ᐅᖃᓚᐅᑎᓯᐅᑏᑦ

You are here

ᖃᒪᓂ'ᑐᐊᕐᒥ ᐅᖅᓱᐊᓗᒃ ᑯᕕᓚᐅᖅᑎᓪᓗᒍ ᒫᓐᓇ ᖃᓄᐃᓕᖓᓕᕐᓂᖓ

ᔪᓚᐃ 20, 2021

ᒐᕙᒪᒃᑯᓐᓂ ᐃᓄᖕᓄᑦ ᑐᓴᒐᒃᓴᖅ

ᖃᒪᓂ'ᑐᐊᕐᒥ ᐅᖅᓱᐊᓗᒃ ᑯᕕᓚᐅᖅᑎᓪᓗᒍ ᒫᓐᓇ ᖃᓄᐃᓕᖓᓕᕐᓂᖓ

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᑐᓴᖅᑎᑦᑎᔪᒪᕗᑦ ᖃᒪᓂ'ᑐᐊᕐᒥᐅᓂᒃ ᓄᑖᙳᕆᐊᖅᓯᒪᔪᓂᒃ ᐃᑭᓴᕋᐃᑦᑐᒥᒃ ᑯᕕᔪᖃᓚᐅᖅᑎᓪᓗᒍ ᓄᓇᖓᓐᓂ, ᑕᒪᓐᓇᓗ ᐅᖃᐅᓯᐅᓚᐅᖅᖢᓂ ᐊᐃᕆᓕ 22−ᖑᑎᓪᓗᒍ.

ᐊᕙᑎᓕᕆᔨᒃᑯᓐᓄᑦ ᐱᓕᕆᔨᑦ ᓇᓗᓇᐃᖅᓯᖕᒪᑕ ᑯᕕᓚᐅᖅᑐᖅ ᐊᑕᐅᓯᐅᙱᑦᑐᒥᒃ ᑯᕕᓚᐅᕐᓂᖓᓂᒃ ᐅᖅᓱᖅᑖᕐᕕᖕᒥ. ᐃᕐᖓᖅᑐᑦ ᓇᓗᓇᐃᖅᑕᐅᓚᐅᖅᐳᑦ ᐅᖅᓱᖅᑖᕐᕕᖕᒥ ᓱᓪᓗᐊᓗᖓᓐᓂᒃ ᓯᒥᒃᑕᐅᑖᓂᙶᕐᓂᖓᓂᒃ ᖃᑦᑕᐅᔭᙳᐊᖅ 5−ᒥ ᐊᒻᒪᓗ ᖃᑦᑕᐅᔭᙳᐊᖅ ᐊᑐᖅᑕᐅᓪᓗᐊᑕᖅᑐᒥᒃ ᓯᒥᒃᑕᐅᑖᓂ 2−ᒥ. ᐅᑯᐊ ᓯᒥᒃᑕᐅᑏᑦ ᐊᓯᔾᔨᖅᑕᐅᓯᒪᓕᖅᑐᑦ.

9−ᖑᑎᓪᓗᒋᑦ ᖃᑦᑕᐅᔭᙳᐊᑦ 8 ᖃᐅᔨᓴᖅᑕᐅᕌᓂᒃᓯᒪᓕᖅᑐᑦ ᓇᓗᓇᐃᒃᑯᑦᑎᖅᑕᐅᒃᑲᓐᓂᖅᓯᒪᓕᖅᖢᑎᓪᓗ ᐊᒃᑐᐊᓂᓕᖕᓄᑦ ᒪᓕᒃᑕᐅᕙᒃᑐᓄᑦ. ᓴᓇᔭᐅᒃᑲᓐᓂᕆᐊᖃᖅᑐᑦ ᓱᓕ ᐊᒥᐊᒃᑯᑦ ᖃᑦᑕᐅᔭᙳᐊᑦ ᐱᐊᓂᒃᑕᐅᓇᓱᖕᓂᐊᖅᑐᑦ ᐅᓪᓗᕐᓂᒃ ᐊᒡᒋᖅᑐᓂᒃ. ᖃᑦᑕᐅᔭᙳᐊᑦ ᖃᐅᔨᓴᖅᑕᐅᔪᑦ ᑯᑐᒃᑐᖅᓯᐊᖑᓚᐅᙱᑦᑐᑦ.

ᐱᓕᕆᐊᖑᐃᓐᓇᖅᑐᖅ ᓴᓗᒻᒪᖅᓴᖅᑕᐅᒋᐊᖃᕐᓂᖓ ᐅᖅᓱᖅᑖᕐᕕᖕᒥ ᐱᓕᕆᐊᖑᑦᑎᐊᖅᑐᒻᒪᕆᐊᓗᒃ. ᓴᓇᔭᐅᒃᑲᓐᓂᕆᐊᓖᑦ ᓴᓇᔭᐅᒃᑲᓐᓂᓕᖅᑐᑦ ᐃᑭᐊᕐᒥᖓ ᑰᕝᕕᓕᐊᕆᓯᒪᔪᓂᒃ ᐅᖅᓱᖅᑖᕐᕕᖕᒥ ᐊᕙᑖᓃᑦᑐᑦ ᐋᖅᑭᒋᐊᖅᑕᐅᒃᑲᓐᓂᕐᓗᓂ ᐃᑭᐊᕐᒥᖓ ᐃᑭᐊᕐᒥᑦᑎᐊᕙᐅᓗᓂ ᖃᐅᔨᒪᓇᕐᓗᓂᓗ ᓯᕗᓂᒃᓴᑦᑎᓐᓂ ᐃᕐᖓᓕᕐᓂᕐᒥᒃᐸᑦ ᑲᒪᒋᔭᐅᔪᓐᓇᓛᕐᓂᖓᓐᓂᒃ. ᐊᑭᓐᓇᖅᑕᖃᕐᓗᓂ ᓄᖅᑲᖅᑎᑦᑎᔾᔪᑎᒃᓴᒥᒃ ᐊᐅᓚᓂᕆᔭᖓᓄᑦ ᐅᖅᓱᐊᓗᒃᓴᑦ ᒪᕐᕈᖕᓃᒃ ᐃᓚᓯᒪᔫᖕᓄᑦ. ᐱᓕᕆᔩᑦ ᐲᔭᐃᖏᓐᓇᓲᖑᕗᑦ ᑐᖅᑯᖅᑐᐃᕙᒃᖢᑎᓪᓗ ᓱᕈᖅᓯᒪᔪᒥᒃ ᒪᓂᖅᑲᒥᒃ/ᐃᔾᔪᕐᒥᒃ ᐃᒪᕐᒥᓪᓗ ᒪᕐᕉᖕᓂ ᐃᓗᑦᑐᖅᑎᓯᒪᔫᖕᓂᒃ ᑲᑎᖅᓱᖅᑕᐅᓂᖓᓗ ᑲᒪᒋᔭᐅᓂᖓᓗ ᐊᒃᑐᖅᑕᐅᓯᒪᔪᒧᑦ ᐃᒪᕐᒧᑦ ᐲᔭᖅᑕᐅᓗᓂ ᐅᖅᓱᐊᓗᒃᓴᑦ ᒪᕐᕈᖕᓃᒃ ᐃᓚᓯᒪᔪᑦ ᐱᓕᕆᐊᖑᐃᓐᓇᕈᑎᒃᓴᖏᓐᓂᒃ.

ᐊᒡᓂᑰ ᐅᔭᕋᖕᓂᐊᕐᕕᒃᑯᑦ (Agnico Eagle Mines Limited) ᐃᑲᔪᖅᑐᐃᓯᒪᔪᑦ ᐱᓪᓗᑎᒃ ᖃᔅᓯᑲᓪᓚᖕᓂ ᐅᖅᓴᒃᓴᐅᑎᖏᓐᓂᒃ ᐊᒃᑐᖅᑕᐅᓯᒪᔪᒧᑦ ᐃᒪᕐᒧᑦ ᐅᔭᕋᖕᓂᐊᕐᕕᖓᓐᓄᑦ ᑲᒪᒋᔭᐅᑎᑦᑕᖅᑐᖅᖢᒋᑦ, ᐊᒻᒪᓗ ᐊᑐᐃᓐᓇᕈᕐᕕᒋᓪᓗᒋᑦ ᐱᓕᕆᔨᑦ ᐃᖏᕐᕋᔾᔪᑎᓂᒃ ᐊᒻᒪ ᐃᑭᐊᕐᒥᒃᓴᓂᒃ. ᖃᐅᔨᓴᒐᒃᓴᐅᔪᑦ ᐅᓪᓗᒥᒧᑦ ᑕᑯᒃᓴᐅᑎᑦᑎᔪᑦ ᑯᕕᓯᒪᓂᖓ ᑎᑭᓯᒪᙱᓐᓂᖓᓂᑦ ᖃᒪᓂ'ᑐᐊᖅ ᓄᓇᓕᖓᓐᓄᑦ ᐊᒻᒪᓗ ᑎᑭᐅᑎᔾᔮᖏᓐᓂᖓᓂᒃ ᖃᐅᔨᒪᔭᐅᓕᖅᑐᖅ.

ᐊᕙᑎᓕᕆᔨᒃᑯᑦ ᐱᐊᓂᒃᓯᓛᕋᓱᒋᔭᐅᕗᑦ ᓴᓗᒻᒪᖅᓴᖅᑕᖓᓐᓂᒃ ᐅᑭᐊᒃᓵᖑᓕᖅᐸᑦ, ᖃᐅᔨᓴᖅᑕᐅᖏᓐᓇᕐᓗᓂᓗ 2023−ᖑᕋᓱᖕᓂᖓᓂ. ᐱᓇᓱᐊᕈᓯᑕᒫᑦ ᐅᖅᓱᖅᑖᕐᕕᖕᒥ ᖃᓄᐃᓕᖓᓕᕐᒪᖔᑦ ᐊᑐᐃᓐᓇᕈᖅᑎᑕᐅᖏᓐᓇᖅᐳᑦ ᒪᐃᔭᒧᑦ ᐊᒻᒪ ᕼᐋᒻᒪᓚᒃᑯᑦ ᐊᐅᓚᑦᑎᔨᖓᓐᓄᑦ ᑐᑭᓯᒋᐊᒐᒃᓴᒃᑲᓐᓃᓪᓗ ᐊᑐᐃᓐᓇᕈᖅᑎᑕᐅᓂᐊᖅᖢᑎᒃ ᐃᓄᖕᓄᑦ, ᐊᔪᕐᓇᕈᓐᓃᑐᐊᕌᖓᑦ ᐊᒻᒪ ᐊᔪᕐᓇᕈᓐᓃᑐᐊᖅᐸᑦ.

###

ᑐᓴᒐᒃᓴᓕᕆᔨᓄᑦ ᖃᐅᔨᒋᐊᕐᕕᒃᓴᖅ:

ᐊᕋᒪᐃᑦ (ᓘᓚ) ᐅᕗᐊᔾᔨ
ᐊᐅᓚᑦᑎᔨ, ᐊᑐᐊᒐᕐᓄᑦ ᒪᓕᒐᕐᓄᓪᓗ
ᓄᓇᓕᖕᓂᑦ ᒐᕙᒪᒃᑯᓪᓗ ᐱᔨᑦᑎᕋᖅᑎᒃᑯᑦ
867-975-5354
aowoaje2@gov.nu.ca