ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᒥᓂᔅᑕᖓᑦ

ᔮᓐ ᒪᐃᓐ ᓂᕈᐊᖅᑕᐅᓕᖅᑭᔪᔪᖅ ᐃᓕᔭᐅᑐᐃᓐᓇᖅᑐᓂ ᑭᒡᒐᑐᕐᓂᐊᕐᓗᓂ ᐊᕐᕕᐊᑦ ᐅᐊᓐᓇᖓᓂᒃ ᑎᑭᕋᕐᔪᐊᒥᓪᓗ 6−ᖓᓐᓂ ᓄᓇᕗᒻᒥᑦ ᒪᓕᒐᓕᐅᕐᕕᖓᓂᑦ.

ᔮᓐ ᒪᐃᓐ ᓂᕈᐊᖅᑕᐅᔪᒻᒥᔪᖅ ᓯᕗᓕᖅᑎᑦ ᑲᑎᒪᔨᖏᓐᓄᑦ ᓅᕕᐱᕆ 17, 2021ᒥ, ᓂᕈᐊᕐᓂᖃᖅᑎᓪᓗᒋᑦ ᓯᕗᓕᖅᑎᑦᓴᓂᒃ. ᐊᖏᖅᑎᑕᐅᓕᓚᐅᖅᑐᖅ ᐃᓂᒥᓄᑦ ᓅᕕᐱᕆ 19, 2021ᒥ. ᑭᒡᒐᑐᐃᓂᐊᓕᖅᑐᖅ ᓯᕗᓕᖅᑎᒋᔭᐅᓗᓂ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ.

ᔮᓐ ᒪᐃᓐ ᒪᓕᒐᓕᐅᖅᑎᑐᐃᓐᓇᐅᓚᐅᖅᑐᖅ ᑕᓪᓕᒪᖓᓐᓂ ᒪᓕᒐᓕᐅᕐᕕᒻᒥᑦ, ᐃᒃᓯᕙᐅᑕᐅᕙᓚᐅᖅᑐᓂ ᑲᑎᒪᔨᕋᓛᓄᑦ ᒪᓕᒐᓕᕆᓂᕐᒥᒃ, ᐃᒃᓯᕙᐅᑕᐅᓪᓗᓂᓗ ᕿᒥᕐᕈᒋᐊᒃᑲᓐᓂᓂᕐᒧᑦ ᒐᕙᒪᒃᑯᑦ ᐊᐅᓚᓂᖏᓐᓂᒃ ᐊᒻᒪᓗ ᖃᓄᐃᑦᑐᑦᓴᐅᓂᖏᓐᓂᒃ ᐊᒻᒪᓗ ᐃᒃᓯᕙᐅᑕᐅᒋᓪᓗᓂ ᑲᑎᒪᔨᑐᐃᓐᓇᐃᑦ ᑲᑎᒪᔨᖏᓐᓂ.

ᔮᓐ ᒪᐃᓐ ᐱᕈᖅᓴᓂᑰᔪᖅ ᐊᕐᕕᐊᓂ. ᐱᐊᓂᒃᑲᒥ ᐃᓕᓐᓂᐊᕐᕕᐊᓗᖕᒥ, ᐃᓕᓐᓂᐊᕆᐊᓚᐅᖅᓯᒪᔪᖅ ᒪᐅᓐ ᐋᓕᓴᓐ ᐃᓕᓐᓂᐊᕐᕕᓗᒻᒥ (Mount Allison University), ᐱᐊᓂᒃᖢᓂ 2002ᒥ ᐃᓕᑕᕆᔭᐅᔾᔪᑎᒥᒃ ᑮᓇᐅᔭᓕᐅᕈᑎᒃᓴᓕᕆᓂᕐᒧᑦ. ᔮᓐ ᒪᐃᓐ ᑲᓇᑕᐅᑉ ᓯᓚᑖᓂ ᐃᓕᓐᓂᐊᖅᓯᒪᓂᖓ ᐱᖃᓯᐅᑎᓯᒪᔪᖅ ᐃᓕᓐᓂᐊᕐᓇᒥ ᐋᔅᓗ, ᓄᐊᐅᐃ-ᒥ, ᐊᒻᒪᓗ ᐱᓕᒻᒪᓴᒃᓯᓐᓈᖅᖢᓂ ᓄᓇᕐᔪᐊᕐᒥ ᑲᑐᔾᔨᖃᑎᒌᒃᑯᑦ ᑎᒥᖁᑎᖓᓐᓂ ᐃᓕᓐᓂᐊᕐᓂᕐᒧᑦ, ᖃᐅᔨᓴᓐᓂᕐᒧᓪᓗ ᐊᒻᒪ ᐃᓕᖅᑯᓯᓕᕆᓂᕐᒧᑦ ᐱᐅᕆᔅ, ᕗᕌᓐᓯᒥ.

ᔮᓐ ᒪᐃᓐ ᐃᖅᑲᓇᐃᔮᖃᖃᑦᑕᕐᓂᑰᔪᖅ. ᑏᕖᒃᑯᑦ ᐱᕙᓪᓕᐊᔪᓕᕆᔨᐅᓯᒪᓪᓗᓂ ᓰᐲᓰ−ᑯᓐᓂ ᐅᑭᐅᖅᑕᖅᑐᒥ, ᐱᕙᓪᓕᐊᔪᓕᕆᔨᐅᓯᒪᓪᓗᓂᓗ ᐊᕐᕕᐊᑦ ᕼᐋᒻᓚᒃᑯᖏᓐᓂ ᐊᒻᒪᓗ ᐊᕕᑦᑐᖅᓯᒪᓂᕐᒥ ᐱᔭᑦᓴᓕᕆᔨᐅᓪᓗᓂ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖓᓐᓄᑦ. ᓂᕈᐊᖅᑕᐅᓚᐅᕋᓂ ᓱᓕ, ᔮᓐ ᒪᐃᓐ ᓇᒻᒥᓂᖁᑎᖃᓚᐅᖅᓯᒪᔪᖅ ᐱᕙᓪᓕᐊᔪᓕᕆᓂᕐᒧᑦ ᐅᖃᐅᔾᔨᒋᐊᖅᑎᐅᓪᓗᓂ.

ᔮᓐ ᒪᐃᓐ ᐊᖏᔪᖅᑳᕆᔭᐅᓯᒪᒻᒥᔪᖅ ᑭᕙᓪᓕᕐᒥ ᓇᒻᒥᓂᖁᑎᖃᖅᑐᐃᑦ ᑲᑐᔾᔨᖃᑎᒌᒃᑯᓐᓂ ᐊᒻᒪᓗ ᑲᑎᒪᔨᐅᖃᑕᐅᓂᑰᓪᓗᓂ ᓄᓇᕗᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐸᕇᓴᒃᑯᓐᓂ. ᔮᓐ ᒪᐃᓐ ᐱᓇᓱᒻᒪᕆᓐᓂᑰᔪᖅ ᐊᑭᓕᖅᓱᖅᑕᐅᒐᓂ ᐃᓄᒻᒪᕇᑦ ᓂᔾᔭᐅᓯᔭᓐᓂᕐᒧᑦ ᑲᑎᓐᓂᐅᕙᑦᑐᒥᑦ ᐊᕐᕕᐊᓂᓗ ᑕᕐᕆᔭᐅᓯᓕᕆᔨᖏᓐᓂ, ᕼᐅᕙᒎᖅ ᓈᓚᐅᓯᓕᕆᔨᓄᑦ ᐊᒻᒪᓗ ᐅᕕᒃᑲᐃᑦ ᕼᐋᑭᖅᑎᖏᓐᓄᑦ ᐊᕐᕕᐊᓂ ᖃᒪᓂᑦᑐᐊᕐᒥᓗ.

ᔮᓐ ᐊᒻᒪᓗ ᐊᒫᓐᑕ Hᐊᓐᓴᓐ ᒪᐃᓐ ᕿᑐᕐᖓᖃᖅᑑᒃ ᐊᒡᒐᔅᑕᔅ, ᒪᐃᕝ ᐊᒻᒪᓗ ᐅᑎᓐᒥ. ᔮᓐ ᒪᐃᓐ ᐱᒃᑯᒋᔭᖃᖅᑐᖅ ᐊᖑᓇᓱᓐᓂᕐᒥᒃ, ᐃᖃᓗᒐᓱᓐᓂᒥᓪᓗ, ᓄᑦᑕᓂᕐᒥᒃ ᐊᒻᒪᓗ ᐱᓐᖑᐊᖅᑎᐅᓂᕐᒥᒃ.