ᐊᖅᓴᕐᓃᑦ ᐃᓕᓐᓂᐊᕐᕕᒃ ᒪᑐᓯᒪᔪᖅ ᐅᖅᓱᐊᓗᒃᓱᓐᓂᓛᖀᓐᓇᕐᓂᖓᓄᑦ

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᐊᖅᓴᕐᓃᑦ ᐃᓕᓐᓂᐊᕐᕕᒃ ᒪᑐᓯᒪᔪᖅ ᐅᖅᓱᐊᓗᒃᓱᓐᓂᓛᖀᓐᓇᕐᓂᖓᓄᑦ

ᐃᖃᓗᐃᑦ, ᓄᓇᕗᑦ (ᕕᕗᐊᕆ 8, 2022) − ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᖃᑎᖃᖅᖢᑎᒃ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓂ ᐊᒻᒪ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᑦ ᐊᒻᒪ ᓇᓪᓕᐅᒃᑯᒫᓂᑦ ᖃᐅᔨᓴᖅᑎᓂᒃ, ᐅᓪᓗᒥ ᓄᑖᙳᕆᐊᖅᓯᒪᔪᓂᒃ ᑐᓴᖅᑎᑦᑎᖅᑲᐅᕗᑦ ᐃᖃᓗᖕᒥᐅᑦ ᐊᖅᓴᕐᓃᑦ ᐃᓕᓐᓂᐊᕐᕕᖕᒥ ᒪᑐᓯᒪᓂᖓᓂᒃ ᐅᖅᓱᐊᓗᒃᓱᓐᓃᓐᓇᕐᓂᖓᓄᑦ ᐅᖃᐅᓯᐅᓚᐅᖅᑎᓪᓗᒍ ᐱᔾᔪᑕᐅᔪᖅ ᐅᖅᓱᐊᓗᖕᒧᑦ ᐊᖅᑯᑖ ᖃᓱᓚᐅᕐᓂᖅᑎᓪᓗᒍ.

"ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᐃᖅᑲᓇᐃᔭᖅᑎᑦᑎᓚᐅᖅᐳᑦ ᐊᕙᑎᓕᕆᔨᒃᑯᓐᓂᙶᖅᑐᒥᒃ ᖃᐅᔨᓴᖅᑎᒋᔭᐅᔪᒪᓪᓗᓂ ᐃᓕᓐᓂᐊᕐᕕᐅᑉ ᐃᓗᐊᓂ ᐊᓂᖅᓵᖅᑐᑦᑎᐊᕐᓇᕐᓂᖓ ᐊᖅᓴᕐᓃᑦ ᐃᓕᓐᓂᐊᕐᕕᖕᒥ," ᐅᖃᓚᐅᖅᐳᖅ ᒥᓂᔅᑕ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄᑦ, ᑕᐃᕕᑎ ᔪᐊᓇᓯ. "ᐱᓕᕆᕝᕕᖕᒥᐅᑦ ᖃᐅᔨᓴᐃᓐᓇᕐᓂᐊᖅᑐᑦ ᖃᓄᐃᓕᕙᓪᓕᐊᔪᒥᒃ ᐋᖅᑭᒃᓯᔨᐅᓂᐊᖅᖢᑎᒡᓗ ᐃᓕᓐᓂᐊᕐᕕᒃ ᒪᒃᐱᒃᑲᓐᓂᕈᓐᓇᖅᓯᖕᒥᒃᐸᑦ ᒪᒃᐱᖅᑕᐅᒃᑲᓐᓂᓛᖁᓪᓗᒍ."

ᕿᑎᖅᑰᒻᒥ, ᕕᕗᐊᕆ 3-ᖑᑎᓪᓗᒍ, ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᑭᐅᓚᐅᖅᐳᑦ ᐊᖅᓴᕐᓃᑦ ᐃᓕᓐᓂᐊᕐᕕᖕᒥ ᐅᖅᓱᐊᓗᒃᓱᓐᓂᓛᕿᔪᖅ ᐱᔾᔪᑎᒋᓪᓗᒍ. ᑎᐱᐊᒍᑦ ᖃᐅᔨᔭᐅᑲᐅᑦᑐᕈᓐᓇᓚᐅᖅᑐᖅ ᐅᖅᓱᐊᓘᑉ ᐊᖅᑯᑖ ᖃᓱᖓᓂᖓᓂᒃ. ᖃᐅᔨᔭᐅᔪᖅ ᑕᐃᓐᓇ ᖃᓱᖓᓂᖓ ᐃᕐᖐᓐᓇᖅ ᓱᑲᒋᐊᖅᑕᐅᓚᐅᖅᐳᖅ ᐊᐅᓚᐅᑎᖃᕐᕕᒡᓗ ᓴᓗᒻᒪᖅᓴᖅᑕᐅᓪᓗᓂ, ᑭᓯᐊᓂ ᐃᓕᓐᓂᐊᕐᕕᒃ ᒪᑐᓯᒪᐃᓐᓇᓚᐅᖅᐳᖅ ᕕᕗᐊᕆ 4-ᖑᑎᓪᓗᒍ ᐅᖅᓱᐊᓗᒃᓱᓐᓃᓐᓇᕐᓂᖓᓄᑦ.

ᓇᒡᒐᔾᔭᐅᒥ, ᕕᕗᐊᕆ 7-ᖑᑎᓪᓗᒍ, ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᑦ ᐊᒻᒪ ᓇᓪᓕᐅᒃᑯᒫᓂᑦ ᖃᐅᔨᓴᖅᑏᑦ ᓴᖅᑭᑦᑎᓚᐅᖅᐳᑦ ᐱᓕᕆᐊᕆᔭᖅ ᓄᖅᑲᐅᔾᔭᐅᖁᓪᓗᒍ ᐊᖅᓴᕐᓃᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᕐᕕᐅᑉ ᐃᓗᐊᓂ ᐊᓂᖅᓵᖅᑐᑦᑎᐊᕐᓇᓚᐅᙱᓐᓂᖓᓄᑦ. ᐃᒪᐃᓕᖓᓕᓚᐅᖅᐳᕐᓕ, ᐃᓕᓐᓂᐊᕐᕕᒃ ᒪᑐᓯᒪᓕᖅᑐᖅ ᐃᖅᑲᓇᐃᔭᖅᑎᓄᑦ ᐃᓕᓐᓂᐊᖅᑎᓄᓪᓗ ᑭᓯᐊᓂ ᒪᒃᐱᕐᓂᕋᖅᑕᐅᒃᐸᑦ ᒪᒃᐱᒃᑲᓐᓂᓛᓕᖅᑐᖅ.

"ᐅᐱᒍᓱᑦᑎᐊᖅᐳᒍᑦ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᐊᒻᒪ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᑦ ᐊᒻᒪ ᓇᓪᓕᐅᒃᑯᒫᓂᑦ ᖃᐅᔨᓴᖅᑏᑦ ᐱᓕᕆᖃᑎᖃᕐᓂᖏᓐᓂᒃ ᐱᓕᕆᕝᕕᑦᑎᓐᓂ ᖃᐅᔨᒪᔪᒪᓪᓗᑎᒃ ᐃᖏᕐᕋᐃᓐᓇᐅᔭᖅᑐᖅ ᖃᓄᐃᙱᑦᑎᐊᕈᓯᖅ ᐊᑦᑕᕐᓇᖅᑕᐃᓕᒪᓂᕐᓗ ᐃᓕᓐᓂᐊᖅᑎᓄᑦ ᐃᖅᑲᓇᐃᔭᖅᑎᓄᓪᓗ ᐊᖅᓴᕐᓃᑦ ᐃᓕᓐᓂᐊᕐᕕᖕᒥ," ᐅᖃᓚᐅᖅᐳᖅ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᒥᓂᔅᑕ, ᐹᒥᓚ ᒍᕌᔅ. "ᐊᓕᐊᓇᐃᒋᑦᑎᐊᕐᒥᔭᕗᑦ ᐃᖃᓗᖕᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦᑕ ᐃᑲᔪᖅᓱᐃᑦᑎᐊᕐᓂᖏᓐᓄᑦ ᐊᖅᓴᕐᓃᑦ ᐃᓕᓐᓂᐊᕐᕕᖕᒥ. ᖃᐅᔨᒫᓂᒃᑲᑦᑕ ᐃᓕᓐᓂᐊᖅᑏᑦ ᐊᖅᓴᕐᓃᑦᒥ ᖃᔅᓰᖅᓱᑲᓪᓚᒃᖢᑎᒃ ᐸᒡᕕᓇᖅᑐᒃᑰᖃᑦᑕᖅᓯᒪᖕᒪᑕ ᐃᓕᓐᓂᓪᓗᐊᖅᑕᒥᓄᑦ ᐱᓇᓱᐊᕈᓯᕐᓂᒃ ᖃᔅᓯᐊᕐᔪᖕᓂᒃ ᐊᓂᒍᖅᑐᓂᒃ. ᓂᕆᐅᒃᑲᓗᐊᖅᐳᒍᑦ ᓈᒻᒪᙱᓪᓕᐅᕈᑕᐅᔪᖅ ᐋᖅᑭᒃᑕᐅᑲᐅᑦᑐᖁᓪᓗᒍ ᐃᓕᓐᓂᐊᖅᑎᑦ ᐃᓕᓐᓂᐊᒃᑲᓐᓂᕈᓐᓇᕐᓂᐊᕐᒪᑕ ᐊᑦᑕᕐᓇᖅᑐᒃᑰᙱᓪᓗᑎᒃ."

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᑲᑎᒪᖃᑎᖃᓛᖅᑐᑦ ᐃᓕᓐᓂᐊᕐᓂᓕᕆᔨᒃᑯᓐᓂ ᐊᒻᒪ ᐃᖃᓗᖕᓂ ᐃᓕᓐᓂᐊᕐᓂᓕᕆᔨᒃᑯᑦ ᑲᑎᒪᔨᖏᓐᓂᒃ ᐱᖓᑦᓯᕐᒥ, ᕕᕗᐊᕆ 9-ᖑᓕᖅᐸᑦ ᓄᑖᙳᕆᐊᖅᓯᒪᔪᓂᒃ ᑐᓴᖅᑎᑕᐅᓛᕐᒪᑕ ᖃᓄᐃᓕᖓᓕᕐᓂᖓᓂᒃ ᐊᖅᓴᕐᓃᑦ ᐃᓕᓐᓂᐊᕐᕕᒃ.

###

ᐱᕙᓪᓕᐊᔪᓂᑦ ᖃᐅᔨᒋᐊᕐᕕᒃᓴᑦ:

ᕌᓄᓪ ᒍᐃᓚᕋᓐ
ᑐᓴᐅᒪᔪᓕᕆᔨᒻᒪᕆᒃ
ᓄᓇᓕᖕᓂ ᐊᒻᒪ ᒐᕙᒪᒃᑯᓐᓂᓪᓗᑦ ᐱᔨᑦᑎᕋᖅᑎᒃᑯᑦ               
867-975-5342
cgscomms@gov.nu.ca

ᑐᕈᐊᐃ ᕉᑦᔅ
ᑐᓴᒐᒃᓴᓕᕆᔨᓄᑦ ᐅᖃᐅᔾᔪᐃᔨᒻᒪᕆᒃ
ᐃᓕᓐᓂᐊᕐᓂᓕᕆᔨᒃᑯᓐᓂ
867-975-5680
info.edu@gov.nu.ca