ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᒻᒪ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖓ ᐊᑎᓕᐅᖅᑑᒃ ᓄᑖᒥᒃ ᑲᑐᔾᔨᖃᑎᒌᒃᖢᑎᒃ ᐊᖏᖃᑎᒌᒍᑎᒥᒃ

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᒻᒪ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖓ ᐊᑎᓕᐅᖅᑑᒃ ᓄᑖᒥᒃ ᑲᑐᔾᔨᖃᑎᒌᒃᖢᑎᒃ ᐊᖏᖃᑎᒌᒍᑎᒥᒃ

ᐃᖃᓄᐃᑦ, ᓄᓇᕗᑦ (ᑎᓯᐱᕆ 9, 2022) − ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᒻᒪ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖓ ᐊᑎᓕᐅᖅᑑᒃ ᓄᑖᒥᒃ ᑲᑐᔾᔨᖃᑎᒌᒃᖢᑎᒃ ᐊᖏᖃᑎᒌᒍᑎᒥᒃ ᐅᓪᓗᒥ.

ᑎᓴᒪᓄᑦ ᐊᕐᕌᒍᓄᑦ ᐊᖏᕈᑎ ᐊᑐᐃᓐᓇᐅᑎᑦᓯᔪᖅ ᑲᑎᓪᓗᒋᑦ ᑮᓇᐅᔾᔭᑦᓵᖏᑎᒍᑦ ᐊᑭᑦᑐᕆᐊᖅᑕᐅᔪᑦ 9 ᐳᓴᓐᑎᒥ ᑎᑭᓪᓗᒍ 2024. ᐃᓚᐅᑎᑦᑎᖕᒥᔪᖅ ᐅᓄᖅᑐᓂ ᐊᓯᔾᔨᖅᑐᓂ ᕿᒪᕉᑎᓗᒋᑦ ᒪᓕᒋᐊᓖᑦ, ᐊᐅᓚᑕᒃᓴᓄᑦ ᐱᐅᓯᒋᐊᕈᑎᑦ, ᐊᒻᒪ ᑭᖑᓂᑦᑎᓐᓂᖔᖅᑐᓂ ᐊᑭᓕᖅᑕᐅᔾᔪᑎᑦ ᐃᖅᑲᓇᐃᔭᖅᑎᓄᑦ ᑎᒥᖁᑎᙶᓚᐅᖅᑐᓄᑦ ᐱᒋᐊᕐᓗᓂ ᐊᖏᕈᑕᐅᓚᐅᖅᑐᖅ ᐅᓪᓗᖓᓂ, ᓯᑎᐱᕆ 29, 2022. ᓄᓇᕗᒻᒥ ᐅᑭᐅᖅᑕᖅᑐᒥᐅᑕᐅᓂᕐᒧᑦ ᐃᑲᔫᑎ ᖃᔅᓯᐅᓂᖓ ᐊᑕᐅᓯᕐᒧᑦ ᓄᓇᓕᖕᒧᑦ ᐊᔾᔨᒋᓂᐊᖅᑕᖓ ᒫᓐᓇ ᓄᓇᕗᒻᒥ ᒐᕙᒪᒃᑯᓐᓂ ᐊᒻᒪ ᓄᓇᕗᒻᒥᑦ ᐃᓕᓴᐃᔨᑦ ᑲᑐᔾᔨᖃᑎᒌᒃᑯᖏᑦᑕ ᐃᖅᑲᓇᐃᔭᖕᓂᖕᒧᑦ ᐊᖏᕈᑖᓂ.

“ᓄᓇᕗᒻᒥᑦ ᐃᓕᓴᐃᔨᑦ ᑲᑐᔾᔨᖃᑎᒌᒃᑯᖏᑦ ᖁᕕᐊᓱᒃᑎᑦᑎᓚᐅᖅᑐᑦ ᐊᑲᐅᔪᒥᒃ ᒪᓂᒻᒪᒃᓯᓂᕐᒥᒃ ᐃᓚᒋᔭᑦᑎᓐᓄᑦ ᐃᖅᑲᓇᐃᔭᖅᑐᓄᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂ,” ᐅᖃᖅᑐᖅ ᓄᓇᕗᒻᒥᑦ ᐃᓕᓴᐃᔨᑦ ᑲᑐᔾᔨᖃᑎᒌᒃᑯᖏᑦ ᐃᓱᒪᑕᖓᑦ ᔭᐃᓴᓐ ᕌᑲᓐ. “ᓇᖕᒥᓂᖅ ᖁᔭᒋᔪᒪᔭᒃᑲ ᐃᓚᒋᔭᐅᔪᑦ ᓄᓇᕗᒻᒥᑦ ᐃᓕᓴᐃᔨᑦ ᑲᑐᔾᔨᖃᑎᒌᒃᑯᖏᑦ ᐋᔩᖃᑎᒌᒃᑎᑦ ᐱᓕᕆᖃᑎᒌᑦ ᐱᓕᕆᕐᔪᐊᖃᑦᑕᕐᓂᖏᓐᓄᑦ ᑎᑭᐅᑎᔪᒧᑦ ᒪᓂᒻᒪᒃᑐᒧᑦ ᐊᖏᕈᑕᐅᓚᐅᖅᑐᒧᑦ ᐃᖅᑲᓇᐃᔭᖃᑎᖏᓐᓄᑦ.”

“ᓇᓗᓇᐃᕈᒪᔪᖓ ᐱᓇᓱᕐᔪᐊᕐᓂᖏᓐᓂᒃ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᐊᒻᒪ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑲᔪᓯᑦᑎᐊᕐᖢᑎᒃ ᐊᖏᕈᑎᒧᑦ ᑎᑭᐅᑎᓚᐅᖅᑐᑦ, ᑲᔪᓯᑎᑦᑎᐊᕐᖢᒋᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᑭᒡᒐᖅᑐᕐᓂᒃᑯᑦ ᐃᓚᒋᔭᖏᓐᓄᑦ ᐱᓕᕆᕐᔪᐊᕐᓂᖏᓐᓄᓪᓗ ᑎᒥᐅᔫᑉ ᐃᖅᑲᓇᐃᔭᕐᕕᖓᓂ,” ᐅᖃᖅᑐᖅ ᑯᕋᒡ ᓯᒪᐃᓚᒃ, ᒥᓂᔅᑕ ᑲᒪᒋᔭᓕᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᒃ. “ᓄᑖᖅ ᐊᖏᖃᑎᒌᒍᑦ ᐊᓕᓚᔪᖅᑎᒍᑦ ᐸᐃᑉᐹᒃᑯᑦ ᑭᒡᒐᖅᑐᐃᔪᖅ ᐱᓪᓗᕆᒃᑐᒥᒃ ᐃᑲᔫᑎᓂᒃ ᓄᓇᕗᒻᒥᐅᓄᑦ ᐱᓕᕆᕙᒃᑐᓂ ᑕᖃᔪᐃᑦᑑᓪᓗᑎᒃ ᐱᔭᕆᐊᖃᓪᓚᕆᒃᑐᓂ ᐱᒡᑦᑎᕋᐅᑎᓂᒃ ᓄᓇᕗᒻᒧᑦ.”

ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᑭᒡᒐᖅᑐᐃᔪᑦ ᐅᖓᑖᓂ 160 ᐃᖅᑲᓇᐃᔭᖅᑎᖏᓐᓂ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ ᐃᓚᐅᓪᓗᑎᒃ, ᐃᓱᓕᕝᕕᖃᙱᑦᑐᖅ ᑭᓯᐊᓂ, ᐊᐅᓚᐅᑎᖃᕐᕕᖕᒥ ᐊᐅᓚᑎᑦᑎᔨᑦ, ᐆᒻᒪᖅᑯᑎᓕᕆᔨᓂᑦ, ᐆᒻᒪᖅᑯᑎᓄᑦ ᐊᑐᖃᑦᑕᖅᑐᓂ ᐅᐊᔭᓕᕆᔨᑦ, ᐅᖁᒪᐃᑦᑐᓂᑦ ᐊᐅᓚᐅᓯᕆᔨᑦ ᐊᒻᒪ ᐊᑭᓕᒐᒃᓴᓕᕆᔨᑦ. ᓄᑖᖅ ᐊᖏᕈᑎ ᐊᑐᓕᖅᑐᖅ ᔭᓄᐊᕆ 1, 2021, ᑎᑭᓪᓗᒍ ᑎᓯᐱᕆ 31, 2024.

“ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐃᖅᑲᓇᐃᔭᖅᑎᖏᑦ ᐱᔭᕆᐊᖃᓪᓚᕆᒃᑐᑦ ᓄᓇᕗᒻᒧᑦ,” ᐅᖃᖅᑐᖅ ᒥᓂᔅᑕᐅᓚᐅᑲᒃᑐᖅ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᓗᐊᓐ ᑯᓱᒐᖅ. “ᐱᓪᓚᕆᐅᒋᔭᕗᑦ ᐃᖅᑲᓇᐃᔮᖏᑦ ᐱᖁᓪᓗᒋᑦ ᐊᖏᕐᕋᖏᑦ ᓄᓇᕗᒻᒥᐅᑦ ᐃᑯᒪᐃᓐᓇᕈᓐᓇᕐᓗᑎᒃ ᐅᖅᑰᓗᑎᒃᓗ. ᑖᓐᓇ ᐊᖏᖃᑎᒌᒍᑎ ᓴᖅᑭᑎᑦᑎᕗᖅ ᓄᓇᕗᑦ ᒐᕙᒪᒃᑯᑦ ᐱᓕᕆᔪᒪᓪᓚᑦᑖᕐᓂᖏᓐᓂᒃ ᐃᖅᑲᓇᐃᔭᖅᑎᖏᓐᓄᑦ. ᐊᖏᖃᑎᒌᒍᑎ ᐃᑲᔪᕐᓂᐊᖅᑐᖅ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᑦ ᐋᖅᑭᑦᓱᑦᑎᐊᖅᑕᐅᓯᒪᓗᑎᒃ, ᐃᖅᑲᓇᐃᔭᖅᑎᖃᑦᑎᓯᐊᖅᓱᑎᒃ ᐃᑲᔪᖅᓱᖅᑕᐅᓗᑎᓪᓗ ᓯᕗᓪᓕᐅᔾᔨᓂᕐᒧᑦ ᑲᑐᔾᔨᓗᑕ ᐱᓕᕆᐊᑦᓴᕐᓂᑦ.

“ᐱᓇᓱᐃᓐᓇᖃᑦᑕᖅᑐᒍᑦ ᐱᑎᑦᑎᓂᕐᒥᒃ ᐱᐅᓂᖅᓴᓂ ᑮᓇᐅᔾᔭᒃᓵᓂᒃ ᐃᑲᔫᑎᓂᒃᓗ ᐃᖅᑲᓇᐃᔭᖅᑎᓄᑦ,” ᐅᖃᖅᑐᖅ ᕆᒃ Hᐊᓐᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᖓᔪᖅᑳᖅ ᐊᐅᓚᑦᑎᔨᒻᒪᕆᓪᓗ. “ᐊᑐᕐᖢᒍ ᐊᑐᓕᖅᑎᑦᑎᓂᖅ ᓄᑖᖑᕆᐊᖅᑐᓂᑦ ᖃᓄᐃᓕᐅᕈᑕᐅᔪᒪᔪᓂᑦ, ᖁᕝᕙᕆᐊᖅᑎᑦᑎᓂᒃᑯᓪᓗ ᑎᒍᓯᓂᒃᑯᓪᓗ ᐃᒃᐱᒍᓱᑦᑎᐊᕐᓗᓂ ᐃᖅᑲᓇᐃᔭᕐᓂᕐᒥ ᐊᕙᑎᖓᓂ, ᐊᑐᖁᙳᐊᕋᔭᖅᑕᕗᑦ ᑲᔪᓯᓗᑕ ᐱᔪᒥᓇᕐᓗᓂ ᐃᓂ ᐃᖅᑲᓇᐃᔭᕐᓗᓂ.”

ᒫᓐᓇ ᐊᖏᕈᑎᒋᔭᐅᔪᖅ ᐃᓱᓕᓚᐅᕐᒪᑦ ᑎᓯᐱᕆ 31, 2020−ᒥᑦ.

###

ᓱᓕᔪᑦ:

• ᐊᕐᕌᒍᓄᑦ ᑎᓴᒪᓄᑦ ᐊᖏᕈᑎ ᐊᑖᓃᑦᑐᓂ ᐊᒥᓱᕈᕆᐊᖅᑐᓂ:
  • ᔭᓄᐊᕆ 1, 2021 – 1.5 ᐳᓴᓐᑎ.
  • ᔭᓄᐊᕆ1, 2022 – 1.5 ᐳᓴᓐᑎ.
  • ᔭᓄᐊᕆ 1, 2023 – 2 ᐳᓴᓐᑎ.
  • ᔭᓄᐊᕆ 1, 2024 – 4 ᐳᓴᓐᑎ.
• $1,000 ᐊᑎᓕᐅᕐᓗᓂ ᐃᓚᒋᐊᕈᑎᖃᕐᓂᖅ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᐃᓚᒋᔭᐅᔪᓄᑦ.
• ᓄᑖᖅ ᐃᓄᐃᑦ ᐃᓕᖅᑯᓯᖏᑎᒍᑦ ᓄᖅᑲᖓᔾᔪᑎ ᒪᕐᕉᖕᓄᑦ ᐅᓪᓗᓄᑦ ᐊᑭᓕᖅᑕᐅᔪᓐᓇᕐᓗᓂ ᐃᖅᑲᓇᐃᔭᖅᑎ ᐃᓚᐅᖃᑕᐅᓗᓂ ᐃᓄᐃᑦ ᐃᓕᖅᑯᓯᖏᑎᒎᕐᓂᕐᒥ, ᐃᓚᐅᓪᓗᓂ ᑭᓯᐊᓂ ᐃᓱᓕᕝᕕᖃᙱᑦᑐᖅ ᐊᖑᓇᓱᖕᓂᖅ, ᐃᖃᓗᒐᓱᖕᓂᖅ ᐊᒻᒪ ᐊᖑᓇᓱᖕᓂᖅ ᓂᕐᔪᑎᓂᒃ.
• ᓄᑖᖅ ᖃᑕᙳᑎᒌᓄᑦ ᐱᑦᑎᐊᙱᓐᓂᕐᒥ ᓄᖅᑲᖓᓐᓇᖅ ᐅᓪᓗᓄᑦ ᑕᓪᓕᒪᓄᑦ ᐊᑭᓕᖅᑕᐅᔪᓐᓇᕐᓗᓂ ᐊᒻᒪ ᑕᓪᓕᒪᓄᑦ ᐊᑭᓕᖅᑕᐅᙱᓪᓗᓂ ᐃᑲᔪᕐᓗᒋᑦ ᐃᖅᑲᓇᐃᔭᖅᑎᑦ ᐱᕕᖃᕐᓂᕐᒥᒃ ᑲᒪᒋᓗᒋᑦ ᐋᓐᓂᐊᖅᑕᐃᓕᒪᓃᑦ, ᐊᑦᑕᕐᓇᖅᑕᐃᓕᒪᓃᑦ, ᐊᒻᒪ ᓴᐳᒻᒥᔭᐅᓂᖅ.
• ᐊᒥᓱᕈᕆᐊᖅᑐᖅ ᐃᓇᖏᖅᓯᓯᒪᓂᕐᒧᑦ ᐊᑭᓕᖅᑕᐅᔾᔪᑎ 5 ᐳᓴᓐᑎᒥᑦ 10 ᐳᓴᓐᑎᒧᑦ.
• ᐱᐅᓯᒋᐊᖅᑐᖅ ᒪᓕᒋᐊᓕᖕᓂ ᑲᑎᒍᑎᓗᒋᑦ ᓄᖅᑲᖓᔾᔪᑎᑦ. ᐃᖅᑲᓇᐃᔭᖅᑎᑦ ᒫᓐᓇ ᐊᑐᕈᓐᓇᖅᑐᑦ ᑕᒪᒃᑭᕐᓗᒋᑦ ᐅᕝᕙᓘᓐᓃᑦ ᐃᓚᐃᓐᓇᖓᓂ ᓄᖅᑲᖓᓚᐅᑲᖕᓂᕐᒥ ᐊᒥᐊᒃᑯᖏᓐᓂ ᐃᓚᖃᕐᓗᒋᑦ ᐊᓯᖏᓐᓂ ᓄᖅᑲᖓᔾᔪᑎᓂᑦ.
• ᐊᔾᔨᐅᙱᑦᑐᖅ ᓄᖅᑲᖓᔾᔪᑎ ᒫᓐᓇ ᑲᑎᑕᐅᓗᑎᒃ ᓄᑖᒧᑦ ᐱᐅᓯᒋᐊᖅᑐᒧᓪᓗ ᑮᓇᐅᔾᔭᒃᓵᓄᑦ ᐊᑕᐅᓯᖅ ᐃᑲᕐᕋᕐᒧᑦ ᐊᔾᔨᖃᕐᓗᑎᒃ ᓄᓇᕗᒻᒥ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐊᖏᖃᑎᒌᒍᑎᒥ.
• ᐊᔾᔨᐅᙱᑦᑐᖅ ᓄᖅᑲᖓᔾᔪᑎ ᒫᓐᓇ ᐊᐃᑦᑑᑕᐅᔪᓐᓇᖅᑐᖅ ᐃᖅᑲᓇᐃᔭᖅᑎᒧᑦ ᐋᓐᓂᐊᕕᓕᐊᕐᓂᕐᒧᑦ ᒪᓕᒃᑎᐅᓗᓂ ᐃᓚᒋᔭᖏᓐᓄᑦ ᖃᑕᙳᑎᓪᓚᑦᑖᖏᓐᓄᑦ ᓂᕈᐊᕐᕕᐅᔪᓐᓇᙱᓪᓗᑎᒃ ᐋᓐᓂᐊᕕᓕᐊᕐᓂᕐᒧᑦ ᑐᐊᕕᕐᓇᖅᑐᒃᑯᑦ.
• ᐋᕿᒋᐊᖅᑕᐅᓯᒪᔪᖅ ᐊᔾᔨᐅᙱᑦᑐᖅ ᓄᖅᑲᖓᔾᔪᑎ ᐊᑭᓖᓗᓂ ᑎᑭᓪᓗᒍ ᐅᓪᓗᑦ ᑕᓪᓕᒪᑦ ᐃᓚᒋᔭᐅᔪᖅ ᖃᑕᙳᑎᓪᓚᑦᑖᖓᓄᑦ ᐃᓂᖃᕐᓗᓂ ᓯᓚᑖᓂ ᐃᖅᑲᓇᐃᔭᖅᑎᐅᑉ ᓄᓇᖓᑕ ᐋᓐᓂᐊᓕᕐᔪᐊᖅᐸᑦ ᐃᖅᑲᓇᐃᔭᖅᑎᓗ ᑲᒪᔨᐅᔭᕆᐊᖃᕐᓗᓂ ᖃᑕᙳᑎᖓᓄᑦ.
• ᐊᒥᓱᕈᕆᐊᖅᑐᑦ ᒪᓕᒋᐊᓕᖕᓂ ᐃᖅᑲᓇᐃᔭᕐᓗᓂ ᓄᖅᑲᖓᓐᓇᒥ. ᐃᖅᑲᓇᐃᔭᖅᑎᑦ ᒫᓐᓇ ᑐᒃᓯᕋᕈᓐᓇᖅᓯᔪᑦ ᐱᓗᑎᒃ:
• ᐊᑭᓕᖅᑕᐅᔾᔪᑎ ᐊᑐᒐᔪᒃᑐᒃᑯᑦ ᐱᓪᓗᐊᓚᐅᖅᑕᖓᑦ ᐃᖅᑲᓇᐃᔭᓚᐅᙱᑉᐸᑕ ᓄᖅᑲᖓᓐᓇᒥ;
• 8 ᐃᑲᕐᕋᑦ ᒪᓕᒐᑎᒍᑦ ᓄᖅᑲᖓᔾᔪᑎᖓᓃᑦᑐᑦ ᐃᓇᖏᖅᓯᔾᔪᑎ ᐅᓪᓘᓗᓂ; ᐊᒻᒪᓗ
• ᐃᓚᒃᑲᓐᓂᖏᑦ 8 ᐃᑲᕐᕋᑦ ᐃᖅᑲᓇᐃᔭᕐᓇᐅᙱᑦᑐᒃᑯᑦ ᐅᖓᑖᓅᕈᔾᔨᒃᑯᕕᖓᓂ.

ᓄᑖᖅ ᓄᖅᑲᖓᓐᓇᒥ ᒪᑐᔭᖅ (ᐊᑯᓂᐅᑎᒋᔭᖓᒍᑦ ᐊᖏᕈᑎ, ᑭᓯᐊᓂ ᓄᑖᖑᖅᑎᑕᐅᒃᐸᑦ):

• ᑕᒪᕐᒥᒃ ᐅᓪᓗᓕᒫᖅᓯᐅᑎᑦ ᐃᖅᑲᓇᐃᔭᐃᓐᓇᖅᑐᒃᓴᑦ, ᓄᖅᑲᕐᕕᒃᓴᓕᑦ ᐊᒻᒪ ᐃᖅᑲᓇᐃᔭᓚᐅᑲᒃᑐᑦ ᐃᖅᑲᓇᐃᔭᖅᑎᑦ, ᐃᓚᐅᙱᓪᓗᑎᒃ ᐃᖅᑲᓇᐃᔭᖅᑎᑦ ᐱᔭᕆᐊᖃᓪᓚᕆᒃᑐᓄᑦ ᐱᔨᑦᑎᕋᖅᑎᑦ ᐃᓂᖃᕐᓂᖓᒍᑦ ᑎᓕᔭᐅᓯᒪᓗᓂ ᐃᖅᑲᓇᐃᔭᖅᑎᑦᑎᖓᓄᑦ, ᐱᓗᑎᒃ ᑎᓴᒪᓄᑦ ᐅᓪᓗᓄᑦ ᓄᖅᑲᖓᔾᔪᑎᒥᒃ ᐊᑭᓕᖅᓱᖅᑕᐅᓗᑎᒃ ᐊᑯᓐᓂᖓᓂ ᖁᕕᐊᓱᒃᕕᒃ ᐅᓐᓄᖓᓂ ᐊᒻᒪ ᓄᑖᖅ ᐊᕐᕌᒍ ᐅᓪᓗᖓᓄᑦ.
• ᓄᖅᑲᖓᔾᔪᑎ ᑕᕝᕘᓇ ᓄᖅᑲᖅᑎᑕᐅᓯᒪᔾᔪᑎᒧᑦ ᓈᓴᐃᓗᓂ ᐃᖅᑲᓇᐃᔭᕐᕕᒋᔭᖓᓂ ᓇᓪᓕᐅᒃᑯᒫᒐᒃᓴᐅᓪᓗᓂᓗ.

ᐱᐅᓯᒋᐊᖅᑐᖅ ᓴᐳᒻᒥᔾᔪᑎ ᐊᓐᓄᕌᑦ ᐃᓚᖓᓂ ᐃᑲᔪᖅᑕᐅᔾᔪᑎ.

ᐱᕙᓪᓕᐊᔪᓂᑦ ᖃᐅᔨᒋᐊᕐᕕᒃᓴᑦ:

ᔭᐃᒻᔅ ᑲᐃᓗᕐ
ᑐᓴᒐᒃᓴᓕᕆᔨ
ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ
867-979-4209
james@neu.ca

ᕈᓃ ᐴᓱ
ᐊᐅᓚᑦᑎᔨᐅᓚᐅᑲᒃᑐᖅ, ᐊᖓᔪᖅᑲᐅᑏᑦ ᑐᓴᐅᒪᔪᓕᕆᔨᒃᑯᖏᓐᓄᑦ
ᖁᓪᓕᖅ ᐅᒻᒪᖁᑎᓕᕆᔨᒃᑯᑦ ᑎᒥᖓ
867-979-7524
rboucher@qec.nu.ca

ᐲᑕᑭᓐ ᑦᓴᑰᓐᓴ
ᑐᑭᒧᐊᒃᑎᑦᑎᔨ, ᐊᑐᐊᒐᓕᕆᓂᕐᒧᑦ, ᐸᕐᓇᐃᓂᕐᒧᑦ ᑐᓴᒐᒃᓴᓕᕆᓂᕐᒧᓪᓗ
ᐃᖅᑲᓇᐃᔭᖅᑐᓕᕆᔨᒃᑯᑦ
867-975-6226
pchakonza@gov.nu.ca