You are here

ᐃᖃᓗᖕᓂ ᐃᑎᔪᒃᑯᑦ ᑐᓚᒃᑕᕐᕕᒃ ᐱᓕᕆᐊᖅ ᐱᐊᓂᒃᑕᐅᔪᖅ

ᓄᕕᐱᕆ 14, 2022

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᐃᕐᖐᓐᓇᖅ ᓴᖅᑭᑕᕆᐊᓕᒃ

ᐃᖃᓗᖕᓂ ᐃᑎᔪᒃᑯᑦ ᑐᓚᒃᑕᕐᕕᒃ ᐱᓕᕆᐊᖅ ᐱᐊᓂᒃᑕᐅᔪᖅ ᐃᖃᓗᐃᑦ, ᓄᓇᕗᑦ (ᓅᕕᒻᐱᕆ 14, 2022) − ᓯᑎᐱᕆ 9, 2022-ᒥ, ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᓇᓗᓇᐃᖅᓯᓚᐅᖅᐳᑦ ᐱᐊᓂᒃᓯᓂᖏᓐᓂᒃ ᐃᖃᓗᖕᓂ ᐃᑎᔪᒃᑯᑦ ᑐᓚᒃᑕᕐᕕᖕᒥ. ᐊᐅᓚᑕᐅᓂᖓ ᑖᔅᓱᒪ ᐱᒻᒪᕆᐅᓪᓗᓂ ᐊᐅᓚᔪᓐᓇᐅᑎ ᑐᓐᓂᖅᑯᑕᐅᓯᒪᓕᖅᑐᖅ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓐᓄᓪᓗ.

"ᐊᑦᑕᕐᓇᙱᑦᑐᖅ ᐊᑑᑎᖃᑦᑎᐊᖅᖢᓂᓗ ᐃᖏᕐᕋᔪᓕᕆᔨᒃᑯᓐᓄᑦ ᐱᕐᔪᐊᖑᖕᒪᑦ ᐅᑭᐅᖅᑕᖅᑐᒥ ᒪᑭᒪᔾᔪᑎᓄᑦ ᐊᒻᒪ ᐃᓄᐃᑦ ᐃᓄᒋᐊᒃᓯᕙᓪᐊᓕᑎᓪᓗᒋᑦ −ᑕᐃᒫᑦᑎᐊᖅ ᑕᐃᒪ ᐃᖃᓗᖕᓂ ᐃᑎᔪᒃᑯᑦ ᑐᓚᒃᑕᕐᕕᒃ ᐊᑑᑎᖃᖅᑎᒋᓂᐊᖅᑐᖅ," ᐅᖃᖅᖢᓂ ᒪᓕᒐᓕᐅᖅᑎ ᑑᒥᓂᒃ ᓚᑉᓛᖕᒃ, ᒐᕙᒪᑐᖃᒃᑯᑦ ᒥᓂᔅᑕᖓᑦ ᒐᕙᒪᓕᕆᔨᒃᑯᓐᓄᑦ, ᓄᓇᓖᑦ ᐊᐅᓚᔪᓐᓇᐅᑎᖏᓐᓄᑦ ᓄᓇᓕᖕᓄᓪᓗ. "ᐱᓕᕆᖃᑎᒋᓪᓗᒋᑦ ᓄᓇᕗᑦ ᒐᕙᒪᒃᑯᑦ ᓄᓇᕗᒥᐅᓕᒫᓪᓗ, ᐱᕈᖅᑎᑦᑏᓐᓇᕐᓂᐊᖅᐳᒍᑦ ᒪᑭᒪᔾᔪᑎᑦᑎᓐᓂ ᐱᕚᓪᓕᖅᑏᓐᓇᕐᓗᒍᓗ ᓴᐱᓕᖅᓴᕋᐃᙱᓐᓂᖏᓐᓄᑦ ᓄᓇᓖᑦ ᑲᓇᑕᐅᑉ ᐅᑭᐅᖅᑕᖅᑐᐊᓂ."

"ᐅᓪᓗᒥ ᑐᓴᒐᒃᓴᕆᔭᐅᔪᖅ ᑐᓴᖅᑎᓪᓗᑎᒍᑦ, ᐃᓚᓯᕗᒍᑦ ᐊᐅᓚᔪᓐᓇᐅᑎᑦᑕ ᐃᓚᖓᓐᓂᒃ ᓄᓇᕗᒥᐅᓄᑦ," ᐅᖃᓚᐅᖅᐳᖅ ᒥᓂᔅᑕ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄᑦ ᑕᐃᕕᑎ ᔪᐊᓇᓯ. "ᐱᐊᓂᒃᑕᐅᕙᓪᓕᐊᓂᖓ ᐱᓕᕆᐊᖅ ᐱᐅᓯᕚᓪᓕᕈᑕᐅᓂᐊᖅᐳᖅ ᐊᑦᑕᕐᓇᙱᓐᓂᖓᓄᑦ ᐊᑑᑎᖃᑦᑎᐊᕐᓂᖓᓄᓪᓗ ᐅᒥᐊᕐᔪᐊᒃᑯᑦ ᑎᑭᑕᐅᖃᑦᑕᕐᓂᕐᓗ ᐸᓂᖅᑐᓂᒃ ᐅᓯᔭᐅᔪᒃᓴᓂᒃ ᐱᖁᑎᓂᒡᓗ ᓄᓇᓕᖕᓂ ᓄᓇᕘᒥᓗ ᐊᕐᕌᒍᒐᓴᕐᓄᑦ ᐊᒡᒋᖅᑐᓄᑦ."

"ᖁᔭᓕᔪᒪᒐᒃᑭᑦ ᐱᓕᕆᔨᐅᖃᑎᒃᑲ ᓄᓇᓕᖕᓂ ᒐᕙᒪᒃᑯᓂᓪᓗ ᐱᔨᑦᓯᕋᖅᑎᒃᑯᓐᓂ ᐱᓕᕆᑦᑎᐊᓚᐅᕐᓂᖏᓐᓄᑦ ᑐᓚᒃᑕᕐᕕᒃ ᐱᓕᕆᐊᖑᔪᒃᓴᖅ ᑖᒃᑯᑎᒎᓇᖅ ᐱᒻᒪᕆᐅᓪᓗᓂ ᐊᓂᒍᖅᑎᑕᑦᑎᒍᑦ," ᐅᖃᓚᐅᖅᐳᖅ ᒥᓂᔅᑕ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓐᓄᓪᓗ ᑕᐃᕕᑦ ᐊᕿᐊᕈᖅ. "ᐱᓕᕆᕝᕕᒐ ᓯᕗᒻᒧᐊᒃᐸᓪᓕᐊᖏᓐᓇᕐᒪᑦ ᐱᕙᓪᓕᐊᑎᑦᑎᓪᓗᑎᒃ ᖃᓄᑐᐃᓐᓇᑦᑎᐊᖅ ᑐᓚᒃᑕᕐᕕᖕᒥ ᐊᐅᓚᑦᑎᔾᔪᑎᓄᑦ ᐸᕐᓇᐅᑎᑦ ᑖᓐᓇ ᐅᔾᔨᕐᓇᑦᑎᐊᖅᖢᓂ ᐊᐅᓚᔪᓐᓇᐅᑎᑖᖅ ᐊᑐᖅᑕᐅᔪᓐᓇᕐᓂᐊᕐᒪᑦ ᐃᑲᔫᑕᐅᑦᑎᐊᕐᓗᓂ ᐃᖃᓗᖕᒥᐅᓕᒫᓄᑦ."

ᓴᓇᔭᐅᓚᐅᕐᓂᖓ ᐃᖃᓗᖕᓂ ᐃᑎᔪᒃᑯᑦ ᑐᓚᒃᑕᕐᕕᒃ ᐱᒋᐊᖅᑕᐅᓚᐅᖅᓯᒪᕗᖅ ᔪᓚᐃ 2018-ᒥ ᐃᓚᒋᔭᐅᓪᓗᓂ ᑲᓇᑕᒥ−ᓄᓇᕗᒻᒥ ᐊᕕᒃᑐᖅᓯᒪᔪᓂᒃ ᐊᐅᓚᔪᓐᓇᐅᑎᓕᕆᔪᓄᑦ − ᑲᓇᑕᒥ ᐊᒻᒪ ᐊᕕᒃᑐᖅᓯᒪᔪᓂᒃ ᐱᓕᕆᐊᒃᓴᑦ ᐱᓕᕆᐊᖑᔪᓄᑦ. ᑐᓚᒃᑕᕐᕕᒃ ᐱᐊᓂᒃᑕᐅᓂᖓ ᐊᓪᓗᕆᐊᕐᓂᕐᔪᐊᕌᓘᕗᖅ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖃᓗᖕᓂ ᓄᓇᕘᓕᒫᒧᓪᓗ.
ᑐᓚᒃᑕᕐᕕᒃ ᐊᐅᓚᑦᑎᐊᓯᒋᐊᓛᕋᓱᒋᔭᐅᔪᖅ 2023-ᒥ ᓄᓇᓕᖕᒥᐅᑦ ᐅᒥᐊᕐᔪᐊᑕᐅᖕᒥᒃᐸᑕ. ᓄᓇᕗᑦ ᒐᕙᒪᒃᑯᑦ ᖁᔭᓕᕗᑦ ᑲᓇᑕᒥ ᒐᕙᒪᒃᑯᓐᓂ ᐱᓕᕆᖃᑕᐅᓚᐅᕐᓂᖏᓐᓄᑦ ᐱᓕᕆᑦᑎᐊᓚᐅᕐᓂᖏᓐᓄᓪᓗ ᐱᕙᓪᓕᐊᑎᑕᐅᑎᓪᓗᒍ ᐱᕐᔪᐊᕌᓘᓪᓗᓂ ᐅᑭᐅᖅᑕᖅᑐᒥ ᐊᐅᓚᔪᓐᓇᐅᑎᓄᑦ ᐱᐅᓯᒋᐊᕈᑎᒃᓴᑦ.

###

ᐱᕙᓪᓕᐊᔪᓂᑦ ᖃᐅᔨᒋᐊᕐᕕᒃᓴᑦ:

ᓱᓕᑳ ᑐᐊᐃᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ
867-975-5406
sduale1@gov.nu.ca

ᓰᐅᕋ ᓚᑉᓛᖕ
ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ
867-975-7818
sleblanc@gov.nu.ca