ᐱᓕᕆᐊᒃᓴᑦ, ᑐᕌᖅᑕᐅᓇᓱᐊᖅᑐᑦ, ᐱᒻᒪᕆᐅᒋᔭᖏᓪᓗ
ᓂᕆᐅᒋᔭᐅᔪᑦ
ᓂᕆᐅᒋᔭᕗᑦ ᐅᓄᕐᓂᖅᓴᓂᑦ ᐃᓕᓐᓂᐊᑦᑎᐊᖅᓯᒪᔪᓂᒃ ᐊᒻᒪᓗ ᓇᖕᒥᓂᖅᓱᕈᓐᓇᖅᑐᓂᑦ ᓄᓇᕗᒻᒥᐅᓂᑦ. ᑐᕌᒐᕆᔭᕗᑦ ᖁᑦᑎᖕᓂᖅᓴᓂᒥᒃ ᐃᓕᓐᓂᐊᕐᕕᖕᒥᑦ ᐃᓱᓕᑦᑎᔪᑦ ᐅᓄᕐᓂᖏᑦ ᓇᓕᒧᓐᓂᖃᕐᓗᑎᒃ ᑲᓇᑕᒥᐅᓄᑦ ᐊᒻᒪᓗ ᐅᓄᕐᓂᖅᓴᑦ ᓄᓇᕗᒻᒥᐅᑦ ᒪᒃᑯᒃᑐᑦ ᐃᓱᓕᑦᑎᓗᑎᒃ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ, ᓯᓚᑦᑐᖅᓴᕐᕕᖕᒥ ᓯᓚᑦᑐᖅᓴᕐᕕᒡᔪᐊᒥᓘᓐᓃᑦ, ᐊᒻᒪᓗ ᐊᔾᔨᒋᓗᓂᒋᑦ ᐱᔪᓐᓇᕐᓂᖏᑦ, ᖃᐅᔨᒪᓂᖏᑦ ᐊᒻᒪᓗ ᐊᔪᖖᒋᓐᓂᖏᑦ ᐱᔭᕇᖅᓯᓯᒪᓗᑎᒃ ᓇᓂᑐᐃᓐᓇᖅ ᑲᓇᑕᒥ.
ᓂᕆᐅᒋᕙᕗᑦ ᐅᓄᕐᓂᕐᓴᑦ ᓄᓇᕗᒻᒥᐅᑦ ᐃᖅᑲᓇᐃᔭᕐᓗᑎᒃ ᐱᔪᓐᓇᖅᑑᓗᑎᒃ ᐱᒡᒍᔪᑎᑐᑦ ᐊᒻᒪᓗ ᐱᓕᒻᒪᒃᓯᒪᔪᓂᑦ ᓴᓇᔨᓪᓚᕆᖕᓂᑦ ᐃᖅᑲᓇᐃᔭᖅᑐᑦ ᑭᒃᑯᑐᐃᓐᓇᕐᓄᑦ ᐃᖅᑲᓇᐃᔭᕐᕕᖕᓂ, ᐅᔭᕋᖕᓂᐊᕐᕕᖕᓂ ᐊᒻᒪᓗ ᐃᖃᓗᒐᓱᒃᑎᐅᓂᕐᒥ ᐊᒻᒪᓗ ᒥᑭᓐᓂᖅᓴᓄᑦ ᐱᓂᓯᖃᕐᕕᖕᓄᑦ ᓲᕐᓗ ᓴᓇᕈᓘᔭᖅᑏᑦ ᐊᒻᒪ ᐳᓚᕋᖅᑐᓕᕆᓂᖅ ᓄᓇᕗᒻᒥ.
ᐱᔪᒪᔪᒍᑦ ᒪᕐᕉᖕᓂᒃ ᐅᖃᐅᓯᓕᖕᓄᑦ ᐃᓄᒃᑐᑦ ᐅᖃᓪᓚᓲᓂᒃ ᐃᓕᓴᐃᔨᓂᑦ ᐃᑲᔪᕋᖅᑐᓂᑦ ᒪᕐᕉᖕᓂᒃ ᐅᖃᐅᓯᖃᕐᓂᕐᒥ ᐃᓕᓐᓂᐊᖅᑎᖁᑎᑦᑎᓐᓄᑦ. ᒪᕐᕉᖕᓂᒃ ᐅᖃᐅᓯᖃᕐᓂᕐᒥ ᐃᓕᓐᓂᐊᕐᓂᖅ ᐱᑎᑦᑎᓲᖑᖕᒪᑦ ᐊᓐᓇᐅᒪᓂᕐᒥᑦ, ᐊᑐᕐᓂᖅ ᐊᒻᒪᓗ ᖁᕝᕙᓯᒡᓕᒋᐊᖅᑎᑦᑎᓂᕐᒥᑦ ᐃᓄᒃᑐᑦ ᐊᒻᒪ ᐃᑲᔪᕐᖢᓂ ᓄᓇᕗᒻᒥᐅᓂᑦ ᐱᔨᑦᑎᕋᖅᑕᐅᔪᓐᓇᕐᓂᕐᒥᑦ ᐅᖃᐅᓯᑦᑎᒍᑦ.
ᑎᓕᓯᔾᔪᑕᐅᓯᒪᔪᑦ
ᑎᓕᔭᐅᓯᒪᒐᑦᑕ ᓂᕈᐊᖅᑕᐅᓯᒪᔪᒧᑦ ᐃᓕᓐᓂᐊᖅᑐᓕᕆᔨᑯᓐᓄᑦ ᐋᖅᑭᒃᓯᓂᕐᒥᑦ ᖃᓄᐃᖖᖏᑦᑎᐊᕐᑐᒥᑦ, ᓴᖖᒋᔪᒥᒃ, ᐊᒻᒪᓗ ᐆᒻᒪᕆᒃᑐᒥᑦ ᓄᓇᕗᒻᒥ. ᐃᓕᓐᓂᐊᕐᓂᖅ ᒪᑐᐃᖅᓯᓂᐅᖕᒪᑦ ᑲᔪᓯᑦᑎᐊᕐᓂᕐᒧᑦ. ᑐᓂᓯᒪᕗᒍᑦ ᐱᓕᕆᔭᕆᐊᒃᓴᖅ ᓯᕗᒻᒧᐊᒃᑎᑦᑎᓂᐊᕐᑐᒥᑦ ᐱᓪᓚᑦᑖᒧᑦ ᐊᒻᒪᓗ ᓴᖅᑭᔮᖅᑐᒃᑯᑦ ᐊᑑᑎᔪᓂᒃ ᓄᓇᕗᒻᒥᐅᓄᑦ ᓴᖅᑮᓗᑕ ᐊᒥᒐᖖᒋᑦᑐᓂᒃ ᐃᓕᓐᐊᕐᓂᕐᓂᑦ ᐊᒻᒪᓗ ᐱᓕᒻᒪᒃᓴᓂᕐᒥᒃ ᐱᕕᒃᓴᐅᔪᓂᑦ. ᑐᕌᒐᕆᔭᕗᑦ ᓴᖅᑮᓂᕐᒥᑦ ᓇᖕᒥᓂᖅᓯᕈᓐᓇᕐᓂᕐᒥᑦ ᐊᒻᒪᓗ ᐃᖅᑲᓇᐃᔭᖅᑐᑦ ᐃᑲᔪᕐᓗᑕ ᑲᒪᑦᑎᐊᕐᓂᕐᒥᑦ ᐃᓕᑦᑎᕙᓪᓕᐊᓂᕐᒧᑦ ᐊᕙᑎᓕᖕᒥᑦ ᐱᔪᒪᓕᖅᑎᑦᑎᓲᖅ ᖁᕝᕙᓯᖕᓂᖅᓴᒥᑦ ᑲᔪᓯᑦᑎᐊᕐᓂᕐᒥᑦ, ᑎᒍᒥᐊᖅᑕᐅᓗᓂ ᐃᓄᐃᑦ ᐃᓕᖅᑯᓯᑐᖃᖏᑎᒍᑦ ᐊᒻᒪᓗ ᐱᒻᒪᕆᐅᒋᔭᖏᓐᓄᑦ.