ᐅᖃᓚᐅᑎᓯᐅᑏᑦ

You are here

ᓄᓇᕗᒥᐅᑦ ᐃᓚᐅᓂᐊᖅᐳᑦ ᑲᓇᑕᒥ ᑐᐊᕕᕐᓇᖅᑐᖃᓕᕐᓂᖅᐸᑦ ᐅᐸᓗᖓᐃᔭᐅᑎᒃᓴᓂᒃ ᖃᐅᔨᓴᕈᑎᓂᒃ

ᒪᐃ 01, 2019

ᒐᕙᒪᒃᑯᓐᓂ ᐃᓄᖕᓄᑦ ᑐᓴᒐᒃᓴᖅ

ᓄᓇᕗᒥᐅᑦ ᐃᓚᐅᓂᐊᖅᐳᑦ ᑲᓇᑕᒥ ᑐᐊᕕᕐᓇᖅᑐᖃᓕᕐᓂᖅᐸᑦ ᐅᐸᓗᖓᐃᔭᐅᑎᒃᓴᓂᒃ ᖃᐅᔨᓴᕈᑎᓂᒃ

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ, ᑐᐊᕕᕐᓇᖅᑐᓕᕆᔨᒃᑯᑦ, ᑐᓴᖅᑎᑦᑎᕗᑦ ᓄᓇᕗᒥᐅᓂᒃ ᖃᐅᔨᓴᕈᑕᐅᓗᓂ ᑲᓇᑕᒥ ᑐᐊᕕᕐᓇᖅᑐᖃᓕᕐᓂᖅᐸᑦ ᐅᐸᓗᖓᐃᔭᐅᑎᒃᓴᑦ ᐱᓕᕆᐊᖑᓛᕐᓂᖓᓂᒃ ᐊᑕᐅᑦᑎᒃᑯᐊᓗᒃ ᓄᓇᕘᓕᒫᒥ ᖃᐅᔨᓴᐅᑎ ᓱᖁᑎᒋᔭᐅᙱᓪᓗᓂ ᒪᐃ 8, 2019-ᒥ.

ᖃᐅᔨᓴᕈᑎ ᐱᒋᐊᖅᑎᑕᐅᓛᖅᑐᖅ 1:55 ᐅᓐᓄᒃᓴᒃᑯᑦ ᑲᓇᖕᓇᒥ, 12:55-ᐸᑦ ᑭᕙᓪᓕᕐᒥ 11:55−ᐸᑦ ᕿᑎᕐᒥᐅᓂ, ᐅᖃᓘᑎᕋᓚᒃᑯᑦ, ᑕᓚᕖᓴᒃᑯᑦ ᐊᒻᒪ ᓈᓚᐅᑎᒃᑯᑦ.

ᖃᐅᔨᓴᕈᑎ ᐅᖃᐅᓯᕆᔭᐅᓂᐊᖅᑐᖅ ᐃᒪᐃᓕᖓᔪᖅ: "ᐅᓇ ᖃᐅᔨᓴᕈᑎ. ᖃᓄᐃᓕᐅᖅᑐᖃᕋᓱᒋᐊᖃᙱᑦᑐᖅ. ᑐᑭᓯᒃᑲᓐᓂᕈᒪᒍᔅᓯ ᐅᕗᙵᕈᓐᓇᖅᑐᓯ: http://www.cgs.gov.nu.ca/npas”.
ᓰᐲᓰ ᓈᓚᐅᑎᒃᑯᑦ, ᑕᓚᕖᓴᒃᑯᑦ, ᐊᒻᒪᓗᑦᑕᐅᖅ ᓄᓇᓕᖕᒥ ᓯᓚᓕᕆᔪᑦ ᕿᓪᓚᔾᔫᑎᖏᑦ ᓴᖅᑭᔮᖅᑎᑦᑎᓂᐊᖅᑐᑦ ᑐᐊᕕᕐᓇᖅᑐᖃᓕᕐᓂᖅᐸᐅᑎᒥᒃ. ᐅᖃᓘᑎᕋᓛᒃᑯᑦ ᑐᓴᖅᑕᐅᔪᒃᓴᑦ ᓂᓪᓕᖅᑎᑕᐅᓛᖅᑐᑦ ᐅᖃᓘᑎᕋᓛᒃᑯᑦ ᐊᑦᑕᑕᖅᓯᒪᔪᓄᑦ LTE ᑐᓴᐅᒪᔪᓕᕆᔾᔪᑎᓄᑦ ᐋᖅᑭᒃᓱᕆᐊᓖᑦ ᐋᖅᑭᒃᓱᖅᓯᒪᓗᑎᒃ ᑐᓴᒐᒃᓴᑦ ᑐᓴᖅᑕᐅᔪᓐᓇᖁᓪᓗᒋᑦ.

ᐅᖃᓘᑎᕋᓛᑦ, ᐊᑦᑕᑕᖅᑎᓯᒪᔪᑦ LTE ᑐᓴᐅᒪᔪᓕᕆᔾᔪᑎᓄᑦ, ᐅᖃᓘᑎᕋᓛᓄᑦ ᓇᑉᐸᖅᑯᑎᓄᑦ ᑎᑭᐅᑎᓯᒪᔪᑦ ᐊᔪᙱᑦᑐᓪᓗ, ᐅᖃᓘᑎᕋᓛᓄᑦ ᑎᑎᕋᕈᓐᓇᐅᑎᑦ ᐋᖅᑭᒃᓯᒪᓂᖏᓪᓗ ᐊᒃᑑᑎᓛᖅᑐᑦ ᐅᖃᓘᑎᕋᓛᒃᑯᑦ ᐅᖃᓗᒃᑐᓄᑦ ᖃᐅᔨᓴᕈᑎ ᑐᓴᖅᑕᐅᔪᒃᓴᖅ ᓂᓪᓕᐊᓕᖅᐸᑦ. ᑐᓴᖅᑕᐅᑎᑕᐅᓂᖓ ᖃᐅᔨᓴᕈᑎᒥ ᐊᒃᑐᐃᑐᐃᓐᓇᕐᓂᐊᖅᑐᖅ ᕿᓪᓚᔾᔪᒐᕐᓄᑦ (ᑏᕖᒃᑯᑦ, ᓈᓚᐅᑎᒃᑯᑦ, ᓄᒃᑕᐅᑎᒃᑯᑦ), ᐃᒻᒪᖄ 30 ᑎᑦᑕᑯᓗᖕᓄᑦ.

ᑐᐊᕕᕐᓇᖅᑐᖃᓕᕐᓂᖅᐸᑦ ᐅᐸᓗᖓᐃᔭᐅᑎᒃᓴᑦ ᑲᓇᑕᒥ ᐋᖅᑭᒃᑕᐅᓯᒪᕗᑦ ᑐᓴᖅᑕᐅᑎᑦᑐᓐᓇᖅᖢᒋᑦ ᐱᕐᔪᐊᑦ ᐊᒻᒪ ᐃᓅᓯᕆᔭᐅᔪᓂᒃ ᐊᓐᓇᒃᑎᑦᑎᔾᔪᑎᑦ ᐅᐸᓗᖓᐃᔭᐅᑎᑦ ᑲᓇᑕᒥᐅᓄᑦ ᐃᓕᓐᓂᐊᖅᑎᑦᑎᔾᔪᑕᐅᓪᓗᓂᓗ ᐃᓄᖕᓄᑦ ᑐᐊᕕᕐᓇᖅᑐᖃᓕᕐᓂᖅᐸᑦ ᐅᐸᓗᖓᐃᔭᐅᑎᑦ ᖃᓄᐃᑦᑑᖕᒪᖔᑦ ᐃᓅᓯᕐᒧᑦ ᐊᑦᑕᕐᓇᖅᑐᓂᒃ ᓴᖅᑭᑦᑐᖃᑳᓪᓚᖕᓂᖅᐸᑦ. ᖃᐅᔨᓴᕈᑎᑦ ᓇᓗᓇᙱᔾᔪᑕᐅᕗᑦ ᐱᓕᕆᔾᔪᓯᖅ ᐊᔪᙱᓐᓂᖓᓂ ᓇᓗᓇᐃᖅᓯᔾᔪᑕᐅᓪᓗᓂᓗ ᓇᐅᒃᑯᑦ ᐋᖅᑭᒋᐊᖃᕐᒪᖔᑦ.

ᓄᓇᕗᒥᐅᑦ ᑐᑭᓯᒋᐊᒐᒃᓴᒃᑲᓐᓂᕐᓂᒃ ᐱᔪᓐᓇᖅᑐᑦ ᐅᕗᙵᕐᓗᑎᒃ http://www.cgs.gov.nu.ca/npas.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᓈᔅᕋ ᐃᓴᒃ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᓄᓇᓕᖕᓂᑦ ᒐᕙᒪᒃᑯᓪᓗ ᐱᔨᑦᑎᕋᖅᑎᒃᑯᑦ
ᓄᓇᕗᑦ ᒐᕙᒪᒃᑯᖏᑦ
867- 975-5342
nesak@gov.nu.ca