ᐅᖅᓱᐊᓗᖕᒧᑦ ᓂᐅᕐᕈᑕᐅᕙᒃᑐᓄᑦ ᓴᓇᕝᕕᒃ

ᐅᖅᓱᐊᓗᓕᕆᔨᒃᑯᑦ ᑲᒪᒋᔭᖃᖅᑐᑦ ᓂᐅᕕᖅᑕᐅᓂᖏᓐᓄᑦ ᑎᑭᑎᑕᐅᓂᖓᓄᑦ, ᑐᖅᑯᖅᑕᐅᓂᖏᓐᓄᑦ, ᓂᐅᕕᐊᔅᓴᐅᓂᖏᓐᓄᑦ, ᐊᒻᒪ ᑐᓂᐅᖅᑲᖅᑕᐅᓂᖏᓐᓄᑦ ᐅᖅᓱᐊᓗᔅᓴᔭᐃᑦ ᓄᓇᕗᒻᒥ. ᐊᖓᔪᖅᑳᖃᕐᕕᖏᑦ ᐃᓂᖃᖅᑐᑦ ᑲᖏᕐᖠᓂᕐᒥ ᐱᖓᓱᓂᒃ ᓄᓇᓕᖕᓂ ᐊᕕᒃᑐᖅᓯᒪᓂᐅᔪᓂ ᑎᑎᕋᕐᕕᖃᕐᖢᑎᒃ ᐃᓂᖃᖅᑐᓂᑦ ᒥᑦᑎᒪᑕᓕᒃ, ᐃᖃᓗᒃᑑᑦᓯᐊᖅ ᐊᒻᒪ ᑲᖏᕐᖠᓂᖅ. ᐅᖅᓱᐊᓗᓕᕆᔨᒃᑯᑦ ᑲᒪᒋᔭᖃᖅᑐᑦ ᐊᐅᓚᑦᑎᓂᕐᒥᒃ ᐃᒪᓐᓇᐸᓗᒃ $190 ᒥᓕᐊᓐ ᐃᓗᐃᑦᑑᓪᓗᒋᑦ ᐅᖅᓱᐊᓗᒃ ᑐᖅᑯᖅᑕᐅᓯᒪᕝᕕᖕᓂ ᐱᖁᑎᑦ ᓂᐅᕕᖅᑎᑦᑎᕙᒃ:ᑎᒃᓗ ᐃᒪᓐᓇᐸᓗᒃ 210 ᒥᓕᐊᓐ ᓖᑕᑦ ᐅᖅᓱᐊᓗᖕᓂᒃ ᐊᔾᔨᒌᖏᑦᑐᓄᑦ ᐊᑐᖅᑎᓄᑦ ᐃᓚᐅᓪᓗᑎᒃ ᒐᕙᒪᒃᑯᑦ, ᓇᖕᒥᓂᖃᖅᑐᑦ, ᖃᖓᑕᓲᓕᕆᔨᒃᑯᑦ, ᐃᒡᓗᓂᒃ ᓇᖕᒥᓂᓖᑦ ᐊᒻᒪ ᑭᒃᑯᑐᐃᓐᓇᑦ. 

ᐅᖅᓱᐊᓗᓕᕆᔨᒃᑯᑦ ᐊᐅᓚᓂᖃᓲᑦ ᑕᐃᑰᓇᖅ ᑮᓇᐅᔭᑦ ᐅᑎᖅᑕᖅᑐᑦ ᐱᖁᔭᖓᑎᒍᑦ (ᐱᖁᔭᖅ). ᐱᖁᔭᖅ ᓴᖅᑭᑎᑦᑎᓪᓗᓂ ᐅᖅᓱᐊᓗᖕᓄᑦ ᑮᓇᐅᔭᑦ ᐊᐅᓚᔾᔪᑎᒃᓴᓂᑦ, ᐱᑎᑦᑎᔪᓂᒃ $250 ᒥᓕᐊᓐ ᐊᔪᙱᑦᑐᓄᑦ ᐊᑭᑐᔪᓄᑦ ᑮᓇᐅᔭᓕᕆᓗᒍ ᐅᖅᓱᐊᓗᓕᕆᔨᒃᑯᑦ ᖃᐅᔨᓴᕈᑎᖏᑦ, ᑮᓇᐅᔭᑦ ᐅᑎᖅᑐᒃᓴᑦ ᐊᑭᓕᐅᑎᓪᓗ. ᐅᖅᓱᐊᓗᓕᕆᔨᒃᑯᑦ ᐅᑎᖅᑎᕙᒃᖢᑎᒃ ᐱᓕᕆᐊᒃᓴᓄᑦ ᐊᑭᖏᓐᓂᒃ ᓂᐅᕕᐊᒃᓴᖃᕐᓂᒃᑯᑦ ᐅᖅᓱᐊᓗᖕᓂᒃ ᐱᔭᕆᐊᖃᖅᑎᑕᐅᓪᓗᑎᒃᓗ ᓇᓕᒧᒌᓕᖅᑎᓪᓗᒋᑦ ᑮᓇᐅᔭᓕᕆᔾᔪᑎᑦ ᐊᑐᖃᑦᑕᖅᑕᖏᓐᓂ. ᐊᓯᔾᔨᖅᐸᖕᓂᖏᓐᓄᑦ ᐅᖅᓱᐊᓗᒃ ᐊᑭᖏᑦ ᓄᓇᕐᔪᐊᒥ ᓂᐅᕕᐊᒃᓴᖃᖅᑎᓂ, ᐅᖅᓱᐊᓗᖕᓄᑦ ᐋᖅᑭᒃᓯᒪᑦᑎᐊᖅᑎᑦᑎᓇᓱᖕᓂᖅ ᑮᓇᐅᔭᖃᖅᑎᑕᐅᔾᔪᑎ ᐱᑎᑦᑎᓪᓗᓂ ᐃᓂᖃᕐᓂᕐᒥᒃ ᐅᖅᓱᐊᓗᓕᕆᔨᒃᑯᑦ ᐊᕐᕌᒍᑕᒫᖅᓯᐅᑦ ᑮᓇᐅᔭᑦ ᐊᒥᐊᒃᑯᑦ ᐊᒻᒪ ᐊᑭᓕᒃᓴᑦ. ᐋᖅᑭᒃᓯᒪᑦᑎᐊᖅᑎᑦᑎᓇᓱᖕᓂᕐᒧᑦ ᑮᓇᐅᔭᖃᖅᑎᑕᐅᔾᔪᑎ ᐊᓯᔾᔨᕈᓐᓇᖅᑐᖅ +/- $10 ᒥᓕᐊᓐ ᐱᐅᓯᒋᐊᖅᑎᑦᑎᓗᓂᓗ ᐅᖅᓱᐊᓗᓕᕆᔨᒃᑯᑦ ᐱᔪᓐᓇᕐᓂᖓᓂᒃ ᐋᖅᑭᒋᐊᖅᑎᓪᓗᒋᑦ ᐅᖅᓱᐊᓗᒃ ᐊᑭᖏᑦ.