᓇᐃᔮᕆᔭᐅᔪᒪᔪᓕᕆᔨᒥᒃ ᑎᑎᕋᖅᑎᖃᙱᒃᑯᔅᓯ ᓄᓇᔅᓯᓐᓂᒃ ᐅᕝᕙᓘᓐᓃᑦ ᓱᒃᑲᔪᒃᑰᕈᓐᓇᐅᑎᖃᙱᒃᑯᔅᓯ ᑎᑎᕋᖅᓯᒪᔪᓂᒡᓘᓐᓃᑦ ᐊᔾᔨᓕᐅᕆᔾᔪᑎᖃᙱᒃᑯᔅᓯ ᖃᕋᓴᐅᔭᖃᙱᒃᑯᔅᓯᓘᓐᓃᑦ ᑐᙵᓱᒃᑎᑕᐅᓇᔭᖅᐳᑎᑦ ᓄᓇᕗᑦ ᒐᕙᒪᒃᑯᑦ ᑎᑎᕋᕐᕕᖓᓐᓄᐊᕐᓗᑎᑦ ᓲᕐᓗ ᓂᖃᐃᓱᖅᑐᓕᕆᔨᒃᑯᓐᓄᑦ ᐅᕝᕙᓘᓐᓃᑦ ᐅᖃᖃᑎᖃᕐᓗᓯ ᒐᕙᒪᒃᑯᑦ ᑐᓴᐅᒪᔪᓕᕆᔨᖓᓐᓄᑦ ᐃᑲᔪᖅᑕᐅᔪᓐᓇᕋᕕᑦ ᑖᒃᑯᓇᙵᑦ ᐱᓇᔫᑎᑎᑦ ᐱᐊᓂᒃᑕᐅᔪᓐᓇᖅᑐᑦ ᐊᐅᓪᓚᖅᑎᑕᐅᔪᓐᓇᖅᖢᑎᒡᓗ ᐱᓕᕆᐊᖑᓕᕐᓗᑎᒃ.

ᐃᕐᖐᓐᓈᕈᑖ:

FANS@gov.nu.ca

ᐅᖃᓘᑖ:

1-877-860-0680

 

Forms