ᐅᖃᓚᐅᑎᓯᐅᑏᑦ

You are here

ᓄᑖᖅ ᓱᖏᐅᑎᕙᓪᓕᐊᓂᕐᒧᑦ ᐱᓕᕆᐊᖅ ᐃᑲᔪᖅᑐᖅ ᐅᖅᓱᖅᑑᕐᒥ ᐱᕙᒌᔭᐃᑎᓪᓗᒋᑦ ᐊᑦᑕᕐᓇᖅᑐᓄᑦ ᓴᖅᑭᔮᖅᑐᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ

ᐊᒐᓯ 11, 2022

ᐱᕙᓪᓕᐊᔪᑦ ᓴᖅᑭᑕᐅᔪ
ᓴᖅᑭᑎᑕᐅᑲᐅᑎᒋᔭᕆᐊᓕᒃ

ᓄᑖᖅ ᓱᖏᐅᑎᕙᓪᓕᐊᓂᕐᒧᑦ ᐱᓕᕆᐊᖅ ᐃᑲᔪᖅᑐᖅ ᐅᖅᓱᖅᑑᕐᒥ ᐱᕙᒌᔭᐃᑎᓪᓗᒋᑦ ᐊᑦᑕᕐᓇᖅᑐᓄᑦ ᓴᖅᑭᔮᖅᑐᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ  

ᐋᒡᒌᓯ 10, 2022 − ᐅᖅᓱᖅᑑᖅ, ᓄᓇᕗᑦ − ᑯᐄᓐ ᑭᒡᒐᖅᑐᖅᑎᖓ−ᓄᓇᖃᖅᑳᖅᓯᒪᔪᓕᕆᓂᖅ ᐊᒻᒪ ᐃᓄᓕᕆᔨᑐᖃᒃᑯᑦ ᑲᓇᑕᒥ

ᐅᖅᓱᑑᑉ ᕼᐊᒻᓚᒃᑯᖏᑦ ᓯᕗᒻᒧᐊᒃᐸᓪᓕᐊᓂᖃᖅᑐᑦ ᑲᒪᒋᔭᖃᕐᓂᕐᒥᒃ ᓱᖏᐅᑎᕙᓪᓕᐊᓂᕐᒥᒡᓗ ᐊᒃᑐᐃᔾᔪᑕᐅᔪᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓄᓇᓕᖕᓂ ᐊᐅᓚᑕᐅᔪᒥ ᐱᓕᕆᐊᖃᖦᖤᑐᐊᖅᖢᑎᒃ ᐊᐅᓚᑦᑎᔾᔪᑕᐅᓂᐊᖅᑐᓂ ᓄᓇᓕᕆᓂᕐᒧᑦ ᖃᐅᔨᓴᕐᓂᕐᒧᑦ ᑯᕕᕕᖏᓐᓄᓪᓗ ᐱᕙᒌᔭᐅᒻᒥᒃ  ᓄᓇᓕᖕᓂ ᐃᓂᐅᔪᓂᒡᓗ ᓇᓗᓇᐃᖅᑕᐅᓯᒪᔪᓂ ᓄᓇᒥᒃ ᐊᑐᐃᓐᓇᕈᖅᑎᑦᑎᓂᕐᒧᑦ.

ᓄᓇᓕᕆᓂᕐᒧᑦ ᖃᐅᔨᓴᕐᓂᕐᒧᑦ ᑯᕕᕕᖏᓐᓄᓪᓗ ᐱᕙᒌᔭᐅᑎᓄᑦ ᐱᓕᕆᐊᖅ, ᐊᐅᓚᑕᐅᔪᖅ ᓄᓇᕗᑦ ᒐᕙᒪᖓᓂ, ᑲᑎᑦᑎᓂᐊᖅᑐᑦ ᓄᓇᓕᖕᓂ ᖃᐅᔨᒪᓂᕆᔭᐅᔪᑦ ᑐᓴᐅᒪᔾᔪᑎᒃᓴᓂ ᐊᑐᕐᓗᑎᒃ ᑲᑎᖅᓱᖅᑕᐅᓯᒪᔪᓂ ᐋᖅᑭᒃᓱᖅᑕᐅᓯᒪᔾᔪᑎᓄᑦ ᖃᐅᔨᒃᑲᐃᔨᓄᑦ ᓴᖅᑭᑦᑎᓂᐊᕐᓗᑎᒃ ᐱᕙᓪᓕᐊᕝᕕᐅᔪᓐᓇᖅᑐᓄᑦ ᓄᓇᙳᐊᕐᒧᑦ ᑯᕝᕕᕕᓕᐅᕐᓂᕐᒧᓪᓗ ᐱᕙᒌᔭᐅᒻᒥᒃ ᓄᓇᓕᖕᓄᑦ. ᑐᕌᒐᕆᔭᐅᔪᖅ ᑖᒃᑯᓇᙵᑦ ᐱᕙᒌᔭᐅᑎᓂᒃ ᓇᓗᓇᐃᖅᓯᔾᔪᑕᐅᓂᐊᖅᑐᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᓄᐃᓕᔾᔪᑎᓂᒃ ᐊᐅᒃᐸᓪᓕᐊᓂᖓᓄᑦ ᖁᐊᖑᐃᓐᓇᖅᑐᖅ ᓄᓇᒥ, ᓲᕐᓗ ᐃᒻᒥᖅᓱᖅᑕᐅᕙᒃᑐᓄᑦ ᓄᖑᑉᐸᓪᓕᐊᓂᖏᓐᓄᑦ, ᐊᐅᒃᐸᓪᓕᐊᓂᖓᓄᑦ, ᑯᕝᕕᖅᓱᕐᕕᐅᕙᒃᑐᓄᓪᓗ; ᓴᐳᑎᓇᓱᒡᓗᒋᑦ ᐱᑕᖃᕇᒃᑐᑦ ᓄᓇᓖᑦ ᒪᑭᒪᔾᔪᑎᖏᑦ ᑖᒃᑯᓇᙵᑦ ᐊᒃᑐᖅᑕᐅᓂᖏᓐᓂᒃ; ᐃᑲᔪᖅᐸᓪᓕᐊᓂᕐᒥᒡᓗ ᐱᕙᒌᔭᐃᓂᕐᒥᒃ ᓯᓚᐅᑉ ᖃᓄᐃᓐᓂᕆᒐᔪᒃᑕᖓᓄᑦ ᐅᐸᓗᖓᐃᔭᕈᑎᓂᒃ ᓯᕗᓂᒃᓴᒥ ᐱᕙᓪᓕᐊᓂᐅᓇᔭᖅᑐᓄᑦ.

ᑐᑭᓯᐅᒪᓕᕐᓂᖅ ᐊᒃᑐᐃᔾᔪᑕᐅᔪᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᐊᖃᓪᓚᕆᖃᑦᑕᖅᐳᑦ ᒪᑭᒪᔾᔪᑎᓄᑦ ᐱᕙᒌᔭᕐᓂᕐᒥᒃ ᑐᐊᕕᕐᓇᖅᑐᓂᒡᓗ ᐊᐅᓚᑦᑎᓂᕐᒥᒃ ᓄᓇᖃᖅᑳᖅᓯᒪᔪᓂ, ᐅᐊᖕᓇᖅᐸᓯᖕᒥ ᐅᑭᐅᖅᑕᖅᑐᒥᓗ ᓄᓇᓕᖕᓂ, ᐱᓗᐊᙳᐊᖅᑐᒥ ᑕᐃᒃᑯᐊ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒃᑐᖅᑕᐅᓗᐊᖅᑐᓄᑦ ᑯᕕᑎᑦᑎᔾᔪᑎᖏᑦ ᑐᙵᕕᖏᓐᓄᓪᓗ ᑐᙵᑦᑎᐊᕐᓂᖏᓐᓂᒃ. ᓄᓇᓕᖕᓂ ᓄᓇᕗᓕᒫᒥ, ᐊᐅᒃᐸᓪᓕᐊᔪᖅ ᓄᓇᐅᑉ ᖁᐊᖑᓂᖓ ᒪᓂᕋᕐᒥᑦ ᐋᖅᑭᑦᑎᐊᙱᑎᑦᑎᓯᒪᔪᖅ, ᓄᓇᒧᑦ ᒧᕐᔪᕈᑎᕙᓪᓕᐊᔪᑦ ᐃᒡᓗᖅᔪᐊᑦ ᑰᓕᕈᔾᔭᐅᕙᓪᓕᐊᓂᖏᓐᓄᓪᓗ ᐊᖅᑯᑏᑦ. ᑕᒪᓐᓇ ᐱᓕᕆᐊᖅ ᐃᑲᔪᕐᓂᐊᖅᑐᖅ ᕼᐋᒻᒪᓚᒃᑯᓐᓂᑦ ᐅᖅᓱᖅᑑᕐᒥ ᑲᔪᓯᑎᑦᑎᕙᓪᓕᐊᓂᕐᒥᒃ ᐃᒡᓗᖅᔪᐊᖑᕙᒌᖅᑐᓂ ᓄᓇᓖᓪᓗ ᒪᑭᒪᔾᔪᑎᖏᓐᓂᒃ, ᐃᒡᓗᖅᔪᐊᓂ ᓄᑖᓂᖔ ᒪᑭᒪᔾᔪᑎᓕᐅᙱᖔᕐᓗᑎᒃ ᑐᙵᕕᓕᖅᓯᒪᑦᑎᐊᙱᑦᑐᓂ ᐊᐅᒃᐸᓪᓕᐊᔪᒧᑦ ᓄᓇᐅᑉ ᖁᐊᖑᓂᖓᓄᑦ.

ᐅᓪᓗᒥ, ᒪᓕᒐᓕᐅᖅᑎ ᑖᓂᐊᓕ ᕙᓐᑖᓪ (Daniel Vandal), ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ, ᓇᓗᓇᐃᖅᓯᓚᐅᖅᑐᑦ $200,000−ᖑᔪᓂ ᑮᓇᐅᔭᖅᑖᕈᓯᐊᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᕙᒌᔭᕐᓂᖅ ᐅᑭᐅᖅᑕᖅᑐᒥ ᐱᓕᕆᐊᒃᓴᒥᙶᖅᑐᓂ ᐱᓕᕆᐊᖑᓂᐊᖅᑐᓄᑦ ᐃᓚᓕᐅᔾᔨᓂᐊᖅᑐᓂᒃ ᐱᖅᑯᓯᕆᔭᐅᔪᒥᒃ ᖃᐅᔨᒪᓂᕐᓂᒃ ᓄᓇᓖᑦ ᐃᓚᐅᑎᑕᐅᓂᖏᓐᓂᒡᓗ ᐱᕙᒌᔭᕐᓂᕐᒧᑦ ᓴᐳᔾᔨᓂᕐᒥᒃ ᒫᓐᓇᐅᔪᒥ ᓯᕗᓂᒃᓴᒥᓗ ᓄᓇᓕᖕᓂ ᒪᑭᒪᔾᔪᑎᓂᒃ.

ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᕙᒌᔭᕐᓂᖅ ᐅᑭᐅᖅᑕᖅᑐᒥ ᐱᓕᕆᐊᒃᓴᓄᑦ ᐃᑲᔪᖅᓱᐃᔪᖅ ᐱᓕᕆᐊᒃᓴᓂᑦ ᐃᑲᔫᑎᖃᖅᐸᑦᑐᓂᑦ ᓄᓇᖃᖅᑳᖅᓯᒪᔪᓂ ᐅᐊᖕᓇᖅᐸᓯᖕᒥᓗ ᓄᓇᓕᖕᓂ ᒐᕙᒪᒃᑯᓐᓄᓪᓗ ᐃᓚᒋᐊᕈᑕᐅᕙᒃᑐᓂ ᖃᔅᓯᐅᓂᖏᓐᓂᒃ ᓱᖏᐅᑎᓂᕐᒧᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᑕᒪᓐᓇ ᐃᓚᖃᖅᑐᖅ ᐃᑲᔪᖅᓱᐃᓂᕐᒥᒃ ᖃᐅᔨᓴᖅᑕᐅᓂᕐᒧᑦ ᓄᓇᓕᖕᓂ ᐊᑦᑕᕐᓇᖅᑐᒦᒍᓐᓇᕐᓂᖏᓐᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᔾᔪᑕᐅᖃᑕᐅᕙᒃᑐᓄᑦ ᓲᕐᓗ ᓯᑰᑉ ᐊᓯᔾᔨᐸᓪᓕᐊᓂᖓᓄᑦ, ᓄᓇᐅᑉ ᕿᕿᓐᓂᖓᓄᑦ ᐊᐅᒃᐸᓪᓕᐊᔪᒧᑦ, ᓯᔾᔭᖅᐸᓯᐅᑉ ᓄᖑᑉᐸᓪᓕᐊᓂᖓᓄᑦ, ᐅᓕᕕᒡᔪᐊᕐᓂᕐᒧᑦ, ᓄᓇᒥᓗ ᐃᑭᕐᔪᐊᖅᑐᓄᑦ ᓄᓇᒥᑦ ᒪᑭᒪᔾᔪᑏᓪᓗ ᐱᓕᕆᐊᖏᓐᓂᒃ. ᑕᒪᓐᓇ ᐱᓕᕆᐊᒃᓴᖅ ᐃᑲᔪᖅᓱᐃᖕᒥᔪᖅ ᓄᓇᓕᖕᓂ ᒐᕙᒪᒃᑯᓐᓂᓗ ᑲᒪᒋᔭᖃᕐᓂᕐᒥᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᐃᓚᒋᔭᐅᓪᓗᓂ ᓄᓇᓕᖕᓂ ᐱᕙᒌᔭᕐᓂᕐᒧᑦ ᐊᑐᓕᖅᑎᑦᑎᓂᕐᒥᒡᓗ ᐊᑐᖅᑕᐅᔪᓐᓇᖅᑐᓂᒃ ᑭᐅᔾᔪᑕᐅᔪᓐᓇᖅᑐᓂᒃ ᐊᔾᔨᒌᙱᑦᑐᓄᑦ ᐊᒃᑐᖅᑕᐅᓂᖏᓐᓄᑦ.

 ᐅᖃᐅᓯᐅᓯᒪᔪᑦ

“ᓄᓇᖃᖅᑳᖅᓯᒪᔪᑦ ᐅᑭᐅᖅᑕᖅᑐᒥᓗ ᓄᓇᓖᑦ ᐃᒃᐱᒍᓱᐊᓂᓕᕋᓗᐊᖅᑎᓪᓗᒋᑦ ᓱᕋᐃᓪᓚᕆᖕᓂᖏᓐᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᑦ, ᐱᒻᒪᕆᐅᕗᖅ ᐱᔾᔪᑎᒃᓴᖃᕐᓂᖏᓐᓂᒃ ᓯᕗᒻᒧᐊᒃᐸᓪᓕᐊᔪᑎᒃᓴᓂᒃ ᓱᖏᐅᑎᕙᓪᓕᐊᓂᕐᒥᒃ ᐊᓯᔾᔨᖅᐸᓪᓕᐊᔪᒧᑦ ᐊᕙᑎᒋᔭᑦᑎᓐᓄᑦ. ᑕᒪᓐᓇ ᐱᓕᕆᐊᖅ ᐱᒻᒪᕆᐅᔪᒥ ᐱᓕᕆᐊᒃᓴᖃᕐᓂᐊᖅᐳᖅ ᐃᑲᔪᖅᓱᐃᓂᕐᒥᒃ ᑰᒡᕕᐅᔪᓂ ᓄᓇᓕᕆᕝᕕᐅᔪᓪᓗ ᐃᓂᖏᓐᓂᒃ ᐱᕙᒌᔭᕐᓂᕐᒥᑦ ᓯᓚᒥᑦ ᐃᒻᒥᒃᑰᕈᓐᓇᕐᓂᕐᒧᑦ ᒪᑭᒪᔾᔪᑎᓄᑦ ᐱᕙᓪᓕᐊᓂᐅᔪᒧᑦ ᕼᐊᒻᓚᑯᖏᓐᓄᑦ ᐅᖅᓱᖅᑑᕐᒥ. ᐃᑲᔪᖅᓱᐃᔾᔪᑕᐅᓂᐊᕐᒥᔪᖅ ᓄᑖᓂᒃ ᓴᖅᑭᑦᑎᓂᒃᑯᑦ ᐊᓯᔾᔨᕈᑕᐅᓂᐊᖅᑐᓄᑦ ᐱᕈᖅᑎᑦᑎᕙᓪᓕᐊᓂᕐᒥᒡᓗ ᓄᓇᓕᖕᓂ ᐊᓐᓇᒍᓐᓇᕐᓂᕐᓂᒃ ᐱᓕᕆᕙᓪᓕᐊᓂᖃᖅᑎᓪᓗᑕ ᓯᓚᐅᑉ ᖃᓄᐃᓐᓂᕆᒐᔪᒃᑕᖓᓄᑦ ᑐᕌᒐᕆᔭᐅᔪᓂ.”

ᒪᓕᒐᓕᐅᖅᑎ ᑖᓂᐊᓕ ᕚᓐᑖᓪ, P.C., M.P.
ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ

“ᑕᒪᓐᓇ ᐱᓕᕆᐊᖅ ᑲᔪᓯᕙᓪᓕᐊᔪᖅ ᓄᓇᕗᒻᒥ ᐱᓕᕆᐊᖏᓐᓂᒃ ᐊᑦᑕᕐᓇᕈᓐᓃᖅᑎᑦᑎᕙᓪᓕᐊᓂᕐᒥᒃ ᑲᔪᓰᓐᓇᕈᓐᓇᖅᑐᓂᒃ ᓯᓚᐅᑉ ᖃᓄᐃᓐᓂᕆᒐᔪᒃᑕᖓᓄᓪᓗ ᐅᔾᔨᕈᓱᖕᓂᕐᒧᑦ ᓯᕗᓂᒃᓴᒥ. ᑲᑎᖅᓱᐃᕙᓪᓕᐊᓂᖅ ᓄᓇᓕᕆᔾᔪᑎᓄᑦ ᖃᐅᔨᓯᒪᔭᐅᔪᑦ ᐃᓄᐃᑦ ᖃᐅᔨᒪᓂᑐᖃᖏᓐᓂᒃ ᐱᒻᒪᕆᐅᒋᔭᖏᓐᓂᒡᓗ, ᑭᖑᕚᒃᓴᑦ ᐃᑲᔫᑎᖃᖁᓪᓗᒋᑦ ᐱᒻᒪᕆᐅᔪᓂᒃ ᐱᓕᕆᐊᖑᕙᓪᓕᐊᔪᒪᔪᓂ. ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓱᖏᐅᑎᕙᓪᓕᐊᓂᖅ ᑕᒪᓃᖏᓐᓇᕐᓂᐊᓕᖅᑐᖅ - ᐱᓕᕆᖃᑎᒌᖏᓐᓇᖅᐸᓪᓕᐊᓃᑦ ᓄᓇᓕᖕᓂᑦ, ᒐᕙᒪᑐᖃᒃᑯᑎᒍᓪᓗ ᑲᔪᓯᓂᖃᑦᑎᐊᕈᓐᓇᕋᔭᖅᐳᒍᑦ.”

ᒪᓕᒐᓕᐅᖅᑎ ᑕᐃᕕᑎ ᔪᐊᓇᓯ, 
ᒥᓂᔅᑕ ᓄᓇᓕᖕᓂᑦ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄᑦ

ᓱᓕᔪᑦ

  • ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᕙᒌᔭᖅᓯᒪᓂᖅ ᐅᑭᐅᖅᑕᖅᑐᒥ ᐱᓕᕆᐊᒃᓴᓄᑦ ᑮᓇᐅᔭᑦ ᓯᓚᐅᑉ ᐊᓯᔾᔨᑉᐸᓪᓕᐊᓂᖓᓄᑦ ᓱᖏᐅᑎᕙᓪᓕᐊᓂᕐᒧᑦ ᐱᓕᕆᐊᑦ ᔫᑳᓐᒥᑦ (Yukon), ᓄᓇᑦᓯᐊᕐᒥ, ᓄᓇᕗᒻᒥ, ᓄᓇᕕᖕᒥ, ᓄᓇᑦᓯᐊᕗᑦ, NunatuKavut−ᒥᑦ ᐊᒻᒪ Eeyou Istchee ᓄᓇᑦᓯᐊᕐᒥ. ᐅᓪᓗᒥᒧᑦ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᕙᒌᔭᖅᓯᒪᓂᖅ ᐅᑭᐅᖅᑕᖅᑐᒥ ᐱᓕᕆᐊᒃᓴᓄᑦ ᑮᓇᐅᔭᓕᐅᖅᓯᒪᔪᑦ $53 ᒥᓕᐊᓐ ᐅᖓᑖᓂᑦ 284−ᖑᔪᓂᑦ ᐱᓕᕆᐊᒃᓴᓂ ᐅᑭᐅᖅᑕᖅᑐᓕᒫᒥ.
  • ᑮᓇᐅᔭᑦ ᐊᑐᖅᑐᒃᓴᑦ 2016−ᒧᑦ ᓴᓂᕐᕙᑦᑕᐅᓯᒪᔪᑦ $21.4 ᒥᓕᐊᓐ−ᖑᔪᑦ ᓯᕗᓪᓕᕐᒥ ᐊᕐᕌᒍᓄᑦ ᑕᓪᓕᒪᓄᑦ ᐊᒻᒪ $3.5 ᒥᓕᐊᓐ ᐊᕐᕌᒍᑕᒫᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᕙᒌᔭᕐᓂᕐᒧᑦ ᐅᑭᐅᖅᑕᖅᑐᒥ. ᑮᓇᐅᔭᑦ ᐊᑐᖅᑐᒃᓴᑦ 2017−ᒥᑦ ᓴᓂᕐᕙᑦᑕᐅᓯᒪᔪᑦ ᐃᓚᖃᒃᑲᓐᓂᓚᐅᖅᑐᑦ $55.9 ᒥᓕᐊᓐᓂᒃ ᐊᕐᕌᒍᓄᑦ 11-ᓄᑦ ᐃᑲᔪᖅᓱᐃᔾᔪᑕᐅᓗᑎᒃ ᖃᐅᔨᓴᖅᑕᐅᕙᓪᓕᐊᔪᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒃᑐᖅᑕᐅᓂᖏᓐᓄᑦ ᓱᖏᐅᔾᔨᕙᓪᓕᐊᓂᕐᒥᒡᓗ ᐊᑐᖅᑕᐅᔪᓐᓇᖅᑐᓂᒃ ᐅᑭᐅᖅᑕᖅᑐᒥ.
  • 2022-2023−ᒥᑦ ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓂ, ᐱᓕᕆᐊᒃᓴᐅᔪᖅ ᐊᑐᐃᓐᓇᐅᑎᑦᑎᓯᒪᔪᖅ $13 ᒥᓕᐊᓐᓂᒃ ᑮᓇᐅᔭᖃᖅᑎᑦᑎᓂᕐᒥᒃ 52−ᖑᔪᓂ ᐱᓕᕆᐊᒃᓴᓂ ᓄᓇᕗᓕᒫᒥᑦ.

ᐊᒃᑐᐊᓂᓖᑦ ᐊᑦᑕᑕᕐᕕᐅᔪᓐᓇᖅᑐᑦ
ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᕙᒌᔭᕐᓂᖅ ᐅᑭᐅᖅᑕᖅᑐᒥ ᐱᓕᕆᐊᒃᓴᓄᑦ

- 30 -

ᑐᑭᓯᒋᐊᒃᑲᓐᓂᕈᒪᔪᑦ, ᐱᕙᓪᓕᐊᔪᓄᑦ ᖃᐅᒋᐊᕈᓐᓇᖅᑐᑦ:

ᑲᐃᐅᓪ ᐋᓚᓐ
ᐱᕙᓪᓕᐊᔪᓂᒃ ᑎᑎᕋᖅᑎ
ᒪᓕᒐᓕᐅᖅᑎ ᑖᓂᐊᓕ ᕚᓐᑕᓪ ᑎᑎᕋᕐᕕᖓᑦ
ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ
819-953-1153

ᑐᓴᒐᒃᓴᓕᕆᔨᑦ
ᒥᓂᔅᑕ ᑯᐄᓐ ᑭᒡᒐᖅᑐᖅᑎᖓ−ᓄᓇᖃᖅᑳᖅᓯᒪᔪᓕᕆᓂᖅ ᐊᒻᒪ ᐃᓄᓕᕆᔨᑐᖃᒃᑯᑦ ᑲᓇᑕᒥ
819-934-2302
RCAANC.media.CIRNAC@canada.ca

ᓱᓕᑳ ᑐᐊᐃᐅᓪ
ᑐᓴᒐᒃᓴᓕᕆᔨᒻᒪᕆᒃ
ᓄᓇᕗᑦ ᒐᕙᒪᖓᑦ
ᓄᓇᓕᖕᓂ ᒐᕙᒪᒃᑯᓂᓪᓗ ᐱᔨᑦᑎᕋᖅᑎᒃᑯᑦ
867-975-5406
sduale1@gov.nu.ca

ᑐᓴᐅᒪᖃᑕᐅᒋᑦ
ᐅᖃᖃᑕᐅᖃᑦᑕᕆᑦ ᐅᑭᐅᖅᑕᖅᑑᑉ ᒥᒃᓵᓄᑦ:
Twitter: GovCan_North
Facebook: GovCan_North

https://www.canada.ca/en/crown-indigenous-relations-northern-affairs/news/2022/08/new-adaptation-project-helping-gjoa-haven-prepare-for-risks-posed-by-climate-change.html

Document(s):